|
زوج اختي
السلام عليكم
كيف حالكم اجمعين الصراحة انا ما احب اشكي ابدا ابدا حتى بمنتداي الغالي اذا كان عندي مشكلة ابي لها حل انزل موضوع اما الفضفضة والشكوى فما احبذها ابدا بس الصراحة اللي سمعته امس خلاني ما انام الليل السالفة كنا بيمعة بنات عمي واختي ( اصغر مني ومتزوجة قبلي) كانت معانا وكانت تسولف عن برنامج شافته مع زوجها عن عادات الشعوب في الزواج ومنها شعب في افريقيا يفضلون المراة المطلقة وكل ما تعدد طلاقها او كثر كل ما صار مرغوبة اكثر قال حق اختي من باب المزح خلي اختج (( اللي هي انا )) تروح هناك الصراحة كلمته كانها خنجر في قلبي يعني انا طايحة بجبده والا شنو يتشمت فيني اني مطلقة ما يدري ان الدنيا سلف والدين وان الدنيا تدور ويرجع الكلام لاهله والله لوما زوجته تكون اختي جان دعيت عليه يصير مطلق ويطيح بجبد نفسه حسبي الله عليه ونعم الوكيل امس طول يومي بكي |
:)
ومن قالك ان صار مطلق لا سمح الله بيطيح بجبد نفسه ؟ هو رجل وما رح يطيح بجبد أحد حسرة على الحرمة بس! عموما يا موهبة ياغالية لا تصيرين حساسة .. تراه يمزح برغم انه المزحة بايخة لكن خل ثقتك بنفسك اكبر ولا تخلين احد يأثر عليك بهالمسألة لا تدعين عليه .. بل ادعي لأختك بالتوفيق وتأكدي بأن نصيبك اذا جا محد رح يرده وان ربك سبحانه وتعالى قسم لك رزقك وستأخذينه في حينه الله يوفقك حبيبة قلبي |
وعليكم السلام ورحمة الله وبركاته
هلا وغلا موهبة ديرتي حيا الله هالطلة حبيبتي هو قالها غشمرة بينه وبين اختج..وهي المفروض ما تقولج معاج حق لما زعلتي...كيفي نفسج على هالشي المطلقة لابد تسمح حجي مني ومناك ولاتخلين اي كلمة تأثر فيج حتى لو كانت قوية انتي اقوى منها مع خالص مودتي |
كان من الأولى ان تراعي اختك شعورك ولا تعيد سرد ما حصل بينها وبين زوجها أمامك او غيرك ...
رزقك الله بمن يستاهلك ويحبك في الله ويخافك فيه |
لاتدعين قولي حسبي الله ونعم الوكيل انا جربتها الله ينصرك بإذن الله
|
اقتباس:
هلا حبيبتي بكر اولا : عظم الله اجرج بوفاة ابوج ثانيا: والله لوانتي مكاني لا قدر الله بتصيرين حساسة اكثر مني ربي لك الحمدلله انا عندي ثقة بنفسي كبيرة بس حسبي الله عليه ليش يقول جذي وليش الريال ما يطيح بجبد نفسه ياما وياما رياييل يخطبون والكل رافضهم وخيرتهم راحوا خذوا وحدة من برا وخيرتهم اهم وحريمهم منبوذين سبحان الله صج صج لسانك حصانك ان صنته صانك وان خنته خانك مشكورة على مرورج حبيبتي |
اقتباس:
تسلمين حبيبتي على كلامج بس الصراحة الوحدة مو بكل وقت قوية والانسان عموما مو بس المراة يعني يمر بفترات ضعف الواحد شيقول غير حسبي الله ونعم الوكيل |
اقتباس:
اللهم امين المشكلة ان اختي كتاب مفتوح جدا ما تثمن كلامها لا على الغريب ولا القريب لما قالت لي هالكلام قلت لها قوليله تقولك اختي ( لا تشمت باخيك فيعافيه الله ويبتليك) قامت تبرر ان ما كان قصده وان انا حساسة بس الحين كلش كلش كارهة اختي وزوجه وعيالها باجر الجمعة زوارتهم عندنا احس ما ودي اطلع من غرفتي ولا ابي عيني تطيح في عينها والمشكلة ادري اذا قلت لها عن السبب بتقولي انتي قلبج اسود وانتي وانتي وانتي بس صج لي قالوا اللي ايده بالنار مو مثل اللي ايده بالماي |
اقتباس:
تسلمين يا قلبي على مرورك امس طول الليل وانا ادعي بهالدعاء حسبي الله عليه واذكر مرة اول ما تطلقت وحدة من الموظفات معاي سوت نفس الحركة تشمتت فيني بالطلاق والله العظيم ما مر شهر الا وهي مطلقة لا وباخس حالة بعد ثقتي بربي كبيرة بس ياربي هالناس ليش جذي ما ترحم |
موهبة حبيبتي استهدي بالله
هي كلمة و قالها بساعة ضحك .. مو قصده التشمت ما اعتقد ... الغلط على اختك ما كان لازم تنقل لك الي صار بس حصل و نقتع بطيب نفس مو عشان تتشمت فيك او اي من هذا فليش تدعي عليه.. مو قصده .. اعتبريها زلة لسان و بعدين لو لاقدر الله ربي ابتلاه و طبق اختك مين اللي بيتعذب يعني اختك و اولادها و ابوك و امك .. صح ولا ؟؟؟ بس قولي الله يهديهم ... بالنهاية كانت مزحة ثقيلة لا شماته و لا يحزنون ... |
اقتباس:
والنعم بالله يانورة بس على راي المثل النار ما تحرق الا واطيها مشكلة اختي ما تعرف تمسك لسانها كل شي تقوله بدون وزن والله لا يقولها انا ما ابي اختي تتطلق بس الصراحة حرة بقلبي مشكورة اختي على مرورج |
طنشي ولا كانك سمعتي شئ
انا لما تطلقت عكسك مدحني زوج اختي في اخلاقي وتربيتي والحمد لله وربي شاهد اني مثل اخته وهو في مثابة اخي .طيب اللي صار بنت اختي الكبيرة قالت لامها لك امي لو يتزوجها عليك يعني اكون له الثانية ومش حقولك على نظرات اختي وكانها موافقة بنتها بالراي وانتابها الخوف هي ما قالت شئ لكن لم تقل لبنتها شئ لم تعاتبها ولا شئ ان من حسرتي قلت لها ارتاحي لو ينتهي رجال العالم كله مش حتزوج ابوك لانه مثل اخي الحديث يطول واختصر عليك انك لا تاخذي بكلامه ولا كلامها وبعدين العيب في اختك مش فيه هو يعني قال لمراته المفروض هذه اسرار بينهم وما تخرج ابدا برا البيت الضاهر اختك عقلها لس صغير وما راعت شعورك ولا احساسك يعني قالتها من باب المزح فقط لا تبكي غاليتي وربنا يعوضك باللي فيه الخير تقبلي مروري تحياتي |
لالا حرام لاتدعين عليه لانه شكله من النوع العفوة اختك الله بيسامحه
حبيبتى انا ماكنت اعرف انك مطلقة |
اقتباس:
حبيبة قلبي اشكر مرورج اختي مشكلتها قبل لا تتزوج كانت قمة في العقل والثقل بس من تزوجت ويابت عيال سبحان اللي يغير ولا يتغير كل العقل رااااااااااااااااح والله كل شي تقوله بالله عليكم ابي حل لها باجر بيزورونا وكلش مابي اشوفها سبحان الله كلامها احسه خنجر بقلبي الله يسامحها |
اقتباس:
انا ما ادعي عليه بس الصراحة والله حرة حرة بقلبي ودعواتج لي حبيبتي :) |
وعليكم السلام تذكري الحديث الكريم أبي سعيد وأبي هريرة رضي الله عنهما أنهما سمعا رسول الله صلى الله عليه وسلم يقول { ما يصيب المؤمن من وصب ولا نصب ولا سقم ولا حزن حتى الهم يهمه إلا كفر الله به من سيئاته } الله يشرح صدرك ويرزقك بالزوج الصالح والذرية الطيبة عزوبي بس رجل |
يا الله أنا ما أطيق الأشخاص إلي كذا
بكل برودة قلب تنقل لك كلام زوجها لا وبجمعة بنات ولما تزعلين تقولك إنتي حساسة !!!!!!!! لهالدرجة ماصار فيها إحساس زوجها لما قال كذا هو أصلا ماله علاقة فيك وشي ثاني ماقالها قدامك لكن الغلط الكبير عليها هي ماخذة السالفة تنكيت قايلتها تتوقع يعني بتضحكين !!! الله أكبر عليها وعلى أمثالها هاللي ماعندهم ذرة إحساس لو مكانك بيصير لي نفس ماسويتي ما ألومك على موقفك تجاه أختك بس الشكوى لله المشكلة انها أختك ولازم تتقبلينها لأنك بتشوفينها دايم لكن عسى الله يعوضك وتصيرين بوضع أحسن منها مليون مرة ولا أحد يتجرأ يضحك والا يتشمت لا قريب ولا بعيد الحين لما يجون زيارة وكذا خلك قوية وانسي إلي حصل كأنه شي ماصار لأنك من كلامك تقولين انه طبع فيه تقط الكلام بدون حساب يعني خذيها على قد عقلها وبما إنك رديتي عليها فإن شاء الله راح تحسب حساب لردة فعلك وتعرف كيف تثمن كلامها مرة ثانية حسبي الله ونعم الوكيل على هالأشكال ياكثرهم بالمجتمع ومن أقرب الناس |
ما تزعلي يا اختي..
على راي اخواننا المصريين: (الملافظ سعد).. لو انه يدرك فظاعة جملته ومدى جرحها للشعور لما تفوه بها.. يمكن عم بخفف دمه.. الا انني الوم اختك بالدرجة الاولى، يتوجب عليها ادراك ما الذي يجب قوله وما الذي يجب الامتناع عن سرده.. |
يا الغلا خذي وارمي ولاتشيلي هم ترى الواحد الزم ماعليه صحته
لو التفت لكلام الناس تعب وتدهورت صحته والناس ساعتها مابينفعوه أسأل الله ان يفرج همك وهم المهمومين |
.. برأيي الأثنين غلطانين .. زوج اختك ليش يقول عنك كذا ؟ حتى لو القصد المزح !! جملته عيب يقولها .. وياريت الا تقول انه زوج اختها مو غلطان , تراجع الجملة زين , وتفهم القصد منها ..
.. والغلط الثاني , من اختك , عيب تجي وبكل عين قويه تقول هالكلام .. ليش ما حاسبت لج ولمشاعرك !! .. وياريتج بنفس الوقت قلتي لها ما تنقل لج اي كلام يقوله زوجها عنج , علشان لا تقسى القلوب على بعض .. .. المــهـــم .. لا تقعدين بكره بغرفتج ,, لا قعدي معاهم عادي ,, وقابلي الجميع , لكن اختك خلي معاملتج لها رسميه , علشان يكون لها درس انها ما تنقل كل كلام زوجها لج , لانه في كلام عيب ينقال .. .. الله يسعدك وين ما كنتي , ويرزقك زوج يعرف قيمتك .. |
يابنت الحلال هذا اللي بوجهك غير اللي من وراككككككك طنشي بس لاتصيحين الله قادريبهج الصدر الحزين هونيها ياشيخة واذا بكيتي بيتغير شيء لازم نرضى بقدرنا الحمدلله على كل حااااااااال تفائلي خيرمهما عظم البلاااااااااء وان شاءالله القادم اجمل روحي صلي ركعتين وفضفضي لربك والله يعووضك كل خيرررررررررر |
اقتباس:
جزاك الله خير يا اخوي عزوبي والله من اشوف اسمك احس ان الدنيا لازالت بخير والله يآجرني في بلواي مع هالاخت جزاك الله كل خير :) |
اقتباس:
مشكورة اختي على مرورج المشكلة ان ما عندي اخت ثانية الجمعة اللي نتجمع فيها عددها قليل انا وامي واختي وزوجة اخوي الصراحة احس اني ما اقدر اكون رسمية معاها لانها عادي جدا بتيي تسولف وتضحك ولا كأن شي صاير ووقتها اعرف عمري راح انفجر حسبي الله ونعم الوكيل |
خواتي حبيباتي ام محمد و في الانتظار و Ms blue وفلها وربك يحلها
اشكر مروركم وكلامكم الطيب عسى الله يطيب فالكم وحالكم |
خذي وخلي يختج ..
استغرب من الناس الي جذي اشفيها المطلقة تيك ات ايزي وآنه اختج الطلاق مرضني وتدهورت نفسيتي بس كاني ولله الحمد ب الرغم من المرض إلا اني مرتاحه ومجتمعي ومحيطي ماينظر للمطلقة ك حاله خاصة ب العكس المطلقات عندنا لهم حرية اكثر من اي بنت والله يعينج ويعينا ويعوضنا خير ب النسبة لأختج ف ربج كريم ! |
هداه الله زوج اختك واختك وحاولي ماتكوني حساسه واحتسبي ما قالوه عند الله
وفقك الله ورزقك ماتتمنين |
الله يعنيننا على ملافظ الناس الجارحة ونحن يا عينى لازم نتحمل ونصبر ان شاء الله فى ميزان حسناتك وحسناتنا
والله يعوضك خير ان شاء الله يا موهبة ولاحول ولاقوة الا بالله |
اشكركم خواتي الوردة زينب وسحابة الصحراء والمحبة للاستغفار
بس انا من صجي ابي حل معاها ما تعرف تمسك لسانها كلش اي شي يصير لها في بيتها تقوم تقوله عند كل الناس واي شي يصير لنا ينتقل لبيت زوجها يعني مافي شي اسمه خصوصية عندها كلش اللي عنده حل يفيدني جزاكم الله خير |
عزيزتي
موهبة الكويت في الوقت الراهن ماانصحك تسوين شي ولاتكلمين اختك عشان ماتفهم تصرفك غلط وتقول عنك انك قلبك اسود الخ من هل كلام اصبري على السالفة شهرين بعدها لمحي لها الله يوفقك ويرزقك أحترامي |
تسلمين اختي رولادا على مرورج ونصيحتج
اليوم صارت الزوارة الظهر طبعا طول الوقت بغرفتي تغدوا كلهم وانا لا لما صار الليل رحنا كلنا عند خالاتي وانا طبعا ما اكلمها ولا اكلم عيالها كلش وقلت حق خالتي الكبيرة اللي صار وقلت لها تكلمها وتفهمها شنو اللي ينقال وشنو اللي ما ينقال وان الدنيا ممكن تدور ويرجع الكلام على اصحابه ملاحظة ما قلت حق امي لان امي دايما معاها لانها متزوجة وعندها عيال اما انا ما وراي ظهر فحاطه حيلها فيني دعواتكم لي |
ياقلبي ياموهبه
لييش تقولين ماوراي ظهر انتي وراك ربي معك ونعم بالله وماعليك من اختك ولاكلامها صح الموضوع يقهرر لكن مابليد حيله الله يعووضك بالزوج الي يستااهلك وينسيك كل شيء شفتيه |
ياحبيبتي
خليكي فري ولا يهمك كلام احد انتي انسانه مؤمنه ولا احد ياخذ بيده ولي راح انسيه ولا تفكري فيه اكثري من الاستغفار وربك يفرجها لك واللي غلط اختك الله يهديها وانتي الله يعوضه باخير وابرك ان شاء الله |
يزاكم الله كل خير اخواتي قلبي طفل مغرور ورسيل
وعسى الله يعوضنا بالزوج الصالح بس ما ادري صح اللي سويته والا لا انتي قلت حق خالتي تقول لها لان ادري باختي بتمشي على عماها ولا جنه شي صاير |
اقتباس:
ان شاء الله يكوون صح عشاان اختك ماتفكر تقط اي كلام بدون ماتحسب حساب للي حولها الله يسعدك يارب |
الله يسعدك موهبه ويرزقك الزوج الصالح عاجلا غير اجل
ويعوضك بكل شي |
أفاااااا افا عليك ياموهبة ماهقيتك جذيه
اقووول انت اقوى لماذا تنظري للنقص انت افضل كثير وياكثر الكلام والله عالم بالنيات بس انت لازم تكوني اقوى من كذا وش يعني طلاق هل معناه ماتدخلين الجنة امكن رفع منزلة لك امكن الله كتب لك الخير امكن قالها بعفوية مو قصده الشماته الله يوفقك ياموهبة ويرزقك الافضل من الزواج بخيري الدنيا والآخرة |
عسى الله لا يحرمني منكم
اشركم شكرا جزيلا اخواتي قلبي طفل مغرور وروز ومنية بلا امنية وعسى الله يعوضنا خير |
اختي لابد يكون عندك ثقه في نفسك وياما حتسمعي كلام من ناس عقلها فارغ فلاتنزلي مستواك العقلي لمثل هذه الفئه.
|
معذرة يا اختى انت حساسة بزيادة جدا يا اختى هذا الكلام من باب المزح يعنى سمع عن عادة بعض الشعوب حب المطلقات فطبيعى تأتى على بالة ويقوم خلاص هذا حل لك يا اختى كونى واثقة فى الله ثم فى نفسك وكان يجب ان تتأكدى انك خالة ابناءه ومثل اختة وما يضرك يضرة بكل تأكد اسأل الله ان يرزقك الزوج التقى الصالح عاجلا غير آجل يا رب العالمين |
تسلمين حبيبتي على كلامج
بس الصراحة الوحدة مو بكل وقت قوية والانسان عموما مو بس المراة يعني يمر بفترات ضعف الواحد شيقول غير حسبي الله ونعم الوكيل |
| الساعة الآن 07:39 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©