|
انا اطمح بالزواج من فتاة رائعة الجمال ليس بفتاة جمالها عادي اواقل
السلام عليكم ..
حبيت افضفض .. ممكن ؟ سبق اني حطيت موضوع وقلت اني تقدمت لبنت ومرتاح لها غالبا الا انه احيان تجيني نوبات من التفكير اللي احس انه بلا بهرج ولا اي زخرف .. القصة باختصار اني تقدمت للبنت وشفتها لين قلت بس ومع ذلك ماني مثبت شكلها وانا ماادري حتى هل هي جميلة والا عادية , وهل فيها مسحة جمال أو لا .. طلعت من المجلس اللي كانت فيه البنت واهلي وانا اقول ايوة ايوة خلاص , وانطلقت الاصوات المزعجة اللي يسوونها الحريم بفمهم , هالحركة اللي ماناقص فيها الا انوار زرقا وحمرا وتصير دورية .. وفرحوا اهلي وفرحوا اهل البنت والبنت بعد , واصحابي جاهم خبر فوري وفرحوا هم بعد .. يعني حسيت جيوش واقفة على راسي , وفرحت انا بعد ولكن ماادري هل كاان فرح حقيقي والا فرح بسبب الضغط الغير اجباري اللي حسيته ؟ احترت واحترت وحترت ثلاثاً , كلمت احد اصحابي المشهود له بالعقل والمشورة والجميع يستشيره , هون علي الموضوع وانها وساوس ابليس وانه شي طبيعي وفيه ناس يحتارون بعد الشوفة ووو الخ .. سلمت انا للامر الواقع على طريقة خلاص يارجال مش امورك واللي يكتبه الله بيصير .. صحيح تمشي اموري كويسة لأيام ولكن لاتلبث الافكار ترجع لي ويحق لها ترجع لأنها ماراحت على حجة وبينة واضحة .. راحت على كلام كله احتمالات وظنون وانه قد تكون وساوس شيطان وووالخ .... كيف يروح الخوف نهائيا على ظنون ؟؟ كيف اتخيل اني أتعامل بطريقة مشي حالك, مع موضوع حياتي الاول وهو الزوجة .. هالموضوع اللي دايم كنت معلق خيالي فيه من نعومة اظفاري على انسانة صاحبة جمال اكثر من العادي ؟ ايوة انا منذ طفولتي كنت اعيش في خيال مع انسانة رائعة الجمال , دايم اتخيل اني مع حبيبة لي رائعة في الجمال واني سأرزق بمثلها لما اكبر .. مدري احد زيي والا انا لحالي ف ذا الشي ؟؟ واخرتها أطيح بانسانة اعتقد ولست جازما ان جمالها مابين العادي إلى القليل من الجمال .. الاحلام كل هالسنين تروح في ليلة وضحاها .. وليش أحس اني مرتكب جريمة لما أفكر بانسانة رائعة الجمال والقوام والعقل ؟ ليش يحسسوني ان البنات اللي بهالوصف ماانخلق منهم الا ثنتين او ثلاثة من عهد آدم عليه السلام ؟ وبعد ليش يحسسوني ان البنت الحلوة مطبوع على جبهتها عظمتين وجمجمة ؟ وانها تحمل بين جنبيها شيطان مريد ؟ وليش بعد احس اني مو كويس لما أقول ابي انسانة حلوة كثير , وليش أحس ان ربي بيعاقبني جزاءا لي على اني اطمح بالزواج من فتاة رائعة الجمال ؟ وليش احس اني بطال وسخيف لما افكر برفض بنت بسبب تواضع جمالها ؟ وارجع استغفر , بسم الله وليه طيب ؟ نفسية البنت بعد هم آخر لي .. ماابي اكسر خاطرها مع ايماني ويقيني انه مهما بلغ ضيقها من فركشة السالفة بعد ان علم به اقاربها وزميلاتها , فهو قبل العقد اهون منه بعد العقد بحيث يصير لقبها مطلقة .. وبعد مشكلة اخرى وهو انه ابوها طالب مني مؤخر جامد, يعني لو طلقت بعد العقد وبعد ان وقع الفاس في الراس فأمامي نكبة اخرى قد تحرمني من التقدم لأخرى فترة طويلة لأني سأكون في ضائقة مالية .. لاإله الا الله , ارجوا انكم تدعون لي لأني فعلا اعاني .. ساعدوني بالدعاء .. |
شكلك مش مقتنع اقتناع كامل من البنت بعد محاولاتنا في تهدئتك في موضوعك السابق .. بشور عليك مادام انك ماشفتها زين اطلب شوفتها مره ثانية ومافيها شيء ممكن تتحجج انك ماشفت الا شعرها لانها كانت منزله راسها وقل لأخوها يكلمها وانت يمه عشان تنتبه لها لانها بترفع راسها واذا تبيها تحط مكياج قل لاخوها خلها تحط مكياج بس ما أظن راح تستجيب البنت مره ثانية للموضوع بس جرب عشان تقطع الشك باليقين مع اني ودي تتوكل على الله بس اذا تطمح للجمال زي ما انت شايف وراغب راح تتعب على بال ماتلقى ويمكن ماتلقى والجمال ترى بعد فترة بتشوفه عادي وراح تهمك اخلاقها وتعاملها معاك وحنيتها
|
السلام عليكم ورحمة الله وبركاته
اخي الكريم اطلب من اهلها انك تشوفها بس تكووون رابطه شعرها لانك المره الاولى ماشفت الا شعر هذا سبب والسبب الثاني انها ماشافتك وانت تبيها تتزوجك وهي مقتنعه فيك قل لهم انا ماانام محتار ابي اشوفها واتطمن ؟؟؟مو مساله انها حلوه بس مهم الراحه بين الطرفين وانك تشوفها زين واستخير وخلك لبق بطلبك |
أنت مو محتار بزاويه ..
أنت مــــوســــوس بزاويه .. خطيبتــــك حلـــــــــــووووووووه .. واللي أنت فيه من والوسوسه الزايـدة لاأكثر ولاأقل .. بعطيـك تمرين بسيــط جـدا .. كلما فكرت بموضوع الجمال ونسبته أشغـــل نفسك أطلع مع زملاك جب صينية حلا وفطاير وأجمع الأهل وأشغل نفسك بجلسه حلوه معاهم .. خذ نفسك للمشى مع أي شخص ترتاح له .. سجل بنادي .. شف ملتزمات الزواج أطلـع على القاعات من اللحيـن خذ عنها فكره .. .. يعني بالمختصـر .. لاتجلـس لحالك وتسمح للأفكار تزيد عليك .. .. وعشان أريحك أكثر .. البنت ماتطلع بدون مكياج ألا وهي وااااااااااااااااااااااااااااااااثقه من اللي عطاها ربي .. |
من حقك أنك تحلم ببنت جميله جدا وتكون ذات دين وقوام وخلق وأكيد موجوده وأنخلق منها كثير ,,
والتوفيق من الله سواء مع بنت جميله جدا أو عاديه أو حتى مافيها من الجمال ذره وكل شي ياأخوى نصيب فى نوعيه من الناس إذا ماحصل على المواصفات الى فى باله مايقدر يمشى حياته ولايقدر يتقبل الطرف الأخر أبد وأعرف أشخاص من هالنوعيه وايضا بالمقابل فى ناس تتأقلم مع الشريك مهما كان شكله وتتقبله ومع الوقت تحبه من طيب عشرته ,, بس لاتتزوج بنت الناس إذا أنت مومقتنع بجمالها على أساس أخت صديقي وبمشي حياتي وهالكلام هذا زواج مولعب . لازم تقتنع فيها 100% أطلب تشوفها مره ثانيه لازم تشوفها وهذا حقك أذا أنت يهمك الجمال لهالدرجه وكنت من النوع الى ماتقدر تتنازل عن المواصفات الى ببالك وممكن هالشي يأثر على أستقراركم وحياتكم,, بس أحب أذكرك بشغله مهمه قبل لاتتخذ اي قرار الجمال والشكل مع الوقت بتتعود عليه واذا حبيتها راح تشوفها الأجمل بين كل نساء العالم والمهم العشره الطيبه |
وهي من حقهآا تحلم بفارس أحلامـ يحمل آياآت الكماآل و الوفاآء ووو وجميعـ صفات الرجولة ومع ذلكـ فرحة فيكـ بنقصكـ ومخلصة لكـ سبحاآان الله شتاآاآن بين وفاآاء الأنثى و ،،، عموماآا أتمنى أن يكتب اللهـ لكـ الخير ،، وإن كنتـ تظن ولو بنسبة 1% أن شعوركـ هذا سيستمر إلى مابعد الزواآجـ فأبتعد و اعلمـ أن المشكلة مو فيـ البنت المشكلة عندكـ داخلية ولابد أن تعالجها قبل أن تجرح مشاعر البنت معـ إنني أحسـ من كلامكـ أن البنت جمييييلة جدا وتحمل مواصفات مميزة جدا أتوقع من النادر أن تحصلهاآ واعتذر عن القسوة ولكنـ أحببت أن أدلي بدلوي |
الســــــلام عليك ورحمة الله وبركاته هلا بك اخي ...أنا حسبت موضعك هذا ستبشــــــــــرنا بأن وافقت وإنتهى الأمر !!! ولكن يبدو أنك متردد والسبب لا شي ..........أوهام وتخيلات وشيطان لك بالمرصاد أخي ايش رأيك أخطبها أنا إذا لم تريدها............هون على نفسك أراك غرت عليها صح ...أعصابك !!! لذا أنت تحبها ..........أعتقد انك غرت .........لا تخاف هي لك أنــــــا قد رديت عليك في الموضوع السابق ...ولكن أضيف أيضا أخي العزيزإذا تريد إمرأة جميلة جدا وكاملة المواصفات, مواصفاتها فوق ما تتخيل هي موجودة وأنت تدري أين هي ...............؟ أخلي الإجابة لك أخي العزيز خليك واقعي لقد اشار لك البعض في الموضوع السابق أن تذهب وتراها مجددا ..هل فعلت ..؟ إذا لم تريدها ...............لا عليك من ناحية أني قد تكلمت والناس عارفين ..أهون بكثير وهي واثقة من نفسها وبأخلاقها وجمالها ستتزوج عاجلا غير آجل .....لا تخاف من ناحية نفسيتها كم يوم وتنسى الأمر وكأن ما صار شي .المهم الآن أنت ......سؤالي لك أفترضنا إنك تزوجتها ..بس لم تكون على ما تريد هل سيكون لك الأمر عادي وتكون قد المسؤلية ..؟ أو ترجع في نفس التفاكير وترتكب أمراً لا يحمد عقباه ..جاوبني بصراحة أخي |
الله يجملها بعيونك
|
وعليكم السلام ورجمة الله وبركاته
ترا اللي تمر فيه من أفكار وقلق بخصوص جمال خطيبتك إنت اللي سببته لنفسك و سالفة إنك تبيها جميله جدا..ليش أهلك قبل الشوفه ماوصفوا جمالها لك ؟؟! كلم أحد من خواتك وخلهم يصفون البنت لك بدقه أكثر.. عجبك الوصف زين ما عجبك خلاااص لا تؤذي بنت الناس وياك! |
مشكلة والله !
|
دامك مش مقتنع من البداية أنصحك تتركها لآن ماراح تنبسط ولآ راح تبسطهـا
والله يعوضها بخير منك ويرزقك بخيير منها ومثل ماتتمنى وأكثر .... |
اطلب تشوفها مرة ثانية
|
ماقريت الردود كاملة ....
وبصراحة ماعندي تعليق كافي ولااحب احكي بشئ ماعرفه .... بس قالوها الأولين ولاتزعل مني أخوووووي ... قالوها اللي يتشرط يطيح حظه !!!!!!!! هذا شئ معروف سبحان الله ... سواء بزواج او وظيفة او بيت ..... القناعة كنز لايفنى ..... عن تجربة انا قنوعة بأشياء كثييييييييييييييييييييييييرة وسبحان الله لدرجة والله دايم اقول مابي شاب وسيم ولاابي منصب ولاابي وظيفته راقية ... عن قناااااااااااااااااااااااااااااااااااااااااااااااا عة ابي دين وأخلاق وطموح فقططططططططططططططططط ومع ذلك يتقدمون لي شباب وسيمين وغالبيتهم مو الكل وظايف راقية .. القناعة كنزززز بكل جوانب الحياة ..... طبعا فكر وقرر وش مرتاح له ؟؟ بس حبيت اقول نصيحة شاملة في الحياة ..... |
اعانك الله وفرج همك
(لاوجع الاوجع الضرس ولاهم الا هم العرس) انا لا ارى ان تطلب تشوفها مره ثانيه احس ان بيكون صعب عليها اخوي استخير بعد كل صلاة وقم جوف الليل لتناجي ربك وتسأله ان يلهمك الصواب وان يعينك على اتخاذ القرار اللي في خير لك ولها ولا تقدم على الزواج الا اذا اطمئنت نفسك وارتاحت لها وان شاء الله بعد الاستخار ستتغير نفسيتك اما بالرفض التام او الارتياح اسأل الله ان يرشدك ويدلك لما فيه خير لكما |
من جد مشكله
بس تدري الخطأ الاكبر من أهلك ليش لما عرفو أنك تبغي بنت بهاذي المواصفات الي تبغاها ليش يرشحو لك هاذي ؟ اذا كانت غير مقتنع أنصحك بعدم المواصله وما فيها شي توكم علي البر |
وليش أحس اني مرتكب جريمة لما أفكر بانسانة رائعة الجمال والقوام والعقل ؟
ابد ماانت مرتكب ولا تتحسس انكـ مرتكب....اذا كان بعض الفتيات يطمحن بزوج جميل. .فما بال الرجال؟جريمه ماهي بجريمه بس احسه خيـال واسعليش يحسسوني ان البنات اللي بهالوصف ماانخلق منهم الا ثنتين او ثلاثة من عهد آدم عليه السلام ؟ البنـات من هالوصف كثير.واعتقد خطيبتكـ منهن ولا مستحيل ماتحط مكياج!!الا انها واااااااثقه.. وبعد ليش يحسسوني ان البنت الحلوة مطبوع على جبهتها عظمتين وجمجمة ؟ وانها تحمل بين جنبيها شيطان مريد ؟ابد فيه بنات جميلات+ديــــــــــن+اخلاق+//مثل بعض الفتيات اللي يحسون ان مافيه رجال طيب خلوق كل الرجال كذابين<<طبعا بتنكر كلامي بتقول لاتعممين فيه رجال طيبين وانا بقول فيه بنات قمة الأدبوليش بعد احس اني مو كويس لما أقول ابي انسانة حلوة كثير , وليش أحس ان ربي بيعاقبني جزاءا لي على اني اطمح بالزواج من فتاة رائعة الجمال؟ عَنْ أَبِي هُرَيْرَةَ رَضِيَ اللَّهُ عَنْهُ عَنْ النَّبِيِّ صَلَّى اللَّهُ عَلَيْهِ وَسَلَّمَ قَالَ : ( تُنْكَحُ الْمَرْأَةُ لِأَرْبَعٍ : لِمَالِهَا ، وَلِحَسَبِهَا ، وَلِجَمَالِهَا ، وَلِدِينِهَا ، فَاظْفَرْ بِذَاتِ الدِّينِ تَرِبَتْ يَدَاكَ ) .وليش احس اني بطال وسخيف لما افكر برفض بنت بسبب تواضع جمالها؟لأنكـ جعلت الجمال اهم شئ!ّ!! فصديت نظرك عن كل حسن فيها..وسلطت الضوء ع الجمااال!!وارجع استغفر , بسم الله وليه طيب ؟ |
الله يجزاكم خير جميعا , معليش اقلقتكم معي ..
لكن محتاج لدعائكم نفسيتي الحين زانت البارح كنت اكلم اخوها وسالته عن بعض الامور فقال لحظة اسألها وبعد شوي اتصل وقال تقول كذا وكذذا .. قلت اهاا ووو الخ يوم سكرت بست جوالي بدون ارادة ووقفت فجأة وقلت بسم الله ! شسالفة وين راح القلق والزحمة اللي قبل شوي مدري الظاهر اني محتاجها تكون بجنبي واعتقد انها حنونة, الملكة قربت جدا والله يكتب اللي فيه الخير لاتنسون ادعوا لي |
الحمدلله .. الله يتمم لك بخير
إعزمني ع الملكة بقرص عروستك عشان أنخطب بعدها :) ولا تنسى تعوذ من إبليس دايما وكل يوم ولا تقعد لحالك مبين انك موسوسجي |
اقتباس:
الله يكتب لك ولها الخبر |
يااخي الله يتمم لك على خير
ولكن خليك عند كلمتك مو يجي بعد الملكة وتقول ماعجبتني واهم شئ غض بصرك عن التلفاز والنت وراح ترتاح |
إذا كذا نظرتك إفسخ العقد من الحين
وبعدين من قال الفتاه الجميله متكبره بالعكس فيه كثير بنات جمليات ورائعات الخلق الله يوفقك لكل خير |
اقتباس:
لما تقلق وتحزن وتكثر وساويسك عليك بدعاء الهم والحزن مجربته انا كنت باوضاع مايعلم بها الا ربك سبحانه واقوله بتمعن وانام بعده من كثر مااحس ان الهم طاح اللهم اني عبدك..ابن عبدك.. ابن امتك ناصيتي بيدك.. ماض في حكمك.. عدل في قضاؤك اسالك بكل اسم هو لك.. سميت به نفسك..او انزلته في كتابك..او علمته احد من خلقك..او استأثرت به في علم الغيب عندك ان تجعل القران.. ربيع قلبي..ونور صدري ..وجلاء حزني ..وذهاب همي قسمت الدعاء حسب الفهم احفظه اخوي زي اسمك احتجته اوقات باماكن ماكان معي لا كتاب اذكار ولا جوال ولا شي مافادني وقتها الا حفظي لها الدعاء والاستغفار ولا كان حالتي حااااااااااااااااااااااااااااااااااااااااااااااله موفق اخوي هذا ابليس مايحب الي يكمل نصف دينه ويعف نفسه بالحلال ويكثر وسوسه براسك |
الله يوفقك يارب..اللي إنت فيه وسوسه
صدقني إذا قعدت تسمع للوسوسه بتظل مهموم وعايش في قلق وحزن |
اقتباس:
أقعد يا الرومنسي :d شكل السنارة غمزت http://www.66n.com/forums/images/icons/icon52.gif ماشاء الله الله يوفقك :14: |
تكفى ياتوم كروز هع:25:
|
نصيحة لا تتملك إلا وأنت مقتنع و راضي .. مالها داعي عقب الزواج تجيك نفس هالوساوس وتنفصل .
لازم وضروري جداً تطلب من أهلها شوفه ثانيه عشان تقرر وترتاح . الله يسهّل لك ويكتب لك اللي فيه الخير . |
ذكرتني بقصة وحدة من اقارب زوجي اقل من العاديه لاجسم ولاطول ولاملامح زود عاديه جدا جدا بس كانت تنحط على الجرح يبرى من حبابتها وسناعتها وبعد وقت قصير طلقها لنفس سببك وتزوج ملكت جمال ومن فرحته فيها سفرها شهر العسل فرنسا والاوله لا سفر ولاغيره وسنه بس وطلقها وجلس اربع سنوات عشان يرجع الاوله ورجعها وظلت زوجته الين توفى الله يغفرله ويرحمه وكان مدلعها على الاخر
|
الله يوفقك ويجمع بينكما على خير ومحبة
كل الي فيل وسوسة الشيطان اكثر من الدعاء ولاتكثر التفكير |
الله يرزقك بملكه الجمال الي ترتاح معها
|
الله يوفقك
|
الحمدالله أني قرأت ردك الأخير ...
أخوي كلهاااا من وسآآوس الشيطااان .. ادعي ربك واستغفر وتوكل على ربك واستخير أكثر أكثر من مره حتى بعد الملكه ... ربي يتمم فرحتكم وتشوفهاااا ملكه جماااااااااااااال وتجعلهااا قرة عين لك وتسعدهآآ وتسعدك .. موفق يآآعريـــــــــــــــــــــــــــــــــــس ..** |
| الساعة الآن 07:49 AM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©