|
دعيت على ولد زوجي واستجاب الله دعائي
علاقتي متوترة جدا بزوجي بسبب ولده ...
لأني دعيت عليه واستجاب الله دعائي و صار عليه حادث امه زعلانة و تزيد شجن زوجي .. أنا حياتي تعيسة و هالولد زادها تعاسة ،، كرهني بزوجي زيااادة مع العلم انه كبير عمره 34 سنة ،، متزوج وعنده عيال ،، و أنا عمري 26 ..! اللي صار انه كل مرة يجي زيارة لابوه ،، عليه بعض الكلام لكني اتحمل و اصبر اولها يقول لزوجي جيب زوجتك اللي هي أنا تسكن عندنا عشان اختي تكون عندنا طبعا هو يعرف أني مستحيل اروح عندهم خاصة ان زوجي متزوج ثنتين كلهم كبار وانا الثالثة ... و هالمرة كان جالس عندي و يقول ليش الوحدة وهي صغيرة و حلوة و متعلمة تتزوج واحد اكبر من أبوها ..! طبعاً يلمح بالكلام على أني غير شريفة و من هالكلام .. أنا ثارت أعصابي و طردته من بيتي و أخذت سيارتي اللي كنت معطيته إياها يستخدمها و راح ابوه زعل .. كيف اطرد ولده الكبير .. مع العلم انه عنده اكبر منه ،، و هالولد أخلاقه زفت حتي مع خواتــه .. و قال لي زوجي تعتذري منه .. و هو يعتبرك. زي خواتــه طبعا مستحيل اعتذر ،، و قلت له أنا مو اخته ،، و الله لو يموت ما اعتذر له .. و لو يدخل بيتي مرة ثانية ،، لا طلع منه و لا عاد ارجع .. و كبرت المشكلة و دعيت عليه ان الله ياخذ حقي منه ،. و سبحان الله استجاب دعائي و صار عليه حادث بنفس اليوم .. و زوجي عصب و يقول كل شي الا عيالي ... ! أنا كرهت زوجي و عياله و كل حياتي معه ،، افكر جديا بالطلاق بس خائفة على بنتي |
سبحان الله
ربي يصبرك زوجك بصراحه ماعليه حسوفه لو تطلقين وأنتي صغيره وولده ماراح يخليك في حالك مدري هذا رااي البعض بيقول غلط لكن صدق الواقع شايب وعياله شياب وش الخساره فيه ؟! وبنتك أبوها شايب الله يعطيه طولة العمر مو دايم لها الله يدلك علي إلي فيه خير ويصبرك ويعينك |
السؤال الي وجهه لك ولد زوجك ...تلقين كثير ناس ودوهم يسالونك نفسه وصدقيني ماله علاقه باتهامك بشي شين...ليش وحده صغيره وبامكانها تتزوج شاب في عمرها ليش تروح تتزوج شايب...وتدفن نفسها معه .لاتقولون نصيب لان ربي اعطانا عقل نفكر فيه قبل لانخطي اي خطوه وقبل لانقبل نصيبنا..يعني نفكر على الاقل في الاطفال الي راح ينجبهم اكيد بيتيتمون وهم صغاراو مراهقين..
ويمكن ولده مو قصده يتهمك بشرفك يمكن هو كلامه على لسانه والي في قلبه يطلعه على طول من دون مايحس او يحسب حساب... وبالنسبه لكلامه لزوجك وطلبه انك تجين عندهم عشان بنتك تكون معاهم بصراحه مااشوف فيها شي يستدعي انك تزعلين. او تدعين عليه لانه هو فكر في اخته الي هي بنتك..يعني انتي اذا ماتبين قولي ماابي اروح عندهم وخلاص انتي لو انك بدل دعوتك عليه دعيتي بدعوه حلوه مثل الله يهديه او الله يسخره لي ولبنتي الي هي اخته كان الحين ربي استجاب دعوتك صح ولا لا .. |
اقتباس:
لكن أنتي الله يهديك يمكن قدمي سوء الظن في كلام ولده |
مع رأيي الاخت ليه الغرور ...
|
ملامح قمر / ليه الغرور :
الله يهديكم ؟!! وش هالسوال ؟!! كيف الله عطانا عقل ..! خلاص تزوجت و صار اللي صار .. وأي شخص يسال هالسوال ؟!! ماله حق ،. حياتي وانا حره فيها و أكيد عندي أسبابي و لد زوجي اثر على ابوه وصار الا يسكني عندهم مع ان شرطي الاول اسكن بعييد عنهم .. مستحيل اروح عند حريمه و عياله و زوجاتهم ،، أنا طالعة من عند زوجة أبوي و زوجات أخواني اروح أطيح بغيرهم ...؟!!! أنا ما ابغي وجع راس وقال وقيل و غيرة مالها اساس .. ابغي ارتااااح و بس و يكون لعلمك انه مو خائف على اخته ،، هو يضرب خواتــه من امه عاد بيخاف على بنتي تراها صغيرة عمرها شهرين بس ..! وعلى فكرة ابوه نفسه جاء وقالي ديري بالك على بنتك لان واحد من عياله ( غير الولد هذا ) يقول انه بيخطف بنتك ،، تراهم مجانين ... و الله ما استبعدها عنهم .. الغيرة فضيعه .. و المشكلة كلهم كباااار بس هذا تزوج توه وارتحت منه ... و كلامه ليش متزوجة ابوه ؟!! سخيييف و أنا عارفه قصده .. و اخته قالت لي انه راح لامه و قال لها روحي شوفي زوجة ابوي ،، شكله راح يطلقك ( يقصد امه ) و الدعوة لو دريت ان الله بيستجاب لي كان دعيت انه يموت وارتاح منه ،. لو ما كنت مظلومة ما كان الله استجاب لي .. |
أختي الكريمة
ثقي بأقدار الله سبحانه وتعالى وأعلمي أن الله سبحانه وتعالى قد كتب عليك أن تكوني زوجة لهذا الرجل الذي أنتِ في عصمته الآن وأما مسألة كيف وافقتي عليه أم لم توافقي وهل هو شاب أو شايب .. فهذا لا يغني من الموضوع شئ لأنك الآن أنتِ زوجة وأم وعليكِ أختي أن لا تخلطي بين زوجك وأبناءه فليس ما إذا أخطا الإبن تتحاملي على الأب ويُكره من أجل إبنه تعاملي مع زوجك بما ينبغي على كل زوجة أن تتعامل به مع زوجها وعيشي حياتك الزوجية بكل سعادة إذا كانت الحياة تطيب لك مع هذا الرجل وفقك الله |
ياأختي انا ماراح أقوللك ليش تاخذينه بس انتي يوم خذتيه اكيد عارفه أن عنده عيال وأكيد متوقعه يايحبوك او يكرهوك
ليش ماحاولتي تكسبينهم تظهرين احترامك لهم ترفعين معنوياتهم بالكلمه الطيبه ترا طال الزمن ولاقصر هم أخوان بنتك هم سندها وعزوتها من بعد الله انا انصحك لاتدعين عليهم لابسوء ولابشر أدعي بالخيروالتسخير أفضل للك ولبنتك ولاتفرحين أن أنه جاءه حادث لربما يرحمه الله ويبتليك أدعي قد ماتقدرين أن الله يهديهم ويسخرهم للك لاتظهري قوتك عليهم حاولي تكوني قدامهم أنك ضعيفه ومغلوب على أمرك والله يهديهم ويسخرهم للك |
طيب تطلقي دام الحاله كذا إذا علي ابوها شايب الله يعطيه طولة العمر
أما إذا مات تورثين أقولها لك ماراح تطولين لاحق ولا باطل الكتاب واضح من عنوانه يعني وش تنتظرين لما تكبرين زياده ؟!! أو يجيك شرهم لبيتك بصراحه هالعيشه ينخاف منها مافيها أمان ولا راحه |
ملامح قمر
عن أبي هريرة رضي الله عنه قال : قال رسول الله صلى الله عليه وسلم : ( لَيْسَ مِنَّا مَنْ خَبَّبَ امرَأَةً عَلَى زَوجِهَا أَوْ عَبْدًا عَلَى سَيِّدِهِ ) . رواه أبو داود ( 2175 ) وصححه الألباني في " صحيح أبي داود " . |
الرسمي / و الله ما تحاملت على زوجي أبدا
و لا عمري تدخلت بينه وبين عياله أبدا ،، حتي زوجاتهم عمري ما سالته عنهم لكن هو حاطني بكفه و أولاده بكفه ،، زعلان مني عشانهم .. هم انفسهم شككوه فيه ،، كافي بنته الكبيرة و تدخلاتها بحياتي وانا صابرة اتزوجته و رضيت فيه و حاولت أكيف نفسي معاه ،، لكني بنظره طفله ما تفهم و بنته و زوجتة الاولي افهم مني ،، لدرجة اذا تعبت بنتي و قلت له خذها الطبيب يروح يسال بنته او زوجته الاولي ..! .... |
الحادث هذا شي ربي مقدره عليه قبل ما تجيبك امك الله يهديك
فكري في علاقتك مع زوجك بغض النظر عن ابنه و شكراً |
عذاب الورد / و الله أني احترمتهم مو عشانهم عيال زوجي بس لا
لا نهم كمان اكبر مني سناً .. ياختي ارحب فيهم ببيتي و استقبلهم هم و زوجاتهم و عيالهم ( مع ان أولادهم مجانين ) و لا عمري تذمرت منهم او اشتكيت ،. سيارتي اللي ابوهم شاريها لي ،، طلبها ولده من ابوه وقال له لا هذي سيارة خالتك ( اللي هي أنا ) لكن أنا احترمته و قلت لابوه ليش تقوله لا ،، و اعطيته إياها ..! عمري ما رفعت صوتي عليهم اصلا كنت اخجل منهم .. اذا جوا لابوهم يبغونه بموضوع اطلع و اتركهم معه و لا ادخل بينهم أبدا .. لكن بدون فائدة ،، و للمعلومية أخوهم الكبير جدا محترم و الاوسط بعد و الصغير لكن الباقين الله بلاني فيهم .. |
اقتباس:
أهي إنسانه وصغيره في العمر هذولا وحوش بصراحه وش تجلس تسوي معهم لو زوج ممكن ينصلح لكن هذا وش تصلح فيه أو عياله اقتباس:
أعرف كلامي ماراح يعجب كثير و تخريب بيوت بس إن شاءالله لو تتركه ربي يغنيها بأفضل منه خلها تتركه وتشوف حياتها بدل ماتضيع أحلا سنوات عمرها في ملاحقه أهو وعياله ومشاكلهم أختي بصراحه لاتعتبرين كلامي هذا أنه سخريه أو تقليل أو فيك شي لابالعكس بس أنتي تستاهلين الأفضل من هالعائله والله يدلك علي إلي فيه خير |
ملامح قمر / أخذ و غصباً عنهم ،، حقي و حق بنتي ..
يكفي حياتي اللي راحت ،، اترك لهم بعد حق بنتي ..؟' اصلا ابوهم نفسه يخبئ عني أملاكه و املاك عياله ،، و على باله أني مو داريه عن شي ما عرف أني على اطلاع بكل اوراقه و مستنداته اللي عندي .. اما اللي مو عندي الله العالم فيها .. ( مع أني والله العظيم قنووعة باي شي ،، لكن هم غيروني بتصرفاتهم و ظنونهم السيئة ) و لما تزوجته ما كنت ادري وش عنده وكان يقول ما عندي شي وانا مصدقة لكن كثرت اجتماعاته مع عياله و كثرت تلفوناته خلتني ادور في مستنداته واعرف اشيا ما كنت داريه عنها .. |
غريب / فعلا كلامك صحيح ،، لكن أنا وهو طالع من عندي
اتجهت للقبلة و رفعت يدي و قلت يارب ما يوصل بيته سالم معافي .. و هو الحين بالمستشفي عساه ما يطلع .. |
لاحول ولاقوة الا بالله
استغفري ربك ترا ما تدرين يمكن تلاقينها في ابنائك او في نفسك ربك يمهل ولا يهمل توبي لربك الله يهديك فيه ناس عفت عن قاتلين ابنائهم والله يعفو عن البشر وانتي لاتعفين عن مشكله صغيره ادعي له بالشفاء ومالك الا اجر |
ملامح قمر / معاك حق ..
هو لو زوجي بس ،، كان مقدور عليه ،، لكن هذولا جننوني سلمت من أمهاتهم و لا سلمت منهم .. ودي اتطلق لكن مستخسره أني اطلع بدون فايده ..! |
غريب / أنا ما ذنبت عشان استغفر ربي
لا تنسي ( اتقوا دعوة المظلوم فانه ليس بينها وبين الله حجاب ) وهذا اللي صار معي .. |
ولا تنسي
(والكاظمين الغيظ والعافين عن الناس) وش تقصدين باالفايده اللي تبين تخرجين فيها من زواجك ! |
للاسف تعامل الاعضاء مع الموضوع سيء واحيانا غبي
اجل مظلومه تدعو على من ظلمها ويقولون استغفري ربك !!! ياحبيبي ابواب السماء مفتوحه تجي تقفلها .... واللا اللي تقول تطلقي هذا كبير هي لو ما اقتنعت ان الجزئية هذي ماهي اشكاليه بحياتها كان ما تزوجته ,,, واللي يقول بيني انك ضعيفه !!! المراه تحتاج لوضع حدود تتفق مع زوجها عليها منها انها مستعده للتعامل مع اولاده بالتقدير والاحترام لكنها ليست مستعده لتحمل اذاهم هذا امر الامر الاخر اللي مايحترم زوجة ابوه مايدخل بيتها واذا يبي ابوه يروح يقعد معاه بالمجلس ولا بينك وبينهم لا سلام ولا كلام ,,, مسالة السكن تتقفل واذا يبي يغير رايه قولي بيت اهلي اصرف لي >> من باب التخويف زوجك ماينفع معه الا امرين ان تكوني قوية معه وان تلحسي مخه يعني العجايز قدرن يمشن كلامهن وانت بنت ماتقدرين تاثرين على عقله ؟؟؟؟؟؟ اهم شي دائما لاتحسسينه قدام عياله ان الكلمه كلمتك بيني له الاحترام قدام عياله واذا مشوا عطيه القاز ... والله يوفقك عليك بكثرة الدعاء والطيبه الزايده لاتعطينها للي مايستاهلها ,,, |
اقتباس:
بما أن دعوة الظلوم مستجابه أيضاً العفو من أفضل الاعمال الصالحه !!!!! لاتنظري لجهه وتتركين الأخرى هذه حياة انسان ماهي لعبه تخيلي ان اللي سوا حادث ابنك او اخوك وتعلمين ان زوجت ابوك او ضرتك هي اللي دعت عليه وش راح يكون ردك في هاللحطه بيكون مخالف تماماً لردك الآن لو تصل للطلاق لكن لايحدث أي مكروه لأي شخص أفضل هي تعلم انه كبير سن ولديه ابناء وزوجه والغيره ستلعب دورها والأبناء سيكرهونها لابد ان تتحمل وتصبر على اختيارها الله يحفظنا وحبايبنا من كل شر وكل سوء مانتمنى لاي مسلم او مسلمه ان يصيبه مكروه شكراً لك |
طيب هل تتوقعين أن هم ضرو زوجته اللي قبللك مثل ماضروك
وأنتي قلتي أن الكبير محترم جداا وثاني بعد يعني ان شاء الله في أمل أن تكسبيهم أذا مانفع تكلمي مع الكبير وقولي انا ماجت مني مضره ليش أخوانك يتعاملون كذا تكلمي معه وشوفي أذا كان الأب مو قادر عليهم ومن ناحية الأخ ليش كذا أحيان الضعف وعدم أستخدام القوه تجيب نتيجه أنا اتوقع مراهقين ومصيرهم بكره بيكبرون ويعقلون ويتزوجون وتنفك من شرهم لكن لابد من سياسة التعامل والصبر هذا أختيارها ولابد تصبر وتحتسب الأجر في اللي يجيها ولابد يكون عندهاا طولة بال |
اقتباس:
:* نفس الرأي وسؤاله في محله وتعجبه طبيعي جداً :* |
مع احترامي لكل الأعضاء..
ليس من حقنا أن نسألها هنا لماذا تزوجتي هذا الرجل.. هذا قدر الله..ولو نظرنا إلى زواج النبي صلى الله عليه وسلم بعائشة لكفينا أنفسنا السؤال.. وأعلم أن هناك من سيأتي ليقول هذاك النبي صلى الله عليه وسلم وتلك عائشة..هذا صحيح ولكن فعل النبي صلى الله عليه وسلم أسوة لنا.. فلكل إنسان ضروفه الخاصة فالذي لا نرضاه لأنفسنا ليس بالضرورة ألا يرضاه الآخرون لأنفسهم.. والأخت واضح إنها كانت في وضع مأساوي وأرادت أن تخرج منه ولكن للأسف إلى وضع أسوء منه.. أسأل الله أن يعيضها خيراً.. وبالنسبة للأخت صاحبة الموضوع استوقفتني عبارتك بأنك لا تريدين الخروج والإنسحاب بدون فائدة ما الفائدة التي تنتظرينها من هذا الزواج؟؟ هل هو الميراث مثلاً؟؟ أو مؤخر صداق؟؟ أرجو التوضيح وفقك الله.. |
السلام عليكم ورحمة الله وبركاته,,, اخيتي الكريمه اولا اذكري الله وما هذا الا مدخل اوثلم او مدخل للشيطان,,, حقيقه في بعظ الاخوان هداهم الله لا يرون المنظور او المشكله من منظور كامل وانما من زاويه السن والفارق, او من زاويه واحده هداهم الله ,,, ولا يرون ان بينك وبينه طفله,؟, بخصوص اخيتي الدعاء عليه فهذه في بعظ الاحيان لا تعبر عن المسلم ,, حتى لو كنتي مظلومه اخيتي فوضي امرك للخالق وعليك بامور بيتك واكتفي بعدم الموافقه او ابدي رايك بتروي تيقني اختاه لو انكي دعيتي له بالهدايه ولجميع بيته وترويتي قليلا في بعظ الامور تحتاج الى صبر وصدقيني اجرك عند الله سبحانه نصيحه اخ قللي من توترك وعصبيتك قليل وادعي له او لهم بالهدايا,, اما من يقول للاخت تطلقي ومن هذاالكلام الخ,, اختاه في بعظ المسائل تافه تحدث بها الطلاق صحيح, ان فارق سنك يحكمك ولكن انتي من وافق عليه بهذا الشي لاسبابك وامورك الخاصه,, اخيتي ارجعي الى عقلك وفكري بالامر بترويه, فأن هذه الامور تحتاج الا اتزان, ولكن دعي الخلق للخالق وادعي لهم بالهدايه ولك الاجر ان شاء الله,,, وصدقيني بخصوص زوجك في رجوعه لزوجته الاولى ان معظم الازواج المزواجين يرجعون الى زوجاتهم الاولى في كثير من الامور فلا تستغربي من هذا لا يعني تقليل شأنك وانما على كلامنا انه عارفها وعارفته زين ويرتاح في مشورتها اكثر ,, على العموم اخيه اسعدكي الله واراح قلبك وقلوب امة محمد,,, بوووركتم |
اقتباس:
ياخوي مسألة زوجي قااادرة عليه ،، لكن عياله من يروح عندهم غيروه و بطريقه غير مباشرة .. و العجائز على قولتك ،، قوتهم بعيالهم بس ،، و بتقارب السن بينهم .. أكرر شكري لك .. |
اقتباس:
تكون شخص عايش بحالك ،، كافي خيرك شرك ،، تعامل الجميع بيما يرضي الله اولاً ثم بما يرضي ضميرك عندك من المشاكل اللي يكفيك .. و بعد هذا يجي واحد حقيييييييير تااافه ما يسوى ،، وينغض عليك حياتك ..! و تقول بعدها حراام ،، هذي حياة انسان ما هي لعبة .. يعني استقراري انا ،، و شرفي اللي تكلم فيه ،، لعبة ؟؟!! ( إن الذين يرمون المحصنات المؤمنات الغافلات لعنوا في الدنيا والآخرة ) و البعض يقولون صحيح ليش اتزوجتيه ؟؟ رجل جاي وخطبني ،، ما كان لي الا الظاهر من دينه و خلقه ،، وافق على كل شروطي تزوجته ... إيش الغريب في الموضوع ؟؟! يعني كل وحده تزوجت نجلس نسألها ليش تزوجتي ؟؟! كل شخص وله ظروف تحكمه و مو ملزوم يشرحها لكل الناس و يبرر لهم وكأنه مذنب .. أجل الحين انا صرت ظالمة ومعتديه و ما اخاف الله .. سبحان الله يالبشر وحكمهم ..! يأخي الناس المعتدية تنسى ان الله فوقها و شايف وسامع و قادر .. و الحمدلله أن الأمر بيده وليس بيد غيره .. |
اقتباس:
و اصلاً ماحد يقدر عليها طلقها مرتين ويرجع لها بتوسط من عيالها .. و بعدين تراهم ماهم مراهقين كلهم في آخر العشرين و بعضهم في الثلاثين .. اخوهم الكبير محترم صحيح لكن ما يطلع من شور ابوه .. و الكلام إذا ما جاءه مباشرة من ابوه ما يهتم فيه ..! |
اقتباس:
و اتهامه في محله برضوا أو لا .....!!! سبحان الله .. |
اقتباس:
النفوس النظيفة دائماً ترى الناس بطهارة .. جزاك الله خير اما أصحاب الطباع و النفوس القذرة ،، فتعتقد ان الجميع مثلها ..! اقصد بكلامي اني ما ابغي يضيع حقي وحق بنتي من مال زوجي وان من الغبن ان اخرج كما دخلت ..! |
اقتباس:
دعوة المظلوم مقرره في الشريعة ،، ليست ظلم ولا منقصه ولا تعدي .. و الدعوة بالهداية لا يمكن تكون مع كره الشخص .. ( لا يكلف الله نفسا إلا وسعها ) شخص معتدي مؤذي ندعوا له بالهداية ؟؟! و نحن في شدة الأزمة منه . ياترى هل كل اللي قالوا كذا ،، بتصرفوا بناء على كلامهم لو كانوا مكاني ..؟!! |
أسأل الله الكريم رب العرش العظيم أن يصلح شأنكم ويكفيك من له شر يارب ويقر عينك بإبنتك يارب
|
اقتباس:
اكيد اخيه موجود ولك الحق في هذا ( فمن عفى وأصلح فأجره على الله) اتبدلين الذي هو خير لك بهذا,, طبعا اخيه المعتدي او المؤذي اي الشخص الذي يصيبك منه اذى او فاحشه او مضره او الخ,, يحق لك الدعاء عليه ويحق لك الدعاء له بالهدايه فلو دعيتي عليه بالهدايه وهداه الله فلن ولم يؤذي غيرك او يؤذيك,, ولك الاجر ان شاء الله,, وأنا بطبيعتي وبطبيعت شخصيتي دائما اقدم في الذي به خيرا والتمس من الله سبحانه ان يصلحه على كثير من الاشياء وما هي الا نصيحه يا اختاه ولك ما تشائين,, فأنا لا أعلم ما يوجد في بيتك كل اليقين والمعرفه بما يجري ومالنا في هذا المنتدى الا الظاهر لذالك كل حرف او كلمه مسجله علينا امام الله لو اخظئنا فسنحاسب عليها ,, اخيتي اسأل الله ان كان لك خير في وصالح بيتك ان يعطيك وان كان شر لك ولابنتك ان يصرفك عنه,, ربي يصلحك يارب ويصلح امة محمد,, |
اقتباس:
تتوقعين يقدمك علي عياله وإلا حريمه ماعليش بس إلي ياخذ بنت في عمرك هدفه الأول الفراش ولافيه أي ألفه أو محبه وممكن إلي يخاف الله بيعطيها أما غيره لاتحلمين حبيبتي شوفي أنا أقول لك الواقع بنتك أتوقع ممكن أنهم ياخذون الولايه عليها لأنها صغيره وبعدين خذي منهم شي أما أنتي لاتفكرين في شي لك ولاتقولين المحاكم رجاجيل بلحاهم ويالله يخذون حقوقهم من خلق الله تبين أنتي حرمه وتطالبين عيال زوجك عز الله ماخذتي لا حق ولا باطل وعزيزتي القانون عندنا كله في صف الرجال الحرمه تبطي ماطلعت حقها ومعروف حتي في الحضانه وفي النفقه أغلب الحريم ماتاخذ شي وماعندنا قانون يجبر الرجال يابن الذين أدفع لعيالك أو شي لا مافيه وياكثر الأخوان إلي ياخذون ورث خواتهم كثير جدا او يعطونهم مبلغ صغير يسكتونهم كيف زوجة أبوهم الناس ألحين تموت في الفلوس أستغفر الله هذا وأنا بنموت وميتين علي الدنيا ويتذابحون عليها أختي لو علي أستغفر الله بقول لك ياليت تلعبين علي هالشايب يكتب لك شي بعدين أسحبي عليه وأطلبي الطلاق فكي عمرك منه ولاتجلسون تكتبون مثاليات ومدري إيش وعن الأخلاق لو فيهه أخلاق ماراحو يستقون علي هالبنت هو وعياله اقتباس:
والله يستر الوحده مو ضامنه بكره تكون في مكان هالبنت أو غيرها الله يرحمنا وأنا ماتكلمنا ألحين الدنيا في يدنا أو الظروف ماتدرين وش يصير بكره الله يخلي لنا أهلنا وكنت أنتظر اشوف هالمثال يعني مقارنه فرق السماء عن الارض وش أحنا عند الرسول أو هالشايب أو غيره الرسول أكمل الناس خلقا وخير الناس لأهله طيب هل هالشايب تعامل مع هالبنت بنصف التعامل إلي جاء في السيره من تعامل الرسول اللهم صلي وسلم عليه مع زوجاته أي موضوع عند التعداد أو شايب أو كذا تضربون مثل الرسول وأنه تعدد لين كنا مثل خلق سيد الخلق اللهم صلي وسلم عليه نجي نتكلم ونقول الرسول اللهم صلي وسلم عليه وبعدين هل الشايب إلي ياخذ بنت في عمر الزهور تبي تعيش حياتها مع شاب مثلها وعندها طموحاتها ليه مانشوف البنت وإحساسها وفكرنا في الرجال هو عاش حياته وتهنا هالبنت كذالك من حقها تعيش حياتها وإلا عشانها حرمه تقول لا أدفني عمرك وزوجك ومدري إيش مجتمع ذكوري من الدرجه الاولي كل تفكيرهم في الرجال والمفروض يكون مستانس وهالحرمه تطق براسها الجدار وتخلي الصبر عنوان حياتها بصراحه المفروض يعطيها يكب عليها الفلوس كب علي الاقل تعويض لها أنها تزوجت مثله وبعدين إذا الشايب إنساني مره ويبي يستر بنت يقول لواحد من عياله أو من إلي يعرفهم ياخذ هالبنت ويعاونه في موضوع الزواج لكن يجي هو يعرس الحمدالله أخر عمره رجل في الدنيا والثانيه في القبر والأنانيه في قلوبهم لازم أعيش لأخر لحظه وأتزوج وأرمل البنت وش هالانانيه عندنا مجتمع أناني من الدرجه الأولي اللهم نفسي خاصه الرجاجيل قمه الأنانيه مايفكرون في غيرهم لا أنا مستانس خلاص الحرمه تموت قهر إلي يصير فيها عادي الله يولي عليها من يخافه ويتقيه بس وبعدين جينا للمثاليات إلا خلها تدعي عليه تبرد حرتها صح أنها تدعي بالهدايه أحسن والله يسخرهم لها لكن أهي قالته لايكلف الله نفسا إلا وسعها الله يوفقك أختي وييسر لك أمورك ويسعدك دنيا واخره |
الله يكتب لك الخير
انا لوكنت مكانك ماراح ادعي عليه لاني مااحب ادعي على احد مهما سوى لاني اعرف ان الله بياخذ حقي من غير ماادعي لاني لودعيت واستجيبت مثلك برحمه واعيش بعذاب بسبب تأنيب الضمير،، الاخوان قصدهم الاصلاح ولايشككون بك او نواياك والناس يختلفون ومع ذلك مافيه مثل العفو. |
اقتباس:
والبنت وافقت عليه ليش حطيتي حرتك فيه ,,, الرجل ماغصبها عليه جاء وخطب وهي قبلت وش المشكله ؟؟؟ والجزئية هذي ماهي موضوعنا واذا كان الرجل تزوجها للفراش كما تقولين فبامكانها ان تاخذ اللي وراه واللي قدامه لانها صغيره وتقدر تلعب بعقله |
يااخوات الله يهديكم وش اللي ليش تتزوجينه ؟؟؟ استغفر الله بس كل انسان وله ظروفه وهي ماشرحت لكم ظروفها قبل حتى تحكمون وفي الاخير ماسوت شي حرررررام !!
واللي يقولون انتي عارفه وضعه ومدري ايش هي قالت ان التدخل في حياتها مو من زوجاته من ابناءه صراحة شي يقهر !! مافيه وحده تتزوج حتى ولو عزابي ويتدخلون اخوانه مثلا ونقول ليش رضيتي ! هذا وضع مفاجئ وبعدين سؤاله غلط مو من حقه انو يسال حتى لو هالسوال الكل يقوله .. المفروض يسال ابوه هو اللي دق بابها مو هي !!! اكره التدخل في خصوصيات الناس وبعدين معليش واضح من السؤال انو هي داخله على طمع بس باسلوب مؤدب .. لكن بصراحه مايستاهل انو تدعين عليه بسبب هذا الشي الا اذا كان فيه امور اخرى نجهلها الله يفرج لك واقترح انك تروحين له في المستشفى من باب الاطمئنان عليه ولكن في وجود زوجك ولو تكلم لاتردين عليه اخذتي حقك وزيادة ...وبكذا تكسبين زوجك انك قمتي بالواجب |
روحي للمستشفى.. وزوريه بمعية زوجك..
ففي هذا تهدئة للاوضاع بينكما.. نصيحه.. لاتدعي على أحد.. إن ظلمتي فكرري.. حسبي الله ونعم الوكيل.. اللهم اكفينيهم بما شئت. تكفيك باذن الله تعالى. |
ماقدر الا ادعيلك الله يعينك ويكتبلك الخير .
|
| الساعة الآن 08:39 PM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©