|
الزواج الالكتروني
بسم الله الرحمن الرحيم
اعضاء منتدى الاسرة والمجتمع,السلام عليكم ورحمه الله وبركاته~ احببت ان اخذ رأيكم في موضوع صديقة لي تبلغ من العمر 32 عام ,لم يسبق لها الزواج ,فنصحتهآ احدى زميلاتنا في العمل بالتسجيل في موقع العفاف ,وهو موقع محافظ وتحت اشراف المنظمة العالمية للشباب الاسلامي,, صديقتي اخذت الموضوع بجدية وقامت بالتسجيل,,ولكن تخشى من المستقبل ونظرة شريك الحياة لها لو حصل لهم ارتباط من هذا الموقع..(علما انه موقع محافظ) لكن قد تبقى نظرة الرجل الشرقي.. -رأيكم بهذا الموضوع؟؟؟ (رأي الرجال بشكل خاص) -هل سبق ان سمعتم بنجاح زواج عن طريق هذا الموقع؟؟ دمتم بحفظ الله ورعايته.. |
اختي الكريمه
اغلب الشباب اللي يدخلون هذه المواقع يا يكونو لعابين ولا ولا معددين قليلين منهم اللي يكون جاد وصادق اهم شي اذا تبي النصيحه لاتكثر تواصل مع الرجال في الموقع ... تضع رووس اقلام عن صفاتها وطباعها واذا حست انه فيه من الرجال المتقدمين صادق تعطيه رقم الاهل الثابت او جوال ابوها ولو يكون تسجيلها بعلم اهلها افضل حتى يكونو بالصوره لاتقول تستحي البنت طقت ال30 وان شاء الله ربي يرزقها بزوج صالح سواء عن طريق الموقع ولا غيره |
اشكرك اخي الكريم على ابداء رايك..
وصديقتي من مجتمع يحكم على فتاة الـ30 بالعجوز وانها لا تصلح للزواج,تقضي بقية حياتها في تربية ابناء اخواتها واخوانها ,وهذا ما يحصل معها حاليااا , هي طلبت رأيي لكن انا اخشى ان اوفقهاا واله لا يكتب لها السعادة واشعر بالذنب ان لي يد في الموضوع,, ولا اريد ان ارفض الفكرة فيكون الموضوع فيه خيره واكون قطعت عنها الخيره بسبب رأيي .. التوفيق اولا واخيرآ بيد الله سبحانه .. اشكرك مرة اخرى اخي الكريم .. انتظر مشاركة بقية الاعضاء بالموضوع |
السلام عليكم ورحمة الله وبركاته
إذا هي مصرة على تسجيلها بالموقع ,ياليت ماتذكر انها هي تقول قريبه لي أو تسجل باسم رجل عشان مايتمادى احد معها وتكون بعيدة عن الشك بالمستقبل ..وتشرط ان لايذكر لاهلها عن الموقع ماحد يرضى على بنته. ومثل المواقع على حسب مانسمع قليل فيها الصادقين ,,الله يرزقها بعيد عن هالمواقع .. |
عن جد مجتمع متخلف وش وصلت ال30 تصبح عجوز وش هاذي الافكار الرجعيه الله يرزقها انشاء الله من حيث لا تعلم
|
غناتي الغاليه
بوصيج وصاه وان شالله بتفيدج عزيزتي في كل مكان الزين والشين والانسان يسعى بالنيه بس صديقتج لو قدمت عند الخطابه موب عيب لانها ادور النص الاخر بس لجات للمواقع في هالحال مااقدر احكم بهالشي وبترك المايك للي بعدي |
نعم ليش لا ممكن يكون زواج ناجح
انا اعرف وحدة شخصياً مسجلة في هالموقع وهي استخارت قبل لاتسجل وفعلاً لقت من يتقدم لها ويناسبها وكمان ازيدكم من الشعر بيت ملتزم وخلوق بشهادة الناس له وسؤال اهلها عنه بس هي ذكية وفطينة تفهم الصادق والجد من الكاذب واللعاب والله يوفقها ويتمم عليها بجد انا مبسوطه عشانها لان مايجونها خطاب وقالت لي اغلب الموجودين ماعندهم اهل يدورون لهم وافضل يدخلون هذا الموقع القائمين عليه الثقات من المشايخ وبالذات انه الموقع يحذف اي رسائل مخلة ولايلجؤون للخطابات الكاذبات اللي ماهمهم الا التزويج لاجل الفلوس انا قلت هذه التجربة لاني شاهدتها بعيني وسمعتها باذني خليها تستخير ربها وتقدم ومابيصير لها الا كل الخير ولاتنسى الدعاء * |
تستخير الله .... أولا وأخيراً لانه يعلم ما فيه صلاح دينها ودنياها
|
اول شي تستخير
وبعدين انا اشوف انها نفس الخطابه اهم شي جمع راسين بالحلال والله يوفق الجميع |
هلا فيك ,,
انا انصحها انها ما ترتبط بالطريقه هذي لأن الرجال لو شافوا اي شي على الزوجه جلس يتكلم ويذكرها بالماضي ,, ويقول لها كذا وكذا ,, الله يرزقها بالزوج الصالح |
هو عادي لكن زي ماقلتي الشاب الشرقي مايتقبل هذا الشي
والله يرزقها بالزوج الصالح يآآرب : ) |
بصراحه ماانصحها وهي وصلت سن لازم تلحق ع عمرها لان فرصتها بالإنجاب قد تقل او قد تضعف وأتوقع هالحكي حكي علمي شوفي اختي أنا انصحها ع كذا انها اجل تعطي رقمها خطابه احسن من انها تحط مواصفاتها بموقع والكل يطلع عليها بس الافضل تحكي لاحد من اهلها عن الموضوع
والله يكتب لها اللي فيه الخير ويرزقها بالزوج الصالح يارب |
أسأل الله أن يرزقها زوجا صالحا في القريب من الطريق الذي فيه الخير عليها باللجوء إلى الله بالدعاء وكثرة الاستغفار والتقرب إليه بما يرضيه |
والله البنات انحبسوا بالبيوت وما صارو يحبون الطلعات فهذا في نظري مكان الخاطبة فقط ان الموضوع أصبح مواكب للزمن والتطور
لكن على الفتاة الحرص من نشر المعلومات الخاصة بها فقط التواصل عن طريق الأهل وبعد ذلك لا مشكلة الله يوفق المسلمين اجمع |
المشكله مو نظرة الرجل الشرقي ع قولتك لها
المشكله مين اللي راح يكون صادق ويتقدم لها الله يعوضها خير ويرزقها باللي تحب و تتمنى والله حزنت عليها فمان الله / |
والله أنا ما انصحها أبدا
ماني مقتنعة ان فيه رجال مو لاقي احد يخطب له اللي مقتنعة فيه ان الرجال يدخلون المواقع هاذي بس للتسلية و التعارف يضحكون ع البنات .. نادر تلاقين واحد فيهم جاد الله يرزقها و يعوض صبرها خير يارب |
هعععع ليش كذا متخصص بهالموقع
انا رجل وتزوجت منه بصراحه اللي تزوجتها ماكانت هي اللي مسجله معلمتها هي اللي مسجله لها والى اليوم البنت ماتدري انا من مجتمع بدوي ومحافظ وماكنت افكر بهالمواقع واسمع عنها امور سيئة وسجلت بثلاث مواقع للاختبار العفاف نجح بنسبة 100 % تواصلت مع فتيات ولم يكتب الله شيء انا كما انني مافيني عيب يخلي مااحد يزوجني وجيت للموقع بسبب قناعتي فانظر للمراه التي تدخل الموقع انها لاعيب فيها وانها جاءت بسبب قناعاتها وربما ظروف فبعض الناس ليس لديهم معارف او تريد اختيار الزوج بشكل مباشر او تكون تقبل بالمعدد ولكن الرجال لايعرفون هالشيء فمايخطبها احد الى درجة ان بعض البنات لما يخطبها احد تقول لاهله خلوه يسجل بالموقع ونتراسل نتعرف على شخصياتنا اتحدى احد يقدر يتعرف عن طريق هالموقع وارجو من اللي ماجربه لايتكلم بما لايعرف رايي تتوكل على الله واللئيم لئيم سواءا تزوج عن طريق الموقع او بدونه بس تكون صادقه وماتكثر طلبات ,,, |
يمكن انت واحد من نسبة خمسة بالمية اللي جادين
اما الباقي يفتح الله أنا برضو سجلت بموقع العفاف جلست فترة ما انكر فيه رجال أسلوبهم دغري و بايين جادين بس النوايا محد داري بها ولاني من الاصل مب مقتنعة بالطريقة سحبت عضويتي رغم أني ودي اختار شريكي بشكل مباشر لكن المواقع هاذي قلة اللي فيها جادين وحتي ان كان جاد يدور الزمن و يذكرك انه مأخذك من نت .. ليه يبو و ممكن يكون جاد بالزواج لكن كل مواصفاته خرطي وماهو كفو محد رضا فيه قال اضحك ع البنت تحبني و تشوفني غزال وهو بالاصل قرد رب العباد موجود و ما بيضيع خلقه و ع فكرة ما اقصد موقع العفاف انه للتعارف فيه مواقع ثانية يتم فيها تبادل الايميلات و الأرقام ارجع و اقول مالك بهم الرجال اللي بعقله ما يفكر يتزوج من النت الا في أضيق الحدود والظروف لكن البنت ضعيفة تكون جادة و مصدقة ان بياخذها وان كل حكيه صدق |
دام فيه احتمال 5% تتزوج تتوكل ع الله
ليش تمتنع ,,, دام مافيه ضرر الانسان يفعل الاسباب ,,,,,,, |
انا مع الزواج من هذه المواقع بشرط ان يكونوا الاهل على علم ويشرف على المراسلات اخوها او ابوها انا اعرف شاب تزوج من احد هذه المواقع وذالك لظروفه الخاصه امه صار عليها حادث واصبحت معاقة الله يشفيها وما عنده اخوات وقريباته اكثرهم بعيدات عن ديرته صار ما عنده خيار غير الزواج من مثل ذي المواقع وفعلا تزوج وحياته جدا مستقره |
وأنا كمان من المسجلين في الموقع الحمدلله وجدت البنت اللي كنت أتمناها وخطبت عن طريق الموقع والملكة بإذن الله قريبة وأهلي زاروهم وتعرفوا عليهم مع أنهم ماهم من مدينتنا ولامنطقتنا لكن سبحان الله تيسرت الأمور والموقع شهادة حق من أفضل مواقع الزواج لأني سجلت في أكثر من موقع لكن سبحان الله احس الموقع هذا ربي كاتب فيه البركة لأن القائمين عليه مشائخ وهو تابع للندوة العالمية للشباب الاسلامي
بس نصيحة مني للبنت اللي بتسجيل أنا وجدت نصيبي وسجلت لإحدى قريباتي وجدت بعض الرجال كذابين بعظهم وليس كلهم اتواصل مع الشخص ويوم أقول له عطني عملك وين بالتفصيل حتى أسأل عنك ساعتها يبدأ يلف ويدور وبعظهم يكون متزوج ومايسجل انه متزوج ويوم أقول له أبي عنوانك بسأل عنك وأحاول أبين له اني ساكن في منطقة وأقول له باقابلك اللي واثق وجاد مابيتردد لكن تواصلت مع أكثر من واحد اغلبهم وقت الجد يتردد واغلب اللي في الموقع يرغب التعدد بس هذا ليس عام متأكد واثق أن الجادين كثير ولكن على البنت أن تكون حازمة وجادة لاتحاول تخوض في أسئلة وحديث بدون فائدة ولو تعرف أحد تثق فيه تقدر تكلمه بيسهل عليها الموضوع أكثر والخطابات أنا تواصلت معاهم ولكن اغلبهم هدف مادي واحيانا تبالغ في وصف الفتاة أو الشاب وهذا الكلام عن تجربة شخصية وموضوع أن الرجال عنده اهله بيخطبوا له بعض الرجال مايبي من أقاربه أو مدينته وأنا كذا كنت شايل فكرة الزواج من مدينتي وسجلت في الموقع بعد استخاره والحمدلله أشعر بالراحة فاللهم لك الحمد طبعاً أبو البنت سأل عني في العمل وسأل عن قبيلتي وجلس معي وتكلمنا كثير وارتاح لي وأنا ارتحت لحرصه الشديد على بنته هو طبعاً مايعرف عن الموقع شي ربي يسرها بطرق أخرى حبيت انقل تجربتي للفائدة وربي يوفق ويسعد كل بنت وشاب |
الله يوفقها يارب ويرزقها عاجلاً غير آجل بالزوج الصالح
خليها تستخير واذا سجلت خليها تخبر امها ولا احد اخواتها وربي يكتب لها الخير |
وش تربي عيال غيرها؟؟! هم يجيبون وهي تربي؟؟؟ الله مايرضاها
لاحول ولا قوة الابالله؛ وربي ظلم ! مع الاسف نظرت المجتمع مرات تدمر البنت ؛ الله يفرج عنها ويرزقها الرجل الصالح الي يعوضها خير يارب |
| الساعة الآن 07:16 PM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©