|
انا وزوجي والفلوس ساعدوني
السلام عليكم
بادخل في الموضوع مباشرة وياليت انكم تساعدوني وتدلوني ع الطريق الصحيح انا زوجي راتبه مرررررررررررررررة حلو لكنة مايعرف يتصرف فيه ومضيعه بالديون المهم مرت علينا فترات صعبه فبعت مره ذهبي وعطيته 6000ريال وقال هذا دين وبارجعة لك و كان يعطيني مصروف الف ريال شهريا لي انا وولدي وكل شي احتاجة تخيلوا حتى لما اجي اهدي اهله ولا اهلي او اي احد يقول من مصروفك وعادي رضيت ومشيت وضعي لكن تخيلوا مرة كنا بروح لاهله واستحيت اروح ويدي فاضية قلت باهديهم قال من عندك واللي معي مايكفي قال خلاص بعطيك لكن يعتبر دين عليك تخيلوا وصار يخصمها من ال6000 ريال اللي عطيته وانا ساكتة وبعدين ربي فرجها علي وتوضفت في مدرسة بعقد يعني 7شهور وينتهي العقد براتب 6000ووافق زوجي اني اتوضف لكن ولدي صغير مدري وين احطة فراح وجاب خدامة ب13 الف خلاص قلت انا علي مصروفي ومصروف ولدي وراتب الخدامة وانت خلص ديونك تخيلوا من توضفت قطع عني المصروف وعن ولدة حتى قبل ينزلوا راتبي وصار يسجل كل شي اطلبه منة بورقه عندة تخيلوا حتىال13 الف حقت الخدامة ورواتبها وراتب السواق ومصروفي وكل شي ابيه بورقه مسجله عندة واليوم نزلوا راتبي قال عطيني اياه بسدد ديني وانا لي 3 شهور بدون مصروف ولا شي ومع ذلك ماقدر اني محتاجة تخيلوا صرت انا مديونه له وهو ولا شي حتى قيمة الذهب اللي بعته قال باخصم من قيمة ديونك علي ويخف دينك كذا طبعا كل هالشي باسلوب منه ويقول خلينانساعد بعض انا ماعندي مانع نساعد بعض والدليل اني بعت ذهبي وعطيته وتخليت عن مصروفي ومصروف ولدة وضحيت براحتي عشان اداوم واساعدة وهو قاعد يحسب علي بالملي وين المساعدة هنا قولولي وش اسوي معة حلوا مشكلتي تكفون |
يابعد عمري انتي
والله مصيبة مارعرفت له بخيل والا طبعه كذا طيب البخيل مايضيع فلوسه يجمعها وهذا عليه ديون حبيبتي راتبك من حقك انتي وان اردتي اي شى فهو ملزم فيك والا وين دوره كزوج رابتك من حقك توفيرنه للايام السودة ماتدرين عن الظروف وهو من حقه يكفل فيك وفي ابنك انا مااحرضك عليه واقولك ماتساعدينه لكن مو لدرجة انه يسجل عليك بورقة وين حنا فيه زوجك يسوي زي الاروبي لا طلع بتعشى مع زوجته هي تدفع النص وهو النص ولكن لاهو ياخذ حقها ولاهي تطمع فيه يصرف عليها وانا اكره هالعادة لان الرجال قوامون على النساء ولو انتي اميرة ومعك فلوس بالهبل لازم يعطيك مصروف على قد حاله ارميه احرقيه مو مشكلة المهم لازم يكون هو رب الاسرة لو ديونه بدخله السجن وانتي حاولتي تساعديه اقولك من حقك والله يجزاك خير على المساعدة لكن ياخذ منك ويسجل عليك بورقة وفوق كذا مايعطيك مصروفك لا حبيبتي علميه اشلون يخصص لك مصروف شهري لك وابنك وتعوديه على هذا انا مثلا اخذ من زوجي لو بغيت اشتري شى واذا شفت ان الشى الي ابغاه فوق طاقته اكمل من جيبي او اشتري اشياء لنفسي احس انه هو مايقدر عليها ولكن مو افلته مرة عشان الرجل يحس ان له زوجة ويصرف عليها الرجل اذا صرف على زوجته دم قلبه تكبر بعينه لا تتنازلين كثير نصيحة الله يوفقك حبيتي ويصلح حالي وحالك وحال المسلمين |
وعليكم السلام اختي لا أرها مشكلة حتى تستحق ان تكتب في المنتديات المهم انتي وزوجك شركاء حياة وتمثلان جسد وروح واحدة ،، لذا لاتفكري ابدا بالمنة عليه فـ المنة لله ورسوله -- انا ارى ان زوجك من النوع الجاد والذي يحب ان يتعامل بالرسميات في امور حياته المهمة اختي افضل حل الان ان تتخلصوا من المشاكل الكبيرة يعني اجلسي مع زوجك جلسة جادة وخذي ورقة وقلم ثم ابدأي بتسجيل الديون والمصاريف التي عليكم واحسبوها كاملة ثم احسبي راتبك وراتبه وكيف يمكنكما التسديد في اسرع وقت واعملوا خطة لتسديد كل ديونكم <I_ حاولي هنا ان لاتذكري دينه عليك وبعد ان تنتهوا من كل ديونكم وترتاحوا كليا اطلبي منه مثلا شراء كذا من الذهب ولاتنسي تستغلي عاطفته فـ مثلا لو طلب منك او قال لك هذا من اللي تسأليني ، قولي له مايغلى عليك وانا وانت واحد ووو إلخ ايضا اتعاملي باسلوب الورق احيانا ،، يعني عندما تحتاجي طلبات للمنزل لاتقوليها له مباشرة( نريد ونريد ونحتاج ) اكتبي ورقة جميلة وزينيها بعبارات جذابة ثم اكتبي الطلبات وحاولي التخفيف عليه فـ هم الرجال بالديون يجعلهم حريصين ومحاسبين على كل قرش امنياتي لكم بحياة هادئة |
اقتباس:
اختي على أي اساس حكمتي على أنه بخيل ؟؟ لاتنسوا أن وراء كل سلوك نية إيجابية |
اقتباس:
المشكله انا قلتله اذا توضفت انا باصرف ع تفسي وهو ماصدق خبر وقام يحسب كل شي |
اقتباس:
وفعلا زوجي جااااااااااااااد جدا ورسمي في تعاملاته ويموت في شي اسمة ورقة وقلم لكن وين الحل الحين يعني اجلس معه واقول انا راتبي كذا وانت راتبك كذا وديوننا كذا وكذا وحسبنا اللي علينا وبعدين بيقول هاتي راتبك عشان نسدد جزء من اللي علينا وانا وربي محتاااااااااااااااااجة واحس اني مخنوقه لاتحسبون اني ماادية لا والله لكن ماتحسون بالضلم والقهر بدل مايصرف علي يبيني اصرف عليه واسدد ديونة بعد وين المساعدة والتكاتف اللي تتكلم عنه هنا |
.. اختي .. ومثل ما قال لك الاخ ماهر .. أعملي .. أجلسوا وتفاهموا كيف تخلصوا ديونكم ..
.. قلتي راح يقول لك هاتي راتبك . نسدد بيه الديون .. قولي له .. اعطيك جزء من راتبي .. والباقي انا حرة التصرف فيه .. م مو معقوله بتتركي بيتك وتربية أبنك وبتخرجي تشتغلي.. وبالاخير ما تتمتعي بجزء بسيط من راتبك !! .. انتي حددي مبلغ مثلا 2500 ريال .. هذه منك له لمساعدته في تسديد الديون .. وهو يحط مثلك او أكثر .. بقدر أستطاعته .. وحاولوا تقللوا شوي من مصاريفكم ,, قللوا من الاكل بالمطاعم , والطلعات والخرجات ,, حددي ميزانيه ما تتعديها لمصاريف البيت من أكل ومشرب وأدوات نظافه ألخ ,, قللي من الهدايا لاهلك واهله , واشتري اشياء بسيطه ومو لازم بكل مره تزوريهم تاخذي لهم هدايا ,, يكفي صحن شوكلاته حلو ومرتب ,, لا تتسوقين الا وانتي محتاجه , حتى زوجك لا يشتري اشياء انتوا مو محتاجينها ,, قللوا من شراء الكماليات .. وبكذا ان شاء الله راح تقضوا على كل ديونكم وتسددوها .. وتنعموا بالراحه وبراتبكم .. .. الله يسعدك ويهنيك .. ويوفقك .. |
اقتباس:
|
طيب حبيبيتي انا فكرت لمن يحسب معك بالورقة والقلم ان هذا بخل
لان بين الزوجين مافي حسابات مشي حالك يادمعة وربي البيت ماحد مرتاح بهالدنيا ترى بس الهموم مختلفة الله يسعدك يالغالية والله كلنا راح نرتاح بالاخرة بدار البقاء وهناك ماراح نلقى الا اعمالنا اسال الله مثل ماجمعنا في هذا المكان ان يجمعنا بجنات عرضها السماورات والارض |
اقتباس:
لا حول ولا قوة الا بالله .. صارت هي الي تمن !! للاسف صرنا بزمن انقلبت فيه المفاهيم وماتت الذمة والضمائر |
غلاتي دمعة
انتي زعلانة على مسالة انه قطع عنك المصروف .. صحيح موقفه غلط لكن تذكري انك انتي الي قلتي بشيل مصروفي ومصروف ولدي والخدامة لذلك لا تزعلين اذا صار ما يعطيك مصروف ( مع انه واجبه شرعا بس واضح ان زوجك من رجال هالجيل .. او قصدي من ذكور هالجيل ) بخصوص راتبك .. اعتذري منه بلباقة وقولي انا اسفة ما اقدر اعطيك لاني بشيل مسؤوليتي انا وولدي زي ماقلت لك .. وغير كذا انا ساعدتك بذهبي من قبل وكانت مكافائتي انك تسجل كل شي علي بالورقة .. هذا اسلوب تعامل بين زوجين يحبون بعض بالله عليك ؟؟.. ومع ذلك رغم اني زعلانة على الاسلوب هذا .. حبيت اساعدك واشيل عنك شي من المصروف من خلال وظيفتي .. فياليت تقدر هالشي وماتعتبرني مسؤولة عن ديونك والله صراحة دمعة مالقيت طريقة ثانية براسي غير هالطريقة .. زوجك ينرفز من جد الله ييسر لك امورك يا رب |
اقتباس:
مين أين جئت بهذه القاعده ؟؟ هذه قاعدة لا أصل لها يا أخي بل تخالف صلب الشريعه فالافعال على نوعين أفعال خير وأفعال شر ومن أفعال الشر المعاصي والكفر فهل هذه ورائها نيه إيجابيه أظن التعبير خانك يا اخي فأنت تريد نصحها بحسن الظن .. أليس كذلك |
وشهي ديون زوجك ؟
|
اقتباس:
اقتباس:
لاتفكري ابدا بأن زوجك يستغلك لانكم الاثنين تعملوا في مصلحة وحدة وديونكم واحدة ، واهتمامكم مقصدكم واحد اذا كان مثلا يسرف في ماله ارشديه الى طريقة انفاق اقتصادية ، الاهم ان يشعر بمدى اهتمامك بماله وماك وبالمنزل وباستعدادك للبذل بطيبة خاطر ،، ومثلما قلت لك استخدمي الورقة والقلم واذا قال لك هاتي راتبك مثلا قولي له خذ النصف لان بالنصف الثاني سيكون كذا وكذا الأهم ان تكون الامور الاولوية هي محط اهتمامكم اقتباس:
اقتباس:
اختي لم اقل ابدا انها تمن اقرأي جيدا رعاك الله قبل ان تكتبي :) |
اقتباس:
اعوذ بالله ان افتري في الدين شيئا كوني بعيدة المدى اختي انا قصدت ان تحسن النية دائما بزوجها وتضع له سبعين عذر قبل ان تفكر بشيء وأعرف جيدا ما اقول ،، لكن ما لا اعرفه كيف سيفكر القارئ بما سأقوله ومن أي ناحية سينظر له لست هنا لاقلب الموضوع او احولها الى قضية تجاهلوني واهتموا بصاحبة الموضوع ومشكلتها ، ،، ، امنياتي لكم بحياة هانئة |
اقتباس:
عفوا .. انت جبت سيرة المن ليش هل كلامها فيه من ! واذا تقصد ان رفضها لطلبه يعتبر منه ! فاحب اذكرك انها ماهي مكلفة شرعا ولا قانونا بتسديد ديونه ولا حتى الصرف على نفسها وولدها ... وهذ ي وحدة من القواعد الي تبين المعدن الاصلي للرجال زوج صاحبة الموضوع غلط 3 غلطات 1- رفض يعطيها فلوس الضيافة الي لاهله مع انه لو اعطاها ما راح تكلفه لو 3 بالمية من الراتب .. وبعدين رضى يعطيها اياها على انها دين ! علاقة الزواج علاقة روحية لها عمق انساني كبير ماهي علاقة تجاريات وورقة وقلم وديون ! حضرتك ما انكرت عليه هالشي 2- رفع يده عن مصروفها ومصروف ولدها حتى قبل يطلع راتبها (صحيح انها وعدته تشيل مصروفها ومصروف ولدها ) لكن يكمل جميله ويعطيها لين ينزل راتبها بعد ما انكرت عليه 3- طلب راتبها عشان يسدد ديونه وحضرتك شجعتها على هالشي سؤال : باي شرع وباي عرف وباي منطق مطلوب من الزوجة تسدد ديون زوجها ؟ المفروض هو اولا : يرجع لها فلوس الذهب حقها عشان يكون قد وعده وكلامه ثانيا : يصرف عليها وعلى ولده حسب قدرته سواء كات موظفة او لا .. ( هذا على فرض انه رجل يؤمن بواجباته ناحيتها وناحية ولده ) ثالثا : لو ما حصل الي قبل .. على الاقل لاياخذ من فلوسها شي ابدا .. مسالة ان مصلحتكم وحدة وفلوسكم وحدة .. هذي ارد عليك فيها بنقطتين اول شي .. المصلحة الوحدة ابدا ما تعني باي شكل من الاشكال .. ان الزوج يحق له يطلب من زوجته تسديد ديونه او الصرف على نفسها او ولدها .. هذا اسمه استغلال .. مو تعاون وفي فرق بين التعاون .. والاستغلال ثانيا .. فلوسكم وحدة .. قناعة مغلوطة عند كثير من الرجال مالها اصل لا شرعا ولا عرفا ولا منطقا .. تنقال من كثير رجال اذا بغو يوصلون لفلوس زوجاتهم .. وتختفي نهائيا .. اذا الزوجة خذت من فلوس زوجها بدون مايدري او طلبت منه يسدد لها دين هذا غير ان الاسلام اعطى المراة ذمة مالية مستقلة وكفل لها حق التصرف لمالها على كيفها هل تتوقع ان الزوجات يتنازلون عن هالحق الرباني الي فيه منفعة اكيدة لهم .. عشان كلمة تجي وتروح ! الي اعرفه من الحياة يا ماهر نبيل ان الزوج المفروض يكون احرص الناس على مصلحة زوجته وحقوقها .. مو احرصهم على استغلالها .. اذا تشوف ان اخذ الزوج لفلوس زوجته = تعاون ففهمك مغلوط للتعاون مع احترامي التعاون علاقة يستفيد فيها كل الطرفين الاستغلال علاقة يستفيد فيها طرف واحد انا ما اقول بشكل عام ان مساعدة الزوجة لزوجها ماديا غلط او تسديدها لديونه فيه استغلال من جهة الزوج انا احكي عن زوج صاحبة الموضوع على وجه الخصوص .. رجل وعدها يرجع لها فلوس ذهبها وماوفى بكلمته + رفع يده عن مصروفها حتى قبل ينزل راتبها + رفض حتى انه يعطيها مبلغ بسيط ما يجي يمكن اقل من 3 بالمية من راتبه عشان تشتري ضيافة لاهله + يبي ياخذ راتبها عشان يسدد ديونه = استغلال اصلي 100 % مو تقليد .. |
اقتباس:
دمعة إمرأءة اذا زوجكِ مثل ما صرحت يحب الورقة والقلم عامليه بها مبدئياً ولكن بإسلوبك الرااائع يعني بعيداً عن التسلط وغيره أكرمكِ رب البرية من ثم قلت سنفعل سنفعل فيقول .. لا تحكمي قبلاً .. وقلت لك عامليه بالمثل حتى يتم تسديد كل الديون كمرحلة أولى .. ولو تطلب منكِ ان تعقدي معه أن يرجع لكِ مالكِ بعد ان تتحسن اموره بعد سدد الديون .. :21: |
اقتباس:
اقتباس:
روعة المعنى أتمنى أنك في المراات القاادمة تقرأي الكلام ألف مرة أرجو منكِ هذا .. سيدتي لا تقلبي الموازين حسب مبتغاكِ وفوق هذا قال لك الاخ الواثق من نفسه اعيدي القراءة فأعدتها بما هو ادمر حقاً :29: عجبت منكِ بكل من مر هناا بدون تصحيح!! اسمعي غاليتي قد ابدوا قااسية في كلامي:29: لكن ردكِ بدون ادراك .. من غير انه قد يسي للمعنى هو ما اغضبني ساشرح لكِ ليتضح لكِ الامر الأخ قال العبارة التالية ونصاً .. (لذا لا تفكري ابدا بالمنة عليه فـ المنة لله ورسوله) أظن ان المعنى وااضح لكل عاقل ولبيب .. ولكن لن الومكِ ابدا وساختلق لكِ الف عذرٍ وعذرٍ تعالي معي يا روعة أنتِ قرأت النصف الاول ولم تقرأي النصف الاخر وفهمت المعنى خطأ ايضاً ..اختى يوجد في اللغة العربية الفصحى أكثر من معنى منها/ المَنْ بفتح الميم وسكون النون وهي تعني ذكر احسانكَ الى الناااس وان تعدد نعمكِ على من أخذها وهو ما فهمته أنتِ وهو ورد في القران الكريم كما في قولة تعالى *يا أيها الذين امنوا لا تبطلوا صدقاتكم بالمـَنِّ والاذى كالذي ينفق ماله رئاء الناس * .. بالإضافة الى معنى أخر مثال قولة*وأنزلنا عليكم المَن والسلوى المَن هنا بمعنى صبغة ما والبعض قال عسل والبعض قال شراب واختلف فيه:25: كما يوجد حشرة ضاارة بالنباتات يطلق عليه المَن أيضاً !!! نأتي الى الكلمة الثاانية وهي الواردة في كلام الاخ المِـــنَّة / وهي من الاحسان والانعام يا روعة هي اسم مصدر على ما أظن اممممم حتى تفهمي الامر اكثر ساعطيك مثال كما في قوله تعالى * قالوا لانك انت يوسف قال انا يوسف وهذا اخي قد مَنَّ الله علينا* أو لديكِ قوله تعالى في سورة الطور* فمـَنَّ اللهُ علينا ووقانا عذاب السمومِ* انظري غاليتي روعة وضعت لك المثالين ليتضح لك الامر أكثر تقاربا مع كلام الاخ وهو قوله الذي تجاهلته سيدتي حين قال والمنة لله ورسوله!! بالله عليكِ يا روعة المعنى لما تجاهلتي هذا؟:29: ان كان يقصد بها المن على الناس بما احسنت فهل الله والرسول هكذا؟ تعالى الله علواً كبيراً .. رجاءا اختى روعة وكل من يمر هنا ان يدقق يقرأ يعقله قبل قلبه بليز بدون الوقوع في اي اشكاليات والا خ تكرم ومن الاحسان قال اعيدي القراءة لكنكِ اعدتها بـ....!! استغفر الله لي ولكِ وللجميع وكلامُ الاخ واضح ...وليس ضدها ابداً .. اعتذر لصاحبة الموضوع في الخروج عن المسار لكن وجب التصحيح ولست هنا لاقامة درس في اللغويات لكن لو كنت قد التفت لكلامه كاملا ما وقع الخطأ إذا أخطاءت فمن نفسي والشيطان وكل ما قلت حسب علمي ومعرفتي ولستُ بعالم في الدين او اللغة:21: م/ ارجو عدم الوقوف هنا واعادة الموضوع الى مسااره اكراماً لصاحبته أختكم الصغيرة :15: |
ما عاد لك رجعة !!
عساكِ حصلت حل .. ومرتاحة ابشري ؟!! |
| الساعة الآن 04:00 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©