|
ااه محتاره بين رضا زوجي ورضا اهلي
كل عام وانتم بخير ورمضان كريم وكالعاده محتاجه لنصايحكم فاانتم كالاسره الثانيه لي
قالتلي امي ان اخوي بيجيه دوره في المدينه اللي انا فيها وهذي الدوره مدتها شهرونص واخوي بيجي عندي اسبوع ويدور شقه واذا مالقي حيجلس عندي علما بان اخي متزوج ولديه راتب جيد وزوجي مره حصل ان اخوي هذا كان بيجي عندي لووظفوه في المدينه اللي انا فيها ولما كلمت زوجي بالموضوع قال انا انسان برتاح ببيتي وماابغي اخوك يضايقني وهذا الموضوع كان قبل سنه تقريبا والحمدلله ان اخوي توظف في مكان غير اللي انا ساكنه فيه وماصار شي فانا اخاف اني لوقلت لزوجي يعيد نفس الكلام وانا مقدر ازعل امي واخوي لان اهلي احتاجهم وماابغى مشاكل مع زوجي دخيلكم قولولي اش اسوي لاني باقي ماكلمت زوجي بهذا الموضوع |
والله زوجك معه حق البيت بيته
بس تقولين ان مدة الدوره لأخوك شهر ونص يعني ممكن يتحمله حاولي بأسلوب التفاهم |
يا اختي .. زوجك معه حق .. لو كلمكي.. بس إذا فيه إمكانية إن زوجك يقدم خدمة لأخوتس .. ويدور له شقة مفروشة جاهزة .. يستأجرها لمدة شهر أو شهر ونص .. والفلوس يدفها أخوتس ولا يحولها بحسابه ..قبل لا يجي .. أكيد زوجك .. بل مليون في المية بيروح يدور شقة .. .. كذا .. يكون رضيتي أهلك ورضيتي زوجك ..ورضيتي أخوتس .. وجهة نظري تحيـــــــــــــــــــــاتي |
اختي .. احذري ان تقدمي اهلك علي زوجك خصوصا لو كان زوجك معه الحق .. فلو شعر بذلك فستكون نهايتك في قلبه ..
زوجك معه حق في ذلك فهذا بيته و هو حر فيه .. كما ان اخيك مقتدر ماليا و يستطيع ان يقيم في فندق .. و لو عكسنا الوضع و كان اخيه هو من يريد ان يقيم عنده .. فلو رفضتي انت ذلك لكان حقك لان البيت مكان الراحه .. فكلاكما لابد ان تتفقا علي ما يريحكما معا .. |
صراحة الله يعينيك
استغربت انه في ازواج تمانع من وجود اخو الزوجة بالنهاية المفروض اهل زوجته هم اهله و يتجمل معاهم و يقوي علاقته معهم هذولا اخوال اولاده ... ماعلينا ... شوفي وقت مناسب بكون فيه رايق ..و قولي له يدور شقة لاخوك ... اذا قال لاا بينزل عندنا كان بها و اذا قال بدور خلاص .. اتصلي على امك و فهمهيا انه مثل البيت عندك مليان و بيجوا اهله او خواته عندكم يقعدوا عشان كدا طلبتي منه يدور لاخوك لى شقة .. و الله لا يجيب مشاكل بينكم |
انا مدري كيف اقول لامي اخاف امي تزعل لان مره راحوا اهلي لاخوي وزوجي منعني فزعلت امي مني وقالت هذا اخوك المفروض انك تروحي معانا تشوفيه وجلست زعلانه وانا ماقلت ان زوجي منعني قلت اني تعبانه وانا اخاف اقول زوجي يدور لاخوي شقه تقوم تزعل ولاتكلمني خصوصا ان اخوي يقول لامي ان راتبه بسرعه يخلص واحتمال مايقدر يستاجر اذا كان الايجار غالي اش اسوي محتاره ياناس والله اني ماابغى مشاكل
|
من سنة كانت فعلا مشكلة لأنه كان (بيتوظف ) في منطقتك يعني الى اجل غير مسمى ..
أما هذه المرة فليست مشكلة لأنها دورة محددة بوقت قصير نسبيا ... فلا تكلمي امك وحاولي بداية مع زوجك بالمقارنة بين الوضعين وانه وضع مؤقت واذا لم يوافق فلا تكلمي امك ودعي الأمور تجري كما تجري .... فقد تجلبين لنفسك المشاكل بحديثك اكثر من سكوتك .. |
اقتباس:
كلام سليم |
ياناس اختي دوبها كلمتني وقالت ان اخوي يقول بيجلس ببيتي واذا سافرنا انا وزوجي بيجيب حرمته ويجلس ببيتي ياويلي والله اني خايفه من المشاكل ومدري كيف اقول لزوجي والله خايفه
|
بصراحه زوجك معه حق يزعل شهرونص لاخوك وعائلته كثيره....الغريب زوجته كيف راضيه بالشي هذا كيف بتاخذراحتها
في بيتك لمده شهر ونص...وزوجك مو محرم لها.... |
اخوك سيحضر ويسكن في بيتكم مع زوجته
وامك سوف تزعل لو زوجك رفض وزوجك قد يرفض الفكره وانت بين نارين ... أمك وزوجك اخوك راتبه جيد بصراحه زوجك على حق وليس من حق اخيك ان يسكن في بيتكم حتى لو سافرتوا |
الله يفرج همك يا اختي بس انا الشوف الصراحه راحه كلمي اختك واشرحيلها الوضع وانها تعز اخوها بس زوجي يمكن ما يرضى وانا ما ابي مشاكل مع زوجي وانا اخليه يدور شقه يستاجرها لا خوي واختك اتفهم امك وتوضحله الامر او اختك اتكلم اخوكي وتشرح له واتفهمه واكيد اخوك ما يبي يخرب بيتك او يكون سبب في وقوعك في مشاكل مع زوجك وحاولي انك اتهميهم انك لسه ما فتحتي الموضوع مع زوجك بس الكلام من زمان وانا اعرف نفسيت زوجي ما ياخذ راحته في بيته واحد معاه والله يكون بعونك ويجعل اهلك يتفهموا الوضع لكن زوجك لا تحاولي تدخلي مع في شجار ابدا من شان اهلك اهلك مصيرهم يرضوا ويفهما وضعك وانه مو بكيفك وما راح يرضوا بخراب بيتك بس زوجك ما راح يفهم هالشي حيقول فضلت اهله علي وانا متزوجها مو متزوج اهلها طبعا هاد راي انا وان شاء الله اكون افدتك
|
قولي لأهلك إن أم زوجك و أبوه بيجوا عندكم البيت يجلسوا فترة
|
اقتباس:
يعينك كلمي زوجك يمكن يتقبل الوضع بس بطريقه حلوه ليه في سوئ تفاهم بينهم وش المشكله |
جزاكم الله خير انا والله ماادري كيف حقول لزوجي دخيلكم ادوعوا ان اخوي ماتجيه هذي الدوره ويلغوها لاني والله ماني ناقصه مشاكل والله خايفه من المشاكل انا كلمت اختي وقلتلها افرضي زوجي مارضي ان اخوي يجلس ببيتي قالتلي لوجاء اخوي وزوجي تضايق كلمي امي وهي تفهم اخوي اشرايكم بكلامها
|
الاخ سامر لايوجد سوء تفاهم بين زوجي واخي اصلا زوجي قليل الاحتكاك باهلي
اختي رزان فكرتك رائعه لكن لااعتقد باني استطيع ان اقنع امي بذلك لان اهل زوجي لاياتون الانادرا امل الحياه انا لمحت لاختي بس ماقلتلها قولي لامي اولاخوي ابوحكم بالفعل انا بين نارين يارب يفرجها |
شموخي تعداك ابولسع وحودمان وردة الحي جزاكم الله خير
اختي نورا المشكله لوقلت لامي ان زوجي بيدور شقه حتقول ليه ماتبغي اخوك يجيك وتزعل والله محتاره اختي رسيل كلامك اقنعني لكن زوجي هل سيتفهم انها مده وسيذهب اخي قلب القمر زوجة اخي لن تاتي الابعد ان نسافر انا وزوجي |
من تزورين اهلك تنزلين في بيت اخوك
كلميه قوليله جايتك اجازه وشوفي رده فعله امك و اخوك يرضون لو كان الوضع معكوس همه رايحين اجازه و انت وزوجك تنزلون في بيتهم قوليلها للوالده كلام زوجك و ما راح يكرهوه بس حيحسبو له الف حساب سبحان الله الناس بهلزمن ما تحترم الا القوي |
سبحان الله...بدل مايرحب فيه ويقول له اذاماشالك البيت تشيلك عيونا..ويحلف عليه ماياخذشقه مفروشه وهوموجود يقوم يرفض اقامته عندكم..
وين احترامه وتقديره لك..؟؟وليش يتضايق من وجوده هل هومدخن اوسيء؟حصل موقف بينهم عموماطالماالدوره شهرونص ماعليك منه ترجيه كلهاشهرونص مايضره شي بصراحه احسهافضيحه ياخذفندق وبيت اخته موجود |
الله يفرج همك والله من جد حيرة ..
لكن انتي تقولين هالكلام وانتي مازلتي لم تكلمي زوجك لذلك كلميه وشوفي وش يقول يمكن يفأجيئك بموافقته والله ييسر أمرك ويهدي قلب زوجك لك .. |
بصراحه انتي اعطيتي الموضوع اكبر من حجمه يااختي الله يكتب مافيه خير لمحي لزوجك قوليله يمكن اخوي عنده دوره في المنطقه هذه شوفي رده فعله عادي جدا يمكن ان شالله زوجك طيب وفيه خير يمكن يتقبل الوضع لاتسبقين الااحداث حاولي تكسبين الكل هذا زوجك وهذا اخوك وبصراحه انتي اخوك دق عليك شخصيا بنفسه وقال بيسكن عند ولاكلام )والله اعلم الدنيا حياء وموت والدنيا مشاكل خليكي امرءه رزينه تعرفين كيف تتعاملين مع هذه الامور عزيزتي انا والله ماابي اقلل في حقك توكلي توكلي علي ربي ولاتوهقين نفسك زوجك حبيبك جالسيه وصارحيه والله انني متوقع مثلا لودقت اخت زوجك وقالت ابجيك ماراح يقولها لا الناس للناس والكل برب العالمين اكسبي الكل وبالله التوفيق
|
اشكرك اختي مطلقه صغيره والله يسعدك ويفرج همك يرب واشكرك اختي ليه الغرور susu99وسامر والله يجزاكم خير على النصيحه
الحمدلله حلت كلمت زوجي وقلتله ووافق الله يسعدك جميع من مر على موضوعي وساعدني بنصيحته والله يجزاكم خير |
| الساعة الآن 02:29 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©