|
جرحني ثم جرحته وتندمت
السلام عليكم
مساء الخير انا عندي مشكلة مع زوجي انا متزوجة من 11 شهر ماصار حمل زوجي قالي انتي عقيم ...انا انجرحت صراحة وانجرحت بقوة وصارت هالكلمة في جواي وماتروح...هو قالها بعد 5 اشهر من زواجنا... قبل ليلتين صارت بيني وبينه مشكله..السبب انا عند اهلي هذا شرط الزواج لمدة سنتين ولي جناح خاص هو احيانا(مره بالشهر مثلا) يتغدا عند ابوي في مجلس الرجال بعدها يروح لأهله مايجي ينام عندي واهله بعيدين عننا حوالي 20 كيلو متر.. سوا هالشي اكثر من مره واعديها له........علشان حياتنا مايصير فيها مشاكل... في ذيك الليله سألته ليش ماتجي قال ماله داعي ! قلت لا له داعي قال بروح لأمي قلت ما امنعك من امك ... روح لها العصر واي وقت بس الظهر تلاقيها نايمه.. قال لا بروح لأهلي.. قلت انت تروح تجلس مع الشباب صرخ وقال الشباب زوجتي علشان اجلس معهم كل ظهر انتي تتوقعي اني كل ظهر معهم!!! انتي بتمنعيني عن اهلي قلت لا ماراح امنعك عن اهلك قال الا بتمنعيني عن اهلي<<<كذب علي وعصب وصار يتمسخر بي ويتمهزابي ومصر اني بمنعه عن اهله؟ بعدها قلت له انت ظلمتني وقد ظلمتني بالعقم بس ياااارب اتكون انت العقيم مو انا .. بعدها انصدم واتأثر وقال بطلقك قلت براحتك اليوم اللي بعده تضايقت وتندمت اني دعيت عليه.. وهو انجرح .. البارح كان يبكي ويقول اخر شي اتوقعه منك تدعين علي ...اعتذرت منه وقلت له اسفه كنت في حالة غضب ومجروحة وانت قد ظلمتني واسفه..ودعيت له.........بس في حاجه انا ما ابيك مو مرتاحه معك ... قال انا احبك ما ابي اطلقك... انا جرحته وخايفه يشيلها علي رغم اني مجروحه وزواجنا كله مشاكل وهو شخص عنيد وعصبي بس انا ما ابيه لأنوه دايمن يجرحني...ويستهتر...وانا للآن عند اهلي فكيف اذا رحت معه عند اهله ساعدوني ارجوكم |
معليش سؤال !
انتي ليش عند اهلك ولمدة سنتين ؟ تكملين الدراسة يعني ؟ اتوقع كل الضغط النفسي اللي فيه بسبب كونه يعيش معك في بيت أهلك ! صعبة على الرجال حيل ! وشكله يتفشش وانتي ايضا عصبية منتي قادرة تمسكين اعصابك معه ليش؟ يا اختي يا حبيبتي .. الرجال ما يحب يحس بالاختناق ! خليه يروح يشوف اهله ويطلع مع اصحابه ان شاء الله كل يوم .. هو حاس بالضيق من بيت اهلك هذا اللي واضح ويبي يطلع اغلب وقته برا. طيب مافي مجال تستأجروا شقة صغيرونه على قدكم انتي وياه ؟ او تروحي معه بيت أهله قبل السنتين ! |
اختي الكريمة في البداية احب ان ارحب فيك في منتدانا الرائع والجميل والذي بإذن الله تعالى سوف تكتسبي منه المعرفة والخبرة والاستشارة المفيده إن شاء الله 0
اما بالنسبة لخلافك مع زوجك فانا لم افهم الموضوع جيدا هل انتي ساكنه عند اهلك منذ بداية زواجكما واذا كان كذلك فلماذا لم تذهبا في منزل خاص بكم والشي الثاني هل زوجك منذ بداية الزواج وهو بهذا الشكل بمعنى ان اخلاقه وتعامله واسلوبه معك هكذا من بداية الزواج ام انه تغير عليكي فجاءه واذا كان هذا التغير مفاجى فمن الممكن انه يمر بازمة اومشكلة او شي من هذا القبيل جعله يتغير عليكي بهذه الطريقه وانصحك اختي بالهدوء وعدم الاستعجال والتماس العذر لزوجك فالانسان معرض لكل شي من الممكن ان يكون يغير مزاجه وتفكيره ومن الافضل ان تستقلوا في منزل خاص بكم لكي تفهموا بعضكم بالشكل الصحيح وعلى فكرة كم عمرك وعمر زوجك وهل هناك فارق كبير في العمر او التعليم 0 |
اقتباس:
_شكرا على الترحيب _نعم انا ساكنة عند اهلي هذا شرط ابي لمدة سنتين _نعم زوجي من البداية وهو كذا ودايمن اقوله غير معاملتك ارجوووك تعدل وعاملني بلطف تغير بعض الشي لكن يسكت فتره ثم يرجع يجرح ويستهتر ...وانا عمري ما اخطيت عليه الا بادعاء عليه قبل ليلتين ومن عذري وانا الحين ندمانه عمري 20 وعمره 22 وتعليمنا واحد كلنا متخرجين من الثانوي ومانعني من الدراسة..وهو يبحث عن وظائف ومشكووووور |
اقتباس:
اقتباس:
ولك كل الشكر[/COLOR] |
شرط والدك غريب فعلا !
هل زوجك يقرب لك ؟ |
اقتباس:
يقرب لي من بعيد |
اختي من الممكن ان السبب في ذلك ثلاثة اشياء وهي اولا سكنكم في منزل اهلك مما جعل زوجك لايلقي لكي بالا ولايتحمل مسؤوليتك ويحس بنفسه انه لازال عزوبي
الشي الثاني صغر سنكم وتوكم في بداية الزواج واول سنة في الزواج من اصعب السنوات لانها سنة تعارف للعادات والتقاليد والاخلاق والنفسيات خاصة وانكم متباعدين نوعا ما بحكم سكنكم في منزل والدك والشي الثالث من الممكن انه متضايق نفسيا مما حصل في بداية زواجكم من ناحية العلاقة الخاصة وايضا من الممكن انه مهموم بالبحث عن وظيفة وعمل انصكي اختي بالصبر ثم الصبر يااختي فهذا زواج ويجب تحمل الطرفين لبعضهما مهما كان0 |
اقتباس:
السبب الأول اتفق فيه معك حتى من ناحيتي انا للآن اعتمد على اهلي .. السبب الثاني واتفق فيه معك السبب الثالث ..؟؟؟ مافهمت ممكن توضح .. وانا ندمانه اني جرحته ودعيت عليه شسوي ...؟ خايفه يشيل علي......ارجوك ساعدني..لأنك ماشاء الله ذو رزانة وحكمة |
الأخت لحظة ندم والم ،
اختي انا مو فاهمة شو سبب شرط الوالد ، بالعادة اي متزوجين يكون لهم بيت مستقل ، لو سمحتي وضحي ظرفكم اكثر ، وفي معرض ردك على الأخ بندر قلت (غير معاملتك ارجووك تعدل وعاملني بلطف) ، يعدل مع مين هو له زوجة ثانية ؟؟ بغض النظر عن كل هذه التفاصيل ، ارى انه شاب حساس رقيق المشاعر ويحبك مما قلته انت واعتقد ان هناك الكثير مما يكبته ويحز في نفسه ولذلك يصدر عنه ما يصدر في لحظات الضيق ، كما يبدو انك ايضا شابة رقيقة المشاعر وتحبيه وتحترميه وما صدر منك هو مجرد تفشيش في ساعة ضيق . حبيبتي .. زوجك يحتاج لتفهمك واحتواءك ولا يتأتى هذا الا بالنقاش والمصارحة بشكل ودي وبدون ان يتمترس كل منكما وراء جرح مشاعره ، في النهاية كلنا بشر وفي لحظات الضيق والعصبية يصدر منا الكثير مما قد يجرح ولا نقصده حقيقة ، حبيبتي سامحي نفسك اولا وسامحيه ، وابداي انت بجلسات الفضفضة بينك وبينه وافهمي شو مضايقه وانت كمان فهميه.. ادعو لكما بالتوفيق والهدى وهدوء السر. |
حقيقة ما ادري عن وضعك مع زوجك وسبب شروط والدك انك تعيشين معاهم
وايضاً كل ما نكتبه هنا هو مجرد توقع لنفسية زوجك والمؤثرات الجانبيه اللي تزيد الوضع سوء لكن من تجربه شخصيه زوجتي دعت علي مرتين المره الاولى اعتذرت وكنت معصبه ومشيتها لها المره الثانيه ماقبلت منها عذر ولا كلام ولا تبرير ولا انها كانت معصبه ولا شئ يبرر انك تدعين علي ادعي لي بالهدايه ادعي لي لقلبي بالرحمه ادعي اني احبك بس لا تدعين علي ولنا اسبوعين والله ما اقدر اكلمها كل ما اتذكر انها دعت علي بكت - اعتذرت - قالت بروح لاهلي اذا ماتبيني امس بس رضيت عليها وطلعنا مطعم وتعشينا بس لازم تشوف حجم المشكله انا ابي زوجه تدعي لي ماتدعي علي كل شوي على اشياء تافهه زوجك يحبك وهذا كلامك انتي وانه قالك انا احبك مابي اطلقك خلاص من هالناحيه ارتاحي الان عليك تدعين لزوجك كل ما كلمك حسسيه انك تبين له الخير وكثري من الدعوات له الله لا يحرمني منك الله يخليك لي الله يرضى عليك مثل ما انت راضي علي وبالتوفيق لكن صراحه شرط ابوك غريب هل فيه اسباب او تفسير لهالشرط |
شو الي خلا الوالد يشرط هالشرط الغريب
ليش زوجك ازا بدو تعيشي معهم ياريت توضحي النا منيح اختي ايضا صغر سنكو الو دور وسكنكو بعيد عن بعض الو دور وعدم الانجاب اله دور حليها وحدة وحدة خلصي من قصة السكن و عيشي لحالكو وبعدين اعملو تحاليل عشان تشوفو شو سبب تاخر الانجاب بس ماتتركي الوضع هيك ولازم تسكني لحالك وياريت تحكيلنا سبب شرط الوالد |
اقصد يااختي انكي رديتي عليه بنفس اسلوبه عندما دعيتي عليه بدعوة تصعب على الانسان ومن المفترض ان تكوني امتصيتي غضبه 0
|
اقتباس:
صراحة ما ادري وش السبب.........لكن اللي اعرفه ان اثنين من اعمامي يحطون شروط واحد حط شرط سنة والثاني سنتين اللي سنة بنته وزوجها اطلقو واللي سنتين استقلو ببيت قبل كمال السنتين... ومسألة اننا نستقل بيت انا صراحه اتمنى هالشي على الاقل اشعر بالمسؤلية واني متزوجة دون تقييد واعتمد عليه مو على اهلي وهو سبق وان ناقشني بالبيت قال خلينا نروح بيتك جاهز قلت لا ما اقدر وبالصراحه ابوي يقول لو رحتي قبل السنتين راح ازعل وراح تقطعين كلامي لا ماعنده زوجه ثانيه بس هو كان قاسي معي اول الزواج... ومشكوره اختي |
اقتباس:
انا ماراح ادعي عليه مره ثانيه..لأني شفت مدى تأثرة وحزنه.. بس يارب يسامحني وما يكرهني... وانت صادق ادعي له افضل...راح اعمل بنصيحتك ولك كل الشكر.. وابوي انا نفسي مو عارفه تفسير شرطه.. |
اقتباس:
شرط ابوي والله ما ادريليش؟!!...انا بنفسي مستاءه من هالشرط اما سبب تأخر الأنجاب ما اهملت هالجانب توني مسويه تحاليل واشعة والنتيجه بعد شهر ولك كل الشكر |
اقتباس:
وانا معترفه بخطئي.. ياليته يغفرها لي .......... |
اغرب شرط مر علي في حياتي
والله غريب غريب غريب والاغرب انك وافقتيه انتي وزوجك؟ وش الحكمه ؟ يا الهي على الغرابه يعني انتي وزوجك تزوجتوا ومثلا سافرتوا وبعد ما رجعتوا على طول بيت اهلك؟ وين ينام زوجك؟ طيب ما سالتي امك؟ ومانعك من الدراسه ... طيب ما استفدتي اي شي في هالفتره؟ ولسا باقي كمان سنه وشهر على هالحبسه لا يختي غلط هالشرط اعوذ بالله .. تفرقه بينك انتي وزوجك اكيد الرجال بيكون معصب وووووو ولا يصلح منك تعلقين عليه تقولين انت وين تروح وين تجي لأن اصلا مكانك غلط .. والرجال الحق مايلبد في بيت اهل زوجته زوجك ماشاء الله نفسه عزيزه وعلى صح مو عباطه لا تتوقعين يجي يقعد جنبك ماحاولتي تكلمين ابوك؟ تفهمين منه وش هالشرط؟ حاولي معاه ... ويارب يوافق وزوجك يشيلها لك معروف واذا على الدعاء عليه غلط برضو .. اذا عصبتي لا عاد تدعين عليه ابد ... قولي الله المستعان ... والا حسبي الله ونعم الوكيل لأن فعلا لا تكونين دعيتي عليه ولا شي وبرضو نفستي عن عصبيتك ... وكلمته انتي عقيم هذي عيب يقولها لك .. والومه انه قالها ... خصوصا انه وافق على اغرب شرط سمعته في حياتي انك في جهه وهو في جهه |
اقتباس:
زوجي ينام عندي...امي ماتدري بس اللي اعرفه انها تبيني عندها<<<بنتها الوحيده ابوي لا ما اقدر اكلمه اصلا قبل ما اتزوج وانخطب وهو يقول اذا تزوجتي تجلسين عندنا سنتين<<وانا معارضه بس في نفسي ما اقول له ولمى اتزوجت صار الامر صدق بس في حاجه اتوقع مجرد توقع ان الوالد شرط هالشرط بيشوف الزوج على حقيقته اذا يصرف والا لا اذا يقوم بالمسؤولية او لا ؟؟؟ مع اني ارى انوه لايمكن اعرف الرجل على حقيقته الا سكنت معه في بيته ..ولو صارلي شي اهلي موجودين... واتوقع ان هذا الشرط يمكن لأن زوجي ماله وظيفة... ولأنوه راح يكمل دراسته بمنطقة ثانيه ويسكن مع شباب وانا ابقى لحالي.... وبالنسبه للدعاء ماراح ادعي عليه مره ثانيه.... بس كيف اراضيه واطمن انوه مو شايل علي... وجزاك الله خير |
انا برايي شكلو الوالد مو هاين عليه تبعدي عنو بفكر بعاطفية بس اخرتك حتبعدي ولا حتعيشي معاه عطول؟؟
من رايي تحطو واسطة بينكو ناس كبار وثقة في العيلة يحكو مع الوالد انو هادا مابصير ومابنفع وسنة الحياة انو البنت في بيت زوجها وزي هالحكي تقنعوه خلص تروحي بيت زوجك وخدو شقة قريبة وزوريهم كتير عشان مايحس بشي ابوكي ثم اهل زوجك كيف رضيو وهوة كيف رضي فعلا شرط عجيييييييييب الاب مفروض لو بنتو تجوزت واجت تجلس فترة طويلة يستنكر ويقلها مكانك بيت زوجك وحيقلق ويفكر في شي يعني مو منيح البنت تبعد عن زوجها هلأ |
لاحظي معاي اغلب الاعضاء معلقين على مسألة سكنك عند اهلك مو على تساؤلك انك دعيتي عليه
لأن هذي اغرب شغله صراحه مرت هنا في المنتدى اعتقد فيه كذا شغله غريبه مو في موضوعك في وضعك يعني يمكن ابوك جلسك زيادة حرص عليك ... بس لو حريص فعلا ما كان يقبل بشرط زوجك انك ماتكملين دراسه ... خصوصا ان زوجك وافق على جلستك في بيت اهلك سنتين ..يعني انتي مو في بيته ونقول مسؤوله عن كل شي.. وممكن دراستك تعطلك.. يعني ياليتك استغليتي جلستك في شي يفيدك .. وزوجك هذا يمكن مايبقى لك بعيد الشر .. حالك حال هالبشر .. مابيبقى لك الا شهادتك.. كيف وافق ابوك على رجل ماعنده وظيفه ؟ الاب الحريص فعلا ما يعملها .. اجل بنته من وين تعيش؟ زوجك بيروح يكمل دراسته ... ليه ماياخذك معاه؟ ليه مثلا ما صلح سكن لكم هناك بدل ماهو مع الشباب؟ واذا على اعتذارك ... فإذا هو نابع من قلبك فعلا ... رح يدخل قلب زوجك على طول فلا تشيلين هم ونبهيه قولي لا عاد تلعب بكلمة الطلاق ابدا لايكون الشيطان بينا وفعلا يحصل اذا زعلت روح تمشى قفل بوجهي سو اللي تسويه لكن لا تقول اطلقك.. |
اقتباس:
انا افكر نروح عن اهلي ونقنع الوالد.....وشكرا على النصيحة |
اقتباس:
معك حق وانا لاحظت ان الاعضاء مركزين عن السكن عند اهلي.. اما بالنسبة لزواج ابوي لي من غير المتوظف دايمن يقول يرزقه الله ويتوظف والدراسة رافضها وراسه يابس من هالناحيه والله تعبت واناى احاول اقنعة ونبهته على كلمة الطلاق.. وشاكره لك |
يا اختي انا ما اريد احطمك او انزل من معنوياتك
اجلسي مع نفسك وشوفي وضعك راح احط نفسي في وضعك واحكم كاني انا انتي بجلس مع نفسي واتكلم معها انا تزوجت لكن ابدا ماتطورت حياتي دراستي وقفتها مكاني في بيت اهلي عكس الوضع الطبيعي وهو اني اكون في بيت زوجي او بيت اهله واعتمادي في المصروف على اهلي لا على زوجي اطفال الى الان ما حملت اجل كاني ماتزوجت وهذه الامور ولدت مشاكل بيني وبين زوجي لاااااا الان لازم افكر واخذ موقف واتكلم هذي حياتي الانسان هو يصنع حياته ووضعه خصوصا في مثل هذه المشكله الشخص يكون مخير التفتي لنفسك يا اختي لاتخلين غيرك يرسمون لك حياتك ابدئي بحل المشكله خطوه خطوه فورا راضي زوجك وابدي ندمك واوعديه انك ماتدعين عليه مره ثانيه مع اعترافك بغلطك والاعتراف بالغلط من الاخلاق النبيله وخلاص قفلي الموضوع دائما اسعي ان تخلقي جو هادي وصافي مع زوجك اثناء جلوسكم تحاوروا وخططوا لمستقبلكم في البدايه انتي لازم تملين وقت فراغك اما تكملين دراسه اما تسجلين دورات او اي شي يفيدك حرام وقتك يروح اهتمي بنفسك اقنعي ابوك او زوجك اللي رافضين قولي انا انسانه حرا يرح وقتي ساعدي زوجك وشجعيه في دراسته ووضحيله مدى اهمية ان يكون لديه راتب تصرفون منه لازم يكون له دخل يا اختي حتى لو قليل لازم تعتمدي عليه هو فاقد هالاحساس فاقد جزء كبير من القوامه صدقيني اكثر شي متعب زوجك هو جلوسه في منزل ابوك هذا سبب المشاكل ابوك لا زم تشوفين طريقه تقنعونه لازم يكون لزوجك موقف ويسكنك في المكان اللي هو يريده وتكونون مرتاحين مع بعض ولا تهملين فحوصاتك ومتابعتك للمستشفى ونصيحه احتوي زوجك وعدي كلامه اذا كان عصبي لانه مضغوط من وضعه فعلا الله ييسر اموك |
اقتباس:
الله يجزاك خير ويبارك فيك |
حبيبتي
انا قريت مشكلتك بصراحه يكفي انك عايشه ببيت اهلك وعامتا هلموضوع يزعج الزوج كثيييييييييييييييير....هو ماراح يصارحك بها الا بعد استقلالكم عن بيت ابؤك مافكرتي ليش زوجك يبعد عن البيت .... اؤ عن الجلؤس معك من وجهة نظري تلقينه ماأخذ راااحته ببيتكم ...معرؤف اي شخص ماهو ببيته ماراح يرتاح ... هو يبي يحس برجولته من ناحية صرفيته ولبسه وكلالالامه ببيته .... وانتي ماراح تأخذي راحتك بلبسك وكلامك ووو..... وحتئ لؤ انتم مستقلين بغرفه اؤ 2غرفتين هذا ماراح يعطيكم حريه زي ببيتكم.... حبيبتي اشتري حريتك وراحتك مع زوجك قبل ماتنهار حياااتك..... تقؤلي عنيد ودائما مشاااكل هو خليه يرتاح نفسيأ اؤلا ... بعدين احكمي عليه ... بعدين فاتحي زوجك من ناحية سكنكم .... قؤلي ابي بيت خاص فيني وفيك.... صدقيني مو مرتاح نفسيأ..واكيد انتي لاحظتي هالشيء. |
لي نصيحه لك
اذا باقي جرحك بكلمه من وقتها اغتنميها يعني اذا قالك كلمه جاااارحه انتي ناظري فيه وقولي الله يسامحك ماتوقعتها منك ....مشكوووور!!!!!وخلي صؤتك حزين علئ هالشيء.... وروحي عنه بغرفه او اجلسي بعيد عنه ,واكيد اذا كلمته جارحه بتنزلي كم دمعه,,,\ صدقيني 3دقليق وهو عندك لانه حس بجرحه لك وحتئ لو تقعدين ايام لاتنزلي راسك له....خليه يعرف غلطه.... هو بيجيء يعتذر ؤيسلم عليك .... وانتي الريء لك بكيفية القبؤل. اما الدعاء فحرررررام لؤ يصير شيء عليه اظنك بتنجنين عليه. الاهم لاتسكتي عن موضوع استقرارك انتي وزوجك ... نصيحه انقذي حيييااااااتك ببيت مستقل. |
الصراحة حياتكم ينقصها الكثير من الثقافة الزوجية واسس بناءها
بالنسبة للعقم كثير من الناس ما ينجبوا الابعد سنة اوسنتين واصبروا وخذو راحتكم بدون اطفال ولاتناقشيه وين رحت وين جئت وخاصة انكم فارضين عليه ان تسكنين فترة عند اهلك والحياة الزوجية تحتاج صبر وتضحية واحترام اعانكم الله وسخركما لبعض |
اقتباس:
اكيد انوه مو مرتاح ولا انا رغم حبي لأهلي.. على العموم انا كلمته بومضوع البيت وقال خلاص قلت ابي بيت بلحالي قال خلاص.. الان عندهم بيت لكن محتاج تعديلات واول مايخلص راح نروح بأذن الله.. ولك كل الشكر |
اقتباس:
اممممممممممم صراحه كثير يجرحني لدرجة اقول هذا يكرهني.... والله جد احسه يكرهني...لأنوه يجرحني وانا ما اخطيت عليه... وصراحه اعجبني قولك كثير:22: ولك كل الشكر |
اقتباس:
بالنسبة للثقافة انا دايمن اطور ذاتي للأفضل اما هو مستحيل يقرأ كتاب<<مايحب:( والعقم هو اللي اتهمني فيه مو انا بعد فتره بسيطه من زواجنا هو متعلق بالأطفال بشكل كبير..لكن اخطأ في حقي.. وماراح اناقشه حتى لو مايب يجي ماراح انا قشه وبقوله براحتك:22: والله يجزاك خير |
| الساعة الآن 06:48 AM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©