|
بنتي صايره عنيده
فعلا بنتي صايره عنيده جدا جدا هي ما شاء الله عمرها 3 سنوات و تتكلم بكل وضوح و يعني كبرت و تبغى تفرض شخصيتها علينا البنت كانت هاديه و حلوه ما ادري ايش صارلها صايره عنيده و ما تسمع الكلام و مشااااااغبه والشقاوه ما تكون على اصولها الا لما نكون في مكان عام.. قمة الأحراج:29: يعني لما تسوي شي غلط وهي عارفه انه غلط لأني نبهتها قبل كثير فلما اصارخ عليها تقوم واقفه مكانها و تناظرني بنظرات قويه و ماده بوزها شبرين و ترجع تسوي الغلط مره ثانيه بس عناد ولا مثلا اذا قلتلها مافي عصير قبل ما تكملي اكلك, تقولي بكل قوه ما راح اكل قبل ما تعطيني العصير و فعلا تظل مصره على رأيها, لغاية ما في الأخير انا الي استسلم و مثال ثاني تقولي ماما اعطيني زبادي, اقلها لأ مو دلحين بعدين تاكلي, ترجع تعيدها اعطيني و تصرخ بقوه ولا كأنها سامعه ردي عليها الين انا كمان اصارخ بكل قوه و تبدأ شغل النظرات لساعه يعني تكلمت بهداوه بصراخ ما تفرق معاها الي براسها هو الي يصير انا ما استخدم اسلوب الضرب ابدااا لأني مؤمنه انها راح تخاف من الضرب نفسه مش مني يعني ما راح تسمع كلام اي احد الا بالضرب,, فأنا رافضه هذا الشي اعرف انه المسأله يبغالها صبر و طولة بال بس و الله ما فيني حيل و تعبت قلت يمكن غيره من اخوها بس هي ما شاء الله تبارك الله تحبه و تحضنه و شغاله بوس فيه و تحب تعطيه رضاعة الحليب و تلعب دور الأم انا احضنها و العب معاها و معطياها كل الحنان بس ف يالفتره الأخيره صايره تعاندني في كل شي لدرجة ان ابوها يقولي اني مدلعاها على الأخير هو حازم معاها و هي تخاف منه بس هو كمان تعانده احيانا و ما تسمع كلامه ايش اسوي ساعدوني |
حبوبة انتبهي تضربينها تكفين لاتتعقد وهي صغيرة امشي معها بالهدوء والمسايسة خلي لكل عمل تسويه ثواب وعقاب وانتي وضحي لها هالشي لو سوت شي صح جيبي لها هدية أعطيها حلاوة كافئيها إذا غلطت وضحي لها الغلط ونبهيهها وازعلي منها بس لاتعاندي أبدا لإنه رح تزيد أكثر والله يوفقك حبوبة |
فديتها ....
شوفي انتي الغلطانة .. لانك تستسلمي بسرعة .. خلي بالك اطول من بالها .... مافي عصير يعني مافي.. خليها تبكي تصارخ تصيح.... تعبتي من صوتها دخليها الغرفة و قولي لها بحزم عصير مافي و لما تخلصي البكا تعالي انا بالصالة و اقفلي الباب و مرة على مرة بتفهم انه اسلوب العناد و البكا ما ينفع عارفه انه صعب و اصواتهم تجيب وجع الراس الله يحميهم لكن .. ضروري تمسكي ا اعصابك |
اقتباس:
اهلين اختي لا تخافي انا رافضه الضرب تماما مسألة الثواب و الهدايه نفعت معاها فتره بس دلحين ما تفرق اشكرك |
اقتباس:
لا هي وقفت الصراخ و البكا من زمان لما فهمت اني ما اتأثر فيه الحين قلبت عناد و ما تسمع الكلام و لا الأوامر,,, يعني تتجمد في مكانها و تناظرني بقوه بدون كلام الحركه هذه تسويها مية مره في اليوم على اي شي فعلا تعبت |
نفس طريقة ولدي عاد الاولاد اخس واعند بمليون مرة
و يقهرني لما يطالعني بنظرات مدري من وين مو ناقص الا يجيب الشبشب ويضربني ودايما يسويها شبعت ضرب منه الله يهديه بس لدرجة احس اني اتعامل مع عدوي وابغى اي احد يشيله ويفكني منه لو يومين ارتاح على فكرة اذا زاد علي بعد صبر ابدا بالضرب |
هذا عمر الثلاث سنوات كله عناد
لبسيها و دلعيهاو خليها تحس بانوثتها ودلالها اشغليها باشياء ثانيه من تعند قوليلها تجيب لك قصه او قوليلها تغيري تلبسي لبس الاميره و احط لك منكير هي شوي شوي حتعمل الي يرضيكي وزياده الظهر ابوها تالفها بكثره الدلع هي و ابن طيب القلب |
اقتباس:
برضو نفس الشي حبيبتي اتبع اسلوب التطنيش مع ابني لانه برضو يصيبه العناد احياانا اطنشه لييييييييين يرجع يحضني و ينفذ اللي براسي :) مانفع معها اسلوب الثواب . ارجعي للطناش .. خليها تناظر و تتجمد في مكانها .. لين تمل لحالها .. سيبيها بالمكان اللي هي في و اطلعي غرفة ثانية و لا تعبريها و خليك على رايك مهماا يصير و زي ما بطلت اسلوب البكا لما شافت مافي منك امل . راح تبطل اسلوب العناد لحالها لما تشوف انه برضو ما نفع دخلتيها الحضانة ؟؟؟ في امهات يقولوا انه لما الطفل يدخل الحضانة يتعلم كثير من الايجابيات منها سماع الكلام و الترتيب و الله اعلم |
اقتباس:
لا الا يضربك...ايش يضربك اعتقد انك كمان تضربيه فأخذ الأسلوب هذا منك لا حبيبتي لازم تشوفيلك حل مناسب قبل ما المسأله تتعقد اكثر انتي ما قلتي عمر ولدك الله يهدي ابنك و يصلح حاله |
اقتباس:
على اساس ان مرحلة العناد تخلص لما يصيروا 3 سنوات,, ولا كيف و الله ابدأ اتكلم معاها عادي و احاول اشغلها بأشياء ثانيه على اساس توقف العناد و النظرات الحاده بس على مين,,, و لا كأني اتكلم معاها اساسا هي تخاف من ابوها و هو حازم معاها.. بس برضو و هو حازم ما تسمع كلامه احيانا احسك ما شاء الله خبيره في مثل هذه الأمور ياريت تعطيني نصايح اكثر |
اقتباس:
شوفي حبيبتي انا اقدر اسيطر على الوضع لما نكون في البيت,, اقدر اطنشها او اجلسها على كرسي العقاب بس لما نكون في الخارج ما اعرف ايش اسوي اذا طنشتها هي راح تزيد في عنادها و تستغل الفرصه و تروح تلعب مع عيال الناس انا مشكلتي لما نكون برى اكثر من لما نكون في البيت لا لسه ما دخلتها الحضانه,,, بس ناويه ان شاء الله بنتي ما شاء الله اجتماعيه و تحب الكبار و الصغار و الحيوانات كمان و انا متأكده ان الحضانه راح تنفعها لأنها راح تسوي مثل الأطفال الثانيين,, |
اختي حتى لو برا البيت اذا ماشيه بعقاب معين ماتتركيه ابدا عادي ولو برا
حتى لو ماكان في كراسي ممكن توقف او تجلس على الارض لانه صدقيني اذا تجاوزنا ولو مره صعب نرجع ثاني الله يخليلك اياها |
اقتباس:
يعتمد متى بنتك اتعلمت الكلام و الغيره من الاكبر و الاصغر لاحظت انه الطفل يتبع نفس اسلوب اهله يعندو يعند معاهم يتساهلو يتساهل معاهم و انت عندك بيبي اصغر منها تعمل هلاشياء حتى تلفت انتباهكم انت تعبانه من الولاده و متغربه و نفسيتك تعبانه و عندك مسؤليات وحاسه حالك وحيده وما لك خلق و خيالك بيودي ويجيب نصك مع ولادك وزوجك و النص الثاني مع اهلك و في بلدكم هذا غير انك انت كمان حابه تثبتي انك ام و كلمتك وحده و تقولي لها كلمتي وحده ما تصير اثنين ولا يعني لا و هي بالها طول اكثر منك ما وراها شي فتمسك و تعاند اكثر و انت تتعبي و تحبي تخلصي الموضوع تعطيها طلبها النتيجه حيزيد عنادها و صراخها و بكائها الحل انك تجيبيها و تكلميها دايما وحتى من تعاند و اهم شي من تعاند قوليلها حبيبتي و اميرتي و انت قلبي و مافي احلى منك و احضنيها و بوسيها بعد شوي تنسى الموضوع كله خليها تساعدك تغير للبيبي و تنيمه وتلعبه وتاكله و خذي رايها هذا حلو ولا لا حتى بلسوق ولا عند الناس دايما امدحيها تفهم الحزم مع البنات يجيب نتيجه عكسيه اطمنك البنت امرها سهل بكلمتين وحنان مبالغ فيه تكسبيها و تسمع كلامك |
انا استغرب من بعض الامهات حقيقه تحط عقلها بعقل طفلها وتعانده!!
وكانه شخص بالغ افضل حل لمشكلة العناد كما اجمع علماء النفس الاحتواء |
اقتباس:
و الله يا ستي انا احاول قد ما اقدر اني اكون على كلمتي بس لما نكون برى يكون وراي اشغال و مشتريات و ما عندي وقت و لا مجهود بصراحه اعطيكي مثال و احنا طالعين من السوبرماركت و لازم نلحق الباص يعني الوقت ضيق تبدأ تبكي و مصره اني اشتريلها ايسكريم ولا علكه و معانده و مصره و واقفه مكانها ما تحرك انتي في الوضع هذا ايش كنتي سويتي......... اشكرك |
اقتباس:
يعني قصدك لما تبدأ تعصب و تعاند ابدأ معاها بالحنيه و الأحضان و البوسات اجرب ليش لأ... هذي سهله هي ما شاء الله لا حول و لا قوة الا بالله تحب اخوها و تساعدني فيه.. ابدا لغاية اليوم ما ضربته,, هي ما تعرف ايش معنى ضرب جمله و تفصيلا مثلا لما احممه تكون معانا وتحت له الشامبو,,, او لما يبكي تلاعبه و تغني له الحين بدأت أأكله و هي احب ما عندها تأكله بالملعقه,, هو كمان يكون مبسوط هي حلوه و طيوبه بس تجيها حالات العناد تصير عصبيه اشكرك |
اقتباس:
اختي عفوا بس انتي شخصيا عندك اطفال |
اقتباس:
يب تقريبا عندي اطفال يعني عندي اطفال بس ماحملتهم ولا ولدتهم اخواني ربي يحفظهم واطفالي اللي بدار الايتام ازورهم بشكل دوري وتابعت مشاكلهم وعلى فكره تخصصي يخدم الجانب النفسي للاطفال والكبار اي لي خبره في ذلك الحمدالله ولي باع |
اقتباس:
ما شاء الله,, الله يعطيكي الخير و يوفقك و يكثر من امثالك بس برضو حبيبتي كل الي ذكرتيهم مش تحت مسؤليتك تماما انتي بس ارجعي للمواقف اللي ذكرتهم مثلا و شوفي اذا انتي مريتي بيهم و اعطينا من خبرتك اشكرك |
| الساعة الآن 07:15 PM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©