|
زوجي و الضرب طفح الكيل و نويت الطلاق((مستجدات الرد 44))
مشكلتي زوجي العصبي جدا، يضربني عند حصول أي نقاش حاد بيننا ولأتفه الأسباب في كل مرة أسامحه ولا أتفوه لأي أحد وفي كل مرة يتعهد لي أنه لن يعيدها وبعد حصول مشكلة أخرى يرجع يضربني واليوم حصل نقاش بيني وبينه حيث أنه يسكن معي في بيت أهلي ولا يدفع أي مبلغ وعندما طلبت منه أن يقوم يرى حل لمكيف أمي المتعطل حيث أنها مريضة وليس لديه أحد أخذ بالصراخ والتذمر والله صرت أستحي من قعدتي في بيت أبوي وهو ما يسوي لهم شي والوالد متوفي وهو بس ياكل ويشرب وينام حتى خواتي بدوا يتكلمون عنهواليوم بعد هذا قام بضربي ضربا مبرحا جعلني أصيح بشدة واتصلت بأختي وأخبرتها بأني نويت الطلاق وأخبرتها ولأول مرة فتفاجأت وأخبرت ابن أختي واتصل به وتكلم معه فأنا محتارة أحس إني كرهته لكن أفكر في ابني الذي عمره سنة وابنتي التي عمرها ثلاث سنوات.
|
الله يهديه
السلام عليكم يااختي,,,, وكل عام وانتي بخير
اول شي يا اختي تعوذي الشيطان واذكري الله ولا تفكرين بالطلاق نهائياُ للأن الطلاق يا اختي خراب بيوت ودمار لكي وللزوجك فكري بحل يحل المشكله حاولي تتفاهمين مع زوجك بهدوء واذا مانفع شوفي احد عاقل في العائله يتفاهم معاه ,, وبعدين ليش ساكن عند اهلك ليش ما يفتح بيت؟ الله يهديكم |
اقتباس:
وانت بألف خير مشكور أخوي هو حالته المادية كانت صعبة خصوصا في بداية زواجنا وللحين تقريبا والايجارات سعرها مرتفع ما يقدر عليها وهو أكثر من نصف راتبه يروح للقروض وحاليا موقوف عن العمل صار له ثلاث شهور ويمكن يكون انفصل عن عمله بس ما يبي يقول أنا أعمل وأساعده يا ريت لو يأجر لي شقة عشان أحس بعزة نفسي والله تعبت وياه صابرة على كل عيوبه وبالرغم من ذلك يضربني |
غاليتي "زوجة تحب زوجها"
يتضح من اسمك بأنك تحبين زوجك وأنت عندك طفلان .. ولد وبنت هل تعتقدين بأن أحداً سيشعر بهم ويحنّ عليهم مثل أباهم يمر الرجال أحياناً بفترة من تعسر المزاج .. خصوصاً عندما يسكنون في بيت أهل الزوجة لماذا لا تخرجون لبيت يكون ملكٌ لزوجك؟؟؟ فهو فيه سيحس برجولته وسيطرته أكثر ونفسيته ستتحسن أكثر عندما يكون في مكان له وأنت ستحسين بأهميته عندما يصرف عليكم من نقوده الخاصة وسيكبر احترامه في نظرك فكري بشكل جدّي في السكن لوحدكم لو كانت ظروفه تسمح .. |
عذراً أختي فأنا لم أرد ردّك السابق
لذا سأضيف الآتي كل الظروف التي يمر بها زوجك تدل على أنه يمر بفترة صعبة فما أصعبها على الرجل عندما يشعر بأنه عاطل عن العمل .. وهو كذلك إنه أيضاً مدين ... وعليه قروض .. وهي صعبة عليه أكثر حاولي أن تحتويه .. وتخففي عنه .. ولا تزيديها عليه أكثر غاليتي فهو في هذه الفترة يحتاجك جداً .. بجانبه .. لأنك أنت ملجأه وسكنه الوحيد |
اقتباس:
واقفة معاه في كل أزماته مساندته ماديا ومعنويا لكن هو ما يذكرني بخير أبدا والله الوحدة تنقهر تعطي تعطي وما تاخذ شي أبي بس كلمة حلوة ومعاملة عدلة |
؟؟؟
انتي الظاهر انك مدللته علي الاخر يعني زوجه وفاتحه له بيت وقايمه في مصاريفه بعد لا يا اختي هذا غلط الرجل مايعيش تحت ظل زوجنه مهما كان ممكن بعض الازواج يقبلون المشاركه من الزوجه لكن انها تكون مسئوله عنه مسئوليه كامله لا ما يجوز ,,,, عموماٌ لازم توقفيه عند حده وتصحينه من نومه يانه رجال يصير ملتزم في شغله او يدور له علي شغل ثاني والاهم ياختي موظوع مدة اليد حاولي انك ماتناقشيه اذا كان معصب ولا تكثري معه الحكي والطلبات و هو معصب واذا ما نفع معه دخلي ابوه في الموظوع او احد اخوانه بشرط ان يكون شخص عاقل , والله يهديكم
|
والله احلى من اسمك بالمنتدى مالقيت صلي على النبي واخزي الشيطان
زوجك يمكن نقسيته تعبانه من ضروفه الصعبه ويمكن بقلبه حازز هالشي لانه عايش عند اهلك وقلتي ما يسوي شي الله يهديه يبغى باي طريقه ينفس عن نفسه ويبين انه لسا هوا الرجال يقوم يضرب وطبعا غلطان مافي شك بس تفاهمي معه ودخلي وسيط حكيم من عائلتك او عائلته لازم يفهم انك تتذي من الضرب وعاده سئيه انه يعملها ورمضان قرب يا عسل استغليه بالدعاء عشان ربنا يفرجها ويفتحها عليكي وعلينا من اوسع ابوابه |
اقتباس:
أبوه رجال كبير وما عمري أخذت وعطيت معاه بالنسبة لأخوانه كلمتهم مرة عن طريق الهاتف ولم أعرف ماذا فعلوا معه |
اقتباس:
والله انا على طول أقرأ القرآن وأدعي له بالهداية المشكلة اني والدي متوفي وليس لدي أخوان ولا أجد رجل من العائلة قريب مني أستطيع أن أحكي معه هذا الشي لكن مرة تدخل زوج صديقتي وتغير زوجي لفترة ثم رجع على نفس الأسلوب |
الله يعينكم
طيب يا اختي اذا هو مجتهد من ناحية العمل بس ظروفه ما تسمح الله يعينه وصبري عليه اشوي ودعيله ان الله يوفقه وصدقيني مواقفك معه مره مشرفه واكيد هو حاس فيها ومنقهر من نفسه فالاتظغطي عليه اذا بغيتو شي منه يسوسه في البيت اطلبيه باسلوب حلو واصبري يا اختي شوي الصبر مفتاح الفرج,,,,, اما بخصوص اذا ماكان فيه احد من العائله يقدر سكلمه انصحك برجل دين يا امام المسجد او اي شخص ملتزم اخر, اسال الله ان يلهمك الصبر وطولت البال وان يهديه لك ويوفقه في عمل مناسب وتفتحون بيت علي قدكم.
|
اقتباس:
حتى قلت له اذا احتجت لأي مبلغ لا تطلبه من أي شخص وانا موجودة في ظل هذي الظروف لكن اللي قاهرني كثرة الضرب اللي يضربني والله انا قاعدة على النت الحين وجسمي كله آلام في كل مكان وتعبانة وايد |
؟؟؟
اذا المشكله في الظرب خلك صاحبة موقق وطنشيه ولا تعطينه مبالاة وازعلي عليه ولا تكلمينه نهائياً الي ان يتعدل.
|
اقتباس:
المشكلة مو بس الضرب ألفاظه بديئة حدا ، أسلوبه في الكلام دائما حاد وكأنه يتهاوش وما يطلع نفسه غلطان أبدا لكن أنا بهدي بعد هالمرة عشان شهر رمضان وفضله عند الله احتراما لهذا الشهر الكريم الله يهديه |
افا بس افا
زوجك يحبك وقاهرته الدنيا حيل ضربه لك لايعني انه يكرهك ؟ لا... الضرب بمعنى يازوجتي ياام عيالي انا ماانا زوجك الاول؟ |
صحيح زوجك ما يستحي و عينه قويه على كل اللي مسويته له كمان يضربك و يهينك ؟؟ الغلط منك يا اختي انت اللي عطيته المجال انه يعاملك بهذه الطريقه .. اوقفي عنه المصروف .. اطلبي منه ان يبحث عن عمل .. واذا اراد ان يستلف من الناس اتركيه يستلف ويدبّر اموره .. واذا اراد ان يأخذ منك المال لا تعطيه الا بعد ما يوقع لك على ورقه انه استلم منك المبلغ .. اذا تعاملتي معه بهذا الاسلوب راح يحترمك .. اما بالنسبه للضرب فهذا غلطك ايضا .. يا اختي هدديه بالشرطه خاصه انك ما عندك رجل يحميك عشان كذا مستضعفك .. ومو مبرر ان وضعه المادي صعب يعني يضربك على الطالعه و النازله هذا بدل ما يبوس ايدك كل يوم انك تصرفي عليه و على اولاده .. اختي هدديه بالشرطه واذا ما نفع التهديد بلغي عنه الشرطه عشان يعرف ان في قانون يحميك .. لكن اذا سكتي عن حقك راح تموتي من القهر .. في بعض الرجال ما ينفع معهم الطيبه .. اذا صارت الزوجه طيبه يدوسها .. لكن اذا صارت الزوجه قويه و ما ترضى بالاهانه و تعرف تاخذ حقها يعمل لها هذا الرجل مليون حساب .. لا تسكتي عن حقك يا اختي او راح تصير حياتك دماااااار في دماااار .. |
اقتباس:
إذا أنا ما صرفت على نفسي وعلى أولادي احنا اللي بنضيع وهو يمر بضروف صعبة وموقوف عن العمل وهو اذا عنده فلوس ما يقصر علينا فأنا ما أقدر أشوف البيت فاضي وأنا واقفة أتفرج خصوصا واحنا على ابواب شهر رمضان بالنسبة للضرب رحت مرة للشرطة واشتكيت عليه بس بعدين أخذ يترجاني وكنسلت الشكوة ألحين مو عارفة شسوي معاه وكله يتحجج علي ويطلع في عيوب وألفاظه جدا سيئة معاي وحتى مع الاطفال |
والله انا انصحك وانا حاطه نفسي مكانك
ليش الصبر فوق شينه قواه عينه فوق ماعنده وظيفه وساكن عند اهلك ومو محترم اهلك يطق وكلام وسخ اقلها يحترم اهلك شكله يفرغ فيك عقده_ عذرا_ الرجال صج مايطق لو اش يصير شوفي اهو يمكن يحسبك تبينه عشان الفراش اخذي قرار وبيني انك مستغنيه يمكن يتسنع وبعدين اذا حس بالغلط ترجعين له |
اقتباس:
قلت له ما أبيك وأطلع من البيت وروح لبيت اهلك خلاص مو طايقة أطالع في وجهه لكن في نفس اليوم رجع للبيت لأنه وين بيروح وبعد مو حاس بغلطه يتحجج بالبنت لأنها فعلا متعلقه فيه وايد والله نفسيتس تعبانة الوحدة اذا تعبت من زوجها تروح على بيت أهله وتريح عشان تبعد عنه لكن أنا موقادرة أبعد لأني ساكنة في بيت أهلي وهو ما يروح مكان ثاني تعبت منه بانسبة للفراش أنا من أمس ما نمت معاه على نفس السرير نامت معاه البنت وانا نمت مكانها قولوا لي اشلون اتخلص منه ومن عذابه وقالي بعد أنا ما بطلق لو شنو يصير والله محتارة |
شوفي الوحده تزعل من زوجها بكل شيئ الا بالفراش
يعني دامه بالبيت نامي جنبه طبعا هالنصيحه بشكل عام بس بالنسه لج قولي دامك تطقني طلقني خلاص كل واحد يروح لاهله قولي القلب مايجيه شوك يعوره لكن يجيه كلام يعوره _الحكي شوك القلوب_ وانا ماشفت قدري عندك الا بالطق والكلام الشين وغيري من الحريم يلبسونهم رياجيلهم الذهب واليدين مغاريف القلوب وانت تنجبلي طق وطراقات واللي خلاك تكف يدك من المسؤليه كفها من الطق واهلي ماطلبوا منك شيى ولاجوك بشر مايبون منك الا تحترمهم وتعز بنتهم يا اخي اذا ما تقدر على اخترامي طلقني خلاص_ تزوجنا عن البوره واضنينا عن العقم عطيه هالكلام بهدوء وجديه بس وبيني انج صامله عشان يتعدل بس حقيقه لا تخربين بيتج |
اقتباس:
مرة رحت معاه عالبحر وتكلمت معاه بهدوء وقلت له لا تضربني ولا تسب أهلي ودائما أهدده اني برفع عليه دعوة في المحكمة لكن أحس إنه خلاص ما منه فايدة مد اليد شي يسري في دمه والألفاظ البديئة دايما على لسانه ما عنده حلم يغضب لأتفه الأسباب |
اقتباس:
غيري قفل البيت خليه يروح لأحد من اخوانه ولا يروح لاحد من اهله لما ما يلاقي بيتكم مفتوح له بيروح لاحد من اهله وبيسألونه وش السالفه زوج مثل كذا العيشه بدونه افضل من العيشه معاه شلون بيكبرون عيالك وهم يسمعون كلام بذيئ شلون بيحترمونك عيالك وهو يضربك ماعندك خوال او اعمام خليهم يتصرفون معاه او اذا طلع غيري قفل الباب وخليه برا دام هذا أسلوبه |
يا اختي العزيزة الضرب لا يكون ابدا للبشر ..
و انا لن استخدمه قط الا لو استهترت زوجتي بحياتها بمعني انها قد تؤدي بتصرفاتها الي موتها او حدوث حادث فظيع لها و ذلك من خوفي عليها . و هناك الكثير من الوسائل لتاديب الزوجة اولها التفاهم ثم .. التفاهم .. ثم التفاهم .. ثم .. الرشوة اقصد الهدية .. فان لم تنفع .. فيكون حرق الدم ، اي الاتيان بتصرفات تضايق الزوجة او تغضبها ، فاذا كانت الزوجة لا تتاثر بحرق الدم و تواجهه ببرود او العكس تكون انفعالاتها حادة جدا جدا لدرجة يخشي علي صحتها منها ، فليس امام الزوج الا ............ الوش الجبس Masked Face ااي التعامل البارد الخالي من اي شعور او انفعالات ، الخالي من اي عواطف ، و هو ياتي في اغلب الاحوال بنتائج رائعة و خصوصا اذا كان الزوج حنونا و عطوفا و رومانسيا و دائم الاهتمام بزوجته فان لم يكن فيه هذه الصفات فاشك ان تؤتي هذه الطريقة ثمارها . |
اقتباس:
ثاني شي ما أقدر أسوي هذا الشي أحس بيكسر خاطري مع إنه كاسر خاطري على طول المشكلة أقل شي يضايقه يتنرفز وقعد يسب فيني ويقول كلام جارح اللي كاسر ظهري العيال وخايفة فعلا انهم ما يحترموني |
اقتباس:
أنا الحين قاعدة اطبق هذا الأسلوب كلش مو قاعدة اعطيه وجه واذا كلمني بالغصب أرد عليه وأحس هذا الشي قاعد يضايقه بس هالألفاظ البيئة مو قادر يتخلص منها حتى مع العيال |
اقتباس:
بالنسبة لأهله ما يدرون عن خلافاتنا مع بعض وهو ما يخبرهم أبدا يعني قدامهم واحد مثالي يلبس قناع خارج المنزل ويخلع القناع مجرد دخوله الى البيت عمام ما عندي خوال عندي بس ما في علاقة بينا حتى زيارة ما يزورونا |
اختي هل كلمتي احد من اهله عن اسلوب تعامله معك ؟؟؟؟ |
اقتباس:
واتصلت بإثنين من أخوانه اللي أكبرمنه وكلمتهم انتقذوه وقالوا لي احنا ما نرضى انه يضربك وهذا شي غلط وبعدين هو هاوشني يوم خبرتهم وقال لي هم أصلا يضربون زوجاتهم وبعدين ما بذر منهم أي اتصال بي ولو بمجرد للسؤال عن أحوالي بس وانتهت السالفة ورجعت اتكلم معاه عادي بمرور الأيام لكن هالمرة أبي حل للحين ما نمت معاه على نفس السرير وما أتكلم معاه الا كلام محدود جدا واذا اتصل لا أرد على مكالماته أرجوكم ساعدوني |
اقتباس:
مع العلم اني أعلى منه في العلم والعمل والمشكلة اني تزوجته بحب لكن ندمت |
جاء الليلة يتأسف ويقول هذي آخر مرة وماراح أعيدها
لكني ما صدقته لأن كل مرة يوعد ويخلف ويكرر الخطأ هو عصبي وايد ويثور لأتفه الأسباب مو بس معاي حتى مع الأطفال بنتي عمرها ثلاث سنوات ويعصب عليها ويضربها لكنها تحبة ومتعلقة فيه وايد وتحبه أكثر مني وتفضل البقاء معه على أن تبقى معي واذا سمعت نقاشي معاه وانا أقوله طلقني وما أبيك تصيح وتقول لا تروح بابا أو خذني معاك أبي أروح وياك تكسر خاطرب وايد أحسها تحبه أكثر مني بالرغم إنها تشوفه وهو يضربني هو متضايق اني أعامله بهذي الطريقة ومنقهر أكثر كلما شافني على النت يفكرني قاعدة عالمسنجر لأن كلما يجي يمي أصك اللاب توب أبي أقهره مثل ما قهرني |
اقتباس:
لا تقبلي اعتذاره ودعي معاملتكِ جافة معه لكن انتبهي أختي لا تنامي بعيدا عنه بل تحملي واستلقي بجانبه.. دعي كلامكِ معه عند الضرورة فقط وإياكِ ثم إياكِ أن تليني له فإذا اشتكى قولي له "انت اللي تبي هالمعاملة".. يبدو أن زوجك مستهتر ولا يفهم وحشية ما يفعله.. في انتظار أخبارك.. |
اقتباس:
لا يوجد أي مبرر او سبب يجعل الزوج يضرب زوجته إلا ما حدده الشرع وهو النشوز وجعل الضرب آخر الحلول ،، ضرب الرجل للمرأة منافي كليا لأبسط معاني الرجولة ،، أنا رجل ولكن شعرت بالقهر مما قرأت ،، أنا لا أؤيد فكرة الطلاق ،، لا تستعجلي أختي الكريمة ،، الحوار الجاد مهم وأعتقد أنه لابد من تدخل شخص كبير من عائلتك لوضع حد لموضوع الضرب في حال لم يفلح الحوار ،، أسأل الله أن يفرج همك ويهدي زوجك ،، |
اقتباس:
وهو يقول لي اذا صار في بنتي شي انتي السبب وراح تشوفي شنو اسوي فيك ما برحمك ترى البنت أغلى منك يجرح بكلامه وبعد يبيني أسامحه |
اقتباس:
هو شخص فوضوي لا يتقبل الحوار الجاد وليس لدي شخص كبير قريب مني يتدخل وهذا ما جعله يتمادى في ضربه لي أنا الحين قلت له اذا ما بتطلق يكفيني انك تتعهد بعدم ضربك لي أمام شخص من أهلك وشخص من أهلي لكنه رافض تماما ولا يريد أحد من أهله يعلم بما يفعل |
اقتباس:
اختي لازم تخبري احد من اهله عشان يرتدع مو معقوله اللي قاعد يصير ..ارفعي سماعة الهاتف و كلمي ابوه او اخوه الكبير عشان يتصرفون معه و قولي لهم اذا ما راح يتسنع راح ارفع عليه قضية في المحكمه عشان يلزمونه انه يعاملني بالمعروف و يعطيني حقوقي الشرعيه من مصرف و سكن و نفقه واذا ما قدر على هذه الاشياء غصبا عن راح يطلق وراح ارميه في الشارع او خلوه يتأدب ويعاملني بالمعروف .. |
اقتباس:
ايش هذا الكلام يا اختي ؟؟ ليش تستفزي زوجك خاصه انك عارفه انه عصبي ويثور بسرعه ويمد يده عليك .. هذا معناته ان الخلل ايضا منك اختي .. حاولي كثر ما تقدرين انك ما تستفزي زوجك .. |
اقتباس:
بارك الله فيك اختى اميرات والله انا كنت عاوز اقول كدة وانت اختى الكريمة زوجة تحب زوجها يعنى ابعدى عن الاشياء التى تثيره بلاش عناد وبلاش نقاش الى درجة الجدل والصوت العالى ولا تنسى ان جلوسه فى بيتك يشعره بالذل وخصوصا عندما تحتدى عليه ثم راعى يا اختى ان افظع شىء هو جلوس الرجل بدون عمل ذلك يشعره انه مثل الحرمه ولا قيمة له نسأل الله ان يرزقة ببركة هذه الايام الفضيلة وتذكرى منه الخير لكى تصبرى على شره وطبعا نحن لا نرضى الضرب الى اخت مسلمه مهماكان السبب ولذا استمرى على القطيعه ولا تتعاملى معه ابدا واعتقد انه شرعا لا يجوز حتى ان يطلبك الى الفراش واذا لم تليى اعتقد انكى غير آثمة لان الرسول صلى الله عليه وسلم قال لا يسب الرجل زوجته فى نهار اليوم ثم يأتى يطلبها فى ليله لان هذا يتنافى مع المشاعر الانسانية كيف زوجة تضرب وتسب فى النهار تأتى بأفعال كلها حب ورومانسية فى نفس اليوم وتنسى كل الضرب والمعاملة السيئة ولا تنسى الدعاء والتضرع الى الله عز وجل وخصوصا قبل صلاة الفجر |
اقتباس:
يعني أخليه يتكلم ويجرحني وأظل كله ساكته عنه وهو بعد تصرفاته وعدم تحمله للمسؤولية يخلينب أنا كمان أتنرفز وأعصب |
اقتباس:
انت تقول بلاش كلام ونقاش معاه هذا معنا اني أشوف الخطأ وأظل ساكته وهو بالفعل ما راح يعصب اذا أنا ما تناقشت معاه أو كلمته أو طلبت منه يسوي حاجة لأن هو بطبيعته لا يتقبل الكلام أو إني أطلب منه شي هذا الشي بيأثر على نفسيتي وبظل كاتمة داخل نفسي عشان بس هو ما يعصب هو حتى أهله أعتقد انهم ما يتناقشون معاه بسبب معرفتهم له أنه سريع الغضب والإنفعال |
المهم أنا للحين ما تكلمت معاه
وهو اليوم ظل نائم تقريبا للعصر وبعدين وقت الإفطار لم يأتي ليأكل طرشت له بنتي تناديه عشان يفطر قال ما أبي أنا فكرت إنه قاعد يضغط علي عشان أكلمه لكن بعدين اجا وقال انا ما أبي آكل لأني أنا ما اشتريته بس أنا كسر خاطري وحتى اكلت قليل وقمت كنت اشوي وأضعف وأروح أكلمه وأخليه ياكل لكن أسلوبه لا يزال على حاله ولا محسسني انه ندمان أو حزين قولوا لي شسوي أكلمه أو أتم على نفس الأسلوب والمعاملة |
| الساعة الآن 10:25 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©