|
مشكلتي حساسه - اهلي واهل زوجي وزوجي !!!
السلام عليكم ورحمة الله وبركاته بصراحه شفت هالمنتدى واعجبني جدا لأن اللي فيه نااااس ماشاء الله راقيه بالحكي عكس المنتديات الثانيه راح اقولكم مشكلتي وياليت تفهموني وتحطون انفسكم بمحلي انا متزوجه من 3 سنوات من قريب لي بصراحه اوقات الراحه والاستقرار في بيتي انا وزوجي قليله بمعنى انه اهله اذا زارو المدينه اللي احنا فيها يجون لعندنا فتره مع العلم انه عندهم مكان خاص فيهم - شقه مرتبه وكانو يجون لها قبل زواجي من ولدهم- لكن بعد الزواج تغير كل شيء ! لو ينسد عندهم حمام اخذو اغراضهم وجوو لعندي بالاسبوعين واكثر لو ينقص عندهم فنجان من المطبخ قالو ماعندنا اغراض للطبخ ويجون لعندي احس شقتي موب لي لو اروح لأهلي وادق على زوجي يقول انه اهله جالسين في بيتي وانه اخواته المتزوجات جايين وراح ينامون كم يوم في بيتي ! طيب ما شاء الله هم عندهم شقه حلوه ايش معنى شقتي؟ في رمضان حدث ولا حرج ياناس رمضان وقت عباده صار بالنسبه لي وقت كرف في المطبخ وبس يجون يفطرون عندي يوميا تصدقون من ثلاث سنوات بس رمضان اللي فات جلست فيه انا وزوجي 6 ايام لوحدنا كانت من احلى الايام وباقي الرماضانات ممنوع علي اعيش مرتاحه واذا كانو موب موجودين يرسلون اولادهم الكبار يفطرون عندي المشكله أسأل زوجي انتم كيف كنتم عايشين قبلي! معقوله هالوضع اللي يصير لي ! مع العلم انه لما تزوجت سافرو اهل زوجي معاي لشهر العسل << من جد الوضع مو طبيعي بصراحه النفس من تالي عايفتهم مع اني احبهم لأنهم اقاربي بس خلااص ماعاد اتحمل انا ماتزوجت علشا اكرف واجامل الشـــــــــــيء الثاني اهــــــــــــــلي ساكنين بمنطقه ثانيه ويجون بالعطل لمنطقتي ويسون نفس حركة اهل زوجي يجلسون عندي في البدايه كنت افرح فيهم بس من تالي خلاص طفشت وزوجي طفش من وضعنا صحيح اهلي مايطولون عندنا يقعدون من اسبوع الى اسبوعين بس شقتي صغييره واهلي كثير واللي قاهرني انهم يستخسرون انهم يستأجرون شقه لهم ! ليش طيب مو من حقي انا وزوجي نرتاح واللي قاهرني ابوي اللي متخلي عن اهلي يجي يرميهم عندنا ولا عاد نشوفه وتعالو شوفو المشاوير اللي على زوجي مره امي تبغى اختها مره خواتي يبغون السووق !!!! اهل زوجي واهلي ماقصرو فيني انا وزوجي ماخلونا نعيش مرتاحين انا منحرجه من زوجي بالنسبه لأهلي وهو منحرج مني بالنسبه لأهله بتقولون اهلك واهله وعليكم حق بس الشقه صغيره وزوجي يضطر يكون برا البيت طول الوقت ومايرجع مسكين الا بالليل وقت النوم لأنه ماله مكان بالشقه! وبعدين زيارات اهله واهلي كثيير اذا راحو هذولي ورفعنا روسنا جونا الثانين والمشكله نحبهم مره ومانبغى نجرحهم بنص كلمه بس تصدقون وضع اهل زوجي متأزم اكثر من اهلي لأنه هم غير عندهم شقه ليش يجون لعندنا؟؟ تدرون حتى اذا صارت عندهم عزيمه او بيجيهم احد يعزمونه على شقتي؟؟ ابو زوجي مايحب القهوه والشاي الا من زوجة ولده اللي هي انا اسوي القهوه والشاي وارسلها لهم بالصينيه والفناجين يعني حتى اغراض المطبخ لازم تطلع من بيتي وشوفو نهاية كل عطله ايش ينقص من مطبخي! ويضطر زوجي يروح يتقضى للمطبخ مسكين الحاله الماديه بصراحه ماتسمح بهالاشياء كل الطرفين اذا جونا يبغا لهم مصرف والله يضيق صدري على زوجي وعلى وضعنا اقترحت عليه ننقل لمكان ابعد بس في نفس المنطقه بس يكووووون بعييييييييد بحيث يستثقلون انهم يجونا لكن الوضع المادي ما يسمح حاليا والمشكله حتى نظام حياتنا تغيير جدا جدا اذا جونا - الطرفين - يزعلون لو يشوفوني منشغله مع زوجي عنهم ويزعلون لو انام بدري وما اسهر ... قولو لي ايش الحل مقبلين على عطله وخالتي الله يهديها رمت كل مواعين مطبخها على قولتها يبغى لها تجديد!<<< من كثر الاستخدام على كذا راح يجون عندي لأنهم ماشرو المواعين الجديده واهلي راح يجون اسبوعين وزوجي يقول الجيب يصفر ونفسيتنا مندمره انا ويااه كرهنا المجاملات وكرهنا عدم الاستقرار حتى مفتاح شقتي صاير مع الكل ومع اخوات زوجي طلبو من زوجي المفاتيح لأنهم يمكن يحتاجون للشقه اذا كنا مسافرين وبصراحه زعلت من زوجي مررره - كيف يعطي خواته المفتاح وهم متزوجات وازواجهم موب محارم لي وهالزمن يخوف يعني المفاتيح عندهم ويعرفون انها لشقتي صرت اقعد بشقتي وانا خايفه انه يدخل علي احد >> لا تقولون موسوسه لااا ارجوكم انا اخاف على عمري قلت لزوجي غير القفل بس مو راضي المهم ابغاكم تعلموني بالضبط كيف احد من هالزيارات اللي سببت لي حووسه في حياتي طبعا باسلوب ما يجرح اهلي واهله خلاص انا ابغى ابدأ حياة جديده بزيارات معقوووله ارجووكم قولو ايش الاسلوب اللي لازم اتخذه انا زوجي مع تحيــــــــــــاتي كــ ــ ــاندي |
وعليكم السلام الشيء إن زاد عن حده انقلب ضده .... صراحة الوضع لا يطاق وخاصة لما يأخذون نسخة من مفتاح شقتكم ..... عليك بالمقابل ان تجلسي مع زوجك وتصارحيه بالذي في نفسك !!!! وتتفاهموا مع بعض حول هذه الوضع .... وأرجو أنه ما يتحول الحوار بينكم إلى خلاف وسوء تفاهم لأنكم مشتركين في الضرر وتبحثون عن حل مناسب الله يعينكم عزوبي بس رجل |
مالكم الا ان تنتقلوا الي مكان بعيد
علشان مثل ماقلتين يستثقلون يجون |
لو مكانكم ننقل لمدينة صغيرة
لأنه يبدو لي انكم بمدينة هامة اللي يبي مستشفى والا سوق والا طلعات يجي لكم وبالنسبة لرمضان يمكن انتي من النوع اللي يحب كل شيء توب فتمدين السفرة من الى وهم اكيد بيعجبهم الوضع فانصحك هالسنة خليها على تمر وقهوة وماء فطور وكبسة وشوربة عشاء بس لاجل مايحصلون عندك شيء زيادة أما أهلك فالله يعينك لو مكانك بينت لهم انه صعبة زوجي يكون سواق وبما انه برا البيت طول الوقت فأكيد ينشغل بأشياء ثانية بصراحة مهما كان هذي حياتك ومن حقك تستمتعين فيها مثلهم تنامين بدري والا تجلسين مع زوجك لايهمك أحد صدقيني إن ماتداركتي الوضع حياتك بتضيع خصوصا ان زوجك متضايق قريبي كان مثلكم تماما خصوصا ان بيته بمصيف الحين غير المفاتيح لأنه كان موزعها وصار يتحجج منا والا منا إذا طلب احد بيته والكل محترم رأيه الا قليل الذوق تفاهموا على هالوضع لأنه صعب عليكم كلكم |
عزوبي بس رجل >> الله يسلمك اخوي وموضوع المفاتيح الما اللحين بقلبي وانا قلت لزوجي ماراح ارتاح الا لما يغيره
|
لوجينا >>> ياليت بس الحاله الماديه ماتسمح حاليا للأسف يااارب تكتب لنا اللي فيه الخير
|
نبض الدان >> تسلمين حبيبتي بس صدقيني في رمضان ما اسوي ازود من اللي تقولينه بس لأنهم جماعه ومنقسمين حريم ورجال فصار الوضع صعب جدا بالنسبه للكرف وانا اعرفهم ما يجون لي الا علشان يرتاحون
وبالنسبه للنقل لمدينه صغيره صعبه عمل زوجي هنا واصدقائه وانا ودراستي وبعدين مانحب المدن الصغيره واهلي انا بينت لهم مبدأيا يستأجرون لهم سواق اذا جوني لأنه زوجي مشغوول فسكتو وماقالو شي وان شاء الله يعملون اللي قلته |
الله يعينك وربي حسيت بمعاناتك
أنا ما أدري يتحرك إحساس إحترام الخصوصيات عند هالناس وترى كثير زيك يعانون نفس المشكله أنا من رأيي إنك تشوفيلك حل بأسرع وقت وتناقشين المشكله مع شخص فاهم وعاقل يعي أمور الحياه أتمنالك حياه سعيده تقبلي تحياتي |
اقتباس:
اقترح أول الخطوات أن زوجك يكلم أزواج خواته؛ كل واحد على حده ويشرح لهم الأمر .... علشان يخففوا من زيارات زوجاتهم (خواته)، والزوجة تطيع زوجها ولا تروح لمشوار حتى تستأذن منها وتأخذ موافقته عزوبي بس رجل |
انتي ليش تسكتين طيب ..
خليك قوووويه وتكلمي بوجيههم ..هذا لا تجريح ولا قله ادب ولا حراام الا بالنسبه لوالدينك ووالدينه بس(عشان البر وااجب) ..لازم تتفاهمووون ماتسكتوون خصوصا ان زوجك مضايق مثلك .. ماعاد تنفع المجاملات الزمن هذا صدقيني اذا استمريتي على الوضع هذا بتضيع اسعد اياام حيااتك وتندمين وتقولي ياليت ياليت .. زوجك وان كان مضايق مثلك ومعك بكلامك مصيره بيدور له مكان يرتاااح فيه يحس فيه بالراااحه يحس انه مستقر ..لا تضيعين بيتك بايديك خليكــــــــي قوووويه عمر السكوووت والمجاملات مانفعت ...شي يقهر والله ...ايش فايده الزواج نوم وبس وين الخصوصيه وين الراحه وين الاستقراار .. انتم فاتحين بيت اسره مو فندق وليموزينات وخدماات سيرفرز .. الله يهديهم ياختي والله اتضااايقت وتمنيت اني لك صله عشاان اقدر اوقفهم عند حدهم .. ارجوووكي لا تسكتين ربنااا يسعدكم ويزيل همكم ..ويهديكم الصواب والرشد .. |
ولا تقولي يزعلون وتنقطع العلاقاات ...
يزعلون يووم ويرضوون... خصوصا ان جيتي باسلوب مقنع لا هو اسلوب ضعف ولا اسلووب تهديد ونررفززة ,, |
ذكرتيني بامي
كل ما جا حد من السفر ينزل عنا وهات يا غزايم وطبخ ونفخ وابي مدخوله يا دوب يكفي وامي تستدين لاجل تقوم بالواجب واهل ابي واهل امي الكل يحبها حتى عمتي كانت تغار لان اولادها كل يوم عنا على الغذاء وهي تطبخ على الفاضي والله ابي تعب من سد الديون واخي وانا تعبان ويا ريت تسمعي شكر الا تسمعي انو والله شو بتاكلو لحمه ولو تعرفي ان الللحمه احيانا للضيوف ونحن نأكل بيض ومجدره لان ما في فلوس تكفي اول حل هو تغير مفاتيح الشقه .......................... ربما كنتم في موضع ما ودخلو عليكم او كنتم في البيت وما حبيتو تفتحو لحد يدخلو عليكم الاكل خففي منه يعني الطبخ وغيرو وحجتك ان زوجك عنده ديون والوضع شويه صحون وطناجر ما تشتري نفسي الحجج فناجين نفس الشي |
يااختي الله يصبرك من جد الشي اذا زاد عن حده انقلب ضده ادا جوا اهلك قوليلهم زوجي مشغول مايقدر يوديكم وسوي انك متضايقه من الازعاج وبالنهايه بيفهموا هم انا عارفه انك تحبي اهلك بس لازم يقللوا من الجلسه عندك حتى اهل زوجك كلمي زوجك وقوليله بس باسلوب حلو قوليله ان نفسك تجلسي معاه لوحدك وان جلسة اهله فتره عندك غيب وتضايقك واذا جاء اهل زوجك سوي انك تعبانه ولاتخدميهم ولاتسوي شي سوي بطنك يعورك اي شي لانهم اذا حسوا انك ماعد تخدميهم يرجعوا يخففوا من الجيه وبالنسبه لمفاتيح شقتك نصيحه غيرها قولي لزوجك انك سمعت قصه بالتلفزيون والفي قصه وافجعيه وقوليله انا اخاف على نفسي وانفجعت لما سمعت الشيخ يحكي بالتلفزيون صدقيني بهدا الاسلوب بغيير زوجك الاقفال والله يعينك
|
ياختي هو يكلم اهله و انتي كلمي اهلك ..
لا تستحوا ... يكلم امه بينه و بينها و يفهما الوضع ... يقول لها ماديا ما عاد اقدر استقبل ضيوف و خليه يبهرها شوي و ان شاء الله امه تتفهم و تكلم خواته و بالنسبة لك نفس الشي كلمي اهلك انه زوجك ظروفه المادية صارت زفت و بهريها و ان شاء الله الطرفين يفهموا على انفسهم |
حبيبتي
سهله .... اذا مثلا قال احد من اهله او اهلك بنجيء عندكم بلايام او الشهر القادم فقؤلي !!!! لااهلك او هو يقؤل لاهله !!! ماودكم تئجلون جيتكم يالغالين كم شهر بعد ؟؟؟ والسبب ميزانيتي هذا الشهرين تعبانه !!!!! وهم بيسكتون وبيفهمونها !!!وصدقيني بيئجلون .... وعلئ هلحالاعذار لكن مو كل الاشهر ...لا شهر يجون عادي الاهم وانتي بعد لااهلك قؤلي لهم اجلوها كم شهر ؟؟لان ظروفنا الماديه مضربؤبه هذا الشهر ...!!! ولا علينا اجار هذا الشهر وظروفنا صعبه ؟؟!@ وهم بيفهمون .... هذا الافضل لك ولهم !!الاهم لاتسكتون فبيعجبهم ! |
عزوبي بس رجل >> الف شكر لك اخوي بس صعبه جدا جدا يكلم ازواجهم لأنه ازواجهم من الناس اللي تنقد بيخلون زوجي مثل العلكه في المجالس راح يقطعونه بالحكي - كل واحد منهم فاضي ومايهمه الا يحكي عن هذا وزوجته وهذاك وزوجته - وانا عارفه لنفسية زوجي مستحيل يسوي هالشي وماراح اضغط عليه بس الحمد لله اليوم وافق يغير القفل
وافي العهد>> سلمت يا اخوي ويعطيك العافيه ســــــــــكره >>> ما قصرتي يااعسل وانا عارفه انه هالشي راح يكون له نتائج سلبيه اللي بدات تظهر من اللحين بس يا اختي امه قويه جدا ولو يكلمها اقل كلمه راح تقولها له انت عـــــــــــاق>> ما ادري ليش دايم تقوله هالكلمه مع انه ابر عيالها فيها الله يهديها وامي راح تقول انتم معقدين وماتبغون احد لأني سبق وكلمتها وقالت لي هالكلمتين وحطت لي محاظره انه الدنيا ماتسوى وانه الجمعات كويسه >>> بس تعالي شوفيها في بيتها ماتبغى حتى عماتي يدخلون لبيتها لأنها تبغى خصوصيتها !! مشكلتي ياجماعه لمحت وبينت انه زوجي متأزم ماديا لكن لا حياة لمن تنادي تصدقون حتى امورنا الخاصه انا وزوجي ماناخذ راحتنا فيها لأننا راح نكون مكشوفين مررره كنت متحممه الصباح وشافتني امي وبصراحه انحرجت منها بس ايش اسوي الشقه صغيره مرره ! وبعد كم يوم نفس الشيء شافتني الصباح متحممه ! وبعدها مسكتني وقالت لي ابغى اقولك شيء << وسالتني سؤال انحرجت وتضايقت منها ليش تسأل هالسؤال وايش دخلها في حياتي؟ تدرون ايش قالت لي! انتي تعطين زوجك وجه بهذيك الامور كثير؟ استغربت من سؤاله لأنه ماله داعي وقلت لها ليش تسألين قالت ابغى انصحك لا تعطينه وجه ترى الرجال مايصلح كل ما يقولك تعالي رحتي و... و... و...... وقالت لي انا بعد ملاحظه عليك انه بالليل تتركينا وتقعدين مع زوجك بالغرفه ؟؟؟ مايصلح تتركين اهلك ومايصلح تعودين زوجك على هالحركات !! وانا اسمع لها ومصدوومه ومنحرجه وحاسه بالضيق شوفو قد ايش وصلت بهم التدخلات طفشششششششت مررره قلت لها هذا اقل واجب اقدمه لزوجي رجعت وقالت انتي حررره وصارت تبين لي انها متضايقه لو اقعد مع زوجي فتره واذا كانت موب موجوده في البيت نايمه عند قريبتها تدق على خواتي وتسألهم اذا انا مطنشتهم؟!! وبصراحه الحق ينقال علشان ما اظلم احد انا اذا جيت لأهلي مايقصرون معاي بشيء ابد ابد كل طلباتي منفذه بس فرق انا لما اجيهم فرد واحد واصلا ماعندي اطفال وهم تقريبا 10 ههههه ما شاء الله عليهم |
شوكه بين ورود ونورا وهمس الف شكر لكم
خلاص بإذن الله راح ابدأ من اليوم التغييرات لأنه ماعاد ينفع المجاملات القفل وغيرناها واهل زوجي ناويه اذا جوو باذن الله ماعاد فيه طبخ ابد واذا سويت ابسوي شوي وماراح اطلع من غرفتي الا 3 او اربع العصر بس ياليت تعطوني زيادة افكار |
Green
الف شكر لك اخوي بس بصراحه ما يسوى على امك قولها خلاص بلاش عزايم وعيشو حياتكم والف شكر على نصايحك |
حبيبتي لازم تكلمي اهلك وهو يكلم اهله ان الميزانيه ما تسمح
وانك مش واخده راحتك مع زوجك وبصراحه ليس لهم حق بالزعل لانهم هم الي جابوه لنفسهم |
ريحتوني كثير بردودكم لأني كنت متردده باللي راح اسويه بس الحمد لله بينتو لي اني على حق ولازم اخذ هالحق
كان كل خوفي انهم يزعلون |
حبيبتي
ماينفع تطنشينهم زي ماقلتي قبل شؤي اتركهم ومااطلع الا 3 او 4 والله بيحصل مشاكل كثيره وبلاخص من امه !!!! امك تضايقت من قعدتك مع زوجك وتركك لهم تدري ماينفع هلحل لانه والله ان يسؤؤن مشاكل تكونين بموقف محرج كانكم تتهربؤن وماتبؤنهم مايصلح منظرك انتي وزجك ابدا زبيقؤلؤن للناس زوجة ولدنا كذا وكذا حبيبتي تكلموا بصريح العباره اذا قالوا لكم !!! فقؤلي انتي او هو اجلوها ظروفنا الماديه هلشهر ماتسمح ابد والسبب خسرنا باسهم ولا علينا اجار ولا دين سياره ولا علينا ديؤن استلفنا للاجار ويلله حنا نصرف علئ انفسنا وقؤلي لاهلك وامك واخواتك انتم مره تجون وتروحون فيجون اهله وهو يقؤل اهلها يجون ويروحون وانتم تجون فماشاء الله ميزانيتي خلاص فنش بح !!! اجلوها شؤي ....... اما التهرب فكانكم ماتبينهم ببيتك صعبه لك ولزوجك !وبيقؤلن اهله لزوجك وكيف بيكون ؤجهه لاهله عليكم بلاعتذار عن استقبالهم واما التهرب وعدم الجلسه عندهم هم ماهمهم ماكلين شاربين ولا يهمهم الا فلوسهم لاترؤح علئ شقق!!! وش رايكم بكلامي ؟؟ ماودي تتشؤه نظرتهم ونظرة جماعتكم لك انتي وزوجك ولكن اذا اعتذرتؤا وزعلوا وقالوا للناس فما راح يلؤمونكم بل يلؤمونهم هم ! لانهم ماعذروكم بهلشيء! اي ضيف يدخل البيت واجب اكرامه ! |
احيانا البقاحه والتلميح تكون علاج جيد لموضوعك
باختصار هي اول مره تصدينهم ويمكن يقولون ويقولون بس بعدين بيفهمونها |
أختي الصراحة راحة
تفاهما معا سري على أمك تكلم أبوك بطريقة ما يفهم إنك كلمتيها يكلم الباقين أن زوجك متضايق من ها الوضع بس لا يمكن يتكلم لأنه كريم وزوجك يسر على امه تسر على ابوه بنفس الطريقة يكلم العيال الباقين انك متضايقة من ها الوضع وإلا نقلتم سكنكم من ها المكان إلى مكان آآآآآآآآآآآآآآآآآآآآآآآآآآخر بعيد والله يسعدك أنتي وزوجك بس انتبهي بعد أن تحل المشكلة وأنتي تأكلي مع زوجك (فقط) تقولي أه ما أطيب الطعام لولا كثرة الزحام ( أمزح) اقبلوها مني وفقكم الله |
يا اختي اول شي لازمك تعمليه غيري قفل بيتك فورا ولما يجون عندك اهلك او اهل زوجك اعملي نفسك مريضة وتخانقي انتي وزوجك قدامهم مو بجد يعني خدعة والله ا
|
اقتباس:
|
صادقه ياهموووس الف شكر
وزوجة عبدو فعلا خطيره ههههههه راح اخلي حلك اخر واحد وياسعيد بزوجتي ماقصرت اخوي يعطيك الف عافيه ولكل الاعضاء الباقين اللي ردو |
وتخانقي انتي وزوجك قدامهم مو بجد يعني خدعة والله
لا لا لا انتي تقولي امه قويه ورح تلاقيها زويعه وتقلب عقل الرجال وتقول له ازوجك ولكن اعملي نفسك تعابانه مريضه اي حجه تانيه الا المشاكل فناجين طناجر كل شي يتكسر عندك ما تشتري غيرو واعملو ميزانيه انتي وزوجك قبل ان يحضر الضيوف هذه الميزانيه للاكل وممنوع انو تتخطوها واستحمي كل يوم بسبب وبدون سبب واعطي زوجك وقت ولا يهمك من حد اجلسي معه بغرفة النوم الله يعينك انتي وزوجك واهم شي انو تغير قفل الباب الاكل ابحثي بالنت عن اكلات بسيطه وخفيفه وابتعدي عن اللحم وووو ويكون ردك الدكتور مخوفنا من الكوليستريول والشحوم وووو الميزانيه مخربطه معنا |
وقت زيارة اهله روحي انتي زياره لاهلك وهوه خليه يقولهم نروح لشقتكم انا عزابي وماعندي احد
ويقولهم شقتكم واسعه لما تجون هنا انا وزوجتي بنجي عندكم وتصيروو ضيوف عليهم وكم يوم ويرحو لمكانهم لانه التصريح يزعلهم منكم وتبقى الشغله بذاكرتهم ووقت اهلك يجون عندكم خذوو اجازه وسافرو انتوو لو لمدينه جنب مدينتكم هذا اذا كانو يدونكم خبر قبل الزياره التصريفات اللي مثل هذي لاتزعل ولاتجرح بس راح تعرف انو خلاص مافينا نستقبلكم وانتو معاكم عذركم اسئل الله لكم السعاده وراحة البال وتفريج همومكم موفقين بأذن الله |
عزيزتي خلي زوجك يفهم اهله انك تعبانه وعندك اوجاع معينه ولا تقدرو تستقبلو احد وممكن تسافر للمراجعة
اظن مافيها شئ لانهم عالم ماعندها احساس بصراحة - فبتالي في كل زيارة شوفو لكم عذر بسفر او غير ذلك طبعا قبل مايجوا وشكرا |
Green
يسلمو خيتو ماقصرتي فعلا حكيك ضبووط وعقلاني ما شاء الله عليك خاصه تحممي كل يوم >> هههههه عجبتني الله يجعل ايامك كلها سعاده وماتعصبي ابدا ابدا |
على امل اللقاء ماقصرتي يالغلا
الله يخليكم لي من جد كانت مقفله بوجهي بس حسيت انه فيه امل من حلولكم الحلووه انا اهم شيء عندي عدم التجريح يعني ما اقدر ابد اصرح لهم ابغى اتعامل معاهم من تحت لتحت |
مسافر للجفا >> الله يسلمك اخوي لكن صعبه كل ما يجونا نسافر اقولك الاوضاع الماديه ماتسمح وهم زياراتهم كثيره
الله يفرجها يارب |
والله بصرااحه حزنت ع حاالكـ >> الوحده بدال ما تتزوج تترتااح الا تنهم .. الله يكوون في عوونكـ .. وبصرااحه في نااس ما تستاهل نتعطي وجه .. بس انتي حااولي تعتدري منهم .. يعني لو جوكي سووي نفسكـ مشغووله ولا تهمتي فيهم .. وربي عاااالم الله لا يبلااانااا وبس .. وبصرااااحه اول مررهـ اشووف ام تتدخل في حياة بنتهااا الخااصه >> يعني بزياادهـ .. وربي اتمنى من كل قلبي ان مشكتكـ تنحل >> ولا تنسي تبشريناااا ادا انحلت .. الله يكوون في عوونكـ ويفرج همكـ .. |
ابشري يا خطيره حدي
|
حبيبتي صراحة الوضع مرا مزعج واكثر شي جو معاكم شهر العسل وبعد اداهم زوجك المفاتيح لا لازم تتصرفي كلمي زوجك يرجع المفاتيح فعلا زي ماقلت يجي واحد يلعب الشيطان بعقله وانتي تروحي فيها (الله يحفظك ) واعرف شعورك انك منحرجة منهم وماتقدري تقولي معروفين اهل الزوج اذا زوجت ولدهم قالت شي قامت القيامة ونزلوا فيها بس لازم تتكلمي باسلوب لبق وحاولي تتفاهمي معاهم او زوجك يكلم ابوه بس يقلو زوجتي تعبانة وعندي ظروف اي شي خلي ابوه لما يجي زيارة يحطهم على طول في شقتهم الوضع ماينسكت عليه بكرا يجيكم عيال ولا لما تحملي ولا لو تبي تقعدي مع زوجك لوحدكم تعمل ليلة رومنسية ولاشي كل شويا ناطيين عندكم .... موبعيشة
|
صدقتي يا كورلينا
تدرين مادمرنا الا المجاملات ياليت مافيه شيء بالدنيا اسمه مجاملات وام زوجي الله يهديها ما اكتفت برمي المواعين فقط لااااا شالت المطبخ وقالت ابشتري جديد! يعني هالعطله راح تجي وتدخل بيتي من دون ما تشاورني تصدقون توني متخرجه هالسنه وافكر اقدم على ابتعاث للخارج علشان افتك من هالوضع اللي يصير |
وربي شئ يفقع المراره ..بجد لصقه يالطيف الله لايبلانا
لو مكانك من زمان أتكلمت ..يعني الواحد لو مايرتاح في بيتو في يرتاح الله يعينك بس |
شوفي حبيبتي الوقت اللي بيجون فيه اهل زوجك لمدينتك روحي لاهلك زياره ....يعني وقتي جيت اهل زوجك لك تكون سفره لاهلك....واهلك انت اذا ظروفهم والله ماتسمح يستاجرون وجيتهم خفيفه الله يحيهم ..لكن اذا لا تفاهمي مع امك باسلوب وقولي زوجي مااشتكي بس انا افهمه متضايق نفسيآوماديآ......يااختي قوي شخصيتك ليه كذا سلبيه لدرجه تبغين ابتعاث عشانهم لا حبيبتي هذا بيتك وانت الداخله وهم الطالعين واللي مايستحي فيك لا تستحي فيه...بيجيك عيال وشلون تتصرفين وتاخذين حقك ....لالالالالالازم تغيرين من نفسك وتخلين لك اعتبار بيتك موفندق ....
|
روعه >> يسلمو يا قلبي
قلب القمر >> فعلا جيات اهلي خفيفه جدا ومافيه مقارنه بجيات اهل زوجي اللي لهم شقه للأسف وفكرة الابتعاث راح تفيدني وتفيد زوجي وراح نرتاح نفسيا من اللي يصير من درجة ماني مخنوقه افكر اسافر لبرا سنيييييين موب سنه او سنتين وارجع والله ياقلب القمر لو تعيشين مكاني كم يوم راح تنجنين وانا مو سلبيه بس عارفه شخصيات اللي حواليني ام زوجي لو تعرف اني متضايقه او زوجي راح تلاقي دمعتها على خدها طول الوقت ومسوية مظلووومه مجربه هالشيء وحقدت علي فتره بس الحمد لله خف قلبها شوي الله يستر منها والله شخصيتها قوية حتى زوجها ما سلم منها |
ومع ذلك راح احاااول وانا ما فضفضتلكم وطلبت منكم المعونه الا وانا ناويه وعازمه عالتغيير وان شاء الله عن قريب تنفرج ومتفائله خير
|
| الساعة الآن 08:32 PM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©