|
محتاره مع أمي ورفضها الغير مبرر للمتقدم لخطبتي (تم الرفض)
السلام عليكم ورحمة الله وبركاته
راااح اقولكم مشكلتي اللي مالها حل وربي تعبت عشان كذا جيت ابي مساعدتكم انا عمري 26 سنه مشكلتي مع امي مو راضيه تزوجنا تقدمو لنا كثيررررر وكل مرره تررفض بدون سبب تقول مايعجبوني او اي شي ثاني ي اختي عمرها 30 تقدم لها يمكن 10 وكلهم رفضتهم وابووي ماعنده مانع بس يقول مااقدر اسوي شي ايش اسوي امكم رافضه كيف ازوجكم غصب عنها المهم اختي فقدت الامل وشالت فكرة الزواج من راسها ووكلت امرها لله وانا الحين مثل حالتها كثير خطبوني المشكله كل اللي يجو يخطبونا مافيهم عيوب والكل مواافق بس امي هي المشكله وامي عندها الضغط واحيان تتعب عشان كذا نحاول مانزعلها عشان ماتموت بسببنا بس ايش نسووي لمتى نصبر اعمارنا راحت واحنا ننتظر رضاها وربي كل اللي يشوفونا يستغربو ليه احنا ماتزوجنا للحين كل مااحد قابلني يقول معقوله انتي بجمالك ولسى مو مخطوبه احنا مو ناقصنا شي ليه مانكون مثل باقي البنات تخيلو كل اللي خطبو عندنا الحين متزوجين وعندهم عيال لما اشوف زوجاتهم مستانسين اقول في نفسي المفروض احنا مكانهم انقهرررررررر حيل انا ادرس بالجامعه قبل كنت مااكلم شباب ولا اعررف طلعات الحين صرررت اسوي كل شي من القهر اللي فيني وادري انه غلط بس اسووويه دايما اتمنى اتزوج عشان ابعد عن الحراام ابي ارتااح واترك الغلط بس امي واقفه بطريقي اخر شي صاحبتي خطبتني لاخوها وتم الموضوع واهلي سئلو عن الولد وطلع تماام واليوم جو يخطبو رسمي واقنعنا امي بعد محاولات وطلعت وقابلتهم بس كانت معصبه بس الله ستر وعدا اليوم على خير واتفقت ام الولد مع امي على اساس يجو الاسبوع الجاي ويحددو كل شي المهم بعد ماراحو امي جلست تبكي وتقوول ليه تتزوجي غصب عني وجلست تدعي علي والحين تعباانه وتبكي وشكلها بتخرب السالفه اخواتي يقولو اتصلي عالبنت وتعذري وقولي مافي نصيب اختصري الموضوع من البداايه لان امي راح تسووي مشاكل انا محتااره ايش اسووووي مع امي وربي قهررر ارفضه بدون سبب والمشكله سئلنا عنه ومفتشله من اهله اللي جونا اليوم ومن صاحبتي قولولي ايش اسوووووووووووووووووووووي ؟؟؟؟؟؟؟؟ |
اهلا اختي انا قريت موضوعك وحبيت اكتبلك يا اختي ولله امر محير يمكن تكون امك عندها عقدة او شئ لما كانت صغيرة وزوجوها خصب عنها او شئ تاني انتو لازم تقنعوها وتوقفها في امر الواقع وتقولي ليها انا راح اتوزوجو وادا ماوفقتي راح انتحر او شئ من هدا القبيل يمكن هيك تتراجع عن الفكرة وتخاف عليكي تسوي في نفسك شئ واول واحد لازم يكون موافق هو ابوكي امك حاورها بطريقة لابقة وان شاء لله يكتب الك الي فيه الخير وكمان استخري وربنا ما راح يسيبك يمكن الي كانو يخطبوكي مش من نصيبك وبتيجي امك هي سبب ربنا معاكي اختي توكلي بس على لله امرك تقبلي مروري
|
إذا رفضك للعريس بيخليك تمشي في طريق الغلط
فأنا أشوف إنك تقبلي بالعريس و ما راح يصير شئ في أمك ، إللي ربي كاتبه بيصير أمك خايفة عليكم بزيادة و ما يصير اللي بتعمله |
ذنبك في رقبتها والله شي يقهر لو في سبب معليش لكن بدون سبب قهر والله
الله يسهل اموركم يارب |
لابد ان تتكلمي مع الوالد
امك لايجوز لها منعكم من الزواج يجب ان تكلمي الوالد او توصي احد يكلمه بأن يكلم امك ويفهمها واذا مارضيت يجبرها ولاتخافي يالغاليه مافي أحد بيموت الا بيومه المكتوب له ولازم تتركي طريق الخطأ اللي بيأثر على سمعتك لازم تكون نيتك نظيفة وتبتعدي عن كل مايغضب الله |
مافي شي ذنبه برقبتها حبيبتي هذا طريق اذا سلكتيه خلاص يعني راح تعودي نفسك على الحرام عفي نفسك عشان ربي يعفك وحرام ليش امكن كذا يعني انتي واختك اكبار وراشدين اوقفو في وجها وفهموها بهودوء انكم خلاص جا الوقت اللي تبون تنسترون وتبنون اسره اذا ابوكم ما نفع معاه دخلو احد من عيلت امك خالك واخالتك او احد كبير بس حبيبتي لاتقولين من القهر اللي فيني من ترك شيئ لله عوضه الله خيره منه..
|
لاحول ولاقوة الابالله
والله غريبه أمك الله يهديها ويصلحها عليك بالدعاء لله وأكثري من الأستغفار بنية التوفيق الله يوفقك |
مشكووورين عالردود
بس امي ماينفع معاها دخلت كل العائله على اساس يقنعوهاا بس مو رااضيه وتقول اذا بتتزوجي انا متبريه منك وماراح احضرر زوااجك انا اخاف من الدعاااء بالله كيف اتوفق بزواااجي وهي تدعي علي آه بس |
شوفي يا أختي .. أمك يبدو لي تعاني من شيء نفسي..تخاف تبعدون عنها .. تتخيل إنكم بتتخلون عنها
وأنتي لازم ما تضيعين عمرك علشان أفكار أمك الغريبة بصراحة ! لازم تتخذين خطوة إيجابية وبكل ثقة، هذا حقك الشرعي في الحياة، مو من حقها أبدًا تمنعكم من الحياة زي باقي البنات بكره - لا قدّر الله - تتوفى وتبقون إنتوا بدون لا أولاد ولا عائلة .. حرااااااااام والله !!! أنا أنصحك ما تتراجعين عن موقفك أبدًا، وتقولين لأمك إنك موافقة وانك استخرتي ومرتااااحة، وأصررري على موقفك لأنه أبدًا ما يصير تمنعك عن الزواج !!! وهي ما لها أي منفعة .. بصراحة أنانية مفرطة منها الله يسامحها واعذريني يعني على صراحتي ! إذا كلمتيها ولا نفع كلامك معها...كلمي أبوك ! قوليله إنك موافقةـ وإنك خايفة يصير مصيرك نفس مصير اختك وأمك مصيرها راضية ومسلمة بالأمر الواقع أما إنك تنحرفين وتعصين ربك علشان حرمانك من الزواج، وبحجة إنك تبين ترضين امك، فهذا كلام غير منطقي !!! لا طاعة لمخلوق في معصية الخالق...وفي حالتك أصبح الزواج ضرورة .. نظرًا لحاجتك الماسة لزوج يحتضنك فتوكلي على ربك وألحي بالدعااااااء ... وكلمي الوالد..كلمي اخوانك ...لا تستكتين عن حقك لأنك بعدين بتندمين لما تشوفين نفسك صرتي في مصف العوانس - لا سمح الله - وأرجع أكرر أمك مالها أي حق لا شرعًا ولا عرفًا إنها تمنعك من الزواج " حق البنت الطبيعي " وطمنينا عليك .. |
اناا ماراح ارفض
بس اخااف يصير فيها شي او تمووت بسببي والكل يجلس يلومني |
طيب بسألك : هل أنتي مرتاحة للي خاطبك ؟
استخرتي وحسيتي نفسك مرتاحة ؟ إذا ايه ، فمالها حق ( شرعي ) إنها تمنعك، والرسول صلى الله عليه وسلم قال فيما معنى كلامه إن من يمنع بناته من الزواج بغير عذر، فإنه يشرب من حيضهن يوم القيامة" الحديث يدل دلالة صريحة، على إنك تمتلكين الحق الكامل في الزواج من غير رضاها ! والدعاء على قدر المظالم، انتي ما ظلمتيها ولا سلبتيها حق من حقوقها إطلاقًا !!! فليش تدعي وليش تتبرأ منك وأنتي تطلبين الستر والزواج الحلال ؟؟؟ يعني يرضيها بنتها تدوّر ع الحرام والحلال موجود .. حسبي الله ونعم الوكيل أسأل الله أنه يوفقك ويوفق أختك مع أزواج صالحين يسترونكم ويرزقكم الذرية الصالحة معقولة فيه أم تمنع ضناها من السعادة !!!! أختي أنا قلت لك رايي بكل صراحة...واللي أعرفه عن الشرع بحكم دراستي في تخصص إسلامي إن الأم ما يحق لها إطلاقًا تمنع بنتها من الزواج وفي حالتك يصبح الأمر أشد وأشد..فأنتي محتاجة وبشدة إلى زوج يصونك ومن ناحية خوفك من عدم التوفيق بسبب دعاءها ... فلا تشيلين هم أبدًا لأنك ما ظلمتيها ولا خذيتي حق من حقوقها ولا عقيتيها لأنك بس تزوجتي !! أنتي أخذتي حق من حقوقك وهو الزواج والإستقرار ادعي الله كثيييير وتوسلي إليه,..وحاولي إقناع أمك بالحسنى .. لكن إذا كنتي مرتاحة للزوج..فتوكلي على الله وأصري على موقفك، لأنه وكما ذكرتي أمك ترفض أي شخص..وسترفض كل من يتقدم غيره ولا حول ولا قوة إلا بالله !! |
انا استخرررت ومرتاااحه كثير
|
^
^ أجل توكلي على ربك وقولي للجميع إنك موافقة :) أسأل الله إنه يحنّن قلب أمك عليك : ) |
ان شاءالله تقتنع في الايام الجايه
بس اذا ساءت حالتها ومرضت ودخلت المستشفى بضطر اني ارفض وانهي الموضووع |
اولاً أمك مع كل أحترامي لها .. مالها ولاية شرعية عليكِ
أبوكِ موجود مو من حقها شرعاً تمنعك بس الظاهر حتى أبوكِ ما يقدر عليها شوفي خذي هالحكمة ( من له حيلة فليحتال ) اتفقوا مع أهل الخطيب بدون ما تدري امك .. في بيت خالك أو عمك او اي مكان وإذا تم كل شي وملكتوا عطوها خبر وحطوها تحت الأمر الواقع ولو صار فيها شيء اهي المسؤولة مش انتوا اهي الي حدتكم على هالتصرف |
إذا كنتي مرتاحه للخاطب لا ترفضين بسبب أمك هذا حقك الشرعي وستر لك
وماحد ميت قبل يومه ويكون بعلمك لو كان أبوك اللي رافض يزوجك تسحب الولايه منه فما بالك بأمك وهي ليس لها ولايه عليك توكلي على الله واستري نفسك وزعل أمك بيزول بيوم من الأيام الله يوفقك ويرزقك الذريه الصالحه |
ها أختي طمنينا وش صار معك ؟
>>> مره بالي مشغول عليك :) |
أخـتـي الكـريـــمـة استغـرب هـذا الخـلـط بين مفـهـوم الـبـر بأمـك وطاعـتـها والخـوف من دعاءها.... وبين حقك الذي تعضلك عنه.....!!! مع ان ليس لها حـق بالدعاء عليك فأنت المظلومة وأخـواتـك .... فلما الخـوف وانت صاحبة الحـق وأبوك معـك واهلك بيتك وأقـاربـك كلهم معـك ... فاستغلي هذه الفـرصـة واقبـلـي وأخـواتك بمن ترضون دينه وخلقه... ولا عليك من أمـك ،،،، يا أختي ما تلاحظين انه يجوز شرعا ان يكون القاضي ولي امر الفتاة بدل اهلها إن كانوا مـمـن يـرفـضـون تزويجها وعضلـها.... فما بالك بشخص واحد يرفـض تزويجك وأخـواتك ،،،،مقابل العدد الكبير من اهـلك وعائلتك ممن يقفون بجانـبـك... فالوضـع لصالحـك.... لذلك أمـر امك اراه سـهـل ... لكن انت مصعبة الامـور ومعك اخـواتـك.... روحي لها وكلميها وقـولي وش العـرس اللي لي وأخـواتي، وودك تحـضـريــه...؟!!! وهـل فيه أحد متقدم لاخـواتي وتنتظرينـه وضامنـتـه بدينه وخلقه ....؟؟ وإذا ماطلت بالكلام عطـيـهـا كلمـة واضحـة... وإن خـوفـتـكم بالدعـاء؛ فقـولـي لـهـا الله عز وجل يتقبل دعوة المظلوم وأنت بعـمـلك في وضـع الظالـم ،،، ولم نفـعـل ما يـغـضـب ربنا ... بل قولي لها ان من يرفض الخاطب ذا الدين والخلق قـد يعـاقـبـه الله...... وشدي عليها بالـكـلام أنت واخـواتــك... وقريباتك وافعـلوا مثل ما اقترحت الاخت باريسا ؛ ضعـوهـا امام الأمـر الواقــع وسترضـى بإذن الله.... و أخشى ان يـأتـي يـوم تصبـحـن انتن من تدعـون عليها بسبب ما اقترفـه بحـقـكـن... اعانك الله وهـدى امـك ورزقك واخـواتك الأزواج الصالحـيـن والذريـة الصـالحـة عزوبي:21: بس:d رجل:30: |
اقتباس:
عادي ماصار شي احنا مشينا الموضوع رغم انها رافضه يعني ان شاء الله راح يتم الموضوع الحين مو مشكله المشكله قرب الزواج اخاف تسوي مشاكل او ماتجي الزواج او تمرض اي شي متوقع |
888888
مبارك مقدما يا عروسه مو لازم تصلحون حفلة كبيرة دام ظروفكم كذا والله يرقق قلبها عليك وتحس بغلطها ياااااااارب أهم شيء إن الموضوع تم |
الله يوفقك ويسهل امرك
بصراحة اول مرة اسمع بمثل ذلك أعانك الله وفرج همك |
اقتباس:
الحمد لله والله مرررره فرحت :17: إن شاء الله يتمّ .. ولا تمرض ولا شيء....>>> للآن مو مستوعبة إنها تمرض لفرح بنتها /: ربي يسخرها لك يااااااااارب،وتكونين فاتحة خير على خواتك الباقيات ومهما صار .. لا تحسين إنك مخطئة أبدًا ^_^ لأن هذا هو حقك الشرعي : ) ربي يحميك ~ |
اختي اسأل الله العظيم ان ييسر امرك ويفرج همك وأن يزوجك انت وأخواتك ممن يسعدكم في الدنيا والآخرة توكلي على الله وكملي الامور ولا توقفي اي شيء عشان امك ابدا ابدا وان مرضت فهذا قدر الله لن تردوه وان ماتت فهو ايضا قدر الله اما تموتي انتي واخواتك وينقطع النسل من افراد المسلمين فهذا اشد من الاول المهم حاولي تراضينها مهما كان وماتزعلينها بشي الا هذا الامر كمليه ولا توقفي ابدا وتكلمي بأدب وعارضي بأدب وكل شيء بأدب واذا زعلت فأنت فعلت ماعليك من البر والله يقول (( لا يكلف الله نفسا الا وسعها )) والنبي ـ صلى الله عليه وسلم ـ* يقول : (( اذا امرتكم بالامر فأتوا منه ماستطعتم )) فإرضاؤها والحالة هذه فوق المستطاع وانتبهي من الي تسويه من المكالمات والله قد يعاقبك في الدنيا بعدم التوفيق بالزواج وانا مقدر وضعك ولكن ماهو عذر ابدا انتبهي اخيتي اسأل الله لك التوفيق طمنينا عليكي والله شايلين همك |
لا تعتذرين ولا شي
ادعي ربك فوضي امرك لله وادعي ان الله يغير امك |
حبيبتي أمك تغار عليكن و لا تريد أن تفارقوهن و لكن بصورة مرضية
اعرف الكثير مثل حالتها و لكن عليك بإقناع الولد و الضغط على أمك و حتى لو أعترضت و قالت اتبرى منك أو ما شابه فلا تخافي كل هذا تهديد فقط و لا تخافي من دعائها لإانت على حق و هذا هي سنة الله و عليك شرح الأمر لأسرة العريس لكي يكون متفهم لأي مشكلات من طرفها و قبل كل شئ عليك بالدعاء و الاستغفار و كذلك تحدثي معها و قولي لها ألا تريدين أن تريني سعيدة و لا تخافي فلن أبعد نك أبدا فأنت أغلى شئ في حياتي و هكذا و نصيحتي الزمي الاستغفار ف"من لزم الاستغفار جعل الله له من كل هم فرجا و من كل ضيق مخرجا و رزقه من حيث لا يحتسب" الله يسرلك الخير:) |
آه بس انا كنت متفائله وفرحاانه اني بتزوج بس ايش نسوووي
امي رافضه وقالت اذا جو البيت راح اطردهم واذا تزوجتي راح اجي الزواج واخرربه وانا صراحه مابي مشاكل مع الناس مابي اتفشل وهما اذا شافو امي كذا ماراح يوافقو يزوجوني لولدهم وابوي يقول ارفضي خايف على امي تجيها جلطه يعني كل شي ضدي حاولت امشي الموضوع بس تعقد زياده في النهايه رحت وكلمت صاحبتي وقلتلها انسي الموضوع ومالكم نصيب وانهيت السالفه الله يصبرنا بس المهم اشكر كل اللي ساعدوني وردو علي واللي تفاعلو معااي خاااصة Cry.. مع السلااامه |
لا إله إلّا الله ..
وحسبنا الله ونعم الوكيل.. والله إن صدري انقبض ! أتمنى فقط لو تقرأ هذه الكلمة مني - أو أن تصلها - : هل تملك قلب أم حقًـا ؟؟؟ - مجرّد أمنية - وأسأل الله أن يعوضك بزوج أفضل من هذا، ولا حول ولا قوة إلا بالله العلي العظيم .. |
طيب ليش ماتجلسين مع امك وتكلمينها بهدوء شديد
او توصين حد عزيز عليها ياثر فيها طيب شو رايك تبكين وتهددين بالاضراب عن الطعام اذا امك مو وافقت وماتخافين من غضبها ودعائها لانه غير جائز |
اختي الله يعوضك خير كان لابد منك ان تصبري و تحاولي المرات الجاية ان شاء الله تتوفقين لا تخلي هذا الموضوع يعدي على خير اقلبي البيت كله فوق تحت سوي فضيحة ( بس صغيرة شوي) الله يوفقك في الدنيا والاخرة قال تعالى ( ومَن يَتَّقِ اللَّهَ يَجْعَل لَّهُ مَخْرَجاً وَيَرْزُقْهُ مِنْ حَيْثُ لاَ يَحْتَسِبُ ) وقال ( فَإِنَّ مَعَ الْعُسْرِ يُسْراً (5) إِنَّ مَعَ الْعُسْرِ يُسْراً ) ولذلك اصبري واحتسبي وعليك بالدعاء فان كل عسر يأتي بعده يسر وكل ضيق يأتي بعده فرج وكما قيل : ضاقت فلما استحكمت حلقاتها ........ فرجت وكنت اظنها لا تفرج ولا تلتاجئي الى الحرام فتعاقبين في الدنيا بعدم التوفيق لان الله يعاقب عباده المسلمين في الدنيا حتى يخفف عنهم عذاب الاخرة وقد يعاقب في الدارين فاحذري يأختاه المهم الله يوفقك اختي ولاتنسي الدعاء |
الواضح أن وضعكم في البيت مقلوب فوق تحت
انتي المفروض وقفتي ودافعتي عن حقك خاصة إذا ابوكِ موافق ترى فوات الفرصة غصة .. إلى متى بنتظرين ؟؟ إلى إلى بعد عمر طويل أمك تغادر الدنيا هل ترضين على أمك تتعذب في قبرها بسبب معصيتها ومخالفتها لأمر الله ولأنها اصبحت من اسباب الفساد في الأرض يقول رسول الله عليه الصلاة والسلام: " إذا جاءكم من ترضون دينه وخلقه فزوجوه إلا تفعلوه تكن فتنة في الأرض وفساد كبير". رواه الترمذي وغيره. هل انتوا راضين على أمكم وانوتا تعرفون وين مكانها في الأخرة كل انسان في هالدنيا له مكان في الآخرة أما الجنة أو النار .. مافي حل وسط المفروض واحد من اخوانك أو اخوالك قعد لها وقال لها انتي الحين تعصين ربك .. شلون تبين تقابلين ربك وانتي تسببتي في الفساد في الأرض وبعدين ايش تطردهم وتخرب العرس .. ليش ما حطيتوها أمام الأمر الواقع اساساً هذا شي سهل خاصة إذا ابوك موافق واخوانك .. والزوج يصير على الضيق مولازم تعزمون خلق الله كلهم .. ولا راح تجيها جلطة ولا شيء .. اهي في البداية راح تنكد عليكم وبعدين بتسكت وبترضى أمك مع احترامي لها تعمل مثل الأطفال المشاغبين الي يهددون بتكسير البيت والصراخ لو ما تنفذ الي يبون وإذا انتركوا اهدئو اذا عرفوا أن هالاسلوب فاشل انتوا بس لو مملكين وحاطينها أمام الأمر الواقع كان تبطل هالتصرفات وتعرف أن الشي اذا ماصار قدام عينها بيصير وراها .. بس انتي وابوكِ استسلمتوا لها وابوكِ الله يهداه تراه مسؤال أمام الله مسؤلية عظيمة ولا يشفع له عدم قدرته على اقناع أمك أجل بالله عليكم هذا أمر يرضي الله والا رسوله .. أنتي امانه عنده .. أمك امانة المفروض يردعها عشان يحميها من نار الآخرة قال تعالي ( يا ايها الذين امنو قو انفسكم واهليكم نار وقودها الناس والحجارة ) |
الله يصبرك ويصبرني انا اهلي تاخروا بالرد لمدة 8 شهور وبعد ما اقتعت امي اني موافقة وبشدة دقت عالحرمة وكانت الصدمة الكبيرة قالت لامي احنا مرتبطين مع ناس مع العلم انها دقت مرتين مو مرة يوم خطبتني وانا تمنيت الموت ولا اسمع هالشي والحين لي 3 اسابيع حالتي النفسية زفت وخطبني ولد عمي وانا ما ابيه لاني تعلقت بالخطبة الاولى والحين ابي حل الله ييسر امورنا جميعا
|
اقتباس:
أسأل الله العلي القدير أن يعوضك خيرا ويرزقك وأخواتك الأزواج الصالحين عاجلاً غير آجل .. يـغـلـق |
| الساعة الآن 04:00 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©