|
عندي فرصة أسبوع .. انصحوني
السلام عليكم لولا ثقتي بمنتداكم لما عرضت مشكلتي فيه .. . . . اليوم الوالد عرض عليي و فرش كل خياراته .. فلاني تقدملك و فلاني و فلاني .. أول اثنين استبعدهم الوالد لأنه الأول منهم اللي تارك والدته ما يشوفها إلا كل كم من شهر مرة و سمعنا عنو إنو يسكر.. و الثاني سافر يدرس بعثة و رجع بدون شهادة .. يعني بالمختصر شكله متعود ما يلتزم بالوعود.. الثالث .. اللي هو كان صدمة حياتي !! صدمتي كانت أكبر مما توقعت .. هو قريبي فيه كل الصفات الحلوة و دايمًا معروف عنه راعي فزعات بس المشكلة إنه ( أصغر مني) بسنة وحدة .. و هو أحد أعز أصدقاء أخوي الأصغر مني و الفضيحة إني كنت أعده زي أخوي و أسلم عليه بالكلام و كان يوصلني ويا أخوي للدوام أنا شكيت حتى إني سألت أخواتي قلت يمكن الولد غصبوه أهله مستحيل يختار وحدة أكبر منه و الدنيا مليانة بنات أصغر مني و حلوات .. بس حسب كلامهم و اللي فهمته إنه الولد يحبني مرة و ضغط على أهله إنهم يتقدمولي خصوصًا لما عرف إنه المتقدم الأول طلب يدي .. لو تسألوني تحبيه أو لا .. و الله ما جربت أحب و ما أعرف من الصدمة مو قادرة أفكر .. أنا خايفة من إني أتزوجه و أبين كبيرة و هو وجهه مرة طفولي .. و بسرعة أتكرفت و أعجز و أخاف أرفضه و أعنس خصوصًا إنه كل اللي بعمري اتزوجوا .. الوالد عطاني فرصة استخير لمدة أسبوع قلت له ما أبغى استعجل في اتخاذ قراري.. و جدًا خايفة .. انصحوني .. |
ياشيخه بلا تفكير
الولد يحبك وشاريك انسي العمر ترا العمر لا يقدم ولا ياخر خواتي اكبر من ازواجهن بخمس بعشر سنوات وعايشات مبسوطات ومحد جاب طاري عمرك وعمري استخيري وتوكلي علا الله الله يوووفقك |
شوفي حبيبتي فيه موضوع بهالقسم مثبت اللي هو مفضلة عالم المقبلين ع الزواج وراح تلقين كذا موضوع عن فارق السن وفيه اشياء كثيره راح تستفيدين منها باذن الله
وانا عن رايي اذا الرجال كويس لاتلتفتين للعمر واستخيري ثم استخيري ثم استخيري وربي ماراح يخيبك باذن الله بالتوفييييييق ياقمر |
ياستي انا تقدم لي شاب اصغر مني بسنة وكااان مقتنع تماااماً بي بل كان يحبني وانا تفاجئت من حبه ومشاعره لكن اهله هم من فرقوا بيننا
عاادي يااختي دامه يحبك لاتفرطي فيه |
اقتباس:
أنا خايفة من نظرة الناس .. خصوصًا إنه العيلة كانوا متوقعينه يكون لفلانة قريبتي .. و فجأة راح ينصدمون إنه يحب وحدة أكبر منه (اللي هي أنا) .. أحس إني بكون في موقف لا أحسد عليه لدرجة إني أفكر إني إذا وافقت أؤجل الخطوبة لحد قبل الملكة بأسبوع أو أسبوعين قاعدة استخير .. و مرة خايفة .. حتى مو قادرة أركز في شغلي من الصدمة |
وافقي يالغلاااا بعد ماترتاحين بالاستخارة وتسألون عن اخلاقه ’,~
وبالعكس لما الكل متوقع يكون لغيرك وهو جاء وخطبك انتي هذا فخر لك ياحيااتي ’,~ والعمر سنة واحدة مو فارقة كثير وفيه ناس يتزوجون وبينهم سنوات واللي صفاتهم حلوة ماراح تلاقينهم بكل شي كاملين ومثل مانتمنى وهذي سنة الحياة يعني الواحد فيه صفتين حلوة والثالثة لا بس الحكمة انو اذا نقدر نتجاوز نفعل وامااا السابقين فعلااا مع والداك حق بالرفض’,~ وموفقة ومبرووووووووك مقدماااا والله يكتب لك الخير ,~ |
اختي اولا استخيري وهو اكبر منك بسنه وحده
يمكن اكبر منه انتي بس يمكن شكلك صغير ماحد يعطيك عمرك وانتي وش دخلك بالعالم اهم شي انتي مقتنعه وهو مقتنع دامه قدر يقنع اهله فهذا واضح انو شارييك ويبيك ولا تفكرين أخاف وأخاف وأخاف طيب تقدموا لك اكبر منه ومنك شفتيهم كفوا ويستاهلونك وبعدين انتي اكبر منه بسنه مو سنوات وواضح انو اهلك مرحبين بالموضوع استخيري وابعدي كل الوساويس من راسك وخليك واثقه من نفسك وبس وبأ تفكرين باي سي ثاني والله يكتب اللي فيه الخير يارب |
والله الموضوع حبيبتي مافيه تفكير والهم الي في بالك استخيري واتوكلي عل الله دام انه شاريكي ويحبك هذا شئ والشئ الثاني ماعليكي من كلام الناس ارضاؤهم غايه لاتدرك وش عرفهم وش في نفسيه الواحد وكمان شغله انتي اكبر منه بسنه قدوتك الرسول عليه الصلاه والسلام شوفي الفرق بينه وبين خديجه رضي الله عنها وش كثر لاتصعبي الموضوع وتكدري خاطرك استخيري وشيلي كل ذي الافكار من راسك والله يكتبلك اللي في الخير000
|
اقتباس:
قريت المواضيع كلها تقريبًا اللي تخص الفوارق العمرية و ادعيلي قاعدة استخير و الحمدلله أحس براحة مبدئية |
الله يوووووووفقك ياقمر ويكتبلك الي فيه الخير ويريح بالك وقلبي معااااااااااك عاد طمنيني عليك اوكي
|
الله يكتب لك الخير ياقلبي .,~
وماعليكي من نظرة الناس وتفكيرهم ترى لو دققتي كتير ح تتعبي والله يخترلك الافضل ولنا والجميع يارب .,~ دمتي بووود =) |
مادامك إستخرت خلى أمورك على الله ييسرلك اللي فيه الخيرة لك مع الأخذ بالاسباب الله يوفقك لما فيه خير دينك ودنياك |
اقتباس:
و يوم جيت حسبتها .. لقيت في تكافؤ بيننا إجتماعي و تكافؤ مستوى التفكير و تكافؤ مادي أكثر من الناس اللي تقدمولي الحين و قبل .. أنا بعد .. كثير بنات بالعيلة كانوا متوقعينه لفلانة أو فلانة .. بس أتوقع إنه الخبر بيكون صدمة للكل عشان جيه بطلب من الأهل أول شي إنهم يرفضون اللي تقدموا قبل .. بدون ذكر الثالث .. عشان لا تستوي مشاكل بينه و بين الخطيب الأول .. و لا يحسبون إنهم إنرفضوا بسببه .. و يخبرون الثالث بالموافقة بس بدون أي إعلان لين ما يكوّن نفسه لأنه توه توظف .. و قبل الملكة بإسبوع نعلن الخطوبة .. |
اقتباس:
و نعم بالله .. الكمال لله وحده .. |
ياشيخه استخيري
الرجال شكله بجد معجب مافيها شي سنه مو كثير |
اقتباس:
الولد مثل ماقلتي يحبك وشاريك مافيها شي لو أنتي أكبر منه وعلى فكره هي سنه وحده بس يعني تفكيركم راح يكون قريب من بعض أستخيري الله ولا تخلي همك كلام الناس في النهايه راح تعيشي معاه في بيت واحد الله يوفقك / |
اقتباس:
بس بديت أقتنع إنه مو كل شي بالمظاهر .. أهم شي إنه أختارني عن اقتناع و حب .. رحت و تأكدت مرة ثانية من أختي اللي هي تصير زوجة أخوه الكبير إنه هو اللي اختارني و لا أهله اللي جبروه .. و أكدتلي عن طريق زوجها إنه هو اللي يباني من زمان بس كان مخطط يكوّن نفسه بالأول و لمدة سنة لأنه توه اشتغل و بعدها يخطبني .. شكرًا أختي و الله لا يحرمني منكم دوم |
اقتباس:
يا رب .. أنا خلاص ما عدت أفكر في الموضوع .. بس أفكر كيف أخلي أهلي و أهله ما ينشرون الخبر .. لأني متأكدة إنه الوالد من الفرحة بينسى نفسه و بيعلن الخبر .. و أنا ما أبغى الموضوع يطول بعد الخطوبة .. فعشان كذا بحاول إنهم يؤجلوا حفلة الخطوبة لحد قبل موعد الملكة بأسبوع إن شاء الله |
اقتباس:
شكرًا أختي زهرة الرمان |
اقتباس:
أختي الكبيرة نصحتني بعدم الاستعجال في الموافقة .. قالت أهم شي يكون في ( قبول و رضا) امبينكم يعني لو تكون في شوفة شرعية أو مكالمة في حدود الشرع مب لأني مب عارفة شكله أو هو مب عارف شكلي .. إحنا عارفين بعض بس عشان ع قولتها (يؤدم بينكما) ما أدري شو رايكم ؟ (على فكرة لسه ما رديت عالوالد .. منتظر ردي بس قلتله ما أبى استعجل عطني وقت أكثر) |
| الساعة الآن 02:26 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©