|
طريقه الخطبه فى مجتمعناالى متى !!
السلام عليكم ورحمه الله وبركاته
بصراحه مو عارفه من وين ابتدى لكن ابترك لنفسى العنان وبكتب بعفويه كثير اشياء تضايق ومانقدر نغيرها ونرضخ لها لكن تذلنا وتهينا ومن تلك العادات البشعه فى مواضيع الخطبه يتصلون امه واخته وبعدين بالمعنى العامى (نبى نجى نشوفها)ويحسسوك انك قطعه اثاث او فستان اوسيارة او اى شىء للفرجه ماعلينا بمااننا نعرف بالذوق والاصول مانردهم وبما اننا مانريد نضيع فرصه ونندم لاحقا فتنازل ونقبل طيب نجى لمراسم الاستقبال بالنسبه لى والى اعرفهم نحسن الاستقبال ونضع مالذ وطاب مع القهوة والشاى ويجون ويتقهون ويضحكون ويتعرفون واسئله عن كل شى ثم بعد ذلك تبدا الام تقز وتقز وتقز من فوق لتحت والاخت تتكلم والام تراقب!!!! وبعد كذا يطلعون ويمكن يتصلون وممكن مايتصلون!!! وتستمر هالمهزله !!! ماعرف انا بتزوج امه واخته مثلا!!!وانا متاكدة لو الرجل بنفسه جا وشاف ممكن نظرته تختلف كليا !!لسبب واحد ان الرجل يختلف بنظررته عن المراءة لانها تدقق بتفاصيل غير مهمه او تنظر لزوايه معينه اؤمن بالتاكيد ان كل شى قسمه ونصيب والى كاتبه ربى بيصير ولكن انتقادى لاسلوب الخطبه !!! ايام زمان لما كان الرجال رجال والنساء نساء كان الزواج اسهل بكثير من قبل ان يدس النساء انفهن بكل صغيرة وكبيرة واعذرونى على صراحتى المفترض ان النظرة والاختيار من الخاطب والمخطوبه لادخل للاهل بذلك الشوفه الشرعيه له لكن الحاصل حاليا والتقاليد بمحتمعنا ان النساء والطريقه كلها خاطئه وكثير من البنات من اسباب تاخرهم بالزواج هذا الموضوع لانى اعرف بنات ومايعيبهم شى جميلات مشالله ومع كذا يجون ويذهبون مزعج جدا جدا ان تشعرين بانك للفرجه وهم يقرررون يريدوك اولا سبق لى ان دخلت على اسرتين والحقيقه انهم لم يعجبونى ولكنى تنازلت ورضخت وبدخولى يتم التحقيق والاسئله الخاصه والقز ومن ثم لا يتم الاتصال !! لن اكابر واقول بان الامر عادى بالعكس اشعر بجرح بداخلى واكابر لى ولكل من اعرف ولا ارى اسباب لعدم الاتصال حتى انهم هم اقل بكثير من جميع النواحى ومع ذلك تتنازلين وتدخلين ويرفضوك!!! سبحان الله وطبعا قد تدخلين على اسر ويريدوك ولكن لايحدث نصيب لان الشاب ليس بكفؤ اتمنى اسمع اراءكم وتجاربكم الشخصيه ومن يؤيد ومن يعارض مجىء الاهل من الجنسين ؟؟ واتمنى من كل ام او اخت ترتقى باسلوب الخطبه وتقتنع ان الشوفه للرجل وان كان ماعندهم قناعه بنظر اخوهم او ولدهم ممكن تشوفها بس من بعيد بمكان عام تجنبا للاحراج وجرح مشاعر البنت بصراحه انا كرهت الخطب والنساء ومجتمعنا واسفه على صراحتى لانه شعور غير ظريف بتاتا الحمدالله على كل حال نسئل الله العوض والرزق الطيب |
مهما قلنا ما راح نقدر نغير شي هذا المجتمع ما راح يتغير كل العالم تتغير إلا مجتمعنــا عاداته و تقاليده ماتتغير سبحان الله !! صدقيــني محد يحس بـ موضوعك هذا إلا البنات المجربات ظلم المجتمع و أنا أكثر منك يا أختي كر ر ر هـت الزواج بشششششششششششكل مو طبيعــي أنا عنـي خــــــــــــلاص ما أبغى من الدنيـا شي أبي أعـيش وحيــده العمـر كلـــه غصب علينـا نقبل ها المجتمع نقابل الظلم و الذل بـ سكوت حسبي الله و نعم الوكيل حسبي الله و نعم الوكيل حسبي الله و نعم الوكيل !! |
السلام عليكم ورحمة الله وبركاته //
صدقتي أختي بكل اللي قلتيه ،، بس ليه أنا أخلي نفسي في هالموقف ؟؟ ليه ما تدخلتي لإيقاف هذه المهزلة التي أرفضها رفضاً باتاً جملة وتفصيلاً ؟؟ تدرين عندنا نفس العادة ، إذا كان الخاطب من برى العائلة، ولكن والدي وأخواني الرجال يرفضونها ويطلبون أن يأتي الخاطب مباشرة إليهم هو وولي أمره والده أو أخوه أوخاله أو عمه ، ثم تكون النظرة الشرعية بدون تدخل أطراف نسائية ، وبعدها بعد سؤال الأهل عنه هو المعني بالرد ليست أمه أو أخته هو اللي يقرر لأن هو اللي راغب بالزواج ، تزوجت بمثل هذه الطريقة أنا وأختاي الإثنتين بدون تدخلات نسائية إلا بعد أن يتم الإتفاق على كافة الأمور .. أرفضي وأوقفي هذه المهزلة حتى لا تتكرر ، وأنا معك إذا تدخلت في البداية أطراف نسائية لايتم الإتفاق ونادراً ما يتم لأن نظرة المرأة لمرأة أخرى تختلف عن نظرة من يرغب بالزواج ، والدك وأخوانك هم المسؤولون هم الأولى بإستقبال الخاطب وولي أمره وبعدها تتم النظرة الشرعية وهذا هو الأفضل تجنباً للإهانات والإحراجات ونظرات الشفقة من الجميع عندما لا يتم الرد . |
فعلا دا واقع ومستحيل يتغير ابداااااا
من القصص الا ماانساه جاءت حرمة وبناتها ال 2 اامهم ست كبيرة وجاية تخطب لولدها وولد بنتها اول مادخلت انا واختى قالت ماعندكم نور ابيض ابا اشوف لون البنات:( وتطالع من فوق لي تحت مو عاجبها شي والمصيبه انو بشرتنا فاتحه طبعا وفي الاخر طبعا روحاه بلا رده الحمدلله والشكر لك ياربي والله انا امنيتى العريس هو الا يجي ويتفق الاول ويشوف بعديه اهلو اخر شي:d بس لاحياة لمن تنادى والله يعيين على حياتنا المغلقه:29: |
عاداتنا الكثير منها يبي لها خلع كامل بدون رجعه
|
بالعكس التنسيق حلو .. الحريم ينسقون وبعد اخذ المواقفه يتقدم الرجل بكل ثقه منعا للاحراج ومن ثم النظره الشرعيه
لكن تجي الام وتقول نزلوا بناتكم نبي نشوفهم عشان تنقي يعني فهذا مرفوض كذلك اذا مافي نصيب ذوقيا تتصل الام وتقول الله يرزقكم يجيها الاحسن ان شاءالله اما انها تروح على وجها بدون اعتذار هذا اللي عيييييييييب |
فعلا كلامك في الصميم00
وانا معك قلبا وقالبا00 ولكن احنا غيرنا هالعرف وبكيفنا00 نعرفين احنا وش نسوي لو كلم احد يبغى اخواتي 00 اولا000 نسأل عن الخاطب00 ثانيا000 نعطيه رقم ولي امرها يكلمه00 ويتواعدون بأي مكان00 مو لنا احنا بعد الحق نتفحص الرجال !! ومن يرفض الله يحفظه00 وبالعكس 00 في عوائل تفرح بهذا الشئ00 وتكون النظره الشرعيه 00 انتي شئ ما اقتنعتي فيه لا تسوينه00 والله أن بعض حريم العوايل تناظر لأشياء ثانويه اما لبسك او اثاث بيتك00 ولا جيت هالبيت لها داااعي 00 والرجال هو اللي بيتزوجها00 وهي وياه تصطفل00 ان ارتاحوا لبعض كان بها او يغني الله من سعته00 دمتي بخير غاليتي00 والله يقر عينك بزوج يعينك على طاعته 00 وتكونين في عينه مثل الحوريه00 قولي امين00 |
الله يرزقنا
فعلا اكره هذي العاده جداا تحسين حالك بضاعه!! |
معك في كل ماذكرتي عن نفسي قلت لوالدتي وحسمت امري اي وحدة تتصل وتقول بجي قولي اسفة البنت ماتحب شوفة الحريم وابوهم مايقبل الا بعد مايشوف الرجال ويرتاحله ويسأل عنه امي مو عاجبها كلامي بس انا ماصرت اقبل ادخل وهي تعبت مني واخيرا اقتنعت قلتلها الرزق من الرازق ماعلي منهم والحمد لله انا مرتاحة ومريحة امي من هالمعاناة المقرفة لا وانا وخواتي خمس والهانم مو تبغى احلى وحدة تدخلنا كلنا كاانا غنم وتنساق الي جادة وصادقة بترسل ولدها والي ماعندها غير المسخرة والقهوة بسلامتها على الاقل نوفر ثمن القهوة ومجهود التنظيف هههههههههههه امزح والله..
|
السلام عليكم
معك في كلمة وحرف قلتيها وكنت زيك .... وفي الأخير رفضت اطلع لأي حرمة ..يبي يجي حياه الله ما يبي البيوت مليانة بنات ما عندهم مانع .... لكن .... أمي نبهتني الى نقطة تجعلني أعيد النظر في الموافقة على هذه الطريقة .. قالت ... طيب رفضتي انهم يشوفونك وجا هو شاف بنفسه .... تضمنين إنهم ما يقلبون حياتك بسبب انك مب على كيفهم ؟؟ وكثير بنات تطلقوا بسبب الأم والأخوات مب عاجبتهم ولا على ذوقهم ... |
لا تتعبوا أنفسكم المجتمع ماراح يتغير أقولكم شي عشان ترتاحـون كنسلـوا موضوع الزواج مره وحـده ههههههههههههههههه ياويلي حاسه إنكم راح تذبـحوني عشششان ردي اللزيز ^ ^ |
اختى ,,,,الله يعين على هالمجتمع وكان بودى ارفع معنوياتك لكن فاقد الشىء لايعطيه الحمدالله على كل حال وحسبنا الله ونعم الوكيل واللى يهونها اننا بدنيا وشكرا لك
|
غربه الروح ,,معك حق وفكرت مثل تفكيرك لكن لو حصل وقلنا هالكلام بيرفضون وتكون فرصه وانتهت يا اقبل بهاالمهزله واحط نفسى امام اختيار امه واخته يا ارفض والله المستعان بس
|
بنت مكه,,,من جد اختى والله شى يقهر تحطين نفسك بهالمواقف الى قاهرنى والله ان بالغالب الشاب مافيه مميزات وعلى ايش يجون ويرحون مانى عارفه؟؟؟؟يعنى هو لامؤهل ولا جامعه ممكن او وظيفه عاديه وشكله مقبول واهله عادين واقل من ناحيه الجمال طب ليه ؟؟؟مو فاهمه حسبى الله ونعم الوكيل مو المزعج انهم جو وسيرة وانفتحت بالبيت وتفرجو عليك وراحو المزعج بجد مشاعرك ماتمنيت انى اتضايق او انكسر من جوا الله يعين بس
|
بروق,,,والله انك صادقه ومعك حق والف شكر لك
|
نانى ,,كنت اقول مثلك لكن يانانى بعض النساء غير جادين بالخطبه والشوفه تجى وتلاقينها عندها غيرك كم بيت بتمرهم وتنقى ماتعرف انها دخلت بيت ناس ومشاعر بنت وووو مايفكرون الا بانفسهم كلامك صح لو الوحدة جايه وهى حازمه وجادة ووو وجامعه معلومات تامه ووافيه تجى بس تتعرف وتطل عالشكل هذا بحال ماقدرت تشوفها بمكان عام لو كل وحدة فكرت بالبيت الى بتروح له والبنت الى بتشوفها وكنها بنتها وكيف هى ماتحب لبنتها هالشى ماتحبه لغيرها كان افضل
|
شقرديه ,,,اشكرك ولكن ياختى مشالله عليكم ممكن الى يتقدمون لك يوافقون على هالطلبات لكن ممكن الام تصرح وتقول لا مايتقدم رسمى ويصير شى الا لحد مانشوفها تعجبنا اولا
|
بنت ناس ,,هذا الى اقصدة تمام
رسيل التوفيق بيد ربى وممكن يجون وتعجبيهم ووو ويقلبون حياتك بعد الى فيه شر فيه حتى لو احسنتى اسلوبك معه والطيب والكويس حتى لو كان اسلوب معه ماراح يركزون بهالتفاهات الا اذ كان هم عقليتهم مش تمام والله يعين بس فراق وعشناة,,,ههههههههه وليه اضحك عليك لا والله كنك تقرين افكارى اساسا الفكرة ذى صارت براسى انى الغى الزواج وارحى عمرى كفاااااااااااااايه تعبت بما فيه الكفايه مشاكل ولخبطه وسوالف تنتهى كل مرة اصدق السالفه وتتنهى وكل مرة اقول ذالنصيب ومادرى الا هو منتهى اللهم لا اعتراض والحمدالله على قدر الله والله يرزقنا الرضا وان شالله القادم اجمل والخيرة فيما اختارة الله الحمداالله الحمدالله الحمدالله |
والله طريقة الأخوات روعه ما كنت اعرفها بس الحين خلاص إن شاء الله بقول لأمي عليها..
|
كلامك صحيح في عادات مازالت موجودة
بس بالنسبة لنا عاداتنا غير كان في ناس تتقدم بهالطريقة لما كنت صغيرة يعني 15 و 16 بعدين صرت انقهر واقول لامي انا مو بضاعة تجي امه واخته يتفرجو لانه فعلا ممكن الرجل يشوف البنت غير اهله فصرنا بس يتصل احد نطلب انو الشاب يجي من اول مرة لانو مثل ماهو له الحق في اختياري انا كمان وبالعكس مافيها احراج الاحراج انه امه وخواته يجو وماتعجبيهم وانتي اصلا ممكن تعجبي الرجل نفسه بس هذي عادات صعب تتغير |
حلم الامان ,,,انا معك بعد ان شالله
عاشقه الغالى ,,احنا العادات عندنا بقوة وصعب نغيرها لكن ممكن نرفضها وتقل الفرص ولكن ارحم من الاحساس التعيس الى يجينا يجون ويتفرجون ويمشون |
انا تعرضت لمثل مواقفك ، مواقف بايخة اسميها ، واهلي اجبروني عليها ، يعني مثل مرة كانوا باغيين أختي الصغيرة وامي قالت لهم شوفوا الكبيرة يمكن تعجبكم و انا رفضت من حيث مبدا انهم ما بغوا مواصفاتي وباغين مواصفات مثل اختي ، وجوا وفعلا صارت المهزلة تعبت كثييييييييييييييييييييييييييير ، لاني اول ما دخلت صاروا ساكتتتتتتتتتتتتتتتتين وتغيرت وجيهم وشوي بس ويتفلون بوجهي ، حسسوني انهم موب رافضين لولدهم الا وصلوا لي مسج انتي يا شينة لا تحلمين تتزوجين هيك قريت في عيونهم من يوم زارونا وانا تقريبا مشيت بوزي خلاااااص ، في ناس بعد رفضوني بس بلطافة وهناك طبعا فرررررق ، امممم
تعرفي احنا ليش ما تزوج ، احس لاننا كثير معترضين /: لازم نرضى بقضاء ربي علينا ونسكت احيانا اقول ما بقى احد من حولي ما تزوج الحلوة و المغازلجية ، القبلية والغير قبيلية و الطويلة والقصيرة والسبب قد يكون اني شديدة التذمرررررررررررر وما أمشيييي الأمورررررر يمكن هن صحيح فيهم معاصي لكن ايمانهم بقضاء الله اكبر من ايماني أضعاااف اضعاف خلااااص يبة البارح زاروكـ ناس و طالعو طالعو ومشوا خالاص انتي بعد امشي ومشي حياتك بكرة بيجي لبناتهم يوم |
أنا مثلك كرهت الحريم
|
فضيله 25__بصراحه موقف بايخ لكن الشكوى لله الى مايشترى يتفرج انا لله وانا له راجعون الله يعوضك وكل شى باجرة وعلى قولتك الايمان بالقدر موهم جدا الله يرزقنا اليقين والتوكل
|
عازف الاوتار ___انت شاب زى مافهمت من معرفك لو توضح اخوى ليه كرهتهم وش الاسباب وتعرضت لشى معين امك خطبتلك وماطلع الى ببالك ولا كيف !!
|
موضوع شيق ومهم جذبني للمشاركة فيه..
الاخوات كفوا ووفوا فيما قالوا.. وهناك طريقة متبعة لدينا .. هي اذا اتصلت اي أم اولا يتم السؤال عن الشاب ومواصفاته اذا كانت ضمن المواصفات المطلوبة من دين وخلق ... الخ عندها يبلغ اهل الشاب بالتفضل للزيارة والتعرف على الفتاة المراد خطبتها ... ويجب أن يأتي الخاطب كذلك ليتعرف عليه والد الفتاة.. وإذا اتصلت ام الخاطب وكانت مواصفات الخاطب ليست ضمن المطلوب فعندها يتم الاعتذار من والدته بدون ان تتعب نفسها بالمجيء إلى المنزل.. همسة: عادات المجتمع نحن من نصنعها بأيدينا برضوخنا لها أو بالوقوف امامها. لاننا نحن افراد بمجموعنا يكون هذا المجتمع.. |
عاقله ورزينه ,,,طريقتكم حلوة لكن البعض تقولك انا لسى بشوفها تعجبنى اولا ومستعجلين وصعبه تسالون وهى اساسا ماقررت توافق عليك اولا
|
هلا اختي اه ياروحي انا..
لا عزيزتي .. هي الأم تقول مستعجلين كيف يعني راح تجي في نفس اللحظة يلي متصلة فيها؟.. اكيد بتجي بعد كم يوم او حتى بكرة وفي هذه الفترة ممكن السؤال عنهم.. وكمان لما تتصل نقول لها اول نعرف مواصفات ابنك المبدئية حتى نحن نوافق وبنتنا توافق وبعدين يصير خير.. والله مو ضروري كل وحده تبغى تخطب تجي تشوف ونحن ما نعرف عنهم شي ومو ضروري تعجبها ولا لا.. اولا نحن نكون مقتنعين فيهم وبالخطيب المتقدم بعدين الله ييسر اذا تبغى تتفضل.. |
جبتيها عالجرح |
القصة مو بطريقة الخطبة بالعكس تماما الأم تربي وتتعب وتسهر على ولدها بعدين نستخسر فيها تخطب لولدها وتروح لبيت الناس ليه يعني هذه أمه ؟؟
القصة في طريقة اسلوب الخطبة وذوق الناس الي بيجو يخطبوا يعني المفروض تدق الأم على الناس الي ودهم يروجو لهم مجرد تعارف وزياره عادية وبعدين أذا الأم عجبتها البنت تفاتح أمها بالموضوع يعني الأم بعد تكون عارفه ولدها وش يبي يعني من غير ماتاخذ معها الخوات ومن غير نظرات واضحة أو غمز وغيره أصلا جرح المشاعر الله مايرضى فيه أنا يوم راحت أمي تخطب لخوي مارحت معها ولادخلت في الموضوع الا لما صار العقد أهم شي مراعاة المشاعر حتى زوجت أخوي الحين ماأقول كلمة الا لماأفكر أذا أنقالت لي بزعل أولا يعني القصة قصة أسلوب وذووووووق والناس الي تجي تخطب وعليها حركات مالها داعي أصلا فرقاهم خييير |
احنا من الناس اللي تعبنااااااا واحنا نخطب لاخوي ياليتهم يطلبون الشوفه الشرعيه لالالا على طول مدخن لالالالالالااو
لا من دون سبب قبل حتى الشوفه تحطم مسكيييين خلاص تعب وغيرهم من بعد الفحص يرفضونه بسبب التهاب الكبد وانا قدسمعت انو كثييييير من الشعب السعودي مصاب فيه واهم شي ان الزوجه تاخذ تطعيم ضده وخلاص بس من حظنا نخطب من ناس ماقد سمعوا فيه والمسكين تحطم يقول شكلي باجر شقتي ... سؤالي تعرفون التهاب الكبد يابنات والا لا ...وهل ترفضون المصاب فيه حتى لو كان خاااااامد... عائلتنا كثير فيها ومتزوجين ... معليش احس هذريت ووواجد.. |
ينقل لقسمه الأنسب
|
قلب القمر بالنسبة لمرض الالتهاب الكبد الوبائي فيمكن يكون سبب الرفض الطريقة اللي صار له المرض فيها يعني هذا المرض يكون عن طريق الاتصال الجنسي المحرم او الشذوذ اوعن طريق ابر مخدرات او انتقال دم ملوث فالعوائل ترفض عشان تخاف من الطريقه اللي وصلته للمرض
|
اختي عيون خضر اخوي بسبب وراثي اعتقدلان امي وخوالي فيهم ووقتها ماكان فيه تطعيم ضده من بعد الولاده انا واخواتي اللي بعده مافيناشي بسبب التطعيم لان وقتنا صار من ظمن التطعيمات تطعيم التهاب الكبد...او من الحلاقين قبل اتوقع مافيه نظافه....بس الحمدلله الاشياء الثانيه اللي ذكرتيها مستحيله....وامي مصابه فيه اعتقد من عيادات الاسنان ...
الله يوفقه ويرزقه.. |
عاقله ورزينه ,,مرة حلوووو وفكرت فيها قبل والله يكتبلنا الخير النصيب نصيب لو مهما الواحد يعمل الله المستعان
|
روحى مجروحه,,,ان شالله تطيب جروحك وجروحى يارب والحمدالله على كل حال فضل ربى وكرمه ورحمته علينا واسعه وماتضيق الا تفرج باذن الله وماذلك على الله بعزيز بس الله يرزقنا الرضا والقناعه والاحتساب والصبر يا اختى واسفه قلبت مواجعك
|
ندى ,,,صح كلامك بس من يسمع وللاسف يا اختى انتم ذوق واحنا بعد عندنا اخوان وخطبنا لهم بمنتهى الذوق و بس الادب وحسسنا البنت واهلها اننا شارينهم مو مثل ماقاعد يصير معنا كنهم يمنون بولدهم والحمدالله لعله ابتلاء وربى يرفعنا ويعزنا من عندة يارب وواضيف على كلامك انو ممكن يشوفها بمكان عام او مثلا مقر دراستها او عملها بدون ماتحس وكذا افضل وتجنب الاحراج للجميع
|
قلب القمر ,,,الله المستعان يا اختى اعرف برضو انو فيه شباب تعانى لكن بنسبه اقل من البنات وكله نصيب من ربى الله يرزق اخوك ويشفى الجميع يارب ويوفقنا والحمدالله على كل حال
|
ام عيون خضر,,شكرا لمشاركتك ووالله يوفق الجميع ويعافىنا والمسلمين اجمعين ويكفينا الشر يااااااااااااااااااارب
|
اقتباس:
صح كلامك بس أذا البنت غير موضفة وغير طالبة وكمان منقبه فمافي طريقة يشوفها غير الطريقة التقليدية الله يوفقك ويرزقك ربي ماتتمنيه |
| الساعة الآن 10:40 PM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©