|
طردته من البيت ... وش الحل؟
السلام عليكم ورحمه الله ...
اتمنى ان تنوروني بحل لاني احس الامور بدت تفلت من يدي ... القصه بدأت قبل سنه ان ماكان اكثر تعرف زوجي على وحده من غرف الدردشه وكلمها وهي متزوجه وطبعا لما اكتشفت الامر وواجهته قال نزوه والله يلعن الشيطان وابشري ومشيتها له وتغاضيت وصرت اتابعه من بعيد لبعيد وفعلا وجدته صادق بتركها ...لكن بعد فتره عادت علاقتهم واكتشفتها ايضا وواجهته وكان السبب اني مقصره معه بكلام الحب لاني كنت ذيك الفتره تعبانه واتعالج ...فماكنت القى وقت حقيقه لتدليعه اوغزله ...المهم انه وعدني وقال خلاص لو رجعت لها لك الحق بأي شي واي قرار قلت لو رجعت لها تطلقني قال ابشري . اكتشفت يوم الخميس محادثات له معها نسي يمسحها وهو المبادر بالتودد والحديث صراحه وقتها انفجرت وقلت اطلع برى البيت ومستحيل تدخل البيت هذا ويوم الاجازه تجي توديني لاهلي خلاص ابي الطلاق لاني اسكن بعيد عنهم ... والان من يوم الخميس ليوم الاثنين وهو ينام برى البيت طبعا لان عندي دوام فهو يجي يوديني الدوام ونكون على الصامت لاكلام ولاشي ويرجعني البيت وخلاص يروح طبعا هو يوم الجمعه حاول يرجع بس انا رفضت بس محاوله بارده وبعدها وقف اصلا حتى انه يحاول يصلح الموضوع او يجي يعتذر ويحل الاشكال بالعكس احسه زعلان !!! زوجي طبعه رومنسي بزياده يعني يبي 24 ساعه حب وغزل ودلع والحمدلله انا مومقصره معاه بأعترافه هو هي بس فتره لما كنت مريضه ... ورجعت امورنا طيبه واما سئلته قلت وش قصرت فيه ؟؟؟ نزل راسه وخرج لما طردته الان انا متضايقه لاني كل لحظه اتخيله يسولف ويضحك معها ... وانا متأكده انه ماقطعها او تركها وشكلها هي مقويته لانه يوم طردته كان انسان ندمان ووده يصلح الامر لكن بعد كذا الرجال مستقوي ومسوي زعلان ولاهمه . طبعا مابينا اطفال انا عندي مشاكل وهو كمان ...حياتنا ممتازه هو مواصفاته ممتازه ويحبني وانا بعد بس ماادري ليش خان !!! كنت اربط فتره خيانته لي لما اروح اسافر لاهلي فأنشغل عنه فقلت بلاش اروح ولارحت اروح معه وارجع معه لكن الحين انا معاه ووضعنا من كل النواحي ممتاز ...وش السبب الي خلاه يرجع لها انا عنيده وهو اعند ...لكن امورنا كانت تمشي الحمدلله يعني ماعمرنا نعاند بعض في اي شي يخص حياتنا متفاهمين جدا لكني انصدمت من الخيانه ومع نفس البنت ولاعنده عذر !!! ايش الحل الحين لو اقوله تعال نتفاهم بيقول ايه لما شافتني مستقوي وزعلان ويالله ارد عليها الكلمه خضعت ووقتها بيحس غلطه ولاشي ولو مااناديه اعرف زوجي مايحب المشاكل ولاعنده القدره على المواجهه ابد انا نفسيا تعبت من خيانته وافكر بالطلاق لكني احبه واخاف هالامر يأثر على حياتي مستقبلا يعني اصير ابكي على الاطلال طول عمري ساعدوني الله يرضى عليكم |
زوجك يحبك و مواصفاته ممتازة و إنت تحبينه و متفاهمين
لا تتركينه لقليلة خوف الله هذي تلعب فيه أنت أولى و أحق فيه دافعي عن بيتك و ربي بينصرك بإذن الله لأنك على حق و الإخوان هنا بإذن الله بيساعدونك الي بغيت أقوله عوضيه بالي يبيه و احرصي عليه هذا جنتك و نارك |
الله يهديك انتي كذا تركتيه لها
خليه يرجعه و تقدرين تأدبينه بألف طريقه |
الله يجزاكم خير ..
انا طردته بلحظه غضب ووقتها لازم اني استمر لاني واجهته وابي اعلمه ان الي سواه شي كبير ...ومن ناحيتي ابد مو مقصره من كل النواحي وهو دايما يطري ويثني علي . وان شاء الله الاخوان الافاضل يساعدوني قبل تكبر الفجووه |
قوليله عاجبك حالنا كذا؟؟ ماهمك تهدم بيتنا تهدم حياتنا وعشان مين؟؟ عشان وحده تخون زوجها وتكلمك وتكلم عشره غيرك ؟؟
|
للاسف يادكتورة ان العينات اللي وجدها زوجك في غرف الدردشة كثيرة جدا
وتلاقين ان كثيرات منهن مفتقدات للحنان والتعامل الجيد وينجرفن نحو الخيانة زوجك لو كان بمثل هذه المواصفات فهو مكسب رائع لاي بنت تنشد الحنان وطيب التعامل لاحظي انه متزوج وهي متزوجة يعني لغة الحوار بينهما مشتركة.. انا لا ابرر الخيانة لانها اقذر من ان تستساغ.. ولكن فكري بعقلك واتركي عنك العاطفة للحظات هل تقبلين ان زوجك يبث عاطفته لبنت غيرك..؟؟ اكيد لأ هل تستسيغين ان ضحكاته وهمساته وكلماته اللي هي اصلا حق من حقوقك تروح لغيرك؟؟ اكيد لأ مع العلم وانا ادرك تماماً ما اقول.. ان خويته هي الان تسعى وراء زوجك لانها وجدت فيه ماتبحث عنه.. وانتي ماقصرتي أهديتيه لها بكل سهولة معك حق تغارين وتطردينه من البيت فالخائن جزاءه القتل مو الطرد ولكن فكري بعقلك.. رح تلاقي ان كلامي منطقي وانتي تهديدك وطردك له بيكون اثره جيد في ردعه مستقبلا اذا بادر هو بالاعتذار وطلب الصفح فلا تبخلي عليه بالمسامحة المشروطة اللينه واعلمي ان مثلك الكثيييييييييييييييييير والكثييييييييييييييييييييير للاسف وفقك الله |
كان ينبغي ان يكون علاجك هو احتوائه وغمره بالحنان أكثر من المعتاد ولكنك تأخرت بالعلاج فربما أصبح ادمان
فهل انت شخصيتك قويه لتطردي زوجك وهذا ما المسه من معرفك فغيري من طبيعتك وكوني مطيعه وديعه ورومانسيه وجددي حياتكم الخيانه صعبه ولكن الحقيه قبل ان ينجرف الي ما هو أعظم المهم بيني له انك شعرتي انك مقصره تجاهه ولكن ليس بيدك ويتحاولي بذل جهدك ولو تأخذي أجازه من عملك وتتفرغي له كأنه مريض ويحتاج علاجك فهو في نزوه عابره وقسوتك تزيده اصرارا عليها |
اقتباس:
|
اقتباس:
جزاك الله خير . انا اكيد بسامح بشروط لكن هو ماعنده القدره على مواجهه اخطاءه فللان ماحاول يصلح الوضع ...الله يسعدك على الرد |
اقتباس:
لكني معه شخصيه ثانيه لانه هو اصلا انسان رائع مااقدر اظلمه الكل يحسدني عليه انسان حساس وحنون لكن صدمتي فيه وفي الكلام خلت رده فعلي قويه خاصه اننا متفقين لو رجع لها يطلقني حسيته هانت عليه عشرتي . حياتي معه متجدده والحمدلله حريصين على بعض من كل النواحي وبالنسبه لدوامي فأنا استاذه في احدى الجامعات ودوامي فقط يومين بالاسبوع يعني مايذكر علشان اقول كان سبب بتقصيري ويكون هو بدوامه بعد لو بينت له اني مقصره حتى لو بالكذب راح يعتبر هذا سبب لخيانته وانا ابي يحس انه غلط غلطه كبيره علشان مايفكر يرجع له الله يوفقك ويسعدك على ردك اتمنى الاخوان يساعدوني اكثر |
خيانة الازواج ،، دااااء العصر ،،
تريدين حلاً،، لصفاءك انتي وزوجك ام لزوجك الخائن ام لمن تخون مع زوجك ثلاث محاور يجب العمل عليهاااا ،، زوجك سامحيه وحاولي وعظه دائماً وقوي صلته بخالقه ،، من تخون مع زوجك كلميهاا وهدديهاا. لكي تنردع وتعرف حدود خالقهاا.. وذكريها بالله ،، انتي كزوجه ذاقت مر خيانة زوجها ؛؛ اعملي على الامر بالمعروف والنهي عن المنكر ،، وحاولي ضبط نفسك امام زوجك ،، وليكن همك رضا خالقك ،، اعانك الله ويسر امرك ورد زوجك لربه رداًجميلاً،، |
طردتيه ؟! والله مو حلوة لابحقك ولابحقه
كان عاقبتيه بأسلوب ثاني أرقى شوي الغلط منكم الإثنين هو مو من حقه يخونك بسبب تقصيرك الأولى أن يعاتبك أن يوجهك أن ينصحك وإنتي غلطتك طردتيه بس الحين اللي صار صار حاولي تصلحي الأمور وترجعوا تتفاهموا مع بعض عن النواقص في حياتكم او السلبيات بكل واحد فيكم وتغيرونها دافعي عن زواجك للآخر وخليه يكره بنت ابليس بأسلوبك ودلعك وغنجك وكثفي جرعة الحنان والرومانسية ولاتنسي تعتذري عن فعلتك معه وان شاء الله يطيح الحطب وترجعون زي أول وأحسنا |
سامحيني اختي
والله ما بدي اضع رد وانا لست بخبير كثيرا ولكن بالنسبة لي مهما وصلت المشكلة لا يجوز لك ان تطرديه من المنزل اصلا يمكن يقول بعقله اجت منها ما اجت مني ويروح يدور له على حبيبة ( واضح حتى لو انه يمدحك انه يفتقر للعاطفة ) حتى لو كنتي مدللتيه هو طبعه والله اعلم يحتاج للمزيد او انه مدمن على العطف والحنان من الزوجة المهم بدون زعل من الصراحة واضح انه شخصيته ضعيفة معاكي في التعامل خصوصا لان ما يصح تكون اخلاق زوجين مبنيه على هذه الطريقة من عدم الاحترام فكرك هذا ولد صغير يعني ؟ احترميه شوي شوفي مشاكل الناس رح تعرفي انك بنعمه وحلي مشكلتك بهدوء وروية وانسيكي من الكبرياء اللي ممكن يوديكي في مشاكل اكبر لاحقا |
اقتباس:
|
اقتباس:
|
اقتباس:
جزاك الله خير بكل كلمه بس اخوي الاحترام موجود ولله الحمد بينا ورده فعلي هذي كانت نتيجه الكلام اللي شفته الله لايحط لامسلمه ولامسلم فيها فقدت اعصابي وزوجي شخصيته ممتازه ولله الحمد مرن بس مو معناه ضعيف لكن لانه غلطان وماعنده اي مبرر قبل الطرد بدون اي اعتراض لكني عموما اعترف اني غلطت بطردته وبودي اطلح الموضوع لكن مايمنعني ان اكون المبادره بالاصلاح فيفهم ان غلطه هين |
اقتباس:
انا حطيت الغلط عليك فقط في مسألة الطرد ومسألة رجوعه لهالشي يمكن ضعف إيمان منه حاولي تعززي هالجانب فيه من خوف رب العالمين قوليله هالشي ماترضاه على بنتك صح ؟ قوليله الدنيا دوارة ماتدري يمكن ربي يبليني وبس تعتذري وضحي له إنه الأعتذار فقط لمسألة الطرد بس إنك ماخذة منه موقف وزعلانة على محادثة بنت ابليس حبوبة كم لك متزوجة؟وبالنسبة لمسألة الإنجاب قلتي إنه هناك مشكلة فيكم ثنينكم هل عندكم محاولات للعلاج يعني ولاتاركين هالشي على رب العالمين لك الحرية في الإجابة على أسئلتي عزيزتي |
اقتباس:
لي خمس سنوات متزوجه وبالنسبه للانجاب والله نسعى بكل السبل ومحتسبين ومتمسكين ببعض رغم ان المشاكل بسيطه جدا ولله الحمد بس ربي ماكتب الله يرزقني وكل محروم الذريه الصالحه . |
آآآمين وياك ويفرج همك
ماشاء الله تبارك الله انا هذا اللي لاحظته حبكم لبعض من كلامك ويارب ياكريم نسمع عن خبر حملك عن قريب يمكن زوجك يصحصح من اللي هوا فيه حاولي تشغلين فراغ زوجك تطلعون توكلين له مهام يسويها او يشتغل شغلة ثانية مثلا أو تطوع عالأقل يبعد شوي عن الشات موفقة |
ربي يسعدك ويرزقك الذرية الصالحة في القريب العاجل
الحل ينقسم لقسمين .. اولا ترجعيه البيت بس بدون طلب مباشر منك ... عشان مايحس انه تطنيشه جاب نتيجة فايصير اسلوب عنده ثانيا .. حل مشكلة المحادثات نجي للقسم الاول .. عندي فكرتين وشوفي اللي تناسبك .. اولهم ترسلي له على الايميل كلاااام قوي عن الخيانة وطالما انه انسان عاطفي و رومانسية .. دقي على وتر العواطف وقد ايش الخيانة موجعة لك واساليه لو كان مكانك ايش كان بيكون موقفه ؟؟ وذكريه بالله و بعقابه و انه الدنيا دووارة و من هالكلام و كرهيه بهذه المرأة و كيف انه يكلم وحدة اهانت زوجها و خانته .. مايخاف ربي يرده له بزوجته او بناته مستقبلا ؟؟ و كيف انكم تطلبوا الذرية من رب العالمين و هو يسوو هذه المعاصي ؟؟ يعني اكتبي بكل مشاااعرك و ارسليها و باذن الله بس يقراها يتاثر و يرجع يستسمح و ساعتها اسمحي له يرجع عالبيت ولما يكون عندك ساعتها حلي القسم الثاني من المشكلة بالحوار و التقاش و اعادة ماجاء بالرسالة وجه لوجه ولا تنسي الدمووووع :) تلين قلبه .. وبعد ماتتصافوا باذن الله لا تخلي له اي فرصة يكون فيها لحاله .. خليه يمل الحب و الرومانسية مع تكثيف الجرعات الدينية ... الفكرة الثانية عشان يرجع البيت بدون ماتطلبيه انتي تتصلي عليه بالليل و تتظاهري بالمرض (مادري ان كان يعتبر من الكذب الجائز بين الزوجين ) وتطلبي منه يجي ويجيب لك خافض حرارة و بندول الخ واكيد بيجي مسرع و خايف عليك وو يسالك ايش فيك فا تقولي له من يوم المشكلة و انا ماقدر اكل ولا اشرب :) ولا اناام تعبت تععععععبت ... عشان يشوف تاثير عملته عليك ودام انه يحبك فا بيخااف عليك و بيجلس معاك ينتبه عليك ويطيح الحطب... بس بعدها ارجعي افتحي الموضوع معاه وزي ماذكرت اعلاه اتكلمي معاه من ناحية دينية و عاطفية الخ الخ ربي يهدي سرك و يهدي لك زوجك و يرزقكم الذرية الصالحة يارب |
سبحان الله هذا الموضوع الردود فيه كلها هادئة مع قمة التفاعل ..
كلها كانت بعتب هادئ .. شيء جميل بصراحة !! أسأل الله أن يصلح بينك وبين زوجك ويعيد علاقتكما أحسن مما كانت عليه .. |
أختي الكريمة
من خلال كلامك لم تبدي أي سلبية على زوجك غير مسألة الشات وهذه المسألة كان سببها معروف ( وهو أنه كنتِ تعبانه ولم تتجاوبي معه بالحب والحنان .. فذهب يطلبه عند غيرك ) وطالما أنك تحبي زوجك ومقتنعه به تماماً وليست لديك نية بالتفريط فيه فدعي عنك التلميح والقيل والقال وإحساسي وأحساسه والكلام الفاضي أنتِ معترفه بأنك غلطتي غلطتين 1- طلبك للطلاق .. وأنتِ لا ترغبي ذلك 2- طردك له من البيت والحل : هو أن تكلمي زوجك بالجوال .. وتطلبي منه أن يأتي إليك لأنك تبغيه بموضوع هام .. ولكن إذا وصل عند الباب يكلمك تنزلين له وتقولين له ( ودنا البحر ) أو ( مطعم ) أو أي مكان تفضليه .. وتكلميه بالموضوع هناك وقولي له .. أنا آسفة ياحبيبي على ذاك اليوم ( يوم الطردة ) بس لا تجيبي كلمة ( طردتك ) وأنا كنت معصبة جداً وماني في وعيي والسبب أنت لأني أحبك ومتمسكه فيك وأنت زوجي وما أرضى عليك أن ترتكب الحرام والخطأ ليش تقهرني ليش تروح لغيري كل هذا عشان تعبت شوي وأنت عارف أني مستعدة إني أسعدك وأرضيك دائماً ليش تكسر حبنا يرضيك إللي قاعد يصير بحياتنا رجاءاً إذا كنت تحبني وشاريني لا تخلي أي أحد يفرق بينا أبغاك توعدني إنك من الآن تائب إلى الله سبحانه وتعالى من كلامك مع إمرأة متزوجة خانت زوجها وأبغاك توعدني إنك تتركها مهما حصل وترجع حياتنا حلوة زي ماكنا عايشين وبعدين إشتري أكل أو شراب على حسابك وقولي له .. بناكله في البيت أنا وياك ( عاد هو بيفهم إنه بيرجع خلاص للبيت ) أخيراً لا تضيعي حياتك الزوجية للحظة غضب غير محسوبة أعانك الله |
اقتباس:
الله يألف بينكم يالغلا ودائماً ذكريه بالله يارب نسمع كل اخبار حلوة عنك ... بالتوفيق |
كلمي زوجك ...
واتفاهمو على رواق وبرري له انه سبب مرضك هو الي ابعدك عنه بهالفترة ولكنه مش مبرر لزوجك بان يخون ... ولاتخليه ينسى... انه من الواجب عذر الطرف الاخر ... مش فرصه للخيانة ... اتمنى يكون في تفاهم حتى مايصير مشاكل بينكم ... ومسأله طرد زوجك قمة الخطأ ... اتمنى انك لاتعيديها موحلوة بحقك كتصرف غير لائق ومو حلوة بحق زوجك .. انه يروح ينام برة البيت .. هناك اساليب ارقى وانفع في التعامل مع الزوج وبالاخص في مثل هاي الامور.. ( تعجبت من خضوع زوجك واطاعته لامرك .. هل دافع عن نفسه او برر موقفه...؟) |
اسأل الله أن يوفقك وييسر أمرك
اصبري قليلا .. لعل المبادرة بالإصلاح تكون منه .. لابد أن يشعر أن خطأه غير هين لانك نبهته أكثر من مرررة .. والأخت متزوجة .. كيف مايخاف الله في زوجها ؟ إذا طالت المدة ولم يبادر ..فأدخلي طرف للإصلاح ولايشترط أن يعرف موضوع الخيانة ..لا كأنكما متخاصمين .. فيتصل أخوك مثلاً ..ويقول عرفت من فلانه أنكما متخاصمين ..وتعوذو بالله من الشيطان الرجيم .. ويقول بأنه سيكلمك لتتصالحا ..وأنه سيتدخل لتقريب وجهات النظر .. وهكذا .. وأنت قولي لزوجك مادام فلان تدخل وأصر للإصلاح فلأ\جل خاطره سأعود ولكن بشروط ومنها تأكيدات قوية وضمانات ..تؤكد لك أنه لن يعود ولو أن يكون جهازكما مشترك .. أنا لا أريد ان أضايقك ..لكن الحياة مع من يخون مؤلمة ولاتطاق ومن يفعل ذلك يحتاج لدرس قوي حتى يتوب .. ألحي في الدعاء .. |
اقتباس:
ياعيني عالحلول الجهنميه :22:;) بما ان زوجك رومانسي فهالحل اقرب لنفع واتفق معك في انك لاتبادري بالاتصال والاعتذار بطريقه مباشره حتى لايستهين بالامر |
اقتباس:
|
اقتباس:
الف شكر لك على الحلول وفعلا زوجي عاطفي درجه اولى ...الله يجزاك خير وينولك الي ببالك |
اقتباس:
|
اقتباس:
لكن سبب لجوءه للشات انقطع يعني مرضت فتره وقصرت فكلمها وسامحته لكن المره هذي مافي اي عذر له في الرجوع لها وكل عذره ( هي تبلتني بالاتصالات !!) اكييد راح احرص على حياتي وطلب الطلاق كان لحظه غضب منه وبأخذ برايكم كل الشكر الله لايحرمك اجر كل كلمه |
اقتباس:
|
اقتباس:
بالنسبه لخضوعه ياقلبي لاني كنت برده فعل عنيفه وهو ماحب يزيد الاشكال فطلع وكلمني علشان يحاول يبرر وطبعا كل التبرير انها هي متبليته !!! ويحاول يتخلص منها طبعا رفضت انا اي عذر للخيانه |
اقتباس:
الله يجزاك خير على كل حرف |
اقتباس:
الله يجزاكم كل الخير وبأذن الله اطمنكم |
حسبي الله عليها ..إدعي إن الله يفضحها عند زوجها ويكفيك شرها ..
|
الله يهدي الجميع
|
اقتباس:
لذلكي اتصلي عليه وسوي معه الخطه واقعدي يومين على الفراش تمثيليه بس ان شاء الله انه يجوز لانه دفع ضرر الطلاق والخصومة وخليه يخدمكي وانتي تظاهري عليه وخليكي ضعيفه قدامه وابكي طبعا من الالم مو منه وخليه عندكي 24 ساعه وشوفي كيف راح تكون علاقتكم بعدها وبعد ماترجع العلاقة اطلعوا تعشوا برا في مطعم فخم واذا انتم بجدة انا ادلكم على مطعم فخم وتكلموا بالموضوع علشان تقفلوا عليه للابد واذا هو مستحي او يخاف من شخص له علاقه فيكي قوية مثل ابوكي اخوكي عمكي قولي له اذا ما حليتها انا بقول الموضوع لفلان لانه اخر حل ولاتفكرين ابد بالطلاق |
ياليت زوجي رومنسي
كان اقعد احبحب فيه ليل نهار وش وراي اصلا الرومانسية تشفي المرضان ـــ<< رومنسية درجة اولى سبحان الله دايم الرومنسيات يطيحون بخشنين والعكس بالعكس عموما انتي غلطانة قصرتي مع زوجك وان كان هذا م مبرر له للغلط الحل غرقية رومنسية وبيسحب عليها |
الله يهديه ,,,يعني حتى فترة المرض مايراعونها,,مجرد ماتمرض الزوجه قام يلعب بذيله,,و المشكله يقولون الزوجه ناكرة العشير أجل هم وش يصيرون؟؟,,سبحان الله
|
اقتباس:
ولو مرضتي لو حتى بمرض خبيث مايقدر المرض ولايراعي ويروح يدور رومانسيه برا.. والله مافي احلى من الزوج الجاف البارد..بس مو بارد في كل وقت,,او الزوج الوسط الي ماتفرق معه دلعتيه ولا مادلعتيه,, |
| الساعة الآن 08:02 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©