زوجي يمنعني من زيارة أهلي (حُلت المشكلة و لله الحمد)
 

السلام عليكم ورحمة الله وبركاته

ارجوكم ثم ارجوكم ساعدوني فقد ضاقت بي الحياة واشعر بقهر شديد يعتصر قلبي
مشكلتي قد عرضتها سابقا ولم اجد الحل .....فأتمنى ان اوفق بمن يساعدني على تخفيف معاناتي وجروحي التي لا اعتقد انها ستندمل

انا متزوجة ولدي طفلين ..زوجي انسان بعيد عن الانسانيه يعني ظالم يتجلى ظلمه في حرماني من اهلي كل ماطلبته يوديني لهم افتعل المشاكل والاعذار مثلا ..توني وديتك لهم "علما انه من شهر ماوداني وماشفتهم "..العيال تعبانين "علما انه يفرض عليه الذهاب بهم عند اهله "

والله ياناس ضاقت بي الدنيا .مابقيت اسلوب زين ولا شين الا استخدمته معه ومانفع
والله ما اروح لهم الا بعد نقاش وصراخ وسب وشتم منه ودمعتي على خدي لدرجة ان امي تقول خلاص يابنتي لا عاد تجين مانبيك تتمشكلين معه علشانا

طيب هل من حقه يمنعني من اهلي في حين انه يوميا عند اهله؟؟؟؟؟؟؟؟؟؟؟؟؟؟؟؟؟
هل زيارتي لأهلي لازم تكون بسبب يعني لازم احد يكون مريض علشان ازورهم؟؟
هل المرأه تصبح عبده ذليله عند الزوج يتحكم بها ويمنعها من اهلها ؟؟؟؟؟؟

يارجال اتقوا الله ورفقا بالقوارير
علما انه كلما زاد في عاده ورفضه لذهابي الى اهلي يزداد كرهي له واقول لو صار في امي وابوي شي وما شفتهم ماراح اسامحه ابدا

دايما اخواتي مجتمعين عند اهلي وانا محرومه ليش ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

ارجوكم انقذوني لو كان بيدكم النصح والا والله اني صرت افكر في الانفصال عنه فقد كرهته وكرهت ظلمه وغطرسته واحيانا كثيره ادعو عليه من قلبي

هذه معاناتي التي اكتبها بدمعي قبل يدي ..ارجو مساعدتي

اللهم انصرني على من ظلمني وشكرا,,,,,,,,,,,,,,,,,,,,,,,,,,,,,,,,,,,,,,,

المعذبه على يد زوجها

جروح لا تندمل

طيب حاولي تناقشينه بهدوء واسأليه عن الاسباب جربي اسلوب اللين معه ولا تعانديه يمكن يتغير
الله يعينك ويفرج همك

سبحان الله كأنك تتكلمين عني انا كنت اعاني مثلك لكن دخلت عمي بالموضوع واشترط عليه اروح كل خميس واذا اتحجج بعيالي اقله ودهم عند جدتهم او اجلس معاهم المهم امي وابويه الحين فرض عليه روحتي لاهلي اسأل الله لي ولك الصبر والفرج.

الله يفرج همك ويسخر لك زوجك

الغالية:صمتي شموخ شكرا على مرورك والله مابقيت معه حيلة وكل الاساليب جربتها معاه لكن لا حياة لمن تنادي...

الغاليه :سمو الاميرة شكرا على مرورك واود ان اخبرك ان عمر زواجي ثمان سنوات يعني المفروض يكون قد تعدل لكن للاسف والطرق الي قلتيها جربتها معاه وللاسف مانفعت حتى لما اجيب له شي من عند اهلي ماياكله ابد علما انه من الناس الي ماياكلون من اكل احد مدري هي عزة نفس والا يتقرف الله يعين وبس

الاخوات الغاليات الي مروا ربنا يسعدكم ويفرج همومكم وشكرا على مروركم جميعا

[caution]أي نقد لإدارة الموقع أو تقديم شكوى بشأن حذف أو تعديل؛ يكون عبر قسم مراسلة الإدارة[/caution]

يمكن لو حسستيه انك تحبينه فعلا ما كان رفض لك اي طلب

لكنه يبدو انه يشعر انك معاه بالجسـد والعقل فقط وقلبك مازال مغلق امام محبته

ويمكن الشخص الاول الي حبيتيه قبله شلتيه من عقلك لكن قلبك مازال مغلق الطريق لاي حب آخر

حتى لو كابرتي وحسيتي بالعكس

الرجل عندما يشعر بعظم محبة زوجته الحقيقة له يعطي بدون حدود

عامليه كملك وتفنني في اظهار المحبة وعندها شوفي ردة فعله

والله يوفقك

طيب هل من حقه يمنعني من اهلي في حين انه يوميا عند اهله؟؟؟؟؟؟؟؟؟؟؟؟؟؟؟؟؟
نعم هذا حقه ، و لكن أين تنفيذه لوصية النبي صلي الله عليه وسلم "إستوصوا بالنساء خيرا" ، "رفقا بالقوارير" ، و أين رغبة الزوج في الحفاظ علي محبة زوجته له ، كيف تكن له المحبة و هو يعاملها بهذه الطريقة و كيف تربي أبناؤه تربية صالحة و هي غير سعيدة أو تعيش في ضغط و توتر و كيف تعطيه أحلي ما عندها من تصرفات و كلام و أفعال و هو يكدر عيشها .

أري أن الزوج لا ينبغي أن يمنع زوجته من الذهاب لبيت أهلها إلا لو كان هذا البيت غير محافظ أو يسمح بالإختلاط مع الأجانب (زوج الأخت) و حتي في هذه الحالة لا يمنعها أيضا و لكن يذهب معها بنفسه للحفاظ عليها ، و أري أن زيارة كل أسبوع أو أسبوعين كافية جدا جدا .


هل زيارتي لأهلي لازم تكون بسبب يعني لازم احد يكون مريض علشان ازورهم؟؟
لا و لكن إذن الزوج مهم جدا لمرضاة الله و الله أعلم .



هل المرأه تصبح عبده ذليله عند الزوج يتحكم بها ويمنعها من اهلها ؟؟؟؟؟؟
لا ، بل يحل الزوج محل أبيها تماما في كل المسئوليات و أكثر ، فالزوج ليس مسئولا فقط عن الطعام و الشراب و العلاج و الحماية و المسكن ، بل مسئولا أيضا علي الترفيه عن زوجته ، نعم الترفيه عنها بكل الطرق و من ضمنها الجماع ، و لا يقتصر علي الجماع فقط بل يجب أن يرفه عنها بطرق أخري كالكلام و الحوار و الإستماع لمشاكلها ، فالنبي صلي الله عليه و سلم كان يترك السيدة عائشة تشاهد رقص الحبشة بالحراب لتتسلي ، و كذلك جلس يستمع إليها في سردها لقصة طويلة جدا عن رجل طلق إمرأته و رغم مشاغله الكثيرة صلي الله عليه و سلم إستمع لها حتي نهايتها ثم رد عليها ردا أراحها مما يعني أنه فهم مغزي القصة مما يعني أنه كان يستمع بإهتمام ، و طالما الزوج حل محل الأب فيجب أن يكون رحيما عطوفا علي زوجته و ليتق الله فيها .

الاخوان
التائة قلبه
قود مان
اشكر لكم تواجدكم وردكم رغم تحفظي على بعض ماكتبتموة
مع هذا شكرا جزيلا لكم

الاخت بياعة الورد سأجرب الحل الاول
اما الثاني فهو لايمنعني من الذهاب الى اي مكان ووده نطلع نتمشى ولانروح لأهلي يعني ماراح ينفع معاه الحل الثاني شكرا لمرورك

طيب ما تعرفين السبب يمكن فيه سبب ولو انعرف ممكن تنحل المشكلة

حاولي تتناقشين معه بهدوء وبدون صراخ وتتفقون على حل يرضي الطرفين عشان تحسمون الموضوع

خليها مرة كل إسبوعين مثلا

وترى مرة في الشهر مو سيئة مرة تمشي الحال غيرك ماتروح إلا في السنة حسنة

خاصة لما تكون في مدينه ثانيه يعني لو رضي يخليها مرة أو مرتين في الشهر بشكل دائم

ومتعارف عليه يعني بدون ماتطلبينه خلاص هو من نفسه يوديك بإستثناء الحالات الطارئه مناسبه مرض

من أكبر الأخطاء ترك الموضوع معلق بدون حل وكل شوي تتوتر العلاقة عشان نفس المشكلة

بالنسبه لأهلك لا تدخليهم في الموضوع إذا كنت عارفه أن زوجك ما يتقبل منهم التدخل أو علاقته

معهم مو مرة وأدعي الله يهدي زوجك لك

موفقة

الغاليه بياعة الورد

اشكرك على مرورك الثاني زوجي والحمد لله مايبخل علي بشي ومايمنعني من شي وانا اساسا مااثقل عليه بالطلبات او الزياراتيادوب هي زيارة اهلي ويستثقلها الله المستعان حتى اغراضي الخاصة او اي شي اوديه لهم تكون من راتبي يعني ابدا ابدا ما اكلف عليه ماديا واحيانا كثيره اساعده على مصاريف البيت والعيال لكن مابين بعينه الله يهديه وهذا انا اتواصل معاهم بالتليفون لكن مايغني ابدا عن زياراتهم وتفقد احوالهم ومايحتاجون اليه هؤلاء اهلي الي تعبوا عليه خلاص قطعهم ؟؟والله ماني مستوعبه كلام بعض الاعضاء الي يحللون للرجل منع الزوجه من اهلها وياليت يجيبون لنا اية او حديث تؤكد كلامهم

الا ابوي وامي ياناس ما اقدر ما اروح لهم والله اذا تأخرت عنهم احس بضيقه وحزن شديد يعتصرني وللمعلوميه ان بيت اهلي لا يبعد عن بيتي سوا خمس دقايق يعني ماعليه عناء ولا كلافه لكن مدري وش اقول الله يفرجها

اطياف الرياض
والله مافيه اسباب لمنعي الا جبروت وظلم وانا سبق واقترحت عليه يوم معين يوديني لاهلي ورفض يقول ماتفرضين عليه اوديك بمزاجي في الوقت الي ابيه والله قهرني واتلف اعصابي مابقيت معاه اسلوب الا واتبعته وزوجي لا هو طفل ولا هو مراهق ولا توني اول سنه زواج
انا لي معاه ثمان سنوات وعمره في الاربعينات طيب وش الحل معاه؟؟؟؟؟؟؟؟؟
هو انسان متزمت شوي وفكره متحجر مثلا دايما يردد عليه ان الزوجه خلاص اذا تزوجت تجلس في بيتها وينتقد دايما على خواتي كثرة ذهابهم لاهلي في حين ان اخواته بشكل اسبوعي عن اهلهم

والله حتى مشاعري احسها تحجرت تجاهه واحس اني ماعاد لي نفس اسعده او ادور رضاه وهو دايما قاهرني انا انسان من لحم ودم كيف اعطي واقابل بالجفاء والنكران؟؟؟؟؟؟؟؟؟؟؟؟؟؟؟؟؟؟؟

اختي الكريمة جروح لاتندمل

والله ان مشكلت سهلة وبسيطة ولاتحتاج منك كل التعب
انا متأكد اختي ان زوجك ما منعك إلا لأسباب لاكن ماهي الأسباب:
هل علاقتك مع اهله طيبة؟؟
هل هو منقاد لأهله ويتظاهر بأنه قوي ويقدر يأمر عليك وينهى؟؟
هل انتي قوية وتشاكسينة في بعض الأمور؟؟

في الغالب ان الرجل يمنع زوجتة من زيارة أهلها لأسباب
يجب انك تعرفين سبب منع زوجك لك في الذهاب هلك

لاتستعجلين وتفكرين في الطلاق
انا أرى ان زوجك طيب وممتاز لاكن سالفة الروحة لأهلك هي اللي منغصة عليك
كذلك اجتماع خواتك عند اهلك سبب لك شحن وكذلك انتبهي لا أحد يكبّر راسك على زوجك مهما كان سواء اخ او اخت اوصديقة او اي شخص كان
الرجاء يا اختي الهدوء والتريث مطلوب في هالامور

اتمنى لكيِ حياة سعيدة

هل علاقتك مع اهله طيبة؟؟

احب اقولك اخوي اقهر ظروفك ان علاقتي مع اهله رائعه فوق ماتتخيل ما اكن لهم الا كل حب واحترام وهم كذلك والله ما اقوله مدح في نفسي لكن الحمد لله تربينا على حب الخير للغير وهم بعد يحبوني مثل وحده من بناتهم

هل هو منقاد لأهله ويتظاهر بأنه قوي ويقدر يأمر عليك وينهى؟؟

والده مثله تمام معذب والدته على زيارة اهلها مدري هي وراثه بالعايله والا حب تملك

هل انتي قوية وتشاكسينة في بعض الأمور؟؟

نوعا ما ويمكن تنحصر في روحاتي لاهلي لأني شايفه اني ما اكلف عليه بشي واي مكان يبيني اروحه ما ارفض حتى لو ماكنت ابي لكن عند اهلي وبس ما اقدر اسيطر على مشاعري وهو مايقصر يستفزني بشتى الطرق


والله عجزت ابحث عن اسباب مقنعه وما القيت

وعن الصبر والتريث انا لي معاه ثمان سنوات ومافيه شي انعدل والشكوى على الله طيب الى متى في رايك اصبر الين لا قدر الله يرحلوا امي وابوي والاعمار بيد الله ؟لكن مابقى في العمر قد ماراح منه وانا احب امي وابوي ومتعلقه فيهم كثير خمس سنوات وانا محرومه منهم في مكان بعيد نظرا لعمله وعملي والحين يوم صرنا بنفس المنطقه تكون روحاتي لهم بالقطارة؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟ والله تعبت

نصيحتي لك الصبر الصبر الصبر
ودام انك تقدرين تشوفين اهلك ولو بالقطارة واهلك يدرون ان التقصير مو منك من زوج لاتهدمين حياتك ولا تنسين
انه ما حرمك منهم
لكن ارجع واقول لك اللين ماكان في شيئ إلا زانه وما نزع من شيئ إلا شانة
واصبري اصبري اصبري
نصيحة لك من اخ اصبري ولاتهديمن بيتك ابد

الله يسخر لك زوجك ويصلح حالكم وابنائكم

اخي الكريم اقهر ظروفك

اوجهلك التحية وجزاك الله الف خير على الاهتمام والدعاء والله يسمع منك

اشكر كل من شارك وابدى نصيحه جعلها الله في موازين حسناتكم

ابشركم زوجي وعدني يوديني عند اهلي في كل اسبوع مرة بس بشرط ما انق عليه واخلي العيال معاه

الحمد لله حل يرضي الطرفين الله يديم الموده

لكم جزيل الشكر