|
مأساتي الزوجية مع زوجي الحنون
[السلام عليكم ورحمه الله وبركاته
راح اطول عليكم شوي بموضوعي انا متزوجه من سنتين وشوي المهم انا مااحب المنتديات بس زوجي سجلني مع اني مااعرف اي شي فيها امس عرفت انه مسجل بنفس المنتدى وشفت مواضيعه والله انصدمت من كلامه ورده واكيد راح يقراء موضوعي المهم هو كاتب عني كلام بس مادح نفسه كثير ابوجوري انسان مافي زيه طيب وحنون بس كلامه جرحني بالمنتدى وربي يعلم بكل شي بس من يوم ماتزوجت ماعمره دخل عليه هديه لو بالكذب ولو طلبت منه شي يقول طيب لاكن بس كلام في ولادتي الاولى شهر فيني انه خسر حق الولاده طيب وحنون لاكن وش اقول صح اني عصبيه بس هو يضربني دايم لكذا ماكنت احترمه كانت حياتي ضرب وسب لااهلي الوحده تتمنى تتزوج وترتاح موتتهان تخرج من عند اهلها معززه مكرمه وتروح تنذل فبيت زوجها يارب والله اتمنى يدخل عليه بشي يفرحني ويزعل لو بعت من ذهبي في بدايه زواجنا كنت اطلب اهلي ومايقصرو والحين ابيع من ذهبي علشان خاطره لنفسي والحرمه تحتاج كل شي بالمعقول مكياج عطور ملابس لها ولبنتها والحين جاي البيبي الثاني وربنا يعين ويهديه ويهديني ويوفقنا ويخلينا ونربي عيالنا اليوم عرفت انا اللي فيه اغلاط يحطها بغيره وهو ملاك والمنتدى يسمع من طرف واحد ويرد ومو عارفين شي ومافي احد كامل والكمال لله الله يعطيكم العافيه واسفه ع الاطاله سامحوني وادعولي انا وزوجي] |
أبدا ما طولتي :) وأهلا فيكي بالمنتدى :)
ما أدافع عن أحد معين لاني بصراحة ما عرفت زوجك وبالتالي ما قدرت أشوف المشاركات اللي تكلمتي عنها .. لكن بالعموم أغلب الناس تميل لترجيح كفتها عند طرح أي مشكلة وتطرح الموضوع من زوايتها فقط ..لهذا فأنا أشجعك على دخول المنتدى باستمرار والاستفادة منه ... وان لم يكن لدى زوجك مانع بأن تطرحي مشاكلك أو على الاقل تشاركي بطرح وجهة النظر الاخرى في مواضيع زوجك ...وكلنا اذان صاغية واسمحي لنا ان حكمنا أي حكم غير عادل فنحن انما نعطي رأينا بما هو مكتوب بالطرح ولا نعلم بالغيب وربما يكون حكمنا اكثر عدلا ان دخلت وبينت وجهة نظرك وأكرر بعد موافقة زوجك ... نحب أن نجمع لا أن نفرق :) أرحب بك معنا عضوة دائمة ان شاء الله عزيزتي :) |
حيّاك الله ,, أختي وبيّاك ,, وأهلا ومرحبا ,, بزوجك الفاضل (أبوجوري) ..
أختي ,, في الحقيقة ,, لم يمرّ علي ,, هذا المعرّف (أبو جوري) ,, ولم أقرأ له مواضيع ,, أو مشاركات ,, ربّما لأنه ,, حديث الإلتحاق ,, بهذا المنتدى ,, أو لقلّة مشاركاته ... أمّا ما ذكره ,, الأخ أبو جوري (زوجك الكريم) :),, من صفات مدح ,, وثناء لنفسه ,, وما ذكره ,, من ظلم لكِ ,, ومدى إنحياز ,, بعض الأعضاء ,, لطرف دون آخر ,, فهذا برأيي ,, يعتمد على ,, ذمّة ,, وأمانة ,, ومصداقيّة ,, طارح الموضوع ,, ولا ملام على الأعضاء ,, حيثُ ليس لهم ,, إلا مانقله ,, صاحب المُشكلة ,, ولسنا في محكمة ,, لنطلب حضور ,, الطّرف الآخر :),, ونسمع منه .. يبقى علينا ,, كأعضاء ,, التحرّي ,, والتروّي ,, في طرح ,, ما بوسعنا ,, طرحه ,, من حلول ,, والنّظر ,, إلى جوانب المُشكلة ,, بشكل أوسع ,, والله الهادي ,, إلى سواء السبيل .. |
اهلا بيك اختي بانضمامك النا وان شاء الله ما راح تندمي بلعكس اكيد راح تصيري من المدمنين عليه صدقيني
اما بالنسبة للاجابات فانا اختي ارد على المشترك من خلال كلامه اللدي اعتبره صادق اما اداكان ملفق وغير صادق فيه فهادا راجع لضمير المشترك وربي يحاسبه بعدين |
اقتباس:
... العزيزة ( بيتا ) .. فديتج .. .. قلتي الا كنت أمبي أقوله .. .. تسلمين .. ويعطيج العافيه .. وما قصرتي .. :17: :22: معظم ردودك تعجبني .. .. |
إيه أنا اتذكر زوجك أبو جوري ومشكلته طيب زين إنك مالقيتي فيه عيب تذكريه غير إنه مايتذكرك بالهدايا ياريت عيوب الزوج تجي على قدر كذا بس كان كل الحريم في نعمه وين يجي عيب زوجك هذا جنب العيوب اللي نقراها عن الأزواج الثانين خيانات زوجيه وشرب خمر وترك صلاه وسهر بالاستراحات وسفر لدول فيها فساد الخ الخ الخ ياشيخي احمدي ربك وبوسي ايدك وش وظهر ترى النعمه زواله أما على الضرب فهذا شئ ماينسكت عليه لكن مادامك اعترفتي إنك عصبيه فإنتي تتحملي جزء من الغلط برضو |
عفرااا وينك غايبة اشتقنا لردودك
بس اسمحي لي اخالفك هالمرة ... الاخت الكريمة ماذكرت موضوع الهدايا بس.. قالت يهنيها و يسبها و اهلها و يضربها ... و مطلع حاله ملاك في مشكلته برايي مهما كان المفروض ماتوصل للسب و الضرب .. اهم شي الاحترام بين الزوجين.. و الزوج الي مايقدر يفرض احترامه بكلمته و شخصيته ماراح ينفع الضري و ياليته وداها لاهلها و لا هجرها عشان عصبيتها بدال ما يمد يده و يهنيها و يسب اهلها كمان على العموم يا اختي السائلة اعانك الله و ربي يهديهكم و يوفقكم مع بعض لا تعبتي على الاعضاء لاننا فعلا نسمع من طرف واحد و نستبق حسن النية و الصدق و الحيادية في السائل عند طرح مشكلته .. و بالنهاية اللي بيجمل نفسه على حساب غيره هو الخسران .. لانه ماراح يلقى الحل الصحيح لمشكلته .. الله يسعدكم |
اقتباس:
هلا والله بالغاليه أم يوسف تسلمين على السؤال حتى أنا اشتقت لكم بالحيل بالنسبه لردي على الأخت فأنا رديت بناء على معرفتي بمشاكلهم السابقه الأخ ابو جوري كان يشتكي في السابق من عدم احترامها لها ومن سلاطة لسانها يعني وحده تقول لزوجها انت لك عندي مهرك تاخذه على تراب جزمه قديمه اكيد ميه بالميه بيجيها منه كف هذه مايبغالها تحزير يعني اللي تبغى زوجها يحترمها ومايمد ايده عليها لازم تتعلم بالأول تحترمه وماتطول لسانها عليه لأنه فاقد الشئ لايعطيه |
طيب ممكن تحطي لنا روابط
الله يصلح ما بينكم |
اقتباس:
http://www.66n.com/forums/showthread...DE%CF%ED%E3%E5 |
السلام عليكم ورحمة الله وبركاته اسعدكم الله جميعاً يا اخواني في هذا الصرح وبصراحه انا مبسوط جداً ان ام جوري بدت تتعلم وبعدت تنزل مواضيع ومهما كتبت حكون صاحب قلب كبير و واسع صدر طبعاً يا اخواني المواضيع اللي كتبتها كلها اقبل اكثر من سنه والحمد لله الآن تعدل الوضع جداً , , وصارت زوجتي حرمه ثانيه تماماً اسأل الله انه يحميها ويخليها لي ولبنتها ,, كلي آذان صاغيه وكلي صدر رحب لما كتبتوه ولما ستكتبوه والآن راح احط المواضيع حقي كامله وام جوري لها حق التعديل اذا في شي غلط او شي انا كذبت فيه على قولها هذا رابط موضوع بتاريخ 28-09-2009 الموافق 8 / 10 / 1430 http://www.66n.com/forums/showthread.php?t=193540 وهذا الموضوع الثاني ان بتاريخ 15-01-2010 الموافق 29 / 1 / 1431 http://www.66n.com/forums/showthread.php?t=200214 انا مبسوط جداً ,, وهذي روابط المواضيع السابقه يمكن ام جوري قرت موضوع واحد , وابيها تقرى الموضوع الثاني وانتو لكم الحكم والنقد , وملاحظاتكم على راسي من فوق وياليت تحكمو بالحق واحمد الله انها كاتبه عنوان الموضوع , زوجي الحنون ومافي زيه , الله يحفظها لي يارب خطوه حلوه من أم جوري انها بدت تتعلم وتستفيد من اللي تتعلمه لانها طووول اليوم قاعده ع البلياردو تجمع نقاط , تجمع نقاط , وانا غاض الطرف بمزاجي , واقولها البلياردو مافيها فايده البلياردو شي سيئ حاولي تتعلمي شي يفيدك البلياردو مايصلح ياحبيبتي , خشي منتديات الاسره وتعلمي وقريت موضوع في المنتدى ان وحده من الاخوات تطلقت بسبب البلياردو الله لايوصلنا لها المواصيل واهلاً بها في هذا المنتدى الشامخ واشكر جميع الاخوان المشاركين في الموضوع :) وانا لي وقفة دفاع عن نفسي بس مو الحين :) والسلام عليكم ورحمة الله وبركاته |
اقتباس:
هاذي بس ناسية إسم صاحب الموضوع وأتوقع إني حتى أنا باقي ماسجلت في هاذا المنتدى بس كنت دائما من متصفحيه وأتمنى من الأخت عفراء إذا أنا أخطأت تذكرني وعموما أنا ماشفت أحد من الأعضاء قد سبق وقال لصاحب أي موضوع عنده مشكله مع زوجته قال له أضربها وسب أهلها وتكلم عليها يعني يا أختي الفاضله نحن هنا نسمع من طرف واحد فقط ونقول لصاحب الموضوع حلول لاكن ماننصح بخراب بيوت الناس أو تشتيت وتفريق وهدم حياة الناس فنحن هنا نريد الإصلاح وكل مانقوله ونكتبه سنحاسب عليه فإذا كان تصرفه كذا معاك فإعرفي بأنا نحن لاننصح ولانقبل مثل تلك التصرفات أبدا وإنا موحنا إللي نصحناه يتعامل معاك بهاذا الأسلوب لأن إللي مانرضاه لنا مانرضاه لغيرنا وأنا أتفق مع الأخت بيتا والأخت عفراء في كلامهم وأنتي الآن سجلتي ودخلتي في المنتدى فحياك الله يا أختي بيننا عضوة جديده وأكتبي لنا مشكلتك وأبشري كلنا آذان صاغية لسماعها وللأخذ والرد معاك فيها وبإذن الله سنصل وإياك إلى حل يريحك ويسعدك أنت وزوجك وماراح نبخل عليك بالمشوره والرأي السديد فإن هنا في هاذا المنتدى الرائع والراقي أعضاء وعضوات متعلمين ومثقفين وعندهم من العلم والمشورة خيرا كثيرا وإنهم أناس يخافون الله فيما يقولون نحسبهم كذلك والله حسيبهم وأني والله أرى نفسي لا أساوي نقطة في بحر من ما عندهم من فكر وأخلاق وأدب ويشهد الله إني أحبهم في الله لما لمسته منهم من صدق وإخلاص وأمانة في تقديم النصيحه ووضع الحلول وإنهم لايريدون شيئا من وراء ذلك إلا رضاء الله وفعل الخير وإصلاح الخلل أسأل الله أن يجمعنا بهم في جنات النعيم ويكتبنا في عليين . أختك في الله بنت الحكمي |
اقتباس:
حياك الله اختي ونورتي صفحة ام جوري وكلامك هذا اثلج صدري بصراحه والله يحفظك لكل اللي يحبونك |
مــــــــــــرحبا
صراحه احيي ام جوري وابو جوري ومااقول الا الله يسعدكم ويوفقكم دنيا واخره انا لما شفت الرابط قلت ان ام جوري يا ويلها ,لكن لما فتحت الصفحة التانيه ولقيت ان ابو جوري مبسوط من الخطوه اللي عملتها ام جوري وانها صارت معاه بالمنتدى فرحت كثير , وان دل يدل علا احترام الراي فيما بينهم عساهم كدا دايما قولوا ااااااااااااااااااااااااااااااااااااامين ونورتي ياام جوري اختك_ صمتي هوايه |
اقتباس:
حاولت أفتح الملفات ذبحتني الغبرة المكدسة عليهم :d ...أعاطس وانفي صارأحمر :30: قديييييييمة ومشكلة محلولة ..ليش فتح الجروح ؟؟؟؟ يا جماعة الخير ترى اذا قعدنا نفصل كل كلمة وكل تفاصيل بالمشكلة بتتعبوا وترجع المشاكل لا سمح الله .. زوجتك تمدح فيك وانت تمدح فيها ومشكلة قديمة وانحلت وتعلمتوا على طباع بعض ... أنا مو بصالح نفتش بالملفات نهائيا ...متأكدة بيكون في مآخذ على الزوج مثل ما أنا متأكدة بيكون في مآخذ على الزوجة ... المشاكل دائما يشترك بصناعتها الزوجين مع بعض مثلما يشتركوا بحلها مع بعض .... لكن اكبر غلط عدم نسيان الماضي واستمرار النبش فيه . حبيبتي أم جوري ... ربي يسعدك ويوفقك :) قرأت بعض أجزاء من الموضوعين ووجدت انه الاعضاء نصحوه بنصائح جيدة ونصحوه بالصبر وبالتواصل معك وبمحاولة التوصل للوفاق بينكم والتأقلم لانه كل زوجين جدد بيصير بينهم مشاكل شيء أكيد وطبيعي ... مشاكل ومحاولات للتأقلم بين الطرفين ودائما نتمنى انه الامر ينتهي نهاية سعيدة مثل ما حصل معكم .. خليكي معنا عزيزتي وشاركينا ... نحتاج ناس مجربة مثلك ..حكيمة وعاقلة تنصحي الازواج الجدد وتساعدي معنا وتكسبي ثواب ..وانسي العتاب واللي صار من سنين ..انتهينا منه وما نبي نسمع عنه أو نرجعله . |
سبحاااااااان الله..
مع احترامي لأم جوري وأبو جوري.. إلا أنني أتعجب من هذا الاسلوب.. إذا وصلتم إلى مرحلة تتفقون فيها على حل مشاكلكم وطرحها باسلوب راقي فلا داعي لطرحها لعامة أهل المنتدى ولو كان فيهم خير وصلاح ومشورة.. والله كلي عجب من هذه الأساليب أتعلمون انكم بهذه الطريقة ستشعلون النار بانفسكم.. أتظنون أنكم حينما يكتب كل منكم سلبيات رفيقه وشريك حياته بهذه الطريقة ستتوصلون لحلول لمشاكلكم.. بصراحة أنتم الآن خطوتم وللأسف خطوات للخلف.. لأن النفس البشرية بطبيعتها لا تنصاع للنقد والذم ولو من شخص واحد فما بالكم لو كان هذا الذم على ملأ؟؟؟!!! ألا تعلمون أن الأعضاء سيقفون مواقف متعددة قد توافق هواكما وقد تخالفه..وقد تزيد النار ضراماً في بعض الأحوال وبكل أسف.. لا أعرف مالذي ترغبون الوصول إليه؟؟ إذا كانت لديكم فعلاً سعة الصدر هذه لتحمل النقد والنصائح فالأولى بها منزلكم العامر..لا صفحات المنتدى.. تطرح مشكلتك لا بأس ولكن ان تجعلها أخذ ورد على صفحات المنتدى بهذا الشكل فلا أتوقع أن يكون بها فائدة لكما فضلاً عن الأعضاء.. لذا أنصحكما أن تبتعدا وتغلقا الموضوع..وأنا لا أتكلم من فراغ بل لدي خلفية بمشكلة مثل مشكلتكما ولا أتمنى أن تصلوا إلى طريق مسدود.. فخسارتكما في هذا الموضوع أكثر من مكاسبكما.. وأشير عليكما بالدخول بمعرفات جديدة مع احترام خصوصياتكم ، أو على الأقل يحتفظ كل منكم بأسرار بيته دون نشرها بهذه الطريقة.. ولا يظن ظان بأني لا أؤيد طرح المشكلات وعلاجها أو لا أتوسم في أعضاء المنتدى خيراً..لا والله بل ما أزعجني هو طرح الموضوع بهذه الطريقة.. أعلم أن بعضكم لن يؤيدني ولكن الهدف والله المناصحة..واسألكم بالله أن تدعو الله ان يؤلف بين قلوبهم..وألا تزيدوا الموضوع سواءاً وفق الله الجميع لمرضاته.. أم جوري أبو جوري.. لي نصيحة لكما وبإذن الله تكون فيها الفائدة.. سأكتبها لكم وارسلها لكم رسالة خاصة.. ولكن أمهلوني يومين..فأنا ابتدأت امتحاناتي |
حبيبتي ام جوري مدام الموضوع من سنه فخلاص اللي فات مات كان يضربك لانك كنتي تستفزيه وتعصبيه تبيعي من ذهبك هذا غلطك هذا زوجك مجبور يصرف عليك لا تبيعي من ذهبك وترجعي تلوميه طلبتيه ورفض قولي له يبيع من ذهبك والله ان الرجل تعز عليه الف مره انه يبيع ذهب زوجته وبيرجع يعطيك ع العموم زوجك تفاهم معاك بالطيب خلاص الماضي انسيه وانتي بعد لو كنت شاكيه من زوجك كان قلتي انا مافي مثلي كلنا كذا سبحان الله واتركي عن البلياردو ترا والله مامنها الاوجع الراس والمشاكل وانتبهي لزوجك واذا على الهدايا والله ماشفناها الا مره بس ربي يحفظ لنا ازواجنا ومانبي ولا شي غير ربي يخليهم لنا
وانت اخوي ابو جوري تفاهم مع زوجتكوخصص لها مصروف شهري عشان ماتبيع من ذهبها وكمان ترا هديه صغيره اكسسوار او شوز كشخه او قلم روج ما بيخلص الراتب منه بس شي يفرح انك تتذكر زوجتك ولو بشي بسيط واي شي يعجبك بالسوق لو شي بسيط تحب تشوفه عليها جيبه لها بتملك قلب زوجتك وتدخل الفرحه عليها وتكسب اجر من رب العالمين وفقكم الله لما يحبه ويرضاه |
والله موضوعي جاب نتيجه :d ع العموم صار كل شئ واضح ... ومواضيع قديمه ... من جدكم بتتناقشون في اشياء راحت ؟ سكرووا ع الموضوع .. وابدأوو صفحه جديده اللي فات مات .. الله يصلح حالكم .. |
الله يصلح ام جوري تفتكر الموضوع قريب ماتعرف بالمنتديات وودي تتعلم والله وكل الكلام اللي شايفينه هذا قديم جداً له اكثر من سنه والآن والحمد لله , ام جوري اصبحت انسانه ثانيه تغير جذري حنونه طيوبه تخاف على بيتها وزوجها صار تفكيرها متفتح مو مثل أول الحمد لله صارت حرمه ثانيه عن ام جوري الأولانيه وانا والله ما ابي غير كذا راحت البال اهم شي صوتها ما اسمعه الا لما اقولها , ها ,, ها ,, ها ,, وبعدين يوصل الصوت :d وش امدح وش اخلي الله يحفظها لبنتها ولزوجها ولبيتها والهدايا توصل بس وقت الزعل الحرمه تنسى وهذا طبع كل بنات حواء وعشان اوضح الصوره المنقوله في المنتدى ام جوري تفتكر المواضيع جديده انا منزلها , فديتها ماطالعت في التاريخ هذا اللبس في الموضوع , والشي اللي تعلمته في السنتين اللي راحت وانا طبعاً عريس جديد انه لابد من اختلاف وجهات النظر بين الزوجين وخاصه اذا كانو جدد على بعض كل واحد منهم متربي في بيئه مختلفه تماماً عن الثاني , ومع مرور الوقت كل واحد بياخذ على طبع الثاني وتقل المشاكل شوي شوي , الله يصلح الأحوال , اشكركم جميعاً وتقبلو مودتي , |
الله يسعدكم بس وينها ماترد على الموضوع ياليت عشان نعرف انها مبسووطه
والله يخليلكم البنوته ويتمم حملها على خير |
الله يسعدكم ويديم عليكم نعمته
حلوة الكلمات هذي لما تخرج من الزوج عن زوجته ما شاء الله تبارك الرحمن |
يا عزيزتي ، إنت اعترفتي إنك عصبية و إنه حنون و طيب
فلا تهدمي حياتك بيدك و يكفي كلامه هذا عنك :) لا تخلي الشيطان يدخل بينكم اقتباس:
|
أم جوري بأوضح شئ
مرة من سنتين ،، أنا و زوجي اختلفنا في نقطة و وجهة نظر ، قال لي خلاص خذي رأي الأعضاء هنا لإنك تقتنعي برأيهم قلت له مشغولة ، إنت اكتبها .. و تاني يوم دخلت و شفته كاتبها بصورة ثااااااااااااااااااااااانية مرة و مختلفة فيعني الرجال ما يقصدوا ، بس هم ينظروا بمنظار مختلف عننا :) و ( داري على شمعتك ، تقييييد ) ;) |
الله يسعد قلب كل من حط حرف واحد بها الصفحه
انا أقولكم ام جوري ليش ماهي راضيه ترد مع اني قلت لها اكبتي الاعضاء ينتظرون ردك قالت وربي مستحيه مادري ايش اقول , اصبرو عليها شوي وراح تكتب بنفسها اللي يدور بخاطرها , لاني ما ابي اغششها ويارب تفيد وتستفيد منكم والحياه مدرسه , الله يسعد قلوبكم ويوفقكم يارب ,’ |
الله يوسع عليكم
|
اخى ابو جورى
احييك على روحك الطيبه سابقا نشف ريقنا لتدخل شخصيه كنا نود ان نسمع رايها فى موضوع يخص الطرف الثانى ولاحياة لمن ينادى واضح انك رجل مثقف وواع المهم تاخذ براى الاعضاء بصدر رحب ربنا يخليلك جورى بس مش عشان جورى بس اكيد بتعزها لاسباب كثيره اسعد الله حياتكم فينك يا ام جورى |
| الساعة الآن 08:53 AM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©