|
مشاكلي مع زوجي
السسسسسسلام عليكمم
انا ماسجلت بهالمنتدى الا اني عارفه انكم مابتقصرون معي ان شاء الله حبيت افضفض ومنها القى حل عندكم وهذا اللي اتمناهاا انا وحده متزوجه لي سنه و7 شهور تزوجت من واحد عنده ضعف جنسي وصبرت ولا قلت لاحد وسويت روحي ما ادري وش فيه وكان يروح عند اخته ويقول ان السسب ان انا ورحنا لأحسن المستوصفات وكلهم قالو لا وانو يقدر مع ذالك والله ماجرحته ولا بينت له ان عنده ضعف واستمرت هالسنه بالعاده السريه ونادرن مايحاول سكت وصبرت اكتشفت انه يتابع افلام اباحيه وتخيلو اكون نايمه اقوم الا اشوفه متسبح ومخلص لدرجة اني اروح ا تأكد من ملابسه عشان اقنع نفسي والله ماقلت له شي سكت واللي ادهى وامر انه بخيل علي ومايحب اهلي ودايم ينتقدهم صبرت بغربتي معه ع شي ع اشياء كثيره لكن الحمدلله ربي اعطاني الراحه معه وكانت كل الامور هذي هينه عندي صحيح ان نفسيتي تتعب لكن الحمدلله والله اني فعلا احس اني مرتاحه مرت الايام وصار خلاف ومد يده وتفل وضرب بجزمته وكل شي وياليته راضاني بشي لو بسيط بالعكس قالي كلمتين ورضيت رحت لاهلي وانا عندهم حاليا ورفضت ارجع مع ان لي رغبه ارجع بس تمنيت اوقفه عند حده عشان يعرف قيمتي لان والله ارخصتها كثير كثير بغض النظر عن المواقف اللي صارت لكن يعلم الله اني ماظلمته بشي المشكله وبتحديد اني انا حامل ولاتستغربون والله انا لزمنا الاستغفار والحمدلله ربي الهمه وقدر وبعدها رجع لعادته ومعد قدر ورجعنا ع العاده السريه والحين انا بهمم لاني ابي اولد عند اهلي وكرت العايله معه ورافض يعطينا اياها يقول اجي وانا ما ابي الا اذا اردت كرامتي كبرت الامور بين اهلي واهله والسبب عناده رافض يعطيني كرت العايله ويهدد لي شهر اذا ماجيت راح يتزوج وكرت العايله ماراح يرسله قولولي لو صار فيني شي ولا مستشفى يقبلني ومافي اي مستشفى يقبل حالتي اذا جتني الولاده قولولي وش اسوي لان والله اني بهم من لوم اهلي ومن صدمتي فيه لاني توقعت ع صبري عليه راح يفقدني ويجي يرضيني ويحسسني انه شاريني لكن الحمدلله ع كل حاال طلبتكمم ابي مساعده وردو ولو ترفعون الموضوع بدعووه واعذروني اذا الكلام مو مرتب لاني اكتب بسرعه ابي الحق ع اللي صاحيين الحين بالمنتدى |
ما اقول الا الله يكون بعونك
ويسهل اموركويفك كربتك ويسخر زوجك لك |
الله يعينك ويفرج همك
ويعوضك في طفلك او طفلتك اللي في بطنك |
يعني انتي ماعندك بطاقة هوية منفصله عنه ..!
اذا كان عندك خلاص مو لازم بطاقة العائلة .. او ممكن تروحي مشفى خاص .. وان مرة انزنقتي اضحكي عليه وقوليله بترجعي وخذى البطاقة منه .. او ممكن ترجعي وبعد الولادة روحي لأهلك ولا عليك منه .. |
الله يفرج لك يارب ... حبيبتي لا تبينين له ان هدفك هو بطاقة العائلة, حسستيني انها شي مهم مرررة ومستحيل تولدين الا بها !
مع اني ماجربت بس مستحيل هالشي يصير , اتوقع عادي تولدين بدونها دام عندك ملف في المستشفى اكيد فيه صورة لبطاقة العائلة واتوقع تكفي الصورة واذا ماعندك صورة لها خذيها من اي ملف عندك موجود في مدرسة او مكان عملك او مستشفى اهلي لازم يكون فيه صورة محفوظة في الملف واذا ولدتي باذن الله تتسهل الامور ..ربي يفرج لك |
اهم ماعلى الانسان كرامته
بلى زوجي بلى خرابيط الوحده لو تقعد في بيت اهلها معززه مكرمه احسن مايخذها واحد مريض ويبلاها بنفسها ولو زوجك مافهم ولا يبي يفهم انتي ازبديله قولي ترى العيب منك ماتسوي مثل الرجال وفوق هذا تمارس العاده السريه ؟ مدري وش يحسون فيه المتزوجين اجل وش يقولون العزاب ؟. انا لو اني منك اقوله بعيبوه عشان يعرف انه ولاشي واصلن من هي الي بتقبل فيه هههههههههههههه وانا ضد حملك من شخص زيه انتي سيدة القرار |
الله يفتحها عليكي ويفرج همك ...
طيب ماحد من الاهل ممكن يحصل على البطاقه منه .. اذا هيه جد عندكم مهمه بالمستشفى ممكن تحكو مع والدته او حد من اهله مثلا بقدر بقنعه اذا هو متنح كثير او يقدرو بجيبوها لكم ... مثلا.. وطيب اقتراح اخر .... استخيري برجوعك لزوجك .. عارفه انه وحده مثلك صعب رجوعها بهالظروف وعقل هالزوج لكن مش غلط تستخيري ربنا بامرك ان شاء الله انا متفائل بانه مشكلتك حتلاقي الها حل ... |
السلام عليكم ورحمة الله تعالى وبركاته
أختي في الله أحيي فيكِ هذه الشخصية الطيبة ، ولربما زوجك يعرف بضعفه الجنسي وأحس بشيء من عدم الرجولة لذلك عوض ضعفه الجنسي بالضرب والشتم وكانه يريد أن يقول لكِ انا رجل . ثقي بأن مثل هذه الحالات عند الرجال تعكر صفوهم وتؤرقهم جداً إلى درجة أنهم يتمنون الموت دون ذلك ، لذلك مع أني ضد ضرب الزوجة أياً كانت الأسباب فأرجوا منكِ أن تلتمسي له العذر ، فأمره فعلاً محزن . سؤال لماذا لايذهب إلى أطباء الذكورة ويبحث عن الدواء والعلاج ، لربما بأنه يعاني من شيء تناسلي ، أو إنسدادات ، أو فقر في الدم ، ولماذا لايستخدم العسل والغذاء الصحي ، ويبتعد كل البعد عن الدسم والزيوت ويمارس الكثير من الرياضة ، كل هذا سيعالجه والله . بالنسبة لولادتك لا أعرف ماهو النظام في السعودية الشقيقة ، ولكن لا أعتقد بأنهم سيرونكِ في حالة ولادة وينظرون إليكِ ، بالتأكيد سوف يقومون بتوليدكِ ويقومون بإجراء اللازم ، فلا تخافي على نفسكِ من هذا الموضوع . أسئل الله العظيم رب العرش الكريم أن يهدي بالك ويوفقك ويسخر لكِ زوجك ويشفية . كل التقدير . |
مانتي مسوله عن علاجه ..
دام انه عاجز ليه تزوج وبللى بنات الناس معه .. واللي يقول التمسي له العذر ... يا شيخ حرام عليك يضربها عشان العيب فيه و تعذره ..؟!!! هذا اصلا لو رحتي لأقرب محكمة راح تطلقي منه فوررررررراً .. فيحمد ربه انك متحملته و يحسن خلقه افضل له ... لا عقل ودين ولا منطق ولا عرفاً يقبل فعل زوجك ..! يتزوج و يعجز ويضرب وكأنه انتي اللي مسببه له العجز لكن يبدو انه كل ما شافك تذكر عجزه ,, فروحي لأهلك و الله يعوضك بافضل .. |
اقتباس:
فقط تخيلي بأنه أخاكِ أفلا يستحق الموضوع فرصة أخرى خصوصاً عندما يحاول العلاج ؟؟ كل الأحترام والتقدير . |
اقتباس:
ولانقدم حلولا وكأننا نعيش بين الملائكة ... أنا مؤيدة لحل أخونا .. جزاه الله خير .. |
هذه هي نتيجة الأفلام الإباحية..
وكل من يدمن على مشاهدتها هذه هي نهايته والعياذ بالله الشق الآخر من مشكلتك فيك أنت.. من قال يا أختاه بأن كل من تغادر بيتها .. هاجرةً زوجها .. ستلقى الإحترام من قبله وأهله؟؟ رقعة المشكلة هكذا تتسع وتطال أطراف عديدة .. وستبقى في النفوس ولن تنمحي بسهولة مع الأسف.. وفهمت أن مغادرتك لبيتك ليس حال وقوع مشكلة.. إنما ضربك وانتهى وتصالحتما ثم أتت هذه الفكرة الشيطانية بتأديبه؟؟ من أشار عليكِ بهذه الفكرة النيرة؟؟؟ وعلى أي أساس يتدخل أهلك إذا ضربك وتم الصلح والرضا؟؟ ويبدو أن ذهابك لبيت أهلك كان لحاجتين أولهما تريدي البقاء والولادة عندهم واحتلتي بحاجتك الثانية وهي معاملته لك كي يتسنى لك البقاء عندهم رغماً عن زوجك وبقبولِ من أهلك بأنك مظلومة ومقصر عليك!! أي تريدين ضرب عصفورين بحجر واحد ... المكوث والتأديب.. هل هذا صحيح واصدقينا القول أرجوكِ إن كنتي تريدين فعلاً حلاً لمشكلتك مع العلم بأني ضد تصرفات زوجك معك ولكن الطريقة التي عالجتي بها مشكلتك ستصعب عليك الوضع كثيراً.. |
طيب ليش ما تتخيلها انت انها اختك / تضرب و تهان باقبح صورة / و تعيش زوجة باسم فقط ..
ترضاها عليها ؟!! ان قلت نعم / اسمح لي اقول انك بلا ضمير ولا تستحق تكون اخ ( مع احترامي لك لكن نفرض ) ياخي ما انت احكم من الشرع ؟ الشرع يبيح لها الطلاق في هذة الحالة لأن المقصد من الزواج العفاف ثم الإستقرار و العشرة الحسنة .. وللأسف ما تحقق شي منها مع هذا الزوج .. لازم اختنا ما تحكم العاطفة بل العقل والعقل والعقل ... و زي ما قالت اختنا ذوق نحن لسنا ملائكة فعلاً لسنا ملائكة و العمر يمضي وقد تقع في المستقبل بشي اكبر من خيانات وغيرها والواقع يشهد على مثل هذه الحالات .. و طفل واحد افضل من ان تكون الضحية اطفااال بالمستقبل ... و الرجل بامكانه العلاج اذا اراد وبامكانه الزواج باي سن خلافا للمراة .. بلاش حلول مثالية و تضحيات في غير محلها ، لو كان رجل حسن الخلق ممكن لكن كذا لا والف لا .. ولا ذنب لها بعقده النفسية ، ومن معلوماتي ان الرجل العاجز دائما يكره زوجته لأنها تشعره بعجزه .. فالرجل العاجز يكره رؤية انثى .. وباعتراف بعض العاجزين ... و سمعتها من اكثر من رجل والله .. ولو كان اخوي / ما راح تاخذني العاطفة و تغلب عقلي و لا يمكن اسمح لعاطفتي تجعلني اظلم غيري وراح انصحه بان يتقى الله يايشوف له علاج و يحسن الى زوجته .. يا انه يطلقها .. ( إمساك بمعروف او تسريح بإحسان ) .. فالظلم ظلمات يوم القيامة .. |
اسأل الله الواحد الأحد أن يفرج همك ولا تنسين الإستغفار حبيبتي
|
اقتباس:
كل الذي قلتية جميل ولا اخالفكِ علية ، ولكنه لا يطبق إلا عندما تنتهي الحلول ، ف دعي الغضب جانباً أعرف بأنكِ ناصحة من القلب ، ولكن دعينا نعمل بالأسباب ومن ثم نقرر بالحكمة لا بالتهور والإستعجال . وهي فعلاً ك أختي وموضوع الضرب لا ارضى به على أي إمراة مهما كانت الأسباب ، ولكنه أخطأ ، وجل من لايخطئ ، ولربما انه نادماً على مافعله الآن ، وصدقيني إن لم يتحمل الزوج زوجتة والعكس ف ستجدين الدنيا كلها مطلقين ومطلقات ، الصبر جميل . كل التقدير . |
الله يفرج همك وييسر أمرك ويكتب لك إلي فيه خير
|
لابد من تقديم بعض التنازلات حتى تستمر الحياة.. ولو أن الضرب أسلوب عاجز لكن أيضاً العناد والندية لن تنفع في حل المشكلة.. والخطأ لا يعالج بالخطأ وعند عدم تقديم تنازلات من الزوج أو الزوجة يبحث عن طرف ثالث، إنسان حكيم ذو شخصية محترمة حتى يتمكن من التفاهم بأسلوب لبق وحتى يجمع ولا يفرق.. الحياة الزوجية لا تخلو من النكاف ولن تتوقف طالما نحن البشر تضج دواخلنا بمشاعر وأحاسيس وانفعالات لا أول لها ولا آخر.. أختي.. المشكلة الأساسية قد تكون من معاناة زوجك مما ذكرتي وهذه علاجها بالطب.. ونفسي أي منك ومنه.. ولأجل الروح القادمة للحياة والتي ستغير الكثير من جو البيت.. فكري إما بتوسيط طرف ثالث أو ارسال رسالة له حتى لو كانت فاضية صدقيني سيبادر هو بالخطوة التالية.. وفقكم الله وهدى سركم.. |
كل الرجال بيقول لك تنازلي .. مادري عن ايش تتنازلي عن حياة زوجية حقيقية ..
او عن كرامتك ..؟!! لو كان الشاكي رجل ايش بيكون الحل ؟!! لو لاحظتي حملوك جزء من المشكلة .. مع ان مالك يد فيها بتاتاً .. يجب عليك كونك انثى الصبر والتنازل و الخضووووع المهين .. التنازل جميل في الحياة الزوجية لكن تنازل ثانوي وليس تنازل ( جوهري عن اصل الزواج ) و تنازل دون تقدير من الطرف الآخر هو هباااااااااء منثوووور .. الحياة دون زوج اكرم من الحياة مع زوج له حقوق محفوظة وحقوقك مهدرة .. و لا متزوجة ولا مطلقة ..! لي صديقة مثل وضعك لكن زوجها كان محترم نوعا ما طلقها اخوها غصب عنها من زوجها والآن متزوجة وعندها اطفال وسعيدة جدا و تشكر لأخوها فضله .. القرار لك اختي / لكن احسبيها من جمييع النواحي الدينية والخلقية والإجتماعية والنفسية على المدى البعيد و بعيد عن كل العواطف والمثاليات الزائفة .. و يبدو ان زوجك من الأساس غير صالح مدمن اباحيات و سيء عشرة .. الله يكتب لك الخير .. |
اقتباس:
عند اختنا وجهة نظر يعني ما اقول اطلبي الطلاق ولكن لاتتنازلين وذا حاول يغلط عليك او يضغط زيادة دخلي طرف وقولي له الاسباب الحقيقيه اذا هو ماحشمك واحترمك فماله داعي تحترمينه وازعجني ايضا شغله اختي يعني المفروض طلعتي بعد الضرب على طول مو كذا تنسي السالفه وتروحين لبيت اهلك |
اقتباس:
او انه يتجاهل بالنسبه لي هذا اللي اشوفه انسان ممشي حياته وكنه قايم بواجباته كامله ومستحيل يقدم تنازلات ابد وبالنسبه للعلاج انا قد قلت له عن حبوب تساعد ياخذه قال لا غآليه..؟وبعدين مايحتاج وهذا رده لي وهو يستخدم عسسل كل صباح لين حملت وتركه وفعلا انا احسه يكرهني دايم حياتي معه هواش واالله اني صبرت صبرت حتى انه احيانا يرفض يكملي اغراضي ابيع من ذهبي عشان اشتري الي ينقصني اشياء كثيرره اعجز عن ذكرهاا وبالنسبه لنظام المستشفيات لابد من كرت العايله اللي يثبت انك متزوجه شرعاا ولا مايقبلوني ومافي اي صوره عندي والله يعطيك الف عافيه ع كلامك وتفاعلك للموضوع |
اقتباس:
انا من صدمتي مارديت عليه وخليته يتكلم وانا ساكته وواصل كلام لين جاب طاري اهلي وقال عن اخوي كنه بنت وسكت لاني ماقدرت اتكلم من البكى يوم شاف اني مرره تضايقت سكت وجلس يحاول يلطف الجوو بس هذي نتيجت اني رضيت وسامحته من دون مقابل المهم دعيت ربي ونمت وصحيت وكلمني وكلمته عادي ولاكنه شي صار بس اني اتخذت قرار اني مابرجع له لو رحت لاهلي ابد لين ترد كرامتي ويعرف قيمتي بس ماقلت له خليتها بقلبي لو انه سكت وقدر اني رضيت مع اني انهنت كان والله رجعت له لكن تعبت يا انسسسان يحترمني ويحترم صبري ويحترم اهلي ولا يغلط عليهم كان والله لا اشتريه واتمسسك فيه لكن الحمدلله ع كل حال وانا والله العظيم لو عندي فكره ان كرت العايله مهم كان اخذته ومعليش اخوي ع كلمت احتال قسسم بالله لو براسي حيله ونفاق كان ماتنازلت عن حقوقي ابد بس طيبتي الزايده ضيعتني وخلت قدري كذا عنده وبالنسبه لاهلي يتعاطفون معي اهلي عارفين كيف حياتي وكيف صابره اهلي عارفين انه مو محتررم لانه قل ادبه ع ابوي واخوي وقفل بوجه ابوي يوم كلمه يطلب كرت العايله لكن مايدرون عن عجزه لاني ماقلت لاي احد وبالنسبه لروحتي عند اهلي رحت ع انها زياره لاني لو قلت له ماراح يوديني وكنت ناويه ارجع ودقيت عليه وقلت له تعال خذني من عند اهلي لكنه رفض وقال تعالي وقت رحلتك مايحتاج اجي وانا اصريت انه يجي عشان ابوي يتفاهم معه لكن قفل بوجهي وللأسف طلبت كرت العايله ورافض يجيبه اتمنى تكون فهمت وشاكره لك تفاعلك |
اقتباس:
مايبي يتنازل ابد والله العظيييم قبل توصل السالفه لابوي اكثر من مره دقيت عليه ومارد ارسلت وطنش ولين هنا وبسسسسسسسس لكن حسبي الله ونعم الوكيل انا ماهمني الا كرت العايله فقط |
اقتباس:
وانا عندي بطاقة احوال لكن ماتنفع بوقت الولادة لازم كرت عايله يثبت اني متزوجه والله يسعدك مشكوره ع المرور |
اقتباس:
واذا عندك خبر انها مو مهمه قوليلي بأي مستشفى انا من اهل الطايف ومشكووره فديتك |
اقتباس:
ماشاء الله عليك ياليت عندي قلب مثلك لكن قسسم بالله اني ارحمه لكن الله يعوض صبري ويسسر لي امرري تشكررررررات فديتك الله يجزاك الف خيرر |
اقتباس:
وبأذن الله بستخير بكل اموري الله يجزاك الف خيررر |
اقتباس:
انا الحين راضيه باللي ربي كاتبه لاني تقريبا سويت كل شي عشان اعدل حياتي معه ورضيت باللي ربي كاتبه لي مشكووره ع المرور وتفاعلك فديتك |
اقتباس:
لكن هو اللي حدني وخلاني اتخذ هذا القرار اللي بندم عليه انا لاني حامل وهو جالس يهدد ييتزوج لكن الله يرزقه بالزوجه اللي تخليه يعرف وش صبرت عليه وش تحملته ويندم اشد الندمم ويعوضني يارب |
اشكر كل من رد ع موضوعي ودعالي الله يسعدكم ويفرج كربت كل مكروب منكم
ويجزاك الجنه يارب غـلآي امي,, |
اختي ف الله
مع الاسف الشدييييييييييييد الطيبه والتنازل ف الحياه الزوجيه بل وفي كافة نواحي الحياه يتفسر ضعف شخصيه عن(بعض البشر )*:19:: |
اقتباس:
تعالي على نفسك من أجلك مولودك لا من أجله هو وطالما أن كرت العايلة مهم للولادة.. كوني رسمية معه وفي حدود والاختصار والصمت والتجاهل انسب شيء في مثل هذه الأمور.. والايام كفيلة بعلاج معظم الجروح.. أعطيه فرصة فلربما يريد الإصلاح.. أذهبي لبيتك ولكن معك والدك وكبير من العيلة وباتفاق مع والده او كبير من عيلته لتتقابلوا جميعكم عنده وتعرفوا ماذا يدور في رأسه.. بعض الناس تصدمهم المواجهة ولكن في التلفون كالأسود.. صدقيني لو زوجك راغب في الاستمرار سيرضخ وإلا.. أبغض الحلال.. وإن شاء الله الأمور ما تصل إلى هذه الدرجة.. أدعي الله وأساليه أن يهديه فهو القادر على كل شيء ولا يظلم عنده أحد.. طمئنينا عنك.. |
بالنسبه للولاده انا ولدت وزوجي مو موجود واللي وداني اخوي
وصوروا بطاقته اهم شي اللي يجيبك ياخذون صورة بطاقته واسألي نفس المستشفى اللي بتولدين فيه وخلي ابوك يوديك وياخذ بطاقته، الله يفرج همك. |
عذراً إن أزعجتك بكلمة "احتلتي
ولكن هذا ما فهمت ولهذا طلبت التوضيح منك أكثر حتى لا أظلمك في حديثي لنفسي الآن أريد أن أقول لك شيئاً: زوجك يظن بأن أهلك خلف تحريضك ورفضك للعودة.. فمواقفك السابقة كتمتها في قلبك كما ذكرتي ولم يصدر عنك ردة فعل أمامه وتحدثتي معه بعد وصولك وكأن شيء لم يكن .. ثم بالنسبة له يجدك فجأة قد تغير موقفك.. وهذا يزيد من عناده ويزيد من الفجوة .. أنت في أي شهر الآن؟؟ |
اقتباس:
وانا وكلت امري لرب العالميييييين الله ييسرلي الخيره انا ما ادري وينها برجعتي ولا بطلاقي اما بالنسبه نا بأي شهر انا بـ نهاية الشهر 7 |
اقتباس:
|
اقتباس:
مثل كل مرره ليه هو مايفكر يتنازل ويصلح حياتي معه انا ع اتم الاستعداد اني انسى اللي صار عشان اللي ببطني وامشي حياتي لكن انه يهدد ابوي ويهددني بالزواج اذا ماجيت واروح بيته معليشش رضيت اني اتنازل عن ابسط حقوقي في الحياة الزوجيه لكن كل شي الا نفسي وكرامتي وشكرر انا مندهشش ع طيبتك وتفاعلك للموضوع وان شاء الله اطمن الجميع عن اخر اخباري |
اقتباس:
والدنيا تعلم رحت له جاهله واعطاني درسس مابنساه بحياتي وتشكررات ع المرور |
اقتباس:
الله يعينك على بلواك بخصوص انك في الطايف انا كنت بالطايف ودخلت مستشفى الملك عبدالعزيز وكنت اتكلم مع الاخوان حول هذة القضايا وخصوصا تطرقنا لموضوع الولاده اكدو لي الاخوان في المستشفى اذا تم شرح الموضوع ان هناك خلافات بين الزوجين, يستقبل المستشفى مثل هذة الحالات اذا شرح الموضوع للمدير من قبل الاب او الاخ ولكن الطفل يتوجب على والده استلامه او يكتب خطاب للمستشفى قلت واذا رفض الاب الحضور للمستشفى اكدو لي انه في مثل هذة الحالات قد يكتب والد الزوجه تعهد باستلام الطفل بضمانات اما مرجعه او نحوة الامر الاخر عندك مستشفى العدواني طبعا خاص ويمكن الولاده اذا كان معك الوالد بعد شرح الظروف للمستشفى اتمنى قدرت افيدك الله يكون في عونك تحياتي |
اكثر ماقهرني واستغربت منه في مشكلتك انه قلتي انك مرتاحه وترغبين في الرجوع له ..كل هذا ومرتاحه طيب اقنعيني انك مرتاحه...
واكثر ماضحكني الا لما قالك انه بيتزوج..ضعف جنسي .مو قادر يسوي شي ويهددك بالزواج؟؟؟ منجده ولا يمزح؟؟ وانتي مصدقه ؟؟ لومنك اقوله مع السلامه في امان الله تزوج وانا اخطبها لك..هو على باله كل الحريم مثلك سترتي عليه واحترمتيه ويتفل في وجهك وتسامحينه..على ايش طيب شاريته؟؟ مايدري انه ممكن ربي يعاقبه ويتزوج وحده تفضحه قدام الي يسوا والي مايسوا.. هذا اذا قدر وتزوج وان تزوج راح يفشل للمره الثانيه... والي استغربه من اغلب الزوجات الي بينها وبين زوجها مشاكل...تصبر تصبر تصبر ولاصار حمل...نفذ صبرها وانتبهت انه عندها كرامه..طيب كان من الاول رحتي بيت اهلك قبل لاتتورطين بالحمل... بالنسبه للمستشفى..لاتخافين اختي ادا معاك والدك راح تتيسر امورك..اهم شي الوالد معك ..وزوجك ارسليله رساله اكتبي فيها شكرا..ماني بحاجه لكرتك..واحتفظي بماتبقى لك من كرامه.. |
اقتباس:
|
| الساعة الآن 08:35 PM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©