|
زوجي يخونني مع صديقة عمري (مستجدات )
كل عام وانتو بخير وصحه وسلامه
ادري اختفيت فتره طويله انتو ادرى بحالي ... اكيد البعض تســائل وش صار فيها ؟؟ والبعض مايدري وش السالفه للي مايدري عن السالفه هذا رابط الموضوع الاول http://www.66n.com/forums/showthread.php?t=186283 وللي شكك فيني وقال اكيد كذااااابه بقول له ( الله يســامحك ) وللي سأل عني بينه وبين نفســـه أهديه أجمل تحيه مع باقه من أخباري طبعآ أكيد اني ولـــدت ... ايوهـ ولدت وجبـــت ولد .... نسخه من ابوهـ .... العجيب اني احب هالولد بجنووووون أعشقه اموت فيــه طلعـــت كل حرتـــي من الحب بذا الولــــد وصـــار هو شغلي الشاغـــل ...... والخبــر الثاني .... بعد ماولدت حــاولت أسامحه .... بعد الاربعين حجز لي فندق وقلت بجلس معه اسبوع يعنني اغير جو وافتح صفحــه جديده جلست معه ثلاث ايام بعدين كلمـــت اهلي قلت تعالو اخذوني مااااقدرت وربي ماقدرت بعد اسبوعين برضه قلت بحاول ... رحت معه مكان شغله علشان مااضعف وارجع بعد هناك بعييييد مابقدر اقول لاهلي تعالو اخذوني هالمره بحاول ... علشان ولدي وعلشان قلبي وعلشان الناس والجمله الاخيره سمعتها من خالاتي كثيييييييييير كل شي نسويه علشــان الناس وياليت هالناس اللي خايفين على معاليهم من التأثر والحكي ليتهم يفيدونك لا بغيتهم .... دســـت على كرامتي ورحــــت ..... حاولت اتقبل الوضـــع لكــن .... كل ماضحك وبانت اسنانه تذكرت وكل ما مسك يدي تذكرت وكل ما قال لي حبيبتي تذكرت وكل ما ضمني لصدره تذكرت وكل ما طفينا اللمبات تذكرت وكل ما تغطيت وحاولت انام بعد تذكرت السرير جاب لي أزمــه ... لا لا .... كل شي يتعلق فيه جاب لي ازمه حــاولت أسامحه اعيش مثل الناس ... حاولت اني اتغلب على الجرح وماقويت وربي ماقويت .. مشكله لا صار اللي جرحك قدامك ليه ؟؟ لأنك كل ماحاولت تنسى وتقول عل وعسى يطلع بوجهك و ويرجع شريط الذكريات لوراااااااا لذيك الليله ... تذكرون اي ليله ؟ واليوم .... جيت علشان ... أبشركم ... ... اني تطلقـــت .... ما بغيت يمر علي العيد وانا معه ابغى تصير فرحتي بالعيد غيييييير لكن تدرون وش الحســـف ؟؟؟ ان اكيـــد بيكون هالعيد وكل عيد غير لأنه شوهـ فرحتي بالاعياد ليه ؟ حسافه ان زواجي كان بالعيــــد .... .. .. لي عـــودهـ |
اهليين عزيزتي وانتي بخير وصحة وسلامة وينك كل هالغيبة تصدقين انا قريت قصتك بذاك الوقت لكن ماقدرت ارد جداااااااااااااااااااااااا تاثرت يمكن اكثر وحدة تأثرت على اني ما تزوجت للان لكن القصة جد اثرت فيني يمكن مابقى وحدة من صديقاتي ماقلت لها قصتك .... تصدقين مرات اكره جنس الرجال من كثر ما اسمع بلاوي :( الله يهدي الجميع وكنت كل شوي انتظرك تدخلين وتبشرينا تنمنيت لك من كل قلبي نهاية افضل بكثير من اللي صار والله ما دري ايش اقول لك يمكن انتي ماعطيتي نفسك فرصه الى ان تنسين اللي صار لكن الخيرة فيما يختاره الله وربي يصبرك ويعوضك كل خير ويسعدك دنيا واخره والف مبرووك الولد الله يرزقك بره وصلاحه يااارب اختك د.المتفائلة |
كل عام وانتي بخير
الف مبروك علي المولود والحمدلله علي سلامتك وسلامته ,,,, ليش ياختي طلاق كان صبرتي وخليتي الوقت ياخذ حقه وعطيتي زوجك فرصه بتقولين مقدر ليش ما تقدرين اذا رب العباد يسامح ويغفر احنا البشر ما نقدر , وبعدين وش ذنب الولد الي بينكم حاولي انكي تصبرين وعطي نفسك وزوجك فرصه والوقت كفيل بالنسيان الله يهديك بس الطلاق خراب بيوت ومفتاح للشيطان نصيحتي لك يا اختي صلحي امورك بعقلك ماهو في عواطفك و وقفي جنب زوجك ودعيله بالهدايه الله يصلح حالكم.
|
الله يعوضك
الله يعوضك الله يعوضك والله والله والله ان قلبي تفطر من الرحمه والحزن يعلم الله حطيت نفسي لو انا مكانك وش راح يصير فيني.... لكن والله صح اني زعلت لكن فرحت علئ قؤة قلبك وشجاعتك بصراحه لو وحده اخرئ او انا خلاص ابطلب طلاق واقعد بحزني واكتئابي وانتي ماشاء الله قؤيتي قلبك اكيد انك حزينه لكن وقفتي مع قلبك وصارحتي الجميع وانفصلتي. الله يعوضك عاجل غير اجل. بصراحه انا انقهرت والمشكله اني ماقد قريت مشكلتك الي قد كتبتيها من الاؤل . |
ماادري كم المده الي ابتعدي عنه
هل هي مده كافيه للطرفين بلتفكير بلانفصال؟؟؟؟ ابموت قهر لؤ كانت مده قصيره.. اذا مده قصيره فاانا الؤمك الومك. |
حبيبتي
والله توني اقرء قصتك توني فهمتها توني وياليتني ماقريت ومعك حق تطلبين الطلاق ولو انا مكانك كان نفس طلبك وهو الطلاق ليش اكذب علئ عمري واعيش غصب معاه لا الطلاق ارحم من اني ادمر نفسيتي. |
حبيبتي
كل سنه وانتي بالف خير ياري ومبروك الولد اهم شي انه بكامل صحته وعافيته انا ماراح اقول ليش اتطلقتي وكان صبرتي اعتقد انك صبرتي بما فيه الكفايه ومدام الطلاق راح يريحك فانا مع اللي انتي ترضي نفسه وتريحي عمرك فيه مهما كان ابغض الحلال حمدلله على كل حال الحين صار عند ولد زي القمر ما شاء الله وعقبال ما تفرحي بزواجه يارب اهتمي بولدك واكيد انه شغلك الشاغل وشوفي لك وظيفه او كملي دراستك او حتى سجلي في دورات في نادي المهم عيشي حياتك وانبسطي محد راح ياخد من الدنيا غير نصيبه لا تفكر بالايام اللي راحت فكري قدام وحتى العيد اعتبريه اول عيد لكي مع ولدك والعيد اللي بعده خليه واعتبريه ثاني عيد الله يوفقك يارب واحيكي بصراحه على قوتك يكفي انك جربتي مرتين اما لو انا ولا مرة لان كل مرة اطالع في عينه راح افتكر خاصه اني افهم الانسان من عينه و اح افتكر نظرات عينه لمن كنت احبه والعكس وراح اشوف كيف نظره عينه اتغيرت قمه العذاب بالنسبه ليا اتمنى ما اكون اتكلمت كثير وازعجتك |
لاحول ولا قوة الا بلله, يالله ياكريم انك لاتبلانا يالله ياكريم انك لاتبلانا... والله مدري شقول غير الله يعينك على بلواك ويخلفلك خير من ما فاتك ويخليلك ولدك ويحفظه ان شاء لله. والله شي يكسر الخاطر بس وش نسوي هذي الدنيا.
|
يالله !!
والله إني دايم أفكر فيك .. حتى يوم شفت أسمك في المتواجدين في المنتدى قلت ليتها تكتب تعلمنا عن أخبارها .. والله إنك دايم على بالي .. جعلنا مانسمع عنك إلا كل خير .. بس تطلقتي :'( مدري أحس النهاية أحسن من كذا ؟! ننتظر عودتك لا تتأخرين الله يخليك .. ! |
لاحول ولاقوة إلابالله العلي العظيم بورك لكِ في الموهوب وشكرتم الواهب ورزقتم بره وصلاحه والحمدلله على سلامتك أختي الكريمة وكان الله في عونك وربط على قلبك بالصبر .. بإنتظار عودتك .. |
حبيبتي سامحيني بسالك
اللي يقالها صديقه عمرك ايش تبيع الحين ؟؟؟؟ (ايش تسوي في عمرها ووينها اصلن عنك ) لكي مطلق الحريه اذا ما تحبي تجاوبي او اذا جاوبك راح يضايقك انا اسفه مقدما |
أعانك الله.. لو كنت مكانك لما تحملت سماع اسمه على الإطلاق ومن المستحيل أن أفكر برؤيته.. عزيزتي حاولي ألا تحتكي به هذه الفترة سافري علك تنسين وتتمكنين من مسامحته.. تحياتي.. |
اختــي والله انك بمصيببه عظيمه واحمد الله انك حاولتي تقوي نفسك وترجعي له
والطلاق احسن حل واحسن عقاب لزوجك... ومبروووووووك النونو الله يخليه لك ويطول بعمره بس ... عندي اسئله واتمنى تجاوبي عليها واذا ماتبغين براحتك حبيبتي صديقتك .. علاقتها معه زنا ولا زاج؟؟ يعني جالسين يضحكون ولا صار شي ثاني اكبر؟؟ لما اكتشف انك كشفتيه بنفس الموقف كيف كانت ردة فعله وردة فعل صديقتك؟ معقوله مانصدمو واعتذرو لك ولا سوو اي حاجه؟؟ ودي اعرف.... زوجك لما طلبتي منه الطلاق وافق علطول؟؟ اذا ماتقدرين تجاوبين براحتك حبيبتي |
خلاص انا قريت باقي ردودك بس اللي محيرني موقفك انتي واخوك وش اللي صار وكيف زوجك وصديقتك بررو موقفهم ؟؟
والحمدلله انك ماسقطتي هذيك الفتره لان الطفل احلا مافي الحياه انا لاتضايقت وتندمت على زواجي والا على اي شي مايهون علي الا ولدي ... صح انه شيطان بس عسسسسسل الضنا غييييير ومستغربه كيف زوجك قدر يطلقك لانه واضح انه يحبك بس صديقتك لعبت براسه وخذت رقمه من جوالك .. وشكلهم كانو يكلمون بعض ... بس استغرب كيف بكريه وترضى ينام معها.... اااااااه بس ما املك غيرر اني ادعي ربي يعينك ويسهل امورك ويسعدك على طول ويجبر على قلبك ويوري صديقتك بزوجها المستقبلي اقوى من اللي شفتيه الله يعينك حبيبتي اهتمي بولدك وربيه .. ترى من يوصل 4 شهور تموتين فييييييييه يبدأ يضحك |
ماشاء الله عليك بجد اسلوبك رائع في الكتابه حاولي تكتبين في احد الصحف وصدقيني بأسلوبك هذا سيكون لك شأن خصوصا اذا كتبتي مواضيع تمس حياه الناس .
وما اقول الا الله يكتب لك السعاده في الدنيا والله يرزقك الزوج الصالح والحمدلله على ماصار . |
الله يصبرك ويهون عليكى المصيبه ويرزقك فرج من حيث لا تحتسبين يارب
قصتك مؤلمة لأقصى درجه وخاصة انك انسانه رقيقة المشاعر ولكن هذا حال الدنيا(احبب حبيبك هونا عسى ان يكون بغيضك يوما ما) ولكن انظرى للجانب المشرق طفلك ربنا يبارك فيه ويحميه بجد قلبى معاك |
افكر فيك علطول ... بكل مكان ...
استنتجت ان زوجك يحبك للآن وصديقتك هي اللي تعرفت عليه بدليل انها ارسلت له .. اناا فلانه ...!!!! بس في حال فكرتي ترجعي لزوجك بسنه من السنوات ... او حنيتي ... او خفتي على ابنك من الضياع تقدري تعرفي تفاصيل خيانه زوجك لك وكيف صارت انك ترسلي وحده من نفس منطقتكم لكن ماتعرفها صديقتك وتتعرف عليها شوي شوي وتشكي همومها وتمثل انها تحب زوج اختها مثلا ومن هالكلام وتبكي تمثييييل طبعا .. هذيك رح تطلع اللي بقلبها وتقول سالفتها مع زوجك .. وبكذا بتعرفين من وين بدأ الغلط بس ادري انك مارح تنسين اللي صار خصوصا انه خيانه بالفراش وبيوم حلو بالنسبة لك والله تدرين ان كلامك يقطع القلب؟؟ خصوصا هلا حبيباتي.... والله انبسط من اللي تبقى من قلبي على كلامكم وتشجيعكم اقول لسه الدنيا بخير ... في ناس توقف مع بعض .. خصوصا ان محد يعرف مشاعر البنت الا البنت مثلها تصدقون بنات .... اكتشفت ان اللي اصعب من مرحلة الصدمه بكبرها مرحلة مابعد الصدمه .. وانت تبدا تفك الخيوط خيط خيط وتبدا تحلل و تكتشف اشياء صارت من قبل وكنت تمررها بحسن نيه وانت تستوعب اللي صار بشوييييييييش وكأنك تشرب السم قطره قطره وانت تسأل نفسك باليوم الف مره ( ليه ؟ ليه ؟ ) وانت تناظر نفسك بالمرايه تدور على غلط فيك يبرر اللي صار تصدقون بعد وش عرفت ؟ ان اصعب وقت في هالمرحله هو الليل آآآآآهـ يا الليل لا جا الليل والكل دخل غرفته ينام وانت جلست بروحك بذي الزاويه والا على ذي الكنبه والا بذا المكان كل مكان تذكر فيه شي لا جا الليل وتزاحمو حولك الذكريات واحترت اي وحده فيهم تستعرضها قبل لا جا الليل وصار المكان هدووووووء الا صوت الساعه تذكرك بالوقت وتشمت فيك لا بغيت تبكي وعلشان لا يسمعونك تدفن راسك بالمخده او تحط يدك على فمك وتكتم الشهقه واصعب شي ... انك تبلع غصتك علشان محد يحس فيك ... والاصعب من هذا ... انك تلبس ثوب الكبرياء والشموخ قدام اللي حواليك وانت كل خليه بجسمك تصرخ آآآآهـ ... اصلا حتى هالحبوب ما تخليني انام ... مقدر انام والله يمكن كل اللي انامه ساعه ونص الى ساعتين باليوم بس تخليني ادوووووخ واسترخي ويبدا عاد على قولة امي الكلام اللي يقطع القلب لاني اتكلم وابكي وانا مااحس .... والله قطعتي قلبي حييييييييييييييييييييل وبكيت كثييييييييييير وربي انتي مثلي لابكيت ولا حزنت اكتب ولا احس بنفسي واتفاجأ باللي كتبته ومرات اخلط بين الانجليزي والعربي وارسم اغلب رسماتي عيوووون .... بس اللي ونسني انك بردتي قلبك وفضحتيها يارب لك الحمد والشكر فرررررررررحت من قلب ... صدق انك قووووويه ..لو انك ماسويتيها كان انقهرتي طول عمرك عشانك ماسويتي هالشيء |
يا عمري عليكي حبيبتي
والله انك على البال ألف ألف مبروك البيبي .. الله يقر عينك بصلاحه .. وماحد يقدر يلومك على اللي سويتيه .. الله يديم عليكي القوة والصحه والسعاده قولي آمين .. لك فاااائق ودي واحتراااااااااااااااااااااااااااااااااامي .. |
انـا فتحت الرابط الأـول ... قلبي والله قام يدق بشكل مو طبيعي عشت اللحظه وعشت احسااااااااسك ويووم فتحتي الباب وانتي متحمسسه ! هذووول مو ناااااااااس اقسم بالله مو اواااااادم ... شياطين الأنسسسس ! الله اكبر عليهم ...... اقسم بالله من الي حسيته ووصفك وبكاااااااائك كان نفسي اني اكـون جنبك واحضنك واخليك تطلعين كل حرتك بالبكي وربي شلت همك مثل اختي ... الله ينصررررررررررررك نصر عزيييييييييييييييييييييييييييييييييييز ... والف مبرووووووووووك عالبيبي الحمممد لله انه ربي رزقـك بولد لوووو يموت ماياخذه ... الحمد لله يااااااااااااااااارب ربي يفرح قليبك .. |
ليش ياختي الله يسامحك كنتي اعطتي كمان فرصه واضح انه الرجال عرف غلطته وندمان ويمكن مستعد يسعدك اكثر من اول ياريت لو كنتي سئلتي اخصائيه نفسيه عشان تساعدكم اشوي تتخطو الجرح الي انطبع في الذاكره ولكن خلاص حصل الي حصل
لا اتقولي العيد يذكرك ويحزنك لا انسى الاسى والخيانه وشوفي ربي عوضك بالطفل الي بين ايديك كل سنه وانتي بصحه وسلامه بمناسبه رمضان والله اتمنالك الخير من كل قلبي حبيبتي |
و الله قبل يومين فتحت قصتك و جلست أقرأ تذكرتك و قلت و ينها
عودا حميدا و مبروك الولد يتربى بعزك و يعوضك اللي فات |
الله يفرج همك يا رب و يعوضك خيراً منه و يخليلك البيبي ان شاء الله بكون شخصيته متل شخصيتك باعتبار شكله لأبوه أكيد الداخلي طالع إلك
يربى بعزك يا رب |
الف مبروك المولود الجديد و ان شاء الله يعوضك ربي احسن من زوجك...
انا لو محلك عملت نفس الشي ..وفقك الله حاولي تنسيه باي طريقه خذيلك اجازه و سافري يلي مريتي فيه مو سهل... وفقك الله |
باااااااااااااك رحت وقريت 26 صفحه بس عشان اشووف احداثك وتطووراتها ! انبسسسطت كثيرررررررررررررررررر من مواجهتك للحشره الي خانتك ! وانبسطت بعد انك سحبتي على طليقك لما نفذ وعده وكلمها وسبها ... الله يقووووووووووووووووووويك من جد مرأه قويه اسم الله عليك ارجع اقول الله يححفظلك البيبي .. ويباركلك فيه .. ماندري وش صار ... مع طليقك وهل طلب يشوف ابنه ؟ ولا لا ! وكيف سارت اجراءات الطلاق ؟؟؟؟؟؟ |
والله قصتك تقطع القلب لما قرأتها اول كنت ابكي على كل كلمه كتبتيها وبنتي تسألني من زعلك ياماما وتمسح دموعي والله وقتها اذكر اني ماقدرت اتمالك نفسي وماقدرت اخفي دموعي عن بناتي وزوجي ودعيت لك من كل قلبي خصوصآ اني مريت بتجربه مشابهه لتجربتك حسبي الله على الخونه والخاينات وقتها كرهت زوجي وتذكرت جرحي بس احيي فيك شجاعتك وتستاهل الخاينه الي سويتيه فيها ياليت تخبرينا اش اخبارها بعد فضيحتها قدام اهلها وزوجت اخوها اما الطلاق مقدر اقولك شي اتوقع حاولتي تعطي نفسك فرصه بس ماتحملتي انتي ادرى بمصلحتك ربي يوفقك ويعوضك خيييير ويباركلك في ضناك ويقر عينك فيه معليش ودي اعرف كم عمر ولدك الحين وبعدين آخر شي احب اقوله لك اذا انتي متأكده من مشاعرك تجاه زوجك وتأكدتي ان ماله حب بقلبك خلاااص ساعتها والله الطلاق ابرك لك وكل عام وانتي بخييير بمناسبة شهر رمضان
|
شوفي اختي اني بصراحة قريت قصتك من زمن وبصراحى اكثر بالبداية ماقدرت اصدق او استوعب الموضوع ولكن جلست وقريت كل صفحات قصتك وصدقتك ومن ذاك الوقت لحد الان انتي على بالي واقول يارب شو عملت عبالي انك رجعتي لزوجك عالاكثر وتمنت هذا ورديت عليك بالرابط الاتول انك تسامحيه
افرحني جدا خبر ولادتك يارب يخليه الك وبكون قرة عين الك يارب واحزنني جدا خبر طلتاقك بجد ماكنت تكون هذه نهايتك ولازلت اتمنى ترجعيله لسه امامك فرصة انسي يااختي دوسي على اي شي علشان ولدكم مو علشان شي ثاني الله يخليج اخبرينال بمستجد جديد انك رجعتيله اتمنى ذلك من كل قلبي |
شعرت بالغثيان من هول الصدمة
صدمة طلاقك لا أعلم ولكن الطلاق مرّ والخيانه مرّه والألم مرّ القلب مفطور والعقل ماعاد موجود يارب ترحمنا برحمتك وتجبر بخواطرنا الحمدلله على كل حال حمدآ كثيرآ يليق بجلال وجهك وعظيم سلطانك |
الحمد لله على السلامه اختي والف مبروك
بس ليش الطلاق ازلا راح تفرح صديقتك وثانيا الخاسر الاول انتي انتي الان مطلقه وعندك ولد وهذه الطامه الكبرى |
مرحبا عزيزتي...
الحمدلله على السلامة ويتربى النونو بعزك يارب..... وزين إنك قلتي لنا أخبارك...لأن قصتك شغلت بالنا...وعن نفسي حكيتها لجميع الأهل لأني كنت متأثرة جدا جدا...وصاروا بين فترة وفترة يقولوا لي...إلا شنو أخبار الحرمة اللي قلتي لنا سالفتها؟؟؟؟وأكيد كلنا كنا ندعي لك... ما راح أقول لك ليش طلاق...لأنك إنتي أعرف بمصلحتك....بس حبيت أقول الله يساعدك ويصبرك.... ومبارك عليك الشهر وعساك من العايديين... |
الحمد لله على السلامه
وألف مبروك المولود الجديد غاليتي استعجلتي في اتخاذ القرار! لأنه الإنسان عندما يكون مضغوط نفسيا وفي موقف حساس مثل موقفك راح يستعجل باتخاذ قرار الانفصال أعطي نفسك مهلة للتراجع شهر ...شهرين... ثلاثة ثقي أن رأيك سيتغير والله ييسر أمرك ويدلك إلى مافيه صالحك وصالح ابنك صدقيني ما أهون من موضوع خيانته, لكن للأسف صار حال معظم الرجال إلا من رحم ربي أثر فيهم الغزو الفكري للأفلام الأجنبية والمسلسلات التركية مادام هناك صفات طيبة في زوجك لاتتعوض بغيره فتمسكي به حكمي عقلك هالمرة!! اجمعي المعطيات والفروض وابحثي عن الأنسب لك سوِّي جدول لمميزاته والمقابل لسلبياته وشوفي الكفة اللي ترجح وارجع أقول الله ييسر أمرك ويهون مصيبتك |
اقتباس:
فعلااا انا ايضاا لاحظت اسلوبهااا في الكتاابة جميل جدااا الله يحفظك ياااارب وان شاء الله تسوي زي مااقالت الاخت وتكتبي في صحف اما موقفك فأنتي تحملتي وكسرتي وكثر الله خيرك بل احي فيك قووتك وصموودك وطلبك للطلاق مع انة النسيااان النعمة ولكن وضعك صعب جدااااا نسيت<<<<<< مبرووك على الولد:d الله يرزقك برررة يااارب والله يكتبللك الي فية الخير ياااارب |
الف الف الف مبرووووك على الـــــنونــــو ويتربى في عزك واسال الله العلي القدير أن يجيرك في مصيبتك و يخلف لك خيرا منه |
الف مبروك المولود وربنا يحفظه لك ويرزقك بره
أبسألك كم سوأل اتمنى تجاوبيني عليها : كيف زوجك معك بعد الرجوع وهل تشعرين فعلا بندمه؟ ماموقفك من صدك له بعد عودتك له؟ وما موقفه من الطلاق وهل تشعرين أنه متمسك فيك لأخر لحظه؟ وأسال الله ان يعينك ويرزقك الحكمة وفصل الخطاب ويلهمك الصبر والقوة لتربية هذا الطفل والله فرحت لما قلتي أنك حبيتيه غيرك ممكن أنها تكرهه لأنه كان ثمرة زواجك منه ولكن بارك الله فيك لموقفك منه وجعله الله من الصالحين. |
لي عوده معك
|
ما ادري اهنيك ولا اعزيك على العموم ياريت تردي على اساله الاخوان وخصوصا انك متواجده
|
صبــاح الآهـــاتــ
ألف شكــر للكــــل لكل اللي وقفو معاي لكل اللــي دعـــو لي ولكــل اللي شجعـــوني ... يمكـــن كثيـــر عاتبنـــي على موضوع الطـــلاق لكـــن ... قسم بالله بالعيـــن دمعه وبالقلب نـــاااااااار أنا طبعي اني لا قفيـــت مقدر أرجع ليــه أرجـــع ؟ تحسبـــوني ماحســـبت حســاب كلمة مطلقه ؟! تحسبــوني مدري وش يعنـــي نظرة تشمـــت وشفقه ؟ تحسبـــوني ما حطيت ببالي ان ولدي راح بعــاني ويعـــــاااني ويعـــــــــااااااااااني ياترى وش بقــول له لا كبر وصار يفهم وسألني يمه ابوي وينـــه ؟ يمه ... ليه ابوي مو معنــا ؟؟ يمه .. ليه كل ربعي ابوي يضمهم الصباح وانا لا ؟ ليه وليه وليه الله العالم فكــرت بولدي قبل نفســـي يانااااااس حـــااااااولت وربي مقدر الله العـــالم ... شقد عانيت ...وانا اقول .... ( اللي بينا انتهى..ابغى الطلاق ) صحيــح انا اخذت رغبتي وتطلقـــت لكــن أحس اني منكســرهـ ومنكســــــــرهـ ومنكســـــــــــــــــــرهـ تدرون في وشو طلعت حرتي ؟ بالكتابه ... لو تشوفون غرفتي اوراق بكل مكان .... قسم بالله انا ياللي اكتب لا قريت وش كتبت بعدين اجلس ابكي ليه ؟؟ ليييييييييييييييه هدمت اللي بينا ؟ليه ؟ تعبت اهذي تعبت ألوم تعبت ابكي تعبت من كل شي تعبت من كثر ما اسمع كلمة ( يا حراااااااام ) من الناس الناس مادرت اني انخنت ... ماتكلمت ...ماابغى اطلع مغفله قدامهم بس درو اني تطلقت ومحد له شغل بالاسباب ... تطلقت ... ياكبر ذي الكلمــــه ياترى بكرهـ ... راح ينفرون مني صديقاتي لأني مطلقه ؟ صديقات ؟ مدري اضحك مدري ابكي على ذي الكلمه صديقات ؟ معلش تحملـــوني ... أحس ودي ان يوقف مخي عن التفكير بس خمس دقايق والله بس خمس دقايق ودي الدنيا تــفضا دقيقه وحده بس بس دقيقه ابغى اصرخ .... ماصرخت ابغى اصرخ من اعماقي والله ابغى اصرخ ابغى انهاااار على صدر امي و ادفن راسي وانا ابكي لمن انام ابغى احد يحس باللي فيني تعبـــت أكابر تعبت امسح دمعتي لا يشوفها احد تعبت خووووووووووفي من بكره ومن الناس والله تعبت وربي تعبت كثير سألوني ... عن تفاصيل قديمه ابغى أؤدهـــا وعيـــت لا تمــــوت وكل مره ابغى اجاوب تتجمد الكلمه وتختنـــــق .... بحاول اجاوب عاللي اقدر والباقي سامحوووني عليه |
اقتباس:
وينهــا حاليا ؟ اللي عرفته انها انطقـــت طق من اخوها وجت امها لامي بعد ما ولدت .... تكسر خاطري هالام تقول لامي وهي تبكي .... والله ضربناها والله ماكنا ندري الله يخليكم لا تفضحونها امي تقول .. هي فضحت نفسها بنفسها امها مسكينه ..على بالها بس طلعات ماتدري انها راحت الشقه قسم اني يدي ترتجف لا طرت لي هالشقه تقول امها والعهده على الراوي انهم حرموها من كل شي ولا ادري وش معناة كل شي |
معلش تحملوني
النت صاير بطئ مدري وش فيه اقتباس:
اقتباس:
اقتباس:
كيف انا ردت فعلي زين اني ماجنيت عارفه حبيبتي انا من النوع الكتوووووووووم يعني لا انصدمت من حاجه اسكت من الصدمه بس اتجمد اتجلد احس اني بحلم اقتباس:
اكيد ضحكو سوا على سذاجتي اقتباس:
عارفه ؟ احيانا الواحد ... لا تيقن ان الطرف الثاني يموووت فيه تدرين وش يتوقع ؟ يتوقع انه بيغفر له كل اخطائه وانه بيعتبرها زله وعدت بس مو بقاموسي ادري اني ماوضحت كثير المعذره |
اقتباس:
ايه من كثر حبه لي اهداني هالهديه يابختي يابختي انا زوجي غيييييير كل الناس اوووه نسيت طليقي غير كل الناس توي اتعود هالكلمه... كيف قدر يطلقني ؟؟ طبعا يقدر اللي قدر يخون مايقدر يطلق ويحمد ربه اني مانشرت سالفة خيانته بين الاهل احتفظت بالحزن بروحي واحتفظت بالالم بروحي واحتفظت بذيك الذكرى بروحي ولا سألوني الناس قلت قسمه ونصيب .... هددته ... اذا ماطلقت بضطر اني افضحك لاني مو متحمله اعيش معاك ولا اني اكون على ذمتك وعلشان نفسه وسمعته ومكانته طلق وراح .. اما سالفة انها بكريه وما بكريه .... مدري بالضبط هم وش سوو بس كان الوضع مخزي |
اقتباس:
عارفه حبيبتي اول واحد شجعني عالكتابه هو هو ماغيره كنت كل ماكتبت حاجه جديده جيت وسمعته اياها وفعلا صرت اكتب اكتب باحد المنتديات ومعروفه هناك وكان ببالي مشروع الجرايد لاني لقيـــت عروض بس ... ياترى الناس راح تتحمل كل هالحزن ؟ لاني لو بكتب ماراح اوقف ولو ببدا اهذي ... اكيد اكيد بيطردوني لاني تعيسه وكتاباتي صارت تعيسه .. |
| الساعة الآن 10:06 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©