|
ترفضني لسبب سخيف وتقترح اختها علي .المستجدات 58/ 67/ 69/ 76/87/99/103/110
مرحبا بالجميع
والله كنت دايم ابحث عن منتدى اجتماعي عشان اطرح فيه مشاكلي ودخلت منتداكم وصرت اتابع معكم من فتره وسجلت وانتظرت التفعيل وهذاني اجي واقولكم همي قلت يمكن تنصحوني بشي فيه خير ووالله اني محتار واذا شاورت اصدقائي قالوا لي اشكمها وتزوجها غصب عنها ولو اظطريت انك تكلم ابوها وامها بعد لانك متكلف ومستأجر ومجهز كل شي ودافع المهر وانتم تعرفون وش كثر هالأيام الزواج صعب والتكاليف كثيره مره وصعبه اول شي انا رجال عمري 26 من أم أجنبيه وأب سعودي متوظف من فتره وخلصت أموري وتجهزت للزواج لأني كنت ارغب في الزواج من زمان توكلت على الله وكلمت الوالدين وخطبوا لي ثلاث مرات وحده منهم شفت الشوفه الشرعيه لكن ما صار نصيب خطبوا لي رابع مره وشفت الشوفه الشرعيه وقبلوا فيني وتملكت على بنت الناس عمرها 23 مثل ما يقولون لي اول ما بديت اكلمها كانت مثل اي وحده تستحي وماتتكلم كثير ومع الوقت صرنا نتكلم بطلاقه وكأننا نعرف بعض من زمان طلبت مني اصور وارسلها الصور وانا في البدله وانا في الثوب والشماغ وانا وانا وارسلت صور كثيره عن طريق الواتس اب في البدايه ما كانت تقول رايها وبعد فتره بسيطه قالت انا بصارحك قلت سمي صارحيني قالت انا ما ارتحت لك ابدا من ارسلت لي الصور انا محاكيكم والله انصدمت الصراحه وقلت لها وش السبب قالت انت جميل بزياده وانا اول ما شفتك كنت طايره من الفرحه لانك وسيم وحلو بس ما قد فكرت بيوم من الأيام ارتبط في واحد مثلك وانا سكرت السماعه في وجهها ولا قلت لأحد ترددت اقول للوالده او اختي لكن سكت ومشيت السالفه ما دقت ولا مره علي انا اللي دقيت بعد ما هديت نفسي وحاولت بكل ما اقدر اني ما اذكر لها الموضوع اللي صار بينا ابد هي تجيب طاريه وانا اقولها ترا اليوم رحت وشريت كذا وش رايك وش تبغين الوان وهي ترجع لنفس الموضوع وتقول لا تتعب نفسك انا مستحيل ارتبط فيك وتقول انا مقدره انك تكلفت وتحملت مصاريف وانا صرفت اكثر من نصف المهر تقولي بس ماراح يروح تعبك انت كلم ابوي باللي صار بينا وقوله اني ابغى اختها اللي اصغر منها وتقول لي انها حلوه وتنفعون لبعض وتقول الصراحه لوتقدم لي اخوك من ابوك كان قبلت على طول وانا والله سكرت السماعه في وجهها مره ثانيه وما دقيت عليها ولا دقت علي ولا حتى في الواتس اب وانا متنرفز ومالكم علي يمين اني ما انوم في الليل مثل الناس انوم ساعتين واصحى واجلس اهوجس وافكر وللحين ما قلت لأهلي قسم بالله اني ضايق صدري والدنيا ضايقه فيني البنت كلمتها فتره طويله وقلبي مال لها واذا تذكرت انها قالت لي هالكلام ودي اصفق بأقرب شي عندي في الجدار مدري وش اسوي |
الله المستعان سبحان الله المعطي ، أرى أن تتركها بما أنها صارحتك والله يعوضك وأنت بدورك عليك بأبلاغ أهلك وأهلها برأيها وانهاء الموضوع . لا تتعب نفسك بالتفكير واحمد الله أن تم الموضوع من بدي وعرفت قبل أن تقطع شوط كبير وتندم . أيضاً برأيي لا شيء بعد المصارحة يمكن أن يتخذ . دعواتي لك بالتوفيق |
بس انا ما قطعت شوط كبير بس
انا كملت كل شي واستأجرت وشريت اثاث ودفعت مهر فوق الخمسين ألف وعلي مديونيه من البنك واخوي متسلف منه مبلغ والوالد مساعدني يعني قطعت كل الشوط ولو ابي اخطب وحده ثانيه بدفع مهر جديد وبيروح علي آجار بيت 6 شهور 14 ألف ريال ماهمني هذا كله مع اني بتحمله فوق ظهري بس ليه ترفضني بعد ما تم كل شي وبنيت واسست حياتي ومو بهالبساطه نفسخ العقد وينتهي الموضوع ؟ طيب اتزوج اختها ؟ وادفع لها مهر اختها اذا رجعته لي وبترضى اختها او لا |
الله يهديها بصراحه بعض البنات الله يهديهم عليهم تفكير
الحمدالله الذي عافنا أخوي الله يعوض عليك تقدر تاخذ المهر كامل وأختها ماراح تكون بعيده عنها عشان كذا نصيحه أبعد عنهم وخلال هالفتره الله يسخر لك وتتملك علي وحده ثانيه بسرعه الله يوفقك أخوي ويكتب لك إلي فيه خير |
تستهبل هي ولاشلون ؟؟
توها تتذكر إنها ماارتاحت لك والله جد حرام التكاليف اللي حطيتها تكسر الظهر بنات هالأيام مايقدرون اللي يتعب عشانهم وبعضهم مايستاهل اللي يعطيهم وجه بس مدري اي بنت جريئة تصرح لزوجها إنه لو طلبها أخوه كان ممكن توافق ؟؟! و تخطب لك أختها !! عالعموم لازم تبلغ أهلك وأهلها يشوفون لهم صرفة معاها ويعقلوها الله يعينك ويفرج همك |
حلوه ذي نلعب جالسين هذا زواج مو لعبه عشرة عمر اجلس معاها اعرف الاسباب اكيد في سبب ولا احد قايلها شئ لا بد من جلسه مصارحه واذا اصرت كلم ابوها ما تجلس كذا الوقت يمر واكيد ابوها بيعرف للبنت
واذا اصرت على موقفها من حقك يرجعون لك المهر كله حكاية تتزوج اختها مو حلوه حشه سياره مو زواج اتركهم ودور ناس غيرهم يخافون الله يعرفون ان الزواج مسئوليه وبناتهم يبون الستر خذها نصحيه الا الزواج مو بالغصب ولا بالقوه مراح احد يتعب الا انت تبي تتزوج عشان تعيش حياه زوجيه مشتركه فيها تفاهم وحب ولا تبي تعيش مع وحده مغصوبه عليك لا وبعد تعرض اختها عشان بكرة نهار بصير حياتك كلها مقارنه |
لا حول ولا قوه الا بالله
الزواج اصبح مثل اللعبه?? لا تعليق |
ايه بس انتم لاتحسبونها بهالباساطه ابي احطكم في مكاني
تخيلو بغض النظر عن ان قلبي مال لها وبنيت على انها زوجتي وام لعيالنا دفعت مهر 55 + آجار بيت 14 + اثاث بيت 28 + سياره وانا لو ما كنت بتزوج ما اشتريت سياره تليق فيها ب 70 + مبلغ وفرته لحفلة الزواج 35 وكانت شارطه يكون فيه حفلة حريم بس المبلغ باقي معاي ما سويت شي ولاحددنا موعد الزواج والدخله انا كنت موفر من راتبي 75 الف وكنت شاد على نفسي عشان اتزوج وتدينت من البنك 80 وطلعت علي فوائد فوق 25 الف يعني بسدد لهم 105 واكثر شوي وتسلفت من اخوي 30 وابوي ساعدني ب 30 هذا غير الهدايا والله اهديتها هدايا بمبلغ خيالي شوي بس والله ما امن عليها فكرت انها زوجتي وبتكون زوجه لي والله ثم والله انه حرام عليها وحرام علي افوت على نفسي فرصه والله لو اكنسل موضوع الزواج بخسر نصف المبلغ تقريبا 90 الف وبجلس 4 سنوات اعوض اللي راح علي واجمع فلوسي عشان زواج ثاني لا تقولون لي اتركها بدون ما تفكرون معي ولو خطبت مره ثانيه البنات يرفضون يتزوجون خلال شهر او شهرين بالكثير كلهم يشترطون 5 و6 شهور عشان التعارف وهالأمور حطو نفسكم مكاني وقولو لي وش الحل الصح |
اي سبحآن الله ، يعطي ناس نعم وترفسها بدل ما تحمد ربها عليهاا أخي أفهم منها السبب وناقشها بهدوء ، بدل ما تقفل الموضوع وهي تعيد وتزيد فيه . ثم أذا اقتنعت أخبر اهلك وأهلها بالموضوع . ايضاً احتمال أن أختها تريدك من قبل ربما اذا انت تعرف العائلة وأخلاقها وتعاملاتها ، وأهلك يعرفون أختها الصغيره وأخلاقها وانت ما عندك مشكلة عادي أخطب أختها وأعانك الله وسددك |
غريب جداً تفكيرها وتبريرها!، أخي أعتقد أن النفس طابت بعد حديثها، لماذا لا تتحدث مع أبيها، وتُرجع المهر وكل التكاليف منها التي تكفلت بها من ناحية آجار الشقة والأثاث.
أحياناً تسمع تصرفات وقررات من البنت أو الولد، تشعرك بأن هذه التصرفات لا يمكن أن تحدث حتى من الأطفال وكأن الزواج لعبة لديهم. |
فاهم ان الزواج مو بلعبه وصعب ارتبط في وحده مغصوبه او ارتبط في اختها مكانها بس عشان توهقت بموضوع الزواج وما اروح بعيد عنهم وادري ان اختها مو بسلعه وادري عن هذا كله
يعني لو كلمت اهلها وغصبوها يمكن بعدين تطلب الطلاق او ما تعيش معي عيشة راحه واكون مطمئن معها والله اني ما ادري وش اسوي انحطيت في موقف صعب والله العظيم انا ما تقدمت الا وانا راغب في الزواج وابي اتزوج لا انا ما اعرفها هي تكون من اقارب زوجة ابوي الأولى وزوجة ابوي هي اللي اشارت لنا عليها |
غريبة هالبنت الله يصلحها
اخي الكريم الله يعينك اكثر من الاستغفار والدعاء فهو مخ العبادة والدعاء سهام الليل التي لاتخطئ وحاول تفاتحها بالموضوع وتناقشها لاتقفل الموضوع حتى تنتهو منه واتناقش مع والدها وافهم منه الاسباب والله يعوضك خير ويرزقك على قد نيتك يارب ويكتب لك اللي فيه الخير |
كم عمرها هالبنت ,,
جدا تصرف يقهررررر أعانك الله أنا أشوف انك تكلمها ثانية ,,مش للأستعطاف أنما لوضع النقط على الحروف و إذا ما فاد كلم أبوها ,,يا تعقل و تكمل زي العالم و الخلق و تترك هالسبب السخيف أو يرجعوا مهرك كامل و قيمة ما خسرته من ايجار .. |
مهر 55 الف كثيييييير ...!
بس يبدو لي انها تبغي اخوك و ناويه انت تاخذ أختها وهي تاخذ اخوك ..! تزي تفكير البعض كذا .. او ممكن تبغي واحد سعودي الاب و الام و ما تبغي عروق اجنبيه عشان كذا تبغي اخوك من ابوك .. الله يعوضك و تذكر ( اكثرهن بركة ايسرهن مؤنة ) |
عمرها 23
وانا استحي اروح لأبوها واقول رجعوا مهري والله العظيم ثم والله مستحيل اقوله حتى لو اظل اقسط طول عمري تجيني افكار غبيه اقول ليه ما اتنازل لأخوي بالشقه والمهر وكل الأثاث وافسخ العقد ويتملك عليها هو ويرجع لي على الأقل نصف المبلغ بس والله ما ادري اخاف اقول له ويسحقرني او يزعل ايه دفعت 55 لانهم ما رضو لما عطيتهم 45 قمت زدتهم 10 او بالأحرى زادهم الوالد وقال تراها دين عليك لاني وراي اخوانك بزوجهم |
والله موقفي صعب مره
لأني والله امر بظروف تتعبني تقريبا بسبب طبيعة عملي ومحتاج جدا اني اتزوج بس سبحان الله طحت في هذي ورحت فيها والله |
لحين الملكه على اهل العروس يعني انت خسرت المهر وشبكه والهدايا بيرجعون لك المهر والشبكه بس الهدايا في ناس ترجع وفي لا
مافى غير تجلس معاها تفهم وش الي غيرها ووضح لها الزواج مو لعبه تقبل وترفض وياريت تقولها مافى طلاق حتى اعرف السبب الاساسي ولا انسى اطقلك واذا تبي الطلاق ترجع كل شئ حتى الهدايا ولا خليها معلقه في بنات وربي ما ينفع معاهم الا كذا |
دام هي اللي رافضة الزواج، فهي راح ترجعلك المهر كااااااامل.. يعني 55 الف بترجع لك
و الأثاث ماخسرت فيه، لانه بيجلس لك .. و لا حتى السيارة يعني بس بتخسر 14 الف إيجار الشقة |
[QUOTE=شوووجي~;2733739]مهر 55 الف كثيييييير ...!
لا مو كثير في 80 الف والذهب بره :d |
يالله ...
طيب ما فيه أحد من أخوانك تثق برأيه و تشاوره و تنظر مايقول أو أخبر أبوك يتفاهم مع والدها يعني انت اخي لن تجعل بداية الموضوع , أريد مهري بل تخبرهم برغبة ابنتهم و تريد أن تفهم السبب(يعني سوي روحك ما تدري) و اطلب منها أن تحضر بينكم بجلستكم لتوضح سبب رغبتها بالأنفصال . ,,,خل تشوف شجاعتها و منطقها امام والدها |
استغفر الله العظيم
وش العالم ذي انت ماشاء الله عليك ياخوي وانا اشهد انك ماقصرت بشي لكن ليش الحركات :( ؟؟؟؟ وغريبه انا اعرف البنات لا كان ازواجهم وسيمين يطيرو بالعجه ااخوي يمكن تكون خايفه انك بعدين تكون شخص ملتف للانظار عند الحريم او مثلا ماتشوف في وسامتك شي من معاني الرجوله عندها اخوي ا |
يعني الحين انا اكلمها ولا اروح ازور ابوها واكلمه ولا اكلم الوالد
انا مالي الا اخت وحده من امي وصغيره واخواني من الوالد مالي فيهم علاقه قويه يعني مثل ما تقولون يكرهوني شوي لاني من ام غير |
اذهب لوالدها وفوراا
واخبره بكل حرف وهو يتصرف ولازم تفهم منها ليه اخوك وليه اختها تعرضها لك احضروها بينكم خليها تتكلم لا تجي طاري الفلوس انما فورا اطلب والدها واذهب له رجل لرجل تكلم استهدي بالله اقرا لها آية الكرسي كثيرااا خايفه اقول لك تزوجها تقلب حياتك نكد او تطلب الطللاق اواواواوا اسرع واهم حل والمفتاح بيده والدها |
ما دريت ان بيكون فيه كل هالردود
الله يعافيكم انا متشتت شوي وما عرفت احدد شي اسويه بس بجلس افكر اليوم وحمستوني اقول للوالده والوالد خصوصا انه عندنا الحين وتونا متعشين مع بعض بس قلبي يقولي ليه ما تدق عليها وتشوف يمكن الوضع اختلف وغيرت رايها بس مثل ما قلتو اخاف تقتنع بس مو برضى تام منها وتنتهي علاقه زوجيه بالطلاق |
اقتباس:
اتصل وجس النبض واذا شفت ان الحال ماتغير حاول بالأقناع والأسلوب وتناقش معها بأن هذه حياة صعب ننفصل بعد هذا المشوار وانا مااقبل بغيرك ومن الكلام الحلو لعل وعسى قول بعطيك فرصه تفكرين ونستخير الله وان الأفكار هذي من وساوس الشيطان لاتتركين له مجال يهدم حياتنا وحاول تبحث عن احد يقنعها بطريقة غير مباشرة قريب لها امها او اي احد .. كان الله في عونك وفرج همك اكثر من الدعاء والأستغفاار .. |
والله احترت
اصدقائي كلهم يقولون لي لا تدق عليها واذا دقت عليك وتكلمت في نفس الموضوع سكر المكالمه وخل الأمور تمشي مثل ما هي وحدد موعد الزواج مع والدها ويقولون هذا مجرد دلع بنات وتكبر بنات وبعد الزواج بيكون الأمر طبيعي وانتم تقولون لي كلمها وشوف وجس النبضها وفي احد ثاني يقولي روح كلم ابوها وكلم الوالد والوالده وانا ما ادري وش اختار |
قبل ما اتزوج كان فيه وحده من بلد الوالده تحبني وقالت لي احبك واتمنى يكون زوجي مثلك بالظبط
بس انا كنت رافض الفكره اتزوج من غير سعوديه ووالدتي رافضه اتزوج من غير سعوديه والوالد بعد يارب ان شاء الله تصير اموري حلوه |
اخي اتركها ودع ذنبها يتحمله والداها
وحتى لو عادت انساها انت |
- يا أخي ليه تشتت نفسك أو تمشي الموضوع وهي كلمتك بكل وضوح وصراحة وأكثر من مره ؟!؟!! - تحدث معها الأن وأعرف الأسباب ثم اخبرها أنك ستزور والدها غداً وتناقش الموضوع معه بحضورها . ثم صلي وأستخير ولا تنسى الدعاء الله يعينك يآرب |
اخوي انت ماقصرت ماشاء الله عليك
لكن هل لانك وسيم فقط رفضتك ؟؟؟ غريبه صراحه انا اعرف البنات يطيرو بالعجه ويفرحو لمن يكونو وسيمين او ممكن اخوي تكون خايفه انك تكون ملفت لانظار البنات في المستقبل وهي تغار من ذا الشي او ممكن يكون واسمح لي اقولها وقد تكون احد اسباب الرفض انها ماتشوف في وجهك ذاك الوجه الرجولي شوف اخوي وانا اقولها لك ترى زي مافي بنات يعجبهم الشباب اللي يكون بسكسوكه ترى في بنات ايضا يحبو الشاب الملتحي وقد يكون خطيبتك من هذا النوع لو انا في مكانك راح اناقش كل هذه الاحتمالات وقدد تكون سبب رفضها احد هذه الاحتمالات ولكن تستحي لذكرها خوفا من جرح مشاعرك لكن تقبل الموضوع بصدر رحب وحاول تناقشها قبل لا تفصل الموضوع وتفسخ العقد وقد يكون احد الاسباب لرفضك انها تراك اجمل منها ايا كانت الاسباب ياخي ان لم تكن من اصحاب اللحى فاطلقها لعلها تكون سبب لمشكلتك وانا اقلك هذا الكلام لاني سمعتها باذني من احد الفتيات وقالت لي انها ماتحب الشباب اللي فيهم وسامه زايده وسبحان الله انا استغربت من ردها لكن بررت بانها ماتحب تظهر انها اقل جمالا من زوحها الله يوفقك ويهدي سرك |
لكن يا حنون هي ما قبلت فيني الا بعد الشوفه الشرعيه
انا ما فرضت نفسي عليها هو في الحقيقه انا اخذت ملامحي من اخوالي ما اخذت من أهلي ابدا وما اشبه لهم ولدرجة ان الناس يسموني ولد السوريه لكن والله هذا مو بعذر انا تحملت مسؤولية قرض وتعبت وابي اتزوج حرام اللي يصير علي والله |
يعني اكلمها او اروح لبيتهم بعد ما اقول لوالدي ووالدتي
ما ادري بس ببدأ اكلمها اليوم واذا كانت مصره على موقفها بروح لوالدها بعد ما اقول لوالدي واشوف وش اللي بيكون صح تصرفي ؟ |
أكيد صح
وأنت بترتاح لو مشيت على كذا ( لازم تحط الننقاط على الحروف ) أكيد بتكون فيه رد فعل شوي قوي من أهلك وأهلها مثلك أول مره لما سمعت لكن حاول تهدي الوضع وتتفاهم بشكل منطقي عقلاني وي النهاية هذي حياة وعشرة لا تكون بالقوة او الضغط . أيضاً ممكن تتراجع البنت خوفاً من اهلها أنتبه لهذه النقطه أن لم تكن بإقتناع منها ، اشعرها بالطمئنينة وإنهاء الموضوع بشكل سلمي . اسأل الله أن يكون الوضع بالعكس وتعود الأمور بشكلها الإيجابي ، بالتوفيق يآآآرب |
في الحقيقه انا رحمت نفسي
في بداية طفولتي كنت اعيش في ضجر امي مع ابي وفي مراهقتي تغربت عن الكل للدراسه ولما جيت اتزوج تعقدت الأمور كان الله في عوني لكني ادري ان الله بيكتب لي الخير ان شاء عوفيتم على هذه الردود والمساعده |
اخوي البنت قالتها انك جميل بزياده !!!! والبنت على حسب تفكيرهم مايحبون يظهرون اقل من ازواجهم جمالا
لذلك اغلب البناات ماتشترط جمال الشاب دايم يقولو :( اهم شي يكون مقبول شكليا ) الان كلمها وناقشها بجديه وعقلانيه وبهدوء بعيد عن اي امور اخرى تخص بالزواج ناقش كل الاحتمالات اللي ذكرتها لك وانه ماعندك مانع في انك تطلق لحيتك مستقبلا ان كان ذلك يريحها وانت مازلت متمسك فيها داخليا ولايمكن تترك حتى تقتنع بك وقلبي معك وتتسهل امورك يارب |
اخي الكريم لاتدع الافكار السلبية تؤثر عليك ولاتستدعي المواقف التي حصلتلك حتى لاتشعر بالضيق ومن ثم لاتستطيع التفكير في حلول
كل تأخيرة وفيها خيرة ولاتزعل نفسك انت استغفر كثير والجأ الى رب الارباب ومسبب الاسباب ومن ثم ابدأ وفكر بحلول واقعية بناء على ماطرحه الاعضاء الكرام او زملائك والله يكتب لك اللي فيه الخير ويشرح لك صدرك وييسرلك امرك |
آمين يااللي فوقي الله ييسر الأمور
حنون اذا قالت اني جميل مو بمعناته اني غير مقبول عذر سخيف مره لاني انا اراها اجمل مني بكثير |
سبحان الله هالحريم بقولك شي الرجال مخابر مو مناظر هي حطت هالعذر السخيف عشان تتركك طيب وش اقول انا زوجي سعودي قح اب عن جد وامه بعد وصراحتن هو احلا مني لاشخص طبعن والحمدلله ماقلت مابيه واحيانن لابغى يقهرني يقول والله اني مزيون واطخم عاد ارد عليه هذا اللي طيحني بحبك ويضحك ومشيه اموري
|
والله يا اختي ما ادري وش اقول
وانا كنت مصدق نفسي واكتب لها شعر ومسوي نفسي رومنسي هههههه كنت احسب انها تحبني |
طيب ماكلمته مره ثانيه شف وحاول لعل وعسا وان زالت مصره دخل ابوك وابوها بالموضوع والله صادقه امي يوم قالت الحين البنات مو وجه عرس ورجل للاسف تخرب بيته بيده
|
| الساعة الآن 01:58 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©