|
مشكلة أمي وزوجتي
السلام عليكم ورحمة الله وبركاته وبعد ....
يا احبابي شورو عليه وقولولي وش الحل.... موضوعي هو ’’’’ أنا الإبن الاكبر لأمي وأبويه وكنت الوحيد لكن الله سبحانه رزقني بأخ بعد عمر 25 سنه والحين عمره ثلاث سنوات الله يحفظه لنا اخوي المزغبد بصراحة تاخر عليه وإلا كان شال معايه الحمل بس الحمدلله على كل حال أما الباقين بنات 7 ماشاء الله والله يحفظهم وأبويه الله يطول بعمره موجود لكن حمله على قده سلمني مسؤوليت ام وأخواتي من صغري والحمدلله طلعت قد المسؤوليه صحيح إني تعبت كوني الوحيد بس هذول أهلي إذا ماتعبت علشانهم على شان مين أتعب . المهم في غيره صايرة من زوجتي بإهتمامي لاهلي وفي غيره من أمي بإهتمامي لزوجتي . الحمدلله أنا ما ميزت أحد عن الثاني أهلي وأخدمهم وزوجتي واجب علي أخدمها . وحصلت حساسيات بين أمي وزوجتي لا أحب ذكرها . ولكن من هالحساسيات شفت الكره بدأ بين أمي وزوجتي وصار كل وحدة منهم يشكي من الثاني . وتصدقون . أحس زوجتي كرهت الحياة معايه بسبت إهتمامي باهلي وزاد كرها لأهلي . وأمي بدت تقرر تزوجني الثانيه . وانا ماني عارف وش أسوي أفيدوني بالحل ......................... وشكرااااااااااااااااااااااااااااا |
كن الله في عوانك حريم ====
|
احزن دايما لما اشوف مثل هالقصص
اتخيل بيوم من الايام اخوي ينحط بهالموقف والله احس بشي غريب اخوي حاول لما تكون مع امك لاتجيب سيرة زوجتك والعكس حاول تخلي زوجتك تتقرب من والدتك بصراحة المفروض هي الي تتقرب مو والدتك يعني يعني الموضوع كله بيد زوجتك المفروض تكبر عقلها وتفهم انو هذول اهلك وانت المسؤول عنهم ولما تكون مع زوجتك حسسها انو هي اهم شي وبنفس الوقت تكون عارفه ايش واجباتها وخليها تتخيل امك مكان امها وتعاملها على هالاساس ربي يسعدك ويوفقك |
أشكركم على الرد ...........
وبالنسبة لأخوك ياعاشقة الغالي إذا كان متزوج إن شاء الله مايصير شي . وإذا باقي ما تزوج نصيحتي أخطبو له وحده انتم تحبونها وهي تحبكم وأخوكم يحبها وهي تحبه كذه بإذن الله تمشي الامور بدون مشاكل . ومع إن امي كانت تحب زوجتي لكن الغيرة لها دور كبير في توليد المشاكل والله يوفقكم ويويفق اخوك ,,,, |
اخوى,,,,اول شى لاتبين قدام امك اهتمامك بزوجتك ونفس الشى مع زوجتك والشى الثانى دايم قل لامك زوجتى تحبك وجب هدايا لامك كنها من زوجتك ولزوجتك من امك حاول تحببهم ببعض قل لزوجتك دايم انتى اغلى وحدة وانتى وانتى يعنى بصراحه اقولك الحريم يحبون المدح والكلام وانت اشتغل من هالناحيه
|
تتطلع لرضا ربك فقط
وخذها مني لا تدخل بينهن ابدا ولو نقاش ثانوي00 ولا ترى بتروح في الرجلين الله يسعدك |
وعليكم السلام والرحمه ..
، هذا أمر كثير مايحصل بين الأم وزوجة الأبن .. ولكن ماعليك إلا أن تكسب رضا والدتك و رضا زوجتك بحيث تطلب من المدام تأتي بهدية متواضعه أو طبخة تحبها وتقدمها لأمك .. حاول أن ترضي كلا الطرفين لكي يعم المحبه بين قلوبهن .. موفق :) |
الله يعينك ياااااارب
بعض امهات الازواج لو تشعل زوجة ولدها اصابعها شموع علشانها ما رضت عنها افضل نصيحه لك لا تتدخل بينهم مهما كانت المشكله بس اهم شيء قووول لزوجتك تحترم الوالده حتى لووو كانت الوالده هي السبب في المشاكل اهم شيء تحترمها يعني ماتطول لسانها عليها واذا بينهم مشاكل تقدر تحلها بالزيارات الرسميه فقط من زوجتك لأهلك اما انت عادي زورهم دايم ولا تجبر زوجتك تزورهم كثييييييييييير لأنهم اذا تقابلو زادت المشاكل الله يوفقكم |
هذه المشكلة اللي كثير يعانون منها باختلاف درجتها وحدتها
إذا كانت الزوجة ممكن تغار من ابنتها فما بالك من أم زوجها حاول ما تمدح أي وحده فيهم أمام الأخرى وحسس كل وحده فيهم وقت تكون لحالك معها إنها كل شيء ولا تتكلم عن الأخرى زوجتك عليها احترام أمك لكن هذا لا يعني انها تنظلم وتنهان من قبلها لكن تتغاضى عن بعض الأمور عشان رضا الله ثم رضاك ومثل ما قالوا تقلل زيارات زوجتك لهم وتكون رسمية ومو لازم تعرف زوجتك بكل شيء يصير بينك وبين عائلك إذا كان الأمر يزعجها وحاول تكون عادل ومنصف "يَا أَيُّهَا الَّذِينَ آمَنُواْ كُونُواْ قَوَّامِينَ لِلّهِ شُهَدَاء بِالْقِسْطِ وَلاَ يَجْرِمَنَّكُمْ شَنَآنُ قَوْمٍ عَلَى أَلاَّ تَعْدِلُواْ اعْدِلُواْ هُوَ أَقْرَبُ لِلتَّقْوَى وَاتَّقُواْ اللّهَ إِنَّ اللّهَ خَبِيرٌ بِمَا تَعْمَلُونَ (8) " المائدة |
أشكر جميع اللي ردو والله يكون بعون المسلمين
ويصلح الحريم بالذات ويهديهم |
قي حل انك تروح لأمك و نتقلها كلام عن زوجتك حتى لو ما قالتو ان فلانه تمدح فيك و تحبك
و ايضا زرجتك انقلها كلام قول ان امي تقول عنك كذا وكذا مدح فقط لا ذم و احتمال في البدايه تلاقي صعوبات |
بالاول انا ماادري ادا كنت ساكن مع اهلك ولا لا
نفترض انك ساكن معاهم اعرف يا اخي انك مهما تسوييي وتصالح ماراح تجيب نتيجة الا اني راح اقولك الله يصبرك وحاول تعقل زوجتك وترفع معنوياتها عشان هي صابرة معاك ....وكدا وحاول تراضي امك وتطيب بخاطرها عشان ما تقول جات زوجتك وخدتك منها ..... |
مستقر ببيت لوحدي مو مع أهلي
أتوقع لو في بيت واحد ساكنين كان جات مصايب الله لا تبلانا |
رايي الشخصي
هالنوع من المشاكل خاصه اذا كانت الزوجه في بيت منفصل من الزوجه لو كانت تراعي زوجها و تتعاون معاه في هالموضوع ما كان في مشاكل يعني شو فيها اذا زوجي وصل امه ولا ودا خواته سوق ولا تغدا عند اهله؟؟ خاصه اذا كان الكبير وهو مسؤول عنهم؟ ليش احط زوجي بين المطرقه والسندان؟ |
تقول وش تسوي من صجك انت قول لزوجتك تروح تعتذر لاامك واذا مارضت ....... هذي امك يارجال
تعرف وش امك امك الي حملتك 9 شهور ولمن طلعت فرحت فيك سهرت عليك ربتك ليمن خلتك رجال حبتك وللحين انت بعيونها كل شي بحياتها وتجي بنت ناس تسوي مشكله بينك وبين امك تشتكي من امك وانت ساكت قول لها هنا وقفي لا ارجعك عن اهلك لاتفضل الزوجه على الام الانها ماتقارن بالام الزوجه ولا شي بالنسبه للام |
مكانه الانسب
|
اخي الكريم
واضح من دون ان تتكلم بالتفصيل عن المشاكل أن أمك مو سهلة كونها تحرضك الآن على الزواج مع احترامي لرأي الوالدة - الله يحفظلك ياها - الزواج بأخرى أسوأ حل لمشكلتك !! مشكلتك يا أخي ضيق الوقت ! أنت انسان مشغول بعمله و متابعة مشاكل بيتين (بيت أهلك و بيتك ) و تريد والدتك تزوجك حتى تصير مشتت بـ (3 بيوت ) ؟؟ أرى الحل يبدأ من عندك أولاً : أعط زوجتك حقوقها على أكمل وجه ثانياً : لا تدع المجال لزوجتك للكلام على أهلك ثالثاً : حاول تحل أمور أهلك بوقت يكون زوجتك مشغولة فيه بأمور المنزل و الاطفال يجب على الطرفين ان يصبروا بالنهاية انت الذي يتعب لا أمك و لا زوجتك ! وانت الذي يصبر! هذا ان كانت شكوى زوجتك هي ضيق وقتك و عدم تفرغك لها و لبيتك أما ان كان هناك أمور أخرى لهذه المشاكل فنرجو منك توضيحها كي نجد الحلول المناسبة لكم |
اخي
لازم تتعلم توازن بينهم يعني مو تكون 24 ساعة عند امك وتخدم فيها لا,, بالعكس،، اخدم امك وخواتك في الاشياءالمهمة اللي مايستغنوا فيها عنك اما ع الرايحة والجاية صعبة شوي انا كان زوجي ممكن يغيب وقت طويل ويخليني بالبيت لوحدي بس عشان يروح ياخد اخته عند صحبتها عشانها طفشانة وانا اكون كم يوم انتظر منه مشوار وهو عامل فزعات لاهله مو مشكلة يخدمهم بس بموازنة وللاشياء المهمة مو صحبات واشياء ثانوية وعندامك لا تجيب سيرة زوجتك ابدا وكل ماتروح لامك كلها فلانة تسلم عليكم ونفس الشي لزوجتك اما عن الزواج فامك مايحق لها تعمل كدة لانها بدي الطريقة تخرب عليك حياتك انتقاما من زوجتك>>من جد حرام وواضح ان السالفة انتقام وكيد لان امك مافكرت باي منطقية هي شايفة انك مسؤول عن بيتك وعن بيت اهلك وتبغاك تفتح بيت ثالث عشان ديك الساعة تسير معارك بين امك والحرمتين وانت بتنتهي الافضل انك تسايس زوجتك ولما تكون عندها تحسسها ان هي اغلى شي بحياتك >>كدة بتنطفي نارها الله يوفق بينكم ويسعدكم ببعضكم |
اخوي انت تقول انه هناك غيرة صح؟؟؟
طيب من سبب الغيرة دي ؟؟؟ انت .... صح؟؟ يعني الغلط فيك انت لا تزيد مدح الزوجه امام امك ولا تكثر من مدح امك امام زوجتك لا تسمح لأمك بالكلام على زوجتك ولا تسمح لزوجتك بالكلام على أمك لازم تحط حدود في الكلام والتصرفات عند كل وحده فيهم لاتكثر من الزيارات بينهم خلك بعيد حبك يزيد يعني نهاية الاسبوع خلي زيارة وحده لمن كل اخواتك يكونوا متجمعين فقط وانت كون معاهم ( انت طبعا زور امك وقت ماتشاء ) مستحيل امك تحبها زي بنتها ومستحيل زوجتك تحب امك زي امها والربط والفك بيدك انت فقط لاتقول بيد حرمتي او امي لا بيدك انت انت اللي خليتهم يغيرو من بعض انت اللي تخليهم يحبو بعض والله يعينك |
لكل ذي حقن حقه
امك تاج على راسك وراس زوجتك واذا زوجتك تحبك لازم تحب امك هي من جابتك لها وكبرت وضحت عشانك ياحبي لعمتي وقسم بالله اني اعشقها واحبها اكثر من زوجي ماحد نزلت دمعته علي الا هي يوم طلقني والله لن انسى دموعها دام راسي يشم الهوى حبيتها لانها تنحب ولانها انسانة رائعة حبيتها لانها ام لزوجي وبكرة بتكون جده عيالي حبيتها لانها كل يوم تستودعني الله وقلت لزوجي حتى لو تفارقنا ما راج ابطل سؤالي عنها وبتواصل معها بكل الاحوال اخوي لازم تفهم زوجتك ان هذي امك ولابد زوجتك تتقرب من امك انا متاكدة انهم راح يحبون بعض وانت كون الحكيم العاقل وسطهم الله يحفظكم ان شاء الله ويهدي سركم |
اقتباس:
وبالنسبه لك اخوي صاحب الموضوع ماتتدخل لامن بعيد ولا من قريب بس لازم تفهم زوجتك وأنتم لوحدكم أنه اهم شي تحترم أمك وتصبر عليها قد ماتقدرحتى لو شافت شي منها عشانك أنت واحتراماً للكبير وأحتساباً للاجر كمان والله يوفقكم |
تسلمين حبيبتي أحب زوجي
الله يجعلك فرة عين لزوجك ويحفظكما من كل شر وسوء |
هلا وغلا الله يعينك مايحس في النار الا اللي واطيها انا كنت نفس الحاله مع اهل زوجي الله يعينك ويفرج همك بس حاول ان زوجتك ماتروح كثير لهلك وحاول تفهمها انها امك
|
أقدر شعور زوجتك بالغيره فأنت الولد الوحيد ولديك سبع بنات والمسئوليه عليك
ولا شك ان ذلك يأخذ كثير من وقتك وجهدك وتفكيرك فأنت كأنك مقسم فلولا تلك المسئوليه لكنت اكثر تفرغا لزوجتك اما شعور أمك بالغيره رغم انه شعور فطري الا انه ليس في محله وليس له مبرر فأنت لازلت تهتم بهم وتتحمل المسئوليه فلماذا هذه الغيره التي تحولت الي كره يجب ان تكون الام واعيه وتقدر ان لزوجه ابنها حق عليه والا تحمله أعباء اضافيه وهموم فبعض الامهات يكون عندهم رغبه في الاستحواذ علي الابن وعواطفه واهتمامه واحيانا وقته فالام معروفه بالتضحيه فهي ستضحي من أجل سعاده ابنها فحث أمك ان تكون كذلك اما الحل فهو بيدك اولا لا يكون اهتمامك اغلبه لأهلك فتشعر الزوجه انها مرتبه ثانيه واشرك معك ابيك وازواج اخوتك في المسئوليه ثانيا اصلاح ذات البين بينهم ولو بالكذب ولكن اولا حاول ان تعالج موضوع الغيره او حتي التخفيف من حدتها ثالثا اجعل زوجتك تقوم بالواجب فقط ولا تجبرها علي المزيد الا برغبتها ولا تظهر اهتمامك بزوجتك امام أمك فمثلا اذا اعتذرت عن بعض الواجبات فلا تجعل المبرر ابدا زوجتك رابعا الدعاء لهم بظهر الغيب وما أشده من سلاح خامسا اياك والظلم او الجور او العقوق سادسا احسن أكثر الي اهل زوجتك وخاصه أمها فسيجعلها ذلك تحسن وتتقرب سابعا حث كل منهم علي احسان الظن بالاخر عسي الله ان يحل أزمتك |
| الساعة الآن 10:26 AM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©