|
أفكر في طلاق الزوجة الثانية
يااخوان انا باآخذ رايكم وبكل جديه
وتكفون تكفون تكفون ابي الردود اللي تفيدني انا وبدون اي مقدمات؛؛؛ كنت متزوج ومبسوط وما عندي اي مشكله وساكن في بيت ابوي وعند اخواني وخواتي وزوجه اخوي الكبير وبعد سنه رزقني الله من زوجتي ب بنت وبعد السنه الثانيه رزقت ب بنت اخرى المهم ما اطول عليكم0000 بعد كذى صار فيه مشاكل ضد زوجتي وبسبب خواتي وزوجه اخوي الى درجه ان الشغاله قامت تغلق الناقص؛؛ المهم صار مشاكل كثيره وكبيره المهم طلقتها وانا ندماااااااااااااااااااااااااااااااان عليها مرررررررره وبعد كذى تزوجت من وحده ثانيه ومطلقه ؛؛ يعني ما صدقت آآآآخذها طبعا" المه البنات ماقدروا يعيشون بدون امهم 000 مع اني حاولت بس باين عليهم 00 وفي نفس الوقت الزوجه الثانيه ماهي من مستواي يعني مستواها فوق شوي وانا تحت شويتين المهم رجعت زوجتي الاوله بعد محاولات كثيره اسفرت عن قبول اهلها وبعدين انا هلحين افكر في الطلاق من الزوجه الثانيه علما" اني ما حبيتها مررررررررررررررره والمشكله انها فاجئتني وقالت لي انا حامل في الشهر الثاني والمشكله الكبيره اني ما افكر في الشيء الا لمن اطيح في الغلط ___________!!!!!!!!!!! ارجوكم افيدوني الله يبلغكم هذا الشهر الفضيل وجزيتم خيرا" وآسف على الاطاله عفواً تم تعديل العنوان ليتضح المضمون .الاشراف |
حرام عليك
اول شي مبروك رجوع زوجتك الاولي وام بناتك والله يجمعكم علي عز ومعزه ولا يفرقكم ,,, ثانياُ لا تكون انسان اناني وتبني سعادتك علي تعاست غيرك كلهم زوجاتك وحمد ربك علي العافيه والنعمه الي انت فيها ترا غيرك مو لاقي ريحة زوجه وانت عندك ثنتين اللهم لا حسد وش ذنب الثانيه اطلقها وبعدين وش الي ماصدقت انها تتزوجها ياخي هذي زوجتك وما يصير انك تقول عليها كذا يكفي انها في يوم من الايام عفتك عن الحرام ولا هذا ذنبها انها تزوجتك و يكون بعلمك ترا المطلقات هم الي يقدرون الحياة الزوجيه وهم الي يستفيدون من اخطاءهم الاولي ويتحاشوها في الزواج الثاني يعني اكثر خبره في الحياة الزوجيه بس الظاهر ان المشكله فيك تعوذ الشيطان وجمع حريمك علي ذمتك وخلك رجل وصاحب موقف وكن عادل معهم وبعد الطلاق و الحكي الفاظي من راسك . الله يوفقك ويثبتك لما يحبه ويرظاءه
|
انا من رائي تمسك بالثنتين واطلع ببيت مستقل وخل الاولى تحت والثانيه فوق وريح راسك من القيل والقال
|
لاحول ولا قوة إلا الله أخي الفاضل أنت بنفسك قلت البنات ما قدروا يعيشون بدون أمهم طيب والطفل اللي جاي مو في الحسبه ولا لأن امه ماحببيتها وش ذنب اللي في بطنها يطلع لدنيا وابوه هدم سكن يجمعة بأومة وأبوه وأخواتة الله راح يسألك عن هذا الطفل (وكلكم راعي وكلكم مسئول عن رعيتة ) ياأخي تخيل أن هذا الطفل قدامك الحين وعمره عشر سنوات وأنت تخطط لطلاق أمه وحرمانه من دفئ العيش معكم سوا ياترى وش بتكون ردة فعلة تخيل يقولك أي والله طلق امي !!!! المشكلة دائما أن القرارات الهادمة يأخذها الأباء بدون ما يفكرون وش العواقب وش مصير الاولاد ؟ ضع نفسك مكان هذا الطفل وأن ابوك يبغا يطلق أمك قبل ماتخرج لدنيا يعني بتطلع بدون بيت يضمك مع أمك وابوك . زوجتك أم بناتك دام أنها قبلت ورجعت أحمد الله ولا تعالج غلط بغلط زوجتك الثانية حامل يعني أم ابنك طلع فكرت الطلاق من راسك وتعلم تحب زوجتك الثانية وفكر بجدية خلك من الحب الاولاد مستقبلهم أهم من حبك ..... الله يهديك لا تفكر بأنانيه نصيحة عمر الطلاق ما أنتج أبناء ببشخصيات قوية تواجه الحياة غريب تفيكر بعض الازواج لا حول ولا قوة إلا بالله |
المشكله اي زياده على اني ماحبيتها الا ان الزوجه الاولى عمال تزن في راسي
وبعدين ولله العظيم اني فكرت فكرت كثثثثثثثثثثثثثثثثثثثثير لكن احس ان هذا الشي ظلم للزوجه الثانيه فعلاوش ذنبها ؟؟؟ انا ابي حلول منكم بس ماابي اكثر من كذا انتم لا تأخذون الموضوع على اني معزم ومصمل على طلاقها !!!!! بلعكس انا لقيت فيها ايجابيات بعكس السلبيات اللي في الاولى ولكن بعد ماحملت زوجتي تغير ت تماما يعني على قولتهم تمسكن لما تمكن -------- احيانا" اقول بيني وبين نفسي خل اطلقها قبل لا تجيب حمل ثاني وثالث وخااااااااااامس واحيانا اقول الناس اللي ضفوني وستروني لازم اكرم بنتهم واسترها واسعدها ولله ياجماعه الخير انه مشغول فكري وتفكيري والناس اللي يقابلوني دائما" يقولون ياولد انت وشفيك انت فيك شي ؟؟ تشتكي من شي؟؟؟ انت وجهك ماعجبنا ؟؟؟؟ انت كذا انت كذا؟؟ والاعظم من هذا انها تبي تخلي الناس يتجاهلون زوجتي الاولى وتحاول انها تآكل الجو عليها !!!!! وبصراحه مخي ماعاد الا يتفجر من جوى ولله ماعرفت الصداع الا بعد هذي المعاناه والقولون بعد المه تكفون افيدوني الله يستر عليكم دنيا وآخره |
الظلم ظلمات يوم القيامه لا تظلم اخرى على حساب أخرى الله يهديك
|
اخوي عاشق داليا اشكرك على تعليقك وردك وتقبل تحياتي
|
حديث الوقت اشكرك على المرور
واتمنى لك التوفيق |
مشكوره يابندوره العسوله
وغفر الله لكي وبلغكي الشهر الفضيل وتحياتي |
أخي كل الناس تشتكي من الصداع والقولون هذه أمراض ماتتحكم في اتخاذ قراراتنا المصيرية
زوجتك الأولى تزن عليك بطلاق الثانية ( فعلها محرم شرعاَ) يعني اللي تطلبه معصية تغضب الله وزوجتك الثانية تغيرت يمكن بسبب الحمل وخاصة أنو الحمل الأول. اقتباس:
أخوي زوجتك الأولى سكنها في بيت وسكن الثانية في ييت مستقل بعدين ماأدري ليش أحس أنك تميل في كلامك لزوجة الاولى ودور لزوجة الانية مبررات لطلاقها أتقى الله المفروض يكون أهم شي عندك الابناء فقط مستقبلهم مهم روح أسال وشوف كيف عايشين أولاد المطلقين كأنهم أيتام |
الناس مايعطون خير
ماعليش ياخوي تحمل اكيد راح تواجه مشاكل الواحد زوجه وحده ومايسلم من المشاكل فما بالك بثنتين حاول انك اتاقلم نفسك وبعدين لا تدقق علي كل صغيره وكبيره يعني حاول انك اطنش,, وبعدين شي طبيعي ان كل وحده بتاكل الجوء علي الثانيه,,,,, تدري عاد ماني شايف ان في زوجاتك مشكله المشكله يا خوي فيك انت اول شي اذكر الله وحاول تحصن نفسك وممكن يكون في احد فازلك يعني معطيك عين محترمه رح ارقي نفسك واستمر علي قراءة القران والصلاة في اوقاتها وكثر من الدعاء ,,, بس الاهم يا خوي لا تفكر في الطلاق نهائياُ فكر في الحلول وكيف تمسك العصاء من النص وحاول تجلس مع رجال معددين يعني عندهم اكثر من زوجه واستفد من تجاربهم . الله يهديك و يسر امرك ويحببك في زوجاتك ويحببهم فيك وفي بعض ويبعد عنكم الطلاق ويرزقكم الذريه الصالحه .
|
اقتباس:
و اهلك و اخواتك وينهم عنك لمن سببولك المشاكل |
لاتفكر ابد تطلقها المسكينه بس اعدل بينهم صدقني يمكن تضيع البنت ويضيع ولدك اللي فبطنها..
انت لازم تتحمل المسؤليه ونصيحه لاتاخذ بكلام الاهل والخوات انت من نفسك تعرف زوجتك ولا تدع احد يؤثر فيك لان الناس صاروا مايحبوا الخير لبعض وصاروا يتقاتلون ع اتفه الاسباب فلا تنصت الى احد اهم قناعتك... اتمنى لك الصبر عليهم وهذا نتيجه تسرعك ولازم تتحملها الله يسعدك انت وزوجاتك ويحبب زوجاتك فبعض :) |
اخي الكريم أتجه للأصلاح والبناء ولا تستخدم الهدم لأجل البحث عن حلول فجميعهن زوجاتك ولهن عليك حق اسأل الله ان يعينك |
اخي الفاضل ماقصر الجميع الله يجزيهم خير واعطوك الحل الصح
وانا تأكيداً لكلامهم أقول يااخي ولكن أتمنى أن لاتغضب من كلامي لأن قصدي الخير لك فقط مشكلتك أنك ضعيف الشخصية أولاً : صارت مشاكل بين الحريم ورحت طلقت أم عيالك.........,هذا يدل على أن ماعندك رجاحة عقل وقوة شخصية وإلا المفروض ماتدخل نفسك بين الحريم أبداااااااااااا وتحط لزوجتك وأخواتك حدود أنك مالك شغل فيهم ويحلوا أمورهم بنفسهم ولاتسمع لهم أبداااااااااااا ثانياً : رجعت زوجتك الأولى بحمد الله والأن هي تزن عليك الله يهديها علشان تطلق الثانية وأنت متأثر بكلامها ونسيت كل شيء حلو مع زوجتك الثانية وهذا يدل أيضاص ويؤكد على ضعف شخصيتك أن كلمة توديك وكلمة تجيبك لا ياأخوي الثانية مالها ذنب وانت بنفسك تقول فيها إيجابيات غير عن الأولى وكمان أنت من دقيت بابهم وطلبتها فعيب عليك تردها وهي ماقصرت معاك وزوجتك الأولى رضيت ترجع وهي عارفة إن عندك غيرها فغصب عنها ترضى وتوافق على الإستمرار وحرااااام عليها تطلب منك تطلق زوجتك وخوفها وقول لها : أنتِ كذا ماتحبيني لأنك لو تحبيني ماترضي إني أغضب ربي وأدخل النار علشان خاطرك فإذا تحبيني بصدق المفروض تعينيني على العدل والخوف من الله وتحبين لي الجنة أما مسألة تغيرها عليك بعد الحمل فهذا ليس معناه أنها تمسكنت لحد ماتمكنت هذا يااخوي (وحام الحمل) ويختلف من حرمة للثانية يعني لاتقول ليش زوجتي الأولى ماصار لها كذا؟؟!! لأن الحرمة الوحدة نفسها ممكن يختلف وحامها من حمل للثاني يعني الحمل الأول تكون عادية والحمل الثاني تتوحم وتكره زوجها او العكس وكثييييييرا يتوحموا على أزواجهم ويصيروا عصبيات وعندها يكونوا بحاجة لحضن حنون من زوجها ووقوفه بجانبها علشان تتحسن نفسيتها ويولد الطفل بإذن الله بنفسية طيبة أسمع كلامنا يااخي أنت عندك بنات وانتبهي تظلم بنت الناس وتدور عليها الغلط علشان تطلب الطلاق ترى ممكن ربي يأخذ بحقها ويبتليك في بناتك ويصير لهم مثل ماصار لها وعندها قلبك بينحرق مثل مابتحرق قلب زوجتك الثانية واهلها اتقي الله اتقي الله اتقي الله خليك قوي الشخصية حط حدود لكل زوجة بأنها ماتجيب سيرة الثانية أبدااااااا لابخير ولابشر ولاتدخل أهلك ولاتسمع لأحد أبدااااااااااااااااااااااا ولو أحد كلمك في شيء لاتخليه يكمل كلامه وقول ماابغى أسمع شيء ولو تسكن في سكن منفصل أفضل وكن عاااااادل بينهم لاتسمح لوحدة تغلط على الثانية أو تتصل وانت عند الثانية إلا للضرورة القصوى ولا تتهااااااون أبدااااااااااااا وإذا اتصلت بدون سبب ازعل منها ووقفها عند حدها وتقدر تحط لهم عقاب (لو وحدة منهم اتصلت بدون سبب في ليلة الثانية إنك بتعاقبها بأنك تجلس عندالثانية ليلة إضافية ) صدقني بكذا بيتأدبوا ولما تكون عند وحدة منهم حط في بالك كأن هي زوجتك الوحيدة وماعندك غيرها واعطيها كل حبك وحنانك وإهتمامك وإذا رحت للثانية نفس الشيء سوي معاها وأخيرا أقول لك (الخيل بخيالها والمرأة برجالها) وصدقني لما تكون حازم في وضع الحدود وماتسمح لأي منهن تجاوزها مهما كان بتعيش براحة وسعادة وكل وحدة تحرص على إرضاءك وبترتاح من الهم والغم فكن رجل حكيم عاقل محب تعدل بين الإثنتين ليبارك الله لك في صحتك ومالك ودنياك وأخرتك ولاتجيب أخبار الأولى للثانية لابخير ولابشر ولا تجيب أخبار الثانية للأولى وكل ماتدخل عند وحدة إذا سألتك أي شيء عن الثانية قل لها بحب وغزل : ليش هو أنا متزوج غيرك؟؟ أنا ماعندي غيرك بمعنى حسس كل وحدة أنها كل الحب علشان ترتاح نفسها وتهدأ وماتدور مشاكل وتسعى لإسعادك واحذر الظلم ولاتدور سبب علشان تطلق الثانية اصبر عليها وانظر لها بنظرة الحب مثل الأولى وإلا والله لو تدعي عليكِ دعوة يمكن ربي ينكد عيشتك مع زوجتك الأولى ويصيبك بالأمراض والفقر غير العذاب في الأخرة لأن دعوة المظلوم مابينها وبين الله حجاب وأعيد واكرر لا تتهاون أبدااااااااااااااااااا. |
اخوي فتى الديرة
اسمع وانا اخوك ... سويت في حياتك خربطة كبيرة ، تطلق هذي وتتزوج وترجع الأولى وتبي تطلق الثانية ياخوووي اركد. الآن انت تعتبر معدد وواجب عليك العدل والحزم مع الزوجتين ، كل وحدة عطها حقوقها كاملة من المبيت والنفقة وخلافه اخوي استشير رجل عاقل فزوجتك الاولى والثانية لا يوجد مبرر قوي لأجل تطلقهم حرااااام والله ما يصير يعني خاصة زوجتك الثانية وش ذنبها ما يكفي انها فشلت في الزواج الأول وتسبب لها انت الفشل في الزواج الثاني وما لها أي ذنب والله حراااام وبعدين هي كلها فترة بسيطه وتكون ام لأبنائك. وزوجتك الأولى ام بناتك يعني لو ايش ما كان بناتك يستحقون التضحية . اخوي فتى الديرة اياك اياك والظلم ذولا الحريم مساكين انت الرجل العاقل اللي تقدر تضع حل بإذن الله لك مشاكلك |
والله زعلتني كلمتك عن زوجتك انها ماصدقت عشانها مطلقة على علمك المطلقة بإمكانها تتزوج شاب واصغر منها كم حصل لزميلتي
وحاول ان تعدل بينهم ولا يحل لزوجة ان تطلب بطلاق الاخرى مهما كان وفي ذلك حديث وحاول ابدا ماتنقل الكلام بين الثنتين واحزم في امرك يالله الله يعينك وأسأل اللي متزوجين 4 وكلهم في قمة السعادة واحذر احذر ان ترضي اخرى لحبك لها على حساب أخرى هل ترضى بالشق المائل يوم القيامة الله يهدي سركم |
اقتباس:
|
الأخوان والأخوات ما قصرو الصراحة
بس أحب أضيف شيء .. وهي أن شكلك للحين مو مستوعب أنك رجل متزوج ثنتين والدليل أنك تبي تعيش مثل الي متزوج وحدة بس .. وهذا دليل أن كل قراراتك سواء بالزواج أو الطلاق جاءت متسرعه ومن غير تفكير بالعواقب الحين كل شي انتهى .. في تصرفات لما نعملها نقدر نتراجع عنها .. لكن في تصرفات ثانية مستحيل التراجع .. هذي الدنيا مستحيل تاخذ شي صافي مصفى .. يعني تتزوج ثنتين وتبي تعيش كنك متزوج وحدة كل الي يصير معك طبيعي جداً .. غيرة النسوان .. الوضع المادي .. عصبيتك وصداعك ..وكل شي كل شي له ثمن في هالدنيا .. وأنت رجل لازم تتحمل عواقب قراراتك .. ثنتينهم زوجاتك والمطلوب منك العدل بينهم ..والاحسان لهم وما يحق للأولى تقول طلق الثانية وقلها هالكلمة في وجهها هي لما رجعت لك كانت عارفه أنك تزوجت أما باقي الاشياء طبيعيه من الغيرة و محاولات كل وحدة تاكل الجو على الثانية .. تأقلم مع الوضع و تعلم تطنش بعض الاشياء .. مو كل شي بسيط تعمله كأنه قضية عالمية .. ومثل ما قالت أم جمانة انتبه تجيب سيرة أو تمدح وحدة من زوجاتك عند الثانية ولا تحسس وحدة أنك تحب الثانية أكثر أو ترتاح لها أكثر .. لأنك انت الخسران في النهاية عيشتك بتصير كلها نكد ووجع راس وضروري تحط أبناءك في الحسبة .. سواء من الاولى أو الثانية .. ولا في واحد احسن من الثاني في النهاية أرجع وأقول .. ضروري تستوعب أنك متزوج ثنتين .. يعني كل تفاصيل حياتك مختلفه تماماً عن الي متزوج وحدة استمتع بإجابياتهم وتأقلم مع سلبياتهم |
صح لسانك اختي ام جمانه .. قلتي كل ما في نفسي .. |
أأكد على النقطة اللي ذكرتها أم جمانة
خاف الله عندك بنات اللي تسويه ببنات الناس بينرد لك في بناتك!!! وبنات الناس ماهم لعبة اليوم متزوج ويوم طلقت دورت على زوجة ثانية, ويوم حبت الأولى ترجع بطلق الثانية؟؟!! اتق الله في نفسك وفي بناتك وبنات الناس وتعلم تتحمل مسؤولية تصرفاتك أنت اقدمت على شي لاتتراجع تحمل المسؤولية وخلك من سالفة ماصدقت بك<<<<<<<<<<<<<<<رافعة ضغطي كلمتك انت اللي خطبتها مارمت نفسها عليك وياما مطلقات تزوجوا شباب عزابين ماعندهم لاحريم ولاعيال يعني خل الغرور اللي بداخلك |
أولا و قبل كيف تطلق زوجتك الأولى لخلافات بينها و بين إخواتك !!!!!!!!!!!!!!!!!!
هل كانت تظلمهم ؟ كان الأجدر بك إيجاد حل آخر مثل الإستقلال ببيتك و ليس الطلاق ماهو ذنبها؟ و تريد أن تعيد نفس الإسطوانة مع الزوجة الثانية أنت ظاهر فيك مزواج مطلاق :(. يا راجل عيب الظلم حرام. أمسك زوجتيك و كفاية كلام. |
أخي الكريم ..
إضائتين : (((((( هل تتحمل دعائها ودعاء أهلها عليك مدى العمر بأن جعلتها مطلقة للمرة الثانية !!!!!!!!!!!! (((((( في بعض الأحيان عندما نُخفق في أمور مطلوبة منا تُرجع عدم نجاحنا إلى أسباب واااااهية نوهم أنفسنا أنها سببا حقيقيا >>>>> ( ما حبيتها !!!!!!!) لاحظ أن جميع الردود تصب في مصب واحد ... الله يحنن قلبك على الثانية ويسخر الأولى للثانية ويجمع بينكم على خير.. |
ماشاء الله الاعضاء كفوا الموضوع حقه ولكن تذكر ان الظلم ظلمات يوم القيامة ولو اعماك الحب
حافظ على بيتيك وانت من اراد ذالك وعليك بكلمات الاخت ام جمانة فأنها حكيمة وكلامها عين الصواب استقبل شهر رمضان وانت مرتاح البال غير ظالم لأحد بلغنا الله رمضان |
خاف الله في بنات الناس يا رجل وكن رجل بمعنى الكلمه واحرص على صلاح البيتين
|
الله يهديك يااخوي انت متسرع مره
يعني انت ليش تسوي كذااا وانت منت قد الموضوع هذا ماااضي خلاص اسفه المهم::الحين كلهم زوجااتك والمفروض تتطلع بوجه جديد وتقول لكل وحده مالك شغل بثااانيه ياخي انت الرجااال لاتسمع كلامهم الحين الاولى تحمد ربها وتشكره انك رجعتها وتقولك طلقها الله يهديها يعني مرت بظروف الطلاق وعااانت اجل كيف ترضى على اختها والله الحريم انانيات وبعدين الثانيه وش ذبها انك ماتحبها وليش تزوجتها من اول ياخوي بناات الناس مو لعبه يعني الاولى طلقتها عشان الاهل والحين هذي بطلقها عشان مين؟؟اكيد عشان الاولى اكلمك بصرااحه ولاتزعل مني رجااء::خل عندك موقف وتغير من بعد اليوم وخل عندك شخصيه وتحكم من راااسك بالافكار الصحيحه ياخوي ليش سموك رجااال؟؟؟لازم تفكر صح ويوم تجي زوجتك الاولى وتزن عليك وقفها عند حدها وقولها انتي جربتي معاناة الطلاق وهذي زوجتي ام ولدي مثل ماانتي زوجتي وام بناتي طبعا بعين قويه والثاانيا:اذا لغت وجود الاولى وقالت عنها كلام قولها احترمي نفسك تراها ام بنااتي وزوجتي مثل ماانتي زوجتي وانتهى الموضوع بس مو بضعف لالا تكلم معاهم بشده والله بعدها كل وحده تحترم الثانيه ومايوجعو راااسك وانت باذن الله راح تحب الثااانيه باذن الله راح ندعيلك بس انت لاتظلم ولا وحده فيهم ولا تتسرع خير اركد موفق |
اقتباس:
لافض فـــــــــــــــوك , قلتي ما اُريــــد قوله . |
تطلق الثانية بعد ما رجعت لك الأولى و زنت على رأسك
وش ذنب الثانية طيب .. !! |
وبعد كذى تزوجت من وحده ثانيه ومطلقه ؛؛ يعني ما صدقت آآآآخذها طبعا"
لاإله إلا انت سبحانك اني كنت من الظالمين |
حرام عليك انت تتلاعب ببنات الناس صدقني راح يجي اليوم اللي يتلاعبون فيه ببناتك
تطلق الاولى عشان كلام من اخواتك ومرت اخوك والشغاله بعد!!!!!!!!!!!! وبعدين تبي تطلق الثانيه عشان ماحبيتها عجايب!!!!!! اعدل بين حريمك ولاتطلق احد |
الله لايكثر شكلك بين الرجال أمحق رجال
قال ماحسبت انها تزوج من زيينك مطلق مثلها مثلك وبعد مستواها افضل منك يوم رجعت لك زوجتك تبي تغدر فيها وهي ضافتك وعذرك ماحبيتها انت لو تعرف الحب ماخليت أهلك يتدخلون بحياتك وعلى طول تطلق زوجتك اولالى وزوجتك الاولى تطلب طلاقها ياويلها من الله من حفر حفرة لأخيه وقع فيها الدنيا فانية وبكرة كلنا نتقابل عند الله اجل تسمع كلامها خروف انت لحد قال لك طلق طلقت يارب يكون بعونها الثانية قال تمكنت وتمسكنت مسكينة وحام وحالتها زفت وفي ناس تشتغل بالخفاء انت وزوجتك وافق شنن طبقة تلعبون بنات الناس تزوجون تأديب لأولى ولمن ترضى الاولى ترمون الثانية على بالك بيضيع شي عند الله اتقي الله تدعي عليك انت وزوجتك ودعوة المظلوم مستجابه |
الزوجه الثانيه
كيف تبي تتغطي وتاخذ الجو وتخلي الناس تتجاهل الزوجه الاولى ؟؟ هي قالت لك؟؟؟ ولا انت تحس؟ ؟ |
<<<لا تطلق ولا واحد ه منهن لو طلبن ذالك
واعدل في كل شي وما تدري انت تقول ان هذي معها بنات و يمكن الخيره من تطليقك االاولى و تتزوج الثانيه يمكن ربي كاتب لك يجيك ولد عن طريق الثانيه كل الامور فيها خير والخيره خفيه توكل على ربك وربك يكفيك |
اقتباس:
وزوجتك الثانيه بعد شي طبيعي تبي تكون الكل في الكل وتاكل الجو بس خلك رزييييييين وثابت ولاتسمع لا هذي ولا لهذي وافرض على كل وحده حدود تمشي عليها ولاتتعدى على حقوق الثانيه وصدق من قال الضره الرجل مو المره لأن الرجل هو يفرض الحق ويبين بحزم وبقوه لكل وحده حدوها مع الأخرى,, كان الله في عونك واصلح لك شانك كله.. |
اقتباس:
|
مع بالغ احترامي لرجولتك , مجرد تفكيرك في تطليق الثانية دليل شرخ في رجولتك لأنك غير قادر على حكم امراة
وستدور الدائرة وينحرق قلبك على بناتك او اخواتك , وبتعرف ان الله للظالم بالمرصاد ... راجع نفسك في رجولتك اللي مو قادر يحكم نفسه مستحيل يحكم امراة .. |
ياخي اتقي الله الاخوان كفو ووفوا وبعدين زوجتك الثانيه وافقت على رجوع الاولى وهذا دليل كافي على صفاء نيتها فتكافئها بطلاقها عجبا لك من رجل وامرأتك الاولى تكفائها على ذلك لانه كان بامكانها ان تغنيك عن زوجتك الاولى وتلهيك عن ذلك لكنها كانت افضل واحسن قلبا ونيتا منكما ولم تمانع بارجاعك لزوجتك وربما كانت سببا في ارجاعك لزوجتك من اجل بناتك فكانت لبناتك افضل منك انت ووالدتهم فالان تكافؤنها بطلاقها اتق الله ياخي فالدنيا دواره يوم لك ويم عليك الحين قولون بكره يمكن سرطان قولون
|
| الساعة الآن 04:54 PM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©