|
أمر بمشكله زوجيه و اطلب منكم النصح
بدخل في الموضوع على طول بدون مقدمات لأنه طويل الحمدلله نقلنا لبيت جديد من شهرين تقريباً و في العاصمه و أنا فعلاً سعيده لأنه المنطقه فيها مسجد قريب و ناس مسلمين من عرب و بلدان ثانية و يعني حسيت إنه شوي رجعتلي الحياه الإجتماعية لأنه سابقاً كنا نسكن في منطقه بعيده، منطقه ممله بالنسبه لي لا صديقات ولا جارات إلا جاره وحده بعمر أمي احترمها و هي انسانه كويسه بس طبعاً مافي أي شي مشترك بيننا ما عندها غير ولدين و البنات إتزوجوا فكنت حاسه بإكتأب فظيع و ما كنت أطلع كثير إلا مع زوجي و أبداً ما كنت سعيدة بالوضع، و كان دايماً زوجي يصبرني إنه قريب راح ننقل لمنطقه أحسن و راح تكون لك حياه إجتماعيه و راح تتأقلمي مع البلد الجديد الحين نقلنا لمنطقه جديده، منطقه جداً مناسبه من كل النواحي، و تعرفت على بنات من خلال المسجد و المحاظرات، بنات من عمري متزوجات و عندهم عيال قربين من اعمار عيالي، ففي أشياء كثيرة مشتركه بيننا و بدينا نعزم بعض، و نروح على أماكن تجمع الأمهات و الأطفال و حسيت فعلاً إني بديت أحب البلد هذا،، زوجي في البدايه كان جداً سعيد و كان يقول مو قلتلك انك راح تحبي كل شي هنا، و حسيته صادق بس بعدين اتغير شوي شوي، حسيت إنه بدأ يغار من صديقاتي (هو كمان تعرف على أزواج صديقاتي) و قال بنفسه انهم ناس محترمين و متعلمين و كويسين يعني،، بس ما أدري ليش بدأ يتحسس لما يجوا يزوروني خاصة إنهم يزوروني لما يكون زوجي في شغله مو يعني ما يرتاح في بيته و كذا لا، و أنا أبداً ماني مقصره في البيت من طبخ و تنظيف بالعكس اتعلمت طبخات جديدة منهم و هو بنفسه حبها،، فما أدري ايش فيه لما يعزموني عندهم، ما أطلع إلا قبل ما أسوي كل شي يعني أحظر الأكل و الحلى و كل شي تمام، و أقول لزوجي بروح عند جارتي فلانه اشرب قهوه و هو عادي عنده يمسك العيال بس يقول لا تتأخري و هذا طبعاً شي عادي، بس كمان يتصل عشان يتطمن علي أقل شي مرتين و فعلاً هذا بدا يحرجني قدام البنات تناقشت معاه بشكل لطيف، حبيبي لو احتجت شي أرسل مسج إلا إذا كان في شي ظروري. فقال توحشيني لما تغيبي أكثر من ساعه (يعني المقصد لا تغيبي أكثر من ساعه و إلا راح أزعجك إتصالات) سكت و قلت يمكن لسه ما تأقلم على الوضع الجديد إنه بدأت تكون لي حياه إجتماعية خاصة بعيده عنه، و فعلاً يعني بدأ يشتاق لي زي ما أنا كنت دايماً أقوله لما يتأخر في شغله و كلي ملل لحالي في البيت المهم إنه نقاشاتنا كثرة من يوم نقلنا و اتعرفت على البنات، هو ماهو عاجبه إني أطلع و أروح لهم أو انهم يجوا لعندي و مع ذلك يقول لي أنا أبداً ما أمنعك من انك تسوي إللي تبغيه، بس كلامه شي و أفعاله شي ثاني يقولي روحي بس مو أكثر من ساعه، و أنا بصراحه الجمله هذه تعصبني و تحسسني كأني بنت صغيره و إنه ما يثق فيني أو إنه يحب يتحكم فيني. مع إنه زوجي أبداً ما كان كدا، ما كانت تفرق عنده أتأخر حتى لو 5 ساعات يقول أشياء تزعجني و نبدأ نقاش.. مثلاً إذا أزواج صديقاتك ما تفرق عندهم يتأخروا.. فأنا متزوجك انتي و ما أوافق انك تتأخري أكثر من ساعه، أقوله أنا مو برا في الشارع، أنا هنا جنب البيت عند جارتي ياخذنا الكلام و ما أحب تحددلي وقت بالرجعة كيف لو أنا قلتلك نفس الكلام، ما اسمح لك تتأخر أكثر من ساعة برا البيت؟ قال تفرق لأني أنا رجال و انتي زوجتي و تحت مسؤوليتي و لو صارلي شي مثلاً ما راح يعاتبك أحد، بس لو صارلك انتي شي اهلك و الناس كلها راح تعاتبني أنا قلت لا تخلي تفكيرك سلبي و توكل على الله و ماراح يصير شي،، و بصراحة زوجي شاطر بالكلام المعسول فيقلبها إنه يحبني و يخاف علي و إلخ و أنا أعدي الموضوع و أنا مش مقتنعه و نرجع نتناقش في نفس الموضوع بعد كم يوم و نفس الشي لما أروح محاضرات و ندوات يقول مو أكثر من ساعة و نص، و هو عارف إنه راح ياخذ 3 ساعات هذا لو بدأ في الوقت المحدد، و نرجع نعيد نفس الكلام أنا بصراحة أكره أكون مقيدة بوقت معين ما استمتع بوقتي و عيني على الساعة و أكون متوتره أحس إنه الشخص هذا يتحكم فيني، أهلي عمرهم ما عاملوني بالطريقه هذه، عادتنا كانت إنه الكل لازم يكون في البيت قبل الساعة 8 العشا البلد اللي نحن فيه حالياً شتا تغيب الشمس من الساعة 15, يعني خلاص الدنيا ظلمه بس مو معناته إنه الوقت متأخر حتى الطلاب في المدارس يكونوا لسه ما خلص دوامهم،، فأخذها حجه الدنيا ليل ارجعي بسرعه أما في الصيف الشمس تغيب الساعه 23 يعني طول اليوم الشمس موجوده و نهار، فكيف لو أنا أخذتها حجه و أرجع مثلاً الساعة 23 و أقول بس تو الناس الدنيا نهار؟؟ ما يصير صح و الغريب انه أحياناً يقول إنه نفسيتي صارت جداً كويسه و إنه فعلاً حس بأهمية الحياة الاجتماعيه بالنسبه لي، و إنه سعيد اني بديت اكون صداقات و إني بديت شوي شوي بديت أعتمد على نفسي بس في نفس الوقت ما هو عاجبه التغير هذا لحياتنا الجديده، و إني بديت اعتمد على نفسي و استغنيت عنه،، قمة التناقض بصراحه،، و أخاف الشي هذا يأثر بعلاقتنا إنصحوني بالحل؟؟ لأني أرفض إني أكون بيتوتيه.. هذه ماهي شخصيتي و راح أجن لو قعدت في البيت،، و حتى هو بنفسه ماهو بيتوتي و مشترك بنشاطات في المسجد و هو أساساً يقول بنفسه إنه ما يحب إنه المرأه تكون بس ربة منزل، و إنه المجتمع محتاجها حتى لو في الأعمال التطوعيه، و يطلب مني اني اشاركه في نشاطه لأنه للرجال و النساء بس المشكله إني ما أتقن لغة البلد و هذا أهم شي اعذروني إني طولت،، ما عرفت كيف اختصر و حبيت انني أفضفض |
طيب يا غلاتي
يمكن هو من منظوره يبي يقول طلعاتك كثير ! او انه يمل من انه يمسك الاطفال لمدة 3 ساعات او اكثر .. انا مادري انتي تطلعين كل يومين او ثلاث او مرة بالاسبوع او كيف .. لكن بشكل عام الخطة الاساسية : قللي طلعاتك وخليها بالساعات الي تحبين + تكون طلعاتك بوقت هو برا البيت وبيطول + زيدي جرعة الاهتمام سوي اشياء جديدة هو يحبها لان كل ما زاد مقدار رضاه عنك كل ماقل تشدده بهالنقطة وش رايك ؟ |
أنا مع زوجك 100 ب100
هو لا يريد أن يشعرك بالغربة و يريد لك السعادة لكنه يخاف أن تأخذي صفات و عادات المجتمع الذي تعيشن فيه احمدي الله و اشكريه على رزقه لك ، أم تريدين زوج لا غيرة له |
لا تخلقي مشكلة من لا مشكلة
طيعي زوجك و ارضيه..بتعيشي سعيدة ومرتاحة أعتتقد إنك انشغلت بحياتك الجديدة عن زوجك ترى مافي زوج يرضى يمسك أطفال بالساعات عشان خاطر الزوجة تتونس.. صفة حلوة في زوجك يمسك الأطفال عشان تجتمعي بصديقاتك واضح زوجك طيب وحنون فلا تخسريه طيعيه وارضي بالساعة اللي يحددها لك.. |
اقتباس:
طلعاتي مو كثيره، يعني مره إلى مرتين في الأسبوع و أغلب الأحيان آخذ الأطفال معاي أو إني أطلع لما يكون في دوامه الليلي هو كمان ينزعج لما يزوروني، و خاصة انهم ما يزوروني إلا لما هو ما يكون موجود و لما يمسك العيال أكون أنا حظرت لهم العشا قبل لا أطلع و أصلاً العيال يناموا من الساعه 19, فما يزعجوه كثير يرتاح و ياخذ وقته يتابع الأخبار و يسوي بحوثات في النت.. لأنه حتى لما أكون موجوده يكون مشغول بأموره مشكوره عزيزتي |
اقتباس:
أنا متعوده على الغربه،، صارلي في أوروبا أكثر من 10 سنوات فعارفه عاداتهم و تقاليدهم و إلخ،، أنا بس نقلت من بلد اروبي إلى بلد اروبي ثاني فلا أنا متأكده مو هذا ألسبب. و بعدين أنا ما أخطلت بالأجانب عشان أتأثر فيهم طبعاً لا أريد زوج بلا غيره و أحمد الله على زوجي الطيب.. ولكن إن كانت غيره كما تقول، فهي غيره في غير محلها أشكرك أخي |
اقتباس:
أشكرك عزيزتي |
طيب ...ازعلي على خفيف و ووقفي خروج لمدة اسبوعين
و اظهري انك متمللة ,, لكن بدون ما تنكدي عليه لأني من كلامك حاسة فيك , صعب الوحدة تعيش بدون حياة اجتماعة و يكون الحل خلاص ارضي بالأمر الواقع و غوصي بالملل حتى لو زوجك مو موجود او مشغول , انا بس نقطة عدد مرات خروجك كمت أظن هذا وجه الأعتراض لكن ما وضحتي بردك الأخير لا أجد هذا كثير خصوصا أنه وقت خروجك مشغول , فلما نقتل الروح في أجسادنا ... أن أردتي أظهري زعل و تدلل خفيف ,, بحركات لطيفة لكن تظهر مدى انعكاس ذلك عليك أو صارحيه مرة ثانية الى أن يقنعك أو تقنعيه |
كل مافي الموضوع انه اتعود على وجودك
ودحين فقده بس مااتعود احد يشاركه فيك بس كان يقولك اخرجي وواو بس وقت الجد حس انو مايقدر وقفي طلعات شويه بس وشوفي ايش يسوي وردي علينا الله يخليك لزوجك ويرزقك السعادة اينما كنت |
من مغتربه مثلك مرت بنفس وضعك اقول لك
انتي تحبي تذهبي ساعتان مثلا وهو يريد ساعه فقط اذهبي ووقت يتصل اطلبي منه نصف ساعه عم تشربي القهوه وابقي على مده يتعود على الساعه ونصف الاولاد يمكن يتعبوه وانا اعتقد انه فقدك في البيت فعلا وهو صادق بذلك اقول لك :زياره لوحدك من غير اولاد اجعلها هم والاولاد بالمدرسه ولكن في المساء خذي الاولاد معك لمنزل يكون فيه اولادك يلعبو مع بعض ووقت تقدري تزوريهم كعائله رتبي انو زوجك مع زوجها والاولاد مع بعض وانتي مع ربة المنزل رح يغارو يحبو نطلع ويطلعو عيونا وقت نخرج ينقطع الاوكسجين عن البيت اقول لك رح يتعود ولكن كل مره زيدي جرعة الوقت قليلا وان كان حبيبك عسل ما تلحسو كلو انا اعمل يهذا المثل واتبعه في حياتي |
اقتباس:
فعلاً الواحد ما يفهمه إلا اللي يمر بنفس وضعه أنا ما أطلع إلا لما يكون في دوامه الليلي (من 15 إلى 23) و أكن مجهزه كل شي بالبيت قبل أطلع و آخذ العيال معاي، ما هو عاجبه :( أو اني أطلع لما يكون في إجازته و عارفه إنه مشغول ببحوثاته و دروس الجامعه، فاخذ العيال عشان ما يزعجوه و هو بنفسه أحياناً يقترح إني أخلي العيال معه شوي قبل ما يناموا،، كمان ماهو عاجبه :( أو إنه البنات يجوا عندي مع عيالهم وقت غيابه و نتونس مع بعض و يروحوا قبل ما يجي،،، برضو ماهو عاجبه :( و البنات أساساً مشغولات، اللي تشتغل و اللي تدرس و إللي عندها 4 عيال و ما تقدر تطلع لحالها معاهم فتطلب اننا نزورها أحسن فما نجتمع غير مره إلى مرتين في الأسبوع والله يا مسز داني،، أساساً أنا عندي مشكله اني ما أعرف ازعل، يا دوب دقايق و أنسى و أتكلم مع الشخص اللي زعلانه منه :d ما أحب ازعل، أحب أتناقش معاه عن السبب يقول اطلعي و إتونسي و أنا أحب اشوفك فرحانه، بس أشوف تصرفاته عكس كدا :29: أشكرك حبيبتي |
اقتباس:
أنا كمان حسيت إنه هذا ألسبب، ماهو متعود أحد يشاركه فيني كل وقتي كان له و للعيال، و ما نطلع إلا معاه أو لحالي مع العيال للحديقه أو المكتبه أو شوبنغ و نرجع بسرعه تكلمت معاه بهدوء و قلت إنه هذا شي لابد منه بكرا لما العيال يكبروا و يروحوا مدارسهم راح انشغل أكثر بالدراسه و الشغل بنفس الوقت ما يعارض فكرة الدراسة أو الشغل و يقول إنه يحب المرأه الطموحه اللي لها هدف بالحياه غير بيتها أعتقد انها بس مسألة وقت و راح يتعود على التغييرات اللي راح تحصل من فتره لفتره أشكرك حبيبتي |
بس ياعسل
جربي معاه إنك تخرجي وتقوليلي ساعتين بأطلع وتعالي قبل ساعة والمرة الثانية زوديها ربع ساعة وبعدها نصف ساعة وشوفي كيف حتقدري تخرجي وانت مبسوطة وهو راضي عليك ومبسوط فيك يعني حبة حبة على زوجك واحمدي ربك على حبه واهتمامه فيك الله يخليكم لبعض ولابناءكم والله لو ماسال عليك كنت قلتي ليه ماسال في احد في باله يبغى الفكه مني دمتي بووود |
اقتباس:
أهلين بالخالة الغالية غرين يا خاله العيال لسه صغار ما بدأوا المدارس وهما بس إثنين بنت 4 سنوات في الحضانه و ولد سنه و 10 شهور،، و الولد إن شاء الله كمان راح يبدأ الحضانه السنه الجايه بيكون قريب الثلاث سنوات و إن شاء الله وقتها راح أرجع على الدراسه أو آخذ كورسات لغه في البدايه و الحمدلله هما جداً هاديين و يلعبوا بغرفتهم و متعودين على النظام و الترتيب و مش مزعجين أبداً أنا ما عندي مانع أبداً آخذهم معاي في كل مره، بس أحياناً يكون مستمتعين باللعب مع أبوهم و ما يبغوا يروحوا و أحياناً زوجي بنفسه يطلب إني أروح بدونهم أما في الصباح لما أودي البنت الحضانه، أروح على الحضانه المفتوحه أو مكان تجمع الأمهات و نستفيد من وقتنا بتعلم الخياطه و طبخات و إلخ و يكون ابني معاي يلعب مع العيال الثانيين بغرفة الألعاب اتبعت طريقتك يا خاله قبل، بأني اطلب كمان نص ساعه بس لما أرجع على البيت يقول تأخرتي :( أشكرك يا الغاليه |
الله يسهل امورنا ويطوي غربتنا على خير
انا الان مثلك زمان وجداً خايفه مالي اي علاقات وحياتي كلها زوجي واولادي انتظر ابني يدخل الداي كير وابلش دراسه باذن الله واكيد راح يكون لي علاقات وصحبه فاخاف زوجي مايتاقلم ع الوضع الجديد احاول الان اطلع واشغل وقتي واخرج من جو الاكتئاب عشان لايكون بعديين في تغيير على زوجي ويرفض الخروج مع الانشغال بالدراسه ويخلي في حاجز يعيقني واكون مقيده اكيد بتقولي اني استبقت الاحداث لكن حصل كم موقف بالاونه الاخيرة وكان زوجي يتردد بالموافقه ويكون واضح عليه الاستياء والاعذار بالوقت والاولاد ومدري ايش الله يكون في العون راح اكون متابعه للموضوع لعل اجد حلول وافيه تحياتي لك |
اقتباس:
الله يحفظلك زوجك و أولادك و بيتك و فعلاً الغربه صعبه، و مافي أصعب من البعد عن الأهل خليكي متابعه عزيزتي :) |
صراحة من مرة إلى مرتين في الإسبوع عدد جدا معقول ..
في رأيي أن زوجك ( غيران ) فقط .. تعود سابقا أن كلك له .. والغيران شنسوي فيه ؟ نتكيف معه ونعطيه أكثرو أكثر عشان يقتنع أنه هو الأهم والأغلى .. الله يخليكم لبعض.. |
لوفي ياعسل ..
عاادي حبيبتي استحملللي .... بس كذا بالبداية بعدين يتعود مش عارفة طبع زوجك كيف من ناحية الناس مثلا زوجي .. اذا شافني اتعرفت على ناس كثير يقولي خففي :) مايجي من ورا الناس الا وجع الراس و بنظره عائلتين و لا 3 محترمين احسن من 10 عايلات لانه بكثرة الناس تكثر المشاكل عادة نظرة الرجال لبعيد و يمكن زوجك زي زوجي يشوف انه حتى لو الان سمن على عسل فا كثرة الاحتكاك بالناس تولد المشاكل .. و انا مثلك احب الحياة الاجتماعية و بيتنا ماشاء الله دايما مليان فا اتعودت على الناس اذا كان هذا هو السبب .. فا حاولوا الاتفاق على عدد معين يرضي الطرفين :d الاحتمال الثاني .. قد يكون زي ماقالوا بقية الاعضاء يمكن انه غيران :d.. فهذي الحالة مالك الا طولة البال و الصبر مع التاكييد على انه المرتبة الاولى في حياتك وحاولي توقفي الطلوع فترة .. عشان يحس بالذنب :22: |
اقتباس:
بحاول أعطيه أكثر و أكثر و إن شاء الله يقتنع مشكوره حبيبتي و على فكره صورة توقيعك جداً مؤثره :) |
اقتباس:
طول الأسبوع اللي فات ما طلعت و لا عزمت أي وحده البيت و مع ذلك زوجي يسألني ليش ما طلعت؟ قلتله بدلع مشتاقتلك و ما ابغى أخليك فقال وهو يضحك الله يعيني شكله الدور علي الحين و بتصيري لاصقه فيني :d فقلت كمان بدلع أجل إذا ما لصقت فيك فمين الصك يعني؟ مالي غيرك و الله يعينك مثل ما قلت حسيته من جد فرحان.. فالأخ طلع غيران و يبغاني لنفسه و بس :14: الله بيعين إن شاء الله و يتعود مع الوقت مثل ما قلتوا |
الحمد لله انك عرفتي السبب
وكله يتسير بالدعاء ان شاء الله فرحتلك مررره انه صار فرحان ومبسوط منك الحمدلله كل شئ يكون صعب شويه شويه يصير كل اللي تبغيه الله يسهل غربة كل الاخوات............. |
حاولي انك اذا طلعتي زيارة ترسلين له مسج حب واشتياق
واذا رجعتي احضنيه وبيني مدى شوقك له علشان يحس انك ما زلتي اولى اهتماماته وبكذا يمكن يخف عليك شوي |
اعتقد ان الموضوع خوف عليك مع بعض الغيره فبعد ان كان هو كل محور اهتمامك وانشغالك واستمتاعك اصبحت لك محاور أخري
وتصرفه هذا طبيعي والحل أظهري مزيد من الاهتمام به ولا تظهري كل سعادتك بحياتك الاجتماعيه الجديده وطلبه لك الا تتأخري عن ساعه ليس فيه معصيه وعليك طاعته فهو ليس طلب صعب ثم اقنعيه بعد ذلك بما تريدين وليس بالجدال والمشاكل فهو مقنع في رده عليك ولابد ان ترضيه حتي يحفظك الله ويبارك لك في خروجك |
اقتباس:
يعني تعذيرة ... حبيبتي مو كل كلام الزوج لازم ناخذ فيه يمكن يقولها بزعل لازم تفهمي من صيغه كلامة... اي زوج بالعالم ما يحب يكون فالبيت وزوجته برة البيت.. بعدين حاولي تقللي من زياراتك... ولا تغضبي زوجك من كثر زياراتك ... زوجك غيور عليكي ويحب وجودك عنده بالبيت لما يكون موجود... والصداقه الها حدود ... لاتجعليها شيء كبير وماتستغني عنه امام زوجك ... قدري مشاعرة واحترمي رغبته وطيعيه واعلمي ان تصرفات الشخص هي اصدق من الكلام ... |
| الساعة الآن 02:27 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©