|
55 الف ريال ... مشورتكم
السلام عليكم بسم الله والصلاه على رسوله الله مادري من وين ابدي لكن بتكلم معكم بالعاميه لاني اذا بستفصح بالفصيح مانتم فاهمين شي . بسرد عليكم قصتي ونيتي المبيته للزواج بالمختصر المفيد والاهداف الاستراتيجيه اللي صبتها للفائده العامه واذا فيها اغلاط مافيه مانع من التصحيح .. وفي اخر المطاف اتحاج لي مشورتكم . قبل سنتين من هذا التاريخ .. كنت شاب من هالشباب الداجين يعني من ومن الداجين مره لكن كنت راعي سفريات وروحات وجيات وعلاقات ومن اللي انتم خابرين . بس الحمد الله ماني مشكلجي يعني بالمختصر راعي سفريات اجمع هالفلوس بالشهور وتروح بايام . وكنت رافض فكره الزواج . لهذا السببوهي قناعه داخليه . يعني اذا بتزوج لازم اكون نظيف 100% من الداخل . وسبحان اللي هداني و بدت هواجيس الزواج تطق راسي بشكل عجيب . لكن لم اخبر اهلي وبدت الحرب الداخليه النفسيه وبديت اقاوم رغباتي وسفراتي وبديت اهتم بالصلاه وصرت اكثر من الاشرطه الدينيه واسمع واسمع وقسم بالله حرب بمعنى الكلمه . حتى جا وقت الاختبار قلت بسافر واشوف وسافرت ورجعت والحمدالله كانت سياحه بمعنى كلمه سياحه . وبعد فتره سافرت مع شباب الحمدالله قدرت انتصر على نفسي كان معي واحد من الشباب يقولي تزوج اذا وضعك كذا ....... وفعلا اول مارجعت وقبل كل شي اجريت بعض الفحوصات الطبيه واجريت فحص الزواج اللي كان معاناه لي نفسياً لكن الحمدالله كنت راضي من الداخل سواء كانت النتائج اايجابيه او سلبيه . ولكن ولله الحمد الامور كلها تمام . وفعلا سنتين وانا احاول اصلح مابداخلي من الامور السيئه . والحمدالله احس اني جاهز للزواج . هالحين انا خاطب يعني ماتملكت يعني ماهي زوجتي لان فيه ناس الخطبه عندهم ملكه والملكه عن بعض الناس خطبه للتوضيحه فقط ابي مشورتكم عندي 55 الف ريال هل تكفي اني اجهز شقه باثاث جديد . تكفي لشهر عسل وشلون اقسمها . حاس انها ماتكفي واخر شي ادعولي ان الله يوفقني ويوفق كل من يبي بنت الحلال .
|
هل 55 ألف هي للشقة و السفر فقط
هل دفعت المهر و هذالباقي لأن إذا كان بالمهر ,,لن تكفي حتى بدون المهر ,,تحتاج ل30 ألف او 20 ألف زيادة لتكفي التأثيث و السفر و على حسب أسعار الأثاث بمنطقتكم’’يمكن تقدر تأثث بأقل الأسعار يعني يتطلب منك الموضوع تاخذ فكرة عن اسعار الأثاث في منطقتك (غرفة النوم, طقم كنب,مطبخ) و اختار ما يناسب ميزانيتك ,, |
المبلغ الي معك حليو بس للشقة والسفرة فقط ..
طيب .. المهر ؟ ذهب البنت ؟؟ والزواج (لو عائلي ) عندي احساس ان موضوعك هذا بيشب حرب :d وبعد عندي احساس ان بيجيك ناس يقولون لك مهو لازم شهر عسل ولا لازم زواج ولا لازم اثاث جديد .. :25: |
سنتين تعدل حالك
اجل هونت ماني متزوج اروح اخلص دراستي و اطحن الحب و اعدل من نفسي بعدها و بعد كذا اتزوج للمعلومية و الله انا رجعت بتزوج لكن يوم شفت امور الزواج و المشاكل و وجع الراس بديت اغير رايي الى حين ميسرة |
حسنا رجعت مرةأخرى لتأخذ فكرة عن أسعار الأثاث ..(كمثال فقط) على حسب الشقة ,,غرفتين+حمامين+صالة+مجلس+مطبخ غرفة النوم =7000 تزيد أو تنقص قليلا من النوع الأثاث الصيني فيه موديلات مرتبة و قد تجد غرفة ب5000 أيضا المجلس طقم كنب ب3500 و طاولات 400 او 500ريال (قم بتأثيث المجلس أو الصالة و الباقي دعه بعد الزواج* المطبخ على حسب حجم المطبخ عندك , لا تسويه بكامل الجدار , خذ زاوية فقط على شكل حرف ال L ومطبخ المنيوم أرخص بكثير من الخشب , الخشب غالي و يمكن ياخذ 6 الالف او اكثر بشوي او أقل و يبقى المفارش للسرير , تجد مفارش حلوة و متنوعة حتىى سيتي بلازا ب600 ريال او اكثر خذ في وقت الخصم و التخفيضات أما بالنسبة للسفر ..ماعندي فكرة و الله يوفقك |
تكفي ومناسب لكن على حسب صرفك أنت ,, الشقة ممكن تأثث الشيء المهم ثم بعد الزواج تجيب الكماليات على ركادة وهداوة ,, بالنسبة لمسألة السفر ممكن تسافر لسياحة داخلية وممكن تأجله لين الله يعينك وممكن تلغيه حسب قدرتك المادية ,, وتأكد أن التخطيط مهم جدًا في هذه المرحلة بالأخص وضع هذا الحديث أمام عينينك وعد النبي صلى الله عليه وسلم من يريد الزواج لإعفاف نفسه بعون الله له، فقال: ثلاثة حق على الله عونهم: المجاهد في سبيل الله، والمكاتب الذي يريد الأداء، والناكح الذي يريد العفاف. رواه الترمذي وقال هذا حديث حسن |
ياخي من قالك تكفيك
انا توني دافع مهر 30 الف والشقه ايجار تدفع مقدم 6 شهور اقل شي 10 الاف والتأثيث ان كانت غرفه نوم متواضعه حيل راح تكلفك حوالي الـ 6 الاف يعني 5 الاف غرفه نوم و الف للمفارش .. هذا غير الموكيت الاجهزة الكهربائيه .. اقل تدفعها 15 الف .. مابين تلفزيون و ثلاجة و بوتوغاز و 3 مكيفات على الاقل و مكنسه و برداه مويه غير اثاث الصاله و مجلس الرجال .. ياخي والله ان الدنيا غاليه اذا 55 الف فقط للشقه و الزواج ممكن تفكي ولكن مع المهر ((( في المشمش )) بس وكل امرك للحي القيوم اللي وعد المتوكلين بكل خير وتفرج لك .. الله يسهل امري و امرك ويزوجنا المشكلة لاجات في واحد يبني نفسه بنفسه لو الوالد عنده فلوس ماراح يقصر معي .. بس الوالد يالله راتبه التقاعد يكفيه وانا كل شي من جيبي ادفعه والله يسهل الامر |
اقتباس:
|
تبي نصيحتي
المبلغ هذا انت احسبه حسب ظروفك وحسب المجتمع الي انت عايش فيه وروح اسئل وشوف بكم هذا وبكم ذاك على حسب المنطقه الي انت فيها وحسب عاداتكم وتقاليدكم وراح تعرف اذا هذا المبلغ يكفيك او لا ممكن هذا المبلغ يكفيك ويسد احتياجاتك لكن غيرك لا يكفيهم وكل واحد له ظروفه ,, ان روح اسئل اهلك واسئل المتزوجين قبلك وان شاء الله يصير خير اتمنى لك التوفيق اخوي ومبروك على الخطبه ^_^ |
اعتقد تكفيك اذا المهر مدفوع و الاثاث محلي ...
* الايجار (مقدم ستة اشهر) 10 آلاف غرفة نوم 5000 صالة 3500 ثلاجة 1500 فرن 2000 ثلاث مكيفات 3000 فرش و اكسسوارات 2000 مجموع الايجار + التأثيث = 27 الف * شهر العسل (اسبوعين): تذاكر 8000 سكن 6000 اكل + مشتروات 6000 مجموع شهر العسل = 20 الف * مجموع مصاريف الايجار و الاثاث + شهر العسل = 47 الف يبقى لك ثمانية آلاف ريال ممكن تزود فيها اي بند من البنود اعلاه مع وضع مبلغ احتياطي للاستفادة منه عند الحاجة |
اقتباس:
|
اقتباس:
|
انا اشوف انها اتكفي للاثاث وخصوصا بعد رفع الاسعار راح تلقى كل شي غالي
والشهر العسل اكيد بتجيك العانيات يوم الزواج راح اتساعدك طبعا انت وحضك اذكر واحد من خواني جته اربعين الف طبعا اخوي ملتزام والكل يجبه اما اخوي الثاني طبعا كان داج مثلك وراعي روحات وجيات بس جته 1400:d والمسكين قضاء يوم واحد في الفيصليه واضطرت زوجته اتبيع بعض الذهب الي عندها علشان مسكينه تبي اتسافر حالها حال العرايس ومبروك الخطبه والله يتتمم زواجك على خير |
اقتباس:
|
اقتباس:
|
اقتباس:
|
اقتباس:
|
اقتباس:
|
اقتباس:
|
اقتباس:
اما الغسالة فليست اساسية (الله يخلي المغاسل ما في اكثر منها) ,, صدقني لو حطيت اولويات و ضبطت امورك بتكفيك و زيادة |
اقتباس:
:d يابختها زوجتك ياخوي اجل مغااااااسل ياكرهي لها ماتدري يغسلون لبسك مع مين اخوي يعرف صاحب معسلة الهندي مرة طب علية يغسل لبس اطفال وكبار وكلة >>تخيل داخلية وفوقية وكل شي سوى :) استحالة اودي مغسلة لو امووووووووووووت اما صاحب الموضوع اذا المهر مدفوع والذهب اقولك ياااااااااااالله تكفي اثاث وعلي حسب الذوق :22: انا اخواني علي حسب فترات زواجهم عندي اخ تزوج من قبل 13 سنة شايف الفرق بين الان وواول كلفة زواجة كللللللللللة من بدايتة لنهايتة 100 الف بس لاحظ من بدايتة واخوي اثث فيلا كاملة وقتها واثاثة مو اثاث كان :d يعني الذوق يحكم واسعار المدينة جدددددددددددة نااااااااااااااااار الرياض الدبل الطايف ارخص :d وكذااااااا ومبروك:14: |
أعتقد انها بتكفي وزود..
المهر والذهب ويوم العرس(يكون مختصر) كلها انت افتكيت منها.. مابقى الا اشياء تتدبر وتمشي بالاتفاق والتدبير !! والاجهزه والاثاث والكماليات اسعارها تختلف يعني مو ضروري كلها من الغالي والجوده العاليه بحسب الاستخدام والاستهلاك يعني وانتو عرسان يعني بس اثنين لا كثر داخل ولا بزران يعني لا تشيل هم جوده وخراب ومدري وشو اهم شي تاخذ اللي يأدي الغرض وبس.. وبحسب خبرتي المتواضعه..اللي يبي لك تشيل همه هو السكن !! يعني من الحين ابدا دور وخذ فكره عن كل منطقه ماتدري يمكن تتوهق بشي يحتاج ترميم وتنحد عليه.. الله يوفقك وييسر امورك وكل شاب في طريق الحلال.. اللهم امين :) |
اقتباس:
خل الحب ينطحن وتنطحن معاه بمرض ولا مصيبة الله يتوب عليك |
خرعتووووووووني بنـزوج اخـوي يؤؤؤ الله يستر ~ اخـوي سؤال !! انت ماعندكم احد يقربلك يفزعلك بقراشيع المطبخ .. او الأدوات الكهربائيه !! والله احنا ارحمممم اذا جا ولد من عيـالنا بيعرس !! كل شي يجي هديه .. معدا الشي الجااااااامد يجيه مثلا .. طقوووم المطبخ .. صحون وقدوور وغيرها وغساله .. ادوات كهربائيه .. واحيانا فلوس هذا كله قبل لايعرس من الناس الي قريبين منه .. غير الي بتجي يوم العرس .. اخـوي .. لاتشيل هممممممممممممم ربي تكفل بتيسير كل من اراد الزواج واعفاف نفسه .. بأذن الله تتفتح لك ابواب الرزق .. وباتسر قول دانتيل قالت ~ يااااااااااااااااشيخ روح وتوكل على الله .. الله ييسرلك امررررررررك يارب ... وييسر لأخـوي ويوووفق كل من اراد الحلال .. ويرزقهم من حيث لايحتسبوووون يااااااااارب |
تقريبا ينفع
الله معك |
ربي يتمملك على خير و يرزقك إن شاءالله بالمال الحلال
دخلت اخذ فكرة مع اني بنت من عادات بلدنا النص بالنص او كل واحد يتكلف بحاجة والشقه طبعآ تكون ملك الرجل مايدفع إيجار بس عارفين ليةدخلت ناوية إن شاءالله ادخر من مصروفي عشان وقت الزواج اشتري منة((طبعآ إذا رضى البشمهندس)) وما اخلي اهلي يدفعو الا حاجات بسيطة لو احتاج الامر فعلآ لازم تسأل في ديرتك عن الاسعار وكذا وفية تخفيضات وخصومات ولاتشتري الا المفيد وربي يهنيك ((دعواتكم لي)) |
الله ييسر حالك
المهم انت نفذت فكرة الاقدام على الزواج وعلى فكرة انتى ناوى خير الله ما بيفشلك بتلاقى الرزق ياتى من كل مكان ربى يفرحك بعروستك وهى كمان واعزمنا على الفرح تحياتى |
على حدي علمي ومن ناس اعرفهم تقريبا
بالرياض او المنطقه الوسطى (55 الف ) يالله تكفي للشقه لكن ! 55 الف مبلغ كبييييير اخوي ماهو بسيط ... استثمره ياخي وكون نفسك زين على شان لاتتزوج وانت مضغوط ومزاجك متعكر |
اقتباس:
|
أما تلغ فكرة شهر العسل وستوفر الكثير
أو سيبك من بنات الخليج وتزوج من دولة لخرى باقل من ربع هذا المبلغ |
اقتباس:
اقتباس:
و أنتو تنصحوه يهون عن الزواج او يفك خطوبته و ياخذ وحدة ثانية!! اقرأوا الموضوع بارك الله فيكم |
الله يـوفـقك يا أخـوي ويـتـمـم لك على خيـر ويـغـيـنـك بـحـلالـه عـن حـرامـه عزوبي:21: بس:d رجل:30: |
السلام عليكم ورحمة الله وبركاته
الله يوفقك انت و جميع المعرسين من رأيي لا تفكر و لا تشغل حالك بس يصير الزواج لأنك طلبته حتى تعف نفسك الله بغنيك و يرزقك من حيث لا تحتسب بس طول روحك و لا تمكت نفسك وحاول تفكر ما تبذخ و لا تقتر يعني كله قدر المطلوب وان شاء الله تتفوق لما يحبه الله و يرضاه |
انت متوكل على ربك
ومن توكل على ربه كفاه أنا مهري 25 ألف وربي عطاني فيه بركه وانا وزوجي سفرة شهر العسل سافرنا بالسياره وكانت أحلى سفره .. واذا ان شاءالله ربي اعطاك الفلوس بعدين سفرها للي تبغى وترى فلوسك ان شاءالله بتكفيك لاتاخذ الشي المكلف خذ شي معقول وفي نفس الوقت زين |
الله يرزقك
اذا دفعت المهر بتكفي وزيادة |
الله يتمم لك على خير ان شاء الله اتوقع ان 55 الف مبلغ مو بسيط في حاله انك خططت تخطيط سليم اذا على شهر العسل في مكاتب تنظم لك سفريات باسعار حلوووه اما اذا على الاثاث في منطقه في الرياض اسمهااا الفيصليه اتوقع في شرق الرياض غير برج الفيصليه فيهااا اثاث ومفروشات وغرف نوم وكلها محلات معروفه مثل بيت الامارات وطقته واسعارهاا رخيصه رح وخذ نطره عليهاااا وبعد فيها محل او محلين مفارش سرارير حلوه وانيقه ورخيصه.. اما عن الاجهزه الكهربائيه موب لازم كل شي تاحذه اهم شي مكيفات وثلاجه وغساله اتوماتيك وطاحونه قهوه وخلاط كاس انا يوم اتزوج كان بيتي ماثث غرفه نوم ومطبخ فيه الاساسيات والصاله بس المقلط ومجلس الرجال اثثته انا على ذوقي وشوي شوي يعني اتفق مع زوجتك انكم تاثثون على كيفكم عقب العرس موب لازم كل شي مره وحده اهم شي الاساسيات والله يسهل امرك وكل مسلم |
الله يبارك لك اخوي و ييسر امرك
عزيزي بالنسبه للمبلغ اذا بتخليه اثاث وشهر عسل . انا اقولك ما يكفي . اكلمك عن نفسي انا زواجي بعد 4 شهور ومشغول في الشقه واثاثها . الى الان ما خلصت من الاثاث وكلفتني 30 الف هذا غير ايجار الشقه ولا تنسى غرفه النوم وصاله الجلوس لسى ما سويت فيها شي يعني انا راصد ميزانيه للشقه اثاث بس 50 الف وايجار الشقه 25 الف شهر العسل الى الان ما ادري كم بيكلف خلها على الله بس كل شي غالي لكن الله ييسر الامور ولا تشيل هم شهر العسل طلعه من راسك حاليا ابداء في اساسيات الشقه . والباقي دبر عليه وسافر وتراها ميسره بإذن الله . اتمنى لك التوفيق |
اقتباس:
اجار الشقه أقل شي 20 الف <<< ومستحيل ياصل 20 ! شقق الان واصله 30 وفوق لكن يلا علشانك نقول 20 ^_^ ناهيك عن الاثاث و الاحتياجات الاخرى أخوي اذا انت مملك وخالص مثل ماتقول تدين لك 30 الف والله يكتب لنا ولك الخير |
| الساعة الآن 03:14 AM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©