|
لم يتم عقد القران وبيننا مكالمات ورسائل
السلام عليكم ورحمة الله وبركاته
بصراحه انا سجلت بالمنتدى مخصوص لاشراك في هذا القسم واتمنى الاقي عندكم الردود الي تريحني مشكلتي اتوقع انها انطرحت من قبل من اخوات لي بهالمنتدى انا مخطوبه لولد عمي وخالتي بنفس الوقت طبعا خطبه يعني بدون عقد بس مجرد كلام المشكله ان بيننا مكالمات ورسايل المهم ان فيني احساس فظيع بالذنب انا احبه وهو يعشقني لدرجة الجنوووون انا واثقه من ذا الشي بس انا خايفه من غضب ربي علينا وخايفه من اثر الذنب هذا علينا بعد الزواج واكثر من مره احاول اتركه بس ما اقدر اكثرها يومين وارجع له ولمن اقوله والله يجلس يترجاني ما اخليه ويوعدني ان بيخفف مكالمات بس مايقدر يقطعها مره وحده بس نرجع نكلم بعض وعادي انا تعبت والله مو مرتاحه وخايفه من ربي ادري بتقولون اشغلي نفسك بأي شي بس ماعندي دراسه ولا وظيفه ولا اي شي ممكن انشغل عنه فيه فكرت احفظ قران بس برضو ماقدرت اخليه ومن ناحية انه بيشك فيني بعد الزواج هذا الشي انا ضامنه انه مستحيل لاني اعرف تفكيره وعقليته ومستحيل يضرني لاني بنت عمه ولان هو اصلا يحبني حب خيالي المشكله تتلخص في تعودي عليه صار هو شي ضروري عشان اعيش حياتي بشكل طبيعي تعودت عليه لدرجة اني مستحيل ابعد عنه والملكه بتكون بعد سنتين او خلالها لا اقل انا اعرف ربي زين عشان كذا انا خايفه |
وعليكم السلام ورحمة الله وبركاته
بكل اختصار إذا كان صادق بالخطبة خليه يملك عليك ولو تتزوجون بعد 80 سنة :) وبعد الملكة سوي الي تبينه أنت وإياه |
ليش الملكة بعد هذه المدة الطولية
اعقدوا قرانكم الحين وتزوجوا وقت تتيسر الأمور بترتاحين من تأنيب الضمير لأنك عارفة اللي يصير مو صح وبعد ما تملكون تقدرون تكلمون بعض على راحتكم |
اقتباس:
ذكرتيني بوحدة من قريباتنا الله يستر عليها يحبها ولد عمها ويموت فيها وياما نصحوها قريباتها تزوجي وتقول لا بستناه الان عمرها 46 سنه وجالسه عند امها وابوها وكل خواتها واخوانها متزوجين وهي جالسه سبحان الله كأنك تقولين السالفه نفسها بس تنتظرين نفس المصير وحتى الوالده الله يحفظها لي تقول فلانه متكلم ولد عمها انه يبيها وجوها خطاب وهي تحبه وهو يحبها ووقتها يتقابلون بالصدفه ويتراسلون رسايل ولما بغى يتزوج تزوج ثانيه الله يلطف بحالك بس والله حاس انك بتصيرين مثلها ما تصدق اخوانها واخواتها يزورونهم يطلون على امهم الا تتعلق فيهم تحس انها عايشه مع ناس ولما يروح كل واحد بيته تعظ اصابع الندم الله يستر عليها وعلينا ويستر عليك بس كانت واثقه ومتأكده وولد عمي موب ضارني يمكن ما يضرك بالعلاقه انه يتمادى فيها لكن راح يضرك نفسياً ويضرك بقراره الاخير يمكن يهون اذا هون بيضرك وبكيفك علينا النصح لك ولك القرار |
صدقووا اخواتي اكتبو كتابكم ولو ماتتزوجو الا عقب مليون سنه
المهم انه يكون مالك عليك وتكوني زوجته وحلال عليك مو حرام لاتكلميه اقطعيه لمن يملك عليك نصيحه من اخت تكفين ترى بعدين تندمين الله يستر علي وعليك وعلى بنات المسلمين اجمعين |
اذا يحبك ويخاااااااااف عليك 0يملك عليك ويصون سمعتك والزواج ماعليه اذا تيسر
|
اختي الانسان حكيم نفسه
ان كان ملكتك وياه بعد فتره طويله .. لا تكلمينه كثير ولكن ان كانت ملكتكم قريبه او لها وقت محدد فحاولي تتعرفين عليه اكثر واذا كان مصر على مكالمتك و يترجاك لازم اهلك و اهله يكونوا عندهم خبر .. |
راح تتعبين يا أختي كثير
اقطعي المكالمات الحين حتى إذا جاءت الملكة ما يكون جاه ملل منك لأنه تعود عليك قوليله أنا أقدرك وأحترمك وإن شاء الله بعد الملكة نتكلم براحتنا حتى نرضي ربنا الرجل يا أختي يحب المرأة اللي تحافظ على نفسها الله يسعدكم |
جزاكم الله خير ياجماعه انا مقتنعه بكلامكم الي قلتوه وكنت محتاجه احد يعطيني القوه واليوم كلمته وقلت له خلينا نخفف مكالمات وتدريجيا نقطعها لان مستحيل نقطع فجأه بس هو زعل وعصب وجلس يقول ان هو نيته صافيه وربي عالم بذا الشي يعني الي نسويه موحرام لان انا خطيبك واحبك وربي يحاسب الاعمال ع حسب النيات وانا مافي نيتي الا الزواج وقال انه بيشدحيله في الدراسه عشان الملكه تكون اقرب وانا جلست مصممه ع موقفي بس بعدين قام يتهمني اني مليت منه واني اكذب في مشاعري تجاهه وخلاني الحين وانا والله نفسيتي بالارض وش اسوي بالاخير قال خلاص ما نكلم بعض بس يكون بيننا رسايل وربي ان حالتي صعبه انا متعلقه فيه وهو بعد وش الحل |
لو ان اهلك و اهله يعرفون انكم تكلمون بعض .. انا اشوف ما فيها شي
بالعكس انا خطيبتي تعرفت عليها اكثر لاني كنت قريب لها و اكملها وقت الخطبه والحمدلله تحمست واملكت عليها بسرعه |
زين سويتي أختي الفاضلة
وهو لازم يتهمك إنك ما تحبينه لأن الله يختبرك بتفضلين رضى خطيبك والا رضاه وإذ أرضيت الله بيرضى عنك ويرضي عنك الناس ولا تنسين أنه مهما كان خطيبك ويحبك فهو رجل أجبنبي عنك وليس محرم لك وبخصوص قولك إنه مستحيل يشك فيك بعد الزواج لأنه يحبك أقول حتى لو ماشك أليس الله بقادر على تقليب القلوب انتبهي أختي واتقي الله واقطعي مكالماتك معه مهما حصل ولا يهمك كلامه واتهاماته بأنك لا تحبيه وقدمي مرضاة الله على مرضاة كل أحد وسترين الخير وإن لم تفعلي فلا تلومي إلى نفسك أتمنى لك الخير وفقك الله ورعاك |
زين ما سويتي وما يخالف تحملي
يمكن انصدم ولا ما توقع مع إن انتي الصح واللي كان صاير خطأ هو ما بيتضرر في كل الأحوال انتي لو لا قدر الله اللي ممكن تنضرين بس انتي اصمدي على موقفك وادعي الله يتمم أموركم على خير ومهما يصير اعرفي انه مكتوب ومقدر وانه فيه الخير لك بإذن الله وحولي لو تقولين لأمك تقول لأبوك تحاولون لو تملكون والزواج بعدين أحسن من اللي كان قاعد يصير |
ما دام إنت نيتك ترضين ربك فلا تخافي
لأن الله قال: (ومن يتق الله يجعل له مخرجا) هو كان تصرفه بهذه العصبية لأنه تعود عليك وإنت تعودت عليه ومثل ما قالت أختي اقترحي على أهلك إنكم تقدمون الملكة حاليا إذا كان هو يقدر وجاهدي نفسك يا أختي إنك ما تفكرين فيه كثير اشغلي نفسك بدورات وتطوير مهارات ممكن تفيدك مستقبلا في زواجك الله يسعدكم |
مشكوريـــــــــــــــــــــــــــــن كل من رد علي جزاكم الله خير انا ظليت مصره ع موقفي وهو بالاخير وافقني مع انه مره زعلان بس نفسيتي مو تمام وهو بعد حتى خواته يكلموني يقولون لي انه مره متأثر ويسألوني وش اللي صاير بيننا ؟؟ بس انا ماعلمتهم ان شاءالله ربي يصبرني ادعو لي تكفون ماتتخيلون قد ايش متعلقين ببعض بس رضا ربي اهم جزيتم كل الخير |
الله يبارك فيك ويثبتك ويعجل في زواجكم
و يحفظكم من الشيطان |
لا تخسرين زوجك .. عشان تصرف ماله اي داعي ..
الرجل جاي يتزوجك و حاب يعرف عنك اكثر ويحبك عشان تكوني شريكه حياته وانتي من بدايه ايامكم تسوي كذا اخاف يغير نظرته فيك .. و تخسريه |
اخ سمايل وانا بعد حاسه اني بخسره مع ان الحب اللي بيننا حب صادق ونيتنا الزواج لولا الظروف
اللي اجبرتنا نأخره انا خايفه عليه وخايفه ع نفسي من شي حرام اكثر من مجرد مكالمات ورسايل يمكن ما احد يفهمني الا اللي عاش بنفس وضعي يارب ارحمني انا عايشه بين نارين لا اقدر ابعد واخليه ولا اقدر اكمل مكالمات لازم يكون في حل وسط لاتقولون لي قدمو الملكه والله ذا الشي مو بيدنا والا كان ملكنا من زمااان نفسي احد يفهمني ويحس بمعاناتي |
وش اسوي ؟؟؟؟؟؟؟
اخته كلمتني وقالت لي انه سوا حادث انا ادري انه كان قاصد لانه قالي لو تركتيني بسوي بنفسي شي بس ما جا على بالي انه صادق وبيسويها ياويلي لو مات والله ما اسامح نفسي الله يحفظه ان شاء الله ما يكون متأذي والله نفسيتي متدمره وخايفه عليه |
يا أختي الكريمة إذا كان قاصد يسوي في نفسه شي فخلي أبوك أو أخوك يكلمه ويفهمه وجهة نظرك وإنك تعزينه وتحترمينه وإنه المفروض يكون رجل يتحمل الصعاب وإنك إن شاء الله بعد العقد بتكلمينه وبتجلسين معاه
|
اقتباس:
الأمر أكبر من كذا لاحظ كلامها: (انا خايفه عليه وخايفه ع نفسي من شي حرام اكثر من مجرد مكالمات ورسايل) علشان كذا العلماء حذروا من الكلام العاطفي بين المخطوبين بدون عقد لأنه ممكن يؤدي إلى أمور أكبر من مجرد مكالمات وهم ما زالوا أجنبيان وليسوا زوجين شرعا إذا كان في كلام فلازم يكون على قدر الحاجة وعن أمور الزواج وللاطلاع http://www.islam-qa.com/ar/ref/36807...0مع%20المخطوبة وعندي سؤال للأخت جنا العطر ممكن نعرف سبب عدم قدرتكم لتعجيل الملكة؟ |
اقتباس:
انا اقول خذي الكلام من أمه مو من اخته كلميها وسلمي عليها وقولي حمد الله على سلامة فلان لا يكون فلم اكشن واخته مساعدته فيه بس يحنن قلبك عليه جاء في الحديث الصحيح، عن النبي-صلى الله عليه وسلم- أنه قال: "أن من التمس رضا الله بسخط الناس رضي الله عنه وأرضا عنه الناس، ومن أرضا الناس بسخط الله سخط الله عنه وأسخط عنه الناس. واذا انتي تبين تكلمينه كلمي ابوك وامك وقولي لهم اذا وافقوا خلاص كلميه لا تذبحين عمرك ولا هو يذبح عمره بكره ينتحر ولا يحرق نفسه تقولين كله منكم انتوا السبب :29::29: :27: كلميه بدراية اهلك اخاف بكره يقول ما اتزوج وحده تكلمني ولا بيننا عقد ولا خطبه رسميه ولا شئ باقي يدرس + يدور وظيفه + يكون نفسه او يجهز عمره + تفاهم على امور السكن وخلافه = زواج لكن متى هالزواج الله اعلم 3 سنوات تكلمون بعض او تمتد الى 6 سنوات ربما .....:14: حطي النقاط على الحروف من البدايه علشان تعرفين وش لك وش عليك لاننا ما نرضالك الا اللي نرضاه لأخواتنا وانا ما ارضى لولد عمي يعلق اختي وبعد فتره يقول والله مابي اتزوج هونت ويطلع بينهم مكالمات واحنا اخر من يعلم ما تقولنا الا بعد ما يتركها ويهون من الزواج انها كانت تكلمه :( ولا نقدر نغصبه الا تتزوجها ورجلك فوق رقبتك |
اخواني شكرا ع ردودكم وتفاعلكم معي واولا الملكه راح تكون اقل شي بعد سنه لان انا ادرس واهو بعد يبي يخلص دراسه لا اهلي ولا اهله بيوافقون ان الملكه تكون في اقل من سنه وبعدين اذا ع سالفة انه بيجي يوم ويقول انا ما اتزوج وحده كانت تكلمني لا انا وااااثقه من ذا الشي وواثقه بنفسي قبل لا اكون واثقه فيه لان انا رضيت اكلمه لاني بنت عمه وخالته وسمعتي من سمعته ومستحيل يأذيني وعايلتي وعايلته تقريبا اقدر اقول عايله وحده والحمدلله وغير كذا خواتي متزوجين من اخوانه والاهم انا واثقه فيه وبحبه انتم ماتعرفون التفاصيل وقاعدين تحكمون ع اساس حكايات وقصص سمعتو عنها !!! بس محد يعرف تفاصيل علاقتي معاه كثري بالمختصر ثقتي فيه مستحيل تنهز وان شاءالله ربي مايخيب ظني فيه واذا ع سالفة الحادث انا متاكده منها بس الحمدلله ماصار له شي جات سليمه وامي وابوي مايدرون اني اكلمه بس اهله يدرون وانا بعض اخواتي يدرون المشكله تتلخص في تعودنا ع بعض فعلا انا اكثر من مره جربت اتركه بس اتعب نفسيا لدرجة اني اهمل كل شي في الحياه واضعف وارجع له وهو اكثر مني احنا كان بيننا مكالمات ورسايل جوال ومحادثات ع الايميل ولساعات طويله سؤالي الآن ؟؟ اذا اختصرنا الامر ع رسائل جوال (( فقط )) وبشكل محدود واقل من السابق بكثيييييير هل هذا يعتبر حل ؟؟؟ افيدوني |
اقتباس:
اكلمه واهله يدرون وخواتي يدرون وواثقه فيه مستحيل ثقتك تنهز فيه خلاص مافيه مشكله من الأساس ليه تبين تخففين من المكالمات ؟ وش خايفه منه وانتي واثقه فيه كلميه ولا عليك من احد :25: نصائحنا قدمناها لك بردودنا السابقه لإرضاء ضمائرنا فقط وانتي ارضي ضميرك وربك سبحانه وتعالى ولاكن للأمانه من واجبي ان اكرر حديث نبينا صلى الله عليه وسلم "أن من التمس رضا الله بسخط الناس رضي الله عنه وأرضا عنه الناس، ومن أرضا الناس بسخط الله سخط الله عنه وأسخط عنه الناس. فكري بمعنى هذا الحديث والله يوفقك ويستر عليك اقتباس:
اقتباس:
|
سبحان الله اذا دروا خواته وخواتك عنكم معناه صح !!!!!!!!!!!
لاغلط طبعا والله اهلك مو رب العالمين عشان تقولين يدرون عني ادور رضاء ربي قبل رضاءااهلي او أيأ كان بالفعل ماقصروا الأخوه والأخوات هنا ردوا بشكل شاافي الله يجزاهم الجنه ولافض فووهم ياجنا انتي مو راضيه تتغيرين احس من كلامك مااحدن بيعبي راسك والأخ في الله عاشق الجواهر برررد قلبي في رده والله يااختي قالوالك النصيحه من قلب مو ملزومين هم يقولون لك رايهم ومن الممكن يجاملونك ويقوولون ايوا يااختي هذااحب... ماتقدرين.... صح عليك.... ايوا ....كملي مشوارك>>>>وغيرها من المجاملات لكنهم تحدثوا بماأملت عليهم ضمائرهم وانتي حكمي عقلك قبل عاطفتك هداكِ الله للرشد ورضي عنك ِوحفظكِ من كل سوء وسترنا وإياك بستره الجميل |
صح
يمكن انا قاعده الف وادور مع اني عارفه الصح من الغلط بس لا تلوموني انا احبه ومتعلقه فيه وهذا الشي الي مخليني متردده مشكلتي عاطفيه بزياده وعاطفتي تطغى ع قراراتي ا اخوي عاشق الجواهر شكرا لك وجزاك الله كل خير ع كل كلمه نصحتني فيها ولكن ! انت يمكن مافهمتني صح انامشكلتي مو في خوفي منه او الخوف من عدم ثقته فيني بعد الزواج !! لأ انا اقصد ان مكالماتنا وتواصلنا بأي طريقه هو الشي اللي مضايقني يعني خوفي مو من خطيبي انا خوفي من ((ربي اولا واخيرا)) ومعليش سامحوني اذا حسيتم ان في بعض كلامي تناقض في هذا الشي يرجع لعاطفتي المفرطه وسيطرتها علي بشكل كبير عشان كذا سرت اختلق لنفسي اعذار وتبريرات بس ان شاءالله اقدر آخذ قرار سليم بعقلي بعيد عن العاطفه ومايزينه لي الشيطان واهم شي يرضي ربي وظميري ثانيا وانا يمكن كنت محتاجه توجيه بسيط وانتم ماقصرتم كل من قدم لي النصيحه مشكوريــــــــــــــن وردودكم كثير فادتني جزاكم الله خير والله ييسر اموركم ويوفقكم جميعا لما يحبه ويرضاه دمتم بحفظ الله ,,, |
عفوا بس حبيت اوضح شغله
لمن قلت ( انا كنت اختلق الاعذار والتبريرات )ماقصدت اني كنت اكذب عليكم بتفاصيل مشكلتي لا ابدا وربي شاهد بس انا كنت احاول ادور لنفسي عذر عشان ما ابعد عن خطيبي زي مثلا سالفة الحادث هي صحيحه وانا حطيتها عذر وتبرير لان استمر في مكالمته بس انا بقرارة نفسي ادري ان مافي شي بالدنيا يستاهل اسخط ربي عشانه اسفه ع الاطاله سامحوني |
شوفي عزيزتي
ياما ناس تزوجوا وهم لسه ما كملوا دراستهم وصار عندهم عيال بعد وانتوا ودكم لو تملكون بس ودامكم من نفس العائلة شوفوا لكم شخص له تأثير على أبوك وعمك عشان تعجلون بالملكة وحاولوا تطمنون الأهل إن ملكتكم على بعض بإذن الله ماراح تأثر على دراستكم وما بيصير إلا خير بالعكس كذا ترتاحون ونفسيتكم تصير حلوه بالتوفيق |
اختي جنا العطر
انا بأعطيك اللي عندي و انتي براحتك سوي اللي يريحك فيه ضميرك اولاً .. من ناحية المكالمات اجد تهويل للامر .. على انه نسبة جوازه مختلف ايضاً ثانياً .. انا بالنسبه لي . كلمت خطيبتي و هي قريبه لي والحمدلله حبيتها اكثر و الخميس الجاي ملكتي ولله الحمد جلست 3 اشهر اكلمها .. وعرفت عنها اكثر و اكثر ولاني كنت احبها و تحبني .. ارتبطنا في بعض اكثر والحمدلله وفقنا الله و دفعت المهر و ملكتي الاسبوع القادم .. ان اشوف انه مافيها شي وفي الشرع لا يوجد حديث او نص صريح يقضي بحرمة الكلام بين الرجال و النساء وبالاخص بين المخطوبين .. هو جاي يتزوجك .. واللي بينكم حب فلا تأجرين عقللك و قلبك وخصوصاً في امور كهذه بين مشاركات و اقلام وفي الاخير ( انتي اللي راح تتعبين ) انتي الان اللي استفديه شي واحد فقط ( الهم ) و تعبتيه معاك .. واخاف انه راح يكرهك من تصرفك اللي ماله داعي الولد يحبك و يبغى يتزوجك .. وانتي تحطين عقبات ما انزل الله بها من سلطان والامر في الاول و الاخير يرجع لك وما راح اعلق في هذا الموضوع بتاتا لانني سوف اجد من يعارض و من يعمل و يعمل وكـأن الرجل وحش و يريد النيل منك |
اخوي سمايل اولا الف مبرووووك والله يبارك لكم ويتمم على خير يارب وبعدين انا قرأت الفتوى اللي تقول ان حكم مكالمة الرجل لخطيبته هو جائز ولكن بشروط يعني مو محرم وانا كنت عارفه هذا الكلام من الاول بس الي خلاني اغير تفكيري واتردد في مكالمته هو ردود بعض الاعضاء سواء في منتداكم او بمنتدى اخر وبمواضيع شبيهه بموضوعي كلامهم جعلني اعيد النظر وعشان كذا انا سجلت بالمنتدى وبالنسبه للاخ المتهندم لمن قلت اقتباس:
يعني اذا انا تركته راح اترك فراغ كبير بحياته خاصه واني كنت شي اساسي بالنسبه له ويمكن يروح يعوض هذا الفراغ بشي حرام !!! يعني يكلم خطيبته ولا يتجه للحرام ؟؟ وانا اذا تركته بعد بيكون في عندي فراغ مثل ماقلت لكم انا ما ادرس (حاليا) بس ان شاء الله قريبا يعني ع الترم الثاني وامي تقول مافي ملكه لين تدرسين حبيت اوضح هذاالكلام للاخ عاشق الجواهر لانه ظن اني اكذب !!! عموما مشكورين ع الردرود جميعا |
اقتباس:
لكن يبدو أنه يحصل سوء فهم أو سوء تقدير عند الكلام عن الأمور المختلف فيها شرعا لذلك المفروض من صاحب المشكلة إذا أراد الحل العلمي الشرعي المناسب لمشكلته أن يعرضها بتفاصيلها على عالم أو شيخ حكيم له بعد نظري في الأمور لأننا هنا في المنتدى قد تغيب عنا بعض التفاصيل التي لها تأثير في القضية فنحكم بناء على خلفية مسبقة قد تزيد الأمر سوءا كما أوردت يا أخي من قبل المشكلة ليست في الكلام بل هي في نوعية الكلام (هل هو كلام عاطفي أو كلام عادي) عموما لن أسترسل في الكلام عن هذا الأمر فالأهم هنا هو الحل لمشكلة الأخت ونصيحة لأختي الفاضلة أولا أن تستعين بالله وتقول دائما بصدق: (اللهم اهدني وسددني) ثانيا هناك قسم للاستشارات الخاصة موجود في المنتدى وفيه عدد من المختصين إن شاء الله يعينونك في حل مشكلتك وكوني يا أختي على يقين من قول الله سبحانه: (ومن يتق الله يجعل له مخرجا) صدقيني احرصي على ما يرضي الله سبحانه واسعي له (ليس فقط في مشكلتك بل في جميع أمور حياتك) والله سيرضيك ويعطيك ما تتمنين وأفضل منه أسأل الله لك يا أختي السعادة والتوفيق |
^^^
اسأل الله ان يجزيك الجنه قول امين .. كلامك جداً جميل |
صراحه انت خليط من المتنااااقضات ..
يعني مايوخذ منك لاحق ولا باطل :| خايفه من ربك ومع ذالك مستمره بهالشي لإنك تحإولين تبررين لنفسك وتخلقين الاعذار وواثقه فيه وخايفه من شيء اعظم من رسائل ومكالمات .. !! وبلحظه ماقررتي انك تبعديييين . تراجعتي وين الاصرار طبيعي تتعبين بالبدايه !! بس العبره بالنهايات ~ انت ماتضمنين الاقدار ولا النصيب يمكن باي لحظه يحصل شي مايييتم ولا شي من اللي كنت تتوقعينه .. ساعتها وش موووقفك ؟؟ راح تتمنين ترجع ايامك لهالنقطه هذي عشان تتوقفين وتفكرين كوويس !! ~ و لو فرضا تزوجتي تضمنين توفيق ربك ؟ كيف بتدعين يوفقك وانت عصيتيه وقدمتي رغبتك على رضاه ؟! ياماااااااا سمعنا عن ناس كثير تزوجوا عن حب وعشق وبلحظه انتهى الحب يعني الحب مو شي دائم عشان تتأملين فيه كثير وتغمضين عيونك عن ايامك الجايه والسبب ثقتك بحبه ~! |
انا بصراحة مع مكالمة الخاطب لخطيبتة ما فيها شيء
مدام متفقين بس طبعا بحدود وما يتجاوزو الكلام في الرومنسيات او احياة الزوجية طبعا مو كل شوي يعني مرة في الاسبوع مع رسايل حلو |
| الساعة الآن 12:44 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©