|
محتاره زوجي يرفض السفر والخادمه معنا ...
" السلام عليكم ورحمته وبركاتهـ "
منتداي العزيز اعرض عليكم مشكلتي وانا متاكده أن شاء الله انكم بتساعدوني الي الا الله ثم انتم ... شوروا علي منذ ان ولدت طفلي الثاني عمره الان4 شهور وانا اود السفر لكني انحرمت منه بحكم ابني صغير ويحتاج الرضاعه الطبيعيه والعناية والسفر يعيق ذلك بالنسبة لي كما ان لدي طفله عمرها سنتين و9 اشهر ... وقد اضطر زوجي للسفر بدوني مرتين.. المهم الان نخطط لرحلة لخارج المملكه اقصد دولة الامارات العربية المتحده ( دبي ) وذلك في بداية الاجازة بعد اسبوعين لكن تفاجاءت اليوم انه يرفض اخذ خادمتي معي في السفر ويقول اتركيها سالته مالسبب: يقول ابي اخذ راحتي معك اولا. ثانيا: لااريد ان نأخذ فندق بغرفتين نظرا للتكلفة انتو عارفين دبي واسعارها . ثالثا والاهم : ان خادمتي باسم اخو زوجي يعني صعب تطلع من البلد من غير تصريح ... ارجوكم ابغى حل لمشكلتي اليوم لما تناقشت قلت له مستحيل اسافر بدون شغاله !!! كيف امسك بنتي وولدي بنتي مازلت صغيره وتبي لها :30: متابعه واهتمام ولاتنسى انها ترضع وتلبس حفاظ الله يكرمكم وابني :15: يريد من يحمله ويهزه ويرضعه ويعتني به ويغير له حفاظ فقال لي انا علي البنت:23: وانت عليك الولد :15: قلت له انسى اسافر بدون خادمه قال خلاص اتركي الصغار...:11: عند اجدادهم قلت له مستحيل اتركهم ولدي يرضع مني وبنتي ماستغني عنها مقدر انام بدون ماتكون عندي الله لايحرمني منهم قال : خلاص بسافر لحالي اجلسي مع عيالك:( ان الان في حيييرة من امري ابي رايكم اجلس مع عيالي واحرم نفسي السفر خاصة اني مضغوطه دوام وظيفه وتربية صغار واترك زوجي يسافر لوحده والا اروح مع زوجي بدون شغالتي واتلخبط معاهم تعرفون المولات والاسواق وكل الاماكن محتاجه احد يساعدني ... دمتم بسعادة وراحة بال ... |
وعليكم السلام ورحمة الله وبركاتهـ يااختي قرات مشاكل عدهـ هنا بسفر بعض الزواج وحدهم فلتعتبري منها .. ولاتحرمي نفسك فرصة التنزهـ مع زوجك والقرب منه خصوصاًمع ضغط الدوامات .. وإنشغالكم بأعمالكم وحتى لا يعتاد زوجك على السفر دوماً بدونك فقد سبق مرتين وهذه الثالثهـ وبصراااحهـ فعلا هي تقيدكم .. وستصبح كالرقيب عليكم فنصيحتي لك دعي شغالتك عند أهلك فرأيي سافري انتي وأطفالك .. واستمتعي بوقتك وهو سيساعدك وفي السوق ضعيهم في العربية ألإثنين < اعتقد لديك ويعني تقدري تدبري نفسك مو صعبهـ صح ستكون ممله نوعاً ما لكن تكوني بقرب زوجك وهو الأهم وحتى لايشعر زوجك على الأقل بإنشغالك عنه بأطفالك :: لا تحرمي نفسك من شان الشغالهـ |
يابنت الحلال كلام زوجك منطقي و انت بعد حطيتي الكلام اللي وافق هالمنطق
الخادمة مو باسمكم و لا بترتاحوا و بتكلف غرفة! عزيزتي انت امهم و لازم الأم تضحي شويااات و تتعب مافي امومة بدون راحة بالنسبة للولد الصغير الله يحفظه راح يكون اصلا نااايم اغلب الوقت و يدوخ من العربة و المشي في المول فماراح تحسي بتعب و بنتك الصغيرة ايضا خذو لها عربة او خذو عربة ام نفرين لتكفيهم اثنينهم و اي حركة و تعبث تقوم به ,,خلاص زوجك راح يساعدك باللي يقدر عليه في المولات تقدري تغيري حفائظهم و بعدين تعطي الصغير رضعته كل اربع ساعات لتتطمني انه ما يجوع او يتضايق و الحمامات و انت بكرامة هناك مريحة و مهيئة لتغير الحفائظ يعني خليك حركية و مرنة مو كل حاجة تصعبيها ,,راح تصعب انا سافرت من كم شهر دبي و عندي بنتي عمرها 4شهور و بنت الثانية سنتين و8شهور و ايضا بنت خمس و نص!! بدون خادة و الحمد لله من كثر الدوران و المشي بالمول و الحركة و اللعب يرجعو الفندق دايخيين و يناموا على طول.. خذي سريرين اطفال من الفندق اطلبيهم من خدمة الغرف و صدقيني بما انه زوجك قال بيساعدك ودق على صدره فثقي به و لاتروح عليك السفرة,, |
تبريرات زوجك وحلوله جدا منطقية وواقعية فعليك الاختيار بين أحدها
|
حبيبتى ارى انك مبالغة بالمشكلة ارى ان تسافرى مع زوجك وتاخذي اطفالك وهما فقط طفلين حتى لوكانوا صغارا ماالمشكلة وبالاخص ان زوجك اخبرك انه سيعتنى بواحد منهم وهل كل الامهات لديهن خادمات والله استغرب منكم يااهل الخليج انو من اهم الضروريات الخادمة لماذا امهاتنا تنجب 10 ابناء وامهاتنا تتعلم وتتوظف وتلبي طلباتنا وطلبات ازواجهن ووالله انك لا ترى ابتسامة تفارق وجوههن رغم هذا المجهود ماتحكولى حياتنا غير وحياتكو غير بالعكس حياتنا اصعب ومتطلبات اكثر اسفة اختى سامحينى تقبلي نقدى
|
اقتباس:
صدق ماعندك سالفة....الحين زوجك يبي ياخذ راحتة معك...وانت ملزمة على الشغالة... انا بسفراتي مااخذها معي ولاافكر مع ان ولدي متعب...بس ماعلية...وغير كذا نفوسهم قوية... انا بالصيفية اللي راحت سافرت دبي وكنت حامل ومعي ولدي .. ولافكرت اخذ معاي الشغالة....قرفانة منها بالبيت ......والحمداللة مشيت اموري.. خوذي لك عربية اللي تكون مزدوجة(يعني بكرسيين)وحطي الصغار فيها وتمشي عادي... ذكرتيني بوحدة شفتها من المطار معها اولاد تقريبا بعمر اولادك ولاكان معها شغالة بس ماشاللة عليها ماحرمت نفسها من السفرة... وهو كثر خيرة عرض عليك المساعدة ...يعني راح يتحمل هو الجزء الاصعب في الرحلة(مطارد الصغييرة) انت بس معك الصغير اللة يحفظهم لك...وبالعمر هذا بس يشرب رضعة وينام..... بس لاتنسين تاخذين معاك ادوية احتياط(فيني فوبيا من مرض الاطفال في السفر) واستمتعي يابنت....واللة يحفظكم وترجعون بالسلامة... |
من راي اختي المسداني
لا تضيعي عليك السفرة |
بالعكس بدون شغاله تاخذين راحتك شكلك ماشتهيتي تسافرين !!
بعدين ماوراك الا هالثنين لاغسيل ولا طبيخ وش عندك ! |
غريبين هالحريم!!
سبحان الله! |
اقتباس:
سافروا و روحوا غيروا جو في الحدايق و الأماكن اللي بينبسطوا فيها أطفالك و زوجك |
اقتباس:
|
يا أختي لاتضيعي السفره عليكي ولا تزعلي زوجك مشان الشغاله كلهم ولدين مو قادره عليهم عنجد غريب انا وزوجي من شهر رحنا ع دبي ومعنا ولدين بعمر الشقاوه 3 سنين وسنتان وبدون شغاله ولا شي وانبسطنا طبيعي جدا بعدين مو كل الناس عندهم شغالات شفنا في دبي اجانب بالهبل وكلهم مع اطفالهم بدون شغالات وكلهم سياحه جايين ومبوسيطين وبعدين ابنك الصغير ما اعتقد يغلب كثير لانه رح يكون معظم وقته نايم رووحي ولا تضيعي الفرصه عليكي وعشان ما يتحسس منك ويقول انك ما تفرق معك سعادته وانه هل همك الشغاله بعدين في نسوان تتمنى اشاره من زوجها انها تسافر معه وانتي ترفضي النعمه بعدين لا تتركي زوجك يسافر لدبي اااااه من دبي وما ادراك ما دبي بلاووي |
اقتباس:
|
لاتحرمين نفسك وزوجك الوناسه يقولك باخذ راحتي معك تقولين شغاله ترا الرجال تهمه راحته بدرجه الاولي اهتمي فيها دامه يبيك لاتصعبين الامور وتحرمينه عشان اطفال امرهم سهل
|
اقتباس:
|
انا رأيي تخلي الولد الصغير عند جدته ومعه الشغاله وتكون معكم البنت بس لأن الطفل بهالعمر ما تصلح له المشوره والتعب والرأي الاخر انك تاخذي الاثنين ولما تطلعون برى الاوتيل تطلبين جليسة اطفال للرضيع وبكذا يكون قريب منك ووقت التمشيه هو نايم وانتي مرتاحه ولو انا مكانك اخلي الاثنين اذا السفره بحدود خمسة ايام لأنهم كلهم صغار ومو فاهمين شي واروح وانبسط مع زوجي واتمشى وانام برواق لأنهم اذا كبروا شوي صعب تخلينهم لأنهم يفهمون |
ما قريت الردود
لكن البنت صغيره جدا ومو كويس تغير الجو عليها خليها عند جدتها مع الشغاله واستودعيها الله واحمدي الله ان جدتها موجوده والولد ممكن يسافر معاك مع انه رأيي تخلينهم كلهم صراحه لا تلومينه أنا أييد تريحين زوجك وانتي ترتاحين بعد دوشة الحمل والولادة والله يخليلك عيالك ما عليهم ان شاء الله العاطفه أحيانا مالها داعي واذا بتسافرين وبتقضينها بكاء وشوق لعيالك لا تسافرين |
صراااااااحة شكلك دلووووووعة حيل..
ياقلبي أنا أسافر وأستانس حتى لو معي البزران.. رحت بالصيف لدبي ومعي بنتي عمرها سنة و 9شهور والله ما تعبتني وعندي ولدي عمره 8شهور تركته عند الوالده..الله يخليها طبعاً كانت بنتي بالعربية وحنا بالمولات أو المنتزهات.. ونرجع البيت وتكووووون خلاص حدها دايخة وتبي تنام.. وكنا نخرج من بدري وماكان ودها تصحى..مع إنها كانت متعبتني بموضوع النوم في السعودية..لكن في الخارج الله يسعدها مثالية.. و تدرين بعد دورات المياة اللي بمولات دبي تفتح النفس والله إني أستانس وانا أغير لبنتي من زود النظافة والاهتمام.. لاتضيقين على نفسك سافري واستانسي وخلي البيبي الصغير عند أهلك والبنت خذيها بتستانس حيل.. والله يهنيكم ويسعدكم ويجعلها سفرة خير.. |
اقتباس:
الضنى غالي فلا تفرطي .. |
انا جربت ورحت دبي
قويت قلبي وقسيته وقررت اني انبسط مع زوجي واسترجع ايام شهر العسل والله اني انبسطت مووووت وغيرت جو وغيرت النفسية ورجعت لبيتي ولمسؤليتي بروح غيييييير غير اني انا وزوجي قربنا من بعض كثير اللي حصل اني تركت اطفالي عند امي الله يخليها ولايحرمني منها واحد منهم كان رضيع وياخذ صدري ، وامي عودته على الرضاعة صح تعبت معاه الله يجزاها الجنة بس والله السفرة تستاهل التعب وكنت في السفر ادخل دورات المياه في موعد الرضاعة واحلب صدري عشان لايجف الحليب السفرة كانت بحدود ستة ايام وتركت بنتي عمرها سنة و10 اشهر ماتفهم شي لسه صغيرة وماتدري وين الله حاطها عااادي قسيت قلبي وتحملت وعلى فكرة مو اول مرة اسويها ، سبق سويتها وسافرت مع زوجي وكان عندي بنوتة عمرها 6 اشهر ، والثانية عمرها سنتين وثلاث شهور نفس الشي قسيت قلبي ورحت والله اكلمك من واقع تجربة ، لاتخلي زوجك يحس انه اطفالك اخذوك منه لاتخليه يحس انه اطفالك اهم منه لاتخليه يحس انك مربية للاطفال وزوجة في المنزل ، لكنك لاتصلحي ان تكوني حبيبة ورفيقة درب لاتخليه يحس انه محتاج انثى تشاركه ادق تفاصيل حياته لاتخليه يحس انه فاقد انثى يعيش معاها لحظات الغرام والعشق المجنون والخلوة مع بعضهم من غير التزامات البيت والاطفال يناموا ويصحوا مع بعض ، ولو جا في بالهم فجأة يخرجوا مع الصباح بدري مايشيلوا هم الاطفال اللي نايمين كيف يتركوهم واذا اخذوهم ممكن ينكدوا لانهم ماشبعوا نوم و ...الخ من مشاكل الاطفال حبيبتي خليها سفرة شهر عسل لان اطفالك صغار ، وخلي السفرات العائلية لما يكبروا اطفالك ويفهموا ويصعب عليكي تتركيهم عند اجدادهم خذيها مني عن تجربة زوجك سبق وسافر لوحده معناه السفر عنده شي مهم الاولى عدت ، الثانية عدت ، صدقيني بعد كذه راح يحس انه محتاج انثى تشاركه كوني انتي هذه الانثى ولاتخلي زوجك محتاج شي الله يسعدكم ويهنيكم |
والله ياعمري لاتعتبر مشكله ولاحيره اظن انك كبرتي الموضوع البنت كبيره يعني سنتين ونص تمشي وعاادي الوضع او خليها عند اهلك ابد ماهي قضيه انا اخواتي كذا اذا فيها سفره الشغاله والاولاد عندنا في البيت وخذي بنتك بحكم انها صغيره لو انا مكانك الشغاله بخيلها لانه فعلا ماراح اخذ راحتي مع زوجي وانصح كل متزوجه لاتخلين زوجك يسافر لوحده نهائيا حتى لو فيه ثقه دام ماعنده مانع انك تروحي معاه خلي الشغاله والبنت عند اهلك لاتعقدين الموضوع روحي استانسي وانبسطي والله يرجعك بالسلامه ولا هذا الزمن الواحد يرفض سفره ووناسه00تحيااااتي
|
كلام زوجك سليم ونظرته صحيحة وانا من النوع الذي اكره اصحاب الشغالة معاي مهما كان الاطفال اوكنت حامل المهم لاتذهب معنا
فهي هم من حيث السكن والأكل ومراقبتها لكل تصرفاتكم وقد يدخل الغيرة الى قلبها فهي انسانة ومحرومة من هالأشياء وبالنسبة للأطفال ماقصر زوجك بيساعدك في البنت والولد خلي معاك عربية وممكن تأخذي عربية ذو مقعدين والرضاعة الطبيعة اسهل بكثير من الصناعية بسهولة توفرها ونظافتها وانا مجربتها في السفر روحي ولاتضعي الفرصة |
أسألك بالله العلي العظيم:
هل أنتِ مقتنعة بذهاب الخادمة معكم؟! دعينا نأخذ عيوب ذهابها: 1)تضييق الخناق عليكم في الحركة. 2)تكميم الحرية. 3)زيادة المصاريف المادية. 4)الحرج أمامها من فعل أي شيء. مثلاً: لو أردتِ أن تمسكي يد زوجك فلن تستطيعي أمامها... 5)حرمانكم من فعل أي شيء. ::: دعي التعقيد وتحميل الأمر أكثر مما يحتمل كلام زوجك صحيح 100% إما أن تذهبي بالأولاد معكم فهو يقود العربية وأنتِ احضني الطفل الصغير. أو اجعلي الطفل الأكبر يجلس عند جدته. أو اجعليهم كلهم يجلسون عند جدتهم. ::: سافري يا رعاك الله مع الرجل، واستمتعوا هناك فالطقس جميل. وإن اردتم معرفة أماكن سياحية سوف نساعدكم... ::: ملاحظة: إذا كثرت أعذار المرأة للرجل فإنه ينصرف عنها. |
اقتباس:
احلى كلام قريته... طبقيه وماراح تندمي هذا اللي اسويه انا بسفراتي ورحله سعيده ان شاء الله |
مرحبا..
من كلامك يتضح انك غير قادره على العناية بأطفالك ورعايتهم. حتى لو كانت ايام معدوده مع ان زوجك عرض عليك المساعده. وواضح انك تعتمدين على الشغالة بكل شي حتى برعايتة اطفالك .. الله يكون بعون زوجك وبعونك وبعون شغالتكم .. |
اختي طفوله 00
عيش حياتك بكل دقائقها وبكل ظروفها واهم عليك رضى زوجك - فهو عقلاني جدا تقدرين تجعلي السفره استجماااام فقط - بما أن الحمل ثقيل عليك بوجود الطفلين واذكرك - اسعدي زوجك في هالسفره و ليكن همك أن ترضيه وتريحي باله ولو تضعي برناحج لكم خاص كل يوم ولو لمده ساعه - بعد ما تنيمي اطفالكم لكي لا يستغني عنك في السفرات القادمه الله ييسر امركم - ورحله سعيده |
اقتباس:
لكن أختي حبيت أنبه لفظ الجلالة يكتب هكذا الله هل هناك فرق بين كتابة الله و اللة |
اقتباس:
انا والله لم اكن عامله ماجبت الشغاله ولاشئ بالعكس انا من النوع اللي احب اطفالي دايم بجنبي حتى في النوم الاثنين انومهم عندي والله ولااستطيع تركهم باي صورة من الصور .. صحيح كلامك امهاتنا كانوا يجيبون 10 ابناء وتحملو اكثرمنا الله يحلنا منهم ويقدرنا على برهم ... بالعكس خيتو اتقبل رأيك .. سررت بتواجدك متصفحي:d |
سافري وغيري جو مع زوجك واطفالك
وفرصة تخلي زوجك يتعلم يتحمل المسئولية معاكي الصراحة فرصة ما تعوض الله يهديكي لا تضيعيها من يدينك |
كلام زوجك منطقي
اختي لاتفتحي لزوجك باب السفر بدونك اعتبري من غيرك ايش صار معاهم انا لو مكانك اخذ معي بس الي يرضع واترك الثاني عند اهلي انا مارح اغيب سنه |
واضح ياقلبي انك مرتبطة باطفالك ومتعلقة فيهم على حساب زوجك
بدليل انك تقولي حتى النوم يناموا معاك المفروض لهم غرفتهم حبيبتي زوجك من حقه ينبسط معاكي لاتخليه ياخذ فكرة عنك انك بمجرد انجاب الاطفال اصبحت مربية اطفال ولم تعودي انثى له حبيبتي هذه السفرة فرصة انك تغيري نظرته عنك ، خلي اطفالك عند اهلك وروحي معاه ، جددي ايام شهر العسل خذيها نصيحة من وحدة تهمها مصلحتك ترى ماراح يصير الا اللي ربي كاتبه ومو انتي اللي تمنعي عنهم الخطر ، ربك اللي يحميهم والطفل الرضيع ترى متعب في السفر تدري ليه؟ لانه مسكين هو راح يتعب من الروحة والجية وماراح يتهنى في نومه ، السفر متعب للاطفال الرضع اسمعي مني والله يوم اسافر لاهلي مدة اربعه ساعات بالسيارة اني اشوف الويل معاهم قلبي يتقطع لانهم تعبانين ومو قادرة اريحهم استخيري والله يختار لك الافضل |
:d:d
اقتباس:
|
اقتباس:
ربنا يسعدك ويسلمك حبيبتي |
اقتباس:
يعطيك العافيه راح اعمل بنصيحتها ... |
اقتباس:
مومشكلة الغسيل والطبيخ ياااختي المشكلة في الرضيع رااااحمته ... بنفس الووقت مقدر اتركهم ولاقدر اترك زوجي يسافر لوحده ... لكن شكلي بسافر واتوكل على الله |
اقتباس:
ماغريب الا الشيطان انا مدري ليش مستغربين اكثر الاعضاء وعلى بالهم السالفه دلع او قلة تحمل مسؤليه يمكن عشاني دقيقه واهتم باطفالي كثييير موعارفة اتركهم ولاودي اقصر بحقهم .. اخواني واخواتي هذولا اطفالي وبرقبتي لو يصير فيهم شئ وترى هم امانة في اعناقنا يعني اللي يقول اتركيهم وانتي استانسي كيييف ارتاح وهم بعيدين عني ؟؟ |
اقتباس:
شاكره لك ملاحظتك |
اقتباس:
والله يسعدنا ويقدرني على اسعاده وحفظه... شاكره لك حبيبتي |
اقتباس:
جزااك الله خير حبيبتي |
اقتباس:
شاكره لك نصيحتك والاختلاف في الراي لايفسد للود قضية بتوكل على ربي والله يعاونني وهو اعلم بنيتي اني اريد مصلحة زوجي وابناءي بنفس الوقت حتى لوكانت على حساب سعاادتي وراااحتي,, باخذ الامور بروح رياضيه وانسى انه عندي شغاله بالاساس ويعتمد على نفسي وربك يعيييين ودي وتقديري لكِ |
| الساعة الآن 07:59 AM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©