|
ماذا أفعل لو رأيتها
السلام عليكم ورحمة الله
اللي باقوله ماهي مشكلة بكثر ماهي استشارة معطيات الاستشارة <<<<<< داخلة امتحان رياضيات :) انا حديثة الزواج برجل منفصل اجتماعيا عن زوجته التي له منها بنتان وقد كان بينهما طلقتان واول ما تزوجنا سافرنا على لندن لدراسة زوجي وبناته ما عرفوا انه تزوج رسمي الا قبل اسابيع تقريبا وهم عايشين مع امه حاليا - يعني اذا زوجي خلص دراسته بيعيشون عندي- ان شاء الله الاسبوع المقبل سنعود الى الكويت لمدة 3 اسابيع فيه اشياء وافكار براسي وايد 1. لو لا قدر الله زوجته الاولى تبي ترجع له وقالت انها راح تتعدل وتصير سنعة شنو التصرف الصحيح اللي اسويه؟ 2. اذا قررت انها تاخذ البنات؟ طبعا زوجي واهله مو عاجبتهم تربية زوجته ولا اهلها عشان جذي ماخذين البنات؟ 3. اذا صادف اني شفتها شلون اتصرف؟ 4. شلون اخلي زوجي يتقرب لي اكثر بهالفترة؟ 5. شلون اكسب بناته؟ زواجهم استمر 9 سنوات تقريبا،، اعتقد اكيد العشرة لها دور في استمالة زوجي لها مع انه لا هو ولا اهله يبونها ترجع له،،، لانه حاول فيها اكثر من مرة قبل لا يتزوج بس راكبة راسها وعلى قولة امه :" ما تبي الستر" نصحوني افيدوني بارك الله فيكم |
هو انتي لما اتجوزتيه ماعرفتيش هو ناوي على ايه معاها ولو طلبت الرجوع هيعمل ايه معاها؟؟
وكمان ميلة القلبي مش واضح ؟؟ |
مشكورة اختي حلواية على مرورج
هو قالي ان ماراح يرجعها لان على قولته ما تنفع ام وقالي هالكلام وامه قبله اكدت لي هالكلام وسالته قلت له لم طلبت انها ترجع شنو راح تكون ردة فعلك اول شي قالي : " تو لييت" يعني طلبها متاخر جدا وبعدين قالي لا تفتحين علينا ابواب ولكل حادث حديث وهو مقرر ان اذا كبروا البنات يطلقها الطلقة الثالثة وكمان ميلة القلبي مش واضح ؟؟ سامحيني ما فهمت هالجملة وبارك الله فيج |
يعني هو هيجيب لنفسه وجع الدماغ ليه لو مرتاح معاكي ،،
الا لو هو بيحبها وبيحنلها بس بيكره عمايلها ،، ده اللي اقصده بالميل القلبي |
ياقلبي عليك يا موهوبتنا :d.
يحق لك التفكير والقلق.. بس لايكون الموضوع هذا ياخذ كل حيز من تفكيرك.. نبدي خطوة خطوة بعدين انبهك على شغله.. اقتباس:
4. شلون اخلي زوجي يتقرب لي اكثر بهالفترة؟ أنتي الان توك مالك اربع شهور.. متزوجة يعني مابعد تمكنتي من وجودك في قلبه.. بقولك شغله.. أنا أول ماتزوجت حطيت لزوجي الشمس بيد والقمر بيد.. مريحته على الاخر وبنفس الوقت كنت ابين له انه شخصيتي قويه مع الناس بطريقة غير مباشره.. ماعمري تخانقت معاه.. وإذا صار موقف غلط منه تجاهي أبين له انك غلط وانا عديتها وبنفس الوقت أضحك معاه واتغشمر. أتنازل عن أشياء كثيرة عشان ما أظايقه.. هذا غير التدليع أدلعه.. هو أكشخه.. أنا مهتمة بنفسي ومهتمة بالتغيير.. رافعتله راية أهم شي بالنسبة لي سعادتك. ألييييييييييين ما تمكنت من قلبه.. وعرفت غلاوتي عنده .. وأنه لايمكن يقدر يعيش بدوني. بديت أعيش حياتي معاه كجزء من اهتمامي مو محور حياتي كلها. .. صارت كل طلباتي مجابه.. مو طلباتي هو الحين لو عرف اني ودي بشغله معينه يفاجأني فيها قبل لا أطلبها. الان هو صار لي أكثر من اللي أنا كنت أبيه. والحمد لله على تمام النعمة.. فأنتي شوفي هو شنو يحب وتفنني فيه.. الاكل طريقة تقديمك له..اللبس .. الاهتمام.. المساج.. الاجواء الرومانسية.. ولا تبدين أي ظيق أو عتاب تجاهه لو ماعجبك ردة فعله . يعني مثلا سويتي له مفاجأة وكانت ردة فعله باردة عادي لاتتحطمين ولا تزعلين ولا تعاتبين.. لا أستمري أستمري أستمري. ألين مايتعود على طريقة الحياة معاك ومايشوف منك الا كل اللي يرضيه. فياعزيزتي.. تحتاجين وقت طويييييييييييل عشان تاخذين اهتمامه فيك وتقربه منك طول عمره مو بس بفترة معينه. يعني القاعدة: خلي زوجك أول زواجك هو محور حياتك .. وبعد ما تتمكنين من قلبه خليه جزء منها. |
بالنسبة لطليقته حاولي قدر الامكان ما تقابليها واذا حصل خليكي معاها رسمية . بس بوجه مفرود وبدون كشره :)
بالنسبة للبنات مافي غير انك تتحملي تصرفاتهم مهما كانت واذا تشوفي شي يحتاج تنبيه تبلغي زوجك عنه وهو يتصرف .. ويتصرف بدون ما يعرفوا انك انت اللي بلغتي عنهم ... يأخر تأديبهم الى أن يشوف بنفسه أو يقول لهم انه جدتهم أو عمتهم اللي قالت انكم سويتوا كذي وهذا ما يرضيني ... ولا تبلغي الا عن الاشياء الكبيرة .. حاولي تتغاضي وتسامحي وتحلي لهم مشاكلهم على قد ما تقدري . حلو انهم عند جدتهم قبل زواجك .. يعني مالك خص ببعدهم عن أمهم .. لا تنتقديها بأي كلمة أمامهم حتى لو هم انتقدوها . بالنسبة للزيارة هذي عليك بالهدايا .. الله الله بالهدايا السنعة :) زوجك تكسبيه بحسن تعاملك مع البنات وبقلة النكد والغيره بخصوص زوجته.. وأختنا أحلاهم ما قصرت :) بالتوفيق |
ما اعتقد ان يحن لها لان قعد سنة قبل لا يتزوجني وهي في بيت اهلها
واعتقد لو كان يحن لها جان صبر عليها وما تزوج بس اعتقد هو عايفها حبيبتي احلاهم الله ييسر لج كل عسير ويفتح عليج وينولج كل اللي ببالج النقطة الاولى هو قالي لا تستبقين الاحداث - واحس من ثنايا حديثه ان خلج واثقة فيني وبنفسج- 2. الحمدلله مبينة له هالشي وهو حاس ومتاكد منه بانط على النقطة الرابعة انا حاليا ما عندي شي وفاضية عشان جذي هو محور حياتي وحتى هو ما عنده شي غير الدراسة وانا ومخليته انه هو القائد والرائد في حياتنا الزوجية وتقريبا تقريبا اسوي مثل ما سويتي ومبينة له ان سعادتك هي سبب حياتي - بما ان احنا تونا في بداية الزواج وبما ان في لندن ما عندي شي غيره بس مثل ما قلتي المسالة يبي لها وقت كبير يعني اكيد 4 شهور ما تقارن ب 9 سنوات يزاج الله كل خير حبيبتي والله يوفقج |
اقتباس:
هي طلعيها من حياتك.. أنا أقصد من كلامي انه خليك فترة طويييييييييييله مايشوف منك الا كل خير وزيادة.. والعيبه لا تطلع منك حتى لو هو الغلطان.. كل هذا عشان انتي تتمكنين من قلبه.. مو عشان كان متزوج!!! أنا لما تزوجت قعدت 3 سنين كنت له الكل بالكل.. ولا كنت أزعل ولا اعاتب ولا أنكد عليه على الرغم كان فيه تصرفات تظايقني منه.. وكنت أعطيه أكثر من اللي أخذه.. أو بمعنى أصح ما كنت أخذ شي. :23: اما الحين لا صار هو يعطي وانا أعطي ويمكن الحين صار هو يعطي أكثر..:d انتي بس يبيلك شوي صبر واخلاص وطولة بال وربي يوفقك وين ماكنتي |
[QUOTE=موهبة الكويت;2601642]
1. لو لا قدر الله زوجته الاولى تبي ترجع له وقالت انها راح تتعدل وتصير سنعة شنو التصرف الصحيح اللي اسويه؟ هل تكرهين رجعتها لهذه الدرجه !! انا اريد وانت تريد والله يفعل ما يريد 00 والله يكتب لك ولها ولزوجك وبناتها مافيه الخير00 2. اذا قررت انها تاخذ البنات؟ طبعا زوجي واهله مو عاجبتهم تربية زوجته ولا اهلها عشان جذي ماخذين البنات؟ تعجبهم او لا تعجبهم 00 هي امهم 00لها من الحق الكثيييير 3. اذا صادف اني شفتها شلون اتصرف؟ تصرفي بما يرضي ربك 4. شلون اخلي زوجي يتقرب لي اكثر بهالفترة؟ بتاخذين الجو كله يعني 000 وكلي امرك لخالقك 00والله لوكان زوجك حابها ورايدها 00 ما رده شئ عنها 00كبري عقلك 5. شلون اكسب بناته؟ عامليهم بما يرضي ربك 00 والله هو الهادي ومقلب القلوب سبحانه QUOTE] الله يريح بالك |
مشكورة حبيبتي بيتا على نصايحج
يعني قصدج لو قابلتها بالصدفة ابتسم بوجهها؟؟؟ الله يصبر قلبي وانا هالسفرة شريت لهم هدايا وايد - احس نقطة زوجي في بناته- مشكورة حبيبتي وراح اسوي اللي قلتي عليه يا قلبي يا احلاهم الله يصبرج علي الحين فهمت الله يقدرني اني اعمل بوصيتج بارك الله فيج |
يزاج الله خير اختي شقردية على ردج
انا ما قلت اني اكره رجعتها بس اسال شلون اتصرف لو قالت له بارجع لك وسؤالي لو شفتها اقصد فيه بكيفية الطريقة اللي ترضي ربي هل لو جات بيتنا - بيت اهل زوجي- اكمل الجلسة معاها والا ابتسم في وجهها بعد التسليم عليها وامشي والا كيف؟؟ مشكورة حبيبتي وراح احط الله امام عيني دائما ذكرك الله الشهادة كما ذكرتني به |
حيا الله موهبة الكويت ..
سؤال قبل ما أكتب ردي : تقولين ( منفصل عنها اجتماعيا ) >> يعني هل على ذمته الحين ؟ وبالنسبة لتساؤلاتك عزيزتي : ابتداء أقولك ماشاء الله من معرفتي فيك ( نتيا ) :d إنت واثقة من نفسك ( وهذه نقطة مهمة في الحياة الزوجية ) وانت أهل إن زوجك يحبك موت وتغنينه عن غيرك .. ونجي الحين لاسفساراتك : لو لا قدر الله زوجته الاولى تبي ترجع له وقالت انها راح تتعدل وتصير سنعة شنو التصرف الصحيح اللي اسويه؟ يمكن فيه إجابة مثالية على هالسؤال الي حتى أنا متعرضة لموقف زي كذا !! بالنسبة لي : راح أوافق أحس ما أقدر أكون سبب في حرمان العيال من أبوهم فضلا على إن ثقتي بتمكني من قلبه تجعلني أوافق على شئ مثل ذلك .. بالنسبة لك حقيقة ما أدري وش أقول لك ؟ لكن مثل ما قالوا الأخوات لا تستعجلين الأحداث وتفكرين في شئ غير موجود ويمكن ما يصير موجود أبدا مستقبلا فليه تفكرين فيه أصلا . 2. اذا قررت انها تاخذ البنات؟ طبعا زوجي واهله مو عاجبتهم تربية زوجته ولا اهلها عشان جذي ماخذين البنات؟ حبيبتي ما لك دخل بالبنات ياخذونهم أهل أبوهم تاخذهم أمهم هم يقررون ولا يكون لك يد بها الشئ أبد ! لو شاورك زوجك إنك تربيهم .. طبعا لا تردينه قولي له بناتك وفي عيوني .. 3. اذا صادف اني شفتها شلون اتصرف؟ عادي زي ما تقابلين أي وحدة في المناسبة .. بتحبينها من خدها وبتقولين لها شلونكم :d>> خلك على طبيعتك .. 4. شلون اخلي زوجي يتقرب لي اكثر بهالفترة؟ ما شاء الله رد أحلاهم يجنن >> الله يحفظها ما قصرت .. 5. شلون اكسب بناته؟ إذا كنت تخافين الله ما عليك بتكسبينهم بإذن الله >>> وإذا جوك البنات اكتبي موضوع بهالخصوص وبتجيك الخبرات متتالية وكثييييييييرة .. الله يطمن قلبك .. ويسخر لك زوجك .. ويحفظ بناته يا رب.. |
موهبه شلونك و شلون لندن معاك
1. لو لا قدر الله زوجته الاولى تبي ترجع له وقالت انها راح تتعدل وتصير سنعة شنو التصرف الصحيح اللي اسويه؟ الي الله كاتبه بيصير و كل واحد ياخذ نصيبه 2. اذا قررت انها تاخذ البنات؟ طبعا زوجي واهله مو عاجبتهم تربية زوجته ولا اهلها عشان جذي ماخذين البنات؟ اختي زوجك وزوجته ( الاولى) اقارب 3. اذا صادف اني شفتها شلون اتصرف؟ همممممممم اذا شفتيها ما اعرف احس انه الكل يطالع فيكم و يشوفو ردات فعلكم مثل ما قالت شيهانه سلمي عليها انت وزجك اقارب من اي درجه شكلها الزوجه الاولى تقرب لك كمان 4. شلون اخلي زوجي يتقرب لي اكثر بهالفترة؟ الصبح علريوق سويه البلاليط بلدهن و البيض وقيمر و عسل و كاهي اطبخي له المجبوس بانواعه و التشريبه و القبوط و المرقوق ومربين والربيان و انواع الاكلات الخاصه فيه و اهم شي مجبوس الزبيدي و الحلويات بنت الشيخ و القرص العقيلي و بيض القطا و اخيرا القهوه وشوفيه ما يعود يشوف غيرك ابد،،، جد الرجال اهم شي عندهم بطنهم خاصه مع الاكلات الشعبيه 5. شلون اكسب بناته؟ بناته عاد الصراحه الكويتيات فيهم دلع دلعيهم بزياده وهمه يحبوك اهتمي فيهم همه البنات يهتمو ويعجبهم يشوفو انه في احد مهتم فيهم اشتري لهم اكسسوارات و كم لبسه من بريطانيا يكشخون فيها مشطي شعورهم و حنيهم نقشات بايدهم و على رجلهم و اعملي جدول لكم كل يوم بمكان مع زوجك و البنات لانهم توهم صغار بس كسروا خاطري البنات محرومات من امهم |
اقتباس:
تدرين عاد زوجي مطلق وعنده ولدين وعايشين مع امهم ... ودايم افكر بالاسئله اللي كتبتيهاا بالذاااااااااات لو صادفتها يوووم ..؟ وان شاء الله مااشوفهاا . وكنت اقول لو جابهم عادي وغلاتهم من غلاة ابوهم .. وقالت لي وحده والله وش ماتسوين من طيب معاهم اسمك مرة اب .. قلت لها اذا بسوي طيب بسويه لله مو عشان مدح احد وكمان بسويه لان اخلاقي تملي علي هالتصرف .. بالناسبه بقولك موقف طريف .. كنت افكر بشكل طليقته وهل ممكن اصادفها وانا ماادري اقصد بالمناسبات العامه .. فسالته :d قال ليش طيب ..؟ قلت افرض تصادفنا وعرفتي . اجل اقعد انا زي الاطرش بالزفه ... فقام يوصف بشكل عام .. قال طويله وووو الين وصل وقال جميييييييييييييييييييييييييييييله ورفع حواجبه فوق .. وتحضر شياطيني كلها قلت خلاص عاد انت تبغى تقهرني :( قال لا والله وضحك وقال انتي اللي سالتي .. بس والله اكرها ومااحب الا انتي ... حسيت وقتها اني غبيه هههههههههه |
مشكورة يا قلبي شيهانة على مرورج
ومشكورة على شهادتج فيني اتمنى اني اكون قد المقام بالنسبة لسؤالج هو من زمان مطلقها طلقتين وراجعها والحين هي قانونا وشرعا على ذمته بس من قبل لا يتزوجني بسنة وهي في بيت اهلها وبالنسبة للنقطة الثانية اللي اقصده هي لو قررت تاخذ البنات اكيد بتكون هزة عنيفة لزوجي واهله وطبعا الاوضاع راح تكون حساسة وانا كوني زوجة زوجي لابد ان يجيني الطشار فكيف اتصرف ومشكورة ويزاج الله كل خير واقر عينج بشوفة عيالج عاجلا غير اجل ياذا الجلال والاكرام ...................... هلا بج اختي الغربة مرة والله لندن حلوة بس الشوق ذابحني على اهلي زوجي ليس قريب لطليقته ابدا وليس قريب وانا مو قريب لزوجته كل واحد بوادي والله والله ضحكتيني على الريوق وقرص العقيلي الحمدلله انا شاطرة بالطبخ الكويتي الاصيل <<<<<<<<<<<<<< بس هذا تخصصي ما اعرف سوالف ستيكات ولازانيات بالنسبة لبناته والله افكارج حلوة ماشاء الله انا شريت لهم هدايا بس مو اكسسوارات وملابس لا شريت لهم العاب من مركز التعليم المبكر كلها تصنع بالايد يعني الطفل هو اللي يصنع لعبته بنفسه ويزاج الله كل خير وفتح الله عليج وين ما كنتي لا تنسينا بدعواتج اختي احلاهم للاسف لي الحين ما جربت الزبيدي اخر شي سويته - وهو اليوم - مرقة الربيان مع عيش المشخول والحمدلله طلعت اوكي سؤال اخر بنته العودة تدرس بالابتدائي هل اساعدها في حل الواجبات والا اشلون لان طبعا الحين جدتها هي تسوي كل شي بس كون وضعي جديد هل اقوم بهذا الشي والا يتعبر تطفل مني بارك الله فيكم |
هلا فيج حبيبتي لا تظلمونه
مااتوقع يرجعها تسع سنوات صح عشره لكن كيف كانت حياته؟ العبره بالكيف لا بالكم بالضبط هذا اللي اظنه واجزم به هم حياتهم قبل مجيء الابناء حلوة ( اعتقد مثل حياتي معه الحين) بس من الله رزقهم بالبنات وهي شايلة يدها من المسئولية ما ينامون الا على الفجر معاها والبنت اللي بالمدرسة تروح المدرسة وهي سهرانه ومو كاتبه واجباتها ودائما تضرب البنات هالتصرفات خلت زوجي يطلقها انا قلت هالكلام عشان تكونون معي بالصورة وعلى رايج مهما سويت باظل مرة الابو وهم بيظلون سندريلا بس مثل ما ذكرتي انا لو باسوي شي باسويه لله عشان ما يخيب ظني فيهم بارك الله فيج حبيبتي |
حيالله موهبة الكويت نصيحتي لك لاتجيبين طاريها عند زوجك ابدا لابخير ولابشر
اذا بتكسبين زوجك حطي بناته في عيونك وشيليهم من الارض شيل واخلصي النيه لله عشان الاجر حاولي بقدر الامكان ماتتقابلي مع زوجته نهائيا اذا تقابلتي اكيد لاتبتسمين لان العيون عليكم ولو ابتسمتي وش يعني بيفهمون او بتفهم زوجته خليك عاديه كانها حرمه غريبه لاتعرفينها ولاتعرفك وتوقعي انها ماتسلم عليك هذا اللي يحضرني |
يا حبيبتي يا موهبه
يا اختي متعاقبه عقاب من اول الزواج و استلموني الاولاد سبحان الله ما يحبو الاكل الخواجاتي اكل كله بيتي :29: وتقليدي :18: اقتباس:
بس مع الاسف ما تمشي مع التربيه الاستهلاكيه انه اصنع بايدك هذه كل قطعه بتلاقيها بمكان اساليني هذه تطلع بلجينات العربيه حتى لو ولدو وما شافو العرب كيف عايشين عموما ممكن هذه تاخذاجازتك كلها معاهم بلنسبه لحلا لواجبات ما اعرف شوفي همه نظامهم يعني انت رايحه 3 اسابيع ما مطوله و اغلب وقتهم بلمدارس يمكن حماتك بتتسلى بتدريس حفيدتها و شاغله فراغها معاها |
مشكورة حبيبتي ادمنتك على مرورج
يعني انتي تنصحيني اني اهتم في بناته وايد وايد انزين اشرايج باللي تقول مهما سويتي بتظلين مرة الاب؟؟؟ واذا صادفتها تنصحيني ما ابتسم؟؟؟ ليش؟؟ ومرة اخرى مشكورة على مرورج حبيبتي مشكورة يا غربة عسى الله ييسر لج كل عسير انا الحين شريت وخلصت وسفرتنا الجمعة باذن الله بالكويت باذن الله اشتري لهم الاكسسوارات وسوالف البنات بارك الله فيج .............................. |
اقتباس:
الله يريح بالك ويطمنك ان شاء الله |
اقتباس:
والقصص والمسلسلات شوهة هالشئ بزياده . وانتي ماراح تفرق معاك قالوا مرة اب او لا .. الواحد يخلص النيه لربه .. لو عندك جيران طبيعي بتحسنين التعامل معاهم .. فما بالك ببنات زوجك واخوات عيالك ان شاء الله.. |
اقتباس:
|
حبيبتي لا تظلمونه اي نعم انا باسويه اللي باسويه لله
الواحد بهالدنيا يادوب يلقط له حسنات بارك الله فيج ............................. حبيبتي بيتا الله يفرج عليج دنيا وآخرة ومشكورة على دعواتج الطيبة |
[QUOTE=موهبة الكويت;2601889]مشكورة حبيبتي ادمنتك على مرورج
يعني انتي تنصحيني اني اهتم في بناته وايد وايد انزين اشرايج باللي تقول مهما سويتي بتظلين مرة الاب؟؟؟ على الاقل سويتي اللي عليك يقولوا اللي يقولوا رضا الناس غايه لاتدرك واذا صادفتها تنصحيني ما ابتسم؟؟؟ ليش؟؟ لانك ماخذه زوجها واذا ابتسمتي اش يعني بتفهم من ابتسامتك اكيد بتعتبرك عدوه واذا ابتسمتي كانك تبغي تقهريها ومرة اخرى مشكورة على مرورج حبيبتي العفو اهم نصيحه لاتجيبين طاريها عند زوجك لابخير ولابشر احترامي لك |
يزاج الله كل خير اختي ادمنتك
دعواتكم لي الله يسخر لي زوجي ويسخرني له ويبعد عنا الشر انا الحين في طريقي للكويت |
اقتباس:
عسى الله يوفقك ويصخر لك زوجك امييييييييين بالتوفيق |
اشكرك كل الشكر اختي حواء
|
الحمد لله على سلامتك
قرة عينك شوفة الوالده و الكويت ها بشري شلون الاوضاع |
جزاج الله خير اختي الغربة مرة
والله الأوضاع الى الان جديدة علي خصوصا مع البنات ( بنات زوجي) ما اعرف أتعامل مع الاطفال بس بفضل من الله زوجي معاي عالخط وينصحني ومرة قعدت مع امه قلت لها عطيني نصايحج في التعامل معاهم ويزاها الله خير انصحتني اللي اشعر فيه الحين ان الوضع جديد. ولابد من وقت للتأقلم دعواتكم لي |
اقتباس:
صدقيني اذا أحتسبتي أمرك لله ربي بيعينك.. أنا أعرف وحدة طلقها زوجها.. ورمت عيالها عليه..وبعد فترة تزوج.. الزوجة بالبداية تعبت خاصة من البنات.. الصغيرة اهون من الكبيرة.. يعني تقدرين تقولين الصغيرة فتحت عينها على مرت أبوها فبسرعة صارت تناديها ماما. الكبيرة شوي عنيدة وراسها يابس قالت لها أصلا انتي حرمة غريبة ومستحيل اناديك ماما أصلا أنا أمي وحدة.. حتى خاله ماراح أقولك خالتي!!!! ردت عليها : عادي حبيبتي اللي تبين تناديني فيه انا راضية. تبين تقولين ماما راح أفرح.. تبين تقولين خالتي بتحترميني. بتناديني باسمي بنكون صحبات .. اللي تبين أنا راضية.. طبعا شوي شوي سنة ورا سنة .. كلللللللللهم صاروا يحبونها.. لدرجة حتى تعاملها مع مدرساتهم كأنهم بناتها من لحمها ودمها.. لو تنقص وحدة منهم نص درجة تروح للمدرسة وتحاول فيهم يعيدون لهم الاختبار.. الحفلات هي اللي تسويها وتتكفل فيها..لبسهم من أكشخ مايكون.. وبنفس الوقت ماهي ضعيفة معاهم ماترضى بالغلط. لكن تعلمهم الصح بدون ماتنفرهم منها.. وحتى لما تسولف عنهم تقول بنتي فلانة طبعها غير عن ولدي فلان سبحان الله ولا كأنهم أخوان!! والبنت تكون بنت زوجها والولد تقصد ولدها او ولد زوجها. حتى بالشبه تقول ولدي الصغير نسسسسسخة من بنتي الكبيرة.. يعني باختصار كللللهم عيالها. بعدها جتها البنت الكبيرة قالت لها ممكن أقول لك شي بس ماتزعلين مني؟ قالت لها : قولي.. قالت : ممكن أناديك ماما؟؟ طبعا هي مرررررررررة فرحت.. وتقول لو ربي رزقني عيال بدون التجربه هذي يمكن ماكان تربوا عيالي بالمثالية والثقة والقوة اللي ربيتهم فيها الان.. كان صرت مثل اي ام يا تربي عيالها على الدلع وتسكت لهم على الغلط.. أو تربيهم على المثالية القاسية.. لكن تجربتها هذي علمتها شلون توجههم للصح بدون ماتعصب وتخانق مثل حالتنا:25:. |
يزاج الله خير احلاهم يا بعد عمري
الموضوع محتاج وقت حتى اكون امهم الله يعين ويقدرنا البنت الكبيرة متقبلتني اكثر من الصغيرة لانها فاهمة اما الصغيرة احس في بالها تساؤلات وايد اول يوم تسال انتي وين بتنامين؟ وشلون بتعيشين عندنا اما الكبيرة فاهمة أني زوجة أبوها وتحاول تصاحبني وجدتهم تقولي كسبي الكبيرة والصغيرة بتلحقها الله يعينا وييسر أمورنا واموركم |
الله يوفقك لما فيه الخير وييسر لك أمورك وحمدا لله على سلامتك |
الله يكون معاك أختي موهبة الكويت
و الحمد لله على سلامتك |
من كلامك واضح انك انسانه طيبه وتخافين الله وتبغين تكسبين زوجك وبناته واهله
مالي الا اني ادعوا لك بالتوفيق والسداد |
اختي ابتهاللطفي اشكر مرورج ومشكورة على الدعاء
غاليتي روح كنت انتظر مشاركتج ورايج بموضوعي بس عاذرتج مع اللي تمرين فيه من نفاس اختج ووحامج بارك الله فيج ومشكورة على الدعاء اخوي متزوج بارك الله فيك ومشكور على الدعاء |
مااعرف الله يعينك بس اعجبني رد المغتربه
|
اقتباس:
عفوا الغربه صعبه |
رد : ماذا أفعل لو رأيتها
يمنع رفع المواضيع القديمة |
| الساعة الآن 02:55 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©