متضايقه من قلة مكالماته وتطنيشه وأهماله
 

السلام عليكم ورحمه الله..انا عضوة قديمه بالمنتدى ولكن دخولى بين فترات لظروفى لكنى احب هالمنتدى واحترمه كثيرا وكنت احاول ان اساعد الجميع ولكنى الان بحاجتكم خصوصا اهل الخبرة فانا فى تعب نفسى وحيرة شديدة والحمدالله على اى حال ساحاول ادخل بالموضوع بدون تفصيل ممل ..
انا بنت متملكه من فترة وبالبدايه كان خطيبى يكلمنى كثير على مدار اليوم ورسايل ولايستغنى عنى وكلام كثير وكنت حابه هالشى لانى رومانسيه عاطفيه وكلام كثير قاله ودش ووعود وووو الموهم جلس على هالحال فترة تقريبا وتعلقت فيه واعتدت على هالشى خلاص ولو مارد بلحظه يزعل وبعدين بدون مقدمات صار مايكلم الا قليل مرة يعنى مرة باليوم ومكالمه ناشفه عن الترتيبات وكذا ولا كلام حلو ولا اشتياق والرسايل مافى واشياء كثير تغيرت وانهرت كثير وتعبت كثير والوساوس فجرت راسى ممكن يقول كلمه حلوة بس بين وبين ولى الان حوالى 4 ايام ماكلمته يتصل مرة ومارد اكون مشغوله وارجع اتصل واتصل وارسل وارسل ومايرد عكس اول اول مارسل او اتصل مباشر مايصدق وامس ارسلت واتصلت واتصل على وكنت متلهفه بعرف بناقش وش صاير!!!!!!!!!بعد فترة ماكلمنا بعض يرد على ببرود يتكلم عن ترتيبات بشكل عام قلت انا متضايقه منك وينك وليه كذا وجاوب اجوبه مالها داعى بعدين قال يالله بدخل البيت وبعدين اكلم قلت انا انتظر اتصالك وابى اناقشك قال بعدين وسكر عكس اول يقعد يدور حول البيت لحد مانخلص انقهررررررررررت وجلست ابكى ليه هالمزاجيه والتغير ومن امس الى اليوم ماكلمنى ولا رساله وهو عارف انى متضايقه!!1




مدرى شفيه الوساوس اشتدت على مل منى ؟ كرهنى ؟ مايبينى ؟ بطل يحبنى ؟ هو مزاجى ؟اسلوبى غلط انى تجاوبت معه بالبدايه وكنت واضحه معه وصريحه ؟ ووالله انى تعبت لدرجه كم مرة برسل اذ ماتبينى قل انا كل شى تحملته هو دفش وصريح وكنت اتعايش مع اسلوبه بس المتعب لى جدا التطنيش والاهمال لانى مررررة حساسه ورومانسيه وعاطفيه وحالمه وهالفترة اشوف صديقاتى عاشوها بشكل حلو ليه يحرمنى منها شى بسيط ويوقف محسسنى كنى اخر همه عكس اول ارجوكم تفاعلو معى والله انى تعبانه حيل والى مايقدر يدعيلى بظهر الغيب وشكرا

السلام عليكم
اختي الفاضلة , أغلب الرجال لما يملكون يكونون ملهوفين و لزقة و كأنهم ما شافوا مرأة بحياتهم , تلاقيه اتصال بالساعات و رسائل يومية و كلام حب و شوق وغزل لما البنت تتعلق فيه و تحبه و تتعود على هذا الاسلوب في المعاملة , بس الرجال مع مرور الوقت يهدأ و يركد ( يظل يحب زوجته مع ذلك) لكن الاهتمام السابق من رسائل و اتصالات تخف فالزوجة تعتقد بأن زوجها لم يعد يحبها كالسابق و تبدأ المشاكل.

حزنى فى قلبى ,,,الله يبعد الحزن عنك وجزيتى خير لكن ياختى انا حاولت اناقشه ويتهرب حسيتنى بالسما وفجاة خلانى بالارض اتصل مارد بحجه انه طالع وقبل النوم يكلم كم دقيقه وينام ومن امس الى اليوم ولاشى حتى كلمه برساله مايرسل بيجبر خاطرى فيها وقسمن بالله تعبت ليش يخلينى اعيش جو وبعدين يصدمنى وهو مو حاس انه مسوى شى ومستغرب منى واتكلم اتكلم ويسكر مانى فاهمته !!انا مافصلت بس بكل شى اصبح عادى ومو ملهوف بديت اكرهه طول اليوم وانا نفسيتى زفت بسببه ابى اناقشه مافى ابى كلام حلو ابى احس انى مازلت مرغوبه ويبينى ويحبنى وملهوف على مدرى احس انى بنجن من كثر التفكير موقادرة اركز بشى

ابى الرد يجينى من الرجال اكثر شى ارجوكم انتو اخبر ببعض المشكله انى مو عارفه كيف اتصرف صديقاتى يقولون اثقلى انتى السبب كنتى واضحه معه عرف عنك كل شى وخلاص افكر اكلم اخوانى بس اخاف تكبر السالفه ويكرهونه خايفه اتصراف تصرف اندم عليه المشكله مطنشنى مرة اكرة هالاحساس وكان العكس تمام الله المستعان بس

حياك اختي مسالة انك ترجعينه زي اول صعب لانه مثل العطشان شرب مويا لييييييييييييين ارتوى خلاص مل وهذا طبيعي >> عن تجربه
كنت اخر فترة الملكه خطيبتي تتكلم واحيانا انام او اتصفح النت وهي حاسه اني مشغول وانا اختلق الاعذار ومع كذا احبها واموت عليها ...
فترة الترتيب متعبه للرجل وتحتاج من المراه انها تقف معاه مو تحقق معاه يعني بين كل فتره ارسلي له الله يعينك حبيبي والله شكلك تتعب كثير بالتجهيز... لاتكلف على نفسك ومن هخالكلام اما السؤال ليش مطنشني وزي هالاسئله الرجل يسميها تحقيق لذلك سوي اللي قلت لك عليه اضافة الى انك لاتتصلين عليه فقط ارسلي له رسايل حلوه ولاتكثرين حتى يشتاق لك هذي ناحية والناحية الثانيه انك كل مازدتي اهتمام وتفكير فيه هذا يزيدك تعب نفسي ...
انتبهي تقولين له انت ماتبيني ومن هالكلام
يبدو ان زوجك من النوع اللي يحب المراه تتدلع عليه وتبهذله وماترد عليه >> مثلي سابقا ...

ياهلا اختي شوفي انا اكثر وحده تعبت من اللي تقولين عليه تطنشيه ومافي رسايل وكمان يقول ابغى هاد وماابغى هاداك ووووووو لدرجة انو بيوم قلت لخطيبي انا ابغى ساعه واحده منك في اليوم تكفيني بس خلي لي من وقتك ساعه ما تخسر شي ووصل الامر بالنهايه بالعربي الى مضاربه والموضوع كبر وصار حوار وكلنا غلطنا بعض نصيحتي اللي حقيقي عن تجربه وجربي وماراح تندمي صدقيني لا تتصلي فيه ولا ترسلي له مسجات ومو من اول مره تردي عليه بعد المره الثانيه الثالثه وهو يدق افتحي عليه ولاتتكلمي عن الرومانسيه او المشاعر او الحب خلي نقاشك عادي وطبيعي بس من غير حبيبي ولا حياتي ولا هالاشياء اللي بتعرفي عليها ابدا ابدا ابدا واذا قالك وش فيك قولي ولاشي اشبك متغيره لا والله بس صرت مشغوله ودبكه ومو عارفه ايش اسوي وكلام من هادا بس حاليا لاتدقي عليه بالقليله 5 ايام 4 ايام وراح تذهلك النتيجه ....
وبالاخير الله يوفقكم ويسعدكم واطمني هالاشياء طبيعيه من الرجال انهم بتجي عليه فتره يبعدو عشان يبغو يحسو بالاستقلال والحريه حتى لو لحظات فلا تخلي وسوسه الشيطان ليكي تجيب نتيجه انو يحبك او لا لانو لو مايحبك ماراح يتعب نفسو ويرتب لزواجكم واكيد انتي ادرى بهالشيء

الوحيد,,كلامك صحيح واحاول اطبقه بس انا طبعى عجول وحار استحمل وبعدين اتعب وارسله وصارت مكالمتنا كلها طفش بطفش هو يحس انى مكبرة الموضوع وانى بزر وانى تافهه ومسوى نكد ومشكله ويتريق ويعلق على وتفشلت صراحه قلت الشرهه على انا الى اشتاق مدرى ليه فشلنى حسسنى جد بزر الله يسامحه

ليش كذا,,,, طب ليه تخلونا نتعود ونتعلق وبعدين برود وفتور هو زى كلامك بس انا غير صبورة ابد حبيت الجو الاول وحاولت يرجع ومافى فايدة وهو الى قاهرنى يحس ان مافى شى متغير وعادى الوضع جننى مررة وحتى لو ماكلمنا بعض فترة مايحسسنى انه مشتاق او ولهان او او لا عادى مررررة مدرى شسالفه الله يعين بس

عسوله موت___معك حق ووالله احاول اطبق هالكلام بس ماستحمل واضعف وارسل او اتصل ماقوا قلبى كل يوم اقول منب مرسله ولا متصله والقا نفسى انا الى اتصلت ودورته واذ كلمنى عصبت من اسلوبه كنه امس مكلمنى برود وعادى ومو حاس اصلا انه فيه شى ويحسنى نكديه وماستفيد اى شى من النقاش لافاهمنى ولا فاهمته بس يهزء ويسكر واتنرفز الله يعين بس

زهرة الرمان ,,,اميييين يارب الله يسمع منك وجزيتى خير على الدعوة الله يقبل

شوفي ياحبيبتي انا كنت اكثر منك مااقدر اني افارقه ولا بتحمل اني ابعد عنو واجلس ادورو وهو يتعامل كانو انا معاه بنفس الشقه كل يوم خلقتي بوجهه مادري بس وشلون لو كان كذا صحيح !!!!!! اكيد انتي فاهمتني
بس الرجال كده هم طبعاهم غير عنا ابد اول يوم راح يكون صعب انك ماتكلميه وتحسي انو يدينك تبغى تجري على الجوال عشان تحصليه وتدقي عليه لاتسوي كذا اشغلي نفسك باي شيء لاجيتي مسكتي الجوال تدقي عليه دقي على صديقاتك ودشيها حكي للصبح لين تصدع ع راسك وبالاخير ماتكوني دقتي عليه لاتقولي ليه اللي مضايقك اذا كان يسخر منو خليه هو يسالك وش فيكي متضايقه خليه يدور ايش اللي يرضيكي من غير ماتقولي ابغاك ترضيني فهمتي
اتقلي عليه ولا تحاولي باي طريقه انك تاخدي منو شيء متل الحب بالغصيبه لانو ماراح يكون حلو الا لو جاء منو هو واكيد انتي عارفه هالشيء طيب انا تعبانه وطفشانه وحاسه اني هموت مين اشكي روحي لصديقاتك اي احد ولا تشكي ليه هو لانو بياخدها كانك بتلوميه على اللي انتي فيه ويصير يحس انو تحقيق وانو اجبار وانا رجال ولو سويت ليها اللي براسها طب فينها رجولتي وحكي من هاد اكيد انتي تعرفيه صري اني ماتكلميه لمده رابع ايام ويبتدي من بكره مهما صار خدي عهد على نفسك انو مهما ضعفتي ماتدقين عليه ولا ترسلين له مسج وشوفي نتيجه وخبرني :))

اختي اثقلي شوي عليه يمكن من النوع اللي يحب المرأة الثقيلة بس لا تقطعينه مرة وحدة حاولي ترسلي له كل ككم يوم و لا تكون لوم خليها مسجات شوق بس مو جريئة أةو تقدريت ترسلي له تصبحين عليه و لا تتمنينله احلام سعيدة , و حاولي تبينين له ان عندك امور غيره تشغلك و, حاولي تطلعين تسوين زيارات مع الوالدة و اخواتك أو الصديقات بشرط انك ترسلي له تخبرينه . مثل ما قلت لك تواصلي بس بثقل . و الله يسعدك

اختي الكريمه
التمسي لزوجك الأعذار ترا الكلام الحلو يطلع لمن يكون الرجل رائق ومرتاح البال
تأكدي ان مشاغل زوجك من تجهيزات عش الزوجيه والتفكير فيه ويمكن يكون
عنده نقص مادي جعله يشيل هم
أنا الحين متملك واحب زوجتي وودي ارسلها واكلمها كل دقيقه وثانيه بس اقول لنفسي خلني
ارتاح شويه من شغل وتجهيز البيت وهي بعد تجهز حالها بعدها أكلمها لين نمل من بعض
أختي حاول انك ماتكثرين الاسئله ولا تقولين اذا ماتبيني قول لان هالكلمه مايحبها الرجل
الله يوفقكم يارب ويتمم عليكم بخيررررر

المتفائله__اللهم امين يارب الله يفرج لى ولك ولكل مسلم

عسوله موت_مرة كلامك ريحنى الله يسعدك كويس فى احد مثلى لانو صديقاتى معطينى انطباع انو بالملكه يكون خاق عليك وهو محسسنى انه مهملنى وماكان كذا وامس حاولت اناقشه لمن كلم وماحد فاهم الثانى وسكرنا انا معصبه وهو يحسنى نكديه وعله وانتهت المكالمه زفت احس اسلوبى كمان يبعدة عنى زيادة الله يعين__بس بسالك انتى تزوجتى ولا لسى؟

حزنى فى قلبى _كلامك صح بس حتى لو طلعت احس مزاجى متعكر والف سؤال ببالى عجزت انى افهمه كنت اتمنى ماكلمنى بالبدايه باسلوب وبعدين غير وكمان امس لمن سالته ليش تغيرت عصب وقال انتى بزر تبين الشى مايتغير وجرحنى كلامه الله يعين بس بحاول اطبق نصايحكم الله يجزاكم خير

مفسر_انا اقول كذا كمان ممكن عندة نقص مادى ومشاكل انا ماعرفها مع انى اتمنى اعرفها عشان اقدر واستوعب بس طبيعه الرجل تختلف عن المراة بس انا ماطالب باستمرار مكالمات او او لا بس تغيير مرة واذ كلمنى بعد فترة كنه مكلمنى امس مافى حرارة او شوق او او وحتى مسجات حلوة مافى ليه كله هذا اذا كذا من الحين اجل متى الواحد ينبسط؟ الحمدالله بس ونصيحه منى لاتلهى عنها الوحدة بهالفترة تبى تحس انها مرغوبه وانك حابها وشاريها وانها مهمه عندك تكون قلقانه بما فيه الكفايه من التفكير بالمستقبل والقصص والنصايح الى تسمعها والبعد عن اهلها والحياة والمسؤليه يعنى هم وقلق بمافيه الكفايه تحتاج تحس بالامان معك والله يوفق بس ويعين

كم عمرك اختي ؟؟

ثانيا ً مشكلتك هذه لاحظتها كثير في هذا المنتدى , وبرئيي اعتقد ان مسبباتها كالتالي :
1- السن اقل من 20 سنة
2- السماع لقصص لكلام الاخرين ومحاولة تطبيقها
3- سماع الاغاني والتخيل واستشعارها
4- متابعة الافلام ومسلسلات التي فيها قصص الحب

انصحك اختي تثقفي نفسك بأمور الزواج وتقرئي اكثر وتشاهدي برامج تنورك وتعلمك بهذه الامور
انصحك تتابعي للدكتور طارق حبيب محاضراته ممتازة , افعالك هذه الي تسوينها ليست لها علاقة بالحب
بل هي محاولة اشباع لشي في نفسك , الحب عطاء وبذل للطرف الاخر
والطرف الاخر اذا كان قلبه سليم وتفكيره سليم راح يرد بالمثل ,
اتمنى لك التوفيق اختي الكريمة

ابن المكلا_شكرا لردك لكن اخوى مانى صغيرة ولا انى اسمع اغانى ولا اشوف قصص حب ولا احس انى طلبت كثير انا ماتشرطت ولا شرط والله مافنرضت شى كل الى ابيه شويت اهتمام فينى ويحسسنى انى على باله ويسال عنى ؟مدرى هل هالشى غلط؟ او طلب كبير وصعب؟ بس انا اعرف ان الرجل تركيبته غير المراة وانه مختلف هذا اللى مصبرنى وانا احس ان فترة الملكه المفترض تكون حلوة مرة لانها بتنتهى وتروح حلو الواحد يعيشها صح _بعدين حتى لو طلبنا رومانسيه وحب ووو وين الغلط؟ارخص شى الكلام بس ماعرف ليه البخل بالكلام والمشاعر هذا الله يصلح الحال والحمدالله رب العالمي

بانتظار نصائح توجيهات الباقين والرجال خصوصا لانى تعبت من كثر ماسمع انو المفروض هالفترة الرجال يكون باحسن حالاته وعاطفى ويهدى ووووو واحس باحباط

شوفي أختي
بما أني رجل ومررت بنفس المرحلة

ولي من الأصدقاء الكثير الذين واجهتم مشاكل فترة الملكة

اود أن أنبهك لنقاط


1- يحصل الفتور بعد فترة من الاندفاع العاطفي والرومنسي في بداية الملكة . فهذا طبيعي

2- كثير من الشباب يقلل من المكالمات والرسائل والغراميات عند قرب موعد الزواج حتى يكون هناك شوق ولذة بعد الزواج


3- أنتي بنفسك تنفرين زوجك فيك من غير ماتشعرين بتتبعك له وفتح هذا الموضوع هو يقول انتي حساسة ولاتنكدين علي ، ومع ذلك مافهمتي وش يقصد ( يعني لاتتذمرين من قلة الاتصال منه )

4- اثقلي قليلا في الاتصالات عليه وإذا حصل اتصال بينكم حاولي أن يكون أنهاء الاتصال منك انتي

والله الموفق

سديد الراى___ممكن كلامك صحيح انا مافهم بنفسيه الرجال وانا جالسه احاول قد مقدر انو مارسل ولا اتصل مع انى من جواتى تعبت لاهماله اليوم كله وامس مافى اتصال لامسج حلو ولا شى الله يعين بس

رجال كلهم في الاول هيك لما يملكو يتغيرو انا زوجي كان مايتصل فيني من اسبوع لاسبوع ولما يتصل يتكلم اربع دقائق ولما ازعل اواقولو ليش هيك بيتعصب علي وهينني والخ بيقولي انا مابحب تليفون كتير وبعدين انتي هلا مرتي ونة زوجك مومراهقيكن وكان مايقولي كلمة حبيبتي والله العضيم ماسمعتها منو من يوم ملكت فحين لحين كان يقولي بعض الكلام لكن مو كتير وصبرت معاه قلت هاد نصيبي انا يمكن مافي بنت بدنيي بتحب رومنسية متلي لكن للاسف كلشي بيدي الله دعي ربنة يهديه ليك وبس

بنت المغرب اشكرك وصادقه والله الله يعين ويوفق لكن انتى تزوجتى ولا لسى ؟يعنى تغير بعد الزواج اولا

والله يا اختي الرجال حظوظ

في بنات اشكالهم عادية و اقل من عادية و تشوفي الخطيب محسسها انها ملكة العالم
و في بنات على قدر عالي من الجمال مع كذا الخطيب محسسها انها ولا شي و لا تهمه و لا لها وجود بالرغرم من انه كل العالم تحسدهااا
انا كذا بعد بس انا خطيبي ما تغير علي من اول ما خطيني و هو كذا يعني الحين تحسن
حتى لما اول حدي و اتكلم معاه و ابدى اهاوشه يحسسني اني بنت سخيفة وما عندي شي و ما احس فيه و ان اهو عنده مشاكل و انا بنت فاضية قاعدى اتسلى فيه

يااااااااااااارب تخلي هالخطبان يحسووو فينا

عادي جدا , وش بتسوين اجل بعد مرور شهر العسل يمكن ما تشوفيه إلا ساعتين و مايتكلم إلا كلمتين
طبيعة الرجل كذا يبط الكبد حتى يتكلم و يقول شي فاضي و رومانسيات مالها داعي


, و انتي عزيزتي خلي الزم ما عليك صحتك و راحتك
لا تتركي صديقات دربك ,اشبعي رغبة التواصل الفطرية بالمرأة معهن عن الحياة عن الجامعة عن كل شيء
و إذا جاء على بال خطيبك يكلم حياه الله ماجى على باله لا تتكدري,,,

روها الدلوعه_الله يعينا بس انا اهون على لو مابدا معى باندفاع بعدين يتركنى بالايام مايتصل وكنه عادى حسسنى كنه مل منى وبس اوسوس اخاف انى تجرءت معه اخاف انى غلطت والله ندمت انى تجاوبت معه بالبدايه وعطيته وجه لحد ماكتفى الله يصلح الحال بس ويسخر لى ولك وللجميع انا خايفه من كثر ماشحن عليه انى اكرهه الله يستر لانى منفقعه مرارتى ومعصبه طول الوقت واهلى مايدرون شفينى لو احد كلمنى نرفزت وصرخت على شى تافه بس جواتى مقهور انه مطنشنى ولامعبرنى الحمدالله بس

المسدانى _جزاك الله خير اختى وماعرف كيف الوحدة تصبر وتتحمل يعنى الوحدة تنتظر هالانسان الى يحتويها ووو بالحلال وتتعبين على نفسك باشياء كثير وتحسين ان كل شى عادى الله يصبرنا والحمدالله بس

صراحة انا هلا تزوجت لي تقريبن عاماين مافي تغيير زوجي من الاول هيك وفي الاشهر الاولة كان معي كلعسل وبعدين تغير كاننة تزوجنة من زمان مافي اي رومنسية بيناتنة الا في الفراش وهلا عادي راح تولفي صدقيني

لا والله ياحبيبتي انا لساعي متزوجت بس من قبل مااتزوج وانا خلاص ابغى افتك منو بس هههههههههههه الله يعين والله احنا الحريم لما نحب نصير كاننا جواتنا اكوام حنان وشوق ماادري من وين نجيبها ولا بنقدر نسكت ومانتكلم عنها ولاهي بتريحنا وتتركنا وانتي لساعك متضايقه وبتقولي انك مافهمتيه ولاهو فهمك انا خطيبي كده انا ماملكت خطوبه عاديه قرايه فتحه ودبل ودهب لسه ماصار ملكه بس هو من الحين وهو بالحاله اللي تقولي عليها ولما تقلت عليه جلست وربي 10 ايام مااكلمو كان بينجن وصار ماياكل لدرجه ابوه سالو اذا كان هو فسخ خطوبتي او انا ولالا هههههههههه من كتر ماهو متكدر وحزين اني مااكلمو ولما رجع يكلمني والله تعالي شوفو الاشعار والغزل والحب اللي على اصلو من جد كانو غريق متعلق بقشه هههههههه صرت لمااحس انو بيقرب يشبع من مشاعر الحب اجلس يوم مااكلمو او يومين يرجع يكلمني كانو من العشق بيطق ههههههه التقل صنعه كده يقولو والمفروض تكون صنعتنا نحنا البنات والله انا حاطه مشكلتي في المنتدى ماادري اذا قريتها اولا ونفس المشكله تقريبا يعني والله يهدي خطيبي ليا ويهديلك خطيبك ويقصر حبالهم عشان خلقنا ضاق ههههههههههه لاتشيلي بقلبك حبيبتي وادعي ربك على قد ماتقدري ولاتنسي اتقلي

حبيبتي انتي على الاقل عارفة انو هو يموت عليكي يعني لما خطبك كان مقتنع 100%
بعد حبيبتي عيشي حياتك وعيشي انا بالاول كنت مثلك بس بعدين افكر مو باقي شي و اصير طول اليوم بوجهه
عيشي حياتك الحين لحقااااانة عليه

انتي متى زواجك ؟

بنت المغرب_الله يهديهم انا مو عارفه شفيه والحال مستمر بالتطنيش وعدم الاتصال والسؤال

عسوله موت _انا عم بعمل بنصايحكم ومابتصل لى يومين وقبلها كم يوم ونفس الحال مايتصل ولا يسال بس الله يهديه ويصلح الحال

روها الدلوعه_على اى اساس تقولى مقتنع مايه بالمايه ويموت فينى لا ابد مو صح الكلام لانو مافى معرفه بينا نهائيا وماحسيت دانه بيموت كيف يحب انسانه مايعرفها بس الى فرق على انه كان بالبدايه مندفع يتصل ووو وبعدين غير الوجهه مررة بس لكن مشاعرة وووو لا مافى شى من هذا ابدا ___انا لسى باقى وقت ومازلت استخير والله يختار الخيرة ويوفقنى واياكم ويسمح الامور لمافيه خير يارب دعواتكم

حبيبتي بما انه بالاول كان مندفع معنا هذا انك عاجبتيه و يبيك بس خلاص حس روحه انه تملكك صار ما يسأل

عسوله موت انا ماقريت قصتك بس بحاول اقراها حطى الرابط لو سمحتى لكن انتى طالما انك عارفه انك يحبك ويموت فيك ومايستغنى عنك وين المشكله؟ وجربتى معه اسلوب التطنيش ولقيتيه مفيد وجلس يدورك؟ مانى شايفه مشكله بالعكس افرحى واحمدى ربى الله يتمم عليك حبيبتى لكن لاتطولى بالخطبه تزوجو _الله يفرجها يارب على وعليك وعلى كل احد الحمدالله بس

روها الدلوعه مو دليل ابد ممكن كان اندفاع او حماس وانتهى يعنى مو معقوله لهدرجه اهمال 5 ايام ماكلمه عادى ومايتصل ومايرسل والله انى تعبت مرة من التغير هذا والاهمال لدرجه صرت افكر اتركه اعوذبالله من الشيطان