|
مخطوبة ترغب بالانفصال لعدم الاقتناع
السلام عليكم ورحمة الله وبركاته
في البداية اود اني وضح لكم انه ابغى مشورتكم ونصيحكتم لوحده من المعارف مقربة لي. هي بنت عمرها 23 سنة على قدر من الدين والخلق وجامعية وحافظة القران كامل وتحب العلم مره ولها انشطة في المجتمع وعلاقات جيدة ومن اسرة متدينة ومتعلمة ومتواضعة. المهم تقدم لها رجل كبير شوي اكبر منها بعشرين سنة او اقل بكم سنة متزوج وعنده اولاد بس مراته واولاده في بلد ثاني بعيد عشان دراستهم وهو مستقر بعيد عنهم في بلد اخر يلي فيه البنت المخطوبة عشان شغله ما يزور اولاده الا مره في السنة. هو متدين يصلي في المسجد وحافظ له كم جزء من القران وغير مدخن وموظف شغله كويس وكريم وعاطفي مره وذكي هذي ايجابياته. المهم صارت الملكه او العقد والبنت مو مقتنعة فيه ابد لفارق السن ووجود الزواج الاول والاولاد بس صار العقد بضغوط الاهل لانه متدين وما يتفوت وهو وصف حاله فوق الخيال قبل العقد ووعد وعود عشان يقنع اهلها فيه. وفي فترة العقد اكتشفت البنت فيه اشياء ما عجبتها وزادت من تخوفها وعدم ارتياحها من زواجها منه هي تقول انها تشعر انه ما يناسبها ابد افكاره غير غريبه وعنيد جدا وصعب يتنازل عن رأيه وكثير الجدال وثرثار لابعد الحدود وما يراعي مشاعر ولا عنده ملاحظه وتحس انه رغم كبر سنه بس مو ناضج لسه يستشير اصدقائه في كل اموره ويشتغل في مكان مختلط مستشفى ويستشير الممرضات يلي عنده وكمان اتكالي ما يعرف يساوي شي لوحده وكمان ما قدرت تتقبل شكله. هي طلبت منه انه يخبر زوجته الاولى بانه راح يتزوج رفض وعلل انها عندها فكرة مسبقة على نيته وقال بس اروح لعندها البلد اقول لها راح ولا قال وبعدين جلس يبرر انه ما يبغى يجرح مشاعرها. المهم البنت مو متقبلته ولا مقتنعه فيه ابدا ولا شايفه حياتها ومستقبلها معاه وتبغى تساوي خلع لانه هو رافض يطلقها لانه يحبها كثير ومتمسك فيها ويقول اذا تركتيني تصيبني ازمة نفسية وتسيئي سمعتك وسمعتي وتصيري مطلقة !!. ملحوظه فترة العقد لها اربع شهور وكان محدد يصير الفرح قريب بس هي رافضه ونفسيتها تعبت وتبغى تلغي الموضوع كله. نبغى نسمع ارائكم ونصايحكم بس بالعقل والمنطق السليم والله يبارك فيكم |
صراحه ماذكرت عيب واضح
لكن هي شكلها ما تبيه تستخير الآن أهون من بعد الزواج |
طالما حالها هكذا .. فالافضل لها و له الانفصال .. اما مسالة سمعتها فلا تخف من ذلك .. لانها لم تفعل حراما .. كما انها مطلقة قبل الدخول .. و سياتي لها من يقدرها لصفاتها الحسنة .. اما زوجها فيبدو عليه الانانية الشديدة .. حيث انه يهتم بالمه هو و لا يهتم بالمها .. فلو كان يحبها بصدق لضحي بالمه في سبيل الا تتالم هي ..
|
حتى لو كان الرجل فعلا رائع ....
مجرد عدم راحتها له يعد سببا كافيا لتركه .. الزواج حياة عمررررر ... لا بد من القناعة التامة من كلا الطرفين |
جزاكم الله خير على الردود
بس كثير نصحها وقال انه التقبل والحب يجي بعد الزواج. وممكن انه يتغير ويصير افضل بما انه يحبها وميت عليها. ويلي يقول لها حرام تنفصلي وتضيعي فرصة واحد متدين ويصلي ويحبك. ايش رايكم صحيح هذا المنطق والتفكير. |
عمرها 23 تاخذ واحد بهالعمر ومتزوج ومخلف !!!
صراحة اشوفه خطأ كبيييير وإنه مايعلم زوجته هذا شيء غريب ترضين تتزوجين بالدس !!! يعني بكرة لاجات زوجته بيجيك مرة مرتين في الاسبوع لأن المسكينة ماتدري عنه وهو خايف يعلمها والله أنا أشوف إنها تتركه افضل لها لسه صغيرة وبيجيها نصيبها ان شاء الله بعدين عمر كبير فرق بينهم هي من جيل وهو من جيل ماني متصور كيف تعيش معه ترى الوحدة تقعد في بيت ابوها معززة مكرمة ولا تروح وتعيش حياة تبكي ليل نهار عشانها الله يكتب لها الخير ويسعدها مع هذا الرجل أو غيره |
اقتباس:
ومسألة ترويجه لنفسه وكأنه لؤطة .... نقطة ثانية كانت ستجعلني انفر منه ايضا أسلوب استفزازي |
شكرا لك اختي الكريمة رسيل ..
وليس هذا فقط هو يقول لها كمان اذا تركتيني راح تندمي وبعدين الله ينتقم منك لانك بتظلميني ويجي واحد يتزوجك يظلمك ويقول عن نفسه انا رحمة ونعمة لك بس انت كفرتي بهذي النعمة.. |
على ماذا تدل هذه الامور برأيكم تشعر انها يريد ان يفرض نفسه فرضا عليها لتتقبله..
ولها مدة اسابيع مقاطعته ماتكلمه ولا تبغى تشوفه لا تشعر بارتياح نهائي عند مكالمته. |
والله صغيره البنت عشان تحط نفسها بهالموقف
تتركه بدون تردد يكفي انها راح تبداء حياتها بهالشكل زوجته ماتعرف ماندري يمكن بعد مايتزوجها تضغط عليه الاؤلى وتصير مطلقه وممكن تجيب اطفال من الحين تحمد ربها دامها عالبر وربي يعوضها بلي يناسبها حرام على اهلها حتى لو انه امام الحرم مايضغطون عليها طمنينا وش يصير معاها |
اقتباس:
والحين هو في فترة الملكه طبيعي انه يكون فرحان وطايرفيها لانهاالثانيه وجديده باالنسبه له وصغيره لكن بعد الزواج الله عالم كيف راح يتعامل معها الحين هويعتبرزوجها وهي ماتقبلته ولاحبته...ومستحيل في يوم راح تقتنع فيه لانها من الاساس مو مقتنعه والي يقول التقبل والحب يجي بعد الزواج غلط...التقبل يجي في فترة الخطوبه.. رجاء اذا فعلا ماتبيه ونفسيتعها تعبانه تنفصل من الان احسن من ان تروح بيته ويدخل عليها ويضيع مستقبلهاوهي بعدهاصغيره ليش العجله.. وهوقالها بنفسه مايبي يطلق عشان سمعته..وماادراك يمكن زوجته ترجع البلد ويستغني عن الزوجه الثانيه الرجل لايناسبها من جميع النواحي والباب الي يجيك منه الريح سده واستريح |
من الافضل لها تركه ان كانت لاترى معه حياتها وسعادتها فالزواج عشره عمر وليست محدده بوقت معين عليها ان تستخير ربها اولا وماتراه خيرا لنفسها فلتاخذه وهي ليست كبيره جدا لتأخذ رجلا متزوج ويخفي زواجه عن امراته الاولى " فتح الله قلبها وانار بصيرتها لما فيه خير وصلاح لها الشيئ المهم بعد الاخلاق الرضى التام عن الزوج |
صغيرة و هو كبير كتير
مش مناسب الزواج و كمان اصلا سبب رفضه يقول لزوجته الأولى انو رح يتزوج !! افعاله مش مريحة و هي مش مرتاحة معو انا بقول تنفصل عنه و بكرة يجيلها نصيبها ان شاء الله |
واضح أنه يستخدم مصطلحات دينية لإجبارها على القبول به ....
وكل ما يقوله لها ليس من الدين في شيء ... من حقها الرفض وليس من حقه اجبارها |
الاخت الكريمه ..
الرجل لم يتضح ان فيه عيوب شرعية اودنيوية .. فاصله و واضحه تستدعي تركه !! لكن الواضح ان قريبتك لم تتقبل شكله بحكم كبره في السن فهي ترغب بشاب بستايل ( نيو لوك ) شبابي المظهر و متقارب معها بالافكار !!!! هذا ما اتضح من خلال سردك للموضوع ... ما دام مو مقتنعه فلا تستمر وتقطع العرق ....... الخ أحسن قبل ان يتم زواج !!!!! |
اقتباس:
هي لسة صغيرة و الرجال بداله الف رجال (على وززن الحرمة بدالها الف محدش احسن من حد) المهم الراحة النفسية ضروووورية ايا كانت مواصفاته فالأرواح تتآلف حسنا لما لا تنصحينها بجلسة مصارحة من مخاوفها قبل التفكير بفكرة الإنفصال ربما يفضفض لها و يعلل سبب بعض تصرفاته و تفهمه.. |
شكرا لكم جمعيا على تفاعلكم الكريم مع الموضوع
برأيكم نقترح على اهلها يشترطون عليه انه يخبر زوجته قبل زواجه من البنت هي ناشقته البنت المخطوبة كثير في سبب عدم اخبارها قال مو لازم هي بعيدة وما راح تضرك بشي واساسا ما راح تجي للبلد الا لما تكمل تعليم الاولاد يقول عشر سنين وممكن ما تجي ابد . بس الاولى حاسه انه في شي لانه لما هو سافر لعندها بعد ما خطب الثانية كان يكلم البنت كل يوم ويتخبى عن الاولى وراحت الاولى ماخذه الرقم وصارت تتصل لما زوجها يكون نايم تشوف مين يكلم حرمة ولا رجال. وهذا الشي زاد تخوف البنت وتقول اذا من اولها كذا وهي الاولى لسا شاكه بزواجه كيف لما تعرف اكيد وش بتساوي. هو يقول للبنت لا ماراح اطلقك مهما حدث ويقول لها الاولى مسكينة وما راح تساوي شي اذا عرفت بس بتزعل شوي وخلاص لانها عندها فكره عن الموضوع. على فكرة وصلني كمان من ناس يعرفون الاولى انه كان يهدد الاولى ويقول لها اذا ما تنحفين اتزوج عليك بس هو ما قال للبنت هذا الكلام يقول لها ابغا اتزوج مره ثانيه لان الزواج الثاني مستحب وفضيلة!!. ولما سافرت الاولى جلس يدور وحده نحيفه يتزوجها وكان كثير يسأل البنت كيف جسم اخواتك يتغير بعد الانجاب ويسمنوا وما ادري ايش وعلى قولته يبيها متدينه وخلوقه. |
وكمان تحس انه يبي يعزلها عن العالم الخارجي يعني يقول لها ثقي فيني انا وبس واذا عندك مخاوف ناقشيني انا وبس ومره حطت استشارة في النت لموقع مختص تسأل عن زواجها منه قام اكتشف وغضب وعصب وقال لها ليش تسألين الناس هذول ما يفهمون وكلهم حساد ما يبغوكي تنبسطين وما ادري ايش ويقول لها لا تقولي لصديقاتك اي شي ولا تسمعي لكلامهم وكمان في اشياء غريبة ثانية يقول لا تقولي لاهلك.. ما ادري شي غريب!! .
وبصراحه هي ما عادت تثق فيه ابد مهما وعد وقال ولا تبغى تصارحه بشي لانها حاولت كثير. |
حسيت إنه انسان مراوغ و أناني
التدين ، مو سبب مقنع لقبول الزواج منه ، لإنه البعض ياخذوا الدين ( قناع ) لهم فانتبهي لا ترمي نفسك لشخص مثل هذا |
اقتباس:
مثير للإشمئزاز ... حقيقة لاأفهم ترددها ... |
المشكلة بالنسبة لهم ولاقاربهم لانه اشترت البنت واهلها كل شي وتعبوا مره في التجهيزات للزواج وحسب قولها هو ما كلف نفسه كثير بس يدفع فلوس. وجهزوا هم كل شي اثاث وعفش البيت لانه كانت وجهة نظرهم ان البنت تختار على ذوقها لانه هو كان يبغى يسكنها في بيت اي كلام ويجيب اثاث مستعمل اي كلام.
ويوم قالوا له البنت ما تبيك غضب وقال كيف وانا تكلفت ودفعت مصاريف وثمن الاثاث ومدري وشو وقال اذا تبوني اطلقها لازم ترجعولي كل شي صرفته بالمبلغ المالي وحتى طالبهم بثمن اجار البيت وثمن الاثاث وغير المهر والذهب وثمن الملابس. واهلها ما عندهم مشكلة مستعدين هم يتكفلوا بكل الخساير بعد ما تعبوا وجهزوا كل شي الله يعينهم ,, بس وش رايكم بتصرفه هذا مو فيه نوع من اللؤم |
اقتباس:
ودام اهلها ما عندهم مشكلة يدفعون خلاص اختي خليها تخلع ... والله قلبي صار يعورني عليها ... الله يفرج همها ويقدم لها اللي فيه الخير ... |
فعلا اختي رسيل الموضوع غريب
ويقول لها بعد لازم واحد يزهد في الدنيا ما يتطلع للماديات ويصير مثل الصحابة يعيشون على الخبزة والامور المادية تافهه وثانوية ومدري ايش وكان يبغى يسوي الفرح في استراحه متواضعه كم الف ريال ما تدري ليش يفكر كذا .. هو في البداية دفع مهر جيد وصار بعدين يتضايق مع انه ماديا غير فقير وصارت لازم البنت هي يلي تطلب منه فلوس حتى يعطيها تشتري بقية مستلزمات العرس دون ان يعطيها او يسألها لوحده او حتى لا يفهم بالتلميح.. ويقول كمان ليش كل هذا التعقيد الصحابة كانوا يزوجوا بناتهم على الدين والخلق والصلاح والتقوى وعلى سورة من القران فقط!! برأيكم خلاص نخليهم يرفعوا قضية في المحكمة.. لانه باين عليه مو سهل ابدا وراح يمرمر اهلها عشان الطلاق.. |
اقتباس:
أختي بصريها تراها مسكينة في وسط المشكلة ما تشوف الأمور بشكل واضح زيك انتي من برا وشايفة ... تصوري أختي بعد طلاقها لامتني أني لم أبصرها بأمور كنت اراها واضحة في خطيبها وكنت اعتقد انها واضحة لها مثل ما هي واضحة لي ... ولكن الحقيقة غير ذلك ... فالأمور لا تكون لهم واضحة لأنهم داخل الصورة ولا يراها على حقيقتها الا من هو خارجها .. |
جزاك الله خير اختي رسيل..
بس وش نعتبر العيب يلي فيه هذا الرجال في دينه ولا خلقه ولا ايش بالضبط انا شخصيا عجزت كيف اصنفه ,, لئيم ام مغرور ام اناني ام متحجر فكريا. وهل هذا العيب برأيك كافي امام القاضي لخلعه وعلى فرض انها تزوجته نفترض ايش ممكن يصير في البنت اسوأ الاحتمالات لمن كان مثله يعني.. |
سواء في سبب واضح وزلا مافي
برأيي اذا هي غير مقتنعة ومو مرتاحه هذا اكبر سبب للانفصال ومافي شي يجبرها تكمل دام اهلها مستعدين يتحملو الخساير |
السؤال :
وما هي الأسباب الموجبة لإقرار الخلع والتي يحق للمرأة بموجبها طلب إنفاذ الخلع من زوجها ؟؟ الجواب : أسبابه : = كراهية المرأة لزوجها ، دون أن يكون ذلك نتيجة سوء خُلق منه ، كما قالت زوجة ثابت بن قيس رضي الله عنها وعنه . = عضل الزوج لزوجته ، بحيث يكره الزوج زوجته ولا يُريد أن يُطلّقها فيجعلها كالمعلّقة ، فتفتدي منه نفسها بمالها ، وإن كان يحرم عليه فعل ذلك . = سوء خُلُق الزوج مع زوجته فتُضطر الزوجة إلى المخالعة . = إذا خافت الزوجة الإثم بترك حقِّ زوجها . والله تعالى أعلى وأعلم . - وما هي الأسباب الموجبة لإقرار الخلع والتي يحق للمرأة بموجبها طلب إنفاذ الخلع من زوجها ؟؟ السؤال : - وهل يمكن اعتبار الخلع هو الحل للخلافات الزوجية وللعديد من القضايا التي قد تستمر في المحاكم لسنوات طويلة بدون حل ؟؟ الجواب : والخُـلع هو أحد الحلول الشرعية للمشكلات الزوجية إذ أن بعض الأزواج يحمله سوء الخلق أو اللؤم أحيانا على مُعاشرة زوجة لا تُحبه بل تكرهه أو لا يُريد أن يوقع الطلاق بل يُريد أن تطلب منه ذلك ليذهب بما أعطاها من مهر أو يأخذ العِوض والمقابِل على الطلاق . أما إذا وُجد السبب من كراهية أو شقاق وخلاف مستمر أو غير ذلك مما سبقت الإشارة إليه من الأسباب فيجوز لها أن تطلب الطلاق أو أن تُخالعه . ولذا فإن النبي صلى الله عليه وسلم لم يُنكر على زوجة ثابت بن قيس رضي الله عنها وعنه لما قالت : يا رسول الله ثابت بن قيس ما أعتب عليه في خلق ولا دين ، ولكني أكره الكفر في الإسلام . فقال رسول الله صلى الله عليه وسلم : أتردين عليه حديقته ؟ قالت : نعم . رواه البخاري . وسبقت الإشارة إليه في المقدمة . ففي هذا الحديث أنها سألته الطلاق ؛ لأنها لم تُحبّـه وفيه أنها ردّت عليه المهر ؛ لأنها هي التي طلبت الطلاق . فهي لا تعيبه في خلق ولا دين ولكنها لا تُحبّه |
الله يبارك فيكم جميعا على ردودكم
وشكر لك خاص اختي رسيل الله يرفع عنك الظلم وينصرك على من ظلمك.. |
طيب اخواني واخواتي الكرام
في سؤال هنا يطرح نفسه البعض يقول انه البنت يلي فسخت خطوبتها بعد العقد ما يعود يتقدم لها الشباب او نادر جدا لانه بنظرهم ما يبغون وحده شافها غيرهم. برأيكم هل هذه المقولة صحيحة ولو فسخ عقدها ممكن تتزوج شاب ولا راح تتورط مرة ثانية وتقل فرصها وتنحصر في المطلقين والمعددين. شكرا لتفاعلكم معنا. |
انا فهمت من اهلها انهم يقولون انه خطيبها هذا جيد ما فيه عيب وانه البنت موسوسه وما يعجبها احد. بس فيه عيب انه مثل ما قالت البنت ثرثار وسريع الغضب والحمق واذا عصب يتكلم كلام ما يدري وين يودي واذا احد عاتبه بعدين يقول انا كنت معصب وانا ما ادري كيف اعبر عن نفسي وما ادري ايش وقالوا كمان مثل ما قالت البنت انه عنيد جدا وصعب يتنازل عن رأيه ويحب الجدال كثير بس هم قالوا انه متواضع وكريم يعني يدفع لما يطلبوا منه فلوس عشان البيت وغيره. بس البنت تقول العكس انه معاها لا يقول زهد وهذا مو ضروري وتافه ومدري ايش بس بالنهاية يدفع.
بس على فكرة انا لاحظت انه البنت مو موسوسه بس هي ذكية كثير ومثقفة جدا ومو بسهوله يمشي عليها الكلام واذا حست انه احد جالس يخدعها خلاص تكرهه وما تعود تثق فيه. لانها تقول طلع عنده مرض وراثي في كبده وما قال قبل العقد وهذا المرض يخليه يتعب بسرعة وما يتحمل الصيام. وتقول انه طلع عنده شيب في لحيته وصابغه وما قال لها ابد وحاولت معاه بعدة طرق وما اعترف حتى بالنهاية اقر انه صابغ,, وما ناقشته قال انه مو ضروري اقول لك وعادي ايش فيها وانا مو قصدي اغشك لاني اصبغ من زمان. هي هنا حست انه يخدعها وما اقتنعت بكلامه. والملاحظ انه في البداية وقت الخطبة كان كثير يتكلم عن ايجابياته ومميزاته واذا تسأله البنت ايش الامور يلي تشوفها في نفسك مو حلوه وحابب تغيرها ما يتكلم ابد وكانه ملاك. مع انه البنت ما خلت شي الا قالت عن نفسها الايجابيات والسلبيات وحتى قبل العقد. والملاحظ انه هو بس مركز على ايجابياته عشان ما يرفضوه اهلها بس صار العقد بدأت تكتشف البنت امور. برأيكم إن كانت هذه البنت موسوسه مثل ما قال اهلها وما يعجبها احد يحق لهم ان يزوجوها من هذا الشخص خطيبها الحالي يعني يقولون لانه تقدم لها كثير قبله وهي رافضه حاطه شروط تعجيزيه. ولما سالت البنت عن شروطها تقول تبغى واحد (اعزب ما يزيد عمره عن عمرها 10 او 12 سنه ويكون جامعي او يحب العلم ومثقف لانها هي جامعيه ولديه عمل وقادر على فتح بيت ومقبول الشكل ويكون طبعا متدين يعني يصلي واذا بالمسجد افضل واذا ملتحي افضل وما يدخن ويكون عنده ثقافة دينيه مو واحد جاهل في امور الدين وما له علاقات او صاحب افلام ويكون خلوق يعني يحترمها ويقدرها ويراعي مشاعرها ويكرمها ويحترم عقلها وفكرها وما يمنعها من التعليم ويكون اهله متدينين وما تهمها الجنسية او الدولة يلي يسكن فيها) برأيكم هل هذه الشروط تعجيزيه يعني مستحيل تتوفر في شخص؟. جزاكم الله الف خير على اهتمامكم بجد موضوع البنت هذه شاغل بالي. |
لا طبعا هالكلام خطا ياكثر الى كانو مثلها مدام هي بكر فهي مرغوبه
وممكن يجيها شاب اعزب وكثير اعرفهم فسخو العقد وربي عوضهم بازواج صالحين |
والله الحياه مع أنسان بصفاته وعقليته التي وصفتيها لنا وعرفناها من خلال كلامه وتصرفه معها غير مطمنه!!
من خلال مدحه لنفسه ويكفي ردة فعله عند طلبهم للطلاق !! هل هذه أفعال رجل متدين وعدم أرتياح الفتاه له سبب كاافي لعدم أتمام الزواج الزواج من مثل هذا الرجل تضحيه بنفسها غير أنه متزوج وكبير فارق العمر بينهم جدا! هي بعز شبابها فأيش أللي يجبرها على الزواج بمثل هذا الرجل ؟؟؟؟؟؟؟؟!!!!! |
شكرا لك اختي احب زوجي
فعلا كلامك منطقي وسليم جدا بس على قولتهم اهلها يعني انه هو يحبها ورامي نفسه عليها وخذ يلي يحبك ولا يلي تحبه وانه اذا كان يحبها فراح يسوي المستحيل على عشان يسعدها. وهم يقولوا انه كبير يكون ناضج وعاقل ويتحمل المسؤولية ويقدر يحتوي البنت ويفهمها بخلاف الشب لانه شباب اليومين طايش وما له شخصية ولا يتحمل المسؤولية ويبغى بس وحده تدلعه. هذي وجهة نظرهم يعني وكمان البنت تحب العلم وتكمل دراستها العليا فهو هنا خطيبها جالس يشجعها وهذه النقطه عاجبه الاهل لانهم يقولوا ما في شاب يشجع زوجته على الدراسة لان معظمهم يكونوا يبغوا زوجتهم متفرغة لهم هم بس. |
اقتباس:
واغلب الرجال الكبار الي سبق لهم الزواج وتزوجوا بنات صغار شوفي كيف انظلموا مع هاالشيبان في الاخريطلقهاعشان زوجته الاولى زعلانه منه ويرميهاهي وطفلها واحد يجي من ورا زوجته ويتزوج عليها مثل ماقالت انهااكتشفت ان زوجته ماعندهاخبربزواجه..بلله وين النضوج والعقل..وهي لساصغيره ليش تاخذ واحد كبيرمره ومتزوج بعد بكره يجيهامنه طفل وهوعادي ولاهمه وموفرحان مثل فرحة الشاب الي اول مره يخلف عموما اذا هي ماتبيه محد يقدريجبرها عليه واهلها المفروض مايرمونهاهذي الرميه..وخليهاتقولهم هم يتحملون نتايج هذا الزواج اذا اجبروها وانا انصحها دامها ماتبيه تتمسك بقرارها ولاتسمح لاي مخلوق يجبرها هذا زواج مو لعبه /COLOR] |
المرض الوراثي الي في الكبد...ممكن ينتقل لها...بعد الزواج..
|
شكرا اختي الكريمة ليه الغرور لتعقيباتك المتعددة.. والله يبارك فيك.
اختي انا جالسة انقل كلام اهلها وجهة نظرهم. مو معناته اني مقتنعة بهذا الرأي بس اكتب لكم لاني ابغى ارى ارائكم على شان اقدر ادعم البنت واقويها نفسيا. الحين اهلها جالسين يقولون للبنت اذا تبغي نشترط عليه شروط على شان ضمان للمستقبل. لانه للحين ما يبغى يتركها. لا اختي المرض الي في الكبد وراثي مو معدي يعني ممكن ينتقل للابناء بس ماينتقل لها. يعني مو مرض الكبد الوبائي |
يعني أهلها رافضين انها تنفصل عنه ؟؟!!!
|
الي هذا أوله ينعاف تاليه..
بعدين قضية التعميم خاطئة ما أحد يتزوج البنت الي عقد عليها وتطلقت رأي خاطئ..لأنه رزق وياما بنات جالسين لسى في البيوت وبنات تزوجوا وياما مطلقات تزوجوا ويا ما مطلقات لسى ما تزوجوا ما فيه شئ معين ممكن يتعمم وكذلك بالنسبة للشباب هناك شباب مثقف واعي مسؤول قادر على فتح بيت وقادر على إسعاد زوجته وشباب العكس وكبار سن قادرين على إسعاد زوجاتهم والعكس صحيح الزبده: لا تفكر بالناس ولا رأيهم .. هي وش تبغى من الزواج وهل هذا الزوج الي تتمناه وإلا لا وتتمناه أب لأولادها كلام الأهل على العين والرأس...لكن حياتها لا تخليها عرضه للأهواء وخليها تستخير ومبدئياً تأجل الزواج لين تشوف وش هي عليه |
اهلا بك اختي احب زوجي مرة اخرى..
اهلها مو رافضين بمعنى الرفض بس مو مقتنعين انها تنفصل لانه برأيهم ما عليه عيب قوي وعيوبه امور تافهه موجودة في كل انسان من باب عدم الكمال. يقولوا بس انه متزوج وعنده اولاد وهذي محلولة بشوية شروط وبس. |
اهلا اختي الغالية ذكريات لا تغيب شكرا لتعقيبك.
لا مو هذا الزوج يلي تتمناه وقضية انه تتمناه اب لاولادها هي اساسا من بداية العقد تقول لو اجبرت وتزوجته ما تبغى تجيب منه اولاد عشان ما تتورط معاه. |
| الساعة الآن 06:20 PM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©