|
تقدم لخطبتي شاب ومتحيرة.(تم الرفض)
السلام عليكم.
انا في حيره, .. اليوم تقدم لخطبتي شاب ودشيت معاه مقابله. الشاب طيب ويحب الضحك ويحب الاطفال. وقال لي انا متوسط في الالتزام ولا احب التدخين. لحد اهني حلو وتمام. وحالته الماديه جيد جدا ولكن مو مكمل المدرسه. هالشي اشوي ضايقني. وانا جامعيه وخايفه يكون فرق بالتفكير. والشي الثاني هو حامل سكلر و انا مصابه بنقص الخميره g6bd , والشي الثالث هو اكبر ميني 7 سنوات. لو انتو مكاني تقبلون وتحسون هالشي عادي؟ صراحه حسيت الشاب متحمس ولي مرتاح لي جدا .. انا يعني نص ونص لاني خايفه حدي . يوم قلت له فيني نقص الخميره استغربت شاب بعمره مايعرف شنو يعني او تحير.. وهو قال يمكن فيني ويمكن لا يعني مو عارف اسم الي فيه عرفته من قريبتهم.. متحيره ساعدوني والله ابجي .. احس اضل بدون زواج احسن من اخذ شاب ماعرف شلون بعدين بكون |
أهلين أختي
أذا أنتي صارحتيه بكل شي ،، أوك وهو ماعنده أي مشكله وقابل الأرتباط فيكي فأنتي أستخيري الله ووافقي عليه . وبالنسبة للوضع التعليمي ففيه ياأختي ناس جامعيين من الجنسين لايفقهون من الشهادة الا أسمها ولم يظهر عليهم أنهم جامعيون . فالفرق التعليمي ليس مقياس في أمر مثل الزواج هذه وجهة نظري من الناحية التعليميية , أما بالنسبة لكي فقطار الزواج لايفوتكـ . حفظكي ربي |
تصدقين انا جامعية ولا اعرف وش نقص الخميرة ؟؟
<< واعيباه !! طبعاً أصارحك في هذا قبل لا ابحث عنه بالنت وهذاني بروح ابحث إن شاء الله واتثقف فيه .. واتوقع اني اعرفه بإسم ثاني .. انتِ استخيري وتوكلي على الله ,, أختك ,, مشكلة والله ! <<< راحت تبحث عن نقص الخميرة ! هههه ! |
اقتباس:
انا ما قلت له اني ابي متعلم .. بس انا على الاقل ابي شخص مكمل مدرسه.. هو مو مكمل مدرسه ومضايقه حدي.. والشي الثاني يوم قلت له عن نقص الخميره حسيته ماعرف شنو يعني. خايفه انه لانه مو متعلم من جذي ماعرف.. والله اعلم شلون اوافق وانا خايفه؟ ان شاء الله بستخير |
استخيري الله واسالى عنوا والله يكتبلك كل خير
<<< حتى انا اول مرع اسمع بي نقص الخميره |
اقتباس:
هههههههههه الله يوفقج يعني الي ما يسير ناكل بقوليات او فول |
اقتباس:
|
اختي فيه شي أسمه تقريب وجهات النظر ؟؟
انتي حاولي تقربين وجهات النظر بينك وبينه بالحوار المباشر وراح يبين وياكي من طريقة رده وتعامله وأموره اللوجستية أثناء الحوار . وبالنسبة لموافقتك ع الزواج لاتوافقيي الا وانتي مقتنعة بنسبة 100%100 لان هاذي حياة زوجية مو اي شي ثاني . الله يوفقك ويستر عليكي |
آآآهاا شفتي كنت اعرفه باسم ثاني هو الإنيما الحادة
هو نقص في نوع معين من الأنزيمات (الخمائر) الضرورية لعملية التمثيل داخل كريات الدم الحمراء وهذا المرض يؤدي إلى الإصابة بأنيميا حادة (فقر دم حاد) الله يشفيك يارب |
قرات عن المرض وهو ينتقل للطفل من الام
اهم شي انو عرف الله يكتبلك كل خير ويسير امرك |
اقتباس:
يعني هو قال مايحب السياسه ومايحب يدخل في نقاشات حاده وانه مو عصبي.. والرياضه اكره يعني مو ميوله قال يحب السفر ويحب الطلعات والتسوق.. هو طبعا كون روحه بنفسه وعنده بيت وشغل خاص فمادري هو شلون؟ وانا طبعا بفكر قبل لا اوافق عليه |
اقتباس:
طيب تمام بالنسبه له هو راح احاول ابيلك ميوله من خلال نظرية شخصية تحتمل الصح والخطا . هو مايحب السفر والسياسة ولايدخل في نقشات ومو عصبي ومو رياضي : من خلال هالكلام يتضح أنه شخص هادي الطباع وانسان حده حد نفسه ماله علاقة باللي مايخصة . الله يوفقك اختي وييسر أمركــ . وخبرينا عن أخر المستجدات أذا أمكن . |
اقتباس:
اي هو قال جذي هو يحب يسافر. مو ما يحب ان شاء الله ادعولي الله يسهل |
انتي فيج نقص الخميرة يعني بيكون افضل انج تاخذين واحد سليم حفاظا ع صحه الاولاد بعدين !
حامل المرض اهون من المصاااب ,,, ففكري زين قبل ماتوافقين او ترفضين ادري مافدتج بس ماحبيت اطلع من الموضوع بدون ماارد :d |
حبيبتي~
قريت كلامك عنه.. شوفي شغلة هو ما يحب النقاشات ،، مو مهمة :) والله صحيح،، انتي ماتبين الي يوجع راسك بالنقاش:) انتي تبين المتفهم ،، المحب،، الحنون :) و كللللللللللللللللللللللللللللللللللل الباقي يهون .. يحب السفر و السوق :) ممتاز والله :D اذا ما تبينه عطيني اياه،،، اموووووووووت عالسوق :P (امزح والله بس ابيك تضحكين شوي ولاتشيلين هم) تقولين عنده شغله الخاص و كون نفسه ،،، ممتاز والله . وش بعد؟ اهم شي انتي اعجبتيه؟ طيب انتي هو شكله مثلا نفرتي منه؟ اخلاقه زينه؟ يدخن مثلا؟ راعي سهرات؟ اذا لا! توكلي على الله :) والله يكتب لك الخير يارب.. على فكره بالنسبة للمرض ،، توكلي على الله و ربك كريم:) |
الله يوفقك لما فيه الخير والصلاح
نقص الخميره منتشر في البحرين ودول الخليج ومنهم انا وزوجي وهو حتى لو انتقل للاولاد عادي مثل انا عايشه وما احس بشى يا اختي المدرسه ما علمونه شي اسمه نقص الخميره يعني ليس بضروري ان يكون يعرفه اختي تعالجة في الاردن علشان الحمل وهي حامله السكلر الدكتوره هناك تسالها يعني شنو حامله سكلر عرفتي حتى الدكتوره ماعرفت يعني شنو حامل سكلر لانه له مسميات علميه اخرى |
اختي في تحاليل قبل الزواج للامراض الوراثية لا تشيلي هم سويها اذا طلعت توافق
خلاص توكلي علي الله وادرسيء شخصيتة ووافقي |
طيب انا كمان جامعيه وماعرفت نقص الخميره!!
له اسم ثاني اللي هو تكسر بالدم!! انتي الحين قستي ان ثقافته ضحله لانه ماعرف اسم المرض لاتقيسين من اشياء بسيطه جدا خليك متعمقه اكثر انا اشوف انتي مو متقبلته ووضحتي عيوبه بدون لاتبينين ايجابياته والترركيز على العيوب دون الايجابيات امر راح يتعبك جداااااااا وعلى فكره اهم شي في الزواج التقبل بغض النظر عن ي شيء اخر موفقه يارب |
مرحبا قديتج
اختي انه من البحرين مثلج واعرف شباب البحرين شلون .. اختي الدراسة مو كل شي ولا لها تاثير على التفكير صراحة .. انه زوجي تخيلي اشتغل بدون لا يكمل الثانوية حتى .. وعقب ما اشتغل اخذ الشهادة وانه متخرجه دبوم بس والحين زوجي يدرس بالجامعه وبياخذ بكالوريوس ولا اشوف في فرق في عقليته عني .. وعن حامل السكلر ونقص الخميرة تره مايخصهم في بعض سالين دكتورة من قبل بخصوص اخوي .. وبعدين يمكن اهو يعرف اسمه بالانجليزي لان احنه نستخدمه في بيتنه g6bd .. وفرق العمر بينك وبينه معقول وبالنسبة لي كنت اتمنى هالشي بس مالله كتب لي ..والله يوفقكم انشالله |
السلام عليكم ورحمة الله وبركاته:
يا اختي فرق التعليم في حقيقة الامر لا يهم لأنه ما راح تلقي محاضرة امامه ولا هو كمان لو كان متعلم يعني الحياة الزوجية خلط من الحياة الاجتماعية يعني الحياة مدرسة وتثقف الجميع واكبر دليل حالتي لأني خريجة بكالوريوس وزوجي مو مكمل الثاني اعدادي ولكنه طيب وحنون ومتفاهم والحمد لله لا يحصل خناقات ابدا الا ما ندر ولي متزوجة 3 سنين واهم شي في الزوج يهنيكي ويعرف قيمتك وكيف يعاملك مو يعرف في تخصصك واللي درستيه في المدرسة والجامعة وازيدك من الشعر بيت كل الصفات اللي ذكرتها في الزوج الرائع يجب ان تتوجها استقلاله بنفسه وبعمله الخاص وهذا ما ينقص زوجي للاسف (ملاحظة: انا خريجة جامعة ولا اعرف نقص الخميرة ولكن اعرفه بنقص الدم الفولي فلا تستغربي بمعرفته للمسميات الجديدة) لذلك اعقلي وتوكلي على الله واستخيري واجلسي معه كمان مرة وشوفي ازا بترتاح نفسك معه ولا لأ موفقة اختي |
اقتباس:
لا بالعكس كلامج صح.. وتسلمين خيوه |
اقتباس:
هلا ههههههههه لا ما نفرت من شكله هو صراحه وسيم وطويل ورياضي .. ويروح نادي للرياضه بعد على حسب كلامه وحتى اثيابه استايل.. بس خايفه يطلع طرطور لانه مو متعلم خايفه من هالشي وقال ماحب اتنقاش بالسياسه انا ودي ريال يكون له كلمه قويه ويحب يناقش .. والشي الثاني المرض .. ماعرف شلون انابتسخير .. دعواتج لي.. وتسلمين على الرد |
اقتباس:
وتسلمين خيتوه على المعلومات والله كريم |
اقتباس:
اكيد بنسوي بس انا افكر اسوي مقابله ثانيه.. انيت اشرايج؟ |
اقتباس:
ماعرف شقول يمكن لاني متردده .. انزين شولن اتقبله ؟؟؟؟ ارفضه احسن ولا اسوي مقابله ثانيه وثالثه؟؟؟ لانه مابي اتزوج من مقابله وحده موة معقوله بعره من مقابله بس.. هو فيه اجابيات.. مثلا معتمد على نفسه يصرف على اهله يحب امه حنون وكريم لابعد حدد .. هم عائلتهم من النوع الي يدلعون المرا يعني يتقاسمون معاها حتى اشغال البيت وتربيت الاطفال.. وهو وسيم ومرتب ورياضي.. بس تابعتني مشكله اني جامعيه وهو مو مكمل مدرسه مضايقه حدي شلون اشيل هالعيب.. خايفه اسلوبه يطلع جاهل بسبب انه مو متعلم انا مو متقبله انه مو متعلم.. انا مابي جامعي بس على الاقل مخلص ثانويه.. |
اقتباس:
ان شاء الله دعواتج |
اقتباس:
انتي شلون كان اسلوب زوجج؟ هو حتى بالمقابله يقول بالعكس انا بساعدج على اكمال الدراسه .. قلت له شلون قال لا تشيلين هم البيت والمسؤليات.. حتى لو وجد اطفال انا بكون موجود.. بس خايفه ياربي |
بصراحة من خلال قراتي لردودك ومتابعتي لموضوعك . فأنتي مثل اللي يرفس النعمه . وكل قضيتك أنه مو متعلم وذكرتي كذأأ في ردك رقم {25} لكن نصيحة لكي قبل لايفوتك القطار شيلي قضية الفارق التعليمي من راسك . وبعدين من شاف كلامك عن التعليم الجامعي بيقول أنك وزيرة التعليم بالبحرين . الله يعينك ع نفسكــ . |
اقتباس:
|
بالنسبه لي أحس مواصفاته ممتازه
ولو أنا مكانك ماترددت في الموافقه |
اقتباس:
دعواتج |
اختي انا من رايك انك تسوين مقابلة ثانية واذا تطلب الامر مقابلة ثالثة
وبعد انا اقولك بصراحة كلمية علي التلفون لفترة مثلا اسبوع طبعا كلام عادي وهذي المكالمات مهي حرام قبل المقابلة الثانية بعدين اذا رتحتي قرري تسوين التحليل احسن لك انا اختي عملت كذا مع خطيبها |
اقتباس:
ان شاء الله راح اسوي جذي ادعيلي |
هلا اختي اني مسجلة من زمان بس ماادخل ودخلت بس عشان ارد عليش << يا حظش سأليه اذا في نيته يكمل دراسة؟ قيسي طموحه صح ان صاحب الشهادة الجامعية مو بالشرط يكون انسان مثقف, راقي له اسلوب و غيره من الصفات اللي من المفترض ان تتوافر في شخص جامعي في جامعين ابعد ما يكونون عن هذا للأسف بس اذا بتنظرين لها من ناحية ضمان مستقبلي مثلا او طموح او غيرها اكيد بيكون لها معنى بالنسبة لنقص الخميرة يمكن اخوانا من الخليج ما يعانون مثلنا من هالمشكلة في البحرين حتى الاطفال يعرفون نقص الخميرة لانه متفشي بشكل رهيييب غير حملات التوعية و الى اخره اللي عرفت الناس بهالامراض الوراثية عموما مو مرض خطير يعني ماله اعراض تقريبا في حال تجنب اكل الفول عموما يمكن هو يعرفه باسم ثاني او مادري يمكن عنده عذر سوي مقابلة ثانية عطي روحش فرصة اعتقد ان الشخص فيه كثير من الصفات الجيدة حسب كلامش عطيه وعطي نفسش فرصة و فكري زين بالتوفيق :) |
اقتباس:
هلا والله خيتو ماتقصرين على الرد.. المفروض اساله هالسؤال بس استحيت بس اذا سويت مقابله ثانيه لازم بساله لانه خوش سؤال لازم اقيس طموحه اذا لا صراحه مابغيه اذا اي بكمل حياتي وياه.. صح كلامج نقص الخميره حتى الاطفال يعرفونه .. ماتوقع .. هو حامل سكلر اوكي اساله انت فيك مرض وراثي يقول مادري يمكن مثل الي فيج .. بالاخير سالت نسيبتهم قالت انه حامل سكلر .. وللعلم هو من قبل مسوي فحص ما قبل الزواج وماصار نصيب.. يعني معقوله مايعرف او ينسى او متناسي ... انا راح افكر دعواتج لي بقولج شغله بعد مضايقتني :( بما انج بحرينيه وتعرفين هو كلامه اشوي قروي ومتحسسه من هالسالفه لانه هو قروي... انتي شنو رايج؟ |
فديتج الحمدلله يوم خذته مالاقيت اي شي يسبب خلاف متعلق بدراسته .. وكل الفروقات اللي يمكن تلاقينها تره بسبب محيطة الاجتماعي شلون تربى وشلون اسلوب بيتهم .. يعني فديتج بتحسين باختلاف لاختلاف بيئتج عن بيئته فقط ومع الوقت راح تتكيفين و بالاسلوب الزين تقدرين تغيريين باذن الله الاشياء اللي ماتعجبج بس يبيلها صبر لانه شي متعود عليه وعاش معاه سنين مو معقوله تقدرين تغيرين اي شي بسرعه .. والله يوفقج ويسوي اللي فيه الخير والصلاح لكم |
اقتباس:
انا سالت عنه كمبدئي فقط يمدحونه وايد خصوصا بالكرم .. يقولون ايده مو له بس بعد خايفه الكرم وحده مايكفي. ومثل ما قلتي يمكن اسلوبه وكلامه على البيئه الي تربا فيها.. من جذي اشوي لهجته , بس احس اسلوبه عادي يحب يضحك.. دعواتكم |
اقتباس:
امممممممم بخصوص اللهجة في راي الشخصي مو بذيك الاهمية .. اشوفه شي عادي الله يكتب لش اللي فيه الخير وطمنينا عن احوالش :) |
مرحباااا قشطة ^.^
,, اولا ً بما إنج متحسسة هالكثر من الناحية الشهادة والتعليم المفروض أول سؤال تسألينه إذا كان ناوي يكمل دراسة والا لا ؟؟ بصراحة برأيي الشخصي إن الشهادة الجامعية مو كل شيء ! ولا كل جامعي معناه مثقف؟! .. بالعكس تجارب وامتحانات الحياة أكثر واغزر من امتحانات الجامعة ولكن بنفس الوقت مهم جدا ً وضروري إنه يآخذ الشهادة المدرسية عالاقل ... خل يآخذ مواد ذاتي ويقدمها امتحانات ؟؟ هو صج مستقر ماديا ً وعنده شغله الخاص .. بس الشهادة الثانوية عالاقل ضرورية ؟ حق الي الجاي والمستقبل .. سبحان الله ما ندري شنو بصير لنا ... وبالنسبة للمرض ... آنا على حسب علمي إن الي حامل سكلر عادي يآخذ الي عنده خميرة؟ بصراحة مو متأكدة ... بس هذا كله لا تفكرين فيه ولا تعورين راسج ... لأن لازم بتسوون فحص قبل الزواج وهو الي راح يحدد إذا كنتوا مناسبين لبعض والا لا يعني ريحي نفسج من هالجانب ... وخلي السالفة على الفحص ؟ واللهجة ! .. حلو الواحد يتكلم بلهجته الاصليه .... كل شيء على طبيعته حلو , ومو حلو يتصنع حتى لو في الكلام !! انتي مترددة وايد ,, وهذا من حقج لازم بعد تشاورين الاهل تآخذين وتعطين معاهم وتقولين لهم ب إلي تفكرين فيه عشان هم يعطونج رايهم ويفتحون عيونج عن اشياء يمكن غفلتي عنها ؟ ويمكن إحنا نقول اشياء عادية بالنسبة لنا بس بالنسبة لأهلج لا مو عادي .. !! لازم تسمعين كلام الماما والبابا ورأيهم في المقام الأول وبعدين تتشاورين مع اخوانج وخواتج ,, موفقه عزيزتي ... والله يكتب لج الي فيه الصلاح , يارب |
الله يشفيك ويكتب لك اللي فيه الخير
اهم شي استخيري وماخاب من استخار |
| الساعة الآن 08:59 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©