|
ما آخذ راحتي في بيتي
السلام عليكم
عندي مشكله انا ما آخذ راحتي في بيتي ، زوجتي دايم يجونها اخواتها وانا ما آخذ راحتي في بيتي لازم اطلع وانا انسان ما احب اكون بعد الساعه 12 برا بيتي ، ومن زمان متعود على هالشي حتى قبل الزواج فأظطر اني أطلع من البيت واروح عند أهلي أو في الإستراحه مع اني ما احب الإستراحات بس مظطر وإذا جا خميس وجمعه يا يجونها اخواتها يا تروح لأهلها وتنام عندهم ، وانا مابيها تنام عندهم واذا قلت لها تقول مستحيل اجي انام في البيت خميس وجمعه انت رافض اخواتي يجون ما تقدر تمنعني من النوم عند اهلي وش العمل ؟ ووش الحل ؟ |
وانت ليه ماتخلي خميس وجمعه نقاهه لك ولها يعني لازم تجلس في البيت خلها تستانس مع اهلها واخواتها ليش التنكيد
على العموم تقدر تجبرها وهي واجبها الطاعه واذا مارضيت لاتجي باقي الاسابيع عندك تكمل الباقي في بيت اهلها والا تحترم رايك وخلك حازم معها بتزعل فتره ومصيرها ترضخ اعجبها ولا مااعجبها |
أخي الفاضل.. التعلق بالأهل والأخوات شي وارد.. بالذات إذا لسه عرسان اتفق مع زوجتك بشكل لطيف انها تحدد أوقات معيينة لزيارة أخواتها.. اكيد البيت بيتهم في اي وقت.. بس وضحلها انك ما تحب السهر وانك تشتاقلها.. وممكن ما تخرج من البيت وقت وجودهم.. ليه تخرج؟؟ اجلس في غرفة ثانية.. كدا انت في بيتك والويك اند ممكن أسبوع تنام وأسبوع لا.. كله بالإتفاق والتراضي.. حببها في الجلسة معاك أكثر.. وعموماً التغيير مطلوب ولما تروح وترجع حتشتاقو لبعض.. الله يجمعكم على خير إن شاء الله.. |
صراحه مايعجبني الوحده تعود الزوج انها تكون بعيده عنه
اكيد اهلها وعلى عيني وراسي بس مو كل اسبووووع تنام عندهم يعني الويك اند احسه للازواج هو طول الاسبوع مشوا يبيها له بالويك اند اقترح عليها الاربعاء لاهلها ولو تبي تنام بس الاربعا والخميس لكم تطلعون سوا والجمعه زياره اهلك انا مااايد الزوجه كل اسبوع تنام عند اهلها معناته متى هي وزوجها يجلسون برواقه وبعدين غريب الاهل كل اسبوع عند بنتهم كم لكم متزوجين وهي الوحيده متزوجه من خواتها ولا كيف الاخت هدو انثي هو مقصده تنكيد الرجال يبي زوجنه يبي يحس بروعه الويك اند معها تصدق ماحسيت بقرب زوجي لي الا بالغربه تعودنا على بعض اذا نزلنا الصيف زياره لاهالينا نتضايق ان كل واحد بمكان ومانستمتع لان تعودنا اننا مع بعض |
المفروض إنك تقول لها إنها تتفق مع خواتها كل مرة تصير الجمعة عند وحدة إذا كانوا خواتها متزوجات مثلها أو انهم يتجمعوا باستراحة أو منتزة وبالنسبة لأهلها تزورهم الاربعاء وممكن تروح بدري وتجلس الى الليل وبعدين ترجع لبيتها
إحنا آغلبنا كذا نسوي خاصة اذا كان فيه أولاد وتكون موظفة وإذاكان على النومة ممكن انت تسمح لها تنام بين فترة وفترة الله يوفق الجميع |
:* يحدد لها يوم بالأسبوع لزيارة أهلها ويوم لزيارة أهلها لها إذا هالشيء ضروري عندكم وبعاداتكم :* أضف لذلك زوجتك تشعر معك بالملل فهل أنتَ من النوع الذي بالبيت طوال الوقت ولاتحب أن تخرج معها للترفيه والتمشية وتضطرها فقط للجلوس معك بالبيت دون خروج..؟! :* |
الزوجه الي تعود زوجها على بعدها غلطانه لانها تعطيه مجال للخيانه
تعطيه فراغ كبير في حياته يعني لاضرر ولا ضرار حلوه الاشياء المعقوله مره كل شهر مش كل اسبوع بس انت لازم تغير من اسلوبك بالطلب يعني انت طلبت تجلس وقالت لك لاء المره الثانيه خذها فندق ليلتين يعني الخميس والجمعه غير جوها خليها تحس انك متجدد دايم والله يسهل عليكم يارب تقبل مروري. |
اذا كان ماتقول حق فاني اتعجب من المبالغه في الزيارات سواء من الجانبين فالضيف مهما كان قريب فهو يضيف يقيد الحريه
لماذا لا تكون الزيارات وقت وجودك في العمل وكيف انه يوم الخميس والجمعه تنام عند اهلها المفروض يوم الاجازه للزوجين اما الزيارات فلا بأس من رأي الا تترك المرأه بيتها وتبيت خارجه الا لضروره كمرض امها او خدمتها او حتي من فتره لفتره لتستأنس بها او حمل او نفاس هذا ما اراه ولكنك لن تستطيع ان تمنعها فجأه عما اعتادت عليه فقط ابدأ بتقنين الزيارات وضع النظام لها فأنا لا أحبذ ابدا الزيارات المفاجأه من الطرفين فالبيت له حرمته واستئذانه |
عجيب أمرها ,
أنا من رأيي لازم يكون لك قوانين تمشي على الكل . مثلا الضيوف لازم يمشون من البيت كحد أقصى 11 . امممم يحدد يوم وسط الأسبوع ويوم بنهاية الأسبوع لزيارة أهلها , إذا كانوا أهلها معها بنفس المدينة ماله داعي تنام عندهم , عيب , أنا أهلي بمدينة ثانية , أروح لهم كل شهر تقريبا , أحيانا أجلس أسبوع وأحيانا خميس وجمعة بس لازم تقوي شخصيتك وتتفاهم مع زوجتك بالطيب . قل لها وش الفايدة من زواجنا إذا كانوا خواتك دايم عندك ونهاية الأسبوع تروحين لآهلك موب أحسن لو انك ماتزوجتي |
حاول أخوي تفهمها بطريقة غير مباشرة .. حاورها بود وبلطف وبحنان .. الحريم ترضيهم هالحوارات .. بين لها حاجتك لقربها منك خصوصا أيام الويكند .. عطيها حلو الكلام.. اوعدها بمفاجآت نهاية كل اسبوع .. طلعة تسوق مبيت بفندق ووو مع الأيام راح تتعود عليك . وخلك مرن معها لا تحرمها من زياراتها لأهلها دامها ما موظفة فهي تتونس معهم .. |
ماأشوف له داعي تنام الزوجة عند أهلها إلا للضرورة القصوى وظرف خارج عن الإرادة
أما كل أسبوع حلوة ذي وزيارات أهلها برضو كثيرة حدد لها يوم في الأسبوع لزيارة أهلها ماينفع كدا لازم تتفقون وتتناقشون بالموضوع وعلى رواق |
اقتباس:
الأسلوب هذا مو حلو..وبيخليها تكره وماتحبه أخـــوي اشرايك تقترح عليها خميس تبات عند أهلها والثاني في بيتها..كل شي حلو بالهدوووووء والتفاهم..,,, |
وش ذا بعض الردود تحرض الزوج على زوجته لازم تنحذف
.... بس بصراحة مشكلتك طررر واول مرا اسمع زوج مؤدب ويرجع البيت بدري ههههه اسمح لي هاه... ... اتوقع لو تكلمها وتسوي لها جدول ونظام وايد زين ...وبعدين خميس خلوها لكم لسهرتكم برا مع بعض والاربعاء خلها تبات بيت اهلها بكرا تجيب عيال وتزهق امها من ربشتهم..يعني هي فترة وكمان ماحد يسهر اكثر من الساعه 12 قولها هالشي مرفوووووض وربي يفرجها |
الحين انت رجال وماتقدر تحكم زوجتك؟؟معقوله يطلع منك هالكلام...وتسال وش تسوي بعد ...
يااخي قلها نومه عند اهلك لا ومليون لا وانا ابيك تنامين عندي...طبعا ماراح تقدر تسوي شي حتى لو اشتكت لاهلها ماراح يسمعون لها وبيوقفون ضدها وينصحونها...الا اذا كانوا من الاهل الي مايستحون ولايهمهم حياة بنتهم... وبعدين لاجوا خواتها وانت ماتبي تطلع من البيت اجلس في غرفتك ليش تطلع مو بلازم تطلع ..ولايكون هي بعد تقلك اطلع وانت تقلها سمعا وطاعه يازوجتي..وتنفذ كلامها.. خلها تروح وتجي وتستقبل على كيفها لكن بحدود واذا انت ماتبي تطلع من بيتك لاتطلع ..ودام اهلها بنفس المدينه ليش تنام عندهم انا استغرب من بعض الحريم الي تنام في بيت اهلها كل اسبوع من الاربعاء الى الجمعه لاام تنصح و لا لب ينصح..والمسكين الزوج جالس في بيته الله اعلم وش راح يسوي في الاخير.. |
صراحة انا مااقدرانام برى بيتي
حتى لو عند اهلي انا ازورهم مرة وحدة في الاسبوع واهلي مايجوني الا كل 3 شهور مرة يعني الوحدة لازم تحترم زوجها هو ليش تزوج عشان تنام برى البيت انا ضد هذه الفكرة بتاتا الا لضرورة قصوى تقبل مروري |
يا عزيزي وضعك بسيييييط جداً
1- اذا جو خواتها في البيت انت لا تطلع خلك في بيتك في غرفتك 2- النوم عند اهلها انت ممكن تحوله لوضع في صالحك وبدون اي شوشرة.. اذا انت مكلمها على هذا الموضوع وما استجابت لك انا لو منك اسافر اي مكان مكة او المدينة او كشتة بر او اي دولة قريبة.. المهم يكون بشكل مفاجئ وقلها بصريح العبارة انت عايشة حياتك كذا وانا بعيشها بالطول والعرض.. وبعد سفرتين او ثلاث شف النتيجة |
بسم الله
توكلت على الله و لا حول و لا قوة إلا بالله بخصوص زيارات الأهل الكثير من المتزوجين حديثا يعانون من هذي المشكله الأفضل أنك تتركها و لا تناقشها في هذي الموضوع بتاتا لأن منعك للزوجه من أن تذهب لعند أهلها أو المبيت عندهم عند من وجهة نظر الزوجه غير منطقي و غير مقنع و الأفضل من النقاش هو الأفعال ممكن بين فتره و فتره تاخذها في رحله في الخميس و الجمعه أو السوق أو تتمشى بها في مكان لكن من غير ما تفهمها أن السبب هو أنك تبعدها عن أهلها و أجعل نيتك الأصلاح لتنشأ بيت سعيد يكون لبنة من لبنات المجتمع الأسلامي المتين وتأكد أن الزوجه مع مرور الوقت بإذن الله راح تثقل و على أهلها و أخواتها كذلك و راح تقل هذه الزيارات تدريجيا فلا تكبر الموضوع أكبر من كذا و تحملها فأنت الرجل و عليك بالصبر و التحمل و بإذن الله النتيجه في النهايه ستكون في صالحك والله أعلم |
سبحان الله
سبحان الله سبحان الله ذهبت الرجوله والقوامه اصبح الراعي من الرعيه واصبحت الرعيه هي الراعي خذها قاعده اول الزواج مثل تاسيس العماره اذا اسسته صح بترتاح طول عمرك واذا اسسته اي كلام بتعاني طول عمرك الحين زوجتك تقولك مستحيل انام خميس وجمعه عندك وانت راضي ومبسوط انها تمشي كلامها عليك ليش ماخذها مسيار ولا هي الي خاطبتك ودافعه مهرك انت صاحب الامر والنهي في بيتك وربي لتتعب كثيييير ولا احد درى عنك جيب زوجتك وبين لها قراراتك تمشي عليها غصبن عنها وعن الي خلفوها عجبها اهلا وسهلا ماعجبها فيه رجال وراها يعلومنها الصح من الغلط الحق نفسك من بدري قسما بالله لتندم في الاخير |
اخ الهم صديقي
الله يبعدك عن الهم ان شاء الله بخصوص نهاية الاسبوع ممكن تخليها مرة بالشهر وزيارات اخواتها مرة بالاسبوع اما تروح لهم او هم يجونها وكذا ينحل الاشكال بدون حساسيات اخوي من الممكن ان تكون كثرة زيارات زوجتك لاخواتها تعبير غير مباشر عن عدم راحتها او مللها من روتين حياتها معك .. فحاول تجدد روتين حياتكم مع بعض الله ييسر امورك يا رب |
اقتباس:
اذا الحياة الزوجية بعينك ملعنة ومن يمشي كلمته .. فراع انها مو كذا عند غيرك .. لان في رجال يحبون ياسسون حياتهم على التفاهم ومراعاة الزوجة .. مو قهرها واستغلالها فعلا فيه بعض الردود لابد ان تحذف |
قصه نوم الزوجات برة البيت هاي عمرها مادخلت راسي ولابقتنع فيها ... انا ضدها
الا اذا كان الوضع لضّرورة ... شو يعني خميس على جمعه تنام عند اهلها وانت وين صفيت ؟؟ يعني الي بقهرني انه الاهل بيظلو عند بنتهم طول الاسبوع وباخر الاسبوع بتنام عندهم ياسلام خلص اسكنوا مع بعض وخلص .....!!!!! ماحد يمنع انهم مايزورو بنتاهم بس لازم يعرفو ا انه بنتهم عندها زوج وبده يوخذ راحته وقصه ال12 بالليل زادت الموضوع عن حده ..... شو البيت ماله حرمة ولا فش فهم عند الناس الحمدلله .. لليش تزوجت اذن خليها في بيت اهلها الوحده احسن الها .... اصلا مهو الخميس على جمعه للوحده وزوجها وزيارة الاهل ...... مو تنام .......!!!!!! وانت بالنسبه لزوجتك فهمها انه هالوضع بيضايقك ومابخليك توخذ راحتك ... وخلي خواتها يجتمعوا عندها كل مرة بالاسبوع مثلا .... ويوم بالاسبوع تروح عند اهلها ....اما نوم لا مااله داعي اساسا مازال الها دار تنام فيها وزوج مالها حجه تنام برة دارها دقيقه .. اصلا مابعرف كيف الوحده بتعرف تنام بعيد عن زوجها الا اذا كان الوضع اضطراري ... طبعا بالبدايه تعال معها بالمنيح واذا ما ردت خلي عندك قوامة وافرض شخصيتك ولاتقول حرام ازعلها... الحياة شد ورخي واذا زعلت منك بهالموضوع بترضى بغيره فهمها انه الوحده لما تتزوج بيصير عندها بيت مسؤوله عنه وزوج مو بس زيارات وقعدات ... (( اللي بيزيد عن حده بيقلب ضده )) |
بالنسبة للنومة عند الاهل اشوفها عادي وكثير حريم يسوونها اش فيها منها راحة وجمعة وبسطة مع الاخوات والاهل واجتماع على الوجبات , يمكن زوجتك تحس بملل وطفش في البيت نهاية الاسبوع لانك تنام بدري ولا تخرجوا وتتمشوا ولا تقعد معاها <احتمال راجع نفسك وغير في الروتين
تلاقيها تبغا تغير جو مع اخوتها عادي لاتحرمها بس اتفق معاها لو مضايق مو كل اسبوع قلها مثلا كل ثلاث اسابيع ولااربعة روحي باتي والاسابيع الباقيه تروح زيارة والله اخوي لاتقعد تحبكها كل شي يجي بالتفاهم الزواج عشرة بالمعروف ورحمه راعي زوجتك اكيد اخوتها كلهم هناك تبغا تروح وبالنسبة للزيارات اخواتها زي ماقالوا الاعضاء اتفق معاها وصارحها لا تحدد ايام كل فترة او كل مرة الجمعة عند وحدة >>>>> وحط في بالك انتو في بداية زواجكم يعني مع الايام راح يخف الوضع ان شاء الله ويعتدل |
اخي الكريم
لما تجي من اهلها مبسوطه ورايقه قلها حبيبتي انا اتضايق لما تنامين برا البيت وهالشي مايناسبني ابدا النوم ماتنامين برا البيت تبين تروحين لاهلك خذي اليوم من اوله تغدي وافطري عندهم لو تبين <<<<<<انا اسوي كذا وماراح يجي العشا الا خلاص ملللللللللللللللت وتدور البيت وقللها اذا ازواج خواتك يصبرون عن حريمهم انا مااصبر عنك ولا ليله وبالنسبه لجية اخواتها لا تطلع برا بيتك ولا في احد يقدر يقول لك انك ضايقته السالفه مو جيت يوم بالشهر ولا كل اسبوع ويني فيه تتخيل هي ان اخوانك يجون كل اسبوع كم مره ويجلسون طووووول اليوم لين بالليل ماراح تتضايق اكيد بتقول ماخلوني اخذ راحتي ببيتي وانت اولى |
اخوي خلاصة القول الي كنت ابغا اقوله في ردي الاول بس مامداني اعدله وطال الكلام وهو كله اعاده لكلام الاعضاء
طيب منك انك ماتحب السهر لانه مضر ويمكن يضيع صلاة الفجر وتأثم ولاتحب الفلفة في الشوراع على الفاضي لانصاص الليالي بس حاول دايما في نهاية الاسبوع تقعد مع زوجتك تخرجون العصرلانك ماتحب تتأخر سوليف معاها غيرو جو كفاية كل طول الاسبوع انت مشغول وهي مشغولة وبرضو راعي رغبتها في المبيت عند اهلها واتفق معاها كل ثلاثة ولا اربع اسابيع يومين تروح تبات والاسابيع الباقيه الي قبل البيته زيارة واخواتها حدد لهم يوم كل اسبوع ولا اسبوعين . والله يسهل عليكم يارب . |
| الساعة الآن 06:16 PM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©