|
اخواني عاطلين عن العمل
السلام عليكم ورحمة الله وبركااته
اعاني هذه الايام من ضيق شديد وارجو اجد من يتفهمني هنااا انا فتاة في نهاية 21 .. ادرس سنة رابعة في الجامعة .. عازبة غير متزوجة واعيش وسط عائلة ذات دخل محدود جداا ولله الحمد ونعيش ظروف صعبة من الصغر بسبب مرض الوالد وتقاعده هذه الفترة اشعر اني سئمت من هذه الظروف ولم اعد اتحمل الوضع واكااد انفجر لا اريد ان اعترض واتذمر على قضاء الله ولكن هذا الامر فوق طاقتي والدي يعمل في بيع المحاصيل الزراعية في سوق الخضار او على الرصيف في بلد نفطي ويتحمل الحرارة العالية والشمس والارهاق من اجل توفير لقمة العيش لنا بالاضافة الى معاش التقاعد الذي يذهب على قسط السيارة ونحن نعيش من خير الوالد حفظه الله المشكلة ليست هنا .. بل المشكلة لدي اخوان 2 شابين عاطلين عن العمل ويحملون الوالد فوق طاقته ويكلفونه مبالغ كبيرة بدل ان يعينونه على مصرف البيت ومصاريفنا نحن اخوتهم الصغار والنتيجة التقصير يطال جميع افراد العائلة وكلنا نعاني من ضيق شديد اخي الكبير اقترب من 30 وهو عاطل من سنة ويستخدم سيارة البيت وعليه قرض شخصي لم يدفع منه شيء منذ ان تعطل والآخر استقال من فترة واحيانا يحتاج مبالغ فيضطر ابي ان يعطيه شيء لا يطاق فعلا شباب في نهاية العشرينات لا يتقنون كسب الرزق ويعتمدون على والدهم الفقير المسؤول عن فتيات صغار على عاتقه ... هناك خلل في الامر بالسابق كنت اشفق عليهم ولكني اليوم احملهم سبب بؤسنا .. الاموال التي ترهق والدي من اجلهم نحن اولى بها اما هم لقد وصلوا لسن وامكانيات تؤهلهم لصنع كيان خاص بهم فلينطلقوا ويعملوا اي عمل شريف يغنيهم عن والدهم او غيره اما نحن مازلنا بحاجة والدي ليتكفل بنا مادمنا في كفالته نحن الفتيات نواجه صعوبة في توفير مصاريفنا الشخصية رغم حاجتنا لها نخجل ان نطلب من والدي كل مانحتاجه ونكتفي بالمبلغ الزهيد الذي لا يكفينا كي نوفر بعض حاجاتنا لاننا نعلم حجم المصاريف المسؤول عنها ترهقني مصاريف الجامعة وقيمة طباعة الكتب والملخصات ايام المناسبات لا نجد شيء يناسب ميزانيتنا ودائما نبحث عن ارخص ما في السوق ولكن الاسعار جدا مرتفعة احتاج نظارة لمساعدتي في الرؤية ولكني لا املك ثمنها واضاافة الى ذلك نفتقد للترفيه .. ونقضي جل وقتنا في البيت اوفي الدوام ولا يسعنا الاستمتاع في الاجازات او المناسبات لم اعد اتحمل الوضع .. فأنا لا اريد البس ماركات مثل زميلاتي او اقتني بلاك بيري او ايفون مثلهن او اسوق سيارة واقضي وقتي في المجمعات والمطاعم والكافي شوب فقط اريد مصروف يكفيني ويكفي حاجااتي ولا اعلم الى متى سيظل الحال على ما هو عليه احتاج دعواتكم .. تعليقاتكم .. نصائحكم واقتراحاتكم فلا تبخلوا |
الله يرزقنا وياكم من واسع فضله
اخوك وصل الـ 30 ولايملك مصدر رزق ؟؟ اذا كنتم سعوديون فالعسكريه فاتحه ابوابها لكنها تبي رجال واخوانك رجال العسكريه فاتحه ابوابها حتى لخريجي الثانويه العامه لكن خليهم يقدمون حتى التقديم عن طريق الانترنت يفتح كل فتره خليهم يتابعون منتدى البطاله الله يهديهم ويخلي لكم الوالد |
مثل ماقالك أخوي غريب
الله يجزاء العسكريه بالخير ضافه الشباب وإلا كان علوم الله يرزقكم ويفتح لكم أبواب رزقه |
مشكورين على الرد اخواني
وربي يستجيب دعواتكم ويرزقنا ويرزقكم من فضله يارب بس احنا مو سعوديين .. بحرينيين واخواني خريجين ثنوية ولي ما عنده شهادة ولا واسطة يتبهدل معظم الشباب ظروفهم مثل اخواني بس قدروا يدبرون روحهم ويتزوجون اما اخواني الله يهديهم .. حالهم واقف استغفر الله الله يفرج عنهم بالقريب العاجل |
اكثروا الاستغفار (قال تعالى فقلت استغفروا ربكم انه كان غفارا يرسل السماء عليكم مدرارا ويمددكم بااموال وبنين ويجعل لكم جنات ويجعل لكم انهارا )
حاولي البحث عن اي عمل لو تقومين ببعض الطبخات او بعض الاعمال اليدوية وبيعها او الاشتراك بالبازارات وبيع بسعر اغلى وهكذا كلمي اخوانك واجهيهم قولي كافي ساعدوا والدي اولا : التوفيق لايأتي الا بطاعة الله من ثم قولي اي عمل اعملوا اي شيء مب جهال تحتاجون احد يصرف عليكم اصرفوا على انفسكم ابحثوا ارحموا المسكين أعانكم الله |
اقتباس:
أخوانك الظاهر ما عندهم رغبة في العمل أو أنه عاجبهم الوضع أبوكِ موفر لهم اللي يبون .. تكلمي مع أخوانك قولي لهم لازم يتحركون يدورون عمل حتى لو يساعدون والدك ببيع الخضار العمل مو عيب العيب أن رجال طول وعرض يتكل على ابوه كبير السن .. وأنتِ كمان حاولي لو تشتغلي عملي إضافي بسيط بجنب دراستك ، وبإذن الله كلها سنة وتتخرجي وتشتغلي بشهادتك .. أعانكم الله ~ |
اقتباس:
ومتحجبات ومستورات وكلنا توقفنا عن سماع الاغاني من سنين والتلفزيون معظم الاوقات على البرامج الدينية ربما هذا ابتلاء او امتحان او عقاب لا اعلم وفي جميع الحالات لا نمتلك الا الصبر انا عن نفسي على طول ادعي ربي واستغفر واخواني بعد مو غافلين اما الاجابة فهي بيد رب العالمين .. |
اقتباس:
الرقية الشرعية احيانا من تعسير الرزق الحسد او السحر او العين لعل الناس رأوا انكم مجتهدين فحسدوكم لاقدر الله او سحر من الحاقدين لا اريد اوسوس فيكم لكن قولي لأهلك نداوم على الرقية الشرعية لعلك متفوقين في الدراسة واصابتكم عين اسأل الله ان يرزقكم من واسع فضله اكثروا من قول ( حسبنا الله سيؤتينا الله من فضله إنا الى الله راغبون ) سبحان الله دعاء فيه تفريج الكرب والهموم وتيسسير كل عسير |
اقتباس:
صحيح ان الكثير بنفس ظروف اخواني بس الفرص مختلفة هم يساعدون ابوي شويه وحابين مجااله بعد لكن بطالتهم زاادت وكل يوم نقول بيتوظفون لكن ابد انا حاليا مؤجلة فكرة الشغل لان دراستي صعبة واي تقصير بسيط يمكن ينعكس بشكل سلبي علي وانا شادة الظهر بهالشهادة حاطة املي عليها .. اتحمل تعب 5 سنوات .. وان شااء الله ربي يفرجها ويعوضني خير بعدها |
والله يا اختي
ما نملك لكم الا الدعاء العطاله كلنا نعاني منها ولا يكاد منزل يخلو من عاطل وعاطله حاولوا ان تبحثوا لهم عن وظائف عند احد كبير او له منصب يتوسط لهم الله يرزقكم يا اختي |
يااختي طيب ليه مايدورون رزقهم في مكان ثاني يسافرون للسعوديه أي دوله خليجيه
الإنسان يستغفر ويذكر الله لكن مامور بالسعي وطلب الرزق ومو شرط وظيفه أسمع قصص من أبوي وأخواني عن رجاجيل وكيف كونو نفسهم وأسمع أبوي دايم يقوله الرزق كثير الحمدالله بس هالشباب خلاص يبي المكتب والمكيف وأبوي أبدا مايقتنع بالوظيفه ويشوف أنها تحكر الرجال والمفروض الرجال يروح ويجي ويدور رزقه وإيضا نصف الرزق في التجاره وهذا حديث لكن مو الكل تأهله قدراته يروح لتجاره شوفي أخوي الحمدالله صغير في السن ومامعه شهاده قويه لكن الحمدالله ألحين يعتبر تجار ماشاءالله ويطقق منا ومنا لما الحمدالله ربي فتح عليه الله يرزقكم ويوسع لكم في الرزق |
ما عليه اختي ملامح
كلام والدك غير صحيح مو الكل يتوفق في التجاره ولا الكل عنده راس مال ولاتقولين لي خليهم يجمعون حديد ولاتقولين ان الزرق كثير ، الرزق للأجنبي صح لكن للمواطن لا كثير شباب جربوا وفشلوا وانتي ما تدرين عن ظروف الشباب وكيف ان الاجنبي ياخذ اللقمه من فم الشباب شكراً لك |
الله يهديهم ويصلحهم بس
إلى متى رح يبقى أبوك يصرف عليهم والله عيب صاروا رجااااال طول وعرض خليهم يسعوا للوظيفة ويتوسطون لفلان وعلان خلي أصدقائهم ولاأقاربكم يساعدوهم ولو حتى وظيفة مدخولها بسيط أرحم من البطالة الله يرزقكم يارب من أوسع أبوابه |
اقتباس:
اعرف ناس كانت حالتهم صعبة و راحو قطر و اشتغلو هناك و الحمدلله حالتهم تحسنت كثير ..:22: |
اعانكم الله أختي العزيزة
أخوانك هداهم الله يجب أن يعلموا بأن الرزق يحتاج إلى سعي ودام أن الوالد حفظه الله يعطيهم ما يريدوا فهذا ما راح يخليهم يسعون أبد أخبرت مره قصه من أحد الاهل أن هناك رجل أمي لا يقرء ولا يكتب المهم طول عمره يكد ويتعب لاجل أولاده وكان يشجعهم على الدراسه دائما وعندما كان أول اولاده في الثانوية العامه أخبره بأنه يحلم أن يدخل الجامعه المهم الولد رغم تشجيع الوالد إلا أنه يهمل في دراسته والنتيجه أنه لم ينجح بل حمل له مادتين تأثر الاب ولكنه كان صارم أيضا لم يجعل الدلع لولده في اليوم الثاني من صدور النتيجه دخل الاب على الابن الذي جان مستغرق في النوم وناداه بصوت عالي جعله يفز من نومه وقال له إذا تريد أن تظل في بيتي فتبعني الابن خاف من نظرت ابوه فما كان منه إلا انه تبعه وتفاجأ بأن أبوه أخذه لسوق الخظار يسمى عندنا "سوق الموالح" أمسكه من يده وأعطاه "حامل الخظار " قال له أشتغل هنا دام أنك ما أخترت الجامعه فهذا مكانك الابن عارف ان قرار الوالد فإنه لن يتغير مهما حاول المهم أن الابن اللتدغ من قرار ابوه وقرر أن يعيد السنه وصدقيني انه دخل الجامعه تخصص هندسه وكان من الاوائل على دفعته والان يعمي في إحدى شركات النفط راتبه لا يقل عن 18000 ريال سعودي الله يحفظه وتصدقي أن جميع أخوته الذين أتوا بعده ما شاء الله في الجامعه، ويقول الاب لا اريد منهم شيء والحمد لله راتب التقاعد يكفيني ويزيد ولكن اريدهم أن ينفعوا انفسهم ولا يحتاجوا لاحد ولم اربيهم ليكونوا عاله على أحد بل ليكونوا رجال ارفع بهم الراس الاولاد يحتاجوا إلى صرامه في التربيه الدلع لا يليق بتربية الرجال في عمان ايضا الوظائف كانت صعبه واقول كانت لان الان الحمد لله الحال تحسن كثيرا جدا أخواني قبل التعين وفي إجازت الصيف كانوا يعملوا باليومية يحملوا الكتب أو في المزارع والعمل ليس بالعيب والان الحمد لله كل واحد موظف وعنده بيت وعائله الله يحفظهم الرزق يحتاج سعي البحرين لا تفرق عن عمان والسعوديه نفس الحال طيب لما لا يذهبوا إلى قطر هناك ما شاء الله الحال افضل وكثير من شبابنا ذهب لقطر ويعموا فيها اسمحي لي على الايطاله الله يصلح حالكم ويرزقكم ويستر علينا وعليكم |
جزاكم الله خير على التفااعل والمشااركة ..
والله شقولكم .. محنا عارفين ليهم تعبنا واحنا نتكلم بس مافيه فاايدة .. وهم جربوا يشتغلون قبل في اكثر من مكان لكن حصلت ظروف خلتهم يفنشون وكل شغلة يشتغلون فيها اردا من الثاانية والحين قاعدين في البيت كلش ما كانوا متوفقين في حياتهم العملية وحنا مانقدر نفرض عليهم شي لان هذي حياتهم احنا ما نعلم شنو يواجهون اثناء البحث عن عمل بس جدا متضررين من قعدتهم في البيت ع العموم الف شكر على تعااطفكم |
حبيبتى ابواب الرزق كثيرة ومفتوحة
بس الشاطر هو الى يعرف يدور على اسباب الرزق وسعى علاقاتك الاجمتاعية وكثرى معارفك ووصى اى حد تقابليه وانت ابحثى شغل حتى فى مدارس اهلية او تطوين من نفسك عشان تدى دورات تقوية واكثرررررررررررررررررررررررررررررررررررررررررى من الاستغفار |
اقتباس:
ومستحيل اخوي تقول غير كذا إلي مجتهد ربي يوفقه ويرزقه لكن إلي متبطح تحت المكيف نوم للظهر هذا وين ووللأسف أغلب الشباب كذا إلا من رحم ربي وأعتبره عذر البليد الرزق للأجنبي مالقينا أعذار قلنا الاجنبي صح التجاره اقول لك مو الكل يقدر عليها وهذا قلته لكن إلي يبي يشتغل في اي شغله بيلاقي والمملكه فيها تجار كثير ونسبه كبيره في المملكه مقتدرين ماديا وعلي فكره أبوي الحمدالله يعتبر تجار كان أول فقير جدا وكان يشتغل يصلح الكهرباء في البيوت صح الزمن تغير وأبوي جاء في وقت الطفره لكن علي فكره ألحين أغلب إلي في عمر أبوي جاو في وقت الطفره لكن الأغلب ماعنده إلا بيته يعني الفرق في إلي بيتعب وبيجتهد وأي أحد مستحيل يقول المملكه مافيها خير وكل هالاشياء إلي نشوفها دعايات بس شوشره وتخريب وإلا الحمدالله أحنا شعب افضل من غيرنا وحتي هالمقاطع يجيبون رجال في عز قوته ويقول الفقر ومالفقر ألحين أنت رجال رح اشتغل لو في سوق الخضره يشيل هاذي وراها رزق مايتكلم ويقول الفقر إلا حرمه ضعيفه وإلا رجال شايب او مريض أما الرجال في عز قوته لا |
والله يمكن كلامك صح يا ملامح
|
| الساعة الآن 02:22 AM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©