|
مشكلتي مع زوجي اهتمامه الزائد بأهله
السلام عليكم ورحمة الله وبركاته
عندي مشكله مع زوجي تقلب حياتنا جحيم زوجي يهتم لعائلتة وااايد اللي هم امه وابوه واربع بنات وخمس اولاد ...الصغير والكبير للاسف انه يخدمهم بعيونه سواء بفلوسه او اي شيء ايخصهم صغار او كبار .. لدرجة انه ايسافر بالاشهر علاج مع اخته..آخر مرة قعد بلندن سبع اشهر كنت فيها حامل.. بالرغم من ان الحمدلله كلهم خمس اولاد يقدرون يروحون وياها بس معاند لازم هو اللي يسير .. والله قهر ... والمصيبة انه اهله ما يعبرونه ولا يشكرونه وكله طايح من عينهم .. عشان جذيه اضارب وياه واقوله لا تسوي لاهلك شي ..سوي بس بحدود يعني احنا ساكنين وياهم بغرفه وحمام بإيجار أغلى ضعفين من ايجار البيت الكامل برع. بس هو مقتنع باللي يسويه وايحط الغلط علي .. احنا الحين متزاعلين .انا ما اقدر استحمل معاملة اهله له بهاي الطريقة بالرغم من انه سو المستحيل عشانهم وهو مقنع بانه هو على صواب.. شو الحل ؟؟؟ كيف احل المشكله ؟؟ اصلا منو الغلط انا ولا هوو؟؟ ساعدوني دخيلكم |
حبيبتي اذا هو مومقصر عليكي لا تتدخلي خليه يحرق نفسه عشانهم اهله مو غرب
احسم من اللي يصررررف ع بنات ولا اصحابه هونيها بتهون |
اقتباس:
بصراحة فعلا استغرب من الحريم اللي يحرضون أزواجه على اهلهم؟؟!!!! انتي عارفة انك انتي ملزومة تطيعين زوجك وهو جنتك ونارك.. وهو ملزوم يبر اهله وامه هي جنته وناره>>>>>> يعني هو مو ملزوم يطيعك. إذا هو مقصر معك ماديا عشان أهله بنقولك لا حبيبتي طالبيه ومن حقك يكون لك مصرف وانه يوفر لك حياة كريمة. لكن إذا مو مقصر معاك مالك حق تتضاربين معاه عشانه يبر أهله. وكما تدين تدان .. الدنيا دواره وبكره ربي يرزق عيالك حريم يحرضونه عليك.. |
الله يهديج يااختي ترا على الاقل قاعد يصرف على اهله موعلى خرابيطه وصدقيني الي فيه خير لاهله اكيد فيه خيرلج وتحملي غيرج متحمل بلاوي والمنتدى شاهد طولي بالج يالغاليه وارجعي لزوجج ومصيرج تطلعين بيت بروحج وتصير الايام هذي ذكرى بس اصبري حبوبه والله كريم وتقبلي مروري
|
شوووووووووووووووركم وهداية الله
لاني صدق مفقدتنه وااايد |
لو مو مقصر عليكي بشي ووضعه زين لاتجيبي المشاكل لنفسك
|
ليس لي تعليق بعد الأخت أحلاهم وأتحداكم
نصيحة أخوية اتبعي ما قالته لك الأخت الكريمة |
لا أستطيع ان الومك واختلف مع ما سبق من أراء
كيف يتركك سبع أشهر من أجل علاج أخته هذا ظلم وجور في حقك مادام ان عندها اخوه وأم ان حق الام عظيم ولكن حق زوجتك عليك أكبر من حق اخوتك اختصر نصيحتي في حديث الرسول اعطي كل ذي حق حقه وانت معذوره ولكن لن تستطيعي ان تغيري زوجك وسيظل كذلك فيجب علي الزوج أن يراعي عدم المبالغه في الاهتمام امام الزوجه حتي لا تصاب بالغيره والعكس وانا لا أستطيع ان أنصحك بما لا اتحمله لو كنت مكانك ولقد رأيت بعيني مأساه من كان يهتم باخوته واولادهم علي حساب أسرته وكان يثق فيهم ثقه عمياء فسرق امواله أحد أولاد أخته ولم يشهد في صفه أحد من أهله فكانت القطيعه والبغضاء حتي ذكر أسمائهم لا يطيقها فعلي الرجل ان يعدل في المعامله |
فيه مثل يقول اذا كان قلب الرجل فندق فالبنت الشاطره هي من تستطيع حجز هذا الفندق بالكامل يعني بشاطرتك يقدري تنسينه اهلله تقبلي تحياتي
|
يا وخيتي ادا ما كان مقصر معاك ومع اولادو فليش المضاربة والهواش وبعدين لا تنسين انو الوالدين ليهم حق الطاعة عاولادهم
انتي سمي بالله واستهدي وادعي ربك ينحي عنك ما تلاقين وتدكري انه كما تدين تدان والديان لا يموت |
وعليكم السلام ورحمة الله وبركاته
اهله.....امه وابوه اهله....اخوانه وخواته اهله....عزوته وناسه شلون تحرضينه عليهم...مادام انه ماقصر عليج في شي فاتقي الله وراجعي نفسج وبعدين شلون ذكرتي انهم ما يعبرونه ولايشكرونه وفوق هذا طايح من عينه الصج...انه طايح من عينج انتي علشان شدة بره فيهم وعطفه عليهم الله يصلحج ويهديج طريق الصواب..,,, |
هذولي اهله انتي وش عليك؟؟
ليش محتره؟؟ حراام عليك ولا تعاوني زوجك على عقوق والديه!! شكلك نسيتي شي بكره في حسااب واخره وعذااب انتبهي من الحين الله يهديك! |
سبحان الله
نصيحتي لك اختي اولا وقبل اي شي ثاني الدعاء ان الله يسخر لك زوجك ويحنن قلبه عليييييييييييييييييييك هو اقوى علاااااااااااااج لحالتك وربنا معاااااااااااااااك في رأيي انا استغرب والله اهله ...وطيب انتي جزء من اهله مافي احسن من التوسط يراعي امه وخوااااااااته ويقوم بحقوقهم على اكمل وجة ومحد يلووووومه بس ينلام اذا الزوجة تضررت يعني بيكون فيه طرف مظلوووووووووووووووم ....حامل وسبعة شهور بعيد عن زوجته .....والحجة مسافر ..طيب ليش ما يتناوبوا الاخوان على تلبية حاجات أمهم وخواته وهل زوجك هو المتزوج الوحيد بينهم وهل الباقين قريبين من امه ولا بعيدين عنهم ووين الاب بينهم ..او هل زوجك هو الاخ الكبير بينهم وسند ابووووووووووووه ما اقول الا الله يعينك يا اخوان من حقها تطالب بحقوقها ....الا اذا تنازلت عنه برضاها وهو حق عليه انه يراعي هالامر وفي الشرع الزوجة ما تترك لااربعة شهوووووووور متواصلة فكيف سبعة شهووووووووووور ما قلنا شي امه وخواته من واجبه عليهم لكن لازم بعد يراعي حاجة زوجها بس نصيحتي لك لا تظهري زعلك بشكل مباشر ..حاولي معاه بالتفاهم وانك بعد محتاجته واولادك كمااااااااااااان ...او يسوي حل وسط مع اخوته ويتقاسموا المهام لا ضرر ولا ضراااااااااااار والله ما اطيق يبعد زوجي عني شهر فكيف بسبعة شهووووووووووووور الله ييسر لك امورك ويسخر لك زوجك ويارب اجعله بار بوالديييييييييييييه |
انا معاكم
بس مب حرام يترك ولده عمره ست اشهر وانا حامل سبع اشهر.. انتو تدروون أخته اللي معالجنها بلندن من صغيرة الين الحين عمرها 12 سنه ....ترفع صوته عليه. ما تبغوني انقهر .. بس انا ما الومكم لانكم ماعشتوا اللي انا عشته .. تدرون شهر عسلي كان شهرين ونص بلندن علاج مع اخته ..والله كنت خادمه ليهم بالبيت مع اني حملت بسرعه ..بس ابد ما حسيت لا بشهر عسل ولا اني اول مرة احمل.. لكن ارد واقول عسى ان تكروا شيئا وهو خير لكم ..لاني اقول الايام اللي قضيتها بيت اهلي جنة . واولا واخيرا هوو الخسران عوطني بالسفر بعدين بس كانت خطة مني . المهم الكلام لا يفيد ..لا يفيد سوى الحمدلله على كل شي |
اقتباس:
اسمعي ذول الناس اللي اهو يبرهم وما يقصر معهم هم اللي بيشلون اولادك اذا صار بزوجك شي حتى لو اخواله (اخوانك) بيشيلوهم لفترة هل برايك مستعدين يتحملوهم للأبد او ان زوجاتهم بيرضون كذا ... اول كلمه يقولونها انت منت ملزوم بيهم لهم اهل لازم ترجعوهم لهم يهتمون فيهم ... الدنيا دواره .. وانتي لو بتتزوجي اذا صار بزوجك شي ... مارح تقدري توفقين وحتخافين على اولادك من الغريب مهما يبينلك حبهم بالبدايه ... |
شمووووووخ
هذي الصفة من سمات ومن صفات الرجل اللي بمعنى الكلمة رجل هذي نعمة ولاتخلينها نقمة إنتبهي إنك تنصحينه أو تقولين له أي شيء ضد أهله بالعكس المفروض تشجعينه أكثر وأكثر إحمدي ربك وإشكريه وصدقيني إنه لو يصير لك شيء لاسمح الله إنه هو أول من يوقف جنبك ويحافظ عليك هذي نعمة ورب البيت ولاتصيرين حساية من مثل هـ الامور وتصيبك الأنانية وحب الذات حافظي على حبه وحافظي عليه تخيلي إنه مقصر في أهله وطبعه شين معهم كيف بيكون ولدك اللي هو ولده كيف راح يكون معك إحمدي الله وفكري تفكير بعيييييييييييد والله يوفقك ويسعدكم |
أختي الكريمة
أهل زوجك ورقة رابحة في حياتك , حاولي تكسبينهم وبيني لزوجك حبك لهم ودايما امدحيهم حتى لو كذب فهذا من الكذب المباح بين الزوجين ومما يؤلف قلبيكما ...اهديهم الهدايا واظهري كل ودك أمامه لأمه وأخواته المهم دائما امدحيهم ولا تحسسينه انك عدوة لهم وبهذا سيشعر أنك تحبينهم وقلبك عليهم وبعدها يا أختي خططي للخروج من بيتهم ولكن ليس لكي تمنعي بره بهم ولكن لكي تنفردي في حياتك أنت وزوجك وأولادك ببيت بدل الخسائر على قسم صغير وهو وأهله أحرار لا تتدخلي بهم ... وقولي له لما يقتنع بخروجكم من عندهم يعوضهم بما يدفعه لهم من ايجار بطريقة ثانية ولكن هذا بعد أن تكسبي وده تماما وتحسسيه أنك تحبين أهله وهذا من كيد النساء المحمود الذي تكسب به زوجها وتحقق منافعها ولا تضر غيرها ... وبصراحة أنا متيقنة أن هذا الرجل بركة عليك وعلى أهله ماداموا لا يعطونه أهمية وهو لازال في عطائه وهو طبق الحديث القائل بما معناه .. ليس البر بأن تصل من وصلك ولكن البر أن تصل من منعك ما شاء الله عليه ربي يوفقه دنيا وآخرة |
اقتباس:
بس سالفة يقعد سبع شهور لبندن هذي ماعجبتني ويتركك وانتي حامل اما بالنسبة لاهله خليه كيفه هو حرررررر اهم شى انتي لا ينقص عليك شى |
ياسبحان الله ..
صح ماتبغينه يخدم أهله تبينه يخدمكِ ويجلس تحت رجولك .. والا يخدم أهلك ويوديهم ويجيبهم أهله هم أهله من قبل مايعرفكِ .. لو عطاهم عيونه مابيكفي .. وانتي مجرد انسانه بطريقه .. ممكن بيوم من الأيام يطلقكِ وفيه الف وحده غيرك .. انتبهي لبيتك ولاتتكلمين عن أهله بسوء ولاتتدخلين بتصرفاته معهم لأنك انتي الخسرانه .. يالله لاتبلانا بحريم زي هالأشكال |
اللي مافيه خير لأهله مافيه خير للناس
وحبك لأهله من حبك له ممكن تكون بعض الضروف اللي مريتي فيها والمقارنات ثابته في ذاكرتك لكن تذكري وقارني من تتمنى ان زوجها يكون نفس زوجك فعل الخير لايؤسف عليه ابدا ارضي والله بيفرجها تراه جالس يبني له قصر في الجنه وانت بكره بتصيرين ام انت تبين تشوفين احترامهم وتقديرهم له مثل كل زوج لكن وش الأمّر تشوفين عدم احترامهم له ولاعدم احترامه هو لهم ؟ وتشوفين انك زوجة الرجل العاق عديم التقدير والادب ؟ البنت اللي هو معها في لندن تكون اخته حطي نفسك مكانها البنت هذي راح تكبر وماراح تنسى هالوقفه مهما كان والله ان تاريخ زوجك بيبقى رااااااسخ ومشرف مايبي لك الا الصبر واذا هي على السبعه شهور هذي اقل شي من معنى كلمة تضحيات تخيلي ان المريضه اختك ومافيه الا انتي اللي راضيه وزوجك مانعك وش بتشعرين به بالله ؟ الصبر مفتاح الفرج والله مايضيع اجر المحسنين ياخيتي |
السلام عليكم اختي استعيني بالله و ان شاء الله سيعينك لانك ادا ما رفضتي ستكونين انانية بالنسبة له اصبري
|
انزين خلاص اقتنعت بكلامكم
واصلا انا راضية باللي يسويه لأهله بس كيف اتحمل أهله اللي كلامهم مر وعلقم ..وكله تطنيز على زوجي.. ابغي حل لنفسي كيف اغير من نفسيتي .. ما دام انا الغلطانه بكل شي علموني شو اقول يوم اي حد من اهله سواء اخته ولا امه ولا اخوه يطنزون عليه ولا يتمسخرون ...انا دووم موقفي اني ما اتكلم ابدا ..بس انقهر من كل خاطري واحقد عليهم او فهموني ليش اصلا يتعاملون جذيه معاه او كلامهم المر. دخيلكم ساعدوني عشان افهمهم ويصفى قلبي عليهم ...بالرغم من انهم يحبوني وانا اعاملهم بكل احترام بعمري ما قسيت على واحد فيهم. الحل على ايدكم؟؟ |
| الساعة الآن 10:20 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©