|
ماهي حقوقي كزوجه ثانيه
السلام عليكم ورحمة الله وبركاته
ارجوا من من عنده علم او خبره ان يساعدني ويوجهني الى الطريق الصحيح انا متزوجه من رجل متزوج وله 5 اطفال لي شهر تقريبا وهو متزوج من 20 سنه ماهو حقوقي في السكن والنفقه والمبيت علما باني في مدينه وهو في مدينه اخرى مع زوجته الاولى وهو مقتدر من الناحيه الماديه شكرا وفي انتظار ردودكم |
العدل بالعربي كل الي عندها يكون عندج هذا راي الدين والعدل بالمبيت يعني يوم عندك ويوم عندها وعدل بالمصرف
|
حقوقك زي حقوق الاولى بالضبط
مافيها كلام هذي وليش تعيشي بمدينة وهو بمدينة ؟ ليش ماتكوني جنبه ويكون ليلة عندك وليلة عند الاولى ياختي لا تتهاوني بهالامور والا بعدين بتصيرين على الهامش ودام ظروفه المادية كويسة اسكني معه بنفس المدينة والي عند الاولى بيكون لك العدل هو اهم شى بالتعدد |
والله مسكين الي يتزوج 2 احسوو يندم لووول
|
انا قلتله المفروض تصرف علي مثلها بس هو يقول هذا مو عدل لان هي عندها 5 اطفال وانتي ماعندك انا اعطيها مصروفها هي والاطفال
والبيت هو يبنيلها بيت وانا ساكنه عند اهلي يقول بعدين نستأجر والمبيت هو يجيني في الشهر مره تقريبا وهذي اعذره فيها لبعد المسافه بس مالي حقوووق ابد يعني ايش اقوله كيف اقنعه يصرف علي |
وعلى فكره ما اقدر ازور اهله ولا اجتمع فيهم لان زواجي ما اعلنه لاحد حتى هي ماتدري
|
اختي وربي حرام عليج المفرووض المبيت يتساوي معاج يعني ليله عندها وليله عندج او سبوع عندها واسلوع عندج
والمصرف لازم يعطيج زيها قولي له انت تبعد عني وانا محتاجه اشتري كذا شغله انت مسؤول عني وقولي له ربك يحاسبك واضغطي عليه علشان يعلن الزواج انتي زوجه مو صديقتو على شان مايعلم احد |
اقتباس:
هو يعطيني مصروف قليل ولما يخلص اقوله انا محتاجه انت مو عندي يسويلي سالفه ويمكن يعطيني بس لما اكره نفسي انا مستحيه من اهلي قاعده عندهم وهم اكثر الوقت يصرفون علي وانا ماعندي بيت ولا قد حسسني اني زوجته |
يخاف من زوجته ؟ اختي انتي قولي له مدام خايف ليش تزوجت وترا مو حلوه الرجال يخالف المفروض له شخصيته
وقولي له زيد المصرف مايكفي انا شغاله عندك ولا زوجتك وقولي له احمد ربك ماقلت لك ابي بيت وتجي عندي كل يوم على الاقل قدر وعطني فلووس لاتتهاونين معاه ترا وربي احس انك مضيعه عمرك حرام عليج ماايجي لج بالشهر الا مره ومقصر كمان الله يصلحه لج |
اقتباس:
وكيف يزورك بالشهر مرة عسى ماشر ومن اهم شروط الزواج الاشهار ليه ساكت ؟ ترضين على نفسك كذا؟ :( |
مع الأسف يا أختي جيتي تطالبين بحقوقك في الوقت بدل الضائع ... تزوجتي لا أمنتي بيت ولا أمنتي حقوق والحين جيتي تطالبين بها !!! ليش مالك خبر ان زواجك يشبه زواج المسيار اذا ما كان هو المسيار بعينه !!! كان المفروض تطلبين نقلك لمدينته ويأجر لك بيت ويعلن زواجه منك ويقسم بينكم بالعدل بالمبيت والنفقة ...الخ بالنسبة للصرف لا طبعا ما يصرف عليك مثلها كلامه صحيح هي عندها 5 اطفال وانت وحدة طبيعي هي تاخذ اكثر منك وهو قالك انه يعطيها هي وعيالها مع بعض ...وممكن اذا حابة تسألينه من مجموع الفلوس اللي يعطيها اياها هي كم لها !!! اذا قالك مثلا لها 500 صافية, والباقي للعيال يعطيك 500 مثلها مع الأسف يا أختي انت دخلتي نفسك بمقارنة خاسرة لاني مع احترامي للمعددين ولكن أغلبهم يقدم زوجته الأولى والثانية ما يعطيها حقها مجرد للاستمتاع ...بالذات اللي متزوجة بمثل ظروفك الله يصلح ما بينكم واتمنى من كل قلبي انه يتغير ويعطيك حقوقك |
الماضي الدفين الله يهديج البنت تبي نصيحه ماتبي كلام يزيد حالتهاا
|
أهم شئ يعدل بينكم أنتي وهيه بعدين كيف مالك حقوق إلا لك حقوق ونص وليش متزوج بالسر إذا كنت أنتي وافقتي على هاذي الأشياء مثل إنه أهله وزوجته مايدرون عنه إنه متزوج وراضيه يجي عندك بالشهر مره فتحملي النتائج إلا بتتبع مثل هالزواج أول شئ المفروض يجيبك عنده في ديرته ويستأجر لك ثاني شئ يحاول يقول لأهله وزوجته بالصدق إنه تزوج ليش يخفي عنهم وبالنسبه لمصروف زوجته نعم يزيدها علشان عيالها لاكن بالنسبه لأي شئ يخص زوجته الأولى يعطيها فلك مثلها حتى لو أعطاها عود ثقاب يعطيك مثلها
بعدين بقول لك شئ وأنتبهي أحيانا بعض الأزواج الواحد يتزوج بالسر عن زوجته وأهله ويوم يعرفون عنه وتشتد ضغوطاتهم عليه تراه يتخلى عن زوجته إللي أرتبط فيها إرضاء لأهله وزوجته الأولى ويسميها نزوه فإنتبهي من هاذي النوعيه هو تزوجك بالحلال مو عيب ولاحرام والشرع حلل له أربع ومن حقه يتزوج ويعلن زواجه إلا إذا كان زواج مسيار الله أعلم أنت إنتبهي لحقوقك ولاتتساهلين فيها بكره يجونك عيال ومسؤليتك تكبروعيالك بحاجة أبوهم يكون جنبهم ويتربوا معاه ويكون مسؤل عنك وعن عيالك حالك حال زوجته الأولى وعيالها .أسأل الله لك التوفيق والسداد. |
اقتباس:
يا رجل أضحك عليها وأقولها بيعطيك حقوقك وما بيقصر !!! على فكرة اللي مثل زوجها كل ما طالبت بحقوق كل ما نفر منها لانه يبي الزواج بالسر وبالطريقة اللي هو يبغاها , ويبغاها هي ساكتة وترضى باللي يقدمه لها ... اللي هذا أوله ينعاف تاليه والمكتوب مبين من عنوانه ومن حقها علي انها تعرف الحقيقة اللي هي تعيشها ومع هذا ما يمنع انها تحاول معاه يمكن يكون فيه بصيص ايمان وقلب حي ويعلن زواجه ويعيشها كزوجة حقيقية برايي ما اطالبه الحين بشي اتحاول تجذبه لها قدر المستطاع ويوم تشوف نفسها غالية عليه يمكن ذيك الساعة تقدر تطالب بشي ... وبكلامك معاه لا تقارنين بزوجته ولا تذكرين شي تكلمي عن نفسك وبس كذا افضل لان مبدأ المقارنات ما يثمر مع الرجال الله يوفقك |
السلام عليكم
اختي مطلقه انا مادري شلون وافقتي على هذا الزواج الغير معلن !!!!!!! وتسكنين عند بيت اهلج بعد؟؟؟؟؟؟؟؟!!!!!!!!!!! عموما هذا اختيارج اشوف يااختي تناقشينه بكل هدوء بحقوقج من سكن ومبيت وتذكرينه بالعدل واذا مافاد خلص دخلي اهلج ترا موصالحج تفرطين بحقوقج وتقبل مروري |
اقتباس:
اختي اانا وياج بس البنت شذنبها يمكن ظروفها الي خلتها توافق انتي مو عارفه الغيب وانا كل الي طلبته احنا انرد على اسألتها بدون اي عتاب لاتزيدين عليها فوق الي اهي عليه |
لا تسكتين على وضعك يايكون زواج مثل الناس ولا بلااه
الله يعينك عليه |
حقوقك نفس حقوق زوجته الاولى بالضبط في السكن و النفقة و المبيت ،،،
كونه يزيد الاولى من اجل مصاريف الاولاد فهذا امر طبيعي و بديهي ، لكن يجب عليه ان يعدل في المصروف الشخصي الخاص لكل واحدة فيكما (بعد خصم مصاريف الاولاد و الاكل و الشرب) ،، يعني اذا كان يعطيها الف مصروف شخصي يجب عليه ان يعطيكي الف ،، يبدوا لي ان مشكلتك ليست في النفقة بل في طبيعة زواجك معه حيث ان ظاهره زواج مسيار حيث هو في بلد و انتي في بلد ، يزورك في بيت اهلك ، متكتم على الزواج و لم يعلم احد من اهله !!! اكثر ما اخشاه ان يكون ناوي في نفسه زواج مسيار و انتي نايمة في العسل على نياتك !! انصحك بالمطالبة بحقوقك و عدن التنازل عنها ابدا و اهمها السكن و المبيت و اعلان الزواج |
ماذا أردتي من هذا الزواج؟
ما هو هدفك بالضبط؟ |
انا تزوجته بعد الوعود الي عطاني اياها
قال بيحطلي بيت وبيجيب لي خادمه عشان يخاف علي لحالي ""الله من النصب"" قال بيعلن زواجه ولكن ليس في الوقت الحالي وبعد زواجي منه اكتشفت ان زوجته المركز الاول ولا يبيها تحس بشي ابد اصلن اختبرته كذا مره وكل مره يطلع جبان وخايف منها لدرجة انه ما يبي عيال مني وحريييييص من هذي الناحيه قال بيجيني كثييير لكن للاسف مايقدر يجيني كثير لان زوجته تسويله مليون سالفه لو يسافر اي مكان يعني باختصار انا تزوجت واحد ولد زوجته عنده رعب منها ويهتم لزعلها بشكل مو طبيعي ياعالم هو يقول يكرهها كيييييف يكرهها وهو ما يقدر على زعلها حسبي الله ونعم الوكيل على كل واحد معدد ومايقدر يعدل في ابسط الامور انا الحين اعيش في حسره فظيييعه ومتفشله من اهلي كل مره اصرفله واقول مالقى بيت مايقدر يجي ضروف بس لمتى؟؟؟؟؟؟؟؟ المشكله اني اقول له كلام كثير ويرجع يوعدني بامور كثيره بس ما اشوف منها شي والسبب خوفه من زوجته انا انحديت اني اتزوجه لاني كنت مطلقه وام اطفال ومالقيت قدامي الا هو وكان عاجبني ما كنت اعرف عن شخصيته دلوني الله يخليكم وش اسوي الله يرحكم حالكم |
أختي أنتي متفقه معاه على عدم إنجاب الأطفال؟
كم عدد أطفالك؟ هل أنتي موظفه؟ هل هو قريب من العائلة أم لا تعرفونه قبل الزواج؟ أطفالك عايشين معاك والا مع أبوهم؟ كيف تم الاتفاق على الزواج ومع مين من أهلك تم الاتفاق وهل هناك شهود؟ |
اقتباس:
|
لماذا وافقتي على البقاء عند أهلك وأطفالك ما يعيشون معاك؟
لماذا وافقتي على أن يكون زواج بالسر؟ |
أكثرت عليك ... أنا آسفه حقاً
أرى أن تتريثي قليلا حتى يستوعب هو موضوع الزواج ويبدأ يفكر بجديه هل سيمضي فيه أو يقف لذلك اصبري فتره ثم اطلبي إعلان الزواج والسكن مع زوجك إذا أردتي أخذ حقوقك كامله أما إذا أردتي ان تبقين كما أنتي عند أهلك أو ببيت قريب منهم ويجيك كل فتره فإهدأي وطولي بالك لين تتحسن الأمور |
اقتباس:
وليس له نيه ابدا باعلان الزواج والحين انا تزوجته وتوهقت |
المبيت ما تقدرين تطالبيه انه يبات عندك مثلها لانه عندها اولاد
و هذا حقهم بلمبيت اما مساله انه يخاف منها لا ما يخاف منها هو لان عنده اطفال كبار مراهقين يخاف على مستقبلهم من الخلافات ووجع الراس خليكي متحمله وصابره و ارضي بنصيبك و ادعي من الله ان يفرجها عليكي بس لا تنكدي على نفسك و على زوجك بكثره طلبك ان يعلن زواجكم هو يعرف حاله و نفسه متى يعلن زواجكم و من الان احسبي كم يكفيكي بلشهر بلمعقول و اطلبي منه يترك مبلغ للطوارئ |
اقتباس:
شكرا لك والله يجعلها في ميزان حسناتك وكل من رد علي يارب |
اقتباس:
سامحيني لكن اللي كنا خايفين منه وحذرناك منه حصل ... وكنتي شاعرة بأن هذا سيحصل ولكن خوفك من عدم الزواج جرفك ... أما الآن وقد سبق السيف العذل فأمامك طريقان أحلاهما مر ... إما الرضا بالوضع الحالي مع محاولة جادة وحازمة من قبلك معه بإخبار زوجته .. والصبر على مماطلته أو كذبه أو أن تأخذي على عاتقك هذه المهمة بايصال الخبر للزوجة ... وتحمل نتائج ما قد يحدث من زوجته الأولى مع احتمال أن يضحي بك من أجلها في النهاية ... وكل ما سبق هي نتائج متوقعة من زوج مثله ماطل منذ البداية واستغل ظروفك بشكل فاضح وواضح .. الله يسخره لك ويقدم لك ما فيه الخير |
الله يكون بعونك
امثالك كثيييير في هذا الزمن المبارك00 الله يهديه لك 000 غصب عنه 00 قولي امين |
الضحايا مثلك كثير في هالزمن
حطي في بالك مافي رجال يتزوج ثانية بالسر وهو يبيها زوجة دائمه يعني اسمحيلي على هذي الحملة (يبي يستمتع واذا مل انهى الموضوع كان شيئاً لم يكن) انصحك حاولي تنجبين منه لان الرجال مايلين قلبه ويطيحه غير العيال احتالي عليه اذا هو يعزل قولي العزل يحرمني الاستمتاع معك واخدعيه انك بتستخدمين مانع ولا تاخذين ولا تناقشينه ولا تقولين اعدل ولا شي لين يجيك اول مولود وقتها غصبن عنه يعترف |
النصيحة الثانية في حالة انك ماتبين عيال ايضا
فاقول وش حادك عليه الا اذا تبين تعفين نفسك هذا شي ثاني |
سبحان الله انا امي زوجه أولى ابوي لما تزوج الثانيه خبرها على طووووووول من الملكه
تزوج وامي كانت صااااامده وكانت تقوووم بجميع متطلباتنا لأن الرجال لاااااهي هجرها يمكن 4 شهور بداية زواجه من الثانيه ورجع لها وبعدين رجع هجرها !!! سنييييييييين ونسى انه عنده أطفال محتاجينه يتعبون ومايوديهم للمستشفى الا الغاليه تدق عليه يقطع التلفون بوجهها من دون ادنى حق كأن هالعيال موب عياله عيال الجيران تبغى تقوله تعال ولدك تعبان او بنتك تعبااانه يتمللل ويقوووول تهووولووون السالفه لكن اولاده من الثانيه شايلهم من فوق الارض لو يتعب واحد منهم جري على المستشفى واليوم الثاني يقوووولنا سالفة اخونا التعبااااااااااااان ونتذكر كيف امنا يوم من الايااااام رايحه تررررركض في الشارع في نص الليل واخوي او اختي تعبانين من الحراره والانفلونزا وكيف كانت رجولها تتعب وتتقطع لما كانت تمشي الى ان توصل المستشفى وكيف كانت تركب مع اي واحد يمر بالشارع علشان يوصلها للمستشفى - ماتدري هالواحد سيء او جيد - بس لأجل عيالها يهوووون كل شيء ويلوموني الناس ليش اتحسس من الزوجه الثانيه ويلوموني الناس ليش في نفسي كره للمعددين في زمنا هذا استمر الهجران والنكران والاستخفاف بالغاليه اللي تحت قدمها الجنه سنين وسنين واخرتها الطلاق حل على البيت المتهاااااااالك وبدأو الناس يحكووون وينهشون هالضعيفه بألسنتهم القذرة والرديئه مافيه احد مرتاح لا زوجه اولى ولا ثانيه مادام الرجاجيل عندنا اسلوبهم - الهمجيه والانانيه - ولكل واحد يقرا ردي اتقي الله في الحريم اللي تجمعهم وتذكر اليوم اللي تجي فيه وشقك مائل قدام جميييييييييع الخلق |
قلبي معك الله يعينك ويسخرلك زوجك
تتنازلين في سبيل الاستقرار وبالنهاااااااااااااااية ؟!! الله يعينك ويصلح حاااااااااالك |
هلا أختي صدقيني وضعك أحزنني لأني أشعر تماما بوضع المطلقة وما تعانيه من ضغوطات ومع هذا يا أختي أنا لا أبرئك أنت رميتي نفسك رمية شينة كل شي كان واضح لك من الخطوبة ومع هذا جازفتي في مستقبلك ... المرأة لما تمر بتجربة زواج وطلاق تتغير كل مفاهيمها عن الزواج وتصبح تبحث عن الجوهر ولا يهمها المظهر عكس البكر اللتي تنتظر الحفل والفستان وما خلاف ذلك ... همومها تنصب على الاختيار الصحيح , واما ان يكون صحيحا أو لا يكون أبدا .... وليس زوج والسلام أنا نصيحتي أكررها لجميع النساء موافقة أي مرأة على معدد ينبغي أن تكون ضمن حذر شديد وضمانات كثيرة , حفاظا على نفسها , لان القصص التي تقول انهم يتزوجون فترة ويطلقون كثيرة جدا لا تعد ولا تحصى ... فاذا كان هذا المعدد عادل ويخاف الله فيها كان بها والا لا تجازف بنفسها أبدا ... ومشكلات زواج المعددين كثيرة ومستفيضة ... بالنسبة لحالك الان حاولي اجتذابه اليك بما تعرفينه محبب له , وكما قلت لك سابقا لا أرى ان تضغطي عليه بموضوع الاعلان وتكثري الحديث معه عن حقوقك الناقصة فتقلبين زواجك الى نكد وكأني أراك كل ما اتصل بك قلتي اعلن اعلن ووحقوقي وتقصيرك بي وموشح الزوجات الممل المطفش , وهو متضجر من هذا الامر وتعلمين مدى خوفه من الاعلان وانكشاف الامر ,ثم لما يضجر سيقول مالي ومال وجع الراس ويطلقك وينهي امرك ويادار ما دخلك شر ... يعني لسان حاله يقول جبت لنفسي نكد ولاني متهني وحاط نفسي في ضغوط مع ام العيال وخوف وقلق على الفاضي !! توقفي عن مطالبته بحقوق بل كلميه عن شوقك اليه ورغبتك فيه ومن هنا تدرجي وقولي والله ما عاد اطيق بعدك وحاولي ان تنقلي الى مدينته فيمر عليك بالنهار وهكذا تدرجي شوي شوي الى ان تعرفي معدن الرجل اللي امامك هل سيعلن زواجك او لا ولكن اهم امر هو ان تكوني قريبة منه وبالتالي سيستطيع ان يمر عليك كل يوم لو ساعتين وتكوني قريبة منه وتسدين النواقص التي يعانيها هو في حياته ... وقتها قد يتعلق بك ويحبك ويبذل مهجته لأجلك ادعي ربك يا اختي واساليه ان يصلح لك زوجك اضافة لك أختي لا تظنين انه فصيلة زوجك ينربط بأولاد والله العظيم يطلقك ولا عاد تشوفين رقعة وجهه لا انتي ولا ولدك اياك تتهورين وتحملين لان الطلاق مع هذه الشخصيات واارد جدا .. انتبهي من التهور |
حقوقك متل حقوق الاولي وهي انا بدور ع وحدة تانية بدي اتزوجها لاني مش عايش مع الاولي ويمكن اشوف السعادة مع التانية
حقوقكي يجب ان تكون متل حقوق الزوجة الاولي دون نقصان اي شئ ليش يعني هي كاينة احسن منك |
يا جماعه الخير
اتركو الحرمه تعيش حياتها الي اختارتها لا تزيدو عليها هدوها و خلوها تحافظ على بيتهاو استقرارها انتو بهلطريقه ما بتساعدوها تحل مشاكلها و تاخذو اثم مساعدتها لخراب بيتها هيه بساعه عصبيه قالت السيئات ما قالت حسناته و هي ادرى فيه و باخلاقه منا و حرام نحكم على نيه الرجال شكلكم حطيتو نفسكم بمكان الزوجه الاولى اختي استشيري موقع زواج و شيوخ احسن يدلوكي على احسن الطرق للمطالبه بحقوقك من غير ما تخربي على بيتك و نفسك |
شوفي أنت حاولي معاه بالطيب وبلين وإذا شفتيه ما أعلن زواجك ورفض أنا عندي لك حل بس لاتسوينه إلا إذا حسيتي بأنك أنت مليتي من طريقته معاك وصار ماعاد يهمك أعلن أو ما أعلن يعني تحسين نفسك عافته وماعاد تقدري تستحملي وضعك يعني أما إعلان أوفراق
خذي عقد زواجك منه وصوريه وحطي صورته بأي مكان في شنطته أو جيب واحد من ثيابه بحيث إنه ماينكشفه وخذي رقم زوجته من جواله وخليه حتى يسافر لها وبعد ماتتأكدي إنه وصل عندها بحفظ الله ورعايته أتصلي عليها وقولي لها بسألك عن زوجي وصل وإلا لسى طبعا بتسألك أنت مين قولي لها فكي شنطته وفتشيها وفي مكان كذا ورقه أخذيها وأقرأيها وأنت تعرفي أنا مين وسلميلي عليه وخليه يقع بشر أعماله وبعدها هتشوفي إنه بيعترف ويواجه زوجته ويتمسك فيك وإلا يتهرب ويضحي فيك والله إني ما أمقت إلا هالنوعيه من الرجال طيب ليش مغلب نفسه ومتزوج بنات الناس مو لعبه بيدينه الحين لو قدر الله وحملتي لاتقولي مانع قدرة ربنا فوق كل شئ أنت بتضمني مستقبلك مع إنسان بهاذي الشخصيه ليش زوجته لوعرفت بتذبحه يعني من حقه يتزوج مالها حق تمنعه من شئ مشروع له لاكن شكل زوجك لايحب الأولى ولايحبك هذا يحب نفسه وبس يبغى راحته بيغير جوعلا هواه عاد إذا أنتي تحسين نفسك راضيه بالحال ذا الله يوفقك لاكن عواقبه غير مضمونه أقل شئ ياخذ لك بيت عنده ويسكنك فيه ويصرف عليك ويبقى يمر عليك كل ماسنحت له الفرصه إذاكان مايبغاها تدري حتى الله يفرجها عليك ويهديه ويقوي قلبه ويعلن زواجكم قدام زوجته وأهله وبصراحه الرجل إللي مو قد المسؤليه لايتزوج ويظلم بنات الناس معه وألوم البنت إللي توافق تتزوج بهاذي الطريقه اللي مافيها أي أحساس بلأمان والإستقرار ومافيه أي ضمان لمستقبلها مع هاذا الزوج إللي ماهمه إلا نفسه ومصلحته وبس طبعاسوي كذا لومانفعت معه كل الأساليب والحيل وأتحملي نتائج هالتصرف مثل ماتحملتي مغامرتك في زواجك منه الله يعينك وينصرك عليه في إظهار الحق . |
اقتباس:
الوعود التي قطعها على نفسه كانت لك انت فقط بعد العقد ام شروط مع اهلك منذ كتابة العقد.. ام وعود بعد الزواج,,, طيب لو هو وعدك فترة العقد ليه سلمتي نفسك له وما نفذ وعده وكيف اهلك ما تأكدوا من وجود البيت يعني السكن قبل انك تتزوجيه.. واضح جدا من هذا الزواج انه المسيار بعينه وتزوج فقط من اجل متعته هو.. ....... اختي ممكن اعرف كم عمرك وظروفك الاخرى غير انك مطلقة وام اولاد... يعنى حتى لو لك ظروف سيئة اكيد فيك مميزات جميلة انت غفلتي عنها.. كان الله في عونك.. |
اشكركم من كل قلبي على وقفتكم معي جعل ربي يوقف معكم في كل حوائجكم
انا قريت ردودكم كلها ولكن هذا ردي عموما على الجميع صدقوني مافي شي يضمن اي رجال في الدنيا يعني انا في البداية فكرت اني اشترط عليه يكتبلي بيت باسمي واستشرت كثير وكلهم قالوا انو لا بيحس وقتها كانك تزوجتيه عشان ماله اتفق معه الوالده على ان الزواج لا يتم قبل وجود سكن وطبعا كان اتفاق بالكلام فقط وليس شرط وهو كان يماطل كثير وانا صدقت بس ما ادري انو يماطل واكتشفت بعد الزواج انو ما يبي يكون له سكن في غير منطقته ولا شي يربطه مثل عقود بيع وشراء ولا استئجار لانه خايف من زوجته هي تراقبه بشكل فظيييع وتعرف عنه كل شي سؤالي لاي احد فيكم تخيل لو انك كنت وحده مطلقه صغيره وجميله ولكن عندك اطفال تقدملك واحد مدحوا في اخلاقه واعماله وتصرفاته كانه ملك منزل من السماء وفي نفس الوقت هو كان يوعدك بحياة كريمه وعز تم الاتفاق واحضر شهود معه ووعد اهلك ان بيجي يوم يعلن الزواج ولكن حلو ان الواحد يتمتع بداية الزواج بدون مشاكل جا يوم الملكه وتحدد الزواج وكل شي تم بهدوء السكن يحلف انه يدور ولكن مالقى ومازال البحث مستمر وش تسوي لو صرت مكاني؟؟؟؟ عادي تزوجته وبديت انصدم في الواقع المرير الرجال خايف من زوجته ويحسب لها الف حساب حقوقي كلها ضايعه ولما اطلب منه شي يحلف انه بيسويه في القريب العاجل اهلي محتارين لانهم يشوفون شي ويسمعون منه كلااام عسل الي نصحوني قبل اني ما اوافق والله كنت متردده واذا قررت ارفضه شي يردني واستخير وارجع اوافق يمكن لانه نصيبي مميزاته: حنون وطيب واخلاقه عاليه عيوبه: وعوده كلها في الهوا والكلام الي يقوله ماادري هو صحيح او لا واهم عيب فيه انه خواااف ويحسب الف حساب لزوجته كانها امه مو زوجته انا مميزاتي:جميله بشهادة الجميع صغيره في العمر رشيقه مثقفه اهتم فيه وادلعه واعطيه كل الي يبيه وافكر برضاه وسعادته ومابقى كتب ما قريتها ولا مواضيع عن الزواج والحركات الزوجيه وماطبقتها له وماقصرت معه ابد ابد عيوبي: حبيته :( "يضرب الحب شو بيزل" انا ما ادري ادور علاج لنفسي واغير تفكيري واكرهه مثلن واقسى على قلبي عشان ااخذ الي ابيه؟ ولا ادور علاج لخوفه من زوجته واساعده انو تقوى شخصيته شوي عشان يعطيني ويعطيها حقوقها بدون ظلم؟ فكرة اني انجب اطفال منه حلوه لانه يمكن يحس اني زوجته مو مجرد عشيقته او وحده ماله دخل فيها بس فكرة اني احط العقد في شنطته وادق على زوجته قووييييييه يمكن فيها موت وحياة وما ابي اغلط معاه بشي عشان مايمسكها علي او يكرهني الله يعين ويفرجها علي وعليكم هذا وضعي كله كتبته لكم بين يديكم والله ماقصرتوا الله يفرج عنكم مثل ما انتو حسستوني ان لي اخوه و احد اشكيله |
اقتباس:
صدقت بكل كلمة قلتها انا انحصر تفكيري الان في شي واحد وهو حقوقي وصرت ما افكر بشي ثاني ابد بس لان ضروف الحياه تجبرني يعني كل ما اصحى من النوم واتذكر اني في بيت اهلي وانا متزوجه انقهر كل ما ادق عليه والقى الجوال مقفل عشان ما تدري زوجته انقهر كل ما اروح بشتري شي واتذكر ان ما عندي فلوس ولازم اخذ من اهلي انقهر كل ما احد يسالني متى بيجي؟؟ انقهر ان شاءالله انه يحبني ويتعلق فيني يمكن امور كثيره تتغير والمشكله اني ما ابي اتطلق والله مرارة الزواج ارحم بمليون مره من الم وعذاب المطلقه |
| الساعة الآن 02:15 AM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©