|
محتار مع العروسة وأغراض الطليقة ...
احترت اين اضع موضوعي ؟! موضوع 1- صور الزواج عند الانفصال 2- وعندي فلم فيديو للزواج انا لم اظهر فيه 3- وفيلم آخر أنا أظهر فيه وموجود عندها واحيانا نفسي توسوس لي ان ممكن يأذوني فيه وش رايكم بالصور أتلفها وأحرقها ؟ أو أقص الجزء اللي أنا فيه وأعطيها الجزء الثاني والفلم اللي عندي وش رايكم ؟ والفلم اللي عندها اطلبه ولا كيف ؟ طبعا مستحيييل بترده ممكن تتلفه وممكن تحتفظ فيه محتار يعني ما أبغى أظلمها أو أنتقم لنفسي الحل اللي أنا أفكر فيه هو الحرق لإنهاء تلك الذكريات وطوي صفحات الماضي طبعا اوتوجراف الذكريات اللي كان بالزواج بعطيها اياه واي قطعه صغيره اوكبيره لو اطار صوره بعطيها اياه أو ورقه اوكاسه لاني ماابغا اي شي من منها ابدا:11: وكمان ماابي احجز شي عندي اواستفيد منه ويطلع حرام علي .. والشقه كمان وش اغير فيها ووش اخلي :( احس ان العروسه بتحز في نفسها انو الشقه جهزتها لوحده قبلها وكنت معها بنفس البيت بس الميزانيه ماتسمح اغير وكمان الشقه مااستهلكتها الا كم شهر يادوب جلسة الصاله وغرفة النوم مع ان غرفة النوم غالبييه جدا ونادره والباقي جديد مره واحده اواثنين جوني ضيوف عالسريع :25: كيف ارضي عروستي من هالناحية ... لازم اطيب خاطرها :22: مابيها تحس بنقص او اني مطلق و...الخ |
بالنسبه للصور اشوف من الأفضل أنك تقص الجزء اللي انت فيه وتعطيهم الجزء اللي هي فيه
الفلم أللي يخصها وحدها كمان لو ترجعه لها أفضل درءاً للمشاكل أللي ممكن تطلع من ورى هالصور بعدين عن واقع تجربه عشتها مع قريبتي الفلم اللي معاها عادي لاتخاف منه يعني ايش راح تسوي فيه ؟؟ أنت رجال ماينخاف عليك لكن لو تبغاه أنت عشان تتخلص منه ترتاح مافيها شي لو طلبته منهم بالنسبه للشقه لو تحاول تغير غرفة النوم لأنها صعبه شوي على أي بنت تدخل بغرفه تعرف أن زوجها كانت تشاركه واحده ثانيه فيها أما باقي أغراض البيت عادي أذا ماتقدر ألحين ولو مع الأيام ولاأقصد كل الأغراض أنما جلسة الصاله تغيرها فيما بعد مع العروسه أما الباقي كالمطبخ وغيره ماأشوف له أي داعي تغيره وبالتوفيق الله يجعل العروسه فاتحة خير عليك ويسعدكم |
اقتباس:
يارب توفقني |
ماأدري هل بأمكانهم السحر عن طريق الفلم ؟؟
لكن حاول توسط لك أحد يحترمونه وتروح معاه وتوصل اغراضهم لهم وتاخذ أغراضك منهم وتمشي؟؟ |
سلااام علييييكم
فرحنا لك والله يوفقك انت جم باقيلك وتتزوج او تملك؟ على اساس الفتره غير اللي يسمح لك وقتك انك تغيره |
اول شئ شيل العفش وحطه في واحده من الغرف ورش باقي البيت دهان جديد غير لون الدهان السابق وبعدها غير الفرش لوكان مفروش وأما بالنسبه لغرفة النوم غير المراتب والشراشف إذاكانت غالية عليك بالنسبه لصور مثل ماقالوا لك إللي قبلي قص الجزء إللي أنت فيه وأعطهم الباقي مع شريط الفديو إللي يخص طليقتك بالنسبه لشريط اللي أنت فيه أتوقع لوطالبتهم فيه ماراح يعطونك إياه وبالنسبه لسالفة السحر صراحه ما أتوقع يسوا شئ من هاذا القبيل إلا إذا حسستاهم أنت إنك تبغاه ومصمم عليه يمكن ذاك الساع تتحرك عندهم الضغينه وبعدين صراحة ياخوي توقعت سالفة السحر ماتخوف إلا حنا يالحريم أثاريه حتى أنتم يرجال عندكم خوف من هاذي السوالف عموما أنت حصن نفسك وأقرأ عليها وتذكر بأن لن يصيبنا إلا ماكتب الله لنا وانت أطلبهم الشريط بالتي هي أحسن إن أعطوك أهلا وسهلا وإن رفضوا توكل على الله وماعليك فيهم الله يوفقك ويسر لك أمور زواجك ويحقق لك مناك يارب .
|
أنا أحد المتابعين لقصتك من بدايتها حتى الآن وذلك قبل تسجيلي في هذا المنتدى الرائع...
على أي حال غير ماستطعت تغييره من أثاث منزلك لكن لا بد لك أن تغير غطاء ومفرش سرير غرفة النوم مع تغيير الوسادات وملحقات السرير... قدر الإمكان لاتوضح لزوجتك الجديدة أن هذه الأثاث هو أثاث الزوجة القديمة كي لاتشعل فيها نيران الغيرة... بإمكانك تطلب الفلم منهم مباشرة أو عن طريق أحد أبناء عائلة زوجتك السابقة بالنسبة للذكريات فلا بد لك من إزالة أو طمس أي أثر يذكرك بها ابدأ حياتك من جديد وتلافى أخطاءك السابقة وافهم النساء جيداً فأنت خبير بهم الآن:22: |
اقتباس:
وغير الأثاث بالكامل , وإذا لم تستطع تغيير الأثاث بالكامل لكن غرفة النوم يجب تغييرها . |
انا لو في مكان عروستك مستحيل اعيش في مكان فيه وحده مشاركتك فيه احسها صعبه صدقني راح تصير مشاكل كبيره انصحك غير الشقه عشان تتلافى المشاكل من اولها وانقل الاثاث فيها الا الصاله واكييييييييد غرفه النوم ولو حتى جديده لان الحرمه مليون بالميه بتعرف اذا هي مستعمله وراح تدقق بشكل ماتتصوره وتخيل لو لقت اثر روج في التسريحه او اثر مناكير صدقني راح تكرهك والصاله غيرها لان اكيد في شي من اثر الطليقه وانت فاهمني غير الشقه انصحك عشان خاطر عروستك ولو حتى تتدين وافضل انك تبيع الغرفه والصاله في الاثاث المستعمل والله يوفقكم ويجمع بينكم على خير-
|
اختي بنت الحكمي اسمحيلي ماافضل انه يجمع العفش في احد الغرف لان عروسته بتتوقع انه محتفظ فيها للذكرى وانتي عارفه الحريم والغيره-
|
المشكلة ان تأثيث الشقة غالي
و صعب تاخذ رأي زوجتك الجديدة في تقبلها للأمر كونك لا تعرف ردة فعلها طيب ألا يمكن ان تبيع غرفة النوم لأنها صعبة تكون نفسها أما الكنب ,,قم بتنجيده فقط كتغيير حتى انت ايضا ترتاح نفسيا و يكون ارخص من تغييره بطقم آخر و بنفس الوقت يكون شكله جديد,,اضف بعض الأكسسوارات الجديدة الغير مكلفة مثل طاولة للطقم بعد تنجيده اصبغ جدار غرفة النوم و أحد جدران غرفة الجلو س او المجلس |
القسم المناسب ..
الاشراف ؛ |
- غير الشقة تماما..على رأي الأخ / أبو حكيم
-غرفة النوم ما ينفع نفسها ابدا الأثاث الباقي بيعه.. وشوي شوي تأثثون لو تجلسون سنه.. صدقني بتحس بقيمتها وانك شخص جدا راقي بالتعامل.. عادي الوحده تتحمل انه فيه أثاث ناقص بس مو كامل لوحده قبلها - (مارأيها هي؟) هل شاورتها؟ الله يوفقك |
.. مبرووووك مقدما ..
.. اخي الكريم .. .. اذا ممكن تبيع غرفة النوم , وخصوصا انها غير مستهلكه , وان شاء الله تجيب لك سعر ممتاز .. .. وحتى باقي الاثاث بيعه , وبالسعر الا راح تحصل عليه , زيد عليه شوي , وأشتري لك اثاث جديد ورخيص .. لانه اي بنت ماراح ترضى تتزوج وتدخل مكان وتستعمل اثاث كانت اخرى تجلس وتنام عليه .. .. وانت بعد راح يكون اريح لك نفسيا .. .. وجهز المكان شوي شوي .. لا تستعجل .. اهم شيء يكون مريح لك وللعروسه .. .. اما عن الفيلم الا لك عند طليقتك , خبرها عن طريق اي احد انك تريده , وانك بالمقابل راح ترسل لها صورها , يعني سلم وتستلم , والصور يفضل انك تقص الجزء الا انت فيه , وتعطيها صورها مقابل فيلمك الا لك عندها ,, وكل شيء يخصها , حطه لها بشنطه كبيره وارسله لها .. بالتوفيق |
اشكركم على حسن تفاعلكم
اعتقد بعض الصور لايمكن قصها وبعض الصور الجدارية كذلك لذا اعتقد باان الحرق افضل اما الشقة ماادري محتار جدا غرفة النوم قيمتها 12000 لو بيعتها كم بتجيب والله لو 5000 خساره ويبيلي فوقها 4000 او5000 علشان اشتري جديده في طبعا ب3000 و5000 لكن ماتعجبني ممكن اغير الموكيت والاواني المستعمله واجيب اغطيه ووسائد جديده للسرير وبالنسبة للدهانات والله حرام الدهان جديد بس انا بحاول اغير على قولتكم بعض الاكسسوارات ياريت تعطوني شوية افكار بالاكسسوارات وبعض الحركات للتغيير اغير على نفسيتي واضع بعض اللمسات البسيطه التي تعطي شكل |
أخي ...ما قلت لنا عن رأي خطيبتك ... ما سألتها بالموضوع ؟؟ يمكن هي تريحك أكثر منا ..
اذا وافقت على غرفة النوم وهي راضية كون خلصت من تكاليف مالها داعي .. لكن اذا الموضوع يهمها كثير وحسيتها تضايقت راح تندم بعدين اذا صارت مشاكل على الموضوع وتقول لنفسك ليتني غيرت غرفة النوم .. 5 الاف ما تستاهل كل هالمشاكل وما تقدر ترجع بالزمن لورا وترجع تعيد ليلة عرسك عليها .. من رأيي تسألها ...هي ما تعرف انك مطلق ؟؟؟ اذا تعرف أكيد هي قاعدة تفكر بالموضوع بدون ما تسألها |
أشفق عليك من المصاريف أخي الكريم ..
الرجل إذا أراد أن يتزوج فإنه يقترض ويتدين ويشق على نفسه كثيرا .. فلا أستطيع نصحك بتغيير الشقة وربما عليك قروض من الزواج القديم لم تنته منها بعد ! لا يكلف الله نفسا إلا وسعها ... وأظن أن زوجتك الجديدة بنت أجواد وعلى قدر من التربية ولا أظنها ستقبل أن تكلف على نفسك ما لا تطيق بداعي الغيرة .. حاول أن تفهمها هذا الأمر ، وأن كل أثاث منزلك في حكم الجديد .. وأن المرأة العاقلة لا ترضى أن تحرج زوجها وأن تستنزفه ماديا بسبب أمور يمكن تجاوزها .. كنت أود أن أقترح عليك أن تخبرهم بأنه أثاث جديد ، لكن أخشى من عواقب ذلك لو اكتشفوا الأمر .. فتوكل على الله وصارحهم وكلي أمل أن يقدروا موقفك .. وفقك الله .. |
اقتباس:
انا بصارحهم انه جديد ومحفوظ وبغير بعض الاشياء البسيطه لأن والله الأمر مكلف جداً |
والله ياخوي لو كنت مكان خطيبتك
كل شئ عااادي ماتغيرهـ إلا غرفة النوم وربي لاااااااااااااااااااااااااااازم تتغير يعني مو مشكله المطبخ نفسه غرفة الضيوف نفسها إلا غرفة النوم .. والله لأزعل .. يمكن الأراء تختلف بس لو كنت مكان خطيبتك وترى أغلب أراء البنات تتفق غرفة النوم مررررررررررا صعبه تكون نفسها أشتري رخيصه ولا تكون نفسها :: وجهة نظري وأعتقد نفسها عند خطيتك هي أول فرحتها وأول زواج لها حتقول في نفسها كل شئ يهون إلا غرفة النوم :: وبرضوا أنت شاورها وشوف رأيها بالنسبة للصور أفادوك غيري وتمنياتي لك بالتوفيق |
نفس اراء الاخوات
كله عادي عندي الا غرفة النوم اتذكر اخوي كانت غرفته تجنن و بـ7000 بس انت دور بالمحلات زين وبتلقى خير إن شاء الله |
غايتك الرضا
ماشاء الله خطبت !؟؟ الف مبروك عموما بقولك انا عندي 3 من بنات العيله تزوجوا مطلقين الاولى بنت وهو مطلق من ملكه بس ومجهز شقته مع خطيبته الاولى وماحصل انها تسكن فيها ولا هو ماسكن فيها وخطب قريبتي وسكنها فيها وعادي جداااا الثانيه هو مطلق وزوجتوه مااجلست بالشقه الا اياااااااام معدوده فيها تتوقع انه غير الاثاث ؟؟ لا طبعا ماغير ولا حاجه لانها جديده انا انصحك ممكن تضيف بعض الاشياء للشقه وتغير جلسة الصالون وسرير الغرفه جيبلك واحد شاطر يعملك سرير جديد نفس طقم الاوضه والف مبروووووووك |
اهم حاجه تغير مدخل الشقه
لازم دهان ولوحات وحركات |
اقتباس:
بس اهلها رفضوا النقاش نهائي بموضوع البيت وقالوا لو عندك غرفه وحده مايهمنا اهم شي التوفيق والراحه بس هي مادري عنها ممكن تتخبي بنفسها او تطلب ماادري والله بس ياناااس حرام والله جديده اطالع فيها يعني اغير الابجورات والمفرش حق السرير بس هي كلها مكلفه انا بدخل بديوون الان علشان المهر وحفلة الزواج ومابالكم لوغيرت الغرفه حسبي الله ونعم الوكيل على من كان السبب صراحه انا اهم شي العروسه حبيبتي ماابيها تحس بشي مم مدري ... كمان الشقه حلوه ومناسبة بس احاول انقل لشقه اخرى ابي اغير الماضي وتجيني افكار عن حياتي الاوله وذكرياتي اتضايق والله اليوم لما دخلت وشميييت الريحه تضايقت يعني مدري لان الرسول قال في معناه لو ان الواحد تشاءم من بيته يغيره بس في المقابل مكلف ماديا النقل وتغييير المقاسات وما ...الخ محتار ساعدوووووووني |
لا تستعجل بالزواج ..
لازم تنسى الماضي .. بكل الطرق .. أقلها غير الحي اللي انت ساكن فيه .. و غير ألوان الاثاث .. كذا أفضل و أوفر ؛ |
اقتباس:
لان بعد ماخطبت بدا الماضي يهون وينتهي باقي يرجع لي حبيبي الصغير |
يااخوي لا تستعجل ...
زي ماقالوا غير الشقه... ومن ناحيه الاثاث اسالها احسن .. ومن ناحيه غرفه النوم والله صعبه...عندك تناتل على7000والله تجنن..غرفتي 13000وشوي والله ماملت عيني كثر غرف تناتل...وانت اسالها افضل عشان تتجنب المشاكل بعديييين.. موفق.. |
ما يحتاج تغير شي .....
عشان شكليات وكلام الناس والله محد داري عنك ولا حاسب لكلافتك حسااااااب ...... ما فيها شي الغرفه جديده وغير مستهلكه ... الرغبه في تغييرها من باب نفسي فقط .... ومن رايي لا تشاور العروس ولا تاخذ رايها بموضوع زي كذا .... انت ادرى بظروفك وانا اقترح انه الان تتمم الزواج ... وبعدين لو اتفقتوا وحبيتوا تغيروا حبة حبة ... .. او حتى تنقلوا كل شي يجي بهدوء وفي ظروف احسن واستعداد مادي ونفسي .. راح يكون البديل اكيد افضل.. فيما لو زنقت نفسك الان ماراح يكون البديل افضل ... ... با اخي لا تبدا من الان تركز على اشياء هل ترضى العروس ام لا .. هل تفكر في ؟؟؟ ام لا .. الشقه بالنسبه للعروس جديده ....يعني هل تتوقع من ياتي لها ويقول ان هذا الاثاث لم يغير ؟؟؟؟ ربما !!! .... لكن ايضا ربما ان هذا لا يهمها بقدر ما يهمها ان تعيش معك على حب ووفاق .... فلا تفتح بابا لا تستطيع اغلاقه .. على الاقل في الوقت الحالي ... فيه امور تقدرها انت حسب امكانياتك اللي محد يقدرها غيرك وما تشاور فيها احد .. ولا تسكت وترضي الناس على حساب نفسك وتراكم ديون لن يتحملها احد سواك ..... فالكلام لا يكلفهم شي .. بالنسبة للتغيرات في الشقه . يمكن باضافة ديكورات خفيفه .. ولوحات ... مفارش للطاولات . ... ممكن عمل ديكور على جدار المدخل جبسي او نقوش . اضاءات .. مرايات .. والخيارات في ذلك كثيرة ومتوفره .. وفي الاخير بارك الله لكما وبارك عليكما وجمع بينكما في خير |
لا تنسى ولدك مع حبيبت قلبك الجديدة.. أمانه عليك.. لا تتخلى عن ولدك..
ولا تكون زوجتك أغله منه في يوم.. لا تسمحلها أبدا تفكر أنها تاخذك منك.. حنن قلبها عليه.. وقلها أنه هو الأساس.. الله يسخرها لك .. وله.. يارب.. ويسخركم أنت وولدك لها.. ويجمع بينكم في خيروعلى خير.. الله ينولك الدينه .. الحنونه.. كريمة النفس معك .. ومع ولدك.. استودك الله أنت وياه معاها.. ألف مبروك أخوي.. الله يسعد قلبك أنت ولدك.. |
اخي الفاضل انا اعطيك الحل الامثل
اولا ما تغير شي بالبيت والسبب انو هي اصلا ما دخلت وشافت ولو قلت لها غيرت ما رح يأثر انت كن صريحا معها وقل لها :انا لم اغير شي حتى انتي تدخلي وتغيري على كيفك وشويه شويه مع الحب والامكانيات بالمعقول نغير ونجعل حياتنا عسل في عسل الله يتمم لك على خير وتبشرنا قريبا بزواجك وسعادتك انت وهي ادعو الله ان يعوضك بعروسك عن كل لحظة الم شفتها آخر سنتان |
اخوي حتى لو غرفه النوم غاليه افضل من اللي بيصير ورى هالغرفه من مشاكل انت تحس الموضوع بسيط اسمع نصيحتي الحرمه بتدري انها مستعمله ولو كانت اعقل العاقلات ماراح تستحمل -
|
اقتباس:
أخي المهم والاهم بالموضوع هي الخطيبة ...يعني اذا اقتنعت بكلامك وراعت وضعك يكون ممتاز ...لكن لا تفاجئها بالأمر ...خل يكون عندها علم هي داخله على وين حتى ما تتفاجا ويتكدر خاطرها .. ما دام أهلها مراعين وضعك ما أظن تطلع عن شورهم وحلوة منك انك تكلمها بالموضوع وتعطيها خاطر فيه .. بيصير عندها شعور انه أمرها ورأيها يهمك وبنفس الوقت تراعي وضعك عن طيب خاطر بدل ما يكون أمر واقع ومجبوره عليه ... اذا تقدر تترك لها اختيار بياضات الفراش وبعض اكسسوارات بالبيت يكون حلو كثير ... أو ممكن انك تشتري مفرش للسرير وتترك لها الثاني هي تشتريه بعد الزواج وتخلي الاكسسورات تغيروا فيهم على مهلكم بعد الزواج تنزلوا كل كم شهر مرة وتغيروا أو تضيفوا شغلة جديدة .بس بلغها بخططك من البداية حتى ما تظن انك مطنش الموضوع.. .. خلي جزء بسيط من الميزانية كل شهر والاكسسوارات في منها رخيص ولما تكونوا مع بعض وهي عارفة وضعك المادي راح تراعيك وتختاروا شيء مناسب وبنفس الوقت بتكون مبسوطة أنك عملت لها خاطر وكأنك اشتريت أثاث جديد . ربي يهنيك ويسعدك ... فرحانه بفرحتك بعروستك :) |
اخوي
ساضع نفسي بمكان خطيبتك اذا تقدم لي رجل مطلق كحالتك .. وبكل صراحة ساجيبك سارضى بكل شي واي شي الا غرفة النوم صععععععععععععععععععبة جداجدااااااااااااا جدا صعبة فرجاء لاتستهين يبهالموضوع ربما تفكيرك يذهب للخسائر والمادة والديون نعم انا اتفق معك .. لكن عند غرفة النوم لا استوب كللللللللللللللة ولا هذي . والله لو اخليها صدقة او مساعدة تنكتب اجرها لي بكتابي واخذ غرفة ب4 او 5 وياااااااااااكثر التخفيضات بسماتدخل عروستك على نفس غرفة نومك السابقة مو حلوة مررررررة لها حتى لو سكتت صدقني بتحززززززز بالنفس والخاطر لاتنسى ان عروستك انت الزوج الاول بحياتها لاتكون فرحتها بغرفة نوم جديدة وغير مستخدمة من ناحيتك شي كثير عليها والله يوفقك بحياتك القادمة .. يارب |
مع هذا الرد ، للغالية جرين :)
اقتباس:
|
كل شي احرقه ..
ولا ترد لها اشياءها .. سلآمآت .. خلاص كل شي انتهى .. وبيتك غير الي تقدر عليه .. موفق باذن الله |
اقتباس:
ياأختي مطلقه صغيره أنت فهمتيني غلط أنا قصدي يجمعه يحطه في غرفه واحده علشان لما يرش بوية الدهان مايتوسخ العفش بالدهان وبعد مايخلص دهان البيت يرجع العفش كل شئ بمكانه ويرش الغرفه إللي كان فيها العفش أنا أقصد كذا وبالنسبه لغرفة النوم من الأفضل أشوف إن لوغيرها يكون أحسن إلا إذا وافقت هي عليها لاكن مستبعده موافقتها على غرفة النوم لأنها شئ خاص جدا ولها معنى كبير عند الزوجه أنا بصراحه قلت في ردي السابق إنها يغير المراتب والشراشف وقت ماقال غاليه وإمكاناته ماتسمح بس فكرت فيها إنه يترك كل شئ لايغيره إلا غرفة النوم حاول قدر المستطاع إنك تبيعها وتزيد عليها إللي يتيسر معاك وأشتري غرفه جديده لعروستك وبالتوفيق إن شاء الله . |
يااخي لايكلف الله نفساً إلاوسعها
نصحيه غيرعلى الأقل غرفة النوم منعاً للمشاكل المستقبليه لاسمح الله والباقس خلييييه بالنسبه للصور والفليم الأعضاء ماشاء الله عليهم ماقصروا |
الافضل عرض شقتك للبيع او للتقبيل وتفقل باب الماضي
وتبدأ حياتك الجديدة بكل جديد ويمكن زوجتك ماترضي بالاثاث القديم او تذكرك انه تابع لزوجتك السابقة عش حياتك وحتى لو خسرت شوي ولكن تعيش مطمئن سعيد |
اقتباس:
رأيي طلع نفس رأيك ...يكلمها ويفهمها حتى ما تتضايق ويكون عندها أمل انه راح يكون لها الحرية بالتغيير وبنفس الوقت ما ينضغط بالمادة الان وما يضطر يدفع قبل الزواج ...بعد الزواج يطلعوا مع بعض ويغيروا أشياء بسيطة مثل المفارش والاكسسوارات شوي شوي .. |
لازالت الاقوال معظمها متفقه على تغيير غرفة النوم
معاكم حق ولازلت أفكر بالأمر ومحتار لوأردت بيعها الذين يشترون المستعمل يبخسون الواحد يعني بالكثير اتوقع 3000او4000 وهي قيمتها تجاوزت العشره لو بشتري غرفه يبيلي 5000 عالاقل فوق مبلغ البيع علشان اجيب الغرفه اللي ارتاحلها وتناسبني لان السوق الان غرفه كئيبه وحالتها حاله الوان غامقه وتصنيع مشي الحال وبالنسبة لأغراضها إقترحوا علي أجيب شنط وارسلها إياها أنا رافض والله ماني مخسر نفسي وكم شنطه يبيلي ماعندي غير اكياس الزبالة (السودا) احط الاغراض فيها وارسلها مااعتقد اني ظلمتها وماني ملزوم اخسر واشتري مجموعة شنط واعطيها اياها برضووا في اغراض اعطيتها اياها بالملكه هدايا وصندوق الذهب ووو ....الخ والحين موجوده بالبيت اردها ولا تعتبر حقتي |
اقتباس:
ما قلت رأيك أخي بفكرة أختنا جرين وفكرتي ..... حل وسط ... لا أكياس زبالة ولا شنط ... أكياس تبضع عادية .. من رأيي ترجع لها كل شي أو تتلفه حتى ما يظل لها أي ذكرى عندك . من ناحية ما ترجع تتذكر النكد ومن ناحية ثانية ما تلقاهم العروس وتظن انك محتفظ فيهم للذكرى .. |
| الساعة الآن 07:04 PM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©