|
زوجتي وأختي اختلفوا.... هل اتدخل بينهما؟؟؟
بسم الله الرحمن الرحيم .
السلام عليكم ورحمة الله وبركاته .. أخواني أخواتي .. ما الأفضل ي هذي الحالة .. أتركهم لوحدهم القوي يدق الضعيف فيهم ولا أدخل بينهم .. وأصير بين نارين .. من خلال قراءتي وتقييمي لموضوع الخلاف .. أشوف أن زوجتي عليها الحق .. ولكن زوجتي تحن على رأسي ..انتصر لي ...أوقف معي ...لا تخليهم يظلموني ....إذا ما وقفت معي ما أحد لي ..على الرغم من أنها الغلطانه ,, تحياتي ,, |
اخوي وضح مافهمت شي ...........تصرقعوا <<<يعني ايش تصرقعوا
|
خلك مع الحق اذا الحق مع اختك فهم زوجتك وقولها انا مع الحق وذا مالك بالمشاكل خلهم يتصرقعون بكيفهم |
يعني تهاوشوا .
|
اقتباس:
زوجتي ما تفهم .... تفتقد للحكمة والتعقل .. الله يهدينا وإيها .. غير موضوعية إطلاقاً ... |
والله من راي توقف مع الحق اذا بتدخل
اما اذا بتدخل وتوقف مع زوجتك حتى لو هي عليها الحق هنا اقولك خلهم يتصرقعووون |
أصل المشكلة :
أن زوجتي أساءة أدبها مع أمي .. وردت عليها أختي بكلام عنيف من خلال رسالة جوال .. أنا لم أعلم بالموضوع إلا بعد مدة لماا فاتحتني زوجتي في الموضوع عشان أنتصر لها... أنا ثار دمي ... لما قالت لي الموضوع وإساءتها لأمي .. لكن مسكت أعصابي وروحي وقلت أبي أعالج الموضوع بالحكمة والتعقل .. ولكن هي تزن على رأسي تقول وقف أختك عند حدها على الرسالة اللي رسلتها .. |
اذا المشكله لامك لا والله امك اولى توقف جنبها وتوقف المصرقعه اللي معك عند حدها قولها اعتذري لامي وانا اوقف معاك ضد اختي المهم امك بالموضوع ماتتكدر يالاخلااااااااااااااااااااااااااااااااااق |
اقتباس:
ولكن رسالة الجوال اللي رسلتها أختي لزوجتي ...عرفت ردة فعل أمي ...أمي تجهالت الموضوع وساكته .. بس أختي اللي تدخلت .. |
وعليكم السلام ورحمة الله وبركاته
شوف يااخوي الخيل بخيالها والمرة برجالها ومادام زوجتك غلطانة في حق والدتك ورد اختك دفاع عن والدتك فلازم تأدب زوجتك وتعلمها تحترم أمك وماتوقف معها ضد أهلك أبداااااا لااااازم توقفها عند حدها والا بتتعود تتمرد وبتخليك تدافع عنها اجبرها تروح تعتذر لأمك ولاترضى حتى تعتذر لها وإذا قالت لك على تصرف اختك : قل لها أنتِ اللي حطيتي نفسك في هذا الموقف وتستاهلي ماجاكِ لان اللي يحترم الناس يجبر الناس تحترمه إذا هي غلطانة هي تعتذر....وإذا مو غلطانة هي تاخذ حقها بنفسها لاتدخل نفسك ابد. واحذر احذر احذر انك تتدخل بين الحريم وانتبه انها تعودك ترد عنها بين الحريم ترى والله عيــــــــــــــــــــــب. |
اولا شي امك المفروض ماحد يغلط عليها
واختك معها حق هي دافعت عن امك برساله جوال اسلوب محترم بصراحه فنصيحه قل لحرمتك انها ماتكرر الموقف مره ثانيه وقل لها انوهي الي بدت بالغلط وخلاص قفل الموضوع واطلب انها ماتفاتحك فيه وحلو لو تحط لها حدود في معاملتها لامك وامك ماسكتت لالا لانها ماتبي تضايقك مهما كان هي ام وبصراحه زوجتك غلطاااانه واسلوب اختك جدا محترم وراقي هي اساءت ادبها مع امك واختك ارسلت لها رساله جا دورك انك تحط حدود لزوجتك بينك وبينها لاتدخل اختك وتستاهل بصراحه انا والله لو زوجه اخوي تقل ادبها مع امي والله لااقوم الدنيا عليها وماهمتني لاهي ولااخوي اهون علي انها تقل ادبها معي من انها تقل ادبها مع امي |
اقتباس:
|
اقتباس:
أنا صار لي 4 سنوات من تزوجت .. ولا تدخلت في سوالف الحريم ...أعرف أنا مشاكل الحريم ... بالنسبة لإساءتها لأمي ... أنا أدرس في الخارج ...وزوجتي وبنتي في الوطن ...زوجتي سافرت مع أهلها إلى مدينة أخرى ..وخلت بنتي ذات السنتين مع أمي ... بنتي دايم تصيح كله تبي أمها .... أول ليلة قامت تصيح ولا هي راضية تنام .. أمي رسلت مسج بالجوال لزوجتي تقول لها ... ثاني مرة لا تخلي البنت وتروحي عنها ...مو كافي أبوها مو موجود أحنا صحيح أهلها بس البنيه تستوحش ما تسكت لا ابوها ولا امها يمها ... ردت زوجتي على أمي برسالة جوال بهذا النص >>>> أنا الغلطانه .. وكلمت أخوها ....اللي هو خطيب زوجتي ... وكان موجود ذاك اليوم في بيتنا ..أنه يأخذ بنتي ويوديها عند أختها ..... المهم أمي ما رضت يأخذها .. ____________________________________ زوجتي من النوع المكابر ... اللي ما تعترف بغلطها .. ولا أتوقع ولو بنسبة 1 % أنها راح تقبل أنها تعتذر لأمي .. وهي من النوع اللي كل يوم والثاني طالبه الطلاق .. والأن إذا تدخلت وكبرت المشكلة : من المحتمل أني أستجيب لطلبها .. <<<<<< وهذا اللي مخليني أتريث اشوي و لو حصل هالشيء ما أتوقع راح تترك أختي وأخوها ( اللي بيتزوجوا بعد 3 أشهر ) في حالهم ... تحياتي ,, |
انا قلت الحين زوجتك شرشحت بأمك وسبت خامسها !! بس عشان ( انا الغلطانه !!!!!!!!!!!!!!!! ) الله اكبر ؟~ واختك تقووم وتحز بخاطرها وترسلها مسج ولق لق ومشـاكل ؟ على غير سنـع !! الله اكبر من قلب ~ المصارين يقولون اتضارب مو عاد اخت زوج وزوجة اخ !!!!!! هذا اولا ثانيـا : زوجتك ماغلطت ولا سبت ولاقالت شي قالت انا الغلطانه !! بالله انت شايف هذي مشكله ؟! والله انها سخاااااااااااافه من قلب ثالثا : لاتوقف لا مع اختك ولا مع زوجتك ~ ولا تفشل ولا وحده بالنهايه هذي اختك وهذي زوجتك ~ امسك زوجتك لوحــــــــــــدها وفهمها الوضع بالهداوهـ وانه لو تموت هي وخواتك والدم يوصل للركب انت مالك دخل !! وحذرها وبلهجه شديده انك لو تدخلت وارغمت على هالمشاكل ووصلك خبر عنها راح تصير مشكله اكبر منها ويمكن تأثر على حياتكم الزوجيـه .. وعلاقتك معاها ~ والسبب انها مشاكل تااااااااااااااااااااافهه تاااااااااااافهه تافهه ~ وعقول هالحريم ( زوجتك واختك ) صغيرررررررررررررررررررررره ! وانهي المووضوع وانه مالك دخل ولا بأي شي مشاكلكم تحلونها سـوا .. وعيد حذر وشدد على كلامك انها ماتدخلك ولا حتى تجيب طاري للمشاكل وانت اعطيها الجنب الثقيل اذا قعد تبربر لك ~ ثاني شي لأختك الي مادري وش تحس فيه على كلمة انا غلطانه سوووت مشكله مالها دااااااعي صدق عقلها صغير ~ امسكها على جنب او كلمها وقولها بنفس اللهجه وانك متأذي نفسيا وتعبان بسبب هالمشاااكل التافهه الي مالها داعي وانه لو ينحرقون انت مالك دخل لأن مشاااكلهم ماتسـوووى ولو دخلت انت فيها بيصير علم(ن) ثاني !! وقد اعذر من انذر وافتك من دوشـة هالفاضيــــــــــات مع احترامي لك يررفعن الضغط ~ :: |
ولنفرض تتدخلت وش بتقول
اختي الله يعافيك ثاني مره لاتقولين لزوجتي شي وعاااااااادي خليها تغلط على امي :( اسمح لي اخوي هذي امك اولا شي والله كثر الله خيرها لاامك الي متحمله بتنك حرمت رايحه مع اهلها وتاركه بنتها عند امك امك ترى مو مكلفه فيها وزوجتك اسمح لي وش انا الغلطانه اي غلطانه اجل بنتها ماتعودت علو احد غير امها وتجي تحطها عند جدتها وتروح هي مع اهلها اسمع اخوي بصراحه انا كل شي الا الام ياخي الام لو كانت كافره لها احترامها وزوجتك تقول انها دايم تطلب الطلاق يوم سكتها شف لك حل معها يعني خايف انك تطلقها ياشيخ بالطقاق الي ماتحترم امي والله ماتنبغى ولا بفلس واذا بتدخل تدخل من جهه زوجتك ادبها وسكتها خييييييييييييييييييير بتتدخل عشان اختك ارسلت رساله خذ لك موقف مع حرمتك .. ولا أتوقع ولو بنسبة 1 % أنها راح تقبل أنها تعتذر لأمي .. .. ولا أتوقع ولو بنسبة 1 % أنها راح تقبل أنها تعتذر لأمي .. مو بكيفها ماتعتذر لامك اذا غلطت هالمره وشافتك واقف معها بتتمادى اكثر مثل ماغلطت على امك برساله تعتذر لها برساله بصراحه اخوي وبدون زعل احس انك من حبك لزوجتك ماتبي تضايقها وتبي تسايرها الا الام واختك وخطيبها مالكم دخل انتم فيهم وش دخلكم حصل هالشيء ما أتوقع راح تترك أختي وأخوها ( اللي بيتزوجوا بعد 3 أشهر ) في حالهم ... حصل هالشيء ما أتوقع راح تترك أختي وأخوها ( اللي بيتزوجوا بعد 3 أشهر ) في حالهم ... والله شكل زوجتك ماتحب تترك احد بحاله وانت عارف طبعها فخل لها حدود في تعاملها مع الغير ولاتخلي محبتك لها تعمي عقلك اسمحي لي اخوي على اسلوبي لكني من النوع الي ماحب احد يغلط عالام وهذا الموضوع اثارني بعض الشئ |
لو انا في موقفك و غلطت على أمي والله كل غلطه بطلقه لين تذلف بيت اهلها
انت تعرف وش معنى ام !! |
شكراً لكم جميعاً :
الأخوة والأخوات عندهم رأيين / 1- ردها على الوالدة بمسج ( أنا الغلطانه ) يعتبر غلط على الوالدة <<<<<<< وهذا الرأي كل المشاركين ما عدا واحدة . 2- والرأي الثاني يقول أنه مو إساءة أدب وهذا شيء عادي <<<<<<مشاركة واحدة تذهب لهذا الرأي .. ما رأيكم ؟؟؟ |
اقتباس:
ردها فيه اساءة لكن بسيطة توقعنا من مشاركتك الاولى انها أساءت لوالدتك بشكل أفظع .. لأنه كمان الوالدة لما تكلمت كان شوي الكلام قاسي .. الوالدة بتمون طبعاً لأنها متل أمها ، و المفروض زوجتك ما ترد بمتل هالمسج لكن على كل حال ... انك تاخد بتار زوجتك لأن اختك أساءت لها << لا أراه الصواب لأن زوجتك غلطانة أرى ان تري أختك و زوجتك ان الموضوع تافه ، و انك مللت من هذا الصداع ، و عليهما هما الاثنتين ان يكفا عن الجدال و (يكبروا عقلهم) ، و على زوجتك ان تعتذر لأمك و لو بكلمة وحدة (آسفة) ...! و اذا هي من النوع اللي بطلب الطلاق لأتفه سبب لا تتطلق و ان عاندت و راحت لأهلها خليها فترة طويلة عند أهلها ، حتى تصحى من غفوتها و تعرف قيمتك و قيمة بيتها و ستعود بدون طلاق الله يعينك و يعنك أختك و أخوها ، لأن زواج الاقارب بهذا الشكل حساس جداً ، كيف لو كان هناك قال و قيل و نساء قوايا و نصيحة لله : عمرك لا تتدخل بجدل النسوان لأنه خراب بيوت أذكر قصة صارت لأهل صديقة قديمة لي ، كلام النسوان في حفلة زفاف انتقل للرجال ، و تدخلوا الرجال بالموضوع ، و كانت النهاية قتل 3 من العائلتين ، و لا يزال الثأر مستمراً حتى الآن ، و العائلتين قرايب (بين خال و عمة) الله يهديهم فانتبه الله يخليك و دائما بالبيت كن حازماً مع زوجتك علمها على الاحترام ، و اي باب بجي منو الريح سده و استريح يعني موضوع بقاء الطفلة عند الوالدة ، خليه للضرورات القصوى فقط ، و بعد أخذ موافقة الوالدة الأكيدة ! الله يعينك و يهدي زوجتك |
مرحبا بعودتك أخي .. من زمان عنك وعن أخبارك !! من وجهة نظري زوجتك هي الغلطانة .. أولا لأنها أخطأت في الفعل .. تركت بنتها وهي بهذا السن الصغير مع علمها بحاجتها لوجودها معها .. ثانيا اخطأت في رد الفعل على عتاب أمك لها .. رعاية أمك لبنتها ليس بأمر واجب عليها وإنما هو كرم وتفضّل منها .. لأنه مافي أحد مكلف برعاية البنت غير أمها فقط .. ولذلك كان على زوجتك أن تتصرف مع أمك باحترام وتأدب .. وأنا لو كنت مكانها ماكنت راح أرسل مسج وإنما راح اتصل لأمك وأعتذر منها عن أزعاج البنت .. وأقول لها إني ماكانت أدري إن البنت راح تسوي كذا .. وإن كانت زعلانه راح أطيب خاطرها بكلمتين واستسمحها .. وبعدها أستأذن منها إنها ترسل البنت مع الأخ .. وكفى الله المؤمنين شر القتال .. |
شوف اخوي ما نقدر نقول اساءه ولكنه عدم احترام وهو مالا يص في حق الوالده
تعرف انا يوم تزوج اخوي الكبير وسكن عندنا قال لزوجته تري امي هذه الخط الاحمر يعني حتي لو لو غلطت اعتبريها مثل امك ولاتردي عليها وانتي واخواتي احترمي الاكبر والفي سنك تعاملو بالمعروف واذا حصلت اي مشكله تحلونها بينكم واياكم تدخلوني بمشاكل الحريم وقال نفس الكلام لي اناوخواتي والحمد لله الين ماتزوجنا ورحنا مع ازواجنا واستقر اخوي في بيت بروحه سارت الامور بسلاسه عليه انا اشوف انك ماتدخل بس فهم زوجتك قدسية الواله الله يحفظها وعلمها انك ما تدخل بين الحريم اعانك الله والهمك الصواب ...وعزرا للاطاله |
لاتتدخل حتى لو يتذابحون لأن السالفه بتكبروكل وحده بتجي تشتكي لك هذي غلطانه وهذي غلطانه ويمكن بعد يكبروالسالفه ويختلط الحق بالباطل وانت بيكون موقفك هناصعب لاتوقف مع زوحتك ضداهلك ولاتوقف مع أهلك ضدزوجتك خلك بعيد أبعدعن الشعروغني له وبالتوفيق
|
لاتتدخل ولا تسمح لزوجتك تتجرأ على امك ولو باأبسط الكلمات
واختك وزوجتك اتركهم يحلوها بانفسهم علما ان اختك تحتاج منك شكر لانها لاترضى على امك باي اهانه |
اقتباس:
|
سلاماات اخووووي اكيد انت ماكتبت موضوعك الا جيت بألف فكره وفكره لزوجتك ومانفع معها حبيبي الموضوع ومافيه امك ماهي خدامه عند زوجتك تحط بنتها وهي تسافر والمرأه اللي تحترم زوجها ماتروح مكان بس انت شكلك دلعتها وماعمرك قلت لها لاااااااااا علمني وليه قالوا فيه رجل بالبيت انت تعرف ان الرجال مواقف وافعال واللي يقولك خلهم يتطاااقون ويتذابحون ماعنده سالفه ونظرته قصيره طيب اذا خليتهم ييضاربوون علمني وين هيبتك وين شموخك كرجل وليه عايش كل وحده تطش كلمه علي الثانيه وانت بك برودة اعصاب تطلع من البيت مكتم وحالتك حاله وبالاخير لاطلعت بحل للمشكله وبس غاااااث روحك انا اشوف ان هم صاروا اصحاب القرار بعدين زوجتك هذي من نوعية النساء العنيده وقوية رااااااااس ولا عندها احترام لأي طرف ولا تحترم رأي احد ولو انها واقعه بالخطأ وانت تشوفه تكذبك وتقولك لا انا علي صح وانت علي الخطأ واكيد اانت طبعتها هالطبع لكن رأيئ علي انك توقف بوجها وتعلمها احترام الناس وخصوصا امك ثاني شي انك تغير معاملتك لها وتخليها عند اهلها كم شهر الين تعرف قيمة نفسها وبنتك دام انها تاركتها عند امك خلها عند امك وهي نزلها عند اهلها كم شهر عشان تتأدب لأني علي يقين انك طبعتها وربيتها علي هالاسلوب هذي يبي لها اعادة تأهيل من طرفك واسمح لي لاتخلي الحريم يتصرفن ويرفعن اصواتهن وانت موجود فثق تماما الرجل اذا ماله هيبة بين زوجته واخته فأعرف اانه ذكوري فقط. ارق التحايا |
انا اوافق الاخت مشاعر مرهفة 100% زوجتك كان المفروض تتصل في امك وتكلمها بطريقة مؤدبة وتخبرها انها بتطرش اخوها يأخذ البنت مو ترسل اخوها علطول !!!!!! وبعدين امك اكيد ما رسلت الرسالة لزوجتك الا بعد ما تعبت من السهر وبكاء البنت المفروض زوجتك تكلمها بحنية وتستعطف امك ضروري زوجتك تلزم حدها مع امك ولا تعطيها مجال ابداااااا تقلل من احترامها لامك والله يكون ف عونك |
طنشششششششششش وش تبي بووجع الراس حريم ويتصاافوون ... >>>> حشى رد رجال خخخخخ
|
لا والله اساءه
ومو ادب ابدا اولا ماحترمتها كونها امراءه كبيره ثانيا حماتها ام زوجها له احترام خاص والمفروض تحترمها من احترام زوجها :( ثالثا تاركه البنت عندها وترد بعد ......... اسمح لي شي لايطاق هذا وتقول بعد انا الغلطانه اي والله الغلط راكبها الى رجولها بعد والله امك واختك ناااس محترمين ماقالوا لك عن المشكله واخفوها عنك مع انو الغلط واصلهم من زوجتك وتجي حرمتك وتحن وتقول لاتترك اختك هي الي لاتتركها هذي امك .........معليش اخوي مستوعب يعني ايش امك بصراحه احسك في صف زوجتك ولوودك انك ماتعتبها لا عاتبها واذ قالت طلقني قل الحرمه بدالها اربع والام محد يسواها و بتوقف عند حدها وبتحرم تقولك طلقني مره ثانيه وبتحترم اهلك |
انا مع رد الاخت مشاعر مرهفه ....الله يجزاهااا خيررر....
|
اهــــم شي بالموضوع امك لاتخلي زوجتك تسيء لهااااا ابد واذا هي حطت نفسهااا في هالموقف خلها تنتصر لنفسهااا وترد ع اختك والصراااحه لو اني بمكان اختك ومرت اخوووي غلطت ع امي ابفقد اعصابي وابسوي واقوول شي ماينقال حتى لو امي ساكته وماتبي مشاكل وانت خلك مع الحــــــق ........ والله يعينك
|
حبيبي اول شي المفروض ما تخليها تناقشك في موضوع مثل كذا أبداً , لأن النقاش في مواضيع مثل هذي منتهي .. طبعاً الكلام هذا من ناحيتي , والمفروض بمجرد أنها فتحت موضوع مثل كذا أنك تسكتها على طول ..
اقتباس:
حبيبي سالفة مكابره ومو مكابره هذي مشكلتها مو مشكلتك أنت ، والأمور اللي مثل كذا وش فايدتك وأنت زوجها , الزوج إذا ما ضبط حرمته مين اللي بيضبطها .. عموماً حبيبي أنت عندك ألف حل وحل وتعرف كيف تدبر الأمور بس حرك عقلك شوي , استخدمه بالله عليك .. |
السلام عليكم
امممم بصراحة اخوي احس انك مكبر الموضوع حبتين يعني واذا قالت انا غلطانة وين المشكلة انت تشوف بالكلمة مسبة لـ امك انا بصراحة توقعتها رافعة صوتها ولا رامية كلمة كذا ولا كذا بوجهة نظري اختك بعد غلطت وشولة التسرع وترسل رسالة لزوجتك طيب لية كبرت الموضوع وكبرت القلوب طيب بعد هاذي بنتكم وتشيل اسمكم وش فيها اذا قعدت عند امك ولا اختك داييم الدووم الغلط ينحط على زوجة الولد مدري لية مع انة لو جينا للي اشعل الفتيل كلة اختك لانها لو ساكتة ولا شحنت امك يمكن امك وقتها مشتها عادي وعدة زوجتك وحدة من بناتها وقدرت وضعها وبعدها عن زوجها وعدم الاستقرار !! انا اقولك لاتدخل بالموضوع مايحتاج يكبر وهو اتفة من التفاهة وش خليتوا للشي الكبير واذا لابد انك بتحكي بعد كلم اختك وقلها من باب اولى انها لملمت السالفة وخلتها تمر عادي مالة داعي حركات اللي من تحت لتحت .. |
تدري
( لاحظت كثير جدا جدا جدا ان الرسايل تتسبب بالمشاكل بين الناس لأن كل واحد يتخيل نبرة المرسل حسب مزاجه.. اما لو يتصل الشخص فهو يقطع اي لبس في اي ردة فعل) قلبت الكلام كذا مره زوجتك ماغلطت بالكلمه ابدا ... بس الظاهر امك واختك تخيلوا من كلمة انا الغلطانه انها جالسه تقولها بإزدراء.. و ليتها اتصلت كان افضل علشان ماتترك مجال لسوء الظن عند اهلك .. وممكن برضو تحليلي يكون غلط.. لكن غلطها الاكبر كيف تخلي بنت عمرها سنتين عند حرمه كبيره ماعادت حمل سهر وقرف عيال؟؟؟؟؟ قلبها شلون طاوعها؟ اللي غلط صدق هي اختك كبرت الموضوع ...لأن اذا جينا للحق مافيه مايدل في الكلمه على اي تطاول ابدا لكن فيه طرق ارقى للتعامل المفروض تتصل على امك وتسمعها كلمتين حلوين وتدعي لها انه الله يجزاها خير على تعبها وتبين لها انها متأسفه ووووووو بعدين ترسل اخوها.. الخلاصه لا تتدخل الا اذا صاروا مجتمعين كلهم في مجلس واحد وطلبوا تدخلك وعموما خليك مع الحق اذا فعلا زوجتك قصدت بها قلة ادب فتتحمممممممل ولا توقف في صفها ابدا اما اذا بس انفهمت غلط ..فخليك مع الحق |
معليش بس من رأيي أختك حسبتهاااا كذااا ،،،
أمي مسكت بنتهاا ورااعتهاا وسهرت معهاااا ولما عاتبتهااا <<< طق فيها عرق الكرامه وقالت انا غلطانه <<<< عيب !!! طيب معروف انها غلطانه والا كيف تترك بنتهاااا عند ام زوجها وهي راايحه مع اهلها تنبسط !! وتنكد على امك معليش <<< بس لو امووت ما احب اشوف امي بالوضع هذااا ولا حمداا ولا شكورااا !!!!!! من الاصل يا اما تجلس ببيتهاا وتتحمل مسؤليه بنتهااا يا اما تاخذها معهاااا <<<< امك جابت عيال وربت وكبرت مافيها حمل صياح العيال الصغاار لا وسنتين يعني حليب + غياراات !!!! تلاقي امك نسيت مسكينه وربي رحمتهااااا <<<<<<< :29: وفوق هذا كله خذ حقي من اختك والاغرب انك محتاار ولو تدخلت بتوقف مع زوجتك !!!! أجل لو كانت مشكله اكبر وصار خلااف أكبر <<<< وش بتسوي بتوقف مع زوجتك في كل الاحوال الخلاااصه ،،، أولااااا ،،، تفهم زوجتك انهااا مره ثانيه لو فكرت تسافر مع اهلها تتونس تاخذ بنتهاااا معهااا ،،، وامك مو مسؤله من احدرضيت مره كراامه لك وتضاايقت اذااا قدروهاا وتشيل هالموضوع من راسهااا !!!! ثانيااااا ،،، اي شي بينها وبين اختك ما تدخلك فيه نهااائياااا وتحله بينهم والا بكيفهم ما حلوها ،،،، ربي يوفقك ويكتبلك الي فيه الخير |
.. بداية القصه انه زوجتك تهاوشت مع الوالده الله يحفظها .. طيب ليش ؟ وعلى أيش اختلفوا ؟
واختك ما لها حق تتدخل في الهواش لانه الشجار كان بين امك وزوجتك , صح ؟ .. والوالده الله يحفظها والزوجه الله يهديها يتفاهمون مع بعض من غير تدخل اختك , لانه اختك زادت الطين بله .. والزوجه والام عادي يكون بينهم اختلاف اراء وشجار وهواش , بس مو معناه انه الزوجه تغلط على ام الزوج لا أبد , هذه بمقام والدتها , وبحكم انها اكبر منها سنا , تتحمل وتتصبر حتى لو بينهم خلاف , واختك لما تدخلت زادت المشكله وتضخمت , وغلطت على زوجتك , مع انه زوجتك ما تشاجرت معها وما اختلفت معها , فليش الغطل على الزوجه ؟؟ .. اجلس مع زوجتك وافهم منها اصل المشكله , وفهمها انه الوالده الله يخليها لكم , امرأه كبيره بالسن ولها عقل وراي يختلف والسبب اختلاف السن , وان عليكم احترامها , وهي بمقام والدتها والا ما ترضاه لوالدتها ما ترضاه على عمتها ( ام زوجها ) .. وأفهم اختك ان لا تتدخل في اي شجار يحدث بين زوجتك وامك , مادام الزوجه ما طولت لسانها وغلطت ومدت ايدها . علشان ما تكبر السالفه وتجر مشكله وراء مشكله .. مع انه اختك ما فعلته فقط لانها تحب امها وودها تدافع عنها لا أكثر ابدا ما تقصد تغلط على زوجتك .. .. اما اذا امك من النوع الشديد والمسيطر والمتسلط , وزوجتك تكرهه هالشيء , فاخبرها ان لا تحتك بوالدتك كثيرا , وتبتعد عن المشاكل معها قدر الامكان , وضع حدود وقوانين للجميع ,, للزوجه , والاخت , والام .. |
[quote=الأخلاق;2362544]بسم الله الرحمن الرحيم .
السلام عليكم ورحمة الله وبركاته .. أخواني أخواتي .. ما الأفضل ي هذي الحالة .. أتركهم لوحدهم القوي يدق الضعيف فيهم ولا أدخل بينهم .. وأصير بين نارين .. من خلال قراءتي وتقييمي لموضوع الخلاف .. أشوف أن زوجتي عليها الحق .. ولكن زوجتي تحن على رأسي ..انتصر لي ...أوقف معي ...لا تخليهم يظلموني ....إذا ما وقفت معي ما أحد لي ..على الرغم من أنها الغلطانه ,, الساكت عن الحق شيطان اخرس اوقف مع اختك وخليك عادل ربي يفرجها عليكم ويهديهم |
^
^ الله واكبر عليك يااخي قل خيرا او اصمت هذا من التخبيب ولاخير في كثير من نجواهم إلا.... اللي يسمعكم يقول ملائكة او ماتغلطون ابد..او الحرمة ماسكة رشاش على امه مهددتها بالقتل.. مالكم الا الظاهر وبس..هي اكيد ماحطت البنت الا بموافقة الجدة يعني بترميها كذا وتروح وكان بامكان امه ترفض تخليها..بس يوم جا الليل وبدت البنت تصايح قامت الام بحركة مالها دااااعي ارسلت رسالة تشرشح زوجة ولدها وراك تخلينها ! طيب بالله وش تسوي الحرمة الحين ترجع من السفر مثلا ! ارسلت انا الغلطانة..وفعلا هي غلطانه انها خلتها .. وغلطانة انها اعتقدت ان جدتها بتتحملها وغلطانه انها كبرت هقوتها مع احترامي بهالجده وظنت انها بتتحمل حفيييييييدتها ! خلوكم منطقيين مهوب عشان صارت امه خلاص يعني ملاك.. انا يوم قريت بداية الموضوع كنت مؤيدة للردود على بالي الحرمة مسويه جريمه بامه..اثرها كلمة ماتسوى على هالضعيفة التقطيع اللي قطعتوها اياه.. ياااخوي لاعمرك تشاور احد الا ذوي الاختصاص والحكمة بالأمور المصيرية واللي يخربون البيوت ياويلكم من ربي الايام تدور وربي يحطكم بموقف ماتلقون فيه من ينصركم.. نصيحتي لك بس قل لها..أمي من الثوابت مااسمح لك تخطين عليها حتى لو اخطت عليك..وحكاية اني ادخل بينكم يالحريم انسيها لين اشوف خطا صريح منك مايحتمل واوقفك عند حدك والعكس ان صار من خواتي..الزبدة اني بوقف مع الحق يافلانه الله يوريك الحق حق والباطل باطل ويهدي سركم |
| الساعة الآن 02:16 AM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©