|
اتمنى افضح ادمان زوجي لكل الناس!!
السلام عليكم ورحمة الله
سبق وطرحت موضوعي منذ فتره عن زوجي انه مدمن .. المهم انا طلبت الطلاق ورفض يطلقني الا بالمهر كاااامل ,لزوم رد اعتباره عند الناس وكرامته اللي اهدرتها بطلبي للطلاق منه (بحسب وجهة نظره). انا الحين لي أكثر من سنه معلقه ولاعمري تكلمت عليه بكلمه سيئه عند اي احد.واذا سألني احد اقول نصييييب. انا واثقه ان بابا الله يخليه لي يارب راح يحل الموضوع ودي ويرجع له المهر. لكن مقهوره من تصرفات زوجي ورفضه لكل الوساطات اللي طالبوه ان يطلقني بالمعروف وبدون شروط. ويقول اني دلوعه وما اقدر اتحمل مسؤولية بيت وزوج(حسبي الله ونعم الوكيل فيه)!! كيف اتحمل مسؤوليته وهو دايم مسافر ومخليني عند اهلي بالشهور وما يدري عني؟؟ سؤالي :: انا الحين احس بالظلم لانه خدعني وتزوجني وهو مدمن وغير كذا يشوف نفسه من غير اي عيوب ويشوف اني ظلمته لما طلبت الطلاق. وان المرأه مو من حقها تحاسب زوجها على اي خطأ ولو كان الادمان والسفر عنها بالشهور الطويله بحجة العمل!! هل اذا قلت للناس السبب الرئيسي لطلبي الطلاق منه أكون ظلمته وفضحته؟ |
اقتباس:
ياقلبي الله يفرجه عليك .... محد يشووف عيووبه يالغلا .. والحمد لله اللي تركتيه دامه مدمن .. واكيد بعد يبي يطلع العيب فيك .. اكيد من حقها تحاسبه خصوصا في شئ يغضب رب العالمين .. مااظن ظلمتيه او فضحتيه .. لعل وعسى تكوون سبب انوو يتعالج ويرجع للصواب .. موفقه ياارب |
انتظر الامومه
الله يرزقك الطفل اللي تتمنينه لكن ما جاوبتي على سؤالي هل اخبر الناس انه مدمن؟؟ |
لاااختي خلاص استري على ماواجهتي
ماادري اذا عندك اطفال؟؟يعني حراام بكره بيعايرونهم النااس عيال المدمن تعرفين النااس ماترحم |
لو تكتفين بكلمة مافي نصيب يكون أفضل,
وأنتي الله يعوضك خير.. |
اتركيه ربي اللي يفضحه مو انتي
اهم شي تتخلصي منه الحين ويمكن لافضحتيه يعلقك اكثر احمدي ربك رجعتي بيت اهلك سليمة واستري عليه شكر لله وصدقه عليه مو اكثر وربي يعوضك خير |
اختي الله يعوضكك بافضل منه ان شاء الله
ولكن من الافضل عدم فضحه واتركي ذلك لله رب العالمين اما ان يتوب ويستر الله عليه وان ماتاب في رب العالمين هو الي بيفضحه خليكي ارقى منه وافضل وقولي مافي نصيب واحتسبي ذلك عند الله عز وجل الله ييسر امرك يارب |
مشكورين جميعا لمروركم والاحظ جميكم اجمعتم على الستر عليه وعدم الفضيحه .
لكن انا مقهووره من كلامه عني , اتمنى ابرد حرتي فيه , ليه يتزوجني ويغشني وهو عارف اني ماراح اوافق عليه لو عرفت من اول انه مدمن , حسبي الله ونعم الوكيل , |
المفروض الناس تعرف لان اكيد رح يخطب ويتزوج وتتورط فيه فتاة بريئه
انا مع انو اللي يسألك تردي لانو اكيد يشوه سمعتك اولا من باب الدفاع عن النفس وايضا حتى ما يتورط احد به |
أختي هو ماغشك بس أنتوا (أهلك) قصرتوا شوي في السؤال عنه,
والادمان من العلامات القوية التي تظهر على الرجل, عموما حصل ماحصل وأنتي اذا كان تشوفين فيه من الخير مايمكن اصلاحه فلعل هدايته تكون على يديك.. الله يهديه ويسخره لك.. |
اقتباس:
انا كان هذا تفكيري اني استر عليه واذا خطب وسألوني اهل خطيبته ماراح اخبي عنهم شي , لكن الحين افكر اغير رأيي وافضحه عند الناس لانه يتهمني بعدم المسؤوليه واني مو كفو للزواج وفتح بيت, |
اقتباس:
لا ما أقدر اتحمل اكثر بسببه مرضت بالضغط والقولون العصبي وجاني اكتئاب حاد جدا , وما كان احد حاسس فيني وفي معاناتي لاني كتومه وكنت اظن ان فيه امل منه , لكن صحتي ماعادت تتحمل اكثر وانا لسه في بداية شبابي ما وصلت للعشرين عام , |
استري ماواجهتي
حاولي ترجعي له المهر حتى لو كان هذا اخر حل لك ومِن هُنا جاء الحث على ستر المسلمين والمسلمات . فقال عليه الصلاة والسلام : من ستر مسلما ستره الله يوم القيامة . رواه البخاري ومسلم . ... |
اقتباس:
الحين انا المظلومه لاني تزوجته وخرب علي الباقي من حياتي << لاني سأحظى بلقب مطلقه قريبا يارب وايضا ارجع له المهر؟؟ واسكت بعد عن ادمانه يعني هو في كلا الحالتين كسبان؟ بالله مو شي يقهر؟الناس كلها تتساءل عن سبب انفصلنا وهو يقول لهم انها مو كفو زواج وانا اللي الحق معي استر عليه؟ هل تعرفون معنى كلمة مطلقه؟ وايضا بدون اسباب مقنعه؟حسبي الله ونعم الوكيل |
حبيبتي.. فيه شي اسمه محكمه..
اذا كان عندك ادله واضحه على ادمانه.. وحبيبتي اسم مطلقه بدون ابناء يحملون اسم مدمن.. افضل بكثيييييييييير .. انتي باكبر نعمه حبوبه.. مافيه شي اسمه المهر كله.. المحاكم نعمه من الله صح انهم يقولن انها تطول بس تطلع حقك باذن الله ماجربت والله بس كلام الناس وخليك على كلمتك ماكتب الله نصيب والله يتكفل فيه بس زي ماكنتي مقرره اذا احد سالك عنه قولي لهم السالفه وصدقيني قدامك العمر كله .. واخلاقك العاليه تبان لو بعد حين |
| الساعة الآن 09:57 AM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©