|
تعبت نفسيتي والله وكرهت الدنيا
السلام عليكم ورحمة الله وبركاته
اخواني واخواتي أعضاء المنتدى لكم منى احلى تحية بدايةً انا من أعضاء المنتدى وكنت اشوف مشاكل الناس ومرات اشارك بالحلول ومرات اطلع بدعوة لكل واحد عنده مشكله بس ماتوقعت بيوم اني رح احكي مشكلتي هنا عالعموم هي مو مشكله كبيرة بس تعبت نفسيتي منها كثير اقلكم قصتي من البداية انا متزوجة صارلي 4 سنين وعندي طفل عمره 2 سنيتن والحمدلله ساكنة مع أهل زوجي وهم ناس طيبين وكويسين بس لايخلو الأمر من الحركات والكل عارف حركات العرب الحماه والكنه واخت الزوج ومن هالحكي طبعا عائلتهم مكونة من 4 شباب بما فيهم زوجي و3 بنات وحدة منهم متزوجة والتنين وحدة في الثلاثين والثانية اخر العشرين عالعموم علاقتي معاهم كانت جدا طيبه وكنت اجاملهم بكل طيبة وصدق ومرات امثل المجاملة عشان امشي اموري في الحياه خواتهم كنت دايما اطلعهم عالمجمعات كثير اغيرلهم جو واعزمهم ولما تكون في مناسبة امكيجهم واهتم فيهم والله خواتي ماسويت لهم هيك بس عشان زوجي وغير الهدايا لصغيرهم لكبيرهم امه اهديتها مرة خاتم ذهب ومرة حلق ذهب ومرة اهديتها جوال وطبعا غير الورود والعطور والشوكولا يعني بصرراحة سويت اللي ماسوته كنه من اهتمام ورعايه وبما انه البيت اصلا ملك زوجي وهم ساكنين معنا ماحسستهم ابدا انه هالبيت ملكي ولي سلطة فيه بالعكس كانه انا ساكنه عندهم ولي غرفتين وحمام وباقي البيت ملكهم جاء بيوم من الايام صارت مشكله كبيرة بين زوجي واخته الكبيرة وصار كلام كبير بينهم لدرجة انه اخته سبت زوجي سب واهانته كثير بمافيه الكفايه انا انصدمت زوجي زعل وصار يصرخ عالبيت كله وقالهم انتو نكرتوا باني بار لكم وحطيتهم على راسي في بيتي وجزاتي اختي تهيني في بيتي قدام زوجتي وابني وانتو ساكتين والله لاطلعكم من البيت والله لاخليكم تعرفوا قيمتي ومن هالكلام انا كنت منهارة كتير وببكي مابعرف كيف ماوعيت عن نفسي وقلت كلمة لاخته خلاص ازا بتفكري انه فلان اللي هو زوجي قاصد هالكلمة انه تتطلعون اطلعوا بس هو ابدا مو قاصد هالكلام . فكرت اني قلت لها اطلعوا من بيتي ادري انه تعبيري خاني وكلامي مش مفهوم بس ماكان قصدي شي وانا من العصبية والانهيار قلت كلام مش مفهوم. زوجي طبعا قالها بلحظة عصبية بس هم مازعلو منه لانه ابنهم . بس أنا حكمو علي بالاعدام اخته وامه زعلوا مني كتير وللان احاول اراضيهم لاحياة لمن تنادي الام رضت بس الاخت ابدن حقد مش طبيعي مرات اسلم عليها ماترد السلام بصراحة اخواني واخواتي لو تشوفون شلون حياتي معهم تقولون معك حق بهالكلمة اخته من هم صغار تكرهه اخوها اللي هو زوجي وماتعطيه اي احترام لاقدامي ولاقدم ابنه انا كانت بس تحب تتكلم معي للمصلحة بس عشان اوديها للمول معاملتي لاهله دايما زينه واعتبرهم اهلي لكنهم يقابلوني بالتكشيرة ويقولون انه انا اللي اكشر ويعاتبوني وانا مااكشر بس اكون مرات تعبانه من الدوام والجامعة واكون ابي اهدى فقط مو قادرة اتكلم يفكرون اني اكشر بوجههم بدون اي تقدير لظروفي ومرات امثل اني اتكلم ومبسوطة معهم واجامل عشان مايزعلو مني الحمدلله انه زوجي فاهمني وعارف انه انا زينه مع اهله ويقولي كفاية انك تحملتي العيشة الللي كلها مشاكل ويقدر كل اللي اسويه وهذا اللي مهون علي بس بصراحة انا انصدمت رغم كل هالمجاملات والعشرة والطلعات والهدايا والمعاملة الحسنة من غلطة مني نسوا كل شي وهنت عليهم بصراحة تعبت نفسيتي كثير معاهم والله لو اقولكم المواقف اللي كنت اسويها معهم مادري شو حتقولوا عني هبلة غبية مابعرف بس اللي انا بعرفه اني اعتبرتهم اهلي ولما غلطت نسوا كل شي مابعرف كيف حستمر بهالحياه معهم نفسي اطلع ببيت لحالي واركز بحياتي وبتربيتي لابني بس مابقدر اقول لزوجي بخاف يزعل ويفكرني بدي ابعده عن اهله ارشدوني انا اعتبركم اهل النصح والارشاد ايش اسوي معاهم كيف اتصرف كيف اكمل حياتي معاهم اقنع زوجي بانه اسكن ببيت لحالي مع اني والله محتاجة الاستقلالية في اللبس والاكل والمعيشة. انتظر ردودكم. |
الله يعينك اختي
هم في نظرهم انك تقولي في نفسك انا صاحبة البيت لك الامر والنهي فيه وهم مجرد ضيوف عندك علشان كذا ردة فعلهم هذي لاتلومينهم والله صعب على الام بناتها انهم عايشين عندكم وفي بيتكم الان الام وبناتها يشعرون بالاتي (( عدم الامان وعدم الاستقرار والغيرة منك لان البيت لك ولزوجك )) ومهما سويتي فلن تستطيعي ان تغيري مشاعرهم ... فأنا اشور عليك اذا المادية بتسمح تستأجري انتي وزوجك بيت صغير على قدكم وتخلي البيت لامه واخواته ..... اريح للطرفين هم سيشعرون بالاستقرار وانتي كذلك وفيه حل اخر اذا الماديه صعب شوي انكم تفصلون البيت الى قسمين اذا كبيرر ويكون لك جلستك الخاصة والمطبخ وكذا وهم يكون لهم باقي البيت .... لكن ارجوك اختي راعي مشاعرهم فشعورهم صعب صعب ا وممكن انك طيبه معاهم وماقد حسستيهم ان البيت مش بيتهم لكن هذا الشعور مسيطر عليهم مافيه الحل الا كل واحد يعيش في بيت اما اقناع زوجك بالاستقلاليه قولي له ان امك وبناتها من حقهم يكون لهم بيت وانا وجودي معهم غلط احس اني ثقيله عليهم وانا من حبي لهم ابغى يصير لهم بيت بروحهم يعني في نقاشك مع زوجك ركزي انك تبين الاستقلالية عشان مصلحة اهله مو عشان نفسك |
اختي الصابره كلامك عين الحق
بس فيه شوي من التخلي عن الملكيه. من وجهة نظري ماتترك بيتها . ولا اهل زوجها يتركون البيت يعيشون مع بعض افضل بس اذا أحد حاب يترك البيت شيء راجع لهم <3 وهم المفروض يحمدون ربهم ان عندهم اخ وزوجه زي نوره والمفروض مهما بدر من نوره من اخطاء ينسون لان هذا هو حال الدنيا اليوم نزعل بكرا نرضا واتوقع انها تحبك يانوره انتي وزوجك بس زي ماذكرت حبيبتنا الصابره هي تعاني شوي من الغيره ان شاء الله مع الأيام تتعدل . وتكملون حياتكم كما كانت وتعدل اسلوبها مع اخوها لأني حسيت انه استفزازي |
اشكر خواتي على الردود اللي اثلجت قلبي
بالنسبة لشعورهم في داخلهم اني ملك البيت مو وراد في بالهم اصلا وبالعكس البنت الكبيرة تقول هذا بيت ابوي وهادا كله مو مشكلتي الأساسية بالعكس انا مو من النوع اللي يهتم بس اللي دمرني انه هان عليهم كل اللي سويته لاجلهم وماسويت لاهلي هالشي بالعكس اندم اشد الندم اني كنت اتدلع على اهلي واكابر وعند اهل زوجي كل اللي سويته لهم تكبروا علي حتى امي كانت تنقهر مني من كثر مجاملاتي لهم تقولي لاتبالغي بكرة حتندمي وعند غلطة حينسوا كل شي وفعلا طلع كلامها صح بس انا ماندمت احتسبت كل شي لوجه الله تعالى والدنيا تعلم الواحد من اللي يحبه ومين اللي يكرهه |
ماشاء الله عليك يً اختي . صافية النيه نظيفت القلب
والله يعطيك علا قد نيتك |
نورة .. للي ساكن عندكم امه و اخواته البنات بس ؟؟
طيب الشباب متزوجين و منفصلين ؟؟؟ هل البيت ممكن ينقسم طابقين مثلا ؟؟ او هل في امكانية للبناء فوق؟؟ كيف امور زوجك المادية؟ |
واضح بأنك طيبة جدا لذلك تأثرت من الموقف كثيرا
فالموقف لا يستحق بأن تحملي نفسك المسؤولية او تهتمين من اجلهم او حتى تزعلين نفسك لانهم حاقدين عليك او ما يتكلمون معك..طيبتك خليها للي يستاهلون أنا برأيي مادام حماتك خلاص رضيت وزوجك نفسه مش هامة الموضوع وعارف منو انتي فلا تبالين باخت زوجك فهي الخاسرة الاولى والاخيرة وانت مش خسرانة شي يعني هي كانت مستفيدة منك فبالتالي حيجي اليوم الي هي تكلمك فيه وتطلب منك تاخذيها عالمول او اي شيء اخر فلا تبالين..وفكري بنفسك فقط بنفسك فقط فاهمة علي؟؟؟ يعني قولي بعقلك: (انا لم أفعل شيء ليغضبهم،انا واثقة بنفسي بأنني لم أخطئ،واذا ضليت ابرر لهم موقفي حيركبوا فوقي،يعني حيستغلوني،اعتذرت مرة خلاص مارضيوا بكيفهم،المهم زوجي راضي عني) وللمعلومة شخصية اخت زوجك انا فاهمتها الي مثلها ابداً ما تعتذرين منهم لانه وقتها يكبروا الموضوع بس لما ماتعتذرين حتشوفي شخصية ثانية منهم توكلي على الله وانتي الآن بلحظة غضب وحزن ومعك حق(بأن هذا جزاء المعروف)ولكن فقط عليك بالاستغفار سوف ترتاح نفسيتك ولن تفكري بالموقف ابدا وتضحكين عنفسك غدا عندما ترين موضوعك هنا لانه فعلا ما يستاهل وتذكري: (إذا اكرمت الكريم ملكته واذا اكرمت اللئيم تمردا) بعد هالموقف انتي بس عليك تعامليهم بالحسنى بس ما تبالغي بلاش تاخذي ضربة ثانية عراسك منهم |
اشكر لكم ردودكم ووقوفكم لجانبي
الاخت نورة اخوانه الشباب موجودين بالبيت بس كلمة الحق ينقال دايما هم في حالهم ودايما يمدحوني ويقولوا لزوجي زوجتك طيبة كثير و مانلاقي مثلها ومالهم اي مشاكل بس الحريم الله يهديهم بس اصحاب هالحركات بالنسبة للبيت مانقدر نفصل او نبني لانها فيلا ايجار من شغل زوجي وزوجي المتكفل بكل شي حتى خوانه واخواته كلهم يشتغلون ورواتبهم زينه ماشاء الله تبارك الله هم بس يدفعون شهريا مبلغ الاكل والشرب بالبيت اما البيت وفواتير والكهربا والماي عزوجي وبالعكس انا مبسوطة لانه مع اهله يضحي لانه اللي ماله خير مع اهله ماله خير بالناس |
ماشالله المشاهدات كثيرة والردود بس 5 ؟؟؟
بانتظار ارائكم اخواني واخواتي |
اختى بيجى يوم لازم يكون عندك بيت لحالك والوحده لازم تاخذ راحتها فى بيتها خلى هذا البيت لأمه وخواته ولو ظروفكم الماديه زيه اسكنو فى بيت لحالكم واخته هذه اللى ماخذه منك موقف مدام انك اعتزرتى منها خلاص ولايهمك انتى سويتى الصح مالك داخل فيها رضت رضت مارضت بكيفها مصيرها بترضى
|
شوفي بحسب كلامك وما ابغى اشيشك عليهم بس اختى وقعت نفس خطاكانتى بارة باهلي بامه وابوة ماقصرتي بس احسك بزيااده مع الاخوات وهم يعاملوك العكس احسك من كثر معاملتك لهم ذاله نفسك لهم عزي نفس بيحسبولك حساب ترى محد يركب الا على الظهر المنحنى وبعض ناس يحبوا يسيطرو على زوجه الاخو علشان ماتقدرري تتكلمي
كل كلامي على الاخواات فقططط وليس ام الزوج هذا ماوقعت فيه اختى وحبيت انبهك اذلامس الكلام واقعك والا لاتاخذي به لاني خايفه اكوون شيشتك عليهم |
الله يهديك كان من المفروض انك ما ادشين بين الاخت واخوها حتى لو زوجك ..لانه الذي بيصير بعدين بعد زمن قد يغفرون لزوجك لكنك انت لن يغفر لك لذا انصح كل زوجة انه اذا صارت مشكلة بالبيت بين زوجها واحد اخوانه او خواته ما تكون هيه فى الصورة ..ممكن لها ان تكون فى الصورة فى غرفتها امام زوجها بس ..هذا افضل للمستقبل ...والانسان كلما لزم الصمت فى المشاكل العائليه يكون افضل خاصه اذا كان رايه ماله اثر اولن يغير فى النتيجة او المشكله ....لان الحريم يظلن يحملن صورة الموقف مهما طال الزمن على الرغم من انه الزوجه لا تقصد ذلك المعنى .
|
هده المسائل بين الاخوة لا تدخلين بينهم صحيح هو زوجك لكن هو ابنهم و عرفوه قبل لا يعرفوك
خليك كويسة و بعيد عن المشاكل الي بين الاهل راح تريحي راسك على الاخر |
شكرا لكم وفعلا المفروض مااتدخل بينهم بس من غبائي كنت مفكرة انه انا مثل بنتهم وماخذين علي
|
اختي نوره
الطيبه الزائده في هالزمن تسمى سذاجه او غباء مثل ماتفضلتي حضرتك وهالشي يكون مو بيدك طبعاً لأن هالطيبه تطلع بدافع الحب والرضاء ولكن خذيها قاعده في حياتك (عاملي الناس مثل ما يعاملونك) مين ما كانو هالناس حتى لو كانو اخوانك وخواتك وصديقات عمرك مو بس خوات زوجك اسلوب اخت زوجك ماينفع معه الا انك ما تشيلينها من ارضها يعني ما تشوفينها قدامك اصلن احقريها واتكبر عليها واذا جات تتكلم معك لا تردي الا اذا كثرت بالكلام وردي بعدم مبالاه حزتها والله العظيم تدور الرضاء منك اهي بطريقه غير مباشره اللي ما يشوفك بعين لا تشوفينه بعيونك الثنتين انا ماقولك هالكلام عشان اسوي لك مشاكل معهم بس انتي طرحتي هالمشكله وتبين اننا نعطيك الحل وكل شخص يقول الحل من وجهة نظره ومن واقع تجربته وانا اقولك هالشي من واقع تجارب مو تجربه وحده ولا تطلعي من البيت ولا اهم يطلعون من البيت لآنكم راضين تعيشو مع بعض من البدايه ف ما ينفع بين يوم وليله تتركي كل شيء عشان خاطر وحده ماجابت لك خبر الا انبسطي واخذي راحتك وعشان تخليها تولع زياده اطلعي وروحي وارجعي واعزمي صديقاتك خليها تعرف ان الله حق وانك مو جايبه خبرها انا هذا اللي عندي بصراحه واللي اشوفه مناسب وانتي عقلك في راسك اكيد بتعرفي خلاصك موفقه انشاءالله |
شكرا أخ حسين وانشالله راح اطنش مع انه صعب لانها عايشة بنفس البيت واشوفها يوميا
استغرب ليش كل هالحقد مع اني كنت معها اكثر من روعة ويحز هالشي بخاطري مااقدر اعيش بهالطريقة وفي حد في قلبه شي تجاههي كون في موقفي تلاقيها صعبه مثلا لو اني ببيت لحالي اقول مو مشكله كل واحد ينسا ويلتهي بحياته بس المشكله يوميا اشوفها وارد السلام لما ادخل البيت من برة ولااااااااااااترد سكوت اقول في قلبي ايش هالحقد |
وعليكم السلام ورحمة الله عزيزتي خليك رسمية معاهم سلام عليكم وصباح الخير وكيف الحال بس والهدايا نصيحة خليها للشديد القوي يعني لاقدر الله مستشفى ولامرض قوي سبحان الله مع إنه الرسول وصانا بالهدايا تهادو تحابوا لكن بعض الناس لما تكثرين في دلالهم من هدايا وطلعات وغيره تتكبر عليك وتدعس عليك وعلى أتفه غلطة الله يهديهم ويصلحهم وزي ماقلت خليك رسمية وابعدي عن الشر وغنيله موفقة |
عفوا اختي الغاليه بس احب انبهك انو الكلمه اللي قلتيها جدا جدا قويه اعذريني بس تخيلت نفسي مكان اخت زوجك واحس مو مستوعبه مرت اخوي تقول هالكلمه خاصه بموقف صعب زي كذا ادري انو قلتيها بالغلط بس انا حطيت نفسي بالموقف واكتأبت فمابالك لو صار لي الله لايحطني بهيك مواقف اشد شي على نفسي لما اشوف احد يتمنن بشي سواه وهذا الشي سواه زوجك للأسف وكان الأفضل لك انك تصمتين تماما عند المشاكل وفيه نقطه احب افهمها الآن لما أم الزوج تسكن في بيت ابنها هل له منه عليها بهذا؟؟؟؟؟ انا اشوف انو ماله فضل لأنها امه وحق الأم اكبر بكثير من حق الزوجه يعني في نظري البيت اولى الناس بتملكه الأم ثم الزوجه اما الاخوان والاخوات فهم مجرد ضيوف ولكن من الواجب اكرامهم .... نصيحتي الآن،،،،،،، انتي ياغاليتي قلتي ماقلتيه بنيه حسنه لكن كان لها تأثير وهذا طبيعي الحل الآن انك ماتفكرين اصلا بالموضوع وتعاملي معهم طبيعي اللي يكلمك كلميه وتفاعلي معه واللي يطنشك تعاملي معه برسميه لين يطيح اللي براسه ولاتتعبين نفسيتك اكثر من كذا*
|
وكمان عزيزتي اكثري من ذكر الله والاستغفار فمن اصلح علاقته بالله نال كل خير ....
|
اختي خياااالة انا ماعمري تمننت على حد وبالعكس البيت بيتهم وماعمري حسست حد بهالشي بالعكس هم اللي يقررون ويشتغلوا في البيت بدون اي مشورة وبالعكس احسسهم انه انا ساكنه عندهم ومااملك غير غرفتي الانسان حتى لو غلط ينحكم عليه بالإعدام ؟؟؟ لها الدرجة انا ماعمري تمشكلت معهم من اول ماتزوجت وماصارت الحمدلله مشاكل بينا والله انه كانت تصير حركات منهم لكن كنت ابي اكبر راسي عشان امشي حياتي وبالعكس كنت ادخلهم حتى على غرفة نومي يتفرجون معي عالتلفزيون من كثر مانا اعتبرتهم اهلي وهم يقولولي انتي منا ومن هالكلام ولما الواحد يغلط ينسوا كل هالكلام
انتي ماحطيتي نفسك بموقفي وحسيتي باللي انا شفته على العموم الله يعين ويغير حال لأاحسن حال. |
اقتباس:
خليكي رسميه وزيما يطنشوكي طنشيهم وخليكي في حالك خلي زوجك هو اللي ياخد قرار الاستقلال لبيت تاني مو تجي منك لاتتعبي نفسك وتفكري في الموضوع كتير انشغلي بامور تانيه ولا تحاولي تحببيهم فيكي وتجامليهم خليهم براحتهم اللي في راسهم في راسهم ماراح تغيريه باي تعامل منك |
| الساعة الآن 09:31 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©