حامل وطلقني زوجي
 

بسم الله الرحمن الرحيم

مشكلتي بدأت مع زوجي من أول شهرين على زواجنا. حيث كان يتركني وحيدة ولأنه طالب معظم وقته في البيت لكن لايريدني بقربه. أول كلمة جرحني فيها لمن قال " أحس إننا زي البهايم" وذلك لمن حبيت في يوم أنه يأتيني مرة تانية. بعد الوحدة اللي كنت فيها قررت إني أترك حبوب الحمل وحملت في ولدي.
نحن متزوجين تقريبا ٤ سنوات. انفصلنا فيها مرتين , مرة عشان دراسته ومرة عندما زرت أهلي في العيد وزوجي رفض يرجعني البيت وتركني عندهم ٥ شهور عشان يفكر إذا في فايدة أرجع أو لا. بصراحة كنت أحبه موت وأطير من الفرح لما يكلمني. بس بعد ما تركني عند أهله المرة الأولى وسافر كنت أتضايق من تدخل أهله في كل صغيرة وكبيرة بخصوص طفلي الأول. وبعد فترة من التحمل اشتكيتله بالتلفون. اليوم التالي اتصل وقال انت المفروض تحمدي ربك عليهم بدل ما تشتكي منهم. وتخدميهم بدل كونك عالة عليهم. على فكرة أهله ميسورين وعندهم بدل الشغالة اتنين . أنا حاولت جهدي أني أشيل حملي عنهم لأن على قول زوجي كنت ضيفة ثقيلة. من بعدها برد قلبي عليه.

في المرة التانية أكتشفت إن زوجي أمه قالبته ضدي وإن هو مو شايف مني خير من الأساس وهي كمان ما قصرت. المشكلة إن صح ما أحبه زي الأول لكن عرفت زوجي وبدأت أتعامل معاه على أساس إن عمري ما حكون زي أهله. سبب تركه لي عند أهلي كان يقول إني مهملة في بيتي وعنايتي لولدي ومقصرة معاه. المهم مو شايف مني حسنة. جيت أدور واسطة بيني وبينه لأني مهما شرحتله إن الشي ما صار كذا وأحاول أفهمه يقول لي ما تقدري تقنعيني بعكس اللي يقولوه أهلي. وكلمت أخته الكبيرة تتوسطلنا. ما أدري أيش قالت لكن اتصل علي بعدها وقال أنا قررت أفتحلك بيت. لأن هذا اللي أبوي اشترط عليه لأنه شاف إن أهله لهم يد كبير في مشاكلنا.

بعد المرة الثانية من انفصالنا مرت الحين ٦ شهور وصار الوضع أحسن . حملت بدون إرادتي وهو كرهني من وقتها تقريبا. كل ما شاف شي ما يعجبه يقول لولدي الله يعينك على أم زي هاذي. وكان يقول أبغ منك تشيلي عني وتشاركيني. هو قصده أتصل على العمال و أهتم في فرش البيت مع إني ما عندي لا سواق ولا سيارة.

سبب طلاقه لي إن في يوم كعادتي أخدت ولدي للموعد مع الطبيب و حاولت أتصل على زوجي عشان أقله اللي صاير. لكنه كان في اجتماع. فقابلت الطبيب وقال إن ولدي عنده لحمية ولازم عملية. وقعت على الورقة وعملنا موعد للعملية. زوجي لمن عرف إني وقعت زي ما كنت أعمل زمان لمن كان مسافر ثار وقفل الخط بوجهي. لمن جاء قال لما أموت توقعي إنت. ومن كتر ما هو زعلان طل فيني وقال لاعاد توقعي على شى بدوني. أنا ما صبرت. قلت أنت شكلك ما تدري إيش تريد مني. شوية تبغاني أشاركك في المسؤلية وشوية تزعل على توقيع شيل لحمية. الإجراء بسيط وما يحتاج الزعل هادا كله. قام قال جهزي نفسك تروحي بيت أهلك. قلتله ماني رايحة بجلس في بيتي معززة مكرمة.( لأن قبلها بأسبوع كمان قال ايش رأيك تروحي عند أهلك نرتاح من بعض. و أنا ما رديت. ) المهم طولت لساني وقلتله إنت مو رجال إنت بتحاول تتهرب من المسؤلية تجاهي وتجاه اللي في بطني. قال كل اللي بهرب منه هو لسانك..

والله أول مرة أقول كلام زي هادا. لكن زوجي أحسه استفزازي وكلامه أوامر مو تفاهم. بصراحة ندمت وأرسلتله رسائل اعتذار في الجوال. لكن ما يرد عليها ولمن يجي البيت يتأخر ولا يطل في وجهي.

اليوم التاني طبعا ما يكلمني حاولت أقول له إذا ما لك نفس تتكلم معاي طيب بس حددلي وقت نتكلم فيه. لآن زوجي من النوع اللي إذا تركته يجلس بالأسابيع ما يكلمني. وبعدين يقول إنت ما همك تكلميني. المهم , رفض حتى كدة و أصريت وبدأت أمازحه قال إن ما تركتيني الحين طلقتك وأنا عاندت قام قال إنت طالق وأنا ماني مصدقة.

أبوي زعل لمن عرف إني حامل لأنه كان يستنى الوقت المناسب ويطلقني منه. و بصراحة أنا مني عارفة ايش إعمل. أقول في نفسي أحاول أراضيه بس شكله مو راح يرضى. عندي ٧ شهور على ولادتي. إذا ما رضي من هنا لوقتها فما عندي حل. ما أريد أقول لعائلتي لأني إذا رجعت له ما بيسامحوه وفي الأخير أنا الغلطانة لآني حملت منه.

أشيروا علي جزاكم الله خير

اختي الكريمة حياتكم أصلا قائمة على خطأ . هذه ليست حياة زوجية. أولا ما دخل أهلك في مسألة الإنجاب؟ ثانيا أبوك ليس له الحق في تطليقك من زوجك مثلما أنت ترفضين تدخل أهله في شؤونكما. ثم أنا أرى أن زوجك لم يخطئ في حقك كثيرا و كلامه ليس جارح يعني هو يريد نظام معين للحياة و لا يقول لك ذلك بأسلوب جارح.
قولك أنت لست رجل هذه ليست بمحلها أبدا و كانت مجانية بأتم معنى الكلمة . أنت جرحتك كلمة "نحن بهائم" رغم أنه وصف بها نفسه أيضا و لكنك لم تفكري فيما قلته أنت بكلام جارح.
لكن تطليق زوجك لك كان خطأ كبير جدا منه لأنه لم يكن مباشرة بسبب كلامك الجارح له و لكنه كان نتيجة إصرارك انت على إعادة المياه لمجاريها و هو تصرف منه غريب و ظالم.
لكن أصل المشكل هو تدخل الأهل في حياتكم من كلا الجهتين و مادام الأمر هكذا فنجاح حياتكم مستحيل.
الحل بصراحة لا أدري لأن موقف الأهل من هذا الشئ غير معروف و مسألة الطلاق صعب أن تبقى سرا بينكما.
الله ييسر أمرك

أ


أخي Tunisian

أبوي يقول إن ما دام في مشاكل بيننا لازم أعمل المستحيل كي لا أحمل لآن في كل مرة الضحايا راح يكونوا أكتر. وزي ما وضحت لآ أنا ولا زوجي كنا نريد الحمل هذا. من جهة أنا كنت أريد لكن أخاف يطلقني ومن جهة زوجي كان يقول أنا لسة بفكر في زواجنا نستمر أو لا . هو من يوم ما بدأت المشاكل عند أهله وهذة الجملة أسمعها كتير المرات كتهديد أو عشان يفكرني حتى أكون على يقظة وما أحمل.

تقول إن كلمة إنت مو رجال كانت مجانية , بصراحة أنا ما حكيت قصتي بكاملها خوفا من الإطالة لكن أحس إن لما الراجل يرجع من عمله تعبان بس ما يغنيه هدا الشي من خدمة عائلته. هو يقول لابيرجع ويرتاح ولا أحد يطلب منه شي. حتى فرش البيت يريد رميه على غيره. مشاويري أطلب من أهلي توصيلي. وفي الفترة الأخيرة يريدني أروح عند أهلي. طيب ليش؟ نعم أنا أشعر إن الرجل لما يرمي مسؤلياته العائلية على غيره مو راجل. لكن أنا ما عمري تصورت إني أقولها في وجهه.
وهو وحيد أمه وأبوه ودلالهم له زايد مع إنه في الثلاثينات من عمره. وهذه من ناحية تانية مشكلة في حد ذاتها.

أختي أسيرة زوج

أنا خائفة من إخباري لأهلي عما يجري لأن ما أريد أن يأتي والدي وياخدني من بيتي. أفضل أكون في بيتي لمحاولة الصلح بدل ما أكون عند أهلي ويقسى قلب زوجي علي أكتر. لما كنت عند أهلي المرة السابقة اضررت لإبقاء ولدي عند أهل زوجي وما كنت اشوفه إلا في الويك إند. وزوجي كان يتقل في إحضاره عندي. في البداية كنت أحسبه يتأخر لعمل وبعدين اكتشفت إنه عناد. أنا متعلقة جدا بولدي وما أستطيع تكرار تلك التجربة.

وعلى فكرة هذه الطلقة الأولى لكنه يقول إن الأمر انتهى

حسسيه بالذنب .. تزيني والبسي وانعزلي عنه ولاتكلمينه ولاتخدمينه
اذا علق .. قولي له انا مطلقه منك وبخلص عدتي وانا عندك .. واحسبي الايام والشهور بورقة معلقه .. وانتبهي تتراددي معه .. والافضل تخبري اهلك بالموضوع ...

أختي الملاك يونا

زوجي من بعد الطلاق يخرج للدوام وما يرجع البيت إلا وقت النوم. حتى ولدي ما يشوفه وإن حس عليه قام. الساندوش اللي كان ياخده معاه الصباح صار في الزبالة وانسي انه ياكل من طبخي. حتى طبخت له واتصلت عليه وقلتله إنه معزوم على العشا اتأخر و قال ماله نفس و حتى الشموع وهو داخل طفاها.

أخاف أطنشه يقوم يقول هي مبسوطة كذا. وكمان ما ودي أتعب قلبي على الفاضي.

وترى زوجي من النوع اللي ياخد فترة طويلة عشان يشتاق لي وإذا كان زعلان يعتبر من سابع المستحيلات إن يفكر فيني. يعني لبس وكشخة وتزين مو بالضرورة تجيب نتيجة وهادا مو أي زعل هادا طلاق. وأزيدك إني أفتكر في كل زواجي مرة وحدة اللي هو جاني واعتذر مني فيها. وان كان أكتر فكان في أول شهور زواجنا حيث إني نسيت إن عمره قالها.

الله يعوضك بااحسن منه ومالك منه طزفيييييييييه
حراااام كسرالخوااااااااااااااااطر
الله لايهينك

السلام عليكم

حبيبتى كان الله في عونك
اولا انا الومك انتي حبيبتي زوجك انسان تعود على الدلع وعلى ان كل ما يزعل يراضى عند اهله بس عندك لا
انتي من الاول واصلتي مسيره امه وابوه وما فرضتي اسلوب حياة المسئوليه عليه تذكريني باختي من اول حياتها مع زوجها يزعلها وتراضيه لانه وحيدامه وابوه
انتي غلطتي من ابدايه وجلستك عنده مالها معنا
اعزمي على تغيره بس مو فجاه بتد ريج
اول شي لا تقعدين عنده وهومطلقك روحي عند اهلك حاولي تكتبين له رساله قبل ماتروحين بخط يدك مضمونها انك ياستي وانه انتي تعبتي من محاولاتك باسعاده ولا تطرقين في للرساله لا للطاري الفراق والطلاق ولا انا مابيك عشان مايخذها حجه عليك وبعد لاتقولين احبك ومااقدر اعيش من دونك
لان زوجك من النوع الي مكتفي من الحب يبي شويت جد بحياته
ولاترجعين له الا اذا هو جاك واصبري اختي وتحملي بعده وزعله عشان مصلحتك انتي وعيالك
ولا تفكرين تتراجعين عن قرار تتخذينه اين كان
لن واضح ان زوجك متعود منك انك تهونين ودايم ينتظر المبادره منك ومن اهلك


الله يهديه لك

أختي أسيرة زوج

يا ريت إني خبيت عن زوجي حملي وطلقني وهو ما يدري. عشان نفسيتي بس لا تتعب. بس هو يدري من يوم ما شكيت إني حامل وأخدني على الدكتورة وأثبتت حملي. حتى سألها إذا في طريقة ننزل الجنين . هي ما قصرت وأعطته كلمتين في الصميم كان نفسي أقله ياها بس ما أقدر. وبالنسبة لاهلي وأهله أخبرتهم قبل شهر تقريبا. وعلى فكرة أخدت بنصايحكم و كلمت أهلي وأرسلت لآهله رسالة امس إن ولدهم طلقني. واتصلت علي أخته تسألني ليش. أمه ولا دقت. الله أعلم إذا بتسوي شي.

بصراحة أنا قررت ما أخلي أهلي يتدخلوا في محاولة حل المشكلة. أولا لآن زوجي ما يسمع ولا يحترم غير أهله. ولآن زوجي طبعه ما يتقبل كلام من أبوي ويطول لسانه عليه. فيخرجوا بزعل أكتر من أول. وبصراحة أبوي يقول إن الحمدلله جات من عنده وهو كان شايف هذا اليوم جاي زي الشمس بس أنا اللي كنت دايما أحاول أعيد المياه لمجاريها بس يا ريت كنت واعية أكتر وما حملت.

أوئيد قرارك انتي صح
بالنسبه لكونك حامل هو صار لا محال له هذا رزق من رب العالمين
ودام انه باقي 7 شهور مده بصراحه طويله كفيله انها تحل امور
اختي في الله التمس من كلامكي قدر محبتكي له
تقولين انكي كرهتيه
وهذا ماتوهمين نفسكي به
4 سنوات من عمرك قضيتيها معه مليئه بالتجريح والمشاكل لكنكي تحبيه
اشعر انكي لو كنتي مثل ماتقولي كرهتيه ماكان سعيتي لصلح كان قلتي مثل ماقال الوالد الله يخليه
لا اعلم بماذا انصحكي فانتي بيدك الاختيار وانتي وحدكي تعيشين الوضع
فمن كلامكي ان زوجكي مدلل وبالعامي( ولد امه )
انا اسفه على هذه الكلمه
ان كنتي تريدين نصيحتي
فهي ان تتوجهي الى الله ادعيه ان يهدي زوجك اقرأي ماتيسر من القران هالله هالله بالصدقه
فهي تدفع البلاء عندك سبعه اشهر لو سويتي كل هذا صدقيني اقل من شهر راح يكون بحضنك اذا كان فيه الصلاح ..

وووووووووبس تقبلي من مروري واسفه اذا ثقلت عليك

اتضح إن زوجي لا يريد أن يتفاهم معي إبدا إلا ووالدي موجود. يشتكي من ارتفاع صوتي لما تكلمنا وردي المستمر ومن اهمالي لحقوقه خاصة الطبخ. ما أدري يا أخوات. يعني لمن الوحدة تكون وحام وعندها غثيان فظيع برضوا تدخلوا المطبخ؟ أنا كلمت الدكتورة في الموضوع من أول زيارة بس هي كانت شاكة إذا كنت حامل وما صرفتلي الدواء حق الغثيان وطلبتلي تحليل دم لإثبات الحمل. وما بدأت أخذ الدواء إلا بعد اسبوعين تقريبا. بعد أسبوعين كمان رجع الغثيان والدواء ماله فايدة أظن جسمي تعود عليه. ومافي فترة بسيطة إلا ولدي تعب بالمرة جاله فيروس وما يرضى إلا أكون جنبه أو شايلته. وحاولت أوضح لزوجي اللي يشوف وينكر إن الموضوع مو بيدي. وبصراحة أنا ما عندي شغالة ولا أم ولا أخت تساعد. وأهل زوجي ماني على علاقة كويسة معاهم عشان أطلب منهم المساعدة. وعلى فكرة أخر مرة جاتني شغالتهم صارت من وراها مشكلة.
وترى زوجي ميسور ويقدر يجيب شغالة تساعدني بس هو يبغاني أشقى ولمن ما يشوف مني تقصير بعدين يجيب وحدة. يعني أنا لو كنت من غير حاجة كنت طلبت الشغالة؟؟

أنا أدري إن غلط أرفع صوتي بس تراني مني قاعدة أصرخ والجيران يسمعوا. بس أنا لما أتنرفز نبرة صوتي تعلى شوي عن العادي نفس الشي لما أتحمس. وأقله ما بحاول أقلل من أدبي معاك وهو إلا توطي صوتك ويبدأ يخفض من صوته بزيادة.
أحس إن بيحاول يعاقبني على شي ما أدري إيش يمكن الحمل. ومو ناوي يرجعني إلا لما يشوف طلباته متلبية وكلمته ما تناقش. أحس الحياة معاه صارت جزاء وعقاب وإن المودة والرحمة صاروا حلم بعيد المنال.

لما أحاول أفكره بالأوقات اللي تقصيري معاه كان أقل بكثير ما يتذكر. ويطلب مني في كثير من الأحيان إني أعدده أنا إيش أعمله من حقوقه لآنه هو مو شايف أي حقوق واصلتله.
قلبي مجروح وأشك إن هذه هي الغاية من الزواج.

الله يعينك ويكتب لك الخير ... انت لاتعرفين الخيره وين ممكن تكون ..؟
وواضح من كلامك ان زوجك طبعه صعب. فوكلي امرك لله و ارضي بما سيكتب لك..

نصيحة اخوية:

احفظي البقية الباقية من كرامتك, وروحي بيت أهلك معززةمكرمة,

زوجك واضح جدا (مايحبك) , ومايقدرك التقدير الكافي

رأي ابوكي صحيح (الانفصال)واقع لامحالة, ليش تأخريه,وتضيعي عمرك!!

شكلك صغيرة,والحياة قدامك, الله يعوضك احسن منه يغليكي ويقدر قيمتك

يا أخوات أنا قررت ترك البيت والسكن مع أخوي. لكن ماحقدر أروح إلا بعد ما ينقل من بيته لبيت أكبر. الله يصبرني إلين وقتها. بصراحة أنا مليت من قلة الحب والإحترام المتبادل. ومن التهديد المستمر بالطلاق لأتفه الأسباب. أنا امرأة تحتاج للعطف والحنان من زوجي لكنه عندما أقول هذا الكلام له يقول بما معناه طز في احتياجاتك. أحس إني تزوجت صنم وهو إنه ماخد عبدة. نعم مازلت أحب زوجي لكن حياتي كلها منغصات وآلام.
إن وجدته اعتذر واشتاق يمكن أفكر أرجع. لكن الإستمرار في هذا الوضع مستحيل. أنا أفضل زوجي على كل رجل إن اهتم بي وعاملني بحنية ورفق. وأفضل تركه في مثل هذه الأحوال.

سؤالي الأن هو التالي: هل أخبر زوجي برحيلي الأن أم أنتظر إلى أن يأتي ذلك الوقت؟ مع العلم أن سبب انتقال أخي من شقته هو من أجلي لأنه ليس لديه مكان لي في بيته الحالي. وأما الوالد فمتزوج من امراة قومت الدنيا لما عرفت بطلاقي لأنها لا تريد أن أسكن معهم. لذلك كنت أنوي البقاء عند زوجي إلى انتهاء العدة.
أريد رأي كل من قرأ هذه الأسطر لأني فعلا أخاف إني ما أتصرف صح.

بصراحة نفسي أكون محترمة من زوجي. لكن هو معطيني لا احترام ولا حتى كلمة في مواضيع النساء. ومهما بذلت لسة مقصرة في عينه. أنا طبعا ما أمدح في نفسي فوالله أنا شايفة عيوبي من قبل لا يتكلم زوجي. لكن أنا مهما مشيتله من عيوب وتجاهلتها أجد عيوبي منغصة عيشة زوجي ويرددها أمام أهلي وأهله.

حيرانة لآني لسة أحبه وأكره اللي عمله الفراق فيني وولدي لما كنت عند أهلي. ولدي اللي كان عمره وقتها سنتين ونصف تقريبا لمن شافنا هدينا وقدرنا نجلس جنب بعض لأول مرة والله ما أكدب إنه كان يمسد على راسي و على راس أبوه.

بعد ما سكنت معاه شفته راق أول شهر وبعدين من تاني شهر بدأت المشاكل من جديد والتهديد بالطلاق كل ماله يزيد. يعني في الأسبوعين أسمعها مرة.
الوالد يقول لوطلعتي من البيت وسكنت مع أخوك فلا تفكري ترجعيله لآن زوجك طبعه كدا وما راح يتغير. أنا أدري إن زوجي مخه حجر بس ما كان ودي أقفل باب العودة من قبل لا أخرج. أنا كنت أبغ أرجع بشروطي يا إما يتقبلها ونرجع لبعض أو يعاند وبالتالي أتيقن إن الراجل ما منه فايدة.

أنا أدري إن موضوعي صعب ويمكن في نقاط مجهولة لكني فعلا بحاجة لردود القراء سواء مع أو ضد. أنا عمري ٢٧ وزوجي 30

صح إنه مافي فرق كبير بالعمر لكن زوجي جاد لايحب المزاح وبيتوتي وانشغاله في عمله ٢٤ ساعة. حتى بالبيت. وأنا عارفة إن حتى كاسة الشاي يفضل يشربها وهو في مكتبه أمام شاشة الكمبيوتر.

نفسي كان مرة نفتح موضوع نتكلم فيه بدون ما يفرض رأيه ويتقبل إن حتى في الدين والسياسة والعالم من حولنا في أكتر من رأي وليس الذي اقتنع به هو فقط. ولأني اجتماعية أموت لو أجلس بدون ما أتكلم مع أحد أقوم أدخل عليه أقله اللي عندي وأخرج. يمكن عنده تعليق أو سؤال ويمكن لا . والمصيبة إنه مع كدا يكره يشوفني أتكلم مع صديقاتي. ويسأل إنت اتصلت أو هي؟ ولا يقول قومي اهتمي بولدك وبيتك.

يمكن تقولوا إنه بخيل لكنه مجرد أناني. يعني ما يبخل لما يتكلم بالساعة والأتنين لكن لا يشوفني أنا اللي بتكلم. من الأشياء اللي كانت تاكل فيني وأنا عند أهلي إن بعد ما اتصالحنا واسنيت يفتحلي البيت كنت أتصل أقله إني مشتاقتله. إذا ماله نفس يتكلم معاي ما يقول أكلمك بعدين ولامزاجي مو رايق ولا أكلمك في الليل. كان يقول إيش تبغي؟ وأرد ولا شي بس مشتاقة. يقول المكالمة بفلوس ويقفل في وجهي. وبعدين لمن أزعل يقول ما كان لي نفس أتكلم. وانا نفسي أفهم كم سنة لازم أصبر عشان النفس تجيه؟

مع كدة أنا شفت منه الطيب لكن أظنه ضاع في طريق العودة من السفر لأنتهاء دراسته. كما ضاع حنانه علي وحبه لي. فهو يعترف أنه لايحبني مثل السابق وكلمة أحبك ما تخرج منه ولو طلبتها طلب. ولما لأقله إني أحبه يرد و إيش جاييني من حبك؟؟؟

لاتطلعي من بيتك وخليكي ساكته فومي بواجباتك

كثري استغفار وصلاة والصلاة على الرسول

ربي قادر انه يلين قلبة

غيري من طباعك لانه باين انه مايحب طبعك

اصبري مع الدعاء ربي يفرجها عليك

أختي القانتة

جزاك الله خير على ردك

أنا بدأت أضغط على نفسي وأطبخ. لكن الغثيان عندي زايد والله يكرمك إذا حاولت اغصب نفسي على الأكل أجري عالحمام. يعني أنا الحين صرت محرومة وهو لا . ومع كدا ياريت بيجي البيت عشان ياكل!!!

أنا معك إن زوجي ما يحب طبعي. ولا يوجد على ظهر الأرض إنسان كامل لا رجل ولا امرأة. لكن هو قبل الخطبة كان طلبه إن أهله يدوروله على وحدة أمها أجنبية. ولمن خطبني قال إن السبب كان بحكم غربته وإنه ما كان يعتقد إنه راح يتوافق مع امرأة قبلية أو من اهل البلد. وأنا كمان لم أرض بالزوج القبيلي لأني عارفة إني ما أقدر على طباعهم. وزوجي ما حد ضربه على يده يتزوجني.
و بعدين يعني اللي يطلب وحدة أمها أجنبية ما يتوقع إن هذه الزوجة حتكون مو بس وجه جميل بس عندها موروث أجنبي يؤثر على شخصيتها؟؟
أنا تغيرت كثير من أجل زوجي من يوم ما تزوجنا للحين من أجل حبي له. لكن ما أرضى إنه يحاول يمحي شخصيتي من الوجود. وكمان ما أرضى يفرض رأيه الخاطئ علي. وأحاول أجعله ينظر للمواضيع هذي من منظوري وإن ما اقتنع أحاول أبحث عن برهان يثبت ما أقول. وطبعا أتفادى صغائر الأمور التي ما منها طائل. المواضيع اللي أتكلم عنها هي اللي بسببها يضع سلامة قراراتي موضع الشك والإتهام.