|
كيف أقنع والدي ليوافق على زواجي ؟
السلام عليكم
ياعالم يابشر والله خلاص ماعاد فيني صبر كنا نقول الزواج تكاليف بتكاليف ومحد فينا يفكر يتزوج وحطينا لنا عذر وشوي قلنا المهر غالي والاباء اخذين بناتهم تجاره وهذا عذر ثاني.... والحين الناس والله تغيرت والبيوت تغيرت كثير كثير الناس صارت تبغا الستر والبنت نفس الشي ماعاد يهم كلام اول مهر غالي ومدري ايش واذا عالتكاليف عاد انت تفاهم مع اهل البنت وبيتفهمو وضعك دامهم يبون الستر وادخل بالموضوع هذي كلها مقدمات ههههههههه الحمدالله موظف لي سنه الحين وطلبت من اهلي الزواج تعرفون الزمن ذا اروح البقاله الي بحارتنا المكسره وياصغر البقاله على قد حالها وعنده السي وكل شي ابو قديم الله يرزقه راعيها المهم والله اروح لها البقاله اشوفلك ذيك ام عبايه مخصره ياساتر فتن عيني عينك والله حتى شغالات حارتنا صارو يفتنون اقولكم مووضه صارت الفتنه وانا واعوذ بالله من كلمة انا مثلي مثل اي واحد من الشعب غلبان ابي استر نفسي والله ياعالم ابغا الحلال مابغا اروح لطريق البنات(( من دق باب الناس دقو بابه))<<كل شاب يحط هالعباره بباله ,, والمهم كلمت اهلي ابتزوج وعندي دخل وعندي شقه بس الي ناقص بنت الحلال الي تبي الستر وترضا براتبي المتواضع مايتعدا ال3000 ووافقو اهلي ورحنا للناس الله يسعدهم يارب عن طريق الاهل وتقدمت لبنت وانا واهلي رحنا لهم باستثناء ابوي وانا جلست مع اخوانها والاهل يشوفو البنت وكذا وابوهم متوفي والله ياجماعة الخير انهم عيال ناس ابن حلال استقبلوني احلى استقبال ودخلنا بالموضوع واني شاب راتبي على قدي وادور على بنت الحلال وقلي الاخ الكبير وهو متزوج وعنده عيال لاتشيل هم فلوسك ولاشي اهم شي الدين والاخلاق واذا عالفلوس انا ببدايتي مثلك تزوجت وراتبي 1800 واعتبر موضوع الفلوس راح بس خلنا نسئل عنكم بالاول وكذا وتمت الموافقه المبدئيه الحين مجرد جلسة تعارف من غير شي رسمي هذا الكلام صار برمضان ومن بعدها ليومكم ذا تخيلو كل ماكلم ابوي نمشي نروح نتقدم رسمي يقول لا انا مارضاها لبنتي تتزوج واحد مثل وضعك وكيف ارضاها على بنات الناس وصارت مشكله بالبيت وحساسيه بيني وبين ابوي لدرجة كرهته والله كرهته ليش يسوي فيني كذا قلتله انت اشلك واشل الناس هم راضيين خلاص هم ناس يبغو الستر وليش وليش وليش وقام يتعذر باعذار مافيها ايمان بان الله هو الرزاق ويبدل الحال من حال ويقول فلوسك ماتفتح بيت لما تتعين وتصير حكومي ذيك الساعه نروحلهم ومابغا ادخل بتفاصيل المشكله الي كل يوم وانا ابوي لدرجه يقولي انت مين حط براسك فكرة الزواج روح عيش زيك زي الشباب يعني روح تعرف وروح فلها ورب الكعبه انه لو يكفشني مع بنت مابيقولي شي ولابيتضايق...! وانا يمين بالله الحين الحين اقدر اطلع مع اي بنت من ذولي البنات بس مو من حلاتي الله يخلف بس ههههه يعني من الشباب وكذا عزيمه تعال يافلان عندنا صيده بالشقه بتجي وارفض والله اني ساتر نفسي الحمدالله ومايعيبني شي غير الراتب البسيط الي بنظر ابوي طيب انا ايش اسوي بالله دلوني ايش اسوي اروح انحرف والسب ابوي وبني ادم ضعيف والشيطان شاطر وامي الله يحفظها معاي كل يوم انا وهي نزن على راس ابوي زوجه وهو الله يهديه راسه يابس لما يتحسن وضعه...! والله العظيم نفسيتي زفت بزفت وامي الله يحفظها تقولي ياولدي مالك الا الصوم وغض بصرك وابوك ان شاء الله بيحن عليك وانا مابكذب عليكم استقامتي مو ذيك الاستقامه يعني الحمدالله صلاه وبار بوالديني واحب الخير للجميع والباقي الذنوب الصغيره الي ماتخفا عليكم من اغاني وكذا بس كأخلاق والله ماتسمحلي اني انجرف ورا الفتن بس الشيطان مابيتركني بحاله من بعد كل مشكله مع ابوي وخصام يقولي ياولد روح سافر روح سوريا فلها لين تطفش ههههههههههه الله يعين بس |
ياأخي كن جاداً مع أبيك في طرح الموضوع... فإن قال لك كما ذكرت:اقتباس:
فذكّر أبيك بالله.. وقل له يا أبي أترضى هذا الشيء لواحدة من بناتك؟ يا رجل أعراض الناس ليست لعبة وفاكهة يتفكه بها.. ................................................ أما بخصوص موضوع زواجك واقناع أبيك, فمن الممكن أن تستعين بأحد أعمامك أو أخوالك وتطرح له الموضوع بكل وضوح وإن أهل البنت موافقين.. ثم هو بدوره يقوم بمحاورة والدك في الموضوع.. أسأل الله أن يوفقك ويعينك.... واحذر أن تخربها حتى لا تخرب عليك دنياك وآخرتك. |
هلا اخوي ابو ناصر
جاد؟؟؟ يابن الحلال اقولك خصام وهواش ومايفك الخصام الا امي ماهو راضي يتقبل ولا راضي يفهمني اقوله طيب اعطيني عذر غير الفلوس اقنعني اتفاهم معاي يقولي حل عني بعدين افهمك تصريفه |
افهمني يا أخي:
أنت لا تدخل معه في حوار ونقاش.. استعن بعمك أو بخالك أو بشخص تشعر أنه سيؤثر على أبيك ويقنعه.. (جرب وردَ علي) |
فكرتني بقصة شاب كان معنا هنا و كانت أمه رافضة تزوجه
و الحمد لله ، كلها أسبوع تقريبا ،، و جاء يقول باركولي أمي قبلت تزوجني أخوي ، أبوك يقول لك كذا ،، روح فلها ووووووووو إلخ لإنه متطمن إنك ولده ، و واثق من تربيته ماشاء الله فإنت لازم تمثل عليه ، إنه الموضوع جدددددددددددد ( مثّل عليه كم يوم ، إنك متعرف على بنات ، و اسهر مع صاحبك و تاخر و أرجع و رش من عطر الحريم على ملابسك ، خلي أبوك يحس إنك سمعت كلامه و عملت اللي براسه و قول له صاحبي عرض أخته لي للزواج أو أي شئ ) المهم ، إنت تعرف أبوك و شوف إيش الشئ اللي يخاف عليكم منه ، و كأنك بتعمله و تلاقيه تاني يوم بيروح معاك و يخطب لك إن شاء الله ، و إنت فهم أهل البنت علشان لا يطفشوا و يقبلوا غيركم ؟ |
لا حول ولا قوة الا بالله
يعنى اذا كان الولد جد مو عاجب واذا كان طايش مو عاجب انت لازم تبينله جديتك بالموضوع ولازم تفهم والدك انه نفسة اكيد بدأ مع والدتم من الصفر واذا عندك اخوان خليهم يساعدوك |
اها
بصراحه القضية شائكة ولكن ؟؟؟ أقتراح أبو ناصر في محله ,, أو أنك تشوف شخص عزيز ع والدكــ بمعنى أن أبوكــ مايردله طلب عرفت وكلمه يتوسطلكـــ عند أبوكــــــ . ولكن حط شي واحد براسكـ البعد عن الحرام بأي شكل وطريقة . وأصبر فأن الصبر مفتاح الفرج . وأحتمال يطيحك من فوق الدرج . بس أصبر ياغالي |
الله يرزقك ببنت الحلال اللي تسعدك وتسعدها ويرزقكم بالذريه الصالحه عاجلا غير اجل
ويعصم قلبك وجوارحك عن الحرام والمعاصي ياااارب العالمين بصراحه تعاطفت معاك جدا والوالد الظاهر راسه ياابس الله يخليه لكم من رأيي تدخل عمك او عمتك او خالك المهم اي واحد تشوف انه يمون على الوالد ويقدر يقنعه ويكون كلامه رزين وعاقل بالتوفيق ياارب واذا تمم الله لكم بالخير نبي تبشرنا :) |
اقتباس:
والي كلمت الوالده عن ذي الفكره قالتلي لا انا اعرف ابوك كذا انت زي الي تكسر كلامه وهذي خصوصياتنا ماتطلع برا البيت |
اقتباس:
الله يسمع منك يارب ويوافق والله كأنك عايشه معنا وفاهمه الوضع :22: هو متأكد انه مالي بالخرابيط وقال كذا لانه واثق بس بنفس اليوم الي قالها بعدها بساعتين سويت فلم هندي والله ههههههههههه دخلت الشقه ومعصب واسوي اني ادخل ملابسي بالشنطه وامسك الشنطه واطيحها بالارض عشان الفت النظر ويجون يشوفوني ايش يسوي ولما جو ابوي وامي قالو خير اقولهم ابسافر بروح............ ابفلها هناك واجيكم ههههههههههه وخذلك كلام وهواش لين امي طلعت ابوي برا الغرفه ومسكتني وجالسه تترجا فيا وتقول تعوذ من ابليس هههههههههههه قلتلها هيا شفتي هذي المره عشانك وقولي لابوي بيوافق ولا اعيش حياتي وانا ابمسكه من اليد الي توجعه الوظيفه هو موظفني بالواسطه الوظيفه الي انا فيها هو معايا بالاداره وانا مدني كذا مره لمحت له اني على ايش موظف ابطل احسن وحسيته بعد ماقوله كذا يبدء يقولي ياولدي ياحبيبي ههههههههههههه والله ابوي ذا مصيبه قلك الحين طيب معاي لدرجه وربي اقول حرام والله مايستاهل اسوي بابوي كذا بس ان شاء الله خير وابشركم |
اقتباس:
هلا اخوي سمير والله رأيه بمحله الاخ ابو ناصر بس انت تعرف الكبار لامسكت عليه شي خلاص مايغيره الا لوحده وبنفس الوقت استشرت الوالده ونصحتني ماسويها والله لو ماهو براسي احافظ على نفسي ماطلبت الستر والحرام تعرف انتشر وصار سهل ايش ديتها احط جل بشعري والبس طيحني واقول انا كول واشبك على كيفي ههههههههههههه بس بيني وبينك ياخوي والله ماكلمتهم بالموضوع الا وانا بصراحه مليت الصبر وابي عيشة الاستقرار مو عشان الشي الي بيني وبينك:d لا والله بجد ابي استقرار طفشت من الشباب والطلعات والسهرات الله يوفقكم جميعا عالمرور ويسعدك ياسمير |
اقتباس:
هو مو الظاهر الا طالعه اليباسه من الجبهه الله يهديه بس شاكر لك عالمرور |
والله فعلا مشكله ...
لكن تلكم بأسلوب الجديه مع أباك .. واجلس معه جلسه جاده .. أو مالك الا رجل من برى العائله يقنعه واناعترض أباك على هذا الأمر .. قل أنت من جعلتني أسلك هذا المسلك ... |
اقتباس:
اقولك والله هواش كل يوم بسبب ذا الموضوع كل يوم اجلس مع ابوي كل ماصيده يتجول بارجاء البيت :) واقوله هااا خلنا نتوكل على الله ونروح رسمي الناس يبغو الستر مابنلقا مثلهم ويبدا صراخه انت ليش ماتصبر ويقارني بفلان وعلان وشوف ماتزوجو الا بعد ماجاتهم فلوووس طيب انا اشلي واشلهم اوووف شي يرفع الضغط والله بس ان شاء الله يلين راسه واجي ابشركم والله يعطيك العافيه وطولة العمر |
غريبه أو مره أشوف أهل مايبغو أيزوجون ولدهم
ممكن هم شايفينك موقد المسؤليه علشان كذا مايبغون يزوجونك ليما تكبر وحتى علشان ماتضلم البنت معاك.. |
اقتباس:
اما عاد يشوفو كذا وانا 23 بعز ريعان الشباب بس المشكله بابوي بالفلوس يقول راتبك بيخلص بالفواتير ههههههههههه قلتله لا اكيد بعمل حسابي واحدد ميزانيه وغير كذا الرزق من ربك ولاتنسى في حديث من ضمنه الله يتكفل بشاب يريد العفاف رد علي رد سريع الحين تطلعلي باحاديثك ووينك عن الصف الاول بالمسجد ماقولكم هذا ابوي مصيبه :) |
:)
:) :) الله يووووووووووفقك مالك الا انك تصيح عند ابوك ابي اعرس زوجوني مو عيب الولد يطلب العرس ويزن عليه البلا لا بنت تبي تعرس وش تسوي كلنا نبي استقرار بس الله يوووووووووووفق الجميع واذا ع لراتب ليش ماتشتغل شغله ثانيه؟ دوامين يمكن يقتنع ابوك |
اقتباس:
افا بنت ناس ماعاش من ينزل دمعه من عيني مالقيتي غير هالحل ههههههههه مو انا مسوي غلبه بالبيت كل يوم زان عليه بس يسمع من هنا ويخرج من هنا الله يهديه بس والله يوفقك ويسعدك يارب من جد البنت ايش تسوي هههههههههه الله يعينكم ماقدر اداوم دوامين لان دوامي 24 ساعه واريح 3 ايام فله :d يعني ابيت بالدوام ومعاي فرشتي ونوم هناك وشاكر لك عالمرور |
الله يفرجها عليك يااخوي مالك الا صلاة الليل والدعاء وربي بيفرجها عليك وخل ع لسانك دايم
اللهم اغنني بحلالك عن حرامك وبفضلك عن من سواك خطيبي زيك عمره 23 سنه وكان مافيه امل نتملك بس يقولي دايم ع لسانه هاالدعوه والحمدلله تيسرت الامور وهااللحين معد بقى ع الزواج شي خل املك باالله كبير ولاتوقف محاولات مع ابوك |
:d
اقتباس:
:d عاااادي البكي مو عيب يعني مو ابكي ابكي يعني واه واه لالا تبيكى تحيزن عند ابوك قول يبه ولله ماامزح وخلك جااااااااااااااد وحزيين:17::25: وبهالثلاث الايام الفله اشتغل شغله طلع لك الف على الاقل فيها بركه الله يوووووووووفقك وييسر امرك نصيحه من مجربه عليك بالاستغفار بنية الزواج صدقني الاستغفار اقوى سلاح لادموع ولافلوس ولا زن استمر على الاستغفار وشوف بنية الزواج وتكون متيقن ان الله سبحانه بيرزقك بالحرمه اللي تسعدك عاجلا غير اجل:) |
هو حل واحد مافيه غيره
الخميس هذا تروح عند الشيخ اللي يلقي الخطبه ليوم الجمعه وتتفق معاه على خطبه انه الآباء يساعدون عيالهم على العفاف وانه يأثم وووووووووووووو مالك الا خطيب صلاة الجمعه اذا انتو مثبتين على جامع واحد |
اقتباس:
بس ينفع كمان اقوله حاول تقنص ابوي وتطل فيه وتعطيه نظرة الويل :) الله يسعدك عالمرور عسا ابوي يحن علي بس |
اقتباس:
مافي شغله بالثلاث الايام غير فلها وبس وبيني وبينك والله العظيم اكلمه وانا مرره متنرفز يعني مو بس جاد الجديه طالعه من عيوني بس خليها على ربك والله صادقه مافي غير الاستغفار بس برضو الواحد ياخذ بالاسباب والاسباب اشوفها بيد ابوي...! والله ينور طريقك يارب |
اقتباس:
والله رجعتيلي الثقه بعد التجربه من خطيبك عسا الله يسعدك معاه يارب يوم بعد يوم |
اطبع هذا الحديث في ورقة، أو أرسله على جوال والدك:
عن أبي هريرة رضي الله عنه قال : قال رسول الله صلى الله عليه وسلم : (ثلاثة حق على الله عونهم : المكاتب يريد الأداء ، والمتزوج يريد العفاف ، والمجاهد في سبيل الله) رواه أهل السنن إلا النسائي . ومن كان الله معه ماضره أحد، كائناً من كان، وكفى بالله وكيلاً. مصيبة هذا العصر هو الزواج، أصبح الناس لا يحرصون على أبنائهم في أمر عفافهم، ومصيتنا الكبرى تلك الأعذار التي لا مبرر لها سوى اتباع الهوى. فلو كان والدك جاداً لخطب لك تلك الفتاة على الأقل! بحيث تطمئن نفسك، ثم يعينك الله في باقي أمرك. وفقك الباري وفرج الله كربتنا أجمعين. |
اقتباس:
ياشيخ وربي انك عسل على عسل الله يوفقك ويسعدك وين ماكنت هو المصيبه اقول لابوي هذا الحديث ويجي يقولي ووينك بالصف الاول بالمسجد هههههههه والله صادق مبرر من اتباع الهوى نبغا فلوس عشان نسويلك بافخم قصر ومدري ايش تعرف احلى شي عجبتني فيك ذي الجمله ((فلو كان والدك جاداً لخطب لك تلك الفتاة على الأقل! بحيث تطمئن نفسك، ثم يعينك الله في باقي أمرك.)) وربي محد فاهمني غيرك هذا الي اقوله لابوي بس نخطب رسمي عشان ارتاح اقلها اشوف البنت بالنظره الشرعيه الله يسعدك وين ماكنت يارب |
هلا ياغالي وش اخر التطورات اللي حدثت شو سويت ؟؟ وافنا بكل جديد الله يسعدكـ ويزوجكــ حفظكـــ ربي |
اقتباس:
اخر التطورات حزن علي اخوي الكبير واخذني على جنب وقلي شوف معليك تتزوج يعني تتزوج وابوي الحين همه بالفلوس انا بحاول اتفاهم معاه وابقوله اني بجمعلك كمان بس قلي اخوي ليش ماتصبر ونتزوج بسنه وحده هو لسى ماهو متزوج قلتله روح امشي هناك انا مستعجل مافيا اصبر قلي طيب على راحتك ههههههههههه ونشوف اخوي ايش بيسوي امين يارب الله يسمع منك تسلم ياغالي وعسا الله يعطيك العافيه وراحة البال |
وعليكم السلام شوف اخوي الكريم مشكلة ابوك ليست فـي رفضـه لمبدأ الزواج أو عدم رؤيته لك مؤهلاً لتحمل المسؤولية هـو يبدو أنه مجرد قلق من مسألة المال وأنك تتعب بأول حياتك الزوجيـة ، وأيضاً حاب ينبهك بشكل غير مباشر أنه مثل ما تعد العدة لأي موضوع في حياتك، فأعـد العـدة لرغبتك بالزواج ، وبإذن الله مجرد ما تبدأ مجرد بداية فقط ستجده يقف معك ويشجعك ... لذلك صارحـه بسبب رفضه إن كان رفضه يتعلق بمسألة المـال ،،،، وتـرى كـلام اخـوك الكبيـر هـو الأقـرب للصحة في تحليله لرفض ابيك وخـذ وأعـط مـعـه بهدوء واحترام، أمـا أنـهـا توصـل للهـواش بينـكم ورفـع الصوت؛ فـهـذا الشيء لن يـلبي لك مرادك.. وفـقـك الله عزوبي:22: بس:d رجل:30: |
جزاك الله الف خير اخ عزوبي
هو صحيح ماهو بالمبدء بس بالامور المترتبه عليه من فلوس قصر وا وا وا الهرجه كلها بالمال يعني يجيب الله مطر الله يسعدك وين ماكنت يارب |
رفض أبيك للزواجك:14: أعجب من العجب:11: |
| الساعة الآن 09:20 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©