|
زوجة صديقي تحادث رجل اخر ما الحل ؟
السلام عليكمـ ورحمه اللهـ إلي اعضاء هذا المنتدى الشامخ الشهر علينا وعليكم مباركـ وتقبل الله منا ومنكم صالح الأعمال اسمحولي ابدأ علي طول وباللهجه العاميه ... ابي اسرد عليكم معاناة صديقي يا ناس قالي شئ وبصراحه استغربت لها الدرجة يعني صديقي متزوج له سنه الحين زوجته صارحته قبل فتره طويله بانها تشارك بالمنتديات وانها عضوة .. مشى الامر يعني شئ عادي تلهي نفسها بالنت شوي اكتشف قبل فتره وليست بالطويلة ان زوجته تتكلم بالمسنجر مع عضو واتوقع المشرف العام الي علي هالمنتدى بصراحه انصدم ما يدري انهبل يقولي ياخوي بغيت انهبل انا وش مسوي ... صاحبي اعرفه لاهوب راعي بنات يمكن من زمااااااان لكن تركهم من 3 سنين تزوج ليستر نفسه لكن يوم اكتشف هذا ما يدري وش يسوي يقولي بالله انصحني .. انا تفأجات فها السالفه حتى السالفه يالله قالها لي يقول استغفرت الله قعدت افكر في هالسنه الي طافت هل قصر معها بشئ يقول ياخي مدري وش فيها هي ما تقصر من ناحية البيت وتحبه وتتصل علي كل ما تأخر بالدوام (لانه ينتهي علي 4 ونص ) بس مو هنا المشكله هو يبي يعرف ليش يصير هذا الشئ الثاني يقولي وش اسوي وش الحل .. اهاوشها يقول اخاف اتكلم وانفجر يمكن اضربها اذبحها وش يدريني يمكن تجيبه البيت قلت ياخوي اذكر الله ... انا أعرف ان زوجته من بيت محافظ ومستورين وبالعكس عائلة يفتخر الواحد لكن يبي الحل من ضمن السوالف قلت ليش ما تعرف المنتدى وترسل لزوجتك رسالة باسم واحد ثاني وحاول فيها بالكلام قلها كلام كبير .. يعني كيف انتي يا عضوة متزوجه وتتكلمين مع شخص غريب هذا يمكن يفضحك ويخرب عليك بيتك يقول الحل الثاني وش اسوي هل اكلم اخوها بس لو اكلم اخوها علي طول ابتركها وابخليها تروح لأهلها بس يقول انا مابي اهلها يدرون .. المشكله ان صاحبي يحب اهل زوجته ... أنا والله تعبت بصراحه أبي اساعد صاحبي الطريقة الي عرف منها عن طريق سجل المحادثات اتوقع هالطريقه الي عرف منها من الاشياء الي تكلم عنها يقول اوول شئ يا ارسل رساله علي ايميلها بس من دون ما اعلمها انها انا الطريقة الثانيه الي قلت لكم عنها يرسلها علي اسمها في المنتدى وش رايكم ارجع واقولكم اذا صارحها انا اعرفه عصبي مرررررررهـ يمكن تطلع منه اشياء ما تنحمد عقباها ارجوكم يالاعضاء علموني ارشدو صاحبي واسف مرهـ ثانيه علي الإطاله ابي منكم الحلول الاشياء الي يخليها تترك هالشئ الرجال يحب زوجته ولا يحب يخرب بيتها من غلطه وهي بعد تحبه نسيت شئ : من ضمن كلامه يقول انا اشك في واحد من اخوانها انه يغازل اتمني ثم اتمني ثم اتمني مساعدة صاحبي هالاايام مهوب مرتاح لا في صيامه ولا حياته كلها |
قول لصاحبك بستعيذ من الشيطان ومايظلمها
ايش دراك يمكن تكلم احد محارمها ويمكن تكلم وحده مسجله باسم واحد وكثير بالمنتدى يسوا كذا وحتى على الماسنجر في الي تحب تدخل باسم ابنها او زوجها حرام عليه يوصلها لها المواصيل انا ضد وبشده انه تتكلم معاه بالخاص لو كان غير محرم بس اذابالمنتدى ومواضيع عامه مشاركه او رد هذا عادي ومافيه شي مجرد تعليق او رد وممكن تكون زوجته مشرفه بهاالمنتدى وهذا سبب التواصل وحتى لو فانااعتبره خلوه خلي صاحبك يتاكد بالاول والله يستر على الجميع |
اولا ::ا>ا رجال اكتشف ان زوجته تخونه مايجلس يقول اعطيني حل ويستشير خويه
يتصرف من عقله ياقاتل يامقتول انتهى الموضوع وش درااه انه المشرف مسرع تاكد من كل شي وش كان الكلام بينهم هي والمشرف على قولة خويك؟؟ يتكلمون في ايش؟؟؟ كدا على طووول فسر من عنده يقول زوجتي تكلم رجاااال لا وكمان زوجته خاااينه فرضا ومايبي يقول لاهلها!! غريب امره والله الرجال لاغار لايعرف زوجتي ولا شي على طووول ادا تأكد بيروح يقول لاهلها وانتهى الموضوع خويك هدا شكله فااضي ماعنده سالفه وزوجته لاتخونه ولاشي هو مريض |
حسبي الله على هالماسنجر اللي خرب بيوت الناس !!
! |
والله وانا اخوك الحل انه يواجها بالمحادثة اللي بالماسنجر ويسألها ليه تسوين كذا قصرت معاك بشئ ؟
وهي ما خانته انها دخلت واحد لبيته او كلمته تلفون علشان يهذري بهالشكل يشوف المحادثه ويسألها بناء على الكلام اللي دار بينهم و يقطع بادر المشكلة ويفصل الانترنت علشان لا يسبب مشاكل حرام ينهي حياته علشان محادثة ما سنجر |
السلام عليكم
المفروض ما يتسرع .. ان بعض الظن اثم .. يرجع لسجل المحادثات ويشوف طبيعة المحادثات اللي بينهم وبعدين يجلس معها جلسه هادئة .. اذا اكتشف انها مكالمات عادية .. ويوضح لها خطر الموضوع وبعدين ايش دخل ان اخوها يغازل ؟؟؟ ولا تزر وازرة وزر اخرى |
لا يتسرع ... نص صديقاتي حاطين اسماء ازواجهم او اولادهم على الماسنجر ..
قد تكون بنت .... قد يكون احد محارمها ... لا يظلمها بدون مايتاكد يدخل الماسنجر و يحول المحادثات و يحفظها .. و يقراها .. ولو طلع انه صدق رجال .. يشوف نوعية لكلام .. اذا فيه نوع من الادب و مايتعدى ... يهاوشها و يبين لها غضبه و ضيقه من هذا الشي.. بس ماتوصل للذبح و الطلاق و و لكن اذا نوعية الكلام كبيييرة و خارجه عن الحدود ساعتها لكل حادث حديث ... |
أشكر الجميع للمشاركة في موضوعي
في البدايه أريد ان اشكر صديقي متزوج ولكن علي كتابة موضوع مشكلتي ابو بالاصح همّي أنا صديق متزوج و لكن أريد أن اتحدث بلسااني لا بلسان صديقي لأتمكن من الردود المباشرة لكم مثل ما قلنا لكم زوجتي تشارك في منتدى وماشاء الله عليها مشاركاتها فاقت 14 الف مشاركه لا اريد ان اعلق شئ علي هالموضوع ما قصرت معها !!! وش تبي عاااد هي أكثر من كذا بخصوووووووص طبيعــة كلامها مع المشرف وكيف عرررفت يوم من الايام دخلت علي المنتدى الي هي مشاركه فيها وعرفت من النك نيم انه مشارك بعد فترة طويله وبالتحديييييييد الاسبووع الي فاات اكتشفت من خلال سجل المحادثااااات انها تكلمه سووالف الي بينهم كأنه مياانه ما ادري يمكن عشانها تشارك في المنتدى وطبيعه المنتديات انها يبينووون الضحك والونااسة وسوالفها معه كأنه عااايدي الي بااين من السوالف الرجال يبي يسحب كلالالام منها هي ما علمته انها متزوجه فيه بنت ثانيه بعد بينهم يعني شكلها عضووة او مادري يالربع دلّوووني علمووووووووووووني وش اسوي يالربع ان قلت لها ليش بتقولي ليش تتدخل في اشيااائي وانا ما علي منها ابهاوشها لكن عاااااااااااااااااااااارف نفسىىىى عصبي لو تتكلم ابقووم وابضرربها ضرب والله ان تتكسرر عقبها يالربععع وش اسوي قلت ابرسل رساله الي العضوو حسبي الله عليه وجعله ترجع عليه في خوااته يارب وزوجته ان شاء الله يارب العالمين في هالساعه المباركه وهالشهرر المبارك الله يهديهاا زوجتي ------- المشكله اني احبها وهي مهيب تقصرر تصييرر بيينننا مشاكل عايديه بس عاادي تصير عند احسن العوايل زوجتي ملاحظ انها تحبني غير كذا لين قلت لها تحبيني تقوول انا ابيك بس تووني علي الحب يعني بديت اتعلق فيك وهذا ما اكذبها منها لاني ملاحظه لين جيت من الدووام ولا جيت اخذها من اهلها تكفوون يالربع والنشامى وش تبوني اسووي |
الأمور هذي ما فيها انتظار
صل ركعتين وأطلب من الله السداد والرشاد في القول والفعل ثم اجلس معها ومهد في الكلام وعرض ولا تصرح في البداية كلمها عن موقفها منك أنت لو إعترفت لها بأنك كنت على علاقة محدودة ومحادثات بريئة مع وحدة من البنات بعد جوابها وإظهرها لغيرتها وحميتها فاجأها بمحادثاتها على الماسنجر ثم أخبرها أنك تثق فيها وفي حسن نيتها لكنك لا تثق بمكر الشيطان وبخطواته وانك لا ترضى ولا تقبل أبدا بمثل هذا الأمر وأنك لن تسمح بحدوثه وتكراره مرة أخرى حتى ولو وصل الأمر إلى الطلاق والفراق وألزمها رغما عن أنفها بترك المنتدى وعدم دخوله ابدا خذ معرفها وغير بياناتها داخل قاعدة بيانات المنتدى من بريد وكلمة مرور ضع عنوان المنتدى قمن قائمة المواقع الممنوعة في متصفحها لا تمنعها من استخدام النت لكن أشعرها أنك لست بمغفل أكد لها وأظهر لها دائما أنك تثق فيها وفي دينها لكنك في المقابل تخاف عليها من ذئاب البشر وأنك ما فعلت ذلك إلا خوفا وحبا وغيرة عليها |
لا يا خي لا تدعي عليه في خواته وزوجته لأن ما لهم ذنب ادعي الله يهديه ويبعده عنك وعن زوجتك والأعضاء يا خي ما قصروا عطوك حلول شف اللي يناسبك منها وأنا صراحة يا خي مستغرب انك ما تدري الى الحين ايش تسوي مع انه هذا بيتك واذا ما اهتميت باصلاحه بحكمة وحزم راح ينهدم وخذها مني نصيحة المحادثة بين الرجل والمرأة اذا أخذت فترة طويلة ولو كان ما فيه كلام وحب بس ضحك ووناسة على قولتك راح يتطور لأمر أكبر وراح هي تتعود عليه وهو يتعود عليها وينتظرون الوقت اللي يتكلمون فيه مع بعض علشان كذا اتصرف يا خي بحكمة ولا تخلي هذا الشي ما دام انك دريت عنه الحين انه يمر بدون وضعك لحد له |
مشاركاتها في المنتدى من الملل
محادثتها للمشرف بالماسنجر هذي لا لازم تطلب منها انها ماتكلمه لانه حرام حتى لو حديث عادي اعتبرها خلوه وبالاول اتاكد انه مش من محارمها او وحده لازم تتاكد قبل ماتظلمها والموضوع مايبيله عصبيه ولا شي كثير نساء بيجهلوا هالشي يمكن بتفكره عادي انت قولها بهدوء انك تخاف انه يكون حرام |
اخي الكريم
انا وزوجي نملك منتدى سويا ومشاركاتي فوق العشرين ألف لكني تحت عيونه ويشوف كل كلامي وما اطيح الميانه مع أي حد ومسنجري باسوورده مع زوجي وما اضيف فيه إلا البنات القريبات جداا جداا يا أخي .. في شي اسمه قطع اشتراك النت امنعها من هالشي وقولها انه يضايقك الظاهر ما عندكم اولاد الى الحين وزوجتك تمل من البيت اقتراحي تسجلها بدورة الصباح تشغل وقتها فيها .. واقطع النت من البيت بشكل كاامل هالفترة حتى تتخلص من ادمانها هذه نصيحتي لك .. يجب أن تنهي هذه المحادثات قبل أن تسفر عن شيء أكبر الله يهنيكم .. ويصلح قلبها |
شكـــرا لكمـ
جزااكم اللهـ خير وررفع مقدااااركم ! بصراحه فيه حلوولـ ززينه وماشاء الله ما قصرتوو بصراحه انا فكرت في اشياء تمهيد بصراحه اوول شئ ما بعد تمكنت وهذا شئ عيب في نفسي اني اصارحها علي طوول ابوضح لكم انا من طبيعتي اذا بغيت الشئ سواء نصيحه اصير امهد من بعيد الي بعيد بعدين اقوول الي ابيه يعني مع زوجتي بالذااات ما اجيها علي طوول وهي مثلا جالسه تطالع التلفزيوون واقولها ليش وليش وراك لا لا اجي واقولها تعالي غرررفه النووم سككري الباااب هي بذيك الساعه تلف راسها عشرين مره وبعدين اقولها الي ابي سواء شئ ما عجبني ولا لا اتوقع فيني خلل ما بعد مسكتها من الوسط يا ناس اسمحولي اقول شئ ثاني بتمر سنه يا ناس انا احس هالسنه طارت بسررعه ما بعد فهمتني ولا فهمتها هذا مجرررد احساااااااااس فيني اناااا يعني علي قوولت الناس بتعرفك وتعرفها بس مدرري يا ناس احساااسى يقوووول غير كذا يمكن عشان اول لاهيه بالدراسه الجامعيه غير كذا بعض الاحيان تجيني ايااام وبالليل ما فيه سواالف واذا صاارت وش اخبار اهلك وكيف الدراسه ويعني تجي ضحك وسوالف ولما سألت الحريم الي يقربوون لي قلت هل تجيكم سااااعات انتم وازواجكم تسكتوون فيها تقولي ايه ااه بس يارب ان تفرجها علي وعلي كل مسلم ارجع لموضووعي فكككرررت ارسلها رساله علي الايميل بعدها اجي اكلمها اقول تراك صرتي تااخذين وقت طوويل بالنت هذا مره قلت لها ليش تطولين بالنت وبالذاات الصباح من الفجر الين 8 او 9 كلمتها بسالمشكله رااسها عنيد وفيها عناد تقولي طيب وش اسووي رديت عليها قلت لها تعالي ناامي معي النوم احسن شئ الحل الثالث افصل النت واوول كنت معطيها اشتراك كونكت 5 جيجا بس رفعتها لـ مفتوح شكلي ابرجعها علي 5 جيجا خلها تنقهر ويفصل عليها ارسل رساله للعضوو ولها هي بانها يستهدوون ويذكروون الله ويتسغفرون ويتووبووون ولا علي منهم ان طولت السالفه والله لا اطيرها في بيت اهلها وافضحها عندهم بنت ..... انا انقهرت بس تكفون وش رايكم بردودوي اسمحولي ابيكم تحكمون علي .. انا عادي استقبل اي شئ منكم و جزاااكم الله خير |
أخي الكريم هذا الرد كتبته الساعة ظهراً12 ولكن لإنفصال النت أعدته من جديد ولكن متأخر عليك بالدعاء ثم الدعاء ثم الدعاء ، ومشكلتك هي مشكلة بدأت تظهر كثيراً في هذه الأيام ، ولكن أنت أعرف بطبيعة زوجتك ومدى تقبلها للكلام منك بدون ما تحمل هي على كلامك أنه ذرة شك أو ريبة و أنك فاهم ومطلع على تصرفاتها ، وتدرج معها بأسلوب غير مباشر في طرح المشكلة ، وإسال نفسك قبلها هل أنا مقصر معها في جانب من جوانب حياتنا أو لا؟ ، وبناء عليه حاول تحل المشكلة من مكان الخلل ، يعني لو كانت هي عاجبها كلامه المعسول وطريقة حواره ، فحاول أنك تكون المبادر في تحسين حوارك وكلامك بطريقة تنسيها اللجوء إلى شخص آخر من باب التغيير أو من باب معرفة تصرفات ذلك الشخص مع المرأة ، لأني أتوقع أن زوجتك باحثة عن عطف يمكن وجدته لكن دون ما تتمناه_ وهذا توقع لا أجزم به _وكذلك عليك بحسن عشرتها وإشغال وقتها بما يفيد حتى ما يكون لها مدخل لأمور أخرى ، وكذلك عليك و أهم شئ أنك تكون صابر وطويل بال ووسيع صدر في حوارك ونقاشك معها ، وحاول تمتص غضبها لو ثارت عليك وأحذر أن تمد اليد لأنها ما فيها فائدة وهي كلها شر وعواقبها غير حميدة والله يصلح حالك وحال المسلمين |
اقتباس:
السلام عليكم اخوي الكريم والله انت باين عليك ولد ناس وقبيلي وتحب زوجتك بحيث انك ما تحب تجرحها ابد وهذا شئ حسن وطيب لكن من الإقتباس اللي بالأعلى كأنك ما تبي تفاتحها بالموضوع حق الماسنجر والمحادثة اللي دارت بينهم عزيزي لابد من موقف حازم شد على زوجتك شوي وافتح الكمبيوتر وطلع المحادثه واقراها لها وقولها هل يرضيك اسولف مع وحده بالماسنجر مثل ما انتي تسوين ؟؟؟؟؟؟ موب عيب هاللي تسوينه يهوشها ويعلمها انه موب راضي عن هالوضع باختصار ويقولها وش الاهم عندك حياتنا مع بعض او ماسنجر ومنتدى مع شخص ؟؟؟؟؟ اذا قالت حياتنا يرد عليها خلاص مافيه انترنت لانه مافيه اي فائدة لك بالوقت الحالي واذا تكرر الشئ هذا لي تفاهم ثاني وصدقني بتترك المنتدى والماسنجر والانترنت كله <<<<< كان عندي منتدى وكانت زوجتي تغار من الردود واضطريت اني اقفله علشانها وبكذا ريحت راسي من المشاكل ووجع الراس والشك اللي ذبحني من جهتها اتمنى تاخذ الموضوع بنقاش جاااد وسيده مباشرة لا تلف وتدور برسل رسالة واشرح لها وافصل لها انت عصبي ياخوي معروف عن الرجل الشرقي عصبيته وغيرته على عرضه اصلا ماراح يكون فيه مجال للنقاش اذا هو شاف المحادثه وواجها بيطلب شرح منها وبتقول عااادي ويعصب عليها وهالشئ ما احبه ولا ارضى به ولا ترضين انتي اني اسوي هالشئ مع بنات بالانترنت ومن هالكلام وبتحس بخطأها وبيقطع الاشتراك وانتهى الموضوع ماراح تخرب بيتها بنت الناس علشان انترنت |
لو كان زوجي مكانك لذبحني منذ أمد بعيد!
ماذا تنتظر يا أخي؟ اذهب وواجهها وبين لها غضبك مما يحدث واقطع النت من البيت تماما.. |
اخي الكريم لا توجع قلبك ,, صارحها ان البنت اذا تزوجت ماتكلم رجال ثاني عن طريق المسنجر
لأن تتطور العلاقة ,, وانتي تبين الستر وتبين تبنين حياتج وتكونين ام ونكون اسره مانبي شي يخليج منشغله بطرف ثاني وانصحها نصيحه ثانية اشتركي بمنتديات نسائيه اسلامية صدقني راح تتوب من المحادثات لأن اهي بترااااجع كل الي تحدثته |
اخي رعاك الله
بالنسبه لزوجة صديقك فيجب التريث قبل اتخاذ اي قرار ربما يصب في غير مصلحته وتكون هناك ندامه طول عمره نظرا لحبه لزوجته ولاريب ان الرجل لايستطيع ان يرى زوجته تخونه وهذا اذا كانت قد خانته سوف اكمل ذلك بعد ساعه ونصف من الوقت الحالي نظر لقرب وقت صلاة العشاء والتراويح انتظرني رعاك الله اخوك / امير الشوق |
اخي الكريم
مازلت تبحث عن حل ؟؟ عجبي وربي ! تبي تقهرها وتنزل سرعة النت ؟؟ يقول ابن القيم - رحمه الله -: ( إذا رحلت الغيرة من القلب ترحلت المحبة بل ترحل الدين كله ). ولقد كان أصحاب رسول الله - صلى الله عليه وسلم - من أشد الناس غيرةً على أعراضهم. روي عن رسول الله - صلى الله عليه وسلم - أنه، يوماً قال لأصحابه: { إن دخل أحدكم على أهله ووجد ما يريبه أشهد أربعاً }، فقام سعد بن معاذ متأثراً فقال: يا رسول الله: أأدخل على أهلي فأجد ما يريبني، أنتظر حتى أشهد أربعاً لا والذي بعثك بالحق!! إن رأيت ما يريبني في أهلي لأطيحن بالرأس عن الجسد ولأضربن بالسيف غير مصفح وليفعل الله بي بعد ذلك ما يشاء، فقال!! { أتعجبون من غيرة سعد!! والله لأنا أغير منه، والله أغير مني، ومن أجل غيرة الله حرم الفواحش ما ظهر منها وما بطن } الحديث وأصله في الصحيحين. يا أخي الكريم .. اقطع النت كله من البيت .. في نساء لا يعرفون كيف يحافظون على الثقة مالك انت ومال هالمشرف وترسل رسايل وحالتك حاله ؟ انت عليك بزوجتك وبتقويمها !!! وربي متعجبة من ردة فعلك الباارده تجاه الموضوع |
اقتباس:
أنا مع هذا الرأي ....... وأستعجب من برودتك في هذا الموضوع الخطير وتأثيره على حياتك الزوجية مستقبلاً ... الله يهديك إلى الحل السريع والجذري ... |
السلام عليكم ورحمة الله وبركاته . . اخي الكريم مشكلتك مشكلة كبيرة ويجب ان تتعامل معها جيدا لكي لايتفاقم الأمر . . زوجتك بشر وهي معرضة للخطأ مثل ماانت معرض وانا معرض له . . نصيحتي بأن تترك عنك الأفكار التي تؤيد التصرفات الغير ايجابية لحياتك مستقبلا كضربها او فضحها امام اهلها والأنفكاك الأسري . . قد تكون هي ضحية لما لا ؟ قلت بأن هناك فتاة ثالثة فقد تكون صاحبتها هي من جمعتهم في المحادثة او جعلتها تكلم المشرف عن طريق الماسنجر . . اتمنى ان تتعامل مع الموقف بما ينبغي بعيدا عن الغضب . . مهد لها كما تحب وقل سأكلمك في موضوع هام قريبا ولا تقل لها ماهو الموضوع واجعلها تفكر كثيرا حتى تحس انك عرفت بخطئها . . انتظر يوم او يومين واذهب الى اي مكان مناسب كافي او مطعم يكون جوه مهئ للمصارحة . . تكلم بالبداية ان كنت مقصر معها في شئ . . تكلم معها لو حادثت فتايات هل ستغفري ذلك لي . . تكلم معها بكل مابداخلك حتى تحس بخطئها . . ومن ثم ادخل بالموضوع واطلب منها ان تصارحك بكل شئ . . اتمنى ان تحرجها كثيرا بأسلوبك وبتعاملك وقل لها لو كان بموقفي شخص آخر لطلقك بعد ضربك وفضحك هذا ان لم يقتلك . . قل لها سأمنحك فرصة واتمنى ان تكوني على قدر الثقة التي سأمدها لك . . صدقني انها ستندم وستندم كثيرا من تعاملك لها . . هذه حياتك اخي الكريم ويجب ان تكون اكثر شخص حريص عليها واترك عنك الشيطان فهو السبب في خطئها والآن هو يريد منك ان تنتقم ليحصل على مايريده من تفكك اسري . . آخرالكلام سامحها وامنحها فرصة جديدة فهي تستحق على الأقل هذه الفرصة . . |
اخوي لاتتأخر كثير
لانها يمكن مع الوقت تتعود عليه وتحبه واجهها بهدوء ... وعطها الثقه .. خلها تحس بالمسؤوليه يعني لومنعتها بتحاول تدخل من وراك اما لو تفاهمت معها وبعدين قلت انا واثق فيك وماراح احرمك من منتداك وعارف انك مارح تكرريها .... وخلها على ضميرها وراقبها من بعيد لاتحس عليك وحاول انك ماتخليها تفضى وتمل وتجلس عالنت خلك معها ودلعها واطلع معها .. وان جلست عالنت اجلس معها وتفرجوا واقرو مع بعض... |
ياخوي انا عندك معرفي معرف رجل لكني امراة
وبعدين اسالها واجهها ليش تستحي منها قولها مين هذا وشوف ايش تقولك ليش ماتسالها ليش تخلي الشيطان يزود المشكلة وتحترق بينك وبين نفسك تعوذ من ابليس بس من جد انك فاضي تدور لنفسك المشاكل |
اقتباس:
انا ايضا مع هذا الرأي وحاول انك ماتجرحها وتفضحها عند اهلها زي ماذكرت .. هي غلطت ويمكن ماتوقعت المسألة توصل لكذا .. لكن انت حاول تشد عليها وتبين لها غضبك من الموضوع وهي بتصحي من غفلتها .. وماراح تكررها باذن الله ... نصيحة لك ياأخي لاتخرررررب بيتك بسبب غلطة بسيطة وغفلة من زوجتك وفقك الله والهمك الصواب |
| الساعة الآن 06:29 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©