|
ما رأيكم بتصرفي مع الشايب الفقير في السوق ؟؟؟؟؟؟
السلام عليكم ورحمة الله وبركاته أمس وقت صلاة العشاء رحت السوق وأنتظر المحلات تفتح بعد الصلاة كان في شايب كبير والله ينرحم على كبر سنه يمكن في الثمانين أو أكثر ويالله يسمع لابس ثوب شتوي وعلى قده باسط بسطته يترزق الله مسكين وش هي بضاعته كلها مكسرات موزعها بأكياس بلاستك وكم لعبة وشرابات أنا قبل فترة مريت جنبه ورحمت سنه كان الوقت قبل الظهر قلت له بكم المكسرات قال الكيس بريال وأخذت منه بعشرين لما ركبت السيارة قالت أختي يا ليت شريتِ كل بضاعته ما دامها قليلة ويرجع بيته بالمقسوم بدل ما يقعد طول يومه على أمل أحد يشتري وعلى الأقل يرجع لعياله بدري طبعاً تندمت إني ما اشتريت أكثر المهم سولفت لبنتي الكبيرة عنه وتأثرت هي قلبها ما يتحمل قالت ليه يا ماما ما اشتريتِ كل أغراضه بعد فترة رحت نفس السوق وما لقيته وقبل يومين أخذت أطفالي نتسوق عشان خطبة أختي ومرينا وما شفناه وأمس رحت وشفته وقلت بأشتري كل اللي عنده بس بدون ما يحس بأني أحرجته وأنا قريبتي مريضة وقبل كم يوم أعطتني مبلغ صدقة أعطيها أي محتاج وزعت جزء وبقى 50 ريال وقلت فرصة بأعطيها هذا الشايب بس بطريقة غير مباشرة خفت ما يقبلها في بعض الناس فيهم عزة نفس قمت قلت له بكم المكسرات قال الكيس بريال قلت له أبغى 50 كيسة قال خذي يا بنتي الكيس وعبي اللي تبين حتى ما فيه حيل يحطهم طلع الموجود عنده 44 كيس قلت له خلصتهم عليك وطلعت 100 ريال وقلت له كم باقي حسابي وقام يحسب أنا بسرعة حسبت بحاسبة الجوال طلع الباقي حسيت إنه فرح إن بضاعته تصرفت قلت له بكم الشرابات قال 10 ريال قلت أعطيني بـ 30 ريال بعدين قلت خلاص بأكمل حساب المية بكم السيف ( لعبة ) قال بـ 5 ريال أخذت 4 سيوف قلت باقي 6 ريال أعطني أي شئ بـ 6 ريال أعطاني سيارة قام يدعي لي ساعتها فرحت ولما بعدت عنه جلس على كرسيه وقام يصلي العشاء وكلمت قريبتي قلت خلاص باقي الصدقة طلعتها للشايب وقلت لها السالفة أول ما وصلت قلت لبنتي وفرحت لأني ما أخذتها معي ومرت قريبتي وأخذت الأغراض توزعهم بكرة على أي عامل نظافة مع ماء أو عصير بس أهلي قالوا لما حاسبتِ كان قلتِ ما أبغى البضاعة ترزق بها وخذ الفلوس بس حست هذه الطريقة تحرجه لأنه ما بسط بسطته إلا بيترزق من وراها ما ينتظر صدقة من أحد هل طريقتي مجدية وإلا كان المفروض بس أعطيه الفلوس وأترك له بضاعته يترزق بها ؟؟؟؟؟؟؟ هذا الشايب أحياناً أراه بالسوق يعني مو دايماً هل تنصحوني في المرة القادمة أعطيه الفلوس وأقول له ترزق ببضاعتك ؟؟؟؟؟؟ لأنه أحياناً يبسط في عز الشمس أنا لا أميل لهذا الرأي بس أهلي يقولون بالعكس يفرح إنه جاء له رزق ويمكن يجون له ناس يشترون منه يكون ربح مرتين !!!!! |
مبدئيا اشوف تصرفك كويس هو قاعد يبيع مو يطر (يتسول)
و بضاعته عاجلا أم آجلا ستباع أو تتكدس عليه حتى تخرب لكن انتي كنت سبب بفضل الله بتعجيل رزقه و هو أبخص كيف يدبر فلوسه راح يتصرف ببعضها و يشتري بضاعة أخرى و يترزق حصل خير,,, |
دامه قاعد وباسط بسطته
يعني يبي يستغني عن سؤال الناس ولو كان يبي يطر كان ما تعب عمره وبسط بسطته وكان قعد عند اقرب مسجد وما اتوقع يقبلها حتى لو اعطيتيه ترا والله صعبه مررررره بيحس انه انذل مسكين الله يرزقه من حيث لا يحتسب والله يجزاك خير تصرفك مره حلو |
اقتباس:
جزاكِ الله خيراً على مداخلتكِ أنا أميل لهذا الرأي أيضاً سبحان مقسم الأرزاق وأكيد في اللوح المحفوظ الله كاتب إذا هذه البضاعة راح تتصرف أو تتكدس الله يغنينا وإياه وجميع المسلمين من فضله |
اقتباس:
جزاكِ الله خيراً على مداخلتكِ أنا أميل لهذا الرأي أيضاً أنا حسيت بأني لو كنت مكانه ما راح أقبلها لأنه أكيد عنده عزة نفس وما ودي أكسر خاطره وأحسسه إنه عاجز الله يغنيه وجميع المحتاجين من فضله |
أشوف اللي عملتيه هو الصح
تجيني بنت فقيرة تبيع وأعطيها أكثر من الحساب بشوي أحيانا لكن لازم أختار شي اخذه .. ما احب اني أعلمها على الشحدة ... |
تصرفك جميل جداااا
ولكن مثلا ان اشتريتي ب 40 ريال قولي له العشره الباقيه لاحفادك او اولادك بركه يا عم وهمكذا يتعود عليكي بارك الله فيكي انتي وقت تكونو كثر بالسوق ومن بعيد اقتربو واحده او اثنان مع بعض فالناس تشعر ان ما يبيعه طيب وتأتي وتشتري منه فهمتي عليي وهو نفسيا يفرح بارك الله فيكي |
اقتباس:
جزاكِ الله خيراً على مداخلتكِ أنا أميل لهذا الرأي أيضاً أنا ما اشتريت كل البضاعة بس أشياء بسيطة يعني شغلات للأطفال ومكسرات باقي عنده أشياء ثانية ما أحتاجها يعني بمشيئة الله تصرفي مو واضح إني أتصدق عليه |
اقتباس:
جزاكِ الله خيراً على مداخلتكِ أنا أميل لهذا الرأي أيضاً أنا كذا سويت وحسيت الكل يطالعني لأنه كان وقت صلاة والحريم وش كثرهم حولي المرة اللي قبل كانوا أطفالي معي واتفقت كل وحدة تأخذ شئ وأخواتي بعد قلت لهم نجي على دفعات بس للأسف ما حصلناه وقتها المرة السابقة أعطينا المكسرات سواق أختي ووزعها على ربعه وأكيد فرحوا ترى حتى السواقين يفرحون حتى لو الشئ بسيط مشكورة على ردكِ لي أعتبره تاج على رأسي ولا يهونون الباقين |
تصرفك صح ..
وترى شعور ان الشخص مشى بضاعته وكسب شعور جمييييييل يعني كأنها فرحتين .. الله يجزاك الف خير .. تدرين فيني طبعا نادر جدا اعطي كما يقال المتسولين .. لكن اعطي بسخاء وفوق المطلوب للبائعين البسطاء .. ذكرتيني بموقف تندمت فيه ... كنت فالاردن .. بالسووق - كان شارع طويل وشعبي .. وكان فيه رجل يبيع على مااتذكر مناشف .. كان كبير جدا في السن لدرجة الانحاء .. بس اللي معاي يمشون على عجله الى يومك اقول ياليتني اشتريت من عنده : ( .. الله يجزاك خير ويكثر من امثالك .. |
اقتباس:
مشكورة على مداخلتكِ والله يعطيكِ أجر النية بخصوص اللي ما اشتريتِ منه أحياناً الأجر يكون أكثر من الفعل نفسه لأن النية صافية الله يرزقنا من واسع فضله |
تذكرت موقف حصل لنا وحنا رايحين مكة منذ سنوات كنا مسافرين بالسيارة وأعتقد في الطايف كان في ولد يمكن عمره 8 سنوات يبيع مناشف عند الإشارة المهم فتح له الوالد النافذه وسأله بكم قال بريال قال له الوالد خذا الفلوس وخل المناشف عندك تتوقعون وش سوى الطفل ؟؟؟؟؟؟؟؟؟؟؟ رمى الريال وطار بالهواء وقال ياعم أنا أبيع مو أشحذ يا عمري عليه نفسه عزيزة وإلا كان سوى مثل المتسولين الوالد كان يقصد يعطيه بس ما قبلها الولد على نفسه قال تعالى: ( لِلْفُقَرَاْءِ الَّذِيْنَ أُحْصِرُوْا فِيْ سَبِيْلِ اللهِ لاَ يَسْتَطِيْعُوْنَ ضَرْباً فِيْ الأَرْضِ يَحْسَبُهُمُ الْجَاْهِلُ أَغْنِيَاْءَ مِنَ الْتَّعَفُّفِ تَعْرِفُهُمْ بِسِيْمَاْهُمْ لاَ يَسْأَلُوْنَ النَّاْسَ إِلْحَاْفاً وَمَاْ تُنْفِقُوْا مِنْ خَيْرٍ فَإِنَّ اللهَ بِهِ عَلِيْمْ )سورة البقره قم الآيه273 { الله يغنينا من فضله |
الله يغنينا واياكم من واسع فضله بالعكس لما تعطينه من غير مقابل بتحسسينه بنقص ،،
جداً اعجبني تصرفك نبرات والله يجزاك كل الخير يارب ويجعله بموازينك . |
اسأل الله العلي العظيم ان يتقبل منك هذا العمل ويجعله خالصا مخلصا لوجه تعالى
اولا تصرفك صحيح انتي صرفتي بضاعته بوقت قياسي وسعر مربح اما انك تعطينه مبلغ من المال فهو احراج له وتشجيع على التسول ممكن تاخذين عنوانه وتكون الصدقة في المنزل مش بمكان رزقه ولو انك اعطيتيه المبلغ كصدقه صدقيني ماراح يفرح فيه قد مافرح بأنه انتج شيء ثانيا مو شرط انه يبسط انه محتاج بعضهمإذا كبر يبغى يسلي نفسه بأي شيء عشان يروح الوقت ويحس بوجوده فتخيلي انه كان من هالنوع وقدمتي له المبلغ كصدقة كيف سيكون وقعها عليه سينصدم بالتأكيد وسيشعر بالاحباط اعرف امراءة طاعنة بالسن ابناءها من اثرياء البلد وتبسط بالسوق حاولوا ابناءها ان يمنعوها لكن رفضت بارك الله فيك وبمالك وبأولادك |
ما شاء الله عليك يا نبرات ..
وماهي غريبه عليك ،، الله يتقبل منا ومنك .. لكن ياليت تعطين خبر عنه لأي لجنه زكاة او صدقه .. او تخبرين احد من محارمك ،، لكي يتواصل معه و يتقصى حاجته .. الله يجعلنا واياك ممن يوق شح نفسه وجعلنا من المفلحين |
اقتباس:
أشكر لكِ مداخلتكِ الطيبة ويا رب إني أكون سبب لإدخال السرور في قلب مسلم فعلاً بخصوص من يبسط للتسلية بدل الملل أذكر مستخدمة في مدرستي أبناؤها وضعهم طيب ويضغطون عليها تجلس ولكن تقول بدل ما أقعد بالبيت وعيالها كبروا الله يغنينا من فضله |
اقتباس:
مشكورة أختي على مداخلتكِ وفعلاً رأيكِ بخصوص تقصي وضعه عن طريق لجنة زكاة أو صدقات لم يخطر ببالي وسأسعى في ذلك تصدقي قبل شوي رجعت من نفس السوق مع قريبتي نخلص أمور الحفلة ومريت بنفس مكان الشايب وما لقيته والله العالم وش سبب غيابه عسى المانع خير ؟ بس ارتحت نفسياً إني أمس أعطيته المقسوم بطريقة حلوة ولما قلت لقريبتي وأشرت لها على مكانه قالت تذكرته سبق شفته من قبل يارب نكون سبب لإدخال السرور على غيرنا من المحتاجين |
أحيانا يجيني مثل تفكيرك
لكن أفكر أقول حرام ممكن ينجرحون من تصرفنا حتى لو كان فقير اكيد عنده عزة نفس جزاك الله خير حبيبتي وربي يرزقك ويرزق كل محتاج |
الله يجزاك خير ويكثر من امثالك
|
اقتباس:
مشكورة على مداخلتكِ والله يعطينا على قد نيتنا وأحسن والله يغنينا من واسع فضله |
اقتباس:
مشكورة على دعائكِ الطيب ولكِ بالمثل كلكِ ذوق عزيزتي :22: |
ماشاءلله تبارك الله تصرفك جداً صح ومثالي ,’~
ماتعرفي قد ايش ينبسطو واححلى شي لمن يدعولك مساكين حبايب قلبي الله يرزقهم من حيث لا يحتسبون ,’~ وكمآآن حبيت اضيف ,’~ عاملة النظافه في الحمامات اعطيهم والله يفرحو مرررا ولو كان شي بسيط أهم شي انك افتكر,’~ وكذلك البلدية مساكين من الضهر وفي عز الشمس يشتغلو وينظفو الشوارع أحس انهم يستاهلو ,’~ والله يرزقهم السعاده ولنا اجمعين يآآرب .,~ |
اقتباس:
مشكورة على مداخلتكِ وكلكِ ذوق :22: فعلاً أنا لو أعطيت أحد محتاج وسمعته يدعو لي أحس بوناسة أكيد الكل شعر بها وقت ما تجيكِ دعوة من فقير فنحن نرزق بضعفائنا والعمال كما تفضلتِ من فئة المحتاجين أنا ناقشت هذا الأمر مع بعض الأعضاء في موضوع آخر لي بعنوان ( كيف نفرق بين المتسول والممحتاج فعلاً ؟ ) في نفس هذا القسم |
| الساعة الآن 11:58 PM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©