|
مشكلتي مع زوجتي و قلة احترامها لي
السلام عليكم ورحمة الله وبركاته بصراحة اول مره اكتب موضوع عن حياتي الزوجيه بس بصراحة صار الوضع لا يطاق وحاب اشرحلكم مشكلتي مع زوجتي . في البداية متزوج من سنتان ولدي طفل انعمنا الله بنعمته علينا بحياة فيه الحب والاحترام والتضحيه ورزقنا الله بطفل . بس من بعد العيد الي طاف وزوجتي متغيره بسبب مشكلة في شهر رمضان الي طاف والمشكلة انحلت بعد ان تقدمت بعتذاري لها واني احسن اخلاقي وحياتي معها وهي برظو وعدتني بذالكـ . وكانت حياتنا في البداية جميله بس تحصل فيها بعض الخلافات الزوجيه ويكون فيها صلح . لكن بعد العيد عشت احلى فترات حياتي الزوجيه لن كلنا عرفنا الزواج وخاصه انا عرفت حق الزوجه من كل النواحي واحاول اغير نفسي معها في الفتره الحاليه انا طلعت معها طيب إلى ابعد الحدود ماعاد احاول ازعلها بشي الي تبيه يحصل لها بس طلع فيها عدم الاحترام في بعض الاحيان يعني تذب الكلام وترد علي وتهددني تقول مثلاً لو يحصل سوء تفاهم تجي تقول انقلع عن وجهي ولما اقولها انقلعي او اقولها لاتخليني اجرحكـ اكثر تجي ترد تقول جرب تجرحني فيها يعني مدري تهددني انها تروح بيت هلها او تحسبني بدورها بس المشكلة فيها هي لانها من النوع الجاد ومن النوع الي يشيل هم على اي شي . يعني مثلاً تحصلها العصر معك كويس ماتدري الى الليل نفسيتها منقلبه على سبب تافه بسبب ان ولدها مانام انها عندها شغل تجيك نفسيتها اعوذ بالله اكون انا ساكت وكم مره حاولت افهمها عن الي فيه هـي وكم مره جيتها بالاسلوب الزين حاولي ماترفعين صوتك علي حاولي تثمنين كلامك تقول انت برظووو حاول تحترم نفسك وللسانك يعني لما اتكلم عليها ترد علي بنفس الي اقولها مثلاً اقولها انقعلي عن وجهي ترد وتقول انقلع انت كم مره مسكت نفسي عن مدة اليد لن كرامتي فوق كل شي . وانا والله ماقول انقعلي الى من شي اشوفه قدامي شي بعض الاحيان يقهر اقول هذي كذابه ماتحبني بس تبي تمشيني على كيفها صدقووني اني ماقصرت معها وربي يشهد علي وهي برظووو تحبني وتصيح في حبها لي بس مدري وش الحل معها في التعامل معها ورب الكعبه افكر اطلق بس المشكلة عندي ولد وخسرت خسائر وديووون بس كلها عشان حياتنا احس بقهر لما اذكر الشي الزين لها وتضحيتي لها .. ربي يشهد علي اني احاول اعيش بدون مشاكل ونكد وتفاهم بس هي تغلط وفيها زي شوفة النفس في الفتره الاخيره افكر اهجرها فتره طووويله بس والله بتعب كذا انا لاني تعبت من الزعل والمشاكل وربي كرهت الزواج وتمنيت اني عزوووبي ولا ادخل في مشاكل زي كذا وتفاهات مع ناس ماتقدر وش الرجال. لن كل شي الى كرامة الرجال وخاصه لما يكون طيب وحنون مع زوجته وهو في اسوء الظروف يحاول يسعدها . وهي والله في المجتمع الي حولنا يمكن احسن وحده تلبس احسن وحده في كل شي عادها صديقه وزوجه وكل شي بالنسبة لي الحين حسا اني فقد الشخصيه امام الزوجه والسبب تصرفها اخاف اتكلم اغلط ونرجع الى مشاكل وجع راس . وتروح بيت هلها وتنوم هناك وانا في بيتي مافي امل اكمل شهر بدون مشاكل شوفو ابي منكم حل الله يرضى عليكم دنياء وآخره والله لايحرمكم الأجر في وقفتكم معي . وابي حل مع التفكير عن طيبتي معها ابي اغير طبعي معها ابي اكون اكثر جديه مع نفسي واكون مطنشها . ابي حل الله يستر عليكم وشكراً |
الله يكون بعونك ويسخرها لك خلك صبور واحتسب الاجر ..
اذا رفعت صوتها عليك عطها نظرات واسكت لاتكلمها لين تهدى انشغل بقراءة القران الاستغفار اطلع اشتر كتب تحبها خلها لين تحس بغلطها وترجع لك وانت اقبل اعتذارها بس اشرط اذا رجعتي راح ازعل طول عمري عليك لأنك حبيبتي وما ارضى تعامليني كذا .. وانت اخي اذا عصبت عليها لاتطول صوتك هي تتعلم منك بعكس اذا قلت يازوجتي يالغاليه ليتك فعلتي كذا كان انبسطت منك اكثر.. باسلوب اكثر تفهم حتى تتقبل منك نقدك وتحبك اكثر اختر الكلمات اللي تعجبك فهي زوجتك وام ولدك والغاليه تبي منك كل شيء حلو وهي بيزيد حبها لك وغلاك واحترامك وعلمها بكل اللي تبيه وانت ماسك يدها مثلآ او حاضنها تفهم اكثر لاتعاملها كالرجال عاملها انها انثى ويحركها الرقيق الهادئ بل ويجذبها اكثر من القوة والقسوة اللي بتدمركم وماتجيب الا المشاكل والكره والطلاق بعيد الشر ... الله يفرج همك يارب .. ..وماكان الرفق في شيء إلا زانه ومانزع من شيء إلا شانه.. ..اخي ضع هذه الكلمات عنوان حياتك الزوجيه حينها ستنسى المشاكل .. |
اقتباس:
بصراحة استفدت من كلامك في البداية بس وربي تعبت معها صدقيني سويت مثل ماتقولين مثلاً لما تجي مشكلة تحصلني استغفر واسكت ولما اسكت تجي ترد علي ليه تسكت ووتلفظ وانا ساكت مدري وش وضعها , |
السلام عليكم ....
من عرضك للمشكلة أرجو أن تتقبل بصدر رحب ردي على مشكلتك ... صحيح أن للزوج حق عظيم وان على الزوجة ان لا تتعمد مضايقة زوجها ... ولكن مثل ما انت تتضايق من ردودها فكذلك هي عندها احساس وشعور ... فوالله لا أرضى ان يقولي زوجي انقلعي ابدا ولا تسمح لي كرامتي بذلك ... جرب يا أخي طرق اخرى أفضل للتعبير عن غضبك منهاوعدم رضاك عن تصرفاتها ... ولكن التلفظ عليها لن يأتي الا بالعناد من طرفها والثأر لكرامتها ... لأننا حتى النساء بشر وكله الا كرامتنا مثلك تماما ... فعليك اذن باختيار جمل شديدة وحازمة وفي الصميم دون النزول بمستوى النقاش والجدال الى الحضيض ... وأظنك ستجدها تخجل من نفسها مع الوقت ... وتأكد انك بصبرك عليها والسعي لتعليمها وتأديبها بالطرق السليمة فأنت رجل بمعنى الكلمة وكرامتك أعلى من أن تمس .. ملاحظة : من الطرق الفعالة لكظم الغيظ وتاديب المرأة الخروج من المنزل لنصف ساعة والعودة ... لها تأثير في رأيي لأنك تكون قد هدات وهي هدأت ....ولكن تعامل معها بشكل طبيعي عند عودتك ولا تقاطعها ... جرب ما يضر دمت في حفظ الرحمن ،،، |
اخي يمكن نوع الحبوب المانع اللي تستعمله قوي ومأثر فيها
اخوي رحال انت اشكي لها لو تبكي امامها قولها حراام عليك انا محتاجك ليش تعامليني كذا استعطفها علمها بكل اللي مضيقك منها بصوت هادئ قول لها انتي تغيرتي علي يمكن الحبوب اغيرها تكفين ولا اشوف اغلى الحبايب كذا يعاملني وابكي ابكي وشوف ان شاء الله بتحس فيك والاكيد لأنها انثى والعاطفه تغلبهاتصدق بتصيح معاك وبتفضفض بعد هي واسمعها .. وان شاء الله تنتهون وتمسحون دمووع بعض وبعدها توضوا وصلوا ركعتين واشكروا ربي وادعوه انه يسخركم ولايحرمكم من بعض .. |
اقتباس:
استفدت من كلامك الشي الكثير وباذن الله احاول اكون اكبر من اني اتلفظ مثل هذي اللفاظ السئيه وشكراً |
اقتباس:
بس اختي الله يستر عليك صعبه تنزل دمعتي عندها اوكيه ابين لها بحبي لها بس المشكلة الحين وانا ارد عليك كل واحد في غرفه انا زعلان منها وهي بتنام ومدري وش اسوي معها والمشكلة هي غلطانه علي . تعبتك معي الله يعافيك ويجعلك من جنات الفردوس الاعلى يارب ياكريم |
انت تتوقع الدموع ضعف لا والله ..
انت جرب ادخل عليها وقلها كل الي بخاطرك من سوء معاملتها ومثل ماقلنا تراها تتعلم منك انتبه.. ومن ومن ومن كل اللي شايله بقلبك عليها قول لها وانت ماكتبت هنا الا منقهر وتبي حل وانا اقولك الحل بينكم انك تصارحها وجرب تبكي عشان حالكم وانت تبي الراحه وماتبي المشاكل وانك تزوجت عشان تسعدها فالنهايه ماتتوفقوا وهي تتذمر يا اخوي خليها تحس باحساسك .. لو الدموع مالها فايده ليش ربي خلقها فينا .. ترى الحريم الدموع تهزهم وخاصه من الرجال يحسونها قويه ومابكى الا من القهر وعدم التحمل .. وانت كيفك ما اقتنعت اعتبر كلامي ماصار .. |
أنا ما يقهرني الا كل من جاء قال أفكر أطلقسبحان الله .. دام الطلاق حل لكل المشاكل الزوجية .. كان قلنا خلاص يا جماعة .. اللي حياته فيها مشكلة قد الذرة لا يفكر و لا يتعب نفسه .. كلها كلمة من أربع حروف و اااااااااا تبــــــــــــــدا معاناة المشاكل الحقيقة .. حسبالكم الطلاق لعبة .. و النسوان اللي تحتكم مو بشر تخطي و تحس .. و عيالكم أمانة برقابكم .. يناس خاااااااافوووووا ربكم .. وش اللي قاعد يصير في بيوتكم .. اللي مو قد المسؤولية لا يوهق نفسه ولا أحد معه .. اللي مو قادر يفتح بيته .. و يأسسه صحححححح .. يرتااااااااااح .. اسغفر الله .........
أخوي رحال .. حل مشكلتك ببساطة لا تراد زوجتك .. و لا تجيب كلمة شينة بكلامك .. واذا تكلمت بذا الطريقة اسفهها .. هذا هو الحل بكـــــــل بساطة ؛ |
كل اللي ابيه انكم تفتحون صفحه جديدة وكل واحد يفضفض عالثاني وتنتهي مشاكلكم وطفلكم مايكبر وانتو كذا بالاصوات العاليه خلاص الحين انتو تربون مو تنتربون يعني مشاكلكم ماتطول ومو اي شيء بسيط يزعل الثاني
التغاضي , العفو , التسامح . التضحيه شعـــــــــاركم .. ولا ماراح يهنى لكم عيش .. ودمتم بحفظ الله .. |
السلام عليكم
حسب اعتقادي انك اعتذرت لزوجتك بطريقة اكتشفت فيها ضعفك وشدة حبك لها وانك لا تستطيع الاستغناء عنها وعن ابنك لذلك هي ترى انها الآن ندا لك وترد الكلمة بمثلها خاصة وأنت تهينها بالتلفظ بكلمات تدل على احتقارك لها ساعدها في تربية ابنك فهو ليس ولدها وحدها وفي تنظيم وقت نومه حتى يكون لديكما وقت تقضيانه معا كما كنتما قبل ولادته فقد تكون متعطشة لحنانك وحبك وتشعر بالفراغ العاطفي بعد الانجاب وتعصب عليك و تريد منك ان تفهم ذلك بدون ان تطلب (بعض النساء والرجال كذا) والافضل عند ما تعصب انت ان تخرج من البيت حتى تهدأ أعصابكما ثم تحلا المشاكل بهدوء دون ان تظهر لها ضعفك وقلة حيلتك فالمرأة مهما كانت لاتهتم بمشاعر الرجل الضعيف أو من يحاول احتقارها والتقليل من شأنها اتمنى ان تعيش حياة هانئة |
اقتباس:
صدقيني انا عارف كلامك صح بس مشكلت دمعتي مافي امل تنزل والحين حاس نفسي ماقدر اكلمها هي غلطانه وكم مره فهمتها |
اقتباس:
|
اقتباس:
انا استفدت منكم الله يعافيكم من ناحية ان لساني يكون افضل من بعض الكلمات الشينه مثل انقلع والخ ... |
اقتباس:
وباذن الله ربك يسر الله كل امر |
اقتباس:
بعدين من ناحيت النفسيه اذا مو حبوب منع الحمل يمكن فيه شي مضايقه مو شرط من تجاهك يمكن من صديقاتها قرابتها احد جارحها بكلمه وعشانك انت اقرب الناس لها واثقه انك تحبها وهي تحبك صارت بس تتهاوش معاك ياخي اقرب مثل المره ماعندها شي اغلا من ضناها واذا تمشكلة مع زوجها او كانت متضايقه من شي حطة حرتها في ضناها كذا زوجتك صارت بس تنتظرك ترد البيت وتتهاوش معاك انا ما اقولك اعتذر اذا مو غلطان لاتعتذر بس لاتكون جاف معاها حاول تتجاهل الزعل بالبيت خلك رسمي اشوي عشان هي اتحاول يخف زعلها وبتلاحظ تغيرك واذا اسئلتك قول عشان نبعد عن الهواش وجع الراس بتقولك انت تغلط وتقولي كلمات شينه قول انا اعتذرت وعدتك ما اعودها بس انتي مو مصدقتني شسوي شفت ان هاذا انسب حل لنا بس احذر انك تتجاهلها انا اقول تجاهل الزعل سولف معاها طالعو التلفاز جميع عادي بس بثقل اشوي ومزح خفيف مثل عطيني مويه ياحلوه كلمات حلوه مع ثقل اذا شفتها تغيرت اشوي خفف الثقل حتى ترجعون مثل اول واحسن واذا تناقشتو في الموضوع قولها انتي زوجتي وام اعيالي انا اخترتك شريكت حياتي موبس زوجه يعني اذا انتي ماتحملتيني منو بيتحملني انتي نظر عيني وقطعه مني صدقني الكلام الحلوو ياثر بالمره الله يوفقكم ويسخركم لبعض |
اخوي كأنك تتكلم عن زوجتي ..
صراحة انا مريت بكل اللي قلت عليه مع بعض الإختلافات.. أولا احب انبهك لشي ضروري تحل المشكلة عاجلا ولا بتوصلو مواصيل حتى الطلاق ما يحلها لأنها ممكن تدمر نفسيتك وتعقدك .. الشي الثاني عليك بالحزم الحزم ثم الحزم معها .. وأنا اللي عملته انها يوم خرجت وكانت واصلة معاي .. يوم رجعت لقتني لميت كل أغراضها وحطيتها في شنط .. وقلت لها خلاص اللي بينا انتهي هيا على بيت اهلك .. ووضحت لها الاسباب كاملة .. واخدتها على بيت امها .. هي انصدمت وما اتوقعت لأنو كان على بالها اني ما اقدر استغني عنها .. وبعد شهر قلت لها ترجعي بس بشروط .. وشهدت امها علي شروطي .. والحمد الله الآن بدأ ينصلح حالها .. ولكنها احيانا تخرج عن طورها فأمشي لها المرة الأولى فقط .. ولكن بمجرد ما تكرر انبها بقوة وبحزم .. ولكن من دون رفع صوت او تلفظ .. جرب الطريقة هادي وان شاء الله تنجح .. ولكن اياك ثم اياك ان تبكي لها .. فسوف تستأسد عليك زيادة .. |
في خطوات:
- الاحترام المتبادل - الحب يعني التسامح والمغفرة والتنازل - لا تتلفظ بالكلمات التي تثيرها وتشغل غضبها حتى لا تتلفظ هي في المقابل - كن حاسماً إذا بدر منها كلمة بذئية في حقك مع التهديد والوعيد بعدم تكرارها - العقاب بالهجر والدعاء بالصلاح - حاول ان تغيروا نفسيات وأجواء وأماكن .. التغيير مهم ويجدد - الكلمة بالكلمة والنديه لا ينتج عنها سوى الزعل (شد وارخي.. وتجاوز) - الكلمة الطيبة صدقة .. لا تبخل بمشاعرك ولا يقلل النطق بها من قدر نفسك ونفسها - .... هذا ما استحضره الآن من واقع تجربتي. |
اخوي اجلس معها جلسه مصارحة
وكلمها عن كل الاشياء الي تدايقك وهي بالمثل واتفقو تتغيرو ولو تقدرو سافرو مكان هادي غيرو جو شوي وفعلا لو صار بينكم مشكله لاترد عليها واطلع من البيت شوي وبس ترجع لاتكلمها للمسا وبعدين اطلب منها تجلسو وااكلمو بلي صار وتحلوه وان شاء الله ربي يسعدك ويهديها |
مدري وش اقولكم بصراحة يارب يارب يسعدكم ويجعلكم من أهل الجنة كل من وقف معي ورد علي قوولو آمييين
وبصراحة بدونكم مدري وش راح اسوي الله لايحرمكم الأجر .. ابشركم لما قريت كل كلامكم ابشركم بفضل الله علينا انحلت المشكلة معها بعد ماسمعت اغلب كلامكم وطبقته والحمد لله والشكر طلعت بنيجه معها وباذن الله يبعد عنا وعنكم المشاكل ويسعدنا ويسعدكم . اشكركم |
| الساعة الآن 03:27 PM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©