|
خطيبتي طلبت مني مصروف شهري.. حُلت ولله الحمد
السلام عليكم ورحمة الله وبركاته
بارك الله في صاحب هذا الصرح وجعل كل حرفٍ يُكتب فيه شاهداً له لا شاهداً عليه ندخل في الموضوع انا متملك ولي تقريباً أربعة أشهر وزواجي ان شاء الله في عيد الأضحى كما تعرفون العادات والتقاليد متقاربه نوعا ما في المملكه المهم كلمت خطيبتي اليوم كالعاده , سوالف وما سوالف والبنت كأن خاطرها متكدر شوي وانا حسيت انه فيه شي , المهم قالت لي ابي منك طلب ممكن , قلت تفضلي , قالت : ابيك تشتري لي جوال غير الجوال هذا .. طبعاً مع بداية الملكه اشتريت لها جوال من أفضل الجوالات قيمه وشكل ( اسمه لميس ولونه بنفسجي وشكله دلع عالآخر وقيمته ما تقل عن 800 ريال ) المهم ما علينا بس انا دقيق شوي , طبعا صارت مشكله على الجوال ابيك تغيره لي ومن هالكلام ( نوع محدد في بالها ) , المهم تصافينا وقلت لها ابشري اجيب لك جوال , قالت مو لازم ما أبيه لا تجيبه ( طبعا بزعل ) , قلت مو لازم مرت الأيام ونسينا الجوال وقالتها لي اليوم وقالت كنت متوقعه انك تجيبه لي ومن هالكلام قلت لها وش دراك يمكن اني كنت ناوي بس ما بعد حلت النيه , او يمكن اني ناوي اجيب لك اياه هديه في ليلة العرس , المهم قلت خير ابفكر واعطيك خبر والجوال مو هم لكن بفكر واعطيك خبر عن قريب قالت طيب فيه طلب ثاني ( هذا صلب الموضوع واللي فاجأني وما توقعته ) قلت آمري يالغاليه , قالت ابي مصروف شهري :26: قلت وشهو له المصروف الشهري، انتي في بيت ابوك ومو مقصر عليك في شي , قالت اكيد مو مقصر بس انا تحت اسمك وانت الحين صرت مسئول عني بما اني خطيبتك , قلت يعني نوريني وش مفهوم المصروف الشهري في بالك : هل هو أكل أو ملابس أو أغراض شخصيه ..الخ قالت شوف أنا ابوي يمشي لي مصروف شهري 500 ريال ( طبعاً هذا اللي ما فيه أمل أصدقه لأنها بنت عمي وساكنين جنبنا وطبعنا واحد ) يعني مثل اللي يقول مش لي شهريا 500 ريال , طبعا وانا اللي اسدد جوالها تقريباً حدود 300 إلى 350 يعني صار كله 850 هذا من غير أقصادي وديون العرس ضحكت وقلت ابشري اجيك يوم الاربعاء ( لاني عزوبي في مدينه ثانيه وما اروح الا الخميس والجمعه ) واشتري الرز والاكل كله واقول لابوك هذا خاص بخطيبتي تاكل منه لين نتزوج , وقلت بالنسبه للأغراض الخاصه أبد أنا قدمت لك مهر خمسه وأربعين ألف ريال تقدرين تاخذين منه اللي تبين واذا نقص انا حاضر , قالت لا المهر لتجهيز العرس قلت لها ما اشوف انه من المنطق اني اصرف عليك وانتي في بيت ابوك , إذا جيتي عندي ما راح أقصر معك في شي أبد , قالت والله انت المسئول عني وانت متكفل بكل مصاريفي وبعدين هذي مصاريف احتاجها في امور شخصيه والخجل يمنعني اوضح لك اياها ( طبعاً نقاشنا هاديء جداً مع اني لاحظت انها متنرفزه بس ما اعطيها مجال وحاولت اخلص المكالمه بكل هدوء ) قلت لها خير وابشري راح ادرس الموضوع وارد لك خبر لانه يحتاج له تفكير شوي _______________________________ طبعاً يا جماعة الخير فكرت وفكرت والموضوع ما قدرت اهضمه نهائياً وأنا رافض وبقوه مسألة المصروف وقت الملكه , يعني تخيلوا أعطيها 500 + 350 فاتورة جوالها تصير 850 + 1800 قصد , وانا ابي اجمع علشان ليلة العرس والشقه لان الفلوس اللي معي ما توفي هالكلام كله طبعاً إضافه إلى كل هذا لا يمكن أدخل عليها ويدي فاضيه ( وقت الزياره يوم الخميس كل اسبوعين تقريبا ) وقبل شهر طلبتني مكياج وشريته وقيمته حدود ألف ريال ومن أفخم الماركات عموما أنا حبيت أشوف رأي عامة الناس قبل ما أسوي شي أو أظلمها , ويمكن أطلع بشور مفيد منكم أو كلام مقنع أفضل من كلامي ونهجي أفيدوني جزاكم الله كل خير |
بصراحه غريبه ..
أنا أستغرب من جرأتها الزايده معك .. وطلباتها ..هذي وهي في بيت أبوها وشلون إذا جت عندك.. أنا من رأيي أنك تحط حد للموضوع .. قدامك 5 شهور على ماتتزوج .. وراك مصاريف وعندك ألتزامات إذا نفذت كل الطلبات راح تتعب .. وراح تتمادى عليك أنت دافع لها مهر ..تصرف منه اللي تبي سواء تجهيز للعرس والا أغراض شخصيه على قولتها.. يمكن ينتقدني البعض على ردي ..لكن هذا الواقع الله يوفقك |
هو بصراحة واجب عليك تعطيها مصروف بما انك زوجها صارت ملزومة منك..
انا كان خطيبي قبل ما نتزوج يعطيني مصروف بس ببلدنا غير عن بلدكم يعني الظروف تختلف بالنسبة للدخل وبالتالي المصاريف تختلف.. اتمنى اتكون فهمتني.. يعني لا نختلف على المصروف انه واجبك .. ولكن يختلف من شخص لاخر حسب الحالة المادية والدخل وحسب العرف في بلدكم يعني شوف اصحابك كم يعطو خطيبتهم او اسأل من حولك وخد المعدل ممن حولك واعطيها.. ربي يسهل لكم |
عندها المهر تصرف منه
وزين منك تدفع فاتورة الجوال بعد هذا رأيي |
الظاهر حتى الجوال عند اهلها ما كان عندها.
قولها اوكي بس ما اقدر اعطيك الا 400 + تسددين منها فاتورة الجوال ...:( |
بصراحة الكرم في الرجل
يغطي كل العيــــــــــــــــــــوب والبخل من أشرس الاخلاق لذا ابدا لا توضح لها انك بخيل ابدا بدل الرز عطها فلوس ترى كل شي نااااااااااااااار والنت تبي تستانس ان عندها رجل يدري فيها والدليل انها كانت غاضبة عندما رددتها هي زوجتك في الاول والاخير لا تقصر معها |
و الله يا اخويه ما ابغي اصدمك بكلامي بس نحن في الامارات البنت من تملك زوجها لازم يصرف عليها و لو كانت في بيت ابوها ولازم يعطيها مصروف شهري ..وما عندي فكره عن عادات بلدكم بصراحه ..يعني بالنسبه لي اشوفه شي عاادي ..
لكن في حالة انه الماديه نقدر انقول متوسطه ما ينفع الشي هذا من بدايتها طلبات و اوامر اخرتها شو راح يكوم ؟؟!!! لازم اتفهمها باسلوب معين انها تتكيف مع ماديتك و علمها اسلوب ثاني انه مو كل طلب منها راح اتنفذه لانه في النهايه هذي الحياه اثنينكم راح تتقاسمونها ... اتمنى لكم حياة سعيده مفعمه بالتفاهم ... |
ياأخي أنت تصرفك يدل على عقلك وهدوئك وطيبتك انتبه لاتكون من الذين يركب الدين عليهم بسبب زواجتهم يعني انت امورك المادية صعبة فما في داعي تروح تدين على شان تقول عنك كريم ولازم تحط حد لهذه الأمور من الأن ليس بالضروري ان يكون طلب زوجتك دليل على ماديتها لا بس ممكن المسكينة شافت احد صديقاتها أو أقاربها يعطيها خطيبها مصروف فغارت منها انت اشرح لها وضعك المادي وقول لها لو معي والله ماأبخل عليكي أنا مستعد أعطيكي عيوني وألبي وعمري مابس فلوسي بس انت ماترضين اتدين وأنفضح عند الناس من شان الدين وإن شاء الله بترضى وبيمشي الحال الله يوفقك ويبارك فيك ويبارك لك في زواجك بس لاتنسى تعزمنا |
غريبه
مع اني مملكه انا كمان ولي 8اشهر ولا فكرت مجرد تفكير اني اطلب خطيبي كدا وبالذات انو وضعه تقريبا نفس وضعك يسدد جوالي ويشتري لي هدايا والله كدا يكفني وزود .... اما حكاية المصروف دي مااشوفها عدله حاول تفهمها انو انت تجهز للعرس وانو المصروف اللي طلبته راح يخليك تدين وتنضغط ويمكن يأثر على نفسيتك بعد ... وقول لها انك مستعد تساعدها لو نقص شيء من تجهيزها وانك ماراح تقصر معاه وان شاء الله انها تلين وتغير طلبها دا .... |
مدري بس احسني مترددة بالرد
لكن باعتبارك اخوي ماراح اسمح له بهالشي ماعليش هي زوجتك ايه بس انت رجال وراك مصاريف والزواج يبي له مصاريف كثيرة, غير مصاريف شهر العسل ممكن تعطيها المصروف وتشيل تسديد الفاتورة من بالك وبالها!!! حتى المصروف يكون منطقي والمشكلة انها بنت عمك يعني عارفة وضعك كله وظروفك أو قول لها اوكيه امشي لك مصروف بس لاتسأليني وين نقضي شهر العسل لأنه بيكون مامعي فلوس على هالوضع وأنت أولا وأخيرا أدرى بنفسيتها وباللي يناسبكم سبحانك اللهم وبحمدك اشهد ألا إله غيرك,استغفرك واتوب إليك |
أخي الكريم وفقك الله // ما فيه أجمل من الصراحه في هذا الموضوع وكما متعارف لدينا البنت والدها مسؤول عن مصروفها حتى تذهب إلى بيت زوجها لاتجامل وتدلل خطيبتك على حساب راحة بالك وتحمل نفسك فوق طاقتها وبعد الزواج بسبب ظروفك المادية ربما تتغير معاملتك لها من ناحية المال والدلال يعني كن واضح وصريح معها في هذه الناحية بالذات .. أسأل الله العلي العظيم أن يتمم لكم على خير ويسعدكم في الدارين .. |
اقتباس:
والله بصراحه حتى انا مستغرب , لكن قلنا نشوف رأيكم بالأول والا الحد أنا راح أحطه الله لا يعوق بشر وأنا يشهد علي الله ما أقدمت على الزواج الا وعارف اللي لي واللي علي من حقوق يعني لا يمكن أظلمها في شي ان شاء الله موفقه بارك الله فيك |
اقتباس:
أكيد النفقه واجبه علي إذا صارت معي , هذا شي ما نختلف عليه والأوضاع الماديه لا بأس فيها بس تصعب كثير مع كثرة الإلتزامات إذا كان فيه مثل هذي الشروط وبعدين هذي شغله جديده فترة الملكه الواحد يصرف على خطيبته , يعني ما بقى والعادات عندنا كما هو معروف في السعوديه إني ما أنفق عليها الا إذا دخلت عليها موفقه أختي |
اقتباس:
والله يا بنت الحلال خليها على الله , هو فاتورة الجوال عادي ما اعترض عليها , لكن مسألة المصروف فترة الملكه مو راضيه تدخل مزاجي بارك الله فيك وعفا عنك وعن من رباك يا بنت الأجواد والناس الفاهمين |
اقتباس:
والله ياخوي كنك تشوف , الجوال ما كان عندها قبل , يا أخي مشكلتنا بناتنا يجون مطفين النور شوي ههههه ولا يفكرون في شغلات كثير عموما فكرتك حلوه وفكرت فيها لكن ما أعجبتني شاكر لك حبيبي وجودك العطر |
اقتباس:
يا أم داليا الله يسعدك ويخلي لك داليا الموضوع مو موضوع كرم , والا انا ماني بخيل ولله الحمد , الموضوع ما يدخل المزاج من أساسه , وأنا عارف أنها زوجتي مستقبلا إن شاء الله , لكن الشيء إذا زاد عن حده ينقلب ضده يعني تخيلي قبل فتره سوت زعلانه ومدري ايش , تدرين ليش ؟ علشان تقول الرقم مو عاجبني ومع ذلك غيرته لها وانا حاس اني اخطيت في هالشي , يعني ما خليت عليها شي مدلعها عالآخر وانا عاقل في كل تصرفاتي واللي أقدر عليه أسويه بس الظاهر انها ما زالت تجهل أمور كثيره يعني بالله عليك هذا شي يدخل العقل ؟ لو انتي بتقولين لخطيبك الرقم مو عاجبني وتزعلين علشان يغيره ؟ أنا ما سويت هالشي في البدايه الا علشان ما تقول لي بعدين ولا طلب نفذته لي والا من هالكلام عموما يا ليت ترجعين وتقرأين ردي وفقك الله |
اقتباس:
أكيد يا أخوي العادات تختلف من بلد لبلد وهالشيء مو عندنا ولاحظ أكثر ردود السعوديين ولو الحاله الماديه فوق مره , وربي لأحط لها جهاز صراف في بيتهم هههههه لكن الحاله متوسطه مثل ما قلت , يعني مستوره ولله الحمد عموما مشكور أخوي وبارك الله فيك حضورك بحد ذاته أسعدني |
اقتباس:
كلامك عين العقل أخوي سوري حنون , بس ألاحظ عليها أن مشكلتها تتبع قاعدة ( إذا لم تكن معي فأنت ضدي ) لكن ما تدري أني مناصرها على نفسي سواء ظالمه أو مظلومه الله يهديها بارك الله فيك أخي |
اقتباس:
بارك الله في الصلب الذي أنبتك والبطن الذي حملك الدنيا ما تجي على الكيف لكن بنحاول ونشوف وان شاء الله تتيسر |
اقتباس:
المشكله أنها بنت عمي , والمشكله أني تورطت ولو أطيع الشور كان أخذت لي وحده من بعيد , لكن الله يعين بارك الله فيك أختي عاقله وفاهمه وبنت ناس |
اقتباس:
الصراحه جميله , لكنها عند أغلب الناس مزعجه , لكن أبشرك أنا صريح سواء تزعج الشخص الذي أمامي أو لا تزعجه , لكن قلت من باب أولى وليطمئن قلبي أعرض مشكلتي على عامة الناس ونشوف آرائهم لأن رأيي صواب يحتمل الخطأ ورأي غيري خطأ يحتمل الصواب لكن الأغلبيه معي لحد الحين وخصوصاً من تحكمهم العادات والتقاليد التي تحكمني الله يستر عليك دنيا وآخره |
انتو وعاداتكم ...
لكنها جريئه لدرجه انها قالت تبي مصروف !! دامك تدفع جوالها وش تبي من المصروف ... عندنا حنا اللي يبي يعطي خطيبته مصروف من طيب خاطر ايه اما بطلب لأ اشوفها جرأه ... انت تناقش معاها بمبلغ الفاتوره والمصروف ... وشوف لأيش راح توصل ... |
بصراحة انت رائع
يكفي انك تسدد جوالها !!! الله يكثر من امثالك |
اخوي طيب حتى ابوها هو ابوها ختى بعد ما تتزوج ليش ما تطلبه يصرف عليها ؟؟؟
انا عن نفسي بصراحه ابوي وهوا عايش كان مصروفي الف ريال والله يرحمه بعد ما مات كتب في وصيته ان لي من راتبه اربعه الالاف حتى بعد ما اتزوج قولوا ماشاء الله تبارك الله ولمن اتملكت ولا خطر في بالي مساله المصروف وحتى جوالي ما كان يرد عليا يعطيني بيزي وهو يرجع يتصل ومع كذا كان يرسل لي كرت شحن بما ان جوالي سوا لكن ما صار نصيب اما بالنسبه لك انا اشوف عندك خيارين اما انك تقولها مااقدر عشان عندي مصاريف ولمن نتزوج لكي اللي تيغي او انك تقولها لكي 500 منها مصروف جوالك بصراحه انا حتى الجوال ما اشوف انك ملزوم تسدده والحين يعني نفهم ان ابوها ما اصار يصرف عليها بعد ما ملكت ؟؟؟ معليش ما اتوقع في اب يقطع المصروف من بنته عشانها ملكت تعددت ارائنا واغلبها واحد لكن انت شوف اللي يناسبك وسويه احنا علينا النصيحه والله يوفقك اخوي |
اخي الكريم افضل من يبت في هذا الموضوع هو أنت وذلك لانك الوحيد الذي تعرف البنت تمام المعرفة وتعرف اخلاقها و ما اذا كان طلبها هذا لحاجة ملحه لها امـ هو نقص في فهمها وقلة في عقلها انصحك اذا كنت ترى انها غير محتاجه وانها لازالت صغيرة في السن ولا تفهم معنى الزواج فعليك ان تجلس معها وتحاول ان توضح لها مثل هذه الامور وان الزواج شراكة وليس استغلال كل طرف للاخر .. |
اخي الكرريم ::
الان اتووقع البنت معليش يعني ما اعتقد انهااا عايشة بمستوى طيب عند اهلهاا او انة كاانت طلبااتها تجي بعد عنااء وشقااء وما اعتقد انة يعطيهااا والدهاا مصروف كماا ذكررت لذللك تفكيرهاا الان يقتصر على الماادة فقط لأنها تعتقد انة الزوااج = جووال جديد +رقم +مصرووف +طلبااات لها اول مالها اخر طبعاا عقلهاا الان يقتصر على الشكليااات فقط وما اعتقد حتى لو قلتلهااا انة عندك ديوون رااح تفكر فيك لأنة مايهمهااا اصلااا وبعدين من متى الخطيب يجيب لخطيبتة مكياااج !!!! اتذكرر انها المفروض من مهرها تجيبهاااا عمومااا هي الان فيهااا جرأة غريبة جداااااااا وطلباات مالهاا دااعي اين الخجل ؟؟ اووو انة احد بيقوولها اطلبي كذاا وكذاا وهي ماتدرري وين ربي حااطها ومع الخيل يااشقرااا يعني الشغلة يبغالها مصاارحة وكماان تحطلهاا حد (انا يابنت النااس هذي ظروووفي )علشاان تفهم اذا بتستمر على هذاا الوضع بتختلق مشااكل انتو في غناااا عنها بعد الزوااج وكماااان كثرر خيرك تدفع فااتورتهااا بس فية نقطة انت قلتهااا ما عجبتني صرااحة وهي انة البناات مطفين النورر حقيقة اني لم افهم من اين اتيت بالتعميم !!!! واذاا هي مطفية النورر على قولتك البركة فيك ولع كشاااف :d الله يهديهااا ياااارب |
ماشاء الله امتاز نقاشك معاها بالهدوء والرزانه يبدو كما ذكرو الاخوات انه فيه احد جالس يقول لها اطلبي منه او انها تختبر غلاتها كما هو معروف عندنا في المملكة المصروف هذا شي بعد الزواج وليس في فتره الملكة وماشاء الله عليك ماقصرت معاها وارخيت لها الحبل ودلعتها فلازم تصارحها بوضعك مو بأسلوبك المعتاد لكن حسسها انك متضايق منها لان يااخوي لو دلعتها الان وهذي طلباتها بعد الزواج بتتمادى اكثر وبالاخير لا انت ولا هي راح تكونوا سعيدين بوضعك وفقك الله لكل خير |
ياحسره وش نقول بس
انا زوجي عمره ماعطاني مصروف في الملكه ولا عمري تجرأت وطلبت حتى جوالي عمره ماسدده لاني اخجل اطلب جرااااءه |
يا اخي لايكلف الله نفس الاوسعها, اهم شي واللي لازم تنتبهله انك ماتعودها على شي انت ماراح تقدر تكمل عليه وانا معك انه غريب اني اصرف على خطيبتي في بيت اهلها.
اول شي حاول تفهمها وضعك زين وتقولها ان هذا اللي عندي ولاتطلبين مني فوق طاقتي واذا ماصلح معها الحوار كلم ابوها او امك تكلم امها والا فالحزم الحزم ((لا)) |
أعتقد أن هناك من أهلها من يدفعها لقول ذلك ,, ويوجهها ,,
أستبعد الأب ,, لكن ربما والدتها ,, والله أعلم ,, |
الموضوع بسيط و حله ابسط ,, اهم شي تكون هادي و تتعامل بدلماسية ,,
قول لها اوكيه رغم ان العرف عندنا ان الخاطب ما يصرف على خطيبته وقت الملكة لكنك غالية و ما اقدر ارد لك طلب بعطيك مصروف 500 بس فاتورة الجوال عليك ,, بكذا بتكون دفعت لها فعلياً 150 (فرق الفاتورة) بدل 500 |
اقتباس:
انا مع هذا الراي عنا حسب الطلب احيانا والد العروس يفرض على العريس مصروف شهري والحكمه وغيروووو الله يوفقك هي حابه تعودك من الآن ان لها مصروف شهري |
أول شئ أخوي أحيي فيك رزانتك ورجاحة عقلك.. وحلو أسلوب التفاهم وإمتصاص نرفزتها بإنك تأجل الرد بحجة التفكير.. :22: شوف بصراااااحة أخوي أنا شايف الموضوع أكبر من فاتورة جوال ومصروف شهري.. البنت أخوي يا إنها صغيرة ولسى مو فاهمة كيف تتعامل مع زوج المستقبل أو فيه أحد يفر براسها.. وفي كل الأحوال هذه مشكلة كبيرة.. وباين كمان إنها مدلعة شوية معليش على الكلمة أخوي.. الفترة هذه إذا إنت شاريها راح تتعب معاها كثير أخوي لازم تضع لها حدود في التعامل وتعلمها كيف المفروض تكون.. بالنسبة لي فاتورة الجوال 300 وشوي أشوفها كثير يعني بالله بالعقل كذا ايش الإتصالات اللي عندها وهي في بداية عمرها.. ومصروف شهري ملزم بيه كمان صراحة مرة صعبة.. شوف لو إنك ما تسدد الفاتورة كان قلت حلوة منك تعطيها شئ رمزي شهرياً يعني بالكثير قول 200 إذا وضعك يسمح كمان.. وإذا مو مقتنعة أخوي قول لها طيب يعني إنتي اللحين بطلباتك هذه تعتبري نفسك زوجتي ولك واجبات وعليك حقوق لأنه إنتي بتقولي المفروض أجيب لك مصروف شهري يعني هذا واجبي حتقول لك أكيييييد ..قول لها طيب أوكيه كمان إنتي عليك حقوق خلاص ملابسي بجيبها لك تغسليها وتكويها وراح أجي وأخذ حقي الشرعي والزواج مو لازم زواج كبير ومش عارف إيه يعني بحكم إننا خلاص متزوجين يعني.. طبعاً راح تندهش إنت هنا على طول لا تنتظر منها رد وقول لها شفتي يا فلانة الأمور مو بالطريقة اللي إنتي شايفاها أنا اللحين وراي مسؤليات وأشياء كثير لازم أوفرها والمفروض إنتي تكوني عون معاي وتساعديني علشان نتزوح بسرعة ونجتمع في عش الزوجية وكذا.. وبالنسبة للمشكلة خييرها أحسن بإنك تسدد الفاتورة أو تعطيها 300 ريال شهرياً.. تمنياتي لك بحياة سعيدة |
اعتقد انه من المفروض لاتصرف عليها حتى تصبح زوجتك رسمية
وشكلك مرخي حبتين وصحيح الهدايا حلوة بس مو تشترط في نوع الهدية وتتجرء سخركما لبعض |
بصراحة واضح عليك انك مومقصر ابدا وكمان تسدد له الفاتورة ؟؟
احس ان خطيبتك فى احد وازها يعنى معبيلها راسها او انها تقلد صديقاتها او قريبااتها صدقنى الحل بسيط جدا وزى ماهى كلمتك بصراحة انت بعد كلمها بصراحة وقول لها ما عندى وايام وتنتسى المشكلة المشكلة ان بعض البنات لازم تحس ان الرجل هو فقط عشان يصرف عليها ! |
السلام عليكم ورحمة الله وبركاته قبل ارد على الاخ صاحب الموضوع احب ان اعلق على كلام بعض الاخوات وردودهم ومن هم الاخت حرم المعلم اللي تقول بردها انا بصراحه استغرب من جراتها الزايده والخ الله يهديك اختي حرم المعلم اول شي هذي زوجته ومفروض ماتتكلمي عنها بهذي الطريقه امام زوجها حطي نفسك بموقفها هل ترضين وحده تسبك امام زوجك اعتقد والاكيد لا فرجاء من كل العضوات اللي بتضيف رد للاخوان تحط نفسها بالموقف قبل ان تجرح بالكلام فاتقن الله حتى بردودكن واسفه اذا قسيت بكلامي بالنسبه لردي على موضوع الاخ اول شي اخوي هذي زوجتك ومافيها شي لوطلبتك جوال ومصروف اولا هي حابه تتدلع عليك حابه تحس انو في شخص يلبي رغباتها وطلباتها هي اكيد والمصروف بنظري شي ضروري والمهر حتى لوانك معطيها مبلغ كبير مااعتقد بيكفي في هالزمن لانو كل شي غالي فراجع نفسك اخوي وهذي اولا واخيرا زوجتك وفي ذمتك ومجرد ان كتب العقد فهي في ذمتك وكل شي يخصها انت مسئول عنه سواء الاكل والشرب وغيره وحتى لوكانت في بيت ابوها هي الحين تنحرج تطلب من ابوها لانها بذمتك وانت مسول عنها فلاتكسر بخاطرها عشان اشياء بسيطه وتستطيع ان تدبر هذي الامور اجلس مع نفسك وحط ميزانيه لمصروفها بحيث انك ماتقصرمعها ولا تضغط على نفسك فوق الطاقه انا من رايي تفاجئها وتشتري لها الجهاز اللي تبيه وتكلمها وتقول بالنسبه للمصروف لاتشيلي هم انا تحت امرك انتي زوجتي ومافي شي يغلى عليك والله يوفقكم ويسهل عليكم
|
نحن عاداتنا الزوج ينزل راتب لزوجته وقت الملكه
بس زوجي ما كان يدفع فاتورة تيلفوني كنت ادفعها من مصروفي اللي يعطيني اياه لكن لو اموت ما اطلب منه شي...ما دام في بيت ابوي |
شوف خيو ...
زوجتك جاهله بطلبها لانها ما تسوى 4 شهور بس بتعطيها فيها 2000 .. لو انها مكاره كان قالت لك ابي الشيء الفلاني بس ميزانيتي ما تسمح ... ويكون مبلغه فوق 2000 عطها على هواها ... لان المرأه تحب الرجل الكريم ... هذا غير انها بتعتبره ..من ضمن حبك لها ... يعني لو عطيتها تحبها ... ولو ما عطيتها ما تحبها .. خيو .. الواضح انها شايله هم انها لو تزوجتك بكره انك بتعطيها مصروف ولا لا ... عشان كذا هي حابه تعلمك انه شيء مفروض عليك ... وتتعود عليه ... باختصار .. انت قول لها .. انك فاهمها وفاهم تفكيرها ... وانك عارف انها خايفه بكره ما تعطيها مصروف ... لكن عشمها بانك راح تعطيها لو صارت في بيتك.. وقول لها هذا ما يدل على الحب او غيره ... واخيرا وضح لها ضروفك ... وانك انت بحاجت الفلوس ازود منها والحياه تعاون ... اذا اقتنعت ولا عطها ... وبالعاده البنات يجون بالكلام الحلو ... ونصيحه لك قلل المكالمات لان ما وراها الا الطلبات ... ولا تخلي مثل هالمشاكل تكون حاجز بينكم |
اقتباس:
مشكوره أختي والله ماني مقصر معها حتى ما اخليها تكلمني اذا اتصلت , اعطيها بيزي وارجع ادق عليها علشان ما اصرف عليها بارك الله فيك |
اقتباس:
الله يخليك أختي , لكن المشكله ان الواحد ينصدم في أمور مو حاسب حسابها بارك الله فيك |
| الساعة الآن 07:52 PM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©