|
عند سفر زوجك او زوجتك كيف يكون التواصل
السلام عليكم ورحمة الله وبركاته00
ندخل في الموضوع على طوووووول00 عند سفر الزوج 00 كأنتداب او ما شابه 00 ولمده قصيره كأسبوع او شهر00 ما هي الطقوس التي تحرص او تحرصين على فعلها ؟ من تواصل00 مكالمات او رسائل00 تكون يوميه او كل مده ومده00 او ترك ذكرى من رساله او حركه معينه يذكرك بها او تذكرك 00 الاستقبال بعد السفر00 هل تستعد او تستعدين له بكل جديه ولهفه ؟ نريد الإستفاده00 وافكار حلوه 00 فمرحلة الإفتراق 00 بأسلوبنا الجميل 00تكون بداية مرحله جديده في حياتنا00 واكيد لها طعم خااااااااااااص |
لسبب ما لا أستطيع قراءة مواضيعك التي تكتبينها ....
مثل موضوعك عن الطلاق لم أتمكن من قراءته ... ولكني أستطيع قراءة ردودك .... يا سلام لو كتبتي موضوعك في رد ... عشان أقرأه :) |
اقتباس:
هلا فيك اختي رسيل00 غاااااااالي والطلب نسخ موضوع00 تعرفين ليه لأن ببساطه اختار تدرج لوني00 ولسبب ما يختفي بكمبيوترك00 ولعيون رسيل 00 نسخه ثانيه00 السلام عليكم ورحمة الله وبركاته00 ندخل في الموضوع على طوووووول00 عند سفر الزوج 00 كأنتداب او ما شابه 00 ولمده قصيره كأسبوع او شهر00 ما هي الطقوس التي تحرص او تحرصين على فعلها ؟ من تواصل00 مكالمات او رسائل00 تكون يوميه او كل مده ومده00 او ترك ذكرى من رساله او حركه معينه يذكرك بها او تذكرك 00 الاستقبال بعد السفر00 هل تستعد او تستعدين له بكل جديه ولهفه ؟ نريد الإستفاده00 وافكار حلوه 00 فمرحلة الإفتراق 00 بأسلوبنا الجميل 00تكون بداية مرحله جديده في حياتنا00 واكيد لها طعم خااااااااااااص |
تسلم عيونك يالغالية وتسلمين على النسخ ...
بالنسبة للموضوع ... ففي البداية كنا نتبادل الكثير من الرسائل عن طريق الجوال أو المكالمات الطويلة ... لكن مع كثرة سفره وبداية كرهه لشيء اسمه جوال قلت المكالمات بيننا الى مكالمة واحدة قصيرة يوميا ... بالنسبة للمفاجآت والاستقبال ... برضه كان في الأول ... ولكن كثرة سفراته أصبحت شيء روتيني حتى هو مل ... غير أني اثناء سفره لا اجد من يعاونني على توفير الطلبات غير عامل البقالة بالتوصيل ... المهم أني أوفر له عشاء عند وصوله ... مشكورة حبيبتي مرة ثانية كلفت عليك |
نفس مشكلة الأخت رسيل في عدم ظهور موضوعك ..
حتى الأخت سوسنا لا تظهر لي بعض مشاركاتها .. بالنسبة لموضوعك فهو ينطبق علي .. وما ذكرته الأخت رسيل أيضا ينطبق على حياتنا الزوجية .. فهناك ندرة في الرسائل والاتصالات وحتى التواصل عبر الماسنجر .. أصبح الأمر اعتياديا ،،، من المفترض أن نقاوم الروتين وننعش حياتنا الزوجية بالكثير من حركات التجديد لكننا كسالى :).. وفي كل مرة أخطط أنني حين أعود فسوف أشتري الهدايا وأبتكر المفاجآت ولكن يجيب الله مطر ..:d وربما يفيدك العرسان الجدد :) |
اختي شقرديه ... موضوعك حلووو مثلك ... زوجي نادر يسافر لحاله ... يعني سفراته للشغل انا دائما اكون معاه ... بس احيانا يسافر مع اخواني ... لما يسافر اتبع بعض الطقوس ... مثل : اتصالات للسؤال عن الاحوال ولكن مو اكثر من مرتين في اليوم ... لانه هو بعد يتصل .. رسائل نصيه بأبيات عن الشوق ... واحيانا بكلمات من تأليفي ...او موقف مضحك تعرضت له .. واخليه بعيد عن المشاكل ابخر ملابسه بريحة البخور اللي اتبخر منه واللي يحبها ... فيشمها ويتذكرني على طول يرسل مسج او يتصل .. احط تذكير في موبايله مع منبه ... واكتب العنوان مشتاقتلك حبيبي او اي كلام ... فيرن المنبه ويقرأ العبارة .. اتصل بالفندق اللي ساكن فيه ... واتفق معاهم ان يفاجئونه بعشاء على البحر ... او جلسة مساج ...طبعا هو واخواني اتصل واطلب ارسال باقة ورد لزوجي في غرفته ... زوجي يعتمد علي في حجز الفنادق حتى لو كان هو مسافر لحاله مع اخواني ...علشان جذي سهل علي اني اتفق معاهم على امور المفاجآت ... فجذي اكون مع زوجي حتى لو كان بعيد من غير ازعاج ... ولازم لازم الاستقبال بعد العودة يكون بمفاجأة جميله ومبتكرة ..واكون متحمسه في تجهيزها ... وتكون ثاني يوم من العودة لانه نفس اليوم يكون تعبان من السفر .. اما بنفس اليوم ... اجلس اعرف منه اخبار السفر والعمل وكل شيء ...اعمل له مساج يريحه من التعب.. هذي طقوسي حبيبتي ... والله يسعدك ويوفقك ويهنيك يارب ... |
السلام عليكم
الحمدلله تظهر عندي مواضيعيك :) لي فترة ما اشارك في المنتدى .. و اليوم عدت و يسعدني يكون موضوعك الحلو هو اول تدشين :) محسوبتك خبرة في مواضيع البعد .. دايمة السفر ... المهم التواصل بيننا كان بالتلفون طبعا و رسائل الموبايل اخذت نصيب الاسد ... عمرنا ما رسلنا لبعض من الرسايل الجاهزة .. مالها طعم زيها زي اكل المطاعم :) .. طبعا رسائلنا كانت يومية نجتهد فيها بكتابة مشاعرنا لبعض .. و هناك ايضا الرسائل الليلية :) وفعلا لها طعم خااااااااص .. تزيد من الشوق و حلاته بالنسبة للحركات فا غالبا ما اجهز شي لانه انا اللي بكون مسافرة و راجعة بكتفي باشياء يسييطة كارش عطري عالمخدة مثلا او كتابة رسالة او ايميل اعبر له فيها عن مدى حبي و سعادتي معاه ربي يديمها علينا نعمة و طبعا زوجي الله يسعده عمره ما جهز لي اي شي غير ملابسه المحتاجة غسيل و المواعين باالمطبخ :) .. بس معذور مع شغله مايفضى الله يعينه و بصراحة لم اركز بتاتا على ماتسمى بالليالي الحمراء قبل او بعد سفري لانه الشوق موجود اصلا.. فا فضلت تخبية بقية الاسلحة لما يبدا الروتين و الملل يدخل حياتنا و ان شاء الله عمره ما يدخل .. و ربي يسعدك حبيبتي عالموضوع الظريف ... ملينا من المشاكل بهالقسم .. الله يبعدها عن كل زوجين |
حبيبتي ..
زوجي جااااااااااااد جدا المهم اكلمة عندما اوقظة للدوام ... وعندما اصل لدوامي انا وعندما اخرج منة وبالليل الرسايل معدومه .. وهو لا يحب ان اتحدث او يتحدث عن مشاعرة ويغضب عندما اتحدث عن الشوق واللهفة لغرض في نفسة اعتقد عرفتية في عودتة اذا كانت عودتة قصيرة وبعدها سيسافر .. احاول ما اكدر مزاجة وابلع اي شيء منة مضايقني واحاول اجمع سوالف حلوة اغلبها مضحة ... واكيد اللبس والكشخة مطلوبة دوووووووووووم مو يوم |
هلا والله بالغلا..
بما ان زوجي بانتداب الان يكون تواصلنا اغلب شيء بالمكالمات فقط وانا ارسله رسايل بس هو مايرررد:(.. الا اذا كانت الرساله من تاليفي يتحمس ويالف رساله:)... مممم بالنسبه اذا رجعت اتحمس واكشخ اخر كشخه بس اذا دخلت البيت تنسد نفسي مغبرررررررر .. قلت له المفروض نستاجر في فندق,,قال وشوله الفسقه نستاجر فندق وعندنا بيت:29:,, مررررة سويت له حركه اول زواجي كنت مسافرة لمكه مع اهلي وهو بالبيت لحاله سويت لعبه الكنز خبات اوراق وارسلت على جواله مكان اول ورقه وجلس يدور من وررقه لورقه لين وصل للكنز "عطر " واستاااانس:d:d مشكوووووووووووورة شقر 55ديه على موضوعك المفيد... |
مره زوجي كان مسافر وكمفاجئه متعوده ا
حط له رساله حب مني ذيك المره متوقعه بينام بغرفه بلحاله قمت حطيت صورتي بكبرها وحطيت معها ظرف فيه شعر يوم جا الا وهو معصب يقول الشنطه مرميه اربع وعشرين ساعه بلغرفه الي نايم فيها مع ربعه ومادرى عن الصوره الا يوم وصل صار كل ماجا يسافر يقول لي لاتحطين شي لا صوره ولا رساله ولا شي |
بدايات الزواج كان الاستقبال لزوجي
فيه تكلف وحركات كثيره والمكالمات كلها لهفه وشوق لكن مع مرور الايام والسنين بدئت الرومانسيه بالانكماش في المكالمات والرسائل بحكم ظروف الحياه والاطفال قد اخذوا جل وقتي من جد دائما احن لذيك الايام والان مع كثرة المشاغل والاطفال عندما يغيب زوجي لسفر لازم اسمع صوته يوميا او ارسل له رساله طبعا هو مو حق رسايل مرره بس مايقصر يتصل ويطمن علي وعلى العيال بالنسبه للاستقبال لم يعد بتلك الكلفه فاستقبالي عادة يكون بسيط يعني اكشخ نفسي واكشخ عيالي واعمل حلى وعشاء او غداء لذيذ على حسب جيته مع تغيير بعض الروتين وهنا استثني الاعياد والمناسبات فالاستعداد لها مختلف مشكوره ياشقرديه على هالموضوع الجميل |
احتفظ بالغلا والحب والشوق بقلبي لين مايجي مسويه <<ثقل ..
وان رسل او اشتقت قوة ارسله .. بس الحين امل وخلاص انتهت موضة الرسايل بالنسبه لي .. اتحفونا با افكاركم يمكن نتحمس وانتي ياشقر55ديه اكيد عندك اشياء حلوة للتجديد.. |
رسيل
فعلا 00 فكثرة سفر الزوج00 يجعل الامر مملا00 ويقتصر الامر على الامور الضروريه فقط00 اما الكماليات فيكون على حسب التساهيل00 او لا يكون عجزتوا بس :d شاكره لك مشاركتك يالغلا شاطئ المحبه غريبه والله00 حتى انتي 00 كله من الالوان المدرجه >>>>>>>حريييم 00وتحب تكشخ حتى بموضوع ما علينا 00 مو كأنك غاشه من رسيل :11: هل يمكن الطرف الاخر وعدم تلهفه لذلك00 هو السبب في الممل او الروتين او الكسل ؟ ويجيب الله مطر00 كل الشكرلك ولمرورك العطر لمني بشوق الله يحلي ايامك يا قلبي 00 وتسلمين على الافكار الجنان00 اووووه وش خليتي00 ما شاء الله تبارك الله00 كله كوم 00 وتكلمين الاوتيل 00 شئ ثااااان 00 انتي خطيره :22: الله لا يحرمكم من بعض ويسعدكم شاكره لك طلتك الحلوه noora هلا فيك نورا00 وعودا حميدا00 اجل مشاكل بالقسم 00 طا ق وطقيق 00 بس ايسوي اكشن حلو :23: انتي العكس00 فأنت المسافره 00 لذلك مشاركتك كانت مختلفه00 فعلا00 فالرسائل المعبره عن مشاعرنا لها وقع خاااااص وما شاء الله ما قصرتي00 تسلمين يالغلا ورد وذبل جدية الطرف الاخر000 او عدم تقبله لأمرما00 فلذلك يخف الحماس كثيرا وما شاء الله عليك00 واهنيك على حكمتك وإنعاش حياتك00 والغرض اكيييييييد عرفته00 بيض الله وجهه :28: تشكرات لك حبيبتي هايدي والله منتو سهلين 00 راعين تأليف شعر او نثر :d هيوده عاد بيتكم مغبر !! ضحكت عليك ضحك00 وليه ما تسوين سواة اختك ساااابقا قبل الاولاد والمدارس 00 اخذ شغالة اهلي وانظفه قبل يوم او يومين من رجعة زوجي00 اما حركة الكنز 00 خطيييره يا ام الافكار انتي00 الله يعطيك العافيه على المشاركه الحلوه توفي وفيصل الله يوسع صدرك 00 الى الان وانا اضحك :d ذكرتيني بجارتي وهي تنقل اثاثها00 لا بسه عبايتها عند العمال00 والا صورتها مع العفش <<<<<< وش كبرها الله يسعدك يالغلا |
الله يجزاك خير على نسخ الموضوع لأنه حتى أنا مايظهر عندي الموضوع والمره السابقه كذلك لك موضوع ماشفت إلا الردود حقته عموما يالغاليه أنا زوجي لوسافر عني أتواصل معه بالجوال مكالمات ورسائل لاكن والله لوجلسنا نتكلم إن بطارية الجوال تخلص وحنا نسولف وزوجي يروح مشاريع في البر بحكم عمله عسكري وأحيانا يجلس شهر أو نصف شهر وأحيانا يجي يومين ويروح يجي الأربعاء والخميس والجمعه يسافر
بس أموت قهر يوم ينقطع الإرسال أحيانا الشبكه تقطع عندهم مافيه إرسال نرجع لرسايل نتراسل أذكر مره راح مشروع رجع سدد فاتورة الجوال أربعة آلاف ريال وأنا مره سافرت لعند أهلي وزوجي ما أعطوه إجازه وكان عند إخواني عرس فقال لي إيش رأيك أوديك لديره علشان تتونسي وتحضري عرس أخوك وقتها كان عندي ولدين بس قال خلاص بستأذن وأسافر أوديكم وأرجع إجلسوا شهر وإنبسطوا وأرجع آخذ إجازتي وألحق وراكم قلت له خلاص وسافرت وكان كل ليله يدق تلفون ونجلس سوالف إلين يأذن الفجر أنا وياه وحسيت إنه بعد سفرنا تبهذل لأنه متعود علينافي البيت يقول والله إن البيت ماقدرت أجلس فيه وأنتم مو موجدين فيه أحس بغربه والله إن البيت توجد فيه أربع غرف وصاله وإنه يشيل لحافه ومخدته وينام بسيارته يقول أحس إن البيت صارمظلم علي وأنتم موفيه أتخيل وجودك بكل جزء في البيت وحتى أنا ندمت على سفرتي بدونه وبطلت أسافر لحالي وأرسل لي رساله مظرفه في ظرف مع واحد من زملائه كان جاي لديرتنا ويعرف عمي أبو زوجي أعطاه الرساله وقال له هاذي سلمها بيد زوجة ولدك من عند زوجها وأنا تفاجأت فيها صراحه لأنه كل ليله نكلم بعض بس ماقال لي شئ عن الرساله أعطاني عمي وفتحتها وكان مع الرساله سلسال ذهب وتعليقه ناقش عليها أول حرفين من إسمنا أنا وياه وكمان مبلغ من المال بس صراحه الرساله وإللي مكتوب فيها أغلى من كنوز الدنيا كلها عندي جلست أقرأها في نفسي وكان عمي عندي وعمتي أهل زوجي كان يسألوني وش مكتوب فيها وأنا إنحرجت واجد لأنهارساله غراميه راسلها لي وقمت أصرف عاد عمي قال سمعيني وش مكتوب فيها إقرأيها الحين وجلست ماسكه الورقه وألفت كلمات من راسي إلى والدي العزيز وأمي الغاليه أبلغكم تحياتي وأنا مشتاق لشوفتكم وجالسه أقرقر على رؤسهم مساكين وألتفت إلا وأم زوجي تبكي مسكينه من إللي سمعته وقالت لعمي والله إنا حتى حنابعد إشتقنا له قال لها عمي إن شاءالله يعطوه الإجازه ويجينا وجلست أصبر عمتي أم زوجي وأنا أبغى من يصبرني وجلست أقرأ كلماتها في نفسي أكثر من مره وجدت إن كلماتهالامست مشاعري وأحاسيسي ومازلت أحتفظ بها من عام 1420هجري إلى الآن وكل فتره أختلي بنفسي وأقرأها لوحدي وسأحتفظ بها ماحييت. بالنسبه لإستقبال زوجي من سفره أنا لا أحب المبالغة الزايده في الإستقبال حركات ورود وشموع وإضاءات خافته ماعمري سويتها وشفت زوجي ماتجذبه مثل هاذي الأشياء وأعرف وش الأسلوب إللي يحبه ويعشقه وأسويه له وينبسظ أول شئ أتأكد إنه على وشك وصول أضبط له وجبته إللي يحبها ويموت فيها وأرجع أضبط البيت ترتيب وتنظيف كامل كأنه يوم عيد عندنا وعيالي الله يعافيهم كمان مايقصروا كل واحد أكلفه في مهمه ينجزها يساعدوني وبعدها أولع الفحم وأجيب المبخره وأحط ذاك البخور من العربيه للعود أخليه يشم ريحته من باب العماره وبعدها أضبط دلة القهوه هيل وزعفران والعويدي والتمر الخلاص وأحطه علا جنب وأرجع لعيالي ألبسهم وأطيبهم وأحط لهم نظام كل واحد يلتزم فيه وبعدها أرجع لنفسي أخذ شوروالبس وأكشخ بأحسن ماعندي وأرش العطر والعود وأتجهز كأني رايحه لعرس ونجيب لوحة فلين أبيض ونقصها على شكل قلب ونكتب فيها مرحبا 1000بضيفنا الكريم ونحط أسمائنا أنا وعيالي أسفلها ونكتب فيها وصلت أهلا وحللت سهلا مسكنك في وسط قلوبنا أيها الأب الحنون ونعلقها على الباب الخارجي للبيت طبعا أناساكنه دور ثاني ويوم يرقى على الدر ج الباب على طول مقابل وجهه واللوحه عليه طبعا نعطيه وقت حتى يقرأها وبعدمايدق الباب نفتح له ونستقبله أنا وعيالي أحسن إستقبال والحمدالله على سلامتك وحشتنا البيت بدونك مايسوى يانور البيت وضيه إشتقنا لك عسى الله مايفرقنا والحياة مالها طعم بدونك ومن هالسوالف وأنا زوجي الحمدالله سفراته قليله وإن طول إسبوع طبعا سفراته داخليه ومحصوره ياديرتنا أو مكه المكرمه أحيانا يروح عمره لحاله مع أصحابه بس مايتعب إلا في العمل شويه لأن مشاريع البر والتدريبات يطول عنا فيها أحيانا بس يجي الأربعاء والخميس ويسافر الجمعه بس هانت مابقى شئ ويطلع على التقاعد وبعدها نحلق سويه ونسافر كل مدينه وكل دوله نفسي أروح لها وبعدها وحنا سوا ماعاد أحد يحتاج يستقبل الثاني منا وبصراحه موضوعك هاذا بالذات نبش ذكريات الماضي وخلاني أفكر في أحلام المستقبل الله يحفظك ويحقق لك كل حلم تتمنيه يا أختنا الشقرد55يه . |
[QUOTE=شقر55ديه;2526777]هايدي
والله منتو سهلين 00 راعين تأليف شعر او نثر :d هيوده عاد بيتكم مغبر !! ضحكت عليك ضحك00 وليه ما تسوين سواة اختك ساااابقا قبل الاولاد والمدارس 00 اخذ شغالة اهلي وانظفه قبل يوم او يومين من رجعة زوجي00 اما حركة الكنز 00 خطيييره يا ام الافكار انتي00 الله يعطيك العافيه على المشاركه الحلوه يختي يااااااليت والله بس للاسف الشديد اهلي ساكنين بسدير وانا في الرياض ... وكم من مررة تمنيت وجودهم في الرياض يوسعون صدري ومنها اتسلف الشغاله في اوقات العزاايم... بس الله يخلي الشغالات اللي بالساعه.. مشكووورة يابعدي على موضوعك الجمييييل.. |
نسيم الوسم00
اي والله00 اغلبنا مل مع الاشغال والعيال00 مو يوم كنت فاضيه واخر روقااان واهم شئ حسن الإستقبال00 فبعض الحريم من كثر سفر زوجها00 حتى الإستقبال ما تستقبله والله يسعدكم00 ومشكوره على مرورك غاليتي00 ام عزام00 بعض الرجال00 يكفيه شوقك ولهفتك له00 ما هو طمااااااع واهم شئ فيها حسن التعبير00 ومعرفة ما يرضيه00 والافكار والله عند لمني بشوق و هايدي و توفي 00 الله يسعدهم اتحفونا شاكره طلتك الحلوه يالغلا00 بنت الحكمي00 يااااه على الذكريااات الحلوه00 ما تتصورين وش كثر استمتعت وانا اقرا00 اما حكاية الرساله00 فهيا فعلا معبره وشاعريه00 مالومك الله يسعدكم ويخليكم بعض00 وكل الشكر ولمشاركتك الممتعه بجد هايدي00 هلا والله غلاي 00 اي والله مع كل الحق00 الله يعينا واياك00 المره الثانيه عطيني المفتاح00 والله لألمعه لك تلميع :26: مشكوره على طلتك الحلوه |
اقتباس:
ولم أقم بالغش من أختي رسيل وقد حرصت في كلامي على حفظ الحقوق الفكرية والأدبية فذكرت عبارة ( كما قالت الأخت رسيل ) .. :) لا أعتقد أن المسألة لها علاقة بعدم التلهف لكن المجال ليس متاحا لتطبيق الغراميات بيننا .. فحين أتصل بزوجتي أسمع صراخ ابني وإزعاجه لها ولا يكون الوضع ملائما لتبادل الأشواق .. وإذا أردت أن أكلمها في الليل إذا بها تكون نائمة ، وفي الصباح أنا في الدوام والمكالمة تكون مختصرة جدا ورسمية بسبب وجود زملائي الموظفين .. وهكذا لا نجد وقتا مناسبا ، ونجد أنفسنا قد انغمسنا في مشاغل الحياة ونسينا أنفسنا .. وفي رحلة العودة يكون في خاطري أن أجلب لها شيء معي لكنني أكون منهكا جدا وفي كل مرة أقول المرة القادمة .. ثم إنني أسافر أسبوعيا أو كل أسبوعين ولذلك لا تكون فترات انقطاع طويلة بيننا .. من أجل ذلك تكون هناك ندرة في المكالمات وشح في التواصل لأنني لا أمكث طويلا في سفري .. وفقكم الله .. |
محشوووووووم يا اخي الفاضل00شاطئ المحبه00 محشوووووم
اعذرني 00 جديده على المنتدى00 ولو تدري كنت شاااااكه 00 وكنت بسأل00 لكن ضيعتني الردود00 العفو والسموحه اخي الكريم00 واشكرك اخي على المشاركه الطيبه وتوضيح الامر00 لكن تعرف 00 مشاركتك جدا قيمه00 لأنك الرجل الوحيد المشارك !!!!!! فالرجال في هذا المنتدى شحيحي المشاركه والتفاعل الله يعطيك العافيه00 ويسعدك بزوجتك00 وجعلك قرة عين لها |
| الساعة الآن 06:39 AM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©