هل خطيبي بخيل
 

السلام عليكم أخواتي اخواني
هي اول مشاركة لي وحبيت اطرح مشكلة قاقلقتني
انا بنت مخطوبة ومكتوب كتابي وخطيبي شب اكتر من رائع وبنحب بعض بجنون وبيعاملني احسن معاملة وانا كمان حتى ما في بينا اي مشاكل والحمد لله وزواجنا قريب
بس عندي مشكلة احساسي دايما انو خطيبي بخيل علي انا تحديدا يعني هو على نفسه كريم بيلبس وبيشتري وعلى اهله كريم كتير كتير وعلى اهلي كمان كريم بس لما انا اطلب منه يجيب شي لاهلي مثلا بمناسبة معينة طبعا ما بتقل عليه ابدا يعني للضرورة بس
هو عايش ببلد تانية غير يلي انا فيها وبيجي لعندي كل شهر ونص تقريبا ما بجيب معه شي مرة انا طلبت منه يجيبلي شوكولا لعوده يجبلي ما جاب للسفرة يلي بعدها
ولا مرة جبلي هدية بس مرة وحدة كنا ماشيين بالطريق وشفنا بلوزة حلوة اشترالي ياها
انا ما بهمني شي لو جبلي وردة بطير عقلي بس ما حسه بخيل انا بكره البخيل كره العمى
مرة نزلته معي على السوق لاختبره ما رضي يدخل السوق حتى بكيت بالطريق وما اهتم صالحني بعدين
حاولت بطرق غير مباشرة لمحله متل اني امدح كرم اشخاص بيعرفهن قدامه او اني اشتريله هدايا وكتير جبتله وما في فايدة حتى صارحته ووعدني انو يصير يهتم ويتغير لاني كنت فعلا ناوية نترك مع اني بموت فيه بس ما بتحمل بعد الزواج يضل بخيل بهاد الشكل
طبعا نزل اجازة تانية مو جايبلي معه غير دبدوب بحجم كف الايد اضطريت اني انا اشتري هدايا لنفسي وقول للعالم انها منه وخبرته كمان اني عملت هيك بس قلتله لانو عجبوني وبعد ما اشتريهتن حبيت قول انو منك
مر علينا مناسبات كتير مع بعض ما بيهديني فيها شي مع العلم انو وقت نطلع مع بعض ما بيبخل علي بالمشاوير والبسط هو بتكون اجازته كم يوم وبنبقى فيهن مع بعض
كل اهلي وصحباتي انتبهو لهي القصة انو ولا هدية ولا شي
انا ما بهمني القيمة المادية للهدية بس ما بقدر عيش مع رجل بخيل مع انو اوضاعه المادية جيدة
شو اعمل اتركه وانا كتير بحبه احسن ما اطلق بعدين وهو منيح بكل شي الا بهي القصة
بدي رايكم قبل ما اخد قرار

يمكن
 

شكرا كتير لرد أماني طفلة
ويمكن معك حق بس ما اظن انو هو ما بينتبه لقصة الهدية يعني مثلا بيكون بالسوق وبيتصل علي وبيحكيلي استحليتلك هالفستان ولا هالاكسسوار او اي شي وبيحكيلي رح جبلك ياه بيجي بعدين مو جايبه
ودايما بيحكيلي انو بده يخلي صحباتي كلهن يغارو مني على الشغلات المميزة يلي رح يعملي ياها وكمان ما بيعمل شي وكان عنده الف فرصة ليعملي شي مميز يفرحني فيه حتى عيد ميلادي ما هداني فيه وردة ولا بعيد الفطر ولا بمناسبة
مع انه خطيبي اوضاعه المادية جيدة جدا وهي الشغلات بسيطة ومو من طبعه الكذب ابدا وبحياته مع كذب علي الا بهي القصص وهاد يلي بزعلني منه

حبيبتي

كيف حالته المادية

انا بقيت مكتوب كتابي سنتين ما اذكر زوجي جابلي فيها هدية غير يمكن مرتين او ثلاثة

بس ابدا ما كان عن بخل

كانت حالته المادية ضعيفة شوي وكان ما ينتبه انه لازم يجبلي هدية

بس بعد ماتزوجت تفاجأت بكرمه الزايد ععن الحدود حتى لدرجة اني احيانا اعصب عليه لما يجبلي شي ما بريد اتقل عليه

يعني ما تحكي عليه انو بخيل بمجرد ما بيجيب هديه

حاولي تفهمي منه بطريقة غير مباشرة هل المانع حالته المادية او ما بينتبه لهالنقطة

وع العموم اخلاقه ودينه اهم من الهديه ومن الامور الظاهرية

ربي يسعدك ويوفقك وييسر امركم يارب

شكرا كتير لمروركم أختي المحبة للاستغفار لا تنسيني دايما من صالح دعواتك
واختي بنبونتة هو الحمد لله حالته المادية جيدة جدا
واخواتي المهمومة وقسورة قسورة وانسى كل الناس ردودكم ريحتني كتير ان شاء الله انا كون غلطانة ومكبرة الموضوع على الفاضي

ماهو تعريف البخيل وماهي المقاييس
حت لا نتهم الاخرين بما ليس فيهم

حقيقة لا ادري ، أأصدقك القول ام احاول ارضائك برد جميل ؟
عموما للاسف الشديد خطيبك بخيل ، و هذا امر لا شك فيه مع توافر ظروفه المادية الجيدة .
عموما وازني بين عيوبه و مميزاته و احكمي بشكل نهائي فهذه حياتك .

شكرا لردود الجميع
أخي good man واختي علياء الرياض شكرا لمروركم
وبحب خبر الجميع انو خطيبي انسان رائع بكل المقاييس مو مبالغة ولا من مبدأ عين المحب عن كل العيوب كليلة ابدا مو هيك وكل يلي بيعرفوني بيحسدوني على ادبه واخلاقه وثقافته واخلاصه والتزامه وكل صفاته دون استثناء هو مو مقصر معي بالواجبات اطلاقا من المهر والشبكة والمشاوير وحتى السفريات يعني هو بيتحمل مشاق السفر كل شهر ونص تقريبا
بس عنده هي المشكلة يلي خبرتكن ياها انا ما عندي مشكلة لو ما بده يجبلي لانو مو متعود او ما بيلاقي ما في داعي او ما معه فلوس انا بس خوفي يكون بخيل وانا ما فيي عيش مع بخيل
هي كل يلي بيخوفني

حبيبتي انا بتفهم خوفك لأنو انا متلك بخاف من البخل ومابقدر اتحمل الرجل البخيل أبداً

وخطيبك مافينا نعتبرو بخيل- حسب كلامك عنو- فينا نقول ياستي انو عندو عيب انو مابيهتم بموضوع الهدايا

لأي سبب كان وممكن مثل ماقالو الأخوان يكون هالموضوع لسبب معين ويزول بعد الزواج بس بالمقابل عندو

كمية مزايا انتي بنفسك قلتي انك تنحسدي عليها

بيحسدوني على ادبه واخلاقه وثقافته واخلاصه والتزامه وكل صفاته دون استثناء هو مو مقصر معي بالواجبات اطلاقا من المهر والشبكة والمشاوير وحتى السفريات يعني هو بيتحمل مشاق السفر كل شهر ونص تقريبا


وفووق كل هااااد بتحبيه كتييييير وبيحبك اكتر

اتوكلي على الله ولا تخافي من شي حتى لو ضل على حالو بعد الزواج ذكري حالك بالصفات الي حلوه فيه واعتبريه هو هديتك الكبيره :25: ... شو بدك بالهدايا التانيه :)

تسلمو أخواتي على ردودكم
كلامكم مقنع
أختي (عمري كله) أنا صار معي كمان متلك انو اختي خطيبها غرقها هدايا انا والله مو على قيمة الهدية بس يعني بحب انو يحسسني بحبه وكرمه علي خصوصي انو خطيبي حالته المادية احسن بكتير من خطيب اختي يلي ما خلا شي الا وجابه
بس الشهادة لله خطيبي مو مقصر بغير شغلات ابدا وبدو يرضيني بأي شكل يعني الحمد لله
الله يوفقك كل اخواني واخواتي بالمنتدى ويرزقهم الذرية الصالحة

الهدية رمز ولا تقدر بقيمتها

ولكن ممكن انك احيانا تلمحي له ان الهدية معنوية والناس تتحاب بتبادل الهدايا لكن بدون مبالغة ولا اسراف