|
حياتي تتحول الى جحيم بسبب أمي و جنون زوجي .....
حياتي الزوجية كانت في قمة السعادة و التوافق مع زوجي ..
احب زوجي الى درجة العشق و زوجي بعد يبادلني الشعور أوضاعنا المادية بتحسن الحمدلله .. ما ينغص حياتي الا عدم انجابي مع محاولاتنا الجهيده أنا و زوجي و من طبيب لآخر لكن النتيجة وحده وهي مني و كلهم اجمعوا ان الإنجاب بيد الله في حالتي و كل العلاج ما هو الا محاولات قد تنجح بنسبة لا تتعدي 15٪ فقط .. طبعا هذا اكبر الم يعترض حياتي و خاصة مع معرفتي ان وضعي ميؤس منه و لكن يبقي أملنا بالله .. رحت اشتكي لأمي اللي فاجأتني بانبسااااطها التام و قالت لي انها تدعي الله ليل و نهار ان لا يرزقني بذرية من زوجي ...!!! و قالت انها تدور لي عريس ....!!! كانت صدمة كبيرة لي ،، يعني كل هذا بسبب دعاء أمي ( مع ان ما فيه احد من عائلتي أمي و أخواتي و خالاتي و عماتي بعد عانت من اللي أعاني منه من عدم انجاب ) ... فقالت لي أمي انها واثقة ان هذا عدم رضاها عني ... و فوق هذا تعرضني لزواج و أنا متزوجة ؟؟؟ من ابن صديقتها و قالت لهم أني على وشك طلاق و اعتبر شبه مطلقة ... و بتأكيد من اخوي لهم ... ام زوجي سمعت الكلام من مجالس الحريم .. و ثارت لابنها و اتهمتني بشرفي و نقلت الكلام لعمي و زوجي .. زوجي عرف ان هذا من أمي و بمساندة من اخوي .. و منعني من اهلي نهايياً ... و ثار كالمجنون و راح لاخوي و تجادلوا و صارت بينهم مضاربة و حاول زوجي بعدها قتل اخوي .. ينتظره الى ما يطلع من البيت وحاول دعسه بالسيارة اكثر من مرة و بسرعة مجنونة .. كبر الموضوع و راح اخوي يبلغ عليه و سجن زوجي كم يوم و جاء جدي و حل الموضوع ... أمي و ابوي جوني ببيتي عشان ياخذوني معهم .. أنا رفضت اروح او اطلع من بيتي لان زوجي ما كان موجود و اصلا أنا ما ابغي اطلق و لا ابغي الموضوع يكبر .. ابوي احترم رغبتي و سكت .. لكن أمي انفجرت تسب و تشتم و تدعي علي و تقسم انها ما راح تتركني مع زوجي لو كان اخر يوم بحياتها على حد قولها ...! و تقول انها راح تزوجني افضل من زوجي و ان العريس جاهز ...!!! و راح يعيشني بترف ... مادري ويش هالعريس اللي تارك البنات العزاب و جاي يخطب متزوجة و ينتظر طلاقها ؟!!! زوجي الان يعيش بضغط كبير و ثائرة عنده الغيرة و الشك يفتح معي تحقيق كل ما طلع و رجع مين جا و ايش سويت و هو مو موجود ووووو ... و يقول أنا بوديك افضل طبيب و تتعالجي و أنا معك الي ما تحملي بس أني اصبري و راح احسن و ضغنا المادي و أريحك بس اصبري و كل يوم علي هالقضية ... الأمان بينا انعدم و زوجي صاير صعب جداً و أنا تعبت من الضغط حريتي صارت معدومة حتي بالنوم ما يرتاح ينام و أنا صاحية لازم اكون معه و لازم أنام عشان يهدا ... احس نفسيتي تنهاااار و مو عارفة احل الموضوع و ارجع حياتنا مثل ما كانت .. احيانا و الله افكر بالطلاق فعلا .. عشان أتخلص من كل هالضغوط و لا أتزوج بعدها .. |
امك غريبه الله يهديها!
طيب انتي ياخيه وشلون تزوجتي زوجك؟ اكيد امك كانت راضيه ولا لا وليه امك تتصرف كذا بعد زواجك؟ ممكن زوجك قام بتصرف ماهو حلو اتجاه امك لذلك هي شنة عليه كل هالهجوم! ياليت تجاوبين عشان على الاقل تكون الحلول المطروحه لك هنا تماشي وضعك ككل عموما ماحد له طاعه حاليا غير زوجك اما امك ادعي الله انه يهديها ويردها لرشدها ومن ناحية ضغوط زوجك ماعليه تحمليه هالفتره هو حاس انه بيفقدك بأي لحظه فلا تزيدين النار اللي بقلبه وحاولي تحتوينه بكل ماتقدرين وادعي الله كثيــــــــــــــــــــر ان ييسر امورك ان شاء الله الاخوان هنا مايقصرون معاك والله يكتب لك الخير يااااارب ويبعد عنك كل شر |
أتذكر قضيتك ياغزلان وظروف زواجك وانت تعلمين شدة كراهية أمك لزوجك وللسبب الذي تزوجتيه وارغم أمك على الموافقة لذلك لاأتوقع أن تتركك أمك حتى تتطلقي لكن أما من سبيل للتفاهم مع أبيك أن يوقف المسخرة التي تفعلها أمك ـ عذرا على الكلمة ـ من عرضك على ابن صديقتها وانت في ذمة رجل!! أما من دين وخوف من الله يردعها لابد أن يقف أبوك أمام هذا الجنون وزوجك لاألومه فما يحصل فوق تحمل أي رجل لديه كرامة .. وانا بصراحة أرى في زوجك صفات كثيرة تدل على رجولته من موضوعك السابق لذلك حاولي إحتواءه فالمسكين يقع تحت ضغط هائل ولن يخف إلا برؤية نقيض مايسمعه .. أسأل الله أن يفرج همك
|
الله يعينك ويهدي أمك
تصرفها فعلا مجنون تحملي زوجك شوي يا غزلان ... يستاهل توقفي معاه .. تذكري أنه الوضع مؤقت وخوفه هذا مؤقت ... غيرك عايشين بحياة الشك والغيرة على طول ومالها حل ولا يشوفولها نهاية ... استعيني بالقرءان والدعاء والاستغفار حتى تتحملي ظروفك أتذكر اخر موضوع لك كنتِ حاسه بضيقة بصدرك وعندك شعور أنه راح يصير مشاكل .. سبحان الله |
الغلط راكب أمك من راسها لساسها
الله يهديها ويصلحها ماتدري إنه اللي تسويه حرام ولا الكراهية أعمت عيونها لازم تكلمين أبوك يوقف أمك عند حدها ولا هذي مو عيشة بالله كيف تخطبك لشخص غريب وإنتي على ذمة واحد ؟؟! لا والزود أخوك مشارك بالسالفة بصراحة ماألوم زوجك باللي يسويه ؟ اجل يسمعون بمجالس الحريم إنك بتنخطبين عيييب والله وبالنسبة لزوجك وقفي معاه وحسسيه بالأمان و انتبهي تعصين أوامره او تطلعين من بيتك حتى لو غصبوك أهلك واكثري من الإستغفار عزيزتي والصدقة وربي يفرج همك ويرزقك الذرية الصالحة |
حياك الله اخت غزلان...اشتقنالك
...اول شي اكبر غلط انك رحتي واشتكيتي لامك من البدايه المفروض هذا الشي ماتطلعينه برا ويبقى سر بينك وبين زوجك خصوصا انك عارفه بالتوترات الي بينكم وبين اهلك.. ثانيا انا استغرب من تصرف امك واشك ان حكاية العريس هذي تاليف من راسها ولا من هذا الي امك تعزمه عليك وانتي متزوجه وهو عارف... وبالنسبه للحمل...ياعزيزتي الطب الحين تطور ومافي شي اسمه مستحيل...انتي بس روحي لاكبر وافضل مستشفى وان شاء الله تنحل مشكلتك من بعد الله.. وسالفة عدم رضا امك عنك وبسببها مارزقك الله ذريه...يااختي انتي متزوجه على سنة الله ورسوله وحتى لو امك مو راضيه في الشخص الي اخترتيه وماهي راضيه عنك لانك تزوجتيه هذا الشي ماله علاقه ابدا في الانجاب ولايمكن يكون عقاب من الله لانك تزوجتي واحد ماتبيه امك... بس هي جاتك من هذا الباب عشان تخوفك وتقنعك بالطلاق.. في ناس والديهم راضين عنهم تمام الرضا ومع ذلك لم ينجبوا... خليك بعيد عن اهلك واهله هذي الفتره واهم شي طاعة زوجك ورضاه عنك وماتسوين شي الا برضاه هو دامك متزوجته واهلك مالهم حق ابدا في تحديد حياتك على كيفهم .. ونصيحه مني اذا انتي سعيده مع زوجك ومرتاحين وهو يحبك لاتسمحين لاي كائن كان يعكر صفوكم ويخرب حياتك...الحين صعب جدا الوحده تلقى رجل يحميها ويثمنها ويحترمها.. |
لاتطلبين الطلاق ابدا مهما كانت الضغوط والمشاكل وتذكري ان زوجك متمسك فيك لاخر لحظه رغم الي سووه فيه اهلك ورغم الضغوط الي عليه من كل جهه .ومع ان الطلاق بيده .وكان ممكن ينتقم منهم فيك وهو رجال مايعيبه شي..لكن لانه يحبك ويحترمك وعارف الصح من الغلط مافكر هالتفكير..فلا تصدمينه فيك وتطلبين الطلاق منه وتجرحينه.خصوصا انه الطلاق مستحيل يتم مهما هددت امك به الا اذا انتي طلبتيه بنفسك امام القاضي .وهذا انتي بديتي تفكرين في الطلاق للاسف..على بالك بترتاحين..
الضغوط والمشاكل الي انتوا فيها حلها بيدكم انتي وزوجك تقدرون تبعدونها عنكم باي طريقه حتى لو استدعى منكم الامر الى الانتقال من منزلكم لمنزل اخر او الانتقال الى منظقه اخرى وتغيير العنوان ..حتى لايتهجم عليكم احد وبكذاترتاحون ويرجع لكم الامان مثل اول..زوجك مايشك في هو يتصرف كذا لانه خايف عليك يجون ياخذونك وهو مايدري واذا اخذوك صعب يطلعك من عندهم..بيحطونك في سجن |
وابل الندى ..
أمي مو راضية عن زواجي كله .. و أنا ما ابغاها تزعل بصراحه و لا ابغي زوجي بعد يزعل لأني متضررة في كلا الحالتين .. بنت طيبة .. ابوي تااابع لامي بكل شي .. ما راح يسوي شي هي مو راضية عليه .. و زوجي مو مقصرة معه لكن أنا بعد تحت ضغط شديد و لازم يراعيني و يعرف هالشي مو يزيدني ضغط .. صاير عصبي كثير .. خالة بيتا ... أنا متحمله كثييير و صابرة لكن تعبت ... و معك حق كانت حاستي شغاله و استعجلت النكد و إحساس الضيقة قبل تصير المشكلة ... و الان خلاص تعبيت جدا .. روح المسا.. ادري انها غلطانة بس ويش نسوي معها .. ما تسمع لاحد و لازم كلامها يمشي باي طريقة و ابوي ما يقدر يخالفها .. |
مممم بعد ماقريت قصة زواجك
رجعت اقول لك طنشي الجميع وتقربي اكثر من زوجك وقولي له امر طلاقي بيدك انت وحدك زماحد يقدر يتصرف اي تصرف بمصيري كل اللي يسوونه مهاترات لاتودي ولا تجيب وياليت هالفترة ماتروحين لأهلك يكفي اطمئنانك عليهم عن طريق التلفون وكمان حاولي تتقربين من اخوك وتشرحين له ان ماله حق يسوي هالتصرفات ولازم يخاف الله في اللي يسويه هو وامك ومن ناحية تأخر انجابك لاتيأسين ياخيه محدثتك لي ست سنوات ما انجبت صار حمل مرتين عن طريق مشوار علاج متعب نفسيا وجسديا وفكل المرتين صار اجهاض وبعدها بثلاث سنوات فجأة طلعت حامل مع ان نسبة الحمل تكاد معدومه لولا فضل الله وكرمه بس الفرحه ماتمت وطاح الجنين وبعدها بشهر مباشره صار حمل رابع ونفس الكلام طاااااح ماكذب عليك النفسيه فالحضيض بس الحمدلله على كل حال لازم الواحد يتقرب من الله اكثر وسبحان الله كل ماصارت مصيبه استشعر حلاوة الايمان اكثر اسأل الله ان يرزقنا جميعا بالذريه الصالحه ويقر اعيننا بهم وياليت تطرحين مشكلة تأخر الانجاب فالقسم المخصص له عشان لو نقدر نفيدك بأي شي ماراح نقصر ان شاء الله وهناك ايضا دكتور او دكتورة تجيب على تساؤلاتك اذا حبيتي |
ليه الغرور .. يا هلا فيك و أنتم بعد واحشيني ..
أنا كنت أتكلم مع أمي افضفض لها لانها هي سألتني عن الحمل و عارفة هي أني عندي مشكلة فيه .. و هي لو تسمعي كيف تدعي علي اعوووذ بالله دعا فضيع و صراحة احس ان الله يستجيب لها .. لان كل خواتي حملوا بدون مشاكل و خالاتي الا انااا مرات احس بيأس من الحمل و احس مستحيل احمل ... و صح الطب تطور لكن ربنا مو رايد .. كل دكتور اروح له نفس كلام اللي قبله ، بعضهم يعطينا امل و بعضهم يقول نجرب و بعضهم ما يدري ايش السالفة و صعب جدا ننقل أنا و زوجي عشان شغل زوجي .. و العريس لا و الله أمي صادقة فيه ، و اعرفه أنا هو ابن صديقتها و زميل اخوي .. و أمي قايله لهم أني شبه مطلقه و اعتبر مطلقه ،. الله يسامحها حطتني بموقف بااايخ مع بيت عمي و زوجي و عطت ام زوجي فرصة تتكلم في و تألف القصص على كيفها أمي مو معتبره زوجي و لاهي معتبرتني متزوجة اصلا |
وابل الندي ..
زوجي عارف هالكلام لكن مادري ايش صار له من هالسالفة بالذااات مع أننا تعرضنا لاكثر من كذا .. لكن هالسالفة هي اللي قلبت كيانه قلت له ان ما احد له خص فينا و لا حد يقدر يفرض علينا شي بس هو متوتر و خاصة انه بادي مشروع و مشغول فيه .. و الإنجاب و الله تعبت من جد .. ابغي أجيب أطفال انشغل فيهم بدل الوحده اللي حاستها و الملل .. افكر فيهم طوووول الوقت لا ارادياً .. و احس أني ما استقر مع زوجي الا بالإنجاب ... و زاد وضعي سوء اليأس .. صراحة عندي ياس شديد من الحمل و أني مستحيل انجب و الله مو رايد لي أطفال .. احس بغصه كل ما شفت الاطفال ابغي لو وااااحد بس .. |
لاتجعلين لليأس مكان بقلبك
واقري قصص الاستغفار تلقينها بقوقل ملياااان قصص ودوري عن اسباب تأخر الحمل برضو فقوقل وياليت لو تقولين وش العله اللي فيك يمكن اي وحده من خبرتها تقدر تفيدك لو بالقليل |
الله يهدى امك بس مالك غير الدعااااااااااااااااااااااء يا اختى بهدايه امك وبقصه حملك اما زوجك صراحه ماينلام بس كمان انتى حاولى تخففى عليه بل الكلام الحلو وان شاء الله ربى يرزقك الذريه الصالحه ترى الطب اطور فى اطفال الانابيب والحقن المجهرى لاتيأسى والدعاء وحصنى نفسك وزوجك
|
لاحول ولاقوة إلا بالله . والله يااختي أنا قريت مواضيعك ولكن ماجاات فرصة وقتها ارد عليك . المشكلة الحقيقية في أبوك وشخصيته لو أنه له هيبة أو على الأقل كلمة ماوصلت هالأمور لها الدرجة . لكن الواضح أن زوجك شخصيته قووية يعني الحمدلله ماطلع مثل أبوه وعمه . عشان كذا نصيحة ماعليك من أمك الزم ماعليك زوجك وفي الإسلام رضاه مقدم على رضا أمك , ولاتخافين عدم إنجاابك ماله علاقة بدعوة أمك حبيبتي , هذي مسالة وقت والله يختبر إيمانكم . ولو أفترضنا إنك تطلقتي عشان تتخلصيين من المشاكل ولاتتزوجيين بعدها , لاحبيبتي بشخصية أمك وتسلطها حطي في عقلك ممكن تخليك سلعة تزوجك وتطلقك على كيفها لأنها ببسااطة مالقت حمر عين يوقفها عند حدها , ولاتملك من الخوف من الله الي يردعها عن فعل شي يغضبه . أنا أدري أنك تمريين باأزمة ومشكلة صعبة , بس لو أنا مكانك ماابيع زوجي وأتنازل عنه مهما كان , خااصة أنه يحبك ويحترمك ومحافظ عليك يعني رجل تأمنين حياتك معاه والشرع أوجب عليك طاعته في غير معصية . أبتعدوا هن مشاكل أسركم وأسستقلوا بحيااتكم لين الله يفرجها عليكم . ومسألة الإنجاب بيد الله أكثري من دعاء (رب لاتذرني فردا وأنت خيرا الوارثين ) والحالة النفسية عندك لها دور في الحمل . ونصيحة عليك بالدعاء في كل وقت وخاصة دعاء الكرب , وأكثري من الأستغفار , وخلك محسنة الظن بالله . والله راح يفرجها لاتخاافين طالما أحسنتي الظن بالله . وأقرأي عن قصص الأستغفار وفضل سورة البقرة . والله راح أدعي لك بان الله يفرجها عليك. ومثل ماقالت وابل الندى وش مشكلتك الي تعانين منها في الحمل , أنا مااحمل الا بعلااج مو من أول مرة . |
لا حول ولا قوة الا بالله يا اختى استعينى بالله وتقربى له سبحانه وليس امامك الا ترك مدينة امك والذهاب الى مدينة اخرى انت وزوجك وان لم تجدوا اذهبوا الى قرية جدكم فترة حتى يهدأ زوجك وتسلم امك بالآمر الواقع وتنصرف عنكم وربما هناك ومع راحتك النفسية يحدث الحمل بإذن الله تعالى وابحثى يا اختى على النت على الاشياء التى تزيد الخصوبة ان شا الله وتعالج العقم |
والله اشتقنا لك وذكرت من مده وقلت اخبار هالبنت يا رب تكون خير
حببوبه اجمل ما في الامر رغم كل ما تمرين فيه هو حب زوجك لك وخوفه من ان يفقدك هو من يعش الرعب وليس انتي اما عن الحمل فامره سهل ان شاء الله 15 بالميه او 90 بالميه كلو بامر الله سبحانه وتعالى شويه وصفات واكلات لك ولزوجك وان شاء الله يتم الامر قريبتي 8 سنوات ويأسو من الحمل والفضل من الله سبحانه وتعالى رزقت باربع اولاد الاهم هو مساندتك لزوجك في مشروعه ويدا بيد امك حاليا انسيها بريها كل مده واغلقي فمك زوجك معلش شادد شويه من الرعب اللي عايش فيه اقول لك ان شاء الله وقت ينجح المشروع رح تفرحو وتلتقو مع شوية مغذيات وتطلعي حامل ان شاء الله نشوة الفرح طالما انكم معصبين للظروف وما يحصل معكم لن يتم الامر ان شاء الله ما تمر هالسنه الاو تبشرينا انما ممكن اسألك سؤال صغير : ممكن نركز حاليا على المشروع وعلى زووجك ونرتب الاكل مع بعض من مغذيات وتجنب بعضها لا نفكر بالحمل انما نرتب له ونحضر امك تحبيها كثيرا وزوجك ايضا ولن تستطيعي حاليا ان تجمعي بينهم وقت زوجك ينجح في مشروعه بإذن الله ويزيد المال بين يديه امك وقتها من نفسها رح تتفاخر فيه امام الناس وتقول هذا زوج ابنتي سيأتي يوم وتقولي غرين قالت زوجك خائف نعطيه جرعه زياده من الحنان والحب والتصقي فيه هو حاليا مثل الطفل المتعلق بامه وما يحتاج الطفل الا الحب والضم للصدر والشعور بالامان وبهذا الوقت نحضر الاكل وما يجب ان نأكل المردقوش اكيد تعرفيه اذا ممكن انتم في الشتاء احصديه من الجبل او اطلبي من جدك ان يرسلو لك كل مده داومي عليه كل يوم وان كان يابس من عند العطار ملعقة صغيره مع عسك في ماء دافئ يا سلام يدفي ويغزي اكلك اكثره ليكن سمك واقرباءه ولو كان مشوي يكون افضل ابتعدي عن القرفه والكزبره في اكلاتك حاليا اقرباء السمك كالروبيان القريدس الاصداف البحريه انتي وزوجك اكثرو منها عافيه وهنا يا رب ووقت ان شاء الله يتم معكم المشروع على خير نشوة الفرح رح تحملي ان شاء الله ثم اهمسي لزوجك رساله مني ان دهس اخوكي ان مات اخوكي سيعدم زوجك وستخسرين الاثنين معا اهمسي له واخبريه انك لن تتركيه فكيف هو يريد ان يتركك ويذهب للسجن او للاعدام ولمن سيتركك |
هلا غزووله وين الغيبات يابنوته شوفي ياغزلان الأعضاء
ماقصروا كفو ووفوا بنصايحهم وانا اشوف احسن حل لك أنتي وزوجك انكم تهجوون من الديرة بكبرها لوكنتوا بالجنوب سافروا للشمال ولو كنتم بالشرقية سافروا للغربية وبكذا راح ترتاحون انتي وزوجك وتعيشوا حياتكم بالطول والعرض وتتفرغوا لحياتكم ومستقبلكم بالنسبة للحمل ماراح تحملي ونفسيتك كذا اسأليني انا مريت في حياتي بظروف صعبة في بداية زواجي الله ماكتب لي بحمل الا بعد 8 سنوات وبعد ماتحسنت ظروف زوجي وسافرنا واستقرينا مع بعض في بيت واحد واقسم بالله سافرت مع زوجي والدورة الشهرية كانت عليه كانت آخر دورة اشوفها بعد سفرنا حملت بعدها مباشرة الراحة النفسية لها دور كبير جدا في الحمل اذا بغيتي تحملي لازم تكون نفسيتك عال العال وبإذن الله راح تحملي وربنا يرزقك الذرية الصالحة بالنسبة لزوجك انتبهي عليه زين لايتهور ويسوي مشكلة مع اخوك او حتى مع الولد ابن صديقة امك انتبهي لايوزه الشيطان ويسوي شئ ماهو بطيب خليك مع زوجك وماعليك في اي احد غيرة وكل من زعل من اهلك مصيره يرضى بالنسبة لدعوات امك عليك ترى امك تدعي عليك بغير وجه حق والرزق من عند رب العالمين مو من عند امك حطي هاذا الشئ في بالك زيين واحسني الظن بالله واتركي عنك الوساوس اللي لاتودي ولا تجيب وانتبهي على بيتك وزوجك وربنا يرزقكم بالمال والبنون بإذن الله عز وجل في القريب العاجل . |
اقتباس:
حتى زوجي تكلف كثييير بالفحوصات والأدوية ... مرة يعطوني امل ومرة احبااااااط .. يقولوا عندي خلل في زلالية الرحم و مناعة ذاتية ضد الحيونات المنوية لزوجي يعني الرحم يحاربها ذاتيا و تموت وكلام كثييير .. استخدم ادوية بس ما فيه استجابة مادري ليش .. |
اقتباس:
|
اقتباس:
و هي تسوي كذا لا نها تشوف وضعي مع زوجي و تقارني يوضع اختي مع زوجها امي الحياة عندها فلوس ومنصب . هي تتازم لما تشوف وضعنا المادي و عمل زوجي و تكره اهل زوجي و زوجي و تعتقد اني مو عارفة مصلحة نفسي واني قاعدة اضيع عمري مع زوجي .. عشان كذا تبذل جهدها لطلاقي و رجوعي لها و تزوجني على حسب اعتقادها شخص مناسب و اكون مثل اختي .. انا مو مخليه زوجي لكن هو يضغط علي مثل امي تماما .. وهذا اتعبني كثيييير .. |
اقتباس:
و زوجي رافض ترك المدينة و معتبر الموضوع تحدي و خاصة ان شغله فيها صعب نتركها .. و ان شاء الله بنروح لجدي بعد كم يوم و بنقضى عندهم فترة خاطري والله اسكن عند جده و جد على طول.. اكيييد برتااااح كثير .. على الأقل لا اهلى ولا اهل زوجي هناك و لا نشوفهم .. و ناخذ حريتنا و يفرح جدي و جدتي و نونسهم .. لكن زوجي معارض و يقول لازم نفكر بالمستقبل .. و ربي يفرج علينا بالذرية عاجلاً غير اجل .. |
اقتباس:
انا بخير الحمدلله لكن شوية مشاكل تصير معنا ابعدتني عن النت الطبيب قالى ممنوع استخدم اي اعشاب خلال فترة العلاج عشان لا تفسد علينا مفعول الأدوية وتخربط الامور ... و معك حق انشغال زوجي و ضغوط حياتنا مخليه نفسيتي سيئة و محبطة و مشكلتنا يا خاله مو في اللقاء لكن في نتيجة اللقاء .. يااارب يسمع منك و اجي وابشرك اني حامل ياااارب .. و اخوي والله انه يستاهل .. لكن ايش نقول مسويلنا فيها انه زعلان لزعل امي و انه بار فيها وانا العاقة .. و تطاول على زوجي لولا تدخل جدي كان تقاتلوا .. ومبرووووك يا خله زواج ابنك .. شفت المقطع و شفت الحفيدة الحلوه ما شاء الله عليها و انتي بعد حليوه ماشاء الله مع الفستان و الرقصه ..:22: بس ما شفنا العريس الله يبارك له ..؟ |
اقتباس:
ما عليه اعذروني على الغيبة غصب عني .. ممكن فعلا نفسيتي لها دور يارب يفرجها و احمل بسرعة ياختي ما ابغى انتظر ثمان سنوات كثييرة و الله كثيييرة .. و تبغى الصراحة اني مو مستهينه بدعوات امي ابدا .. حتى لو ما غلطت و لو كانت بغير حق تبقى امي و رضاها مهم و واجب و لا زوجي ما راح يسوي شي لا هو ولا اخوي لأنهم وقعوهم تعهد بعدم التعرض لبعض اضافة لأبوي وعمي ما سكينهم ... لكن هو صاير عصبي و دقيق بكل شي يخصني و اذا زعلت و ناقشته يتعذر انه مو قاصد وانه وانه لكن يبقى ضغط متعب لي .. |
معلش حبيبتي هو مرعوب عليك لذلك يدقق وهو فعلا مش قاصد
ولكن لا يتصور الحياة من دونك لذلك هو خائف اعذريه وان شاء الله تحملي وقت تهدا نفسيتك يمكن وقت تكوني عند الجد والجده ترتاح نفسيتك وتبشرينا الراحه النفسيه لها دور كبير والفرح ايضااااااا طالما انتي هنا معنا ان شاء الله تكتبي وتخففي الضغط عن نفسك وترتاحي ونفسيتك تتحسن انتي قلبك طيب كتير وشعرت بتعلقك بوالدتك معلش زعلها مؤقت وان شاء الله وقت ينجح المشروع رح تتفاخر امك فيكي وبزوجك قبلك حبيبتي ما انا اللي كنت عم ارقص ان بحثتي عني بالفايس بوك او نتلوغ تقدري تتابعي اكثر الفرح والصور عقبال نفرح لك ببيبي قريبا |
اقتباس:
مشكلتك هذي تعتبر من المشاكل الغريبه الي تواجه الحمل والانجاب..والطب مايعرف لها سبب...وانا اول مره اسمه انه فيها صراحه ..شلون مناعه ذاتيه...خصوصا انه مافي ولااحد من اهلك صار معه كذا انتي عارفه انه عندك اعداء والاعداء ممكن يضرونك وانتي عارفه قد ايش هم حاولوا يمنعون هذا الزواج...صحيح هم اهلكم بس بعض الناس ايمانهم اعوذ بلله ضعيف ولاحطوا شي في راسهم مستحيل يشيلونه الا لما يصير الي هم يبونه.. انا انصحك تسوي برنامج رقيه شرعيه وتشربي موية زمزم وتتحصني وكل بعد صلاه اقراي على نفسك سورة البقره...باذن الواحد الاحد تتشافين .. امك دعاويها ربك ماراح يستجيب لها..لانك ماظلمتيها في شي ولانها مو من الناس الي ربي يستجيب لهم دعوه معروف استجابة الدعاء لها شروط...وانتي عارفه والدتك هل تتوفر فيها هذي الشروط... الله سبحنه وتعالى رحيم بعباده..وهو عالم بنية امك وعالم بنيتك.. والشي الي استغرب منه..انك قلتي تبين تروحين عند جدك...حيث انك ماتشوفين اهلكم هناك ولاراح يجون هم...انا بصراحه استغربت...هل معنى كلامك والي فهمته منك انه ابوك عمك مايزرون والديهم وقاطعينهم نهائيا...لاتقولين بسبب الي صار معكم.,,ترى مهما حصل ماتوصل لمقاطعة امه وابوه |
| الساعة الآن 07:11 PM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©