|
زوجه ثانيه وضحيه ظرووف ساعدوني بخبرتكم
السلام عليكم ورحمه الله وبركااته كيف حاالكم جميعاا افكاري مشتته ومااعرف ابدى من فين؟؟ فتحت عيني على الدنيا من ام تعتبر زوجه ثانيه وللأسف طلع حضي مثل امي تربيت على يد احسن ام واب مكافحين محترمين قنوعين عشت حيااه مستواها المادي جداا ضعيف بس مااحسيت ولا مره بالحرمان ابوووي طيب وحنون عمري ماحسيت ان له عيال غيرنا زوجه ابوي وعيالهاا يتمنون لنا الموت والامراض لدرجه ان اخواني من ابوي ساكنين في بيت واحد ماشوفهم الا بالعيد تبهذلنا كثير انا وامي وخواتي بحكم ان ابوي مو موظف وشخصيته ماهي حازمه انذليت بركوبي اللموزينات ومع السواقين عشان الدراسه مع العلم اخواني موجودين بس يعتبرونا ماانقرب لهم حقووودين مرضى نفسيين اتمنى من الله ان يااخذ حقي منهم لانهم سبب تعااستي طبعاا عيال عمي ماافيه احد منهم تقدم لي الا واحد سكير والباقي اخواني ماايبوني اتزوج قبل خوااتهم خطبني واحد عمره 55 سنه طبعاا رفضت وجلست اضحك على هالموضوع بعد سنه واافقت عليه صاار لي مووقف يمكن تاافه بس خفت من اخواني وحبيت اتخلص من ظلمهم وفكرت بالمنطق اني صغيره ولو صرت زوجه ثانيه بيدبعني زوجي وبنسى همي الموقف اللي خلاني اوافق على زوجي ركبت مع اخوي الكبير وزوجته بنحضر زواج وامي معاي حلفت امي انا نركب معه ولا انا مااودي اطلع معاه طول الطريق يتاافف يوم جلسنا بالزواج ومع بنات عمي ووناسه وفله الا يجي اخوي الصغير يقول لي يقوولك فلان اخوي ارجعي انتي وامك مع ولد عمي لان السياره مااتشيلكم بااخذ معي خوات زوجتي المصيبه ان ولد عمي اللي يبيني ارجع معه اخو زوجته يعني ليش مو زوجتك ترجع معه؟ المهم دخت بالزواج من القهر وبرد وجهي قدام بنات عمي فيه الفرحان وفيه اللي راحمتني رجعت ع تاكسي مع امي وناديت ابوي قلت زوجني لو صلبي مااله اصل لو ولد حراام انا لو جلست بالمشااكل ذي ذبحت نفسي كنت عاايشه حيااه صعبه مع ان امي تحااول تغير جونا بس يد وحده مااتصفق ويااليتهم ارتاحو يوم وافقت اتزوج واحد كبير لا زعلو ان عنده فلوس واني ممكن اعيش بعز خططو لطلاقي قاامو وسرقو ذهبي يوم زواجي قيمته 50 الف وعرفت بعد زواجي باسبوع ان البصمات اللي على دولاب امي بصمات اخوي جااني ابوي وطلبني اني اساامحهم في الدنيا عشاان ماافضحه مع زوجي ويدرون الناس عنا ساامحتهم بس قدام ابوي ولا عمري مااحللهم على انهم فجعونا وسرقو فرحتي ومن بجاحتهم يحلفون انهم مااسرقو شي ويوم هددت اني ادخلهم السجن رجعو لي طقم وااحد يارب انتقم منهم المهم كل هذاا اعتبرته ماضي عشت مع زوجي بعد زوجي باربع شهور اطلبت مني امه واخته اجيب لهم ملابس له وملابس لي ويسوون سحر لنا لانهم يبون فلوسه وقالو انتي نخليه يحبك وكذاا طبعا هم شافو اني صغيره وماني بنت نعمه قالو اكيد بتوافق رفضت وحلفت اني اعلمه قالو لو علمتيه نضرك طبعا مااهمني علمته وتوقعت انه ينصدم وكذا قاال اساسا امي كبيره وحاكمينها بنااتها وانا مااخلي عيالي يشربون ولا ياكلون عندهم وعاارفهم ولايهموني انا جتني صدمه من تزوجت يخليني يوميا المغرب اتقهوى عند امه واتعشى داايم معاهم يعني بالعربي مااهميته كاان حاطني تحت التجربه من تزوجته ماايعطيني فلوس الا بالعافيه شكيت لاهلي قالو بس يختبرك ولاهو كريم صبرت والحين هااذي ثااني سنه زواج معاي ولد وحاامل وهو يقطر علي بالفلوس ويعطي اهله كثير زوجته الاولى واذا طلبت اغراض للبيت قاام قسم لي من بيت زوجته زوجته الاولى تمثل عليه انها تحبني وتحب ولدي وهي نفسها لي بالمووت وهو يقولي شووفيها مااتجيب طاريك الا بالخير وانا مشكلتي صريحه قلت انا احترمها واحترم عيالها والله اعاملهم معاامله مااحد يصدقها حتى ولدي يجبرني احطه عندها بالساعات لاجيت اطلع مكان ولارجعت الاقيه جوعان ولاتغير له لاوصخ واذا قلت له قاال يمكن توه موصخ ولا رضعته ومااشبع لاتظلمينها لو بحكي مواقفي مع زوجي والله اتعب واتعبكم بالقرايه المشكله الحااليه يوم كنت حامل بولدي طلبت شغااله قام حطني عند اهلي وقال مقدم لك لاجت رجعتك البيت جلست اربع شهور ورجعني عقب قال انا جبت الشغاله ووديتها لحرمتي وانحااشت جلست لحد ماوصلت الثامن ونصرني ربي وانحاشت شغاله امه لي وعيت تشتغل الا عندي طبعا طلعوني متفقه معها ومن هالكلام كاان باقي لها 6 شهور وتنتهي مدتها خلصت وسافرت طلبته شغاله لاني كنت ادرس ورفض في يووم تحديته وجبتها وحلفت لو طلعها من البيت طلعت معها خلاها 15 يوم ومشاها بدون مايشاورني قال انا مقدم وطلع كذاااااااااااااب انا الحين تعبانه ومعي نزيف هو يبيني اروح لاهلي ولاخفيت ارجع وانا ابي اجلس في بيتي ويجيب لي شغااله قاال يوم طلعت حامل انه جاايب شغاله اندونسيه وفرحت وحمدت ربي يوم جاء امس قال ترى الشغاله لاجت لحرمتي لانها صار لها تسع شهور مقدمه على سريلالنكا ولاجتها قال اللي تجي الاولى لها واذا جت السيلانيه قبل تاخذها هي ولاجت الاندونسيه عطيناك السيلانيه انتي مو محتاجه الاندنوسيه اناا طبعا حسيت ماالي كرامه لاني صاابره على ولا شي وخاايفه اسقط االي ببطني لان بحملي الاول ولدت ولاده مبكره وجلس ولدي بالعنايه شهر بسبب التعب والارهاق صحتي ماتتحمل واذا قلت له قال لاتشتغلين بيتي وصخ ولا اقدر اصبر عليه مغبر وحوسه اناا قلت لامي الموضوع وقلت اليوم بالليل بقوله بجيب شغااله بالشهر واذا جت الاندونسيه تكون لي واذا رفض بروح لبيت اهلي ولاعاد اكلمه يتفااهم مع ابوي احسه مستهين فيني عشااني صغيره وطيبه تكفوون راايكم لاهنتم اسفه ع الاطااله بس ابيكم تفهمون الموضوع من كل جووانبه انا مااودي بالطلاق والمشااكل لاني ماانحشت من بيت اهلي بلحالي عشان ارجع له ببزراان زوااجي غلط وحيااتي غلط بس هذاا نصيبي |
الله يفرج همج..ويصلح احوال زوجج واهله
ما بيدي إلا الدعـــــــــــــــــــاء حبيبتي..كان الرحمــــــــــــــــــــــــن في عونج قصتج جدا مؤثرة..الله يسخر لج من يساعدج ويجبر بخاطرج انت وولدج |
زوااجي غلط وحيااتي غلط بس هذاا نصيبي هذا هو احلى مافي كلامك هذا نصيبك ولازم تقبلي فيه حاولي تتكيفي مع هذي الحياة الجديدة بالنسبة لموضوع الشغالة فاذا كانت لك من البداية لا تتنازلي عليها أبدا لانك لو قبلتي على نفسك مرة واحد بأنهم يستقوون عليكي وانتي تركتي حقك فاعلمي بانه من هنا ورايح حقك رايح فيهاااا الله يفرج عنك ويكتب لك الي فيه الخير |
اقتباس:
يعني بتمين بالغلط والعناد عشانه نصيبك اعقلي وكبري دماغك وش سيلانية واندنوسية واسيب بيتي عشن شغالة (يعني حلو تردي لبيت اهلك وبزورتك - وبرضه ماراح تلقي شغالة! يااختي نص العما ولا كله احسني الظن بالناس ولاتتحاملي على زوجته وتحكمي عليها انها تتمنى لك الموت بناء على تجاربك مع اخوانك غيري من نظرتك السوداوية ومشي امورك بالتساهيل والعناد راح يدمر نفسيتك وحياتك وحكمي الشرع في الي انت تسوينه |
يا اختي الله يهديك يعني عشان موقف لموزين ورجعة للبيت معاه تقومي توافقي بسهوله
ادري ان قبل كانت عليك ضغوط وماقدرتي تتحمليها وجا هذا الموقف وكسر ظهرك ووافقتي ياليتك صبرتي على الاقل في بيتكم واخوانك في بيتهم مايجيك منهم شي كثير وهذا درس عشان ماتتسرعي في قراراتك بالمستقبل بالنسبه لحالتك الان برايي تروحي عند امك وتخليه يعطيك مصروف يومي لين ماتقومي بالسلامه امك واخواتك ماراح يقصرو معاكي بهذي الفتره ابغاك تحسبين حياتك اللي راحت واللي جايه وتفكري زين فيها وتتخذي قرارات تريحك مستقبلا انا ماودي اعطيك بعض منها لانك انتي ادرى بظروفك وحياتك وعلى هذا الاساس تقرري اهم شي ادرسي كل شي من كل النواحي والله يكتبلك الخير وين ما كان |
الله المستعان
الله يفرج همك ويبدل أيامك فرحة وسعادة |
يااختي خليك قويه شخصيه
اللي لك لـــــك واللي مو لك مو لــــك وشلون يقطر عليك بالمصروف لالالالازم العدل ... وعليك بالصبر وانصحك تكتبين بقوقل د.مارك قونقور يشرح عقليه الرجل وبتستفيدين منه بحياتك.... |
المشكله أننا أخذنا الزواج هروب من وقعنا وتخيلنا أننا مع الزواج راح نكون سعداء
الزواج مو حل بس قدر الله ومشاء فعل مثل ماقلتي هذاا نصيبي ووالطلاق الحين بهذا الوقت مو حل لانه راح تكرر نفس الي شفتيه قبل عند أهلك مره ثانيه وبعده راح تتمني انك ترجعين لزوجك الحل الي جربته وله نتيجه قويه 1 )حطي الله بين عيونك من أذكار وصلاه ودعاء (( من وجد الله فماذا فقد ومن فقد الله فماذا وجد))) 2 ) زوااجي غلط وحيااتي غلط بس هذاا نصيبي الزواج مو سبب السعاده مو كل متزوجه سعيده كم وحده اخذت شاب تتمنى انها ماتزوجت الكلام عن نفسي :d ولا تقولين غلط لانك مراح تبدعين بحياتك وتنجحين بحياتك وهذي الفكره موجوده عندك 3 )أستمتعي بحياتك ولا تفكرين هذي حقوده وهذي ساحره اذا حصنتي نفسك وذكرتي ربك وان شاءالله مراح يضروك ما أقول صيري مغفله لا خليك حذره بس لا تكدرين حياتك بكثر التفكير 4) وبا النسبه لشغاله اذا تشوفين ان شخصيه زوجك تمشي معاه ان الوحده تأخذ موقف وتكون صارمه سوي الطريقه وذا شخصيته تتطلب انك تطلبين با الكلام الحلو والدلع أدخلي من هذا الباب ونفس كربك وفرج همك وابدل عسرك يسرا اميـــــــــــــــــن |
الله يفرج همك ويريح قلبك.. ولدك لا تحطيه عند زوجته الأولى خليه معاكي ولا عند امك.. والله يهدي زوجك ويحنن قلبه عليكي.. |
لاتخربين بيتك عشان شغاله...تعالي له باسلوب حلو وهادي عشان تحصلين على مرادك
وبالنسبه لولدك.ياأختي.الاطفال محد يتحملهم غير أمهم...خلي ولدك معك افضل لك وله.. ودام معك ولد وحامل اصبري...ان الله مع الصابرين.. |
ان شاء الله انك منتي وحدانيه ، ياوخيتي تصبري ولاتستعجلين بقراراتك والحمد الله على كل حال ، حالك افضل من حال من سمعنا منهم وشفنا بأعيوننا ان شاء الله امورك تبي تتسهل ولاتدمرين حياتك ، وعسى الله يفرج همك ويصخره لك ولايفرق شملكم يارب |
الله يفرج همك ويقومك بالسلامة
لاحظت فيك السرعة في اتخاذ القرار مرورا من قصة اللمزين واستعجالك بالزواج من كبير والان لا تستعجلين وتطلبين الطلاق من قصة خاااااااااااااااااااااااادمة اصبري وحاولي موازنه امورك وخذي ما تريدينه منه باسلوب وطريقه لبقة اما ان تتنفسي عند اهلك مع اخذ مصروف منه او تتنفسي في بيتك مع خادمة مؤقتة اعانك الله ووفقك لمى يحب ويرضى |
واصلا الخادمات الاندونسيات موقفين الاستقدام منهم...ان كنتي في السعوديه...الاندونيسيات بطلوا يشتغلون عندنا
|
الس
لام عليكم الله يجزااكم خير على ردوودكم وارائكم شااكره لكم انا كلمته اولى جلست وقلت انا ابي اناقشك بموضوع ومااودي نختلف ياتقنعني يااقنعك قاال ايوه وش عندك؟ قلت انت شاايفني تعبانه والدكتوره مانعتني عن اي مجهود ولاحتى اني اشيل ولدي وبيتي صار له اسبوعين ماامسحت سراميكه وتعبت نفسيتي من القرف والغبار وملابسي ماغسلتها وكل شي حاايس قااطعني قاال خلاص انا ساامح لك رووحي لاهلك وارتاحي ولاخفيتي ارجعي الله يحييك بكل سهووله باعني عشان سلامه جيبه قلت تستغني عني وعن ولدك عشاان الفين وانت راتبك عشرين الف غير املاكك(ماشاء الله) مع العلم عمري مااكلمته بفلوسه ولااخذت مصروف زيااده حريم عياله ياخذون 2000 مصروف من رجالهم ورواتبهم 6000 هذا بس للسوق والطلعات وانا 1500 توه من شهر بدى نظام المصروف بعد مااترجيته وبكيت عنده وكل شي فيها مصروف ولدي والبقاله والطلعات وكل شي حتى كل شوي يقول كم بقى معااك ذلني حسبي الله عليه المهم قلت لاتطول السالفه برر لي سبب رفضك انا انسانه عاقله ومتزنه واعرف اوزن اموري قاال انا مقدم لو تجي اليوم ولابعد سنه تتحملين وشغاله بالشهر والساعه ماافيه مو عااجبك روحي لاهلك وارتاحي عندهم ولاطاح اللي براسك تعالي انتي تبينها تقليد الواحد ماايكون امعه قلت حتى حريم عيالك وبنتك وحرمتك كلهم عندهم خدم ليش انا مااجيبها حتى لو دلع زي مااتقول وانا ابيها من التعب مااتبي اللي في بطني نزلته بس لاتظلمني واولد ولاده مبكره ويجلس بالعنايه زي اخوه سفهني ولارد علي قمت اقول انا ضحيت بعمري فرق 30 سنه عشااني بكل امانه حبيتك تحملت كل شي وانت مستكثر علي فلوسك صنتك وصبرت وانذليت كله عشانك تحملت اهانات الناس لي لاني بكل اماانه حبيتك بكل وقاااحه قاال لاتتعبين روحك ويطق فيك عرق وتموتين تراك مو حمل زعل بتعصبين وبترضين انا عندي رحله عمل بكره لابغيتي اهلك خلي السواق يوديك ولاخفيتي تدلين بيتك احس بجمره بلعتها واحرقت صدري وربي اكتب ودموعي على خدي اول مره امسك نفسي ولا ابكي قدامه حسيتي دموعي فيه خسااره بكل امانه افكر اموت نفسي ولا انزل اللي بطني نفسي اقهررررررررررره قهرني واهاني بضحكه علي يضحك بصووت يقول باايخه حركه تهملين البيت عشان اجيب شغاله لاتتوقعين بااسلوبك تجبريني وش الحل معااه؟؟ ارووح لاهلي بكره ولا انطق بس والله مخنووقه اخااف يغمى علي من القهر صدري فيه ناار نفسي اصيح بصووتي كله مظلوومه مظلووووووووومه ماابي فلووسه ابي كرامتي ترجع لي داايم يحسسني اني اقل منه انا واهلي حسبي الله عليه وعلى اخواني بعت نفسي عشان ارتاح وبااعني هو !!!!!!! ابي راايكم تكفون وقفو معي مهمومه |
ما أصاب عبداُ هم و لا حزن فقال : اللهم إني عبدك ابن عبدك ابن أمتك ناصيتي بيدك ماضِ في حكمك ، عدل في قضاؤك أسالك بكل اسم هو لك سميت به نفسك أو أنزلته في كتابك ، أو علمته أحداً من خلقك أو استأثرت به في علم الغيب عندك أن تجعل القرآن ربيع قلبي ، ونور صدري وجلاء حزني وذهاب همي " . إلا أذهب الله حزنه وهمه وأبدله مكانه
فرحاً رواه أحمد وصححها لألباني.لكلم الطيب |
اقتباس:
|
عزيزتي وحدانيه
خليك حليمة وفطينة انتي ماتبين الطلاق و زوجك باقي ماتمكنتي منه صح يعني ممكن بلحظه ينهي كل شي بينك وبينه تعاملي معه بحنكة وفطنة اجلسي عند اهلك وخلي وحده من خواتك تروح تنظف لك البيت وخلي اهلك يساعدونك بشغل البيت على ماتولدين وتقومين بالسلامة على حسب مافهمت انك تدرسين او لادك خليهم عند امك واصحك تحملين من جديد الى ماتخلصين دراسة و اجلسي مع زوجك و قولي انا ما ابي خدامة خليه يحس انك انتي غير عن كل اللي حوله على فكرة زوجك رجال كبيرة بالسن يعني يتمنى ان زوجته هي اللي تسوي امور البيت كلها من غير خدامة انتي خليك مثل مايبي عشان تكسبينه و اضح زوجك الى الان مو واثق فيك وحاس ممكن في اي لحظة تتركينه ويمكن بعد في احد يقوله انك انتي طمعانه فيه وبس تبين تسرقين فلوسه حاولي تغيرين الافكار اللي في راسه عنك بيني له اخر شي يهمك الفلوس و اول شي يهمك سعادته هو اذا رجع للبيت لاتنكدين عليه بطلباتك وابي و ابي سويله مساج خليه يرتاح خليه يحس انو اذا جاء عندك انك تبينه هو مو فلوسه يمكن هو يحس كل اللي حوله اهم شي عندهم الفلوس بدليل تصرف امه واخته خليه مايندم انه تزوج وحده صغيره الله يكتبلك التوفيق |
يا قلبي عليكي.. الله يفرج همك ويريح بالك يارب.. حالياً روحي بيت أهلك.. عشان لاتتعبي.. ومافي غير تصبري .. مدام مقدمين على شغالة .. إن شاء الله تجي المحروسة.. أدعي إن شاء الله تجي طيبة ويعطيكي خيرها ويكفيكي شرها.. حبيبتي.. انتي نفسيتك تعبانه مع الحمل كمان.. عيشي حياتك ولا تفكري بغيرك.. اصبري وادعي وإن شاء الله تفرج |
هو قالك مقدم شغاله...خلاص انتي ليش تضغطين عليه...؟؟
روحي لبيت اهلك ارتاحي الين ماتجي.الشغاله..وكل اسبوع مره وحده جيبي اختك للبيت تساعدك في التنظيف احمدي ربك انه مقدم شغاله وما قالك لا...يعني شي أحسن من لاشي..ولاتسالينه عنها كل شوي وتزعجينه هي وقت ماتجي يجيبها لك الله يهديك بس...واتمنى انك تنتبهين لنفسك بعد الولاده وحاولي ماتحملين...الين يكبرونك عيالك عشان ترتاحين وتتفرغين لزوجك.....تدلعي عليه وخليه يرتاح في بيتك...ترى الرجال مايحبون الحرمه الي تزن عليهم ..وينزعجون من الحمل والانجاب الي ورا بعض.. وخذي افكار حلوه تخليه ينجذب لك ويلبي كل طلباتك وانا بصراحه ماني شايفه اي خلل في حياتك لاقبل ولا بعد الزواج بس انتي الله يهديك متشاؤمه وحساسه بزياده لفي على هالقسم وشوفي المشاكل الي يشيب لها الراس صدقيني بتهون عندك مشكلتك.. واحسني الظن في زوجته...دام انها ماتعرضت لك ولا اهانتك..انتي بيدك تقدرين تخلين حياتك من احسن مايكون.. |
اقتباس:
|
مالي الا اني ادعي لك بصلاح حالك والسعادة
الله يصلح حالك ويسعدك ويتمم لك حملك على خير يارب |
| الساعة الآن 11:13 PM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©