|
سبحان الله ... رجال يقلبو المفاجآت الى حزن ..
السلام عليكم ورحمة الله وبركاته بعد التحية والاكرام ... دائما ادخل على هذا المنتدى واستفدت الكثير منه ... وهذه اول مشاركة لي ...وأتمنى من الاعضاء .. ان تساعدونني.. المقدمة ... صار لي ستة شهور من زواجي .. عمري 22 سنة وزوجي 31 ... ساكنة مع اهل زوجي ...زوجي دايم يجيب المشاكل الى نفسه وبعدها يقلبها علي ... انا صار لي شهر واشوي في بيت أهلي .. خلصت الامتحانات .. وفكرت اني ارجع بيت اهل زوجي امس .. وحبيت اني اضيف شيئ .. في غرفتنا والى وزجي ... اشتريت فراش للسرير واخذت بجامات لزوجي .. وبخرت الغرفة وسويت بعد الحركات الرومانسية ,, طبعا زوجي في الدوام ... وانا رديت بيت اهلي .. وتركت له ورقة على اني برد اليوم البيت معاه ... ورديت البيت وانا اتغذى دخل علينا .. وسلم على اهلي ... وراح يجلس في الصالون ... وقمت من الغذاء ورحت له وهو ما يعطيني ويه .. يناظرني من طرف أنفه .. انا في هذا الوقت ياء في بالي ألف سؤال ليش يناظرني جذي اسويت له .. ليكون ما عجبته المفاجأة ,, أو يمكن ما يبغيني أرد بيت أهله ..وكنت أروح وأرجع عليه .. ما في فايدة ... بعدها اخوي جلس معاه بالصالون.. وانا قمت من الصالون اسوي بعض الحركات حق شعري بما اني برجع له .. وانا مشتاقة له وااااااااايد .. لكن ما أتوقع انه مشتاق لي ؟؟؟ بعد دقائق ياء لي وقال انه بروح بيت أخته وانا قلت له مالقيت الا اليوم تروح الى اختك .. رد علي انه عنده سالفة معاها قلت له على راحتك وبكيفك ... تخيلوا في هذه اللحظة شنو قال لي :: (( انتي بجي اليوم البيت ولا لا )) هذا سؤال يسألني معاه .. يستهبل علي .. قلت له وانت شنو شفت .. .. قلت له انا اورردي ما بروح بيت اهلك بعد الصلاة مباشرة بجلس اشوي في بيت أهلي... سكت ما رد علي بعدها راح مرة ثانية يجلس في الصالون .. وانا رحت أكمل شعري ...أذن المغرب وقال لي انه بيمشي بما انه يصلي في البيت إذا ياء .. وبعدها صارت لي سالفة .. وهو يقول لي تأدبي ..انا شسويت لك ..واخوي رافض اني ارجع له الحين الا لما يجي ويتفاهم مع أهلي .. لانه امس احرجني وجرحني جدام اهلي كلهم ..لما امي كلمته يقول لها اني مو متأدبة وامي عصبت عليه شنو تقصد انها مو متربيه ... وهو يقول لي لا احد يتدخل ما بينا .. أهلي ما يتدخلون بس هالمرة ما سويت له شي.. هذه المفاجاة كله من حبي له وهو يرد لي الشكر جذي.. ويبغيني أنا اقوله تعال لي .. اتصل فيني اليوم وقال لي بجهزي نفسج بمر عليك الساعة 7ونص المغرب وانا رفضت .. أولا اهلي يبغو يتفاهمو معاه .. وقال لي اي وقت تبغي تجي دقي علي وانا محتارة اخواني واخواتي الاعضاء اتمنى المساعدة .. انا في هذا الوقت في أمس الحاجة لكم .. ابغي حل معاه .. لما اسوي له مفاجأة يقلبها علي ؟؟؟ الرجال كلهم جذي .. او في رجال ما يحبو المفاجآت؟؟ ومن الغلطان انا والا هو ؟؟ ادق عليه عشان يجي وياخذني والا لا ؟؟؟ محتارة .. ارشدوني ارجوكم لا تبخلوا علي .. من الحلول .. |
حبيبتي تعوذي من ابليس
وكلمي زوجك وانسي تسعة أعشار حسن الخلق في التغافل بصراحه انت وامك بالغتم في تصعيد وتيرة الغضب عنده وايش يعني قالك تربي كلمة عابرة اذا خليتيها تعبر صدق حبيبتي لا تتوقف حياتك على كلمة ولا تسمحي لاهلك يحاسبون زوجك على كل كلمة يقولها قدامهم طبيعي جدا تصير مشادات بين الزوجين بحضور الاهل بس الاهل الواعين يتغاااااااااااااااااااااااااااااااافلون ولا كانهم موجودين ولا تحاولي تحاسبي زوجك على كلمته انسي انسي انسي ويمكن اللي زعله شي ثاني مو في بالك يمكن لبسك يمكن طريقة لهفتك عليه ماحبها قدام اهلك كلميه وتغندري يا حلوة وارجع لزوجك |
شكرا حبيبتي على مرورك وردك الجميل بوضح لج بعض الامور زوجي أكثر من موقف يسويه لي أهلي يسكتوا عنه .. ما يتدخلو ما بينا .. حتى في يوم مد يده علي وصدمني بالسيارة بس الحمدلله ماصار فيني شيئ بس رضوض ما تكلمو له ... اخوي صديقه الروح بالروح ... تفاهم معاه وعدت على خير ... وصار لدرجة انه ما يحترمني جدام أهلي .. من جذي هالمرة أمي تنرفزت هالمرة .. ولانه ضايقني بحركته من ناحية ملابسي : هو ما يرضى البس بنطلون او بدي اي شيئ ملفت للنظر جدام اهلي .. وانا كنت لابسة لبس بيت وهو كان اشتراها لي من أيام الملكة كان ما يحب أجلس جنبه جدام اهلي .. اي بنت بتتحمل .. على طول بعيدة عنه .. الحين تضايق من هالشيئ والله مب عارفة له اسوي الشيئ اللي يبغيه يرد ينقلب علي انا الحين بس اللي مضايقني أنه ما عبرني بشئ بالمفاجاة كأنه ولا شيئ اتمنى تساعدوني |
اختي انتي باقي في بداية زواجكم وشكلكم مافهمتو بعض الى الحين الحياة تفاهم شوفي وش يبغى منك وانتي زوجك راح يعرف وش تبغين منه أما مسألة مشكلتك مع زوجك فلازالت غامضة وفيه شي انتي ماذكرتيه عن بداية مشكلتكم حتى الآن |
شكرا لك اخوي على مرورك وردك بوضح لكم اكثر ساكنة مع اهل زوجي بغرفة وحمام ولله الحمد .. واهل زوجي ما يحبو نشاركهم بشيئ.. مب مشكلة عندي متحملة كل شيئ لاني احبه ... وابغيه وثانيا الوضع اللي فيه بلدي مضطرب .. وخلتني اجلس مع زوجي ولا شفت اهلي تقريبا 3 اسابيع احسه مل مني 24 ساعة في الغرفة ولا هو يخرج بس الدوام ويرجع .. في تاريخ 3 مايو مليت من الوضع وطلبت منه اني ابيت عند أهلي ومامنعني من ذاك اليوم 3 مايو الى يومك هذا انا في البيت اهلي الوضع طبيعي اكلمه في الجوال واحيانا يجي البيت , يتغذى معانا يوم السبت ,, وانا ادرس اختي واخوي لصغار اللي بالمدرسة وكان فترة امتحانات خلصت الامتحانات 5 يونيو الا هو امس يوم الاحد .. وقلت برجع بيت أهل زوجي .. وانا صار لي فترة ما جلست جلسة رومانسية معاه وتكلمنا على راحتنا وصرنا قراب من بعض .. ففكرت اني اسوي له مفاجأة ... امس لما كان في الدوام رحت غرفتنا مع زوجة اخوي ورتبت الغرفة وزينتها .. وبعدها رجعت بيت اهلي .. يعني هو لما رد من الدوام دخل غرفتنا .. اهني انا ما ادري تفاجأ والا تضايق ... وياء لي البيت العصر .. وكان ويهه معتفس يعني ماله مزاج .. ولا يبغي يكلمني .. وصارت مشكلة ابغي اعرف السبب .. وقال لي السبب اني قاهرته لاني ما جلست جنبه هو ما يحب اجلس جنبه من ايام الملكة وكنت اتضايق لان انا في صوب وهو في صوب ... وانا علشانه ما احب اضايقه او ازعله اجلس بعيد عنه .. الحين ياي يقول لي جذي ماله كلمه ...ويقول لأمي اني مو متأدبة واني ما احترمه .. والله انصدمت منه ليش طلع الكلام العكس .. قاعد يقول كلام مب في مكانه .. علشان يبرر موقفه .. انا صح في بعض الاحيانا اعانده.. بس مو لدرجة اني ما احترمه .. قوية في حقي وانا كل كلامي ليش لما اسوي له مفاجأة يسوي لي سالفة ... مب قادرة مستوعبة ان في الازواج يضايقهم هالشيئ مب اول مرة اسوي له مفاجاة .. على طول يسوي لي جذي .. بس هالمرة بزوده ويتقلب علي من شيئ لشيئ .. انا تعبانة نفسيا .. وايد منه وصايدني احباط اشلون ارجع له وانا بهالوضع .. بما اني قصيت شعري .. واشتريت لي فستان كل هذا علشانه .. ما صار لي نفس .. حتى اني مجروح قلبي منه ليش الازواج جذي .. ما يهتمو بمشاعر الزوجة؟؟ انا كل اللي ابغيه من زوجي بس كلمة الطيب .. لما اسوي له مفاجأة .. هو لا يعبرني حتى بالابتسامة انه عاجبه .يقلب علي يومي .. عذرا اخواني واخواتي اذا طولت عليكم .. وادري اني ادخل موضوع بموضوع اتمنى منكم المساعدة .. ارجوكم .. ارجوكم |
مسكين يمكن زوجك ماراح بيت اهله ولادخل غرفة نومكم وشآف التزبيط
الوآضح من كلامك انه جآ من دوامه لبيت اهلك وبوقت الغدآ معناتو بوقت رجعتو من الدوام وسبحان الله ربي اراد انو ذآك اليوم يكون عنده موعد مع اخته دام زوجك اتصل فيك وقال بأخذك رووووووووحي معاه وسيبي موضوع الكرامه واهلك على جنب زوجك باين انه متضايق من موضوع ما الله وعلم ايش هو لكن من واجبك كزوجه محبه لزوجها تعرفي ليش زوجك تعامل معاك كذآ يمكن متضايق من بعدك عنه ذآك الشهر وشوي البعيد عن العين بعيد عن القلب دايم امهاتنا يوصونا اذا اتزوجنا خليك ملازمه زوجك 24 ساعه حتى في سفرياته أعرف حريم يتركو عيالهم عند اهاليهم ويسافرو مع ازواجهم الي عندهم سفرة عمل مدتها اسبوعين بس كلو علشان ماتفارق زوجها :22: وسبحان الله كل زوجه ماتفارق زوجها يجيك الزوج يتعلق فيها اكثر واكثر ولايطيق غيابها يوم واحد لكن انتي ماشاء الله شهر وشوي كفيله انه تخليه يعاملك بذآ الجفى والله انا مااقول هالكلام إلاّ ابغى مصلحتك ارجعي لزوجك وخليك معاه اهلك زوريها واجلس عندهم بالكثير 3 ايام وارجعي بيتك |
اختي أعتقد بأن زوجك تضايق من مسألة انك رحتي للبيت وسويتي له المفاجأة اللي ذكرتيها ورجعتي لبيت اهلك وجاء على باله ليش ماقعدتي قدامه لأن الزوج راح يستانس لما يشوف زوجته قدامه وراح تكون أحلى مفاجأة بالنسبة له وأعتقد هذا السبب اللي خلاه يكون متضايق وخلاه يقول انك ما أحترمتيه والعناد بين الزوجين عمره ماجاب نتيجه دائما تكون نتائجه عسكية على الزوجين نصيحة مني لكي ولكل زوجه انها ماتدخل أهلها بينها وبين زوجها لأنه الأهل دائما اذا يبغون يحلون المسألة يمكن يخربونها أكثر وخلي مشاكلك دائما بينك وبين زوجك لأن الزوج مايحب ان مشاكله تطلع برا البيت نهائيا اتصلي فيه وقولي تعال خذني لأني مشتاقه لك بالحيل وسوي مفاجأتك له اذا وصلتي للبيت ولاتفتحين معاه اي موضوع الا بعد يوم او يومين اذا هدأت الأنفس وعادت المياه لمجاريها بأسلوب حلو دون العتاب في شي يجرح . |
ماقول غير
الله يصلح بينكم الله يصلح بينكم الله يصلح بينكم |
اشكرك اختي حلوة المعاني على ردك الحلو . اختي حلوة المعاني ..زوجي لازم بعد ما يرد من الدوام ياخذ شاور ويغير ملابسه .. فأكيد 100% شاف الحركات اللي مسويتها له .. واشكرك اخوي ابو شذى ..على كلامك اللي يدخل القلب بقول لك موقف يا أبو شذى ... في بداية زواجي .. من عوايدنا الناس تجي تبارك لي سبعة ايام .. يوم في بيت أهلي ويوم في بيت أهل زوجي..بعد السبعة ايام ... كان زوجي يجبرني اروح بيت أهلي .. وأزيدك من الشعر البيت .. اذا كنت راقدة او تعبانة يخليني غصبا عني أروح بيت أهلي .. يعني مو برضاي ..شنو تفسر هذا ....؟؟ انا اللي مستغربة منه انه يقول يحبني وايد .. بس اسلوبه معاي يخليني افسر انه ما يحبني يخليني على راحتي صح .. ولو هو مب عاجبه كان ما خلاني ابيت .. برضاه .. وبين فترة وفترة ييب لي ملابس بدون ما اطلب منه .. يطير من الفرحة .. انا عايشة معاه واعرف شنو ردة فعله ونظراته انه فمستانس ولا لا قبل بيوم قبل لا اسوي له المفاحاة كان يكلمني بالجوال والامور طبيعية وقال لي حدك هذا الاسبوع وتردي البيت ... وانا كنت من فرحتي اضحك واقوله قريب برجع .. ويبين لي انه مشتاق لي وانا بعد قلته اني مشتاقة له ..يوم ثاني بالضبط سويت له المفاجاة ..وانا قلت لك اخوي مب اول مرة اسوي له المفاجاة ... في ايام الملكة سويت له مفاجاة ... كان هو في الدوام وانا رجعت من الجامعة ورحت بيت أهل زوجي..وقلت له لا يجي الجامعة لاني رجعت بيتنا لاني تعبانة .. وجلست في الغرفة ازينها يعني حركات رومانسية ... وهو ما يدري اني في بيتهم .. قبل لا يدر البيت .. دزيت له مسج .. اني مشتاقة له .. وكنت .. على السرير وانا متلحفة لا باين مني يد ولا ريول .. ومطفية المصابيح .. ودخل الغرفة .. وقرب عند السرير ... ولما كشف لحاف السرير ردة فعله عادية مب مستانس ولا شيئ .. وعلى طول سألني تبغي غذاء والا لا ؟؟؟ وانا من احباطي قلت له ما ابغي ..ظليت بدون غذاء.. ونام عني .. ولا كأني موجودة .. ولما صحى من النوم .. قلت له عندي لك مفاجأة حلوة .. ببيت معاك اليوم وبسوي لك عشاء من يديني .. واخذت بجامة نوم الي كنت تبغيها .. واللون اللي تحبه ... على طول قال لي لا لا لا ااااااااااااااااااااااا ماابغيج تبيتين معاي .. انا تفاجات .. من ردة فعله .. وقلت برجع البيت الحين قبل ما تجي الليل .. قالي يالله جهزي نفسك !!!!!! اخواني واخواتي الاعزاء شنو تفسرو هذا .. المفاجآت ... تضايق .. والا شنو ؟؟!!!! اعضاء الاعزاء ساعدوني .. اردي حلا معاه .. وانا ما استغنى عن المفاجأت ... |
كله كوم وصدمة السياره كوم من جد رجال مايقدرون النعمه اللي بين ادينهم نصيحه لك اسفهيه وطنشيه وعطيه الخامس زي مايقولون يبيك اهلا وسهلا مايبيك بسلامته حتى اهلك مو محترمهم يبون يتفاهمون معه مو معبرهم ويهزء بنتهم قدامهم عقلية طفل للاسف الله يعينك بس |
اقتباس:
تشكر اخوي العزيز على مرورك وردك والله يسمع منك.. |
اقتباس:
مشكورة اختي على مرورك وردك ... انا اللي يضايقني احيانا يصارخ علي جدامهم يبغي يلفت انتباهم وهم اللي محترمينه ما يبغون يتدخلو بينا ..بس هو الله هداه ... تصرفات ... تقهر .. تنرفز .. |
لانك ياحبيبتي طيبه وساكته
احترام الزوج وتقديره والقيام بواجباته لاينفي ان يكون لديك موقف حازم من معاملته معك ولايعني انك اذا وقفتيه عند حده... بانك مقصره مثل ماله واجبات... ايضاً لك على نفسك حقوق و وواجبات كيف تريدين ان يحترمك الاخرون وانتي لاتضعين حد لمعاملتهم معك باحترامك لنفسك للاسف اكون صريحه معك زوجك مايبيك ترجعين وتفاجا لما راح للغرفه وشاف انك مستعده للعوده وجاكم وجهه منعفس على حد قولك لذلك اجلي موضوع الرجوع الان وركزي معه على موضوع المعامله والاهانه امام اهلك الرجوع ملحوق عليه ارسلي له رساله مختصره بيني فيها ان اسلوبه ليس اسلوب زوج عاقل ويخاف الله وانك ماقصرتي بشي وانك انسانه متربيه وعندك اهل ..وقولي اذا ماتعرف تتعامل معي ولا انا عاجبتك اما امساك بمعروف اوتسريح باحسان وقفلي جوالك خلي تفاهمه مع اهلك...وبلغي اهلك انك تردين وضع حد لهذه التصرفات الطفوليه يعني مادري يوم يصدمك بالسياره قطوه انتي مو ادميه...مثلا |
أختي حاولت أفهم موضوعك بس أحس فيه جوانب ماهي واضحة
عشان كذا أخاف إني أوجه توجيه غير صائب.. لكن الله يصلح حالكم ويسخركم لبعض.. فيه تساؤل عندي كيف تروحين لغرفته بأيام الملكة وتنامين عنده!!! يعني هل هذي عادة عندكم طبيعية يسوونها كل المخطوبات؟؟ الله ييسر أمركم |
ترى الثقل زين شكله مو عاجبه لهفتك عليه بالشكل الخورافي هذا خلك ثقيله ومستحيه معاه باين على زوجك الجديه في تعامله ويحب يطلع بصوره رسميه امام الكل و مايحب تجلسين جنبه ممكن يستحي بالعكس صفه حلوه ولو انك كنتي اقل جراءه ممكن هو يبادرك بحركات ورومنسيات بس انتي شكلك ماعطيتيه مجال فستفزيتيه بهالحركات وممكن سببتيله احراج لما تكونين بالغرفه عند اهله وكمان رحتي زبطتي غرفتك واخوك وزجته ودوك هنا حس بحراج وتركك عند اهلك عشان يبعد الشبهه هههههههه ولحد يركز فالتفكيرفيكم يحب يكون غامض فعلاقته معاك امام الناس |
رجاااال ما ينعطوووو وجهه ^^
الله يهديلك زووجك يااارب |
انا مع الاخت حلوة المعاني
طيب انتو لمن كنتوا في فترة الملكة كيف تبغي تباتين معاه هذي بالعقل ماراح يرضى الله يصلح بينكم |
مهماكان كان يوضح لها أيش إلي يضايقه وأيش اللي يفرحه مو يخلي الأمور سايبه وهي بحيره
شكلك رومنسيه وطيبه كان الله بعونك صدقيني إنتي من النساء إللي لها نكهه خاصه بس المشكله إنكم لسه ببدايه حياتكم لاكن مع الأيام إنتي بتأثرين عليه بشيء إيجابي وهو يحاول يتجاهل لاكن مصيره يصرح بمكانتك عنده وبيتضح ذلك على أسلوبه بس إنتي وقفي عطى ولاكن موبزعل لاء ولاتنتظرين منه المقابل أبدآ ومع الايام الله بيسهل أمورك وامابالنسبه لسؤالك هل المفاجئات تعجبهم ولا لاء انازوجي زيه مادري احسها تضايقه عساهم بلى حفلات بلى رومنسيه |
اقتباس:
شكرا على مرورك .. كل الاسامي ... وشكرا على ردك .. |
اقتباس:
ان شاء الله |
اقتباس:
تشكر مجموعة حروف على مرورك لا تفكيرك مب في مكانه.. اسمح لي لا سببت له احراج ولا شيئ ... بس هو طبيعته جذي .. يدلع علي اكثر اذا اعرف ان في احد يعرف اني مسوية له مفاجاة ... بس دايما قبل لا يدلع ينقلب علي .. انا هذا الشيئ يضايقني .. واول مرة بشوف بحياتي .. زوج يتعامل مع زوجته بهالطريقة وقت المفاجآت |
اقتباس:
ان شاء الله ..والله يسمع منك .. شكرا على مرورك خطيرة حدي .. |
اذا دخلتي اهلك في حياااتك
يعني بدت الحرب بين الاسرتين والضحيه في الاخير انتي رووحي مع زوجك وانا اقولك من الان زووجك مارايح يجي يتفااهم مع اهلك قطعي الشر ورجعي وترا مووضوعك مافيه ساالفه كبيره انك تتركي بيتك وترووحي بيت اهلك |
اقتباس:
اختي العزيزة .. الامر طبيعي في فترة الملكة عند اهلنا يباتون .. وهو يعرف عادي .. كسر بخاطري .. ويقلب اليوم علي هم .. |
اقتباس:
شكرا اختي العزيزة فاقدة شيئ على مرورك ... وردك السليم مثل حالي .. الله يكون بعونك ... والله يهديهم ... |
اقتباس:
الوزن الثقيل .. في نظرك سالفتي سهلة .. بس تعال وحط نفسك مكاني .. تسوي وتسوي وتسوي .. والطرف الاخر يبادلك بهوشة بسالفة مالها داعي وانا قلت لكم في البداية صرت 3 اسابيع ما خرجت من باب الغرفة .. وهو يروح الدوام ويرجع .. وهذا روتينا .. حسيت من كلامه في ذيك الفترة اني ثقيلة عليه ... وطلبت منه ابيت في بيت اهلي .. وكان يقولي اجلسي بعد عندهم ...!!!!! يعني في البداية مني .. وبعدها منه .. كان راضي .. وانا على طول كنت اساله .. يقول لي انه راضي .. |
الاعضاء ... اخواني / واخواتي الاعزاء وين حلولكم .. اتمنى ما تبخلو علي ... انا الحين في امس الحاجة اليكم .. |
وينكم عني ؟؟؟ لماذا هذا تتجاهلوني ؟؟؟ أليست هذه مشكلة ؟؟ اريد حلول ؟؟ انصوحوني .. ارشدوني ؟؟ ولا تتركوني ؟؟؟ انا انسانة ... وزوجة كحالكم ... واريد منكم بعض الحلول ؟؟ لدي مشاعر واحاسيس !!! عذرا على الازعاج ... |
ليش ماشرطتي عليه من البدايه انك تبين شقه مستقله ؟
وترا مووضوعك مافيه شي مووضوعك بسيط ارضي واقتنعي بالي انتي فيه ولا تدخلين احد بينكم ولا ترووحين بيت اهلك لانك زعلانه من راااسك لان خرووج الزوجه من بيت اهلها بدوون اذنه رايح يكلفها كثير |
|
اقتباس:
اختي العزيزة الوزن الثقيل اولا انا مشكلتي مب على المكان .. انا صابرة مع بيت أهل زوجي المشكلة ان زوجي احسه ما يبغيني كلامه يبين لي انه يبغيني واحيانا لا ما يبغيني .. واسلوبه وطريقة تعامله معاي لما اسوي له المفاجاة .. ينقلب علي .. والله مدري شلون اوضح لكم .. اختي انا ما طلعت من عنده الا هو راضي اني ابيت عند اهلي .. صار لي اسبوعين وقلت له برجع معاك .. كان يقول لي اجلسي بعد عند اهلك .. كذا مرة يقولها لي .. يحرجني .. وانا انصدم منه .. طول الايام الي كنت في بيت اهلي .. يجي لي البيت ويجلس معاي كم ساعة .. يعني لا هو زعلان ولا شيئ .. وواجباتي اسويها .. من غسيل .. وترتيب ملابسه .. وهو راضي بالوضع اني اجلس ..وكان ييب لي ملابس بدون ما اطلب منه .. لما سويت له المفاجاة وقلت له برجع معاك .. انقلب علي .. واهلي ناس طيبين يحبو يشوفو بنتهم مع زوجها سعيدة .. كل االي ضايق هلي .. ليش ينقلب علي بدون سالفة... واحرجني وجرحني جدام أهلي كلهم ... وجدام زوجة اخوي .. صارت الحين .. تشمت فيني .. وتستحقرني .. كل هذا بسببه .. واعيدها لك للمرة ثانية انا ما خرجت من بيت اهل زوجي وانا زعلانة منه .. |
اختي العزيزة سيدة موقف الملكة فيها عقد وبعد الملكة صارت حفلة الخطوبة بسيطة .. ؟؟؟ واهلي عادي عندهم يباتون عند خطيبهم . ومشكلتك لم أستطع فهمها فيها شيء غير واضح المشكلة ان زوجي لما عملت له مفاجاة انقلب علي وانا لسى في بداية زواجي هل زوجك عاداته وأهله نفس عاداتكم...؟! عاداتنا وتقاليدنا مثل الشيئ في بلدي .... والله الكل اغلبهن يبيتن عند اهل ازواجهن في فترة الخطوبة هل كان يريد منكِ أن تستأذنيه قبل الذهاب لبيت أهله وصنع المفاجأة؟ تزوجنا المكان مكاني .. واتوقع اني مب لازم استأذن منه .. عادة الزوج يفرح عند رؤية مفاجاة من عند زوجته.. فما له داعي استاذن الرجل غضب لشيء ما لابد أن تناقشيه فيه ..؟! ختي العزيزة زوجي لا يحب النقاش ابدا دائما يتهرب منه .. ويلف ويدور علي .. كل اللي قاله يبغيني اتأدب لاني ما جلست جنبه لما ياء البيت في نفس اليوم اللي سويت له المفاجاة .. هل هذا سبب مقنع .. بما انه في فترة الخطوبة لا يريدني جلوس جنبه .. وهذا الشبئ يجرحني ..وصرت لا اجلس جنبه .. والان انقلب علي عملها عذر وسبب علشان اتأدب وانا ما عملته شيئ يضايقه .. صارت لي مخطوبة سنتان .. 6 شهور من تزوجت ... |
أختي الغالية...
أولا :اقرأي في النت عن كيفية التعامل مع الأحمق!!! مع احترامي لك زوجك أحمق.. ثانيا :من ناحية تروحين وإلا ماتروحي؟؟ لو سألتيني بذاك الوقت الي دعمك فيه بالسيارة وقلتي أروح وإلا لا بنقولك لا تروحين(حتى يتدخلون أهلك بالموضوع)...لكن الحين من رأيي تروحين وترجعين المياة لمجاريها لاتعقدين الأمور وتدخلين أهلك وتتعقد أكثر ترى الطلاق والله أمر مو سهل أنت شكلك تحبين زوجك لو تعقدت الأمور ماراح يخسر إلا أنت بس!! ثالثا : (اللبيب بالإشارة يفهم ) خلاص أنت كل شي واضح قدامك زوجك مايحب المفاجأت لا عاد تسوين له مفاجأت مايستاهلها والله..تسوين له مفاجأة ويقلب عليك أثقلي عليه وخلي يحلم بالمفاجأت !! رابعا : أتمنى تغيري معاملتك معه إذا كنت تتصلين عليه كثير وهو خارج المنزل قللي الممكالمات أو لاتتصلين عليه أبد وحتى الرسائل لا ترسلين نهائيا وكمان لاتسوين مفاجأت... جربي معاه هالتعامل شكل زوجك من النوع الي يحب المرأة الثقيلة من رأيي قد مايعطيك عطيه وبس!! خامسا : من ناحية الجلوس بجانبه.. قولي له انت فهمني تبيني أجلس جنبك وإلا لا؟؟ وسووي الي يقولك عليه المرات الجايه.. لاتكبري القصة ياقلبي عطيه على قد عقله !! أخيرا .. الله يوفقكم مع بعض يارب.. |
شكرا اختي اللؤلؤة المصونة على ردك ....
الله يوفقني يارب ... |
| الساعة الآن 09:06 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©