|
أرشدوني. زوجي بيتزوج.
لسلام عليكم أخوتي في الله.
مدري من وين أبدا بس حاسه إن براكين جوا صدري تشتعل الله يفرج همكم دلوني وجهوني خايفه ومتوتره السالفه اني أنا وزوجي حاليا في مكه نأخذ عمره وبن روح للمدينه لرجال تصرفاته مو طبيعيه قلبي قالي أمس بروح للحرم بقابل صديقي قلبي نعزني ولحقته للحرم لقيته جالس بلحاله وع إلجوال إلا أسمعه يتفق مع وحده ويقول لها حملي برنامج الواتس اب نتفاهم جيت جلست معه وتفاجأ وجلسنا نتكلم وقال أنا الشرع حللي أربع وانتي أم عيالي وأنا لازم اتزوج غلشان مااطيح ف الحرام وانتي مو مقصره بشهادة الجميع وهدي أكلمها اتفق معها على يوم أجي اخطبها وجبت رقمها من خطابه مطلقه وعندها بنتين وعمرها 2 6 أنا أنهرت بس مابينت له وهو قبل فتره جاب لي وظيفه وأنا مترردده فيها وهو متحمس لتوظيفي يقول غلشان تجيبين لك خدامه تسندك قلت له أنا شرطي تتحمل نص تكاليف الخادمه وأنت نصف وجلسنا نتناقش لين قام راح للفندق ورحت أخذت سبيع ودقيت عليه وأنا مهاره قلت له مااحللك تكلمها البيوت لها أبواب. ثم رجعت للفندقوان في الطريق رحت للصيدليه وقلت له أنا منهاره وعطاني حبوب بروزاك أكلت منها حبه وماجابت نتيجه أول مره أكلها. ودخلت وجلس يقول إنتي ليش شكلك زعلانه ليش ماتت هذا الاحترام حق الزوج أنا برجع للرياض إنتي بتخربين السفره أبرسلك لهلك. واللحين دخل يتحمم ومدري ؤش اسوي من جوىئ مكسوره ومنهاره وخايفه خوف مو طبيعي تكفون دلوني تكفون أرشدوني ؤش اسوي أخاف ارتكب حماقه اندم عليها. معليش أعذروني على ردائة التعبي |
يا توت يا قلبي
انتي الآن في مكه انزلي الحرم وصلي وادعي ربي يصبرك ويقويك لا تحرمي نفسك من العمره علشان كلام في الهواء ما صار منه شيء الى الآن زوجك ما بعد خطب ولا شافها .. هذا مجرد تفكير يفكر فيه افرغي غضبك وحزنك بصلاتك ودعواتك واذا عدتي الى بيتك تحتاجي الى جلسة مصارحة معه بكل هدوء |
له ينولك اللي في بالك يابنت ابو العمره أخذتها ؤالحمدلله تصارحنا أمس وقال إنتي كل شيء في حياتي بس حاجه ولازم أقضيها و رجعت أمس للحرم ودعيت الله مأشاء إن أدعو
|
فعلاً .. الصبر في مثل هذه الأمور هو الحل الوحيد .. دعي زوجك يخطط وأنت ألجائي لله وتوسلي إليه أن يلهمك الصبر وقوة التحمل..
زوجك شكلة مخطط لها من بدري وما باليد حيله .. وقال كلام طيب في حقك يعني مش لأنك مقصرة أسال الله ان يهديه .. |
جزاك الله خير عمرها 26 عذرا على الخطأ الله يثبتني
|
خذي نفس عميق ورددي الحمد للله كذا مرة واستخيري يمكن زواجه من الثانيه خير لكي ولا تتتسرعي وتتصرفي تصرف تندمي عليه بعدين ويمكن الموضوع كله مايتم اصبري ثم اصبري وادعي الله هو عارف الخير فين ولاتيئسي ولاتعلقي قلبك باحد ترى الرجال اذا شاف الزوجه متلهفه وخايفه يزيد بعناده خليه على راحته وانتي الجاي الى الله هو اعلم بحالك
|
الله يعينك ياااااااارب انزلي للحرم وادعي لله سبحانه الله يفرج همك ياااااااارب
|
الله يفرج همك حبيبتي ارفض ابكي قدامه قولي له ان مارض واحده تاخدك مني بيني له انك ضعيفه ومسكينه وانك ماتستغني عنه وانهاري قدامه وبكي صرخ لا تروح بيت هلك تترك وحده تري ينفد امر ويتزوجها
مهم لاتستسلم كون في بيت معه عشان مايقدر ياخد راحته في امور ازوج كما يشوفك حزين ومنهار لا تقول انا سوتلك كدا وانا سويت كداوانا وانا ولا تهدد بيني انك ضعيف وتحبي وماتقدر توشف معه وحده ثانيه سوي قدامه اضراب عن اكل كل مايطلع فيك ابكي اشتغل علي جانب العاطفي والجي لله في ثلث الاخير وكثيري الاستغفار |
أمين أمين أمين اللحين طلعنا لجده يبي يغير جو التوتر ويضغط على يقول ليش ماسولفين وأنا أحس ءوحي بتطلع
|
لا تستسلم نصيحه لا تبيني نفسك قوي طلعي القهر الا في قلبك وبكي قدامه وارفض بس لا تروح بيت اهلك
|
اقتباس:
يظن انك يجبلك ضرة شيء سهل وتتقبلينه بهالسرعة الله المستعان |
يبغي يوظفك عشان تصرفي على نفسك ...
ناس فاهمة التعدد غلط و المظلوم انتي و الثانية .. الله يعوضك و يصبرك ... |
اسئل الله انة يفرج همك
|
هو يبغاكي تروحي لاهلك وياخد راحته في الواتس اب والوظيفه عشان تشغلك وتصرفي على نفسك الظاهر مخطط لها من زماان سبحان الله بالسهولة هذى يجيبوا علينا وحدة ولا يهمهم غير متعتهم وراحتهم ونحن في ستين دهيه كله عشان متعة
الشرع ما يعرفوه الا في التعدد والله صح الرجال ماله امان ...كل يوم والتاني وحدة تقول زوجها بيتزوج عليها عشان حب التغير بس ..ماعندهم قناعة .. استغفر الله انا مقهووورة من الرجال |
حبيبة قلبي ادري ان الموضوع صعب تقبله
بس صدقيني لو فكرتي ان الرابح الاول انتي صدقيني راح ترتاحين زوجي كان يبي يطلق زوجته الاولى والحين بعد زواجه مني غير رأيه ويبي يرجعها يعني زواجه مني كان خير لها فكري عدل واستغلي الوضع تدللي واطلبي وخل يعطيج رضوة مبلغ وقدره استغلي الوضع لصالحج حبيبتي الله يصبر قلبج |
الله يشعدكم كلكم ولايحر قلوبكم يارب انصحوني تكفون ؤش اسوي معه. حتى النووم كله هواجس.
|
فرج الله همك ورزقك من حيث لا تحتسبين
قولى له مشاعرك الحقيقية و لا تكتمى فى نفسك ولا تأخذين مهدئات .... عيشى بطبيغتك كامرأة وعليك بالصلاة و الذكر و القرآن فهم بإذن الله شفاء للقلوب . |
لا تشغلى نفسك به ...... كثيرا
واهتمى بنفسك |
بروزاك مهدأ لا يضر وإن شاء الله يكون نافع في مثل حالتك ، لكن يجب تاخذيه في الصباح بعد الافطار وتداومي عليه كل يوم لحتى 3 اشهر ، وهو ليس حبة صداع تزيل الصداع بعد ساعة ساعتين لكن يظهر تاثيره بعد فترة من استخدامه ونصيحة لا تتركي الدوا الآن ، وما له تاثيرات ضارة ان شاء الله، سبق وجربته بعد فقداني لجنيني ونصحني به زوجي كونه طبيب وكلامي بناء على تجربة وكلام الطبيب
الله يريح بالك ومتل ما قالت لك الاخت المسلمة لا تجعليه اكبر همك واجعل حب الله ورسوله صلى الله عليه وسلم في المرتبة الاولى من قلبك و ابقي في بيتك ولا تتركيه وغالبا زوجك حابب التعدد فلو لم يتزوج الان سيتزوج لاحقا لذا مرني قلبك وعقلك على جعل نفسك الاهم في حياتك واحبي نفسك وفضليها على زوجك واكملي دراستك ان امكن واطلبي حقوقك كاملة غير منقوصة فهو يدفع للخادمة ليست مجبرة على مشاركته الدفع ونصيحة لكل الزوجات مهما احببت زوجك لا تحبيه اكثر مننفسك و لا تفضليه عليها فتخسري نفسك ثم زوجك بتركك واتباع شهواته وما شاء الله عليك انت امرأة صالحة وتقية احسبك كذلك ولن يصدر منك اي تهور اي طيش ان شاء الله وحافظي على حكمتك وهدوئك وذلك لا يعني ان ترحبي بالفكرة وتباركي له زواجه لكن لا تقومي بردة فعل كالبعض بترك البيت وهجران الزوج |
اقتباس:
لافض فوك :* قولي له مشاعرك الحقيقة أنتِ بشر ولك أحساس مو حجر أخرجي مافي نفسك حتى لاتظل غصة حبيسة جوفك من حقك أن تغضبي وأن تثوري أن تبكي أن تنفعلي لكن بالنهاية لاتجعلي الرجال هو أهم شيء بحياتك أو أول سبب للحياة عندك هذا مجرد شريك حياة وأنتِ لك حقوق كما له حقوق فلاتتنازلي عن حقوقك وإذا مقررة البقاء ضعي شروطك منذ الآن وكل رغباتك وماتريدين منه لاتجعلي الموضوع بدون أتفاق مسبق وشروط أحفظي حقك وحق أولادك :* |
استمري ع المهدئات والدعاء في جوف الليل،،،اطلبي منه رضاوه مبلغ وقدره ،،الحياة مو كلها زوج ،،الزوج اضافه لحياتك وليس حياتك كلها ،،اهتمي بنفسك ودلليلها ودللي عيالك،،اشغلي وقتك باشيا مفيده توظفي ،،اطلعي لزيارة الاهل والاصدقا،،اطلعي تمشي انتي وعيالك،،الله يهونها عليك ويرده لك عاجلاً غير اجل
|
جزاكم الله خير وآثابكم بكل حرف فلقد هدئت كلماتكم قليلا من روعي.
|
السلام عليكم ورحمة الله وبركاته...
الله يسهل أمرك ولكن إياك إن بدأت العمل أن تتحملي أية مصاريف فهذا سيعطيه المجال أكثر بالتوفيق ان شاء الله |
كان الله في عونك وفرج همك ورد الله لك زوجا كما كان
|
وعليكم السلام ورحمة الله وبركاته للجميع واسىل الله ان لايذيقكم مكروه وان يجزاكم عني كل خير. مستجداتي لازلت تحت رحمة رب العباد وزوجي امس قبل لاينام قلت له اسمع البيوت لها ابواب ؤلو حسيت انك تكلمها ولاتراسلها راح اكلم اهلها وماراح اسكت قال اصلا اخوها معطيني الرقم قلت لوها بنت حرام مأعطاك رقمها قال الا اصلا الدنيا تغيرت. بعدين دخل ينام وجيت انسدحت وقال ليش ماتسولفين قلت تعبانه وفيني النوم قام يبكي ويقول سامحيني انا ضلمتك وحلليني انتي مثل انتي ذهب ماراح القى زيك ومتحملتني وماراح افرط فيك واتمنى تقدرين رغبتي. انا وقتها بكيت واحس مشاعري جمدت ودخلت في حالة صمت مبطبق مادري وش ارد عليه وللحين الوضع عادي وصاير طيب ومتفهم و جواله مغلق ولا صامت وحط رقم سري ومأدري للحين وش اسوي. احس مخي في حالة شلل تام
|
الله يعينج ويفرج همج
باعتقادي احسن شي تسوينه انج تحقرينه و تكملين حياتج الزوج وانا اختج مؤ كل شي بالدنيا اعتقد راح يستمر بأفلام البكاء والتمسكن وارجع اقولج مرة ثانية لا تحطينه كل همج ابكي وفضفضي لرب العالمين صدقيني راح تلقين العجب العجاب الله يفرج همج ويجعل لج من كل ضيق فرج ومن كل هم مخرج ويرزقك من حيث لا تحتسبين |
والله مادري ايش اقولك بس الله يربط على قلبك ويصبرك لاتخلي زوجك كل همك وتفكيرك اشغلي نفسك والدنيا قصيرة وفانيه عيشي حياتك ولاتكدري على نفسك حقري وصغري الموضوع في نظرك وقولي انا مايهمني الدنيا وزينتها انا همي الاخرة والجنة اللي مافيها حزن او كدر ..
دوام الحال من المحال هذة مصيبة اصبري عليها واحمدي ربك ان المصيبه جات على قد كدا شوفي ابتلاات غيرك عشان تهون عليكي مصيبتك والزوج مو كل شئ في الدنيا ولا بتتوقف عليه حياتنا وسعادتنا فتشي عن السعادة حتلاقيها في اشياء كتييرة غير زوجك وانك تكوني الوحيدة عنده المثل يقول صغريها تصغر لاتنكدي على نفسك الزوج اللي يتزوج عليكي مايستاهل انك تحرقي اعصابك وقلبك عشانه خليه يتمتع وينبسط معاها لاتنشغلي بزوجك وزوجته وايش قالها وايش سوا معاها وايش جابلها ..عيشي لربك ولنفسك وابنك واهلك وزوجك اهتمي به ولا تنشغلي به اليوم الجمعة اسالي الله ان يفرغ عليكي صبرا ويجبر كسرك ويملاء قلبك سعادة |
دام الفكره جت في باله .. الشكوى لله ..
تمسكي بوظيفتك لاتخلينها .. واصرفي على نفسك من راتبك .. البيت والعيال عليه .. دام هو معترف انك مو مقصرة بيعرف قدرك بعدين وللعلم كلمة( انتي مو مقصرة وام عيالي ) كلهم يقولونها اذا فكروا بالزواج.. الحين ماينفع انك تكملين التقصير اذا انتي مقصرة .. خليك مثل ماانتي حتى لو تزوّج .. الآن فكري بنفسك وكيف تنمينها معنويا وماديا .. وهو طنشيه مشكلة بعض الريجيل يفكر لو انه بيتزوج ثانيه بيعيش ملك .. كل وحده تتسابق على دلاله وتنفيذ طلباته المفروض كل وحده تصير مثل ماهي دام الفاس طاح بالراس .. عشان مايتمادى تجيني لحظات اكره الريجيل من سوالفهم وجحداتهم واقلب على زوجي وهو ماله دخل : ( موفقه حبيبتي ... والآن فكري بنفسك وبس * |
مشكلة بعض الريجيل يفكر لو انه بيتزوج ثانيه بيعيش ملك .. كل وحده تتسابق على دلاله وتنفيذ طلباته
بالضبط هذا اللي يفكر فيه ما يدري المسكين ان كل وحدة تفكر بنفسها وبيعيش وحيد لان بالبداية ما فكر الا بنفسه |
حبيبتي مادم يبغي يتزواج قوال له بسلوب حلو حبيبي قبل ماتتزواج اول شيء دوار لي وطائف حكوميه عشان اكون رسميه ورتبهم عالي وكل مايجيب لك وطائف ارفض طالعي حجيج ادا جبلك وطائف راتبها عالي ارضي بعدين طالبي بحقوق النفقه والمسكن وقوله انا ماسمحك ادا دفعة اريال للبيت الثاني مااعطتني وانت مالك دخل براتبي فاهمتي اول ماترجعي رياض ادخل نادي رياضي وكل اسبوع روحي صالون سوي بدكير مونكير حمام مغربي حلوه للجسم وادا قادرتي تروح العيادات تجميل روحي وعمل جلسات شد جسم ومساج من هناء تخسري زوجك ومن هنا تتمتع نفسك وغيري بيتك ادا قادرتي هدا كل حيصير ادا استخدمتي سياستك معه
|
الله لإيججب دعواتكم. يإرب ويحفضكم من كل مكروه حبوب البروزاك ضاعت مني ورحت الصيدلي وعطاني بروكماليل قال البروزاك ماأنصحك فيه لأن تركته صعبه واحس البروكأماليل مره مريحتي ومهديتني. ورجعنا قبل أمس للرياض وزوجي صاير طيب مره ومستمع وجواله دائم مقفل وصاير حنون عجزت افهمه وساعات أفكر أفتح جواله وأكلمها وافتشه طبعا الرقم السري مايدري اين أعرفه. تكفون دلوني الله لإيوريكم مكروه.
|
ما نصحك ياختي تفتحي جواله و لا تفتشي واره لانك انتي اللي بتتعبي ..
خلاص بما انه مراعيك و هادي معك وطيب استمتعي انتي الآن .. و شليها من بالك .. الله ييسر لك و يهدي سرك .. |
اقتباس:
لاتتصلي عليها ولا تتصرفي من ورا زوجك اذا اتصلتي راح تكلمه بااتصالك صدقيني راح يزعل وياخذ في خاطره و يقلبها عناد وتكوني في موقف بايخ |
حسبي الله ونعم الوكيل.
|
اسأل الله العلي القدير ان يمسح على قلبك وينسيك همك ، |
يعني زوجك راح للحرم وجالس قدامه ويكلم في بنات الناس ...لااحترام للمكان الي فيه ولاخوف من الله وضارب كل كلام الله عرض الحائط ومااخذ من الشرع غير ان حلله اربع حريم...ليش ماقلتيله والشرع حلل لك تكلم البنات والحريم على اطهر بقعه على وجه الارض وفي الحرم ويقلها حملي الواتس اب بعد,,ترك مناطق المملكه كلها ومالقى غير بيت الله كان اختار اي مكان ثاني غير الحرم وغير ومكه يسوي خرابيطه وبلاويه فيه,,الظاهر هذي من علامات الساعه...الله يرحمنا برحمته,,
. المشكله يقوم هو يخرب السفره عليكم ويتهمك انتي انك بتخربينها..وبيرسلك بيت اهلك يعني قاعد يور عليك حجه عشان يتزوج زوجك انسان منتهي مااستحى من ربه كيف تبينه يستحي منك او يعملك حساب او يحس فيك وبقهرك.. صراحه زوجك مايستاهل تنقهرين وتاكلين في نفسك عشانه...واذا على زواجه خليه يولي صدقيني الي مثله ماراح يتحمل بيتين وحرمتين وبيرجع لك مذلول...اننتي بس خليه يجرب الي في راسه وتشوفين بعينك نتيجة تهوره.. |
اقتباس:
|
اقتباس:
ازواجهم اعرسو عليهم وجت الي تو زوجها معرس جديد تسال الي قد تزوج عليها زوجها تقول زوجي صار طيب وحبوب لدرجه يبوس يدي قدام هله قالت لها والله نفس حركات زوجي قبل يتزوج يعين يسوي مسكين قدامك الين يتزوج انتبهي واذا تعرفين رقم البنت كلميها والعني خير ابوها |
السلام عليكم اختي من تجربة شبيهه باختلاف الاسباب والدوافع انصحك بالتالي: 1-اختي استخدام الحبوب لطلب السكون ليس كقراءة القران واستجداء الصبر والسلوان والسكينة من الله حديث رواه مسلم: الذكر عند المصيبة حديث رواه مسلم: الذكر عند المصيبة نفحات من السنة النبوية والسير والتراجم ; حديث رواه مسلم: الذكر عند المصيبة السلام عليكم الذكر عند المصيبة عن أُمَّ سَلَمَةَ زَوْجَ النَّبِيِّ - صلى الله عليه وسلم- قالت: سَمِعْتُ رَسُولَ اللَّهِ -صلى الله عليه وسلم- يَقُولُ « مَا مِنْ عَبْدٍ تُصِيبُهُ مُصِيبَةٌ فَيَقُولُ إِنَّا لِلَّهِ وَإِنَّا إِلَيْهِ رَاجِعُونَ، اللَّهُمَّ أْجُرْنِي فِي مُصِيبَتِي، وَأَخْلِفْ لِي خَيْرًا مِنْهَا، إِلاَّ أَجَرَهُ اللَّهُ فِي مُصِيبَتِهِ، وَأَخْلَفَ لَهُ خَيْرًا مِنْهَا ». قَالَتْ فَلَمَّا تُوُفِّىَ أَبُو سَلَمَةَ قُلْتُ كَمَا أَمَرَنِي رَسُولُ اللَّهِ - صلى الله عليه وسلم- فَأَخْلَفَ اللَّهُ لِي خَيْرًا مِنْهُ رَسُولَ اللَّهِ - صلى الله عليه وسلم-.(1) (1) - رواه مسلم ، رقم (2166). ... 2- اغب الرجال حسب قراءاتي لقصص التعدد انهم اذا اتتهم النية وبدأوا بالتخطيط فلن يردهم كل اساليب مكر النساء لكن قد تتفاجئين بعد الزواج بما لم يخطر ببالك وقد يرجع لك زوجك وكله ندم هذا في حالة كان زواجه نزوة ! ولكن هو احتمال وليس مؤكد الى الان لم تتضح لنا الصورة كامله من دوافع زوجك واسباب زواجه معناها الان ماينجيك ولا يفرج هذا البلاء عنك الا الله اتركي طلب الاستشارة والتزمي بالاستغفار ومناجاة الله لعل الله يحدث بعد ذلك امرا ،،،ربما يزيح هذه الفكرة من دماغ زوجك ! 3- بالنسبه لأسلوبه الحنون معك وكيف تغير واصبح متفهم جدا فلاتتأثري نهائيا ولاتجعلي قلبك يخضع لمؤثراته الكلاميه هم لاشعوريا يصبحون حنونين ومثاليين لأنهم محتاجين رضانا بهالفترة ! 4- لاتزعلي او تخرجي من بيتك وحتى لو طلب منك تروحي لاهلك لاتوافقي مافي ارفع للزوجه من البقاء في بيتها 5- اذا شعرتي بالهزيمه والانسحاب تذكري ان حياتك هي ساحتك الخاصة وملك لك واستشعري معنى المُلكية وحرري نفسك من قيود الحزن وكوني حريصة على ان لايسلبك شئ من حياتك مهما سيفعل ستظل حياتك كما هي وطالبيه بابسط الحقوق . الان اذا وجدتي في زوجك تردد... ناقشيه بجديه عن دوافعه وعن الاثار المترتبه على زواجه على الصعيد المادي وعلى الصعيد الأسري وعلاقاته بابنائه وتآثير زواجه عليهم ،،واستغلي اي نقطة ضعف ممكن تساعد في تراجعه!* |
بعض ردود الأعضاء تحتاج لتنقيح ..
المنتدى اجتماعي - تربوي - تثقيفي ، لكن أحياناً نشاهد بعض البلطجة الاجتماعية أو التثقيفية إن صح التعبير . أحوال الناس تختلف ، والحكم على الشيء فرع عن تصوره . ليتنا نبتعد عن ألفاظ السب واللعن والتحريض ، ونجرد عواطفنا الذاتية حين محاولة حل المشكلة . لصاحبة الموضوع : أسأل الله أن يفرج همك وينفس كربك . |
| الساعة الآن 08:00 AM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©