|
زوجي حاول ضربي ابغى حل
السلام عليكم ورحمة الله
بدخل موضوعي ع طوول زوجي في الأونه الأخيره طالع عصبي مرررره ع موضوع سخييف عصب مررره ودعى علي يقول الله ياخذ عمرك ويوم بغى يطلع رمى علي الجزمه بس ابعدت عنها وناويه ازعل زعل جااامد والله لو اهلي عندي كان اروح عندهم في الأونه الاخيره كل ماعصب يدعي علي مثل الله يقلعك والا ياغبيه وشافني اسكت وامشي الموضووع اشوفه تماااادى وهذي اول مره يرمي جزمه بس اليووم يرمي بكره يضرب والمشكله على شي تاافه والله مايستاااهل احس اني مقهوووره وشلون اوقفه عند حده احس اني كرهته ودعيت عليه الين شبعت الله حسيبه |
سلام عليكم
اول شي اعترفي وش سويتي اكيد تضايقينه :d بجد انا ضد ضرب المرءه الا في الحالات القصوى وضرب لايتعدى ماسمح فيه الشرع حاولي تكلمين حد من اهله اذا اهلك بعيدين عنك واذا تمادى اكثر كلمي حد من اهلك يوكون انسان ناضج عاقل موب يجي يمسك بحلقه :) ربنا يصلح حالك |
كل مااكتب امسح
والله يااختي لااحب اخبب امرأة على زوجها واكرها فيه لكن هذا الموقف قهرني لأنه فيه ذل للمرأة بس اهم شيء انك توضحين له انه موب شيء عادي وهين لازم صح يوقف عند حده لأنه اذا رضيتي راح يستسهل الأمر وتكونين ملطشة له وتفريغ وقت الغضب بس التصرف كيف لعله يذكرون لك الأخوات |
حبيبتي الحل .. أنك تقومين بكل واجباته .. بس من غير كلام أو أبتسامة..
سلام ورد سلام .. من غير كلام.. لو سئلك .. أيش فيك قولي .. مافيني شيء.. خليك كذا .. من غير نكد وعناد .. لحد ما يجيك ويسئلك أيش فيك .. وتحسين أنو متأثر من تغيرك معه.. قوليله بصوت حنون وهادي وأنت متأثرة إلى في خاطرك .. مثلاً : أنت زوجي عزي وسندي.. ترميني بالجزمه.. وأنا زوجتك وحبيبتك قيمتي من قيمتك .. وكرامتي من كرامتك .. بدل ماتسمعني كلمة حبيبتي.. تسلم أيدك.. ما أسمع منك إلا كلام جارح.. ليش وأنا أحبك وأحترمك..أنت دائما معي حنون .. وطيب .. ليش أتغيرت علي.. مو أنت فلان .. قوليله: أبغاك ترجع مثل الأول .. بأذن الله راح يتغير وراح يكون أطيب.. ترى الرجال مثل الطفل.. يجيبه الحنان والكلام الطيب .. مع الحزم.. مو بالعناد والصوت.. المهم مايعدي الموقف كذا .. عشا مايتطاول بعدين معك.. والله يوفقك .. |
طيب ازعلي ليش ماتزعلين خليه يعرف انه غلطان لكن انصحك انك ماتخبري احد باللي صار بيناتكم حلي مشكلتك بنفسك الا اذا استدعى الامر ذلك وارجو منك ايضاح السبب كامل يعني معقوله بيرمي الجزمه عليك وانتي ماسويتي شئ!!
|
اشكر كل من علي الله يجزاهم الفردوس الأعلى
بس صدقوني الموقف ما يستاهل هالعصبيه يعني ما كان فيه شي بالعكس امورنا اليوم كلها تمام هو كان يبغى شاهي بياخذه بره قلت له طيب اقعد تعشى معنا قال جيبيه اذا بغيت اكلت قلت ابصلي واجيبه رحت صليت وجبت العشاء قال وين الشاهي قلت انت تقول ابتعشى معكم قال مابي عشاء ابغى شاهي ابطلع مواعد الرجال رحت اسوي الشاهي لقيت المويه مخلصه بس فيه مويه بجيكه حطيته بالغلايه قلت يافلان ترى امخلص الماء اركبه ابليس قال توك تقولين مافيه ماء وقام يهاوش قلت فيه مويه شوي حطيته في الغلايه بس انا علمتك علشان تجيب وصار الي صار وطلع ولا اخذ شاهي ولاشي بس الموضوع يستاهل هالعصبيه كلها |
من وجهة نظره يستاهل.. أنت كان المفروض تسوين طلبه في الأول.. تعطينه الشاي.. وبعدين تقولين .. خلصت المويه..
بس.. مهم أن نعرف كيف ومتى نتكلم .. بعدين هو عصب لأنه طلب منك الشاي .. وأنت رحت صليتي.. بعدين حطيتي العشاء .. وبعد هذا الوقت كله .. جايه بكل برود تقولين مافي مويه.. صح هو الموقف مايستاهل.. من وحهة نظرك .. بس هو مو خالي.. أكيد مهموم من شيء.. وفرغ العصبيه فيك .. أعملي مثل ماقلتلك .. وقوليله .. أنا آسفه.. غلطت أني أخرت طلبك .. وغلطت كمان في توقيت طلبي.. كان المفروض أقلك .. بعد ما أعملك الشاي.. أنا آسفه.. والله يسعدكم.. |
حبيبتي الرجل مثل الطفل الرضيع
الطفل الرضيع اذا جاء وقت اكله او رضاعته وما لقى اللي يسد جوعه قام يصرخ ويبكي الرجل نفس الشي فكان المفروض انج تلبين طلب زوجج بعدين تصلين الحين اللي صار صار وخلص اللي عليج انج تروحين وتبوسين راسه وتقولين له انج ما كنتي متوقعة ردة فعله هذي وانج تأثرتي فيها ( مع كم دمعة تنزلينها) بس انصحج انتي اللي روحي وبادري لان من وجهة نظرة انج انتي الغلطانة وتستاهلين ما يجيج الله يوفقج |
مرحبا فيك اختي ,
انتي قلتي صااااار عصبي مررره يعني قبل ماكان كذا إذن أكيد شي معكر مزاجه بدال ماتزعلين على حاجه كانت ردة فعل وهو وقتها كان معصب أحتويه تكلمي معه بطريقه مناسبه وبمكان مناسب تكلمي معه وأبتسامتك تملاء شفاتك , أحسن من الزعل ومادري أيش وتدخلين بدوامه لها اول مالها تالي , أنا هذي وجهة نظري والله يوفقكم ويسخركم لبعض يارب , |
أشكركم جميعا الله يجزاااااكم خير
بس صدقوني ماقدر التأسف منه احس الرجال بتعجبه السالفه هو راكبه الغلط من راسه الى ساسه بعدين انا قلت له عااادي اصلي قبل بعدين نتعشى بعدين اجيب الشاهي قالي خلاص معليش يعني ما كااان مستعجل وقال حطي العشاء اذا اشتهيت اكلت بعدين انقلب فجاءه بعدين الي صااار حاز في خاطري مررره اشكرك ياحلم الأمان من قلبي لكن اني ماتكلم معه هو اصلا مايتكلم الا قليل يعني مااتفرق معه عاادي عنده مادري وش اسووووي |
احس ضاااايق صدري مررره
|
من وجهة نظري اشوف الغلط صدر منه هو
لكن الحياة الزوجية تتطلب منا ان نتنازل حتى نعيش حياة سعيدة اللي عليك الان انك تمشي الامور طبيعيه وتتقاضي عن اللي صار ولو كرر معك الحركة مرة ثانية لازم توقفيه عند حده وقولي له بالتفاهم واسلوب حوار هادئ انا انسانه مثلك انت ماترضى استخدم هذا الاسلوب معك ليه تستخدمه معي "" والله يصلح بينكم ويوفقكم |
اقتباس:
انا مع الأخت قلبا وقالب لايمر الموقف بسلام |
بصرااااااااااحة اشوفهاااااااااا مررررررررررررره قويه جزمه؟؟؟؟؟؟؟؟؟؟؟؟
والله يضربني لين يموتني ولا جزمه |
اهلا وسهلا
بصراااحه انا جدا تعبااانه بعد الموقف الي حصل وانا عزمت اني ازعل حتى يعرف انه غلطااان بس ااااااخ من الرجااال يعني البارح بعد ما حصلت الهووشه جاء متأخرباليل ودخل ونام وانا ما نمت الليل كله بعدين نمت وهو راح الدوام يعني ما تقابلنا مع بعض قبل مايجي دق علي تبون شي والله مابغيت الرد عليه بس خفت يعصب جاء من الدوام وانا في المطبخ وماعطيته وجه وهذا اشد شي عليه اني اسفهه غير ملابسه وجاني للمطبخ يسألني عن الغداء كأني اول مره أطبخ وكنت ارد ردبسيط وبدون نفس بعدها راح ينام قام العصر متنرفز وناداني وقالي اعتذري عن امس ترى انتي الغلطااانه وتعدلي احسن لك والا والله بكره بدل مأوديك الموعدك في المستشفى أوديك لأهلك قلت له وانت تصرفك صح يوووم ترمي الجزمه قالي احمدي ربك ع كذا والله لو انك عندي كان ضربتك قلت له تراك مأخذتني من الشارع علشان تضربني قالي ترى لك الى الليله والا بكره لأوديك لاهلك ترى منب ناااقص هو المقصود من الكلام كله يبغاني اناام معه فقط لاغير وهذي النقطه الوحيده الي اسويها ضده وانا ماقدر انام معه بعد الي صااار صرااحه احس بإهاااانه كبيره واحس مالي قدر كيف اتصررررف نكفوووون |
خليك حاازمه معه االا الاهانات والله تركت زوجي براحته لحد مااصار وقح معي من الدرجه الاولى
مره يابقره ومره ياهيه ومره ياابنت...... ويرفسني برجله وانا امشي له ولاجيت بزعل قال امزح ويعايرني ان اهلي اقل منه ماديا لاجاب حااجه قال بالله قد اكلتي منها ولا تعرفينها ويجلس يضحك كنت اكتم بنفسي كاان يحذف علي عقاله وانا عند امه وخواته يقول امزح وهو يبي يثبت لهم انه دايسني لاني اصغر منه ب 30سنه اخر موقف خلاني امسح فيه الارض قلت له مره بطلع السوق بعد العشاء قال اروح لامي وارجع اوديك يووم دخل قلت نطلع قاال لا وهو يضحك وجلس يقلب ع التلفزيون بعدين قاام يفاح شبابيك المجلس جيت امشي وانا اضحك قلت بلا مزح يالله ابي اجيب بلوزه من محل واحد وارجع كان بكره عزيمه ورب البيت في ثاانيه عطااني كف حسيت الدنيا تلف احس بصوته يرن بااذني الحين عمر اهلي ماضربوني ولا مدرسااتي مااقد جربت احد يدفني مو يصفقني كف يلف وجهي انا انساانه ابكي من اي كلمه حساااسه مره من قو الكف نشفت دموعي حلقي احس فيه غصه دفيته ورحت للغرفه لحقني قال يالله البسي عباتك ترى امزح ويضحك بقووه يقول وجهك احمر قلت له كلام خليته يندم انه انولد في الدنيا اهنته وحلفت اني لاطلع لاهلي جلس يترجااني ذل نفسه عشان يراضيني وعقبها ماعاد قكر يمد يده يتكلم معي باادب ولا يرجعني بكرامه لبيت اهلي يحسبون انا بنات شوارع احنا مو بهاايم احنا بشر انا مااحرضك عليه بس هو الغلطان ان شاء الله مااوافقتي تصلحين شاهي نهائي مااتوصل للجزمه يتكلم باادب ويطلب باحترام ويعاتب بذووق مارفعنا صوتنا عليهم وهم يهمشون طلباتنا مو عاد جزمه والله قهرني ذكزني بااهانات زوجي الله يسعدك ويصلح حالكم |
اشكرك يا وحدانيه وقعتي ع الجرح
وهذا الي انا خااايفه منه وهو التمااادي يعني في البدايه يدعي علي مع بعض الألفاظ الجميله وانا اسكت وامشي المووضوع واقول معصب ونفسه شينه لكن للأسف صااار يتمااادى يعني ماحس بنفسه واحترمني لأني اراعيه لكن مشكلتي عندي موعد بكره للمستشفى وهو قالي اذا ما عتذرت الليله ماراح يوديني لموعدي بيوديني لأهلي وانا ابغى تصرف معه يحقق مطلبي ويحفظ كرامتي بس مدري كيف أتصرف سااااااعدوني الليله بيتعشى برى هذا احسن شي |
اقتباس:
حبيبتي هو فهم أنك رديتي بغير نفس ردا على تصرفه اللي صار أمس .... نصيحتي لك : لا تفعلي شيء أبدا ... إذا جاء موعد المستشفى .. سيأتي ليأخذك لوحده -هذا ما أتوقعته- فإذا ذكرك بالاعتذار قولي له -وبكل هدوء وحززززززززززززززززززم- : حتى لو غلطت عليك ما كان المفروض ترمي الجزمة ... أنا لي احترامي ... وإذا أنا غلطت ... أنت رديت على الغلط بغلط أكبر .. وإذا قال آخذك لبيت أهلك ,,, قولي له ... أوكي وتصرفي وكأنه ولا همممممممممك |
خليك حازمه ولاتعتذري قوولي انا غلطت بااسلوبي معاك بس هل تتوقع رده فعلك معاي محترمه؟
انا ام اولادك وراح اربي جيل كيف تبغاني اكون ام واثقه من نفسها وانت تجرحني بلا سبب كلميه بالمنطق قولي انت لما تقصر علي ازعل واتضايق واسامح وانت من موضوع مايسوى يخرب علاقتنا تهيني قولي له ترضى هالشي لبنتك او اختك ترى لي اهل مازوجوني عشان تربيني اذا شااك في تربيتي واخلاقي ودني لهم واشرح لهم عيوبي وهم لهم صلاحيه يربوني ويضربوني بعد قولي هالمره بفوتها لك من باب غلاك والعشره ولاني ادري انك مااتقصد ولاراح تعيدها بس تااكد اهانه ثانيه مو انت اللي بتهددني انك توديني لاهلي انا اللي بجيب اهلي واهلك واشوف من اللي معاه الحق واسكتي على كذا هو بيحسبها صح وبيحمد ربه ع النعمه وبيوديك ولا عاد يعيدها لكن لو اعتذرتي لاي سبب كان عشان مستشفى ولاغيره والله ليعيدها والجايه بتكون اكثر من حذفه جزمه خليه يحترمك واحترميه ولاتغلطي عليه تعاملي معاه بااصلك وخليه هو يعكس صوره تربيه اهله له اذا قليل ادب يلاقي من ياادبه والله اتنرفز من التجريح والاهانات بلا سبب مع ان الزواج اشرف علاقه يفترض تكون اكبر من كذا !!!! الله يعينك وينور بصيرتك ويسخره لك |
شوفي حبيبتي انا احس انه مافيه كرامه بين الحرمه والرجال انا اقولك اعتذري منه وحبي على راسه وبيني انك ماتقدرين على زعله والله بعدها بترتاحين صدقيني انا مجربه ترى والله تفكير الرجال غير عن تفكير الحريم انتي تشوفين انه هو الغلطان وهو يشوف انك انتي الغلطانه صالحيه حبيبتي وشوفي بعدها وش راح يسوي....
|
| الساعة الآن 09:24 AM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©